အခန်း ၉၀၄
Vol. 87 Ch. 904
အခန်း (၉၀၄) အတွေး တွေ ဖုံးကွယ်မထားနိုင်တော့ဘူး
မြင့်မြတ်နန်းတော် အတွင်းပိုင်းရဲ့ စည်းမျဉ်းတွေက တကယ့်ကို အလွန်အမင်း တင်းကြပ်လှပေသည်။
ယွမ်ကျိုးက မြင့်မြတ်နန်းတော်ရဲ့ အထွေထွေတာဝန်ခံတွေထဲက တစ်ယောက် ဖြစ်သော်လည်း သူကိုယ်တိုင်လည်း ကျူးကျိယွီရဲ့ တိကျတဲ့ တည်နေရာကို အသေအချာ မပြောနိုင်ပေ။
သူက မွေးရာပါ မျိုးစေ့တွေကို စီမံ ရတဲ့ တာဝန်ခံ မဟုတ်ခဲ့ပေ။
သို့သော်လည်း သူ့ရဲ့ ပြောပြချက်အရဆိုလျှင်မူ ကျူးကျိယွီလိုမျိုး ထူးချွန်ထက်မြက်တဲ့ ပါရမီရှင်အဆင့်က ပုံမှန်အခြေအနေအရ မြင့်မြတ်နန်းတော်ဆီ ရောက်ရှိပြီး နှစ်လခန့်အကြာမှာ ယန်ကွမ်းမြို့လို့ ခေါ်တဲ့ မြို့တစ်မြို့ဆီကို သွားရောက်ရမှာ ဖြစ်ပေသည်။
ထိုယန်ကွမ်းမြို့ကတော့ နေ၊ လနဲ့ ကြယ် တွေ တကယ်တမ်း တည်ရှိနေတဲ့ ကမ္ဘာဆီကို သွားရာ ဝင်ပေါက် ဖြစ်၏။
ထိုကမ္ဘာကြီးကိုတော့ အခုအချိန်မှာ "အလင်း ကမ္ဘာ" လို့ ခေါ်ဆိုကြသည်။
"ဒါဆို ယန်ကွမ်းမြို့ကို သွားပြီးတဲ့နောက်မှာ အခြား မမျှော်လင့်ထားတဲ့ မတော်တဆမှုမျိုးတွေ ဖြစ်ပေါ်လာနိုင်ချေ ရှိသေးလား"
ထန်ထျန်းက ဆက်လက် မေးမြန်းလိုက်သည်။
ယွမ်ကျိုးက ဖြည်းဖြည်းချင်း ခေါင်းခါပြလိုက်၏။
"မဖြစ်နိုင်လောက်ပါဘူး"
"မွေးရာပါ မျိုးစေ့တွေက တင်းတင်းကြပ်ကြပ် အကာအကွယ်ပေးခံထားရတဲ့ လူတွေလေ၊ အချိန်တိုင်းလိုလို မျက်စိဒေါက်ထောက် စောင့်ကြည့်ခံနေရတာ"
"ယန်ကွမ်းမြို့ကလည်း ကျွန်တော်တို့ ကိုယ်ပိုင်နယ်မြေပဲ၊ အခြေခံအားဖြင့်တော့ ဘာပြဿနာကြီးကြီးမားမားမှ ဖြစ်လာစရာ မရှိပါဘူး"
"ပြီးတော့ အလင်း ကမ္ဘာက..."
