အခန်း ၃၉၃

အခန်း (၃၉၃) - အားဖြည့်မှုများ

“အဟွတ်...” ဗိုက်ဆာနေတဲ့အဖွဲ့ရဲ့ အဖွဲ့ဝင်တစ်ယောက်လည်း ဖြစ်တဲ့ စစ်ဆေးရေးမှုးက သူ့ဂုဏ်သိက္ခာကို ကယ်တင်ရန် ကြိုးစားသည့်အနေဖြင့် အရှက်ပြေ ချောင်းဟန့်လိုက်သည်။ “ဒါတွေက မင်းတို့ဆိုင်ရဲ့ ဆေးဖက်ဝင်ဟင်းလျာတွေလား။”

“ဟုတ်ပါတယ်။” လီကျင်းဝမ်သည် ချက်ချင်းဆိုသလို ရှေ့တက်လာကာ သူတို့ကို မိတ်ဆက်ပေးခဲ့သည်။ “ဒါက ဆံပင်ကျွတ်တာကို ကာကွယ်ပေးနိုင်တဲ့ ကြက်မည်းစွပ်ပြုတ်ပါ၊ ဒီနှမ်းရေညှိကိတ်ကတော့ အရွယ်မတိုင်ခင် ဆံပင်ဖြူခြင်းကို ထိရောက်စွာ ကုသပေးနိုင်ပါတယ်။ ဒါကတော့ အမျိုးသမီးတွေ ဓမ္မတာလာချိန်မှာ ဗိုက်အောင့်တာကို သက်သာစေတဲ့ ယိမူချောင်ကြက်ဥစွပ်ပြုတ်ဖြစ်ပြီး ဒါကတော့ အမျိုးသားတွေ သုတ်လွှတ်မြန်ဆန်ခြင်းကို ကုသပေးနိုင်စွမ်းရှိတဲ့ ရေနဂါးကျောရိုးစွပ်ပြုတ်ပါ၊ ဒါက မျိုးပွားနိုင်စွမ်းကို မြှင့်တင်ပေးတဲ့ ပင်လယ်ခရုဂျင်ဆင်းစွပ်ပြုတ်…

လီကျင်းဝမ်ရဲ့ မိတ်ဆက်စကားတွေကို နားထောင်ပြီး စစ်ဆေးရေးမှုးများသည် သူတို့ဟာ အရောင်းအဖွဲ့အစည်းတစ်ခုထဲကို မတော်တဆ ဝင်ရောက်သွားမိတာလားဟုပင် တွေးမိလုနီးပါး ဖြစ်သွားခဲ့ကြသည်။

ဆံပင်ကျွတ်ခြင်း၊ ဓမ္မတာလာချိန် နာကျင်ကိုက်ခဲမှု၊ သုတ်လွှတ်စောခြင်းနှင့် မျိုးပွားနိုင်စွမ်းကို မြှင့်တင်ပေးနိုင်ခြင်း အစရှိသော နာမည်များကို ကြည့်ရုံနှင့်ပင် ယုံကြည်စိတ်ချရပုံမပေါ်ဘူး။ တစ်စုံတစ်ဦးက သူတို့ကို တိုင်ကြားစာပို့တာ အံ့ဩစရာ မရှိတော့ပါဘူး။

အကယ်၍ သူတို့သာ ဤစကားများကို ရုတ်တရတ် ကြားလိုက်ရသောအခါတွင် ပထမဆုံး တုံ့ပြန်မှုမှာ ဤလူများသည် လူလိမ်များ ဖြစ်လိမ့်မည်ဟု တွေးထင်မိမှာ အမှန်ပါပဲ။

လီကျင်းဝမ်သည် အချိန်အတော်ကြာ စကားပြောခဲ့ပြီး နားထောင်နေသူ လူအနည်းငယ်ကို မသိစိတ်က ပြန်ကြည့်လိုက်မိသည်။ သူက “ခင်ဗျားတို့တွေ ဒါကို ရေးမမှတ်ဘူးလား” ဟု သံသယနဲ့ မေးခဲ့လေသည်။

“ငါ မှတ်စုတွေ ယူသွားမှာပါ။” ဒီဟင်းလျာတွေက အမှန်တကယ် အကျိုးသက်ရောက်မှု ရှိမရှိကို သူ တကယ်သိချင်မိသည်။

