အခန်း ၉၂၀
Vol. 88 Ch. 920
အခန်း (၉၂၀) ပြန်ပေးဆွဲခံရခြင်း
အလင်းကမ္ဘာမှ အကြီးအကဲ ၏ ရိုးရှင်းပြီး ထက်မြက်လှသော စီရင်ချက်ကြောင့် ခန်းမတစ်ခုလုံး၏ အရှိန်အဝါ မှာ အလွန်အမင်း တည်ငြိမ် လေးနက်မှုထဲသို့ ကျရောက်သွားခဲ့ရတော့သည်။
လူတိုင်းနီးပါး အသက်ပင် ပြင်းပြင်းမရှူရဲကြချေ။
ကျင်းရှောက်ယွမ် ကတော့ တိုက်ရိုက် သေဒဏ် စီရင်ခံလိုက်ရပြီး အင်အားတောင့်တင်းလှသော ကျူးမိသားစု တစ်ခုလုံးသည်လည်း အလင်းကမ္ဘာမှ အကြီးအကဲ ၏ စကားတစ်ခွန်းတည်းဖြင့် ပြာအဖြစ် ပြောင်းလဲသွားတော့မည် ဖြစ်သည်။
ဒါက အာဏာ ပေ။
အထွတ်အထိပ် အာဏာ ဖြစ်ရာ မည်သူကမျှ လွယ်လွယ်နှင့် လာစော်ကားရဲခြင်း မရှိချေ။
ထို့ကြောင့် မြင့်မြတ်နန်းတော်ထဲသို့ ဇွတ်အတင်းဝင်ရောက်ကာ မြင့်မြတ်နန်းတော် တာဝန်ခံများကို စိတ်တိုင်းကျ ရိုက်နှက်ဒဏ်ရာရစေခဲ့သော ထန်ထျန်း၏ ရလဒ်သည်လည်း ဆိုးဝါးလှပေလိမ့်မည်။
အမှန်တရားကလည်း ထိုအတိုင်းပင် ဖြစ်ပြီး အသက်လတ်ပိုင်း ကျိကျွင်း ၏ စီရင်ချက်အောက်တွင် ထန်ထျန်းမှာ ပြင်းထန်သော ပြစ်ဒဏ်ကို ခံရတော့မည် ဖြစ်၏။
သို့သော်လည်း နောက်ဆက်တွဲ ကိစ္စများ တိုးတက်လာပုံကမူ သူတို့၏ တွေးထင်ထားမှုများထက် များစွာ ကျော်လွန်သွားခဲ့ရသည်။
အလင်းကမ္ဘာမှ အကြီးအကဲနှင့် ထန်ထျန်းတို့ကြားက စကားပြောဆိုမှုများအရ သူတို့နှစ်ဦးမှာ တစ်ဦးကိုတစ်ဦး သိကျွမ်းနေသည့် ပုံစံမျိုး ဖြစ်နေပေသည်။
သို့သော် ပို၍ အဓိပ္ပာယ်မရှိသည်မှာ ထန်ထျန်း၏ သရုပ်မှန်ကို မှတ်မိသွားပြီးနောက် အမြဲတမ်း မြင့်မြတ်လှပြီး မြင့်မားသော နေရာတွင် ရှိနေတတ်သည့် အလင်းကမ္ဘာမှ အကြီးအကဲ၏ မျက်နှာထက်တွင် ကြောက်ရွံ့ထိတ်လန့်သည့် အမူအရာ သိသိသာသာ ပေါ်ထွက်လာခြင်း ပင်။
မှန်ပေသည်၊ ဒါက ကြောက်ရွံ့ထိတ်လန့်မှု ဖြစ်၏
သူက မည်သည့် ဖုံးကွယ်မှုကိုမျှ မပြုလုပ်ဘဲ အံ့အားသင့်မှုနှင့် ကြောက်ရွံ့မှုများကို ၎င်း၏ မျက်နှာထက်တွင် အထင်အရှား ရေးပြထားခဲ့သည်။
နောက်ဆုံးတွင်မူ တိုက်ရိုက်ပင် အဝေးသို့ ထွက်ပြေး ရန် ကြံရွယ်ခဲ့သေး၏
လူတိုင်း ဆွံ့အ သွားခဲ့ရတော့သည်။