"စီနီယာကြီးလည်း သိထားသင့်ပါတယ်၊ အဲ့ဒါက ဘယ်လိုမျိုး ကမ္ဘာလဲဆိုတာ"
"အဲ့ဒီနေရာမှာတော့ ဘယ်သူကမှ ပြဿနာမရှာ ကြဘူးလေ"
သူက စမ်းသပ်သည့်သဘောဖြင့် ပြောလိုက်ခြင်း ဖြစ်သည်။
ထန်ထျန်းက သူ့ကိုတစ်ချက် လှမ်းကြည့်လိုက်သော်လည်း ဤမေးခွန်းကို ပြန်လည် မဖြေကြားခဲ့ပေ။
တကယ်လို့သာ အလင်း ကမ္ဘာက တကယ်ပဲ ကျွင်းချန်ချင်း တည်ဆောက်ထားခဲ့တဲ့ ကမ္ဘာသစ် ဆိုလျှင်မူ ထိုနေရာမှာ ဘယ်သူမှ ပြဿနာမရှာ နိုင်တာ အမှန်ပင် ဖြစ်ပေလိမ့်မည်။
ဒါပေမဲ့ ကျူးကျိယွီကတော့ တကယ်ပဲ ကိစ္စတစ်ခုခု ကြုံတွေ့နေရပြီ ဖြစ်သည်။
ဒီကိစ္စနဲ့ ပတ်သက်ပြီးတော့ ယွမ်ကျိုးက သူကိုယ်တိုင်လည်း အခုအချိန်မှာ တစ်ဝက်တစ်ပျက် အနားယူနေတဲ့ အခြေအနေ ဖြစ်နေလို့ အကူအညီအကြီးကြီး မပေးနိုင်တာကို ဖော်ပြလာသည်။
ဒါပေမဲ့ တကယ်လို့ ကျူးကျစ်ယန်က သေသေချာချာ စုံစမ်းစစ်ဆေးချင်တယ် ဆိုရင်တော့ မြင့်မြတ်နန်းတော်အတွင်းပိုင်းမှာ သူ နည်းနည်းပါးပါး စီစဉ်ပေးနိုင်ပြီး သူမအနေနဲ့ နောက်ထပ် ကံကြမ္မာ မျိုးစေ့ ဖြစ်လာဖို့ ပိုပြီး အဆင်ပြေချောမွေ့စေပြီး နောက် ယန်ကွမ်းမြို့ဆီ သွားရောက်နိုင်မယ့် အရည်အချင်း ရရှိအောင် လုပ်ပေးနိုင်ပေသည်။
" မိန်းကလေးကျစ်ယန်ရဲ့ ပါရမီအကြောင်းကိုလည်း ကျွန်တော် ကြားဖူးပါတယ်"
"နောက်ကျမှ ပွင့်တဲ့ပန်း၊ နောက်မှလိုက်ပေမဲ့ အရှေ့ကို ကျော်တက်သွားနိုင်တဲ့သူပေါ့"
"ကျူးကျိယွီလိုမျိုး ထူးချွန်ပြောင်မြောက်လှတာ မဟုတ်ပေမဲ့လည်း ကျွန်တော်တို့ အခုအချိန်မှာ လိုအပ်နေတဲ့ ပါရမီရှင် ရွေးချယ်စရာထဲက တစ်ယောက်ပါပဲ"
"ကျွန်တော် မိတ်ဆွေဟောင်းတချို့ကို နှုတ်ဆက် စကားပါးလိုက်ရင် မိန်းကလေးကျစ်ယန် ယန်ကွမ်းမြို့ကို သွားခွင့်ရဖို့က ပြဿနာ သိပ်မရှိနိုင်ပါဘူး"
"ဒါပေမဲ့ အတိအကျ ဘယ်လောက်အထိ ဝေးဝေးသွားနိုင်မလဲ၊ အလင်း ကမ္ဘာထဲကို အဆင်ပြေပြေ ဝင်ရောက်နိုင်မလား ဆိုတာကတော့ မိန်းကလေးကျစ်ယန် ကိုယ်တိုင်အပေါ်မှာပဲ မူတည်ပါလိမ့်မယ်"
