အခန်း ၉၀၃
Vol. 86 Ch. 903
အခန်း (၉၀၃) ကြိုတင်ပြီး ထည့်ထားခဲ့တယ်
ခုနစ်ရောင်ခြယ် ပိုးပျံကောင်ကို ရရှိပြီးနောက်တွင်မူ ထန်ထျန်း စဉ်းစားနေခဲ့သည်က ပိုးပျံကောင် ကမ္ဘာမှတစ်ဆင့် မဟာကမ္ဘာကြီးကို ပုံတူကူးယူရန် ဖြစ်ပြီး ထိုမှတစ်ဆင့် အထက်သို့ ထပ်မံ တွက်ချက်ကာ ငါးမွေးသူ ၏ စိတ်ဆန္ဒကို ခန့်မှန်းရန် ဖြစ်သည်။
နောက်ပိုင်းတွင်မူ သူက ပိုးပျံကောင် ကမ္ဘာ၏ သက်တမ်းကို ဆွဲဆန့်နိုင်မည့် နည်းလမ်းကိုသာ အမြဲတမ်း စဉ်းစားနေခဲ့ပြီး ၎င်းကို မည်သို့လုပ်လျှင် ထာဝရ လည်ပတ်စေနိုင်မလဲဆိုသည့် နည်းလမ်းကို ရှာဖွေလိုခဲ့သည်။
သို့သော်လည်း ယွမ်ကျိုး၏ ဤစကားလုံးများကို ကြားပြီးနောက်တွင်မူ သူ၏ စမ်းသပ်မှု ဦးတည်ချက်က သွေဖည်မှုများ ဖြစ်ပေါ်နေခဲ့ကြောင်း ရုတ်တရက် သိရှိသွားခဲ့ရတော့၏။
မှန်ပေသည်၊ သူကိုယ်တိုင်ကတော့ ကမ္ဘာကြီး၏ သက်တမ်းနှင့် သက်ရှိ ၏ ရှင်သန်ခြင်းကို အလွန် ဂရုစိုက်မိသည်။
ဒါပေမဲ့ ငါးမွေးသူ ကတော့ အဲ့ဒီလိုမျိုး ဂရုစိုက်ချင်မှ စိုက်မှာလေ။
တကယ်လို့သာ ငါးမွေးသူ က ယွမ်ကျိုးလိုမျိုး ဝါသနာအရ သို့မဟုတ် ပျော်စရာ စိတ်ခံစားမှု တစ်ခုသက်သက်ဖြင့်သာ ဤကမ္ဘာကြီးကို ကြည့်ရှုနေခဲ့ခြင်း ဆိုလျှင်မူ ကမ္ဘာကြီးနှင့် သက်ရှိတို့ ၏ ရှင်သန်ခြင်းကို ထားလိုက်ပါဦး၊ သူမအနေဖြင့် ဗုံးတစ်လုံး ပစ်ထည့်ပြီး ကမ္ဘာကြီးတစ်ခုလုံး ပေါက်ကွဲသွားသည့် မီးရှူးမီးပန်းကို ထိုင်မကြည့်တာတင်ပဲ တကယ့်ကို ကံကောင်းလှပြီ ဖြစ်သည်။
ပြီးတော့ ထန်ထျန်းတွင် ခံစားချက်တစ်ခု ရှိနေခဲ့သည်၊ ငါးမွေးသူ က တကယ်တမ်းတော့ ယွမ်ကျိုးနှင့် ပိုပြီး တူညီနေနိုင်ချေ ရှိပေသည်။
ဖြစ်နိုင်တာကတော့ သူမက တကယ်ပဲ ကစားဖို့သက်သက်အတွက် ဖြစ်နေနိုင်၏။
ဤနေရာသို့ စဉ်းစားမိသည့်အခါ ထန်ထျန်း စိတ်ထဲတွင် အကြောင်းပြချက်မရှိဘဲ ဒေါသအနည်းငယ် ထွက်လာခဲ့ရသည်။
ဤမျှလောက် ကြီးမားလှသော ကမ္ဘာကြီးတစ်ခု၊ ရေတွက်၍မရနိုင်သော သက်ရှိများ၏ အသက်ရှင်သန်မှုနှင့် သေဆုံး ခြင်းတို့က တကယ်တမ်းတော့ သူမ ပျော်ရွှင်စရာ ရှာဖွေဖို့အတွက် အသုံးပြုတဲ့ အရာသက်သက်ပဲလား။
ဒါက အလွန်အမင်း ဝမ်းနည်းစရာ ကောင်းလွန်းလှပေသည်။