ထန်ထျန်း ဟုခေါ်သော ဤအမျိုးသားက ဘယ်လို ကြောက်စရာကောင်းတဲ့ တည်ရှိမှုမျိုးမို့လို့ အလင်းကမ္ဘာမှ ကျိကျွင်း အရှင် ကပင် ဤမျှအထိ စိုးရိမ်တုန်လှုပ်နေရတာလဲ။
"ငါက မင်းကို သွားခွင့်ပြုလို့လား"
အသက်လတ်ပိုင်း ကျိကျွင်း ထွက်ပြေးရန် ပြင်ဆင်နေစဉ် ထန်ထျန်း၏ စကားသံကြောင့် သူ ကွက်တိ တောင့်တင်းသွားခဲ့ရသည်။
"နှစ်တွေအများကြီး ကြာမှ ပြန်တွေ့ကြတာပဲ၊ အတိတ်အကြောင်းလေး ပြောကြတာပေါ့"
"တကယ်တော့... ငါတို့တွေ စကားတစ်ခွန်းမှ မပြောဖူးကြပေမဲ့လည်းပေါ့"
သူတို့နှစ်ဦးမှာ အမှန်တကယ် တစ်ယောက်နှင့်တစ်ယောက် မျက်နှာချင်းဆိုင် မတွေ့ဖူးကြချေ၊ စကားပြောဆို ဆက်ဆံဖို့ဆိုလျှင် ပို၍ပင် မဖြစ်နိုင်ပေ။
ထိုစဉ်က ထန်ထျန်းက ဖြတ်ခနဲ ကြည့်လိုက်ရုံမျှဖြင့် သူ့ကို အနည်းငယ် မှတ်မိနေခြင်း သာ ဖြစ်၏။
အခြားတစ်ဖက်လူကမူ မတော်တဆ အချိန်မျိုးတွင် ထန်ထျန်း၏ ပုံစံကို မြင်တွေ့ဖူးခြင်း ဖြစ်ပေလိမ့်မည်။
အသက်လတ်ပိုင်း ကျိကျွင်း တစ်ကိုယ်လုံး တောင့်တင်းနေပြီး အောက်ခြေတွင် အေးအေးလူလူ ထိုင်နေသည့် ထန်ထျန်းကို မယုံကြည်နိုင်စွာ ကြည့်ရင်း အချိန်အတော်ကြာသည်အထိ စိတ်မစုစည်းနိုင် ဖြစ်နေခဲ့ရသည်။
ခန်းမကြီးအတွင်းရှိ အခြားလူများအားလုံးသည်လည်း ကြောင်အ သွားကြ၏။
အမြင့်ဆုံး အာဏာ ရှိသည့် အလင်းကမ္ဘာမှ အကြီးအကဲက ထန်ထျန်း ဟုခေါ်သော အမျိုးသား၏ အရှေ့တွင် ဤမျှအထိ... ကြောက်ရွံ့မှုများ ပြသနေလိမ့်မည်ဟု သူတို့ထဲက မည်သူမျှ မထင်မှတ်ထားခဲ့ကြချေ။
မှန်ပေသည်၊ ဒါက ကြောက်ရွံ့မှု ဖြစ်၏။
ဤမျှအဆင့်ရှိသော ကျင့်ကြံသူတစ်ဦးကို ဤမျှအထိ ကြောက်ရွံ့တုန်လှုပ်စေသည့် အရာမှာ မည်သည့်အရာ ဖြစ်မည်ကို သူတို့ အမှန်တကယ် စိတ်ကူးမယဉ်ရဲကြတော့ချေ။
၎င်းက ကြွက်တစ်ကောင်က ကြောင်တစ်ကောင်ကို တွေ့လိုက်ရသကဲ့သို့ပင် ဖြစ်သည်။
မြင့်မြတ်နန်းတော် နန်းတော်သခင်၏ ဘေးနားရှိ အမည်းရောင် ဝတ်စုံဝတ်ထားသူ တစ်ဦးတည်းသာ အချို့သော ကိစ္စများကို ရုတ်တရက် သတိရသွားခဲ့၏။
ထန်ထျန်းနှင့် ပတ်သက်သည့် အချက်အလက်များကို စုံစမ်းစစ်ဆေးစဉ်က လွန်ခဲ့သည့် နှစ်ပေါင်း ခုနစ်ရာခန့်က...