ယွမ်ကျိုးက ပြောသည်။
ထန်ထျန်း ခေါင်းညိတ်လိုက်မိ၏။
ကျူးကျစ်ယန်ရဲ့ စိတ်ခံစားချက်ကတော့ အနည်းငယ် ကျ နေခဲ့ရသည်၊ သူမက နောက်ထပ် မျိုးစေ့ ဖြစ်လာပြီးတဲ့နောက်မှာ ကျူးကျိယွီရဲ့ တည်နေရာကို နောက်ဆုံးမှာ ရှာတွေ့နိုင်တော့မယ်လို့ ထင်မှတ်ထားခဲ့သော်လည်း အမှန်တကယ်တွင်မူ သူမ ထင်ထားတာထက် ပိုပြီး ခက်ခဲနေလိမ့်မည်ဟု မမျှော်လင့်ထားခဲ့ပေ။
ယန်ကွမ်းမြို့၊ အလင်း ကမ္ဘာ
တကယ်လို့သာ ကျူးကျိယွီက အဲ့ဒီနေရာမှာ တကယ်ပဲ ကိစ္စတစ်ခုခု ကြုံတွေ့ခဲ့ရတာ ဆိုလျှင်မူ သူ ဘယ်လိုမျိုး ကြောက်မက်ဖွယ်ရာ ကိစ္စနဲ့ ရင်ဆိုင်နေရလဲဆိုတာကို သူမအနေနဲ့ စိတ်ကူးတောင် မယဉ်ရဲတော့ပေ ။
"ဒါဆို ဒီကိစ္စကိုတော့ မင်းကိုပဲ အပ်လိုက်မယ်"
ထန်ထျန်းက ပြောလိုက်သည်။
ယွမ်ကျိုးက အလျင်အမြန်ပင် ကိုယ်ကိုညွတ်ကာ ပြောသည်။ "ကိစ္စသေးလေးတစ်ခုပါ၊ ကျွန်တော် အသေအချာ ကိုင်တွယ် ဖြေရှင်းပေးပါ့မယ်"
ထန်ထျန်းက အင်းဟု တစ်ချက် ဆိုလိုက်မိ၏။
ထို့နောက်တွင်မူ သူက အခန်းထဲက ပိုးပျံကောင် သေတ္တာကို နောက်ဆုံးတစ်ချက် လှမ်းကြည့်လိုက်ပြီး ဂျူးကျိယန်နဲ့ ရှောင်ယင်း နှစ်ယောက်ကို ခေါ်ဆောင်ကာ ဤနေရာကနေ ထွက်ခွာခဲ့တော့သည်။
သူက ထိုပိုးပျံကောင် သေတ္တာတွေကို ယူဆောင်သွားဖို့ မရွေးချယ်ခဲ့ပေ၊ ၎င်းတို့က သူ့အတွက် အသုံးဝင်မှု အများကြီး မရှိတော့တာကြောင့် ဖြစ်သည်။
တကယ်လို့ စမ်းသပ်မှုအချို့ လုပ် ချင်သေးတယ် ဆိုရင်တောင်မှ သူ့ဆီမှာ ရှိတဲ့ သေးငယ်တဲ့ ပိုးပျံကောင် ကမ္ဘာငယ်လေးက တင်ပဲ လုံလောက်နေပြီ ဖြစ်၏။
ထန်ထျန်းတို့အဖွဲ့ကို ပို့ဆောင်ပြီးတဲ့နောက်မှာမှ ယွမ်ကျိုးတစ်ယောက် သက်ပြင်း အရှည်ကြီး ချ လိုက်နိုင်တော့သည်။
ထိုကဲ့သို့ ကြောက်မက်ဖွယ်ကောင်းလှတဲ့ ဖိနှိပ်မှု အရှိန်အဝါမျိုးကို သူက အလင်း ကမ္ဘာက ထိပ်တန်းခေါင်းဆောင်ကြီးတွေရဲ့ ခန္ဓာကိုယ်ပေါ်မှာတောင် တစ်ခါမှ မခံစားဖူးခဲ့ပေ ။