သို့သော်လည်း အရှေ့ က ပိုးပျံကောင် သေတ္တာကို ကြည့်ရင်း သူက ဤကိစ္စကို ပြန်လည် တွေးတော နားလည်သွားခဲ့ရပြန်သည်။
ပိုးပျံကောင် ကမ္ဘာ၊ ရေတွက်၍မရသော ပိုးပျံကောင်များ၏ အသက်ရှင်သန်မှုနှင့် သေဆုံး ခြင်းတို့က ယွမ်ကျိုး သို့မဟုတ် သူ့အတွက် ဆိုလျှင်လည်း ကစားရုံသက်သက်ပဲ မဟုတ်ပါလား။
ဤကိစ္စနှစ်ခုကြားတွင် မည်သည့် သဘောသဘာဝချင်း ကွဲပြားမှုမျှ မရှိပေ ။
ထန်ထျန်း မျက်လုံးကို မှိတ်လိုက်ပြီး အသက်ကို ပြင်းထန်စွာ ရှူသွင်းလိုက်မိသည်။
"ဒါဆို မင်းခံစားချက်အရ အပျော်ဆုံးအရာက ဘာလဲ"
ထန်ထျန်းက ယွမ်ကျိုးကို မေးလိုက်သည်။
ယွမ်ကျိုးက ထိုအချိန်တွင် ထန်ထျန်း၏ ဆိုလိုရင်းကို သိပ်ပြီး သဘောမပေါက်သေးသော်လည်း အမှန်အတိုင်းပင် ပြန် ဖြေရှာသည်။ "မရေရာတဲ့ ရလဒ်မျိုးပေါ့"
"ခုနစ်ရောင်ခြယ် ပိုးပျံကောင်ရဲ့ ပြောင်းလဲမှုက ကျပန်းဖြစ်ပေါ်တာ၊ ပိုးပျံကောင် သေတ္တာအပေါ် သက်ရောက်မှု ဖြစ်စေတာကလည်း ကျပန်းပဲလေ"
"အဲ့ဒီလိုမျိုး မရေရာမှုတွေကပဲ ကျွန်တော့်ကို နောက်ဆုံး ထွက်ပေါ်လာမယ့် ရလဒ်အပေါ် စိတ်ဝင်စားမှု ဖြစ်ပေါ်စေတာပေါ့"
ထန်ထျန်း ခေတ္တမျှ တွေးတောလိုက်မိသည်။
တကယ်လို့သာ ငါးမွေးသူ ၏ စိတ်နေစိတ်ထားကလည်း ယွမ်ကျိုးနှင့် တူညီနေခဲ့လျှင်မူ သူမအနေဖြင့် ကမ္ဘာကြီး၏ လည်ပတ်မှုအပေါ် ဝင် စွက်ဖက်တာမျိုး လုပ်မှာ မဟုတ်ပေ ။
ဒါပေမဲ့ သူမက အဲ့ဒီလိုမျိုး မဟုတ်ခဲ့ပေ။
ကမ္ဘာ့အရှင် ၏ တောင်းပန်မှုကို သူမဘက်က အတိုင်းအတာတစ်ခုအထိ တုံ့ပြန်မှု ပေးခဲ့ဖူးသည်။
နောက်ပိုင်းတွင်မူ သူကိုယ်တိုင် ဖန်ဆင်းရှင် ကောင်းကင်တိုင် ပေါ်ကနေ ခုန်ချခဲ့ပြီးနောက်တွင်လည်း သူမက သူ့ကို မဟာကမ္ဘာကြီးအတွင်းသို့ ပြန်လည် ခေါ်ဆောင်ပေးခဲ့ပြန်သည်။
ဒါကြောင့်မို့လို့ ငါးမွေးရတဲ့ ရည်ရွယ်ချက်က ဤကဲ့သို့ ဖြစ်ပေါ်လာမှာ မဟုတ်ချေ။
အနည်းဆုံးတော့ ရိုးရိုးရှင်းရှင်းကြီး မဟုတ်နိုင်ပေ ။
"ဒါဆို မင်း ပိုးပျံကောင် သေတ္တာရဲ့ လည်ပတ်မှုအပေါ် မင်းကိုယ်တိုင် ဝင် စွက်ဖက်ခဲ့ဖူးတာမျိုး ရှိလား"
ထန်ထျန်းက နောက်တစ်ကြိမ် ထပ်မံ မေးမြန်းလိုက်ပြန်သည်။
ယွမ်ကျိုးက တွေးတောလိုက်ပြီးမှ ပြောသည်။ "အဲ့ဒါလည်း ရှိတာပေါ့"