"ဘာလဲ... ငါနဲ့ စကားမပြောချင်ဘူးလား"
အခြားတစ်ဖက်လူက အချိန်အတော်ကြာသည်အထိ မတုံ့ပြန်သဖြင့် ထန်ထျန်း မျက်မှောင်အသာ တွန့်လိုက်မိသည်။
အသက်လတ်ပိုင်း ကျိကျွင်း လည်း ထိုအခါမှသာ အသိပြန်ဝင်လာပြီး အလျင်အမြန် ပြောလိုက်၏။ "အော် မဟုတ်ပါဘူး... ကျွန်တော်... ကျွန်တော်..."
"ကျွန်တော်က... အရှင်..."
သူ့မှာ စကားလုံးများကိုပင် စနစ်တကျ မစီစဉ်နိုင်တော့ချေ။
ထန်ထျန်းက ခေါင်းကို ခါယမ်းလိုက်ပြီး "အခြားလူတွေကို အရင် ထွက်သွားခိုင်းလိုက်"
"ငါတို့နှစ်ယောက်တည်း စကားပြောရအောင်"
အသက်လတ်ပိုင်း ကျိကျွင်း ခေတ္တ တိတ်ဆိတ်သွားပြီးနောက် လက်ကို ဝှေ့ယမ်းလိုက်၏။
"လူတိုင်း... အပြင်ကို ထွက်သွားကြ"
လူတိုင်း သံသယများ ပြည့်နှက်နေကြသော်လည်း နောက်ဆုံးတွင် မြင့်မြတ်နန်းတော် နန်းတော်သခင်၏ ဦးဆောင်မှုအောက်တွင် ထွက်သွားရန် ရွေးချယ်လိုက်ကြတော့သည်။
"မင်းတို့လည်း အပြင်ကို အရင် ထွက်နှင့်ဦး"
"စိတ်ချပါ၊ သူတို့ မင်းတို့ကို ဘာမှ မလုပ်ရဲပါဘူး"
ထန်ထျန်းက ကျူးကျစ်ယန်တို့အဖွဲ့ကို လှည့်ပြောလိုက်၏။
ဤအချိန်တွင် သူတို့မှာ လုံးဝကို ကြောင်အ နေသည့် အခြေအနေသို့ ရောက်ရှိနေကြပြီ ဖြစ်ပြီး ယနေ့ ဖြစ်ပျက်ခဲ့သမျှ ကိစ္စများက သူတို့၏ နားလည်နိုင်စွမ်း အတိုင်းအတာထက် များစွာ ကျော်လွန်နေခဲ့ပြီ ဖြစ်သည်။
နှလုံးသားကြီးမားလှသော ရှောင်ယင် တစ်ဦးတည်းသာ ယာယီအားဖြင့် ပုံမှန် စဉ်းစားနိုင်စွမ်း ရှိနေသေး၏။
"ကောင်းပါပြီ"