ဒီလို တည်ရှိမှုမျိုးက တကယ်တမ်း ဘယ်နေရာကနေ ရောက်ရှိလာတာလဲ။
"ကယ်တင်ခြင်းမဟာမိတ်လား၊ ဒါမှမဟုတ် ရှေးဟောင်း မြင့်မြတ် နယ်မြေလား"
ယွမ်ကျိုးက ခေါင်းခါလိုက်ပြီး သူ့ဘာသာသူ ရေရွတ်လိုက်မိသည်။ "အဲ့ဒီ အင်အားစုနှစ်ခုက ငါ တို့နဲ့ ရေနဲ့မီးလိုပဲ၊ သေချာပေါက် သူတို့ မဟုတ်နိုင်ဘူး"
"ဒါဆိုရင်... တံခါးပိတ်ကျင့်ကြံ တဲ့ ပြိုင်ဘက်ကင်း တစ်ယောက်ယောက်လား"
"ထားလိုက်ပါတော့လေ၊ အဲ့ဒီအဆင့်မျိုးက ငါ့လို လူမမည်လေးတစ်ယောက် ဝင် ပတ်သက်နိုင်တဲ့ တည်ရှိမှုမျိုး မဟုတ်ဘူး"
"ကောင်းကင် ပြိုရင် အရပ် မြင့်တဲ့သူတွေ ခံရမှာပဲ၊ ပြီးတော့ ငါတို့ဆီမှာ ပြိုင်ဘက်ကင်း ကောင်းကင်ဧကရာဇ် ရှိနေသေးတာပဲဥစ္စာ"
"ငါကတော့ အေးအေးလူလူ နေပြီး အလင်းကမ္ဘာ နောက်ဆုံး ပွင့်လာမယ့် အချိန်ကိုပဲ စောင့်ဆိုင်းရုံပေါ့"
"ဒီနှစ်ပေါင်း ရာချီအတွင်းမှာ ငါ့ရဲ့ လုပ်ဆောင်ချက်တွေက လုံလောက်နေပါပြီ..."
တစ်ယောက်တည်း တိုးတိုးရေရွတ်ရင်း ယွမ်ကျိုးက လှည့်ပြန်ကာ သူ့ရဲ့ အိမ်ခြံဝင်း လေးထဲဆီသို့ ပြန် ဝင်သွားခဲ့တော့သည်။
.....
စားသောက်ဆိုင် ရဲ့ ခြံဝင်း လေးအတွင်းမှာတော့ ထန်ထျန်း၊ ကျူးကျစ်ယန်၊ ရှောင်ယင် သုံးယောက်လုံးက မိုးမခ ပင်ကြီးအောက်မှာ ထိုင်ရင်း အသီးသီး တိတ်ဆိတ်နေခဲ့ကြသည်။
မြင့်မြတ်နန်းတော်ဆီ သွားခဲ့တဲ့ ခရီးစဉ်က ထန်ထျန်းအနေနဲ့ မူလက စိတ်အပန်းဖြေဖို့ သက်သက်သာ ရည်ရွယ်ခဲ့ခြင်း ဖြစ်သော်လည်း ရလဒ်အနေဖြင့် ကောက်ရိုးပုံထဲက အပ်ရှာသလိုမျိုး တကယ်ပဲ အကျိုးအမြတ်အချို့ ရရှိခဲ့လိမ့်မည်ဟု မထင်မှတ်ထားခဲ့ပေ။
သူ့ရဲ့ ယခင် လမ်းကြောင်းက သွေဖည်မှု ဖြစ်ပေါ်နေခဲ့ကြောင်း သူ ရှာဖွေတွေ့ရှိခဲ့ရသလို ငါးမွေးသူရဲ့ စိတ်ဆန္ဒနဲ့ အပြုအမူတွေအပေါ်မှာလည်း ပိုမိုများပြားတဲ့ ခန့်မှန်းချက်တွေ ရရှိခဲ့ရသည်။