"တချို့အချိန်တွေမှာ ပိုးပျံကောင် ကမ္ဘာရဲ့ ဖွံ့ဖြိုးတိုးတက်မှုက အရမ်း စိတ်ဝင်စားဖို့ကောင်းနေရင် ကျွန်တော်ကိုယ်တိုင် ခုနစ်ရောင်ခြယ် ပိုးပျံကောင်ရဲ့ သဘာဝကို ထိန်းချုပ်ပြီး ကမ္ဘာကြီးကို ပိုပြီး စိတ်ဝင်စားဖို့ကောင်းအောင် လုပ်ပစ်လိုက်တာမျိုး ရှိတယ်"
"နောက်ပြီး တချို့အချိန်တွေကျရင် ကျွန်တော်က ပိုးပျံကောင် သေတ္တာထဲကို ထူးခြားတဲ့ ပစ္စည်းအချို့ တမင်တကာ ထည့်ပေးထားပြီး ခုနစ်ရောင်ခြယ် ပိုးပျံကောင်ကို ကိုယ်တိုင် လိုက်ရှာခိုင်းတတ်တယ်"
"တကယ်လို့ အဲ့ဒါကို ရှာမတွေ့ဘူး ဆိုရင်တော့ ကမ္ဘာကြီးက ပုံမှန်အတိုင်းပဲ ဆက်လက် ဖွံ့ဖြိုးတိုးတက်သွားမှာပေါ့"
"ဒါပေမဲ့ တကယ်လို့ အဲ့ဒီပစ္စည်းတွေကို ရှာတွေ့သွားခဲ့မယ် ဆိုရင်တော့ နောက်ထပ် စိတ်ဝင်စားဖို့ကောင်းတဲ့ ရလဒ်တစ်ခု ထပ်ပြီး ထွက်ပေါ်လာလိမ့်မယ်"
"အမှန်အတိုင်း ပြောရရင်တော့ ဘယ်လို နည်းလမ်းပဲဖြစ်ဖြစ် ပိုးပျံကောင် သေတ္တာရဲ့ စိတ်ဝင်စားစရာ အပိုင်းကို တိုးမြင့်ဖို့အတွက်ပါပဲ"
"ဘာလို့လဲဆိုတော့... ကျွန်တော်က တကယ်ပဲ ကစားရုံသက်သက်ပဲ ဟာကို..."
ထန်ထျန်း နောက်တစ်ကြိမ် တိတ်ဆိတ် သွားခဲ့ရပြန်သည်။
ခဏချင်းအတွင်းမှာပင် သူက ကိစ္စ အမြောက်အမြားကို စဉ်းစားမိသွားခဲ့သည်။
ငါးမွေးသူ က ဘယ်တုန်းကမှ သူ၏ အတွေးနှင့် သူ၏ အပြုအမူကို ဝင် စွက်ဖက်ခဲ့ခြင်း မရှိပေ ။
ဒါပေမဲ့ သူမက ကိစ္စနှစ်ခုကိုတော့ လုပ်ဆောင်ခဲ့ဖူးသည်။
တစ်ခုကတော့ ကောင်းကင်ဝါးမြိုနတ်ဆိုး ကို စနစ်တစ်ခုအဖြစ် ပြောင်းလဲပြီး သူ့ခန္ဓာကိုယ်ပေါ်တွင် ထည့်သွင်းပေးခဲ့ခြင်း ဖြစ်သည်။
အခြား တစ်ခုကတော့ သူ့ကို မဟာကမ္ဘာကြီးအတွင်းသို့ ပြန်လည် ခေါ်ဆောင်လာခဲ့ခြင်း ဖြစ်၏။
မဟာကမ္ဘာကြီးအတွင်းသို့ ပြန်လည် ခေါ်ဆောင်လာခြင်းကို နားလည်ရ လွယ်ကူလှပေသည်၊ အဘယ်ကြောင့်ဆိုသော် တကယ်လို့သာ သူ့ကို ပြန်မခေါ်လာခဲ့လျှင် ဤကမ္ဘာကြီး၏ ရလဒ်က လုံးဝ ဥဿုံ သတ်မှတ်ပြီးသား ဖြစ်သွားပေလိမ့်မည်၊ သူ ရှိနေမှသာ ပြောင်းလဲခြင်း အလှည့်အပြောင်းများ ရှိလာနိုင်မည် ဖြစ်၏။
ပြီးတော့ ကောင်းကင်ဝါးမြိုနတ်ဆိုး ကို စနစ်အဖြစ် ပြောင်းလဲပေးခဲ့ခြင်းကလည်း...