ရလဒ်အနေဖြင့် လူအများအပြားကို နေရာ၌ အုပ်စုနှစ်စုခွဲကာ တစ်အုပ်စုမှာ နမူနာယူရန် တာဝန်ရှိပြီး နောက်တစ်အုပ်စုမှာ လီကျင်းဝမ်၏ မိတ်ဆက်မှုများကို မှတ်တမ်းတင်ရန် တာဝန်ရှိသည်။

ဤလူအုပ်စုဟာ နမူနာများရယူပြီးနောက် ယဲ့ချီလျန့် ဖုန်းခေါ်ဆိုပေးထားသော လူများ နောက်ဆုံးတွင် ရောက်ရှိလာခဲ့သည်။

“ဝန်ကြီး” နမူနာယူသည့်အုပ်စု၏ တာဝန်ခံခေါင်းဆောင်သည် အဲဒီလူ ရောက်လာသည်ကို မြင်သောအခါ ထိတ်လန့်သွားခဲ့ကြသည်။

သူ ထိုသို့ခေါ်ဆိုလိုက်သည့် အခိုက်အတန့်တွင် လီကျင်းဝမ်နှင့် အတူရှိနေသော အခြားသူများသည်လည်း အံ့ဩထိတ်လန့်သွားခဲ့ကြသည်။ သူတို့သည် အခု ရောက်ရှိလာတဲ့လူကို အံ့အားသင့်သော အကြည့်တွေဖြင့် ကြည့်နေခဲ့ကြသည်။

အဆိုပါ ရောက်ရှိလာသောလူသည် အသက် လေးဆယ် သို့မဟုတ် ငါးဆယ်လောက်ရှိသည့် သက်လတ်ပိုင်းအရွယ် အမျိုးသားတစ်ဦး ဖြစ်လေသည်။ သူ့မှာ လေးထောင့်ဆန်သော မျက်နှာသွင်ပြင်ရှိပြီး အဆိုပါ မျက်နှာသွင်ပြင်က သူ့ကို ခက်ထန်သော အသွင်အပြင်ကို ပေးစွမ်းသည်။ သူ့မျက်နှာထား ခပ်တည်တည်ရှိနေသောအခါတွင် ၎င်းသည် သူ့ကို ပို၍ပင် ကြောက်ရွံ့လာစေသည်။

လီကျင်းဝမ်၏ အိတ်ကပ်ထဲမှာ ဝှက်ထားတဲ့ ကင်မရာကနေတဆင့် အရာအားလုံးကို မျက်မြင်တွေ့နေခဲ့ရတဲ့ စုယန်ယန်သည်လည်း အံ့ဩသွားခဲ့သည်။ ယဲ့ချီလျန့်တစ်ယောက် စစ်ဆေးရေးဌာနမှ ကျောင်းတုန်းက သူငယ်ချင်းလို့ ရည်ညွှန်းပြောဆိုတဲ့သူဟာ စစ်ဆေးရေးဌာနခေါင်းဆောင် ဖြစ်နေလိမ့်မည်ဟု သူမ မမျှော်လင့်ထားခဲ့ပါဘူး။

အဆိုပါ ပုဂ္ဂိုလ်ရောက်ရှိလာသည်နှင့် ဤလူများသည် အလုပ်ကို သေသေချာချာ လုပ်ကိုင်ကြတော့မည်။ ဘယ်သူ့မှ မဟုတ်တာ လုပ်ရဲတော့မှာလဲ။

“မင်းတို့တွေ…” ချင်ယန်က သူတို့ကို စူးစူးစိုက်စိုက်ကြည့်ရင်း “မင်းတို့ ဘာဖြစ်လို့ ဒီကိုရောက်နေတာလဲ” ဟု မေးလာခဲ့သည်။

ကျိုးယန်ပိုင်က ဒါကိုကြားတဲ့အခါ မျက်တောင် ပုတ်ခတ်ပုတ်ခတ် ဖြစ်သွားခဲ့သည်။ ဒီလူတွေဟာ တကယ်ပဲ သက်ဆိုင်ရာဌာနရဲ့ အဖွဲ့ဝင်တွေဖြစ်တယ်ဆိုတာ ချက်ချင်း နားလည်သဘောပေါက်သွားခဲ့သည်။

လူအနည်းစုသည် သူတို့ တစ်ယောက်ကိုတစ်ယောက် ကြည့်နေကြသည်။ “ကျွန်တော်တို့ ဒီစားသောက်ဆိုင်ရဲ့ ကျန်းမာရေးနှင့် ဘေးကင်းမှုကို စုံစမ်းစစ်ဆေးဖို့ တိုင်ကြားစာ တစ်စောင်ကို လက်ခံရရှိထားလို့ပါ။”