ဒဏ္ဍာရီထဲက အရာအားလုံးကို ပြောင်းလဲပစ်နိုင်တဲ့ စွမ်းအားက အမှန်တကယ် တည်ရှိနေတဲ့ အရာတစ်ခု ဖြစ်ပြီး ၎င်းကို ငါးမွေးသူဘက်က ကမ္ဘာကြီးအတွင်းမှာ စောစောစီးစီးကတည်းက ကြိုတင်ထည့်ထားခဲ့တာ ဖြစ်ကြောင်း အခြေခံအားဖြင့် အတည်ပြုနိုင်ခဲ့ပြီ ဖြစ်၏။
ဒါပေမဲ့ နောက်ထပ် အကျပ်အတည်းအသစ်တစ်ခုက ထပ်မံ ပေါ်ပေါက်လာခဲ့ပြန်သည်။
ထိုအရာက တကယ်တမ်း ဘယ်နေရာမှာ ရှိနေတာလဲ။
ထန်ထျန်းက ဖြစ်နိုင်ခြေ ရှိနိုင်မယ့် နေရာအားလုံးကို တွေး နေခဲ့မိသော်လည်း နောက်ဆုံးတွင်မူ အားလုံးကို တစ်ခုပြီးတစ်ခု ပြန်လည် ပယ်လိုက်မိပြန်သည်။
အဘယ်ကြောင့်ဆိုသော် တကယ်လို့သာ ထိုနေရာတွေမှာ ရှိနေခဲ့လျှင် အခုအချိန်အထိ ဘယ်သူမှ ရှာမတွေ့ဘဲ နေမှာ မဟုတ်တာကြောင့် ဖြစ်၏။
အခြား ဒုတိယ ကိစ္စတစ်ခုကတော့ မြင့်မြတ်နန်းတော်က ကျွင်းချန်ချင်း ဖန်တီးထားခဲ့တဲ့ အရာ ဖြစ်ကြောင်း အတည်ပြုနိုင်ခဲ့ခြင်း ဖြစ်သည်။
သူတို့က တစ်ကမ္ဘာလုံး အတိုင်းအတာနဲ့ ပါရမီရှင်တွေကို စုဆောင်းကြပြီး ထိုမှတစ်ဆင့် ထပ်ခါတလဲလဲ စမ်းသပ်မှုတွေ ပြုလုပ်ကာ ကမ္ဘာသစ်အတွင်းသို့ ပို့ဆောင်ပေးခြင်းဖြင့် ကမ္ဘာ့သက်ရှိအားလုံးအတွက် အနာဂတ် မျိုးစေ့တွေကို ချန်ထားခဲ့ကြခြင်း ဖြစ်ပေသည်။
၎င်းကတော့ ယွမ်ကျိုးရဲ့ နှုတ်ကထွက်တဲ့ အလင်းကမ္ဘာပင် ဖြစ်၏။
ဒီလိုမျိုး ရွေးချယ်မှု စံနှုန်းနဲ့ ပတ်သက်ပြီးတော့ ထန်ထျန်းဘက်ကလည်း ဘာမှ ပြောစရာ မရှိချေ၊ ရိုးရှင်းပြီး ကြမ်းတမ်းလှသော်လည်း ထိရောက်မှု ရှိပေသည်။
တတိယ ကိစ္စကတော့ ကျူးကျိယွီနဲ့ သက်ဆိုင်နေခဲ့သည်။
ကိစ္စရဲ့ ခက်ခဲမှုက ကျူးကျစ်ယန် မျှော်လင့်ထားတာထက် နောက်တစ်ကြိမ် ထပ်မံ ကျော်လွန်သွားခဲ့ရပြန်သည်။
သူမအနေနဲ့ ယန်ကွမ်းမြို့ဆီ သွားရောက်မှသာ ကျူးကျိယွီရဲ့ သတင်းကို အမှန်တကယ် စုံစမ်းရရှိနိုင်မည့် ဖြစ်နိုင်ချေ ရှိပေလိမ့်မည်။
ဒါပေမဲ့ ကျူးကျိယွီဘက်က အကူအညီတောင်းတဲ့ သတင်းစကား ပေးပို့ခဲ့တာ လွန်ခဲ့တဲ့ တစ်နှစ်ကတည်းက ဖြစ်နေခဲ့ပြီမို့ သူ အခုအချိန်မှာ ဘယ်လို အခြေအနေမျိုးနဲ့ ကြုံတွေ့နေရလဲဆိုတာကို ဘယ်သူမှ မသိနိုင်ကြပေ ။