တကယ်တမ်းတော့ ၎င်းကိုလည်း ပြောင်းလဲခြင်း အလှည့်အပြောင်းတစ်ခုအဖြစ် နားလည်၍ ရပေသည်။
တကယ်လို့သာ ထန်ထျန်းက စနစ်၏ စွမ်းအားကို သေသေချာချာ အသုံးမချဘဲ လျင်မြန်စွာ မကြီးထွားခဲ့လျှင် သို့မဟုတ် ချင်းယွဲ့ဂိုဏ်း၏ ဂိုဏ်းချုပ် ဖြစ်လာစဉ်ကတည်းက စည်းစိမ်ခံစားပြီး အေးအေးလူလူ ပျော်ပျော်ပါးပါး နေထိုင်ရန် ရွေးချယ်ခဲ့မည် ဆိုပါက ကမ္ဘာကြီးက အခြားသော ရလဒ်တစ်ခုဆီသို့ ဦးတည်သွားပေလိမ့်မည်။
သို့မဟုတ် ထန်ထျန်းက သူ့ကိုယ်သူ စောစီးစွာ ထုတ်ဖော်ပြသမိပြီး မပြစ်မှားသင့်သည့် လူကို သွားရောက် ပြစ်မှားမိကာ နေရာတင် အသက်ပျောက်သွားခဲ့လျှင်လည်း မတူညီသည့် ရလဒ်တစ်ခု ဖြစ်ပေါ်လာပေလိမ့်မည်။
အချုပ်ဆိုရသော် ပြောင်းလဲခြင်း အလှည့်အပြောင်းများဖြင့် ပြည့်နှက်နေခဲ့သည်။
ဤအချက်ကို အထက်က ပြောဆိုချက်များနှင့် ပေါင်းစပ်လိုက်လျှင်မူ စိတ်ဝင်စားစရာ အပိုင်းကို တိုးမြင့်လိုက်ခြင်းဟုလည်း နားလည်၍ ရပေသည်။
ဒါဆိုရင်... အခြားသော ပြောင်းလဲခြင်း အလှည့်အပြောင်းများ ရှိနေသေးတာလား။
ထန်ထျန်းတွင် ပြင်းထန်လှသော သာမန်ထက်ထူးခြားသည့် အာရုံတစ်ခု ရှိနေခဲ့သည်။
သေချာပေါက် ရှိနေသေးတယ်ဆိုတာပဲ။
ပြီးတော့ ဖြစ်နိုင်ခြေ အလွန် မြင့်မားသည်က ၎င်းက ကြိုတင်ပြီး ထည့်ထားခဲ့တဲ့ ပစ္စည်းတစ်ခု ဖြစ်နိုင်ပြီး သူကိုယ်တိုင် ရှာဖွေနိုင်မလားဆိုတာကိုပဲ စောင့်ကြည့်နေခြင်း ဖြစ်ရပေမည်။
ထိုအချိန်တွင် ထန်ထျန်းက ကမ္ဘာ့အရှင် ယခင်က ပြောခဲ့ဖူးသည့် စကားတစ်ခွန်းကို ပြန်လည် သတိရမိသွားခဲ့ပြန်သည်။
"မင်း သေချာပေါက် လုပ်နိုင်မှာပါ"
"မင်း ရှာတွေ့နိုင်သရွေ့ပေါ့"
ဤနေရာသို့ စဉ်းစားမိသည့်အခါ ထန်ထျန်း အသက်ကို အရှည်ကြီး ရှူထုတ်လိုက်မိပြီး နောက်တစ်ကြိမ် မျက်လုံးကို ပြန်မှိတ်လိုက်ပြန်သည်။