"ဒါဆို ကျွန်မတို့ အပြင်မှာပဲ စောင့်နေပါ့မယ်"
ရှောင်ယင် က ပြောလိုက်သည်။
ထို့နောက် သူတို့ သုံးဦးသည်လည်း ခန်းမကြီးအတွင်းမှ ထွက်သွားခဲ့ကြ၏။
ကျယ်ပြောလှသော ခန်းမကြီးအတွင်းတွင် ထန်ထျန်းနှင့် အသက်လတ်ပိုင်း ကျိကျွင်း နှစ်ဦးတည်းသာ ကျန်ရှိတော့သည်။
"ဒီကို လာထိုင်လေ"
ထန်ထျန်းက ပြောလိုက်၏။
အသက်လတ်ပိုင်း ကျိကျွင်း က အော် ဟု ရေရွတ်ရင်း အပေါ် မှ ဆင်းလာကာ ထန်ထျန်း၏ ဘေးနားရှိ နေရာတွင် စနစ်တကျ ထိုင်လိုက်ပြီး အလွန်အမင်း သတိထားနေသည့် ပုံစံမျိုး ဖြစ်နေပေသည်။
ဒါကို မြင်တော့ ထန်ထျန်းက မတတ်နိုင်ဘဲ ရယ်မောလိုက်ရင်း "ဒီလောက်အထိ တုန်လှုပ်နေဖို့ လိုလို့လား"
"ငါက လူသားစားတာမှ မဟုတ်တာ"
"ဒါ့အပြင် မင်းရဲ့ နောက်ကွယ်မှာ ကျွင်းချန်ချင်း ရှိနေတာပဲ၊ သေသွားရင်တောင် ပြန်ကယ်လို့ ရတာကို ဘာကို ကြောက်နေတာလဲ"
အသက်လတ်ပိုင်း ကျိကျွင်း ခဏမျှ တုံ့ဆိုင်းသွားပြီးနောက် ဖြည်းညင်းစွာ ပြောလိုက်၏။ "ကျွန်တော်က... အရှင် ပြန်လည် ရောက်ရှိလာလိမ့်မယ်လို့ မထင်ထားမိလို့ပါ"
"ကျွန်တော် ထင်တာတော့... မဟာကောင်းကင် အရှင် လည်း ဒီကိစ္စကို ထင်မှတ်ထားမှာ မဟုတ်ဘူး"
ထန်ထျန်းက ပြုံးလိုက်ရင်း "ငါ သူ့ကို အစောကြီးကတည်းက ပြောဖူးသားပဲ၊ ငါ သေချာပေါက် ပြန်လာခဲ့မယ်လို့"
"ကြည့်ရတာ သူက ငါ့စကားကို မယုံခဲ့ဘူး ထင်တယ်"
အသက်လတ်ပိုင်း ကျိကျွင်း က ခေါင်းညိတ်ပြ၏။ "မဟာကောင်းကင် အရှင် ကတော့ အရှင် အမှန်တကယ်ပဲ..."