ကျူးကျစ်ယန်အနေနဲ့ ကျောက်စိမ်းပြားရဲ့ သတင်းအချက်အလက်အရ ကျူးကျိယွီ အသက်ရှင်နေသေးတယ်ဆိုတာကိုပဲ သတ်မှတ်နိုင်ပြီး ကျန်တဲ့အရာတွေကိုတော့ လုံးဝ မသိရှိရပေ ။
အချိန်အတော်ကြာ တိတ်ဆိတ်သွားပြီးနောက်မှာတော့ ရှောင်ယင်က နောက်ဆုံးတွင် မအောင့်နိုင်တော့ဘဲ ကျူးကျစ်ယန်ရဲ့ လက်ကို ညင်သာစွာ ဆုပ်ကိုင်လိုက်ရင်း တိုးတိုးလေး ပြောရှာသည်။ "သခင်မလေး... ဘာမှမဖြစ်ပါဘူး"
"သခင်လေးကျိယွီက မွေးရာပါ ကံကောင်းခြင်းတွေ ရှိတဲ့သူပဲ၊ သူ သေချာပေါက် ဘေးအန္တရာယ်ကနေ ရုန်းထွက်နိုင်မှာပါ"
ကျူးကျစ်ယန်က သက်ပြင်းတစ်ချက် ညင်သာစွာ ချလိုက်မိပြီး ပြန်လည် မဖြေဘဲ ဘေးနားက ထန်ထျန်းကို လှမ်းကြည့်လိုက်သည်။
"ဒီတစ်ခေါက် မြင့်မြတ်နန်းတော် ခရီးစဉ်မှာ အစ်ကို ကော အကျိုးအမြတ် ရရှိခဲ့ရဲ့လား"
ထန်ထျန်းက ဖြည်းဖြည်းချင်း ခေါင်းညိတ်ပြလိုက်သည်။
"အင်း... အခြား တွေးခေါ်မှုပုံစံအချို့ ရခဲ့ပါတယ်"
ကျူးကျစ်ယန်က ပြောသည်။ "ဒါဆိုရင်တော့ ကောင်းတာပေါ့"
"နောက်ထပ် လာမယ့် အချိန်ကာလအပိုင်းအခြားမှာတော့... ကျွန်မ ယန်ကွမ်းမြို့ကို သွားခွင့်ရဖို့အတွက်ပဲ အာရုံစိုက်ရတော့မယ် ထင်တယ်၊ ဘာကိစ္စကြီးကြီးမားမားမှ မရှိရင် ဒီနေရာကို ပြန်လာဖြစ်တော့မှာ မဟုတ်ဘူး"
"တကယ်လို့ အစ်ကို မှာ အခြား လိုအပ်တာမျိုး ရှိရင်လည်း ကျွန်မကို အချိန်မရွေး ဆက်သွယ်နိုင်ပါတယ်"
ထန်ထျန်းက အင်းဟု ဆိုလိုက်၏။ "ရပါတယ်၊ မင်းရဲ့ ကိစ္စကိုပဲ သေသေချာချာ လုပ်ပါ"
"ရှောင်ယင်က ငါ့ဘေးနားမှာ ရှိနေတာပဲ၊ မင်း ဘာမှ စိတ်ပူစရာ မလိုပါဘူး"
ကျူးကျစ်ယန်က လက်သီးဆုပ် ကာ ကျေးဇူးတင် စကားဆိုသည်။
ခဏအကြာတွင်တော့ ရှောင်ယင်ရဲ့ မျက်ရည်ဝိုင်းနေတဲ့ မျက်ဝန်းတွေအောက်မှာတင် ကျူးကျစ်ယန်က စားသောက် ဆိုင် ခြံဝင်း လေးကနေ နောက်တစ်ကြိမ် ထပ်မံ ထွက်သွားခဲ့ပြန်တော့သည်။