ရှုပ်ထွေးလှသော အတွေးပေါင်း အမြောက်အမြားက သူ့ဦးနှောက်အတွင်း၌ အပြန်အလှန် လှည့်ပတ်နေခဲ့ကြပြီး နောက်ဆုံးတွင်မူ တစ်ခုတည်းအဖြစ် ပေါင်းစည်းသွားခဲ့ရတော့၏။
မဟာကမ္ဘာကြီးက ပိုးပျံကောင် သေတ္တာနှင့် မတူညီပေ ။
ငါးမွေးသူ ကလည်း ယွမ်ကျိုးနှင့် မတူညီပေ ။
ယွမ်ကျိုးနှင့် နှိုင်းယှဉ်လိုက်လျှင်မူ ငါးမွေးသူက သေချာပေါက် ပိုမို ရှုပ်ထွေးလှသလို နားလည်ရ ပိုခက်ခဲပြီး ခန့်မှန်းရလည်း ခက်ခဲလှပေသည်။
သို့သော်ငြားလည်း နှစ်ဦးကြားတွင် တူညီလှသော အချက်အချို့တော့ ရှိနေဆဲပင် ဖြစ်၏။
ကမ္ဘာ့အရှင် လုပ်ဆောင်ခဲ့ဖူးသည့် ကိစ္စများ၊ ကမ္ဘာကြီး၏ ဖွံ့ဖြိုးတိုးတက်မှု၊ ပြီးတော့ သူကိုယ်တိုင် ကြုံတွေ့ခဲ့ရသည့် အခြေအနေအမျိုးမျိုးကို ပေါင်းစပ်လိုက်သည့် အခါတွင်မူ ကမ္ဘာ့အရှင် ၏ စကား ဖြစ်သော "အရာအားလုံးကို ပြောင်းလဲပစ်နိုင်တဲ့ စွမ်းအား" ဆိုသည်မှာ အမှန်တကယ် တည်ရှိနေသည့် အရာတစ်ခု ဖြစ်ကြောင်း ထန်ထျန်း ဖြည်းဖြည်းချင်း စတင် ယုံကြည်လာခဲ့ရတော့သည်။
ပြီးတော့ ဤအရာက ငါးမွေးသူ ဘက်က ကြိုတင်ပြီး ထည့်ထားခဲ့တာ ဖြစ်ဖို့ ရာခိုင်နှုန်း အလွန် မြင့်မားလှပြီး သူကိုယ်တိုင် ၎င်းကို ရှာဖွေတွေ့ရှိနိုင်မလား ဆိုတာကိုပဲ ကြည့်ရမည် ဖြစ်၏။
ဒါပေမဲ့ ဤအရာက တကယ်တမ်း ဘယ်နေရာမှာ ရှိနေတာလဲ။
ထန်ထျန်းက အဆက်မပြတ် တွေး နေခဲ့မိပြီး ဖြစ်နိုင်ခြေ ရှိသည့် နေရာတိုင်းက သူ့ဦးနှောက်အတွင်း၌ တစ်ခုပြီးတစ်ခု ပေါ်လာခဲ့သည်။
သို့သော်လည်း မကြာမီမှာပင် ၎င်းတို့ကို တစ်ခုပြီးတစ်ခု ပြန်လည် ငြင်းပယ်လိုက်မိပြန်သည်။
အရာအားလုံးကို ပြောင်းလဲပစ်နိုင်သည့် စွမ်းအားက တကယ်တမ်း မည်သည့်ပုံစံမျိုးဖြင့် မည်သည့်နေရာတွင် တည်ရှိနေနိုင်မည်နည်း...
"စီနီယာကြီး..."
"စီနီယာကြီး..."