"ဒါပေမဲ့ အရှင် ပြန် ရောက်လာတာကို သိရင် မဟာကောင်းကင် အရှင် လည်း သေချာပေါက် အရမ်း ဝမ်းသာမှာ"
"ဒီနှစ်ပေါင်း ရာဂဏန်းအတွင်းမှာ သူ အများဆုံး ပြောဖြစ်တဲ့လူက အရှင် ပါပဲ"
ထန်ထျန်း ဆွံ့အ သွားခဲ့ရသည်၊ ဒါက သူ ထင်မှတ်မထားသည့် ကိစ္စ ဖြစ်၏။
ထိုကောင်က သူ့အကြောင်းကို ဘာလို့ ခဏခဏ ပြောနေရတာလဲ။
သူ့ကို သဘောကျနေလို့တော့ မဟုတ်လောက်ပါဘူးနော်။
ထန်ထျန်း ခေါင်းကို ခါယမ်းလိုက်ပြီး "ကျွင်းချန်ချင်း နဲ့ ပတ်သက်တဲ့ ကိစ္စကိုတော့ နောက်မှ ပြောကြတာပေါ့"
"အရင်ဆုံး အရှေ့က ကိစ္စကို အရင် ပြောရအောင်"
"ဒီနေ့လို အခြေအနေမျိုးက မြင့်မြတ်နန်းတော်ထဲမှာ ခဏခဏ ဖြစ်တတ်တာလား"
အသက်လတ်ပိုင်း ကျိကျွင်း က ပြန်ဖြေ၏။ "အလွန် နည်းပါတယ်"
"မြင့်မြတ်နန်းတော်ရဲ့ စည်းကမ်းတွေကို ကျွန်တော်တို့က မဟာကောင်းကင် အရှင် ရဲ့ စိတ်ဆန္ဒ အတိုင်း သတ်မှတ်ထားတာမို့ ဘယ်သူမှ မချိုးဖောက်ရဲကြပါဘူး"
"ဒီလို ကိစ္စမျိုး ဖြစ်ပွားပြီးရင်လည်း ကျွန်တော်တို့ရဲ့ ကိုင်တွယ်တဲ့ နည်းလမ်းက အလွန် ပြတ်သားတာမို့ စွန့်စားရဲတဲ့သူ အလွန် ရှားပါတယ်"
"ယန်ကွမ်းလမ်းရဲ့ အရည်အချင်းကို အမည်လွှဲ အစားထိုးတဲ့ ကြီးလေးတဲ့ ကိစ္စမျိုးက နှစ်ပေါင်း ရာဂဏန်းအတွင်းမှာ တကယ်တော့ နှစ်ကြိမ်ပဲ ဖြစ်ဖူးပါသေးတယ်"
ထန်ထျန်း ခေါင်းညိတ်လိုက်သည်။
အသက်လတ်ပိုင်း ကျိကျွင်း က ကျင်းရှောက်ယွမ်နှင့် ကျူးမိသားစုကို ကိုင်တွယ်ပုံအရ ကြည့်လျှင် အမှန်တကယ်ပင် ထိုအတိုင်း ဖြစ်ပေလိမ့်မည်။
သို့သော် စည်းကမ်းများ မည်မျှပင် တင်းကျပ်ပါစေ ဥပဒေအပေါက် ရှာချင်သည့်သူကတော့ အမြဲရှိနေတတ်ရာ ဒါက လုံးဝ ပပျောက်အောင် လုပ်ရန် မဖြစ်နိုင်သည့် ကိစ္စ ဖြစ်၏။
သူသည်လည်း ဤအချက်ကို ဆုပ်ကိုင်ပြီး အတင်းအကျပ် လုပ်မနေတော့ချေ၊ ကျွင်းချန်ချင်း က ဤကိစ္စအပေါ် စိတ်ဝင်စားမှု ရှိနေလျှင် ရပါပြီ။
"ဟို... အရှင် ထန်ထျန်း"
အသက်လတ်ပိုင်း ကျိကျွင်း က ခဏမျှ တုံ့ဆိုင်းနေပြီးမှ ပြောလိုက်၏။ "ကျွန်တော် ကြားတာတော့ ကျူးကျစ်ယန် လို့ခေါ်တဲ့ မိန်းကလေးက အရှင့် ရဲ့ တပည့်လား "
"တကယ်လို့ ဒီ အတိုင်းဆိုရင် အရှင် အနေနဲ့ ဒီလိုမျိုး အလုပ်ရှုပ်ခံနေဖို့ မလိုပါဘူး"
"စကားတစ်ခွန်းလောက် ပြောလိုက်ရုံနဲ့ အလင်းကမ္ဘာရဲ့ တံခါးကြီးက သူမအတွက် အမြဲ ပွင့်နေမှာပါ"
ထန်ထျန်းက သဘောကျစွာဖြင့် "ငါ့မျက်နှာက ဒီလောက်အထိ ကြီးတာလား"
အသက်လတ်ပိုင်း ကျိကျွင်း က အလေးအနက် ခေါင်းညိတ်ပြ၏။ "မှန်ပါတယ်"
"အမှန်အတိုင်း ပြောရရင် လွန်ခဲ့တဲ့ နှစ်ပေါင်းများစွာက ကျွန်တော်တို့တွေ ရပ်တည်ချက် ကွဲပြားမှုကြောင့် ရန်သူတွေ ဖြစ်ခဲ့ကြပေမဲ့..."