ခေတ္တမျှ ဆုံစည်းပြီးတဲ့နောက်မှာတော့ ဤနေရာတွင် ထန်ထျန်းနဲ့ ရှောင်ယင် နှစ်ယောက်တည်းသာ ကျန်ရှိတော့၏။
ထို့နောက်တွင်မူ စိတ်မကောင်းဖြစ်နေတဲ့ ရှောင်ယင်ကလည်း သူမရဲ့ အခန်းဆီသို့ ပြန်သွားခဲ့သည်၊ ဒီလအနည်းငယ်အတွင်းမှာပဲ သူမကလည်း ကျင့်ကြံခြင်းကို အလေ့အကျင့် ကောင်းတစ်ခုအဖြစ် ပျိုးထောင်ထားနိုင်ခဲ့ပြီ ဖြစ်သည်။
ထန်ထျန်းကတော့ မိုးမခ ပင်ကြီးအောက်မှာ ထိုင်နေဆဲပင် ဖြစ်ပြီး အရှေ့က ပိုးပျံကောင် သေတ္တာကို တိတ်ဆိတ်စွာ ကြည့်နေခဲ့မိသည်။
ရှုပ်ထွေးလှသော အတိတ်မှတ်ဉာဏ်ပေါင်း မြောက်မြားစွာက သူ့ရဲ့ ဦးနှောက်အတွင်း၌ လျင်မြန်စွာ ဖြတ်သန်း လှည့်ပတ်နေခဲ့ကြသည်။
ကမ္ဘာကူးပြောင်းလာစအချိန်ကတည်းကနေ တိမ်တိုက် ထျန်းဖူနန်းတော်ဆီသို့ ထိုမှတစ်ဆင့် ထိုက်ယိ မြင့်မြတ် နယ်မြေဆီသို့ ထို့နောက် ဖန်ဆင်းရှင် ကောင်းကင်တိုင်ဆီသို့။
လုချန်းကျီ၊ လုံကျိုကျိုး၊ လနတ်သမီး ၊ နေနတ်ဘုရား၊ ကျွင်းချန်ချင်း၊ ကမ္ဘာ့အရှင်...
နောက်ဆုံးတွင်မူ ဖန်ဆင်းရှင် ကောင်းကင်တိုင်ပေါ်ကနေ မဟာကမ္ဘာကြီးဆီသို့ ပြန်လည် ရောက်ရှိလာခဲ့ပြီး ကျူးကျစ်ယန်၊ လင်းရင်တို့နဲ့ တွေ့ဆုံခဲ့ရသည်။
သူက ဘေးမှာ ထိုင် ကာ အေးအေးလူလူ နေဖို့ ရွေးချယ်ခဲ့ပြီးတဲ့နောက်မှာမှ ခုနစ်ရောင်ခြယ် ပိုးပျံကောင်နဲ့ ယွမ်ကျိုးတို့ ပေါ်ပေါက်လာခဲ့ခြင်း ဖြစ်၏။
အချိန် ဘယ်လောက်အထိ ကုန်ဆုံးသွားခဲ့မှန်း မသိရပြီးတဲ့နောက်မှာတော့ ထန်ထျန်းက ရုတ်တရက် ပြုံးလိုက်မိတော့သည်။
"ငါးမွေးသူ"
"မင်းရဲ့ အတွေး တွေကတော့ ဖုံးကွယ်မထားနိုင်တော့ဘူး ထင်တယ်နော်"
ပြောပြီးသည်နှင့် အနက်ရောင် ပုတီးစေ့တစ်လုံးက ထန်ထျန်းရဲ့ လက်ဖဝါးပေါ်တွင် ပေါ်လာခဲ့သည်။
၎င်းကတော့ ကမ္ဘာ့အရှင်ဘက်က ထန်ထျန်းကို လက်ဆောင်ပေးခဲ့တဲ့ ထူးခြားဆန်းပြားလှတဲ့ ပုတီးစေ့ပင် ဖြစ်၏။
ပုတီးစေ့အတွင်းမှာတော့ အရာနှစ်ခုသာ ရှိနေခဲ့သည်။
ကမ္ဘာ့အရှင်ရဲ့ ပုံတူပန်းချီကားနဲ့ သူ့ရဲ့ တကယ့် နာမည်ပင် ဖြစ်ပေတော့သည်။