အတော်ကြာပြီးနောက် ထန်ထျန်း၏ အတွေးများက အပြင်ဘက်က ထွက်ပေါ်လာသော အသံကြောင့် ပြန်လည် နိုးထလာခဲ့ရသည်။
၎င်းက ယွမ်ကျိုးပင် ဖြစ်၏။
သူက ထန်ထျန်းတစ်ယောက် ဤစကားလုံးများကို ကြားပြီးနောက်တွင် အချိန်အတော်ကြာ ကြောင်အမ်းငေးမောနေသည်ကို မြင်ရသဖြင့် မနေနိုင်ဘဲ လှမ်းနှိုးလိုက်ခြင်း ဖြစ်သည်။
"စီနီယာကြီး... အခြား ညွှန်ကြားစရာများ ရှိပါသေးသလား"
ယွမ်ကျိုးက ကြောက်ကြောက်လန့်လန့်ဖြင့် တိုးတိုးလေး မေးလိုက်သည်။
ထန်ထျန်း ခေတ္တမျှ စဉ်းစားလိုက်ပြီးမှ ခေါင်းခါပြလိုက်သည်။
ဘာမှ မရှိတော့ပေ ၊ ခရစ်စတယ် သေတ္တာက သူ့ဘာသာသူ ဘာကိုမျှ ကိုယ်စားမပြုနိုင်သော်လည်း ငါးမွေးသူ ကြိုတင်ပြီး ထည့်ထားခဲ့သည့် ထိုပစ္စည်းကသာ အရေးအကြီးဆုံးသော သော့ချက် ဖြစ်ပေသည်။
သူက ၎င်းကို ရှာဖွေတွေ့ရှိမှသာ အရာအားလုံး၏ ရလဒ်ကို ပြန်လည် ပြင် ရေး နိုင်မည် ဖြစ်၏။
"အော်... ဒါနဲ့၊ နောက်ထပ် ကိစ္စတစ်ခု ရှိသေးတယ်"
ထန်ထျန်းက ဘေးနားက ကျူးကျစ်ယန်ကို တစ်ချက် လှမ်းကြည့်လိုက်ရင်း ပြောသည်။ "ငါ လူတစ်ယောက်ရဲ့ သတင်းကို စုံစမ်းချင်လို့"
"ကျူးကျိယွီ"
"လွန်ခဲ့တဲ့ တစ်နှစ်လောက်က ထင်တယ်၊ သူက မွေးရာပါ မျိုးစေ့ အဆင့်အတန်းနဲ့ မြင့်မြတ်နန်းတော်ဆီကို ခေါ်ဆောင်ခံခဲ့ရတာ"
ဤမေးခွန်းကို ကြားလိုက်ရသည့်အခါ ကျူးကျစ်ယန်တစ်ယောက် ချက်ချင်းပင် စိတ်လှုပ်ရှားသွားခဲ့ရပြီး မျက်ဝန်းအစုံတွင် မျှော်လင့်ချက်များဖြင့် ပြည့်နှက်သွားခဲ့ရတော့သည်။
ယွမ်ကျိုးကမူ ခေတ္တမျှ တွေး လိုက်ပြီးနောက် ဖြည်းဖြည်းချင်း ပြောလာခဲ့သည်။ "ဒီမွေးရာပါ မျိုးစေ့နဲ့ ပတ်သက်ပြီးတော့ ကျွန်တော့်မှာ အနည်းငယ် မှတ်မိတာ ရှိပါတယ်"
"သူ့ရဲ့ ကျင့်ကြံခြင်း ပါရမီက အရမ်း ကောင်းမွန်လွန်းတယ်၊ နှစ်ပေါင်း ထောင်ချီမှ တစ်ယောက် ပေါ်ထွန်းတတ်တဲ့ အမျိုးအစားထဲကပဲ"
"အထက်လူကြီးတွေက ဒီလိုအဆင့်မျိုးရှိတဲ့ ပါရမီရှင်ကို အရမ်း ဂရုစိုက်ကြတယ်"
"ဒါကြောင့်မို့လို့ ဘာမှ အဆင်မပြေတာမျိုး မရှိဘူး ဆိုရင်တော့..."
"သူက အခုအချိန်မှာ ယန်ကွမ်းမြို့ဆီကို ရောက်ရှိနေလောက်ပါပြီ"