"ကျွန်တော်တို့ထဲက လူအများစုကတော့ အရှင့် ကို အလွန် လေးစားကြပါတယ်"
"ဒါ့အပြင် အဓိကကတော့ မဟာကောင်းကင် အရှင် က အရှင့် အပေါ် ပေးထားတဲ့ အကဲဖြတ်ချက်က အလွန် မြင့်မားလွန်းလို့ပါ"
ထန်ထျန်း နှုတ်ခမ်းတစ်ချက် မဲ့လိုက်မိသည်၊ နောက်ဆုံးအချက်ကသာ အခြေခံအကျဆုံး အကြောင်းရင်း ဖြစ်ပေလိမ့်မည်။
"ဒါတွေကို ထားလိုက်ပါတော့"
ထန်ထျန်းက လက်ကို ဝှေ့ယမ်းလိုက်ရင်း "ငါ ဘာလုပ်လုပ် ငါ့ရဲ့ အစီအစဉ်နဲ့ ငါ ရှိပြီးသားပါ"
"ပြီးတော့ ကျူးကျစ်ယန် ဒီကို လာတာက အလင်းကမ္ဘာကို သွားဖို့အတွက် မဟုတ်ဘူး"
"သူမရဲ့ အဓိက ရည်ရွယ်ချက်က လူတစ်ယောက်ကို ရှာဖို့ပဲ"
"သူမရဲ့ မောင်လေး... ကျူးကျိယွီ"
"မင်း သေချာပေါက် သူ့ရဲ့ လက်ရှိ အခြေအနေကို စုံစမ်းပေးနိုင်လိမ့်မယ်လို့ ငါ ယုံကြည်တယ်"
အလင်းကမ္ဘာမှ အဆင့်မြင့်အကြီးအကဲ ကို တွေ့ဆုံပြီးပြီ ဖြစ်ရာ ဆက်လက် အချိန်ဆွဲနေရန် မလိုတော့ဘဲ တိုက်ရိုက် မေးမြန်းလိုက်ခြင်း က အကောင်းဆုံး ဖြစ်ပေသည်။
ထိုအမည်ကို ကြားလိုက်ရသောအခါ အသက်လတ်ပိုင်း ကျိကျွင်း မျက်မှောင်ကြုတ်သွားခဲ့ရ၏။
"သူ့အကြောင်းကို... ကျွန်တော် ကြားဖူးပါတယ်"
"ဒါပေမဲ့ ကျွန်တော် မမှားဘူးဆိုရင် သူက အလင်းကမ္ဘာထဲကို ဝင်ရောက်ဖို့ ပြင်ဆင်နေတုန်းမှာပဲ ပြန်ပေးဆွဲခံလိုက်ရတာပါ"
ထန်ထျန်း မျက်မှောင်အသာ တွန့်လိုက်မိသည်။
"ပြန်ပေးဆွဲခံရတယ် ဟုတ်လား"
"ဘယ်သူလဲ"
အသက်လတ်ပိုင်း ကျိကျွင်း က ပြန်ဖြေလိုက်၏။ "ကယ်တင်ခြင်းမဟာမိတ် အဖွဲ့ ပါ"
"သူတို့ရဲ့ ခေါင်းဆောင်ကိုလည်း အရှင် သိပါတယ်"
"သူကတော့... လုံကျိုကျိုး ပါပဲ"