ချင်းယန်က မျက်မှောင်ကြုတ်ပြီး ဘာမှ မပြောသော်လည်း ကျိုးယန်ပိုင်က အချိန်ကောင်းတွင် ဝင်ပြောလာခဲ့ပါသည်၊ “ကျွန်တော်တို့ဆိုင်ရဲ့ ဆေးဖက်ဝင်ဟင်းလျာတွေမှာ တရုတ်ဆေးဖက်ဝင် ပါဝင်ပစ္စည်းအချို့ကို ထည့်သွင်းချက်ပြုတ်ပေးထားပါတယ်။ ဒါပေမယ့် ဒီဆေးဖက်ဝင် ပါဝင်ပစ္စည်းတွေက လူ့ခန္ဓာကိုယ်ကို အန္တရာယ်မရှိစေရုံသာမက စားသုံးသူတွေရဲ့ ခန္ဓာကိုယ် ကျန်းမာရေးကို ပိုမိုကောင်းမွန်လာစေပါတယ်။ ဒီစုံစမ်းစစ်ဆေးမှုအပြီးမှာ လူတိုင်းအား အမှန်တရားကို သက်သေပြနိုင်ပြီးတော့ ကျွန်တော်တို့ဆိုင်ဟာ အပြစ်ကင်းစင်ကြောင်း သက်သေပြပေးနိုင်လိမ့်မယ်လို့ မျှော်လင့်ပါတယ်။”

တကယ်တော့ ကျိုးယန်ပိုင်ရဲ့ စကားတွေက သူတို့ဆိုင်ရဲ့ သဘောထားကို အမှန်တကယ် ဖော်ပြနိုင်စွမ်းရှိပါသည်။ သူတို့ဟာ ဒီအဖြစ်အပျက်ကနေ အမှန်တရားကို ရှာဖွေချင်ပါသည်။ သူတို့ဟာ သန့်ရှင်းပြီး အမြတ်အစွန်းအတွက် စားသုံးသူတွေရဲ့ ကျန်းမာရေးကို ဘယ်သောအခါမှ မထိခိုက်စေခဲ့ပါ။

ချင်းယန်၏ မျက်နှာပေါ်ရှိ လေးနက်သော အမူအရာမှာ အနည်းငယ် ပြေလျော့သွားခဲ့သည်။ သူက ခေါင်းညိတ်ပြီး ကတိပေးခဲ့သည်၊ “ဒါပေါ့၊ စုံစမ်းစစ်ဆေးမှုတွေမှာ ဘာအမှားအယွင်းမှ မရှာတွေ့ဘူးဆိုရင် မင်းတို့ဆိုင်ရဲ့ နာမည်ကို ရှင်းလင်းဖို့ ငါတို့ကူညီပေးမယ်။”

“အားလုံးကို ကျေးဇူးတင်ပါတယ်။”

ချင်းယန်သည် ရောက်လာပြီး အမြန်ပြန်ထွက်သွားသည်။ သူထွက်သွားတော့ စစ်ဆေးရေးမှုးအနည်းငယ်သည်လည်း နောက်မှ လိုက်ပါသွားခဲ့ကြသည်။

ဆိုင်ထဲကလူတွေက သူတို့ထွက်သွားတာကိုကြည့်ရင်း စိတ်သက်သာရာရသွားသော်လည်း အနည်းငယ် စိတ်ပျက်သွားကြသည်။

သူတို့စားသောက်ဆိုင်ဟာ အကြောင်းပြချက်မရှိ အပြစ်တင်ခံရပြီး အပိတ်ခံလိုက်ရပါသည်။ သူတို့သည် နေ့လည်စာတွေကို ချက်ပြုတ်ပြီးစီးခါနီးပြီမို့ အကုန်လုံးကို လွှင့်ပစ်ရပေတော့မည်။

ကျိုးယန်ပိုင်ကလည်း ဒါကို ရှင်းရှင်းလင်းလင်း တွေးထားပေမယ့် ဆံပင်ကျွတ်တာကို ကာကွယ်ပေးနိုင်တယ်လို့ ပြောထားတဲ့ အာဟာရစွပ်ပြုတ် အတန်းလိုက်ကို စိုက်ကြည့်ရင်း သူ့မျက်လုံးတွေ တောက်ပလာခဲ့သည်။