အခန်း (၆၄၇-၆၄၈)

အခန်း (၆၄၇)။

“ကောင်းကင်နှင့် မြေကြီး အတူရှင်သန်ခြင်း’ ဆိုတာ အနှစ်သာရစွမ်းအင် အမျိုးစားပေါင်း တစ်ရာကျော်ကို ပေါင်းစပ်ထားတဲ့ အသေသတ်တိုက်ကွက် တစ်ခုပဲ။ မတူကွဲပြားတဲ့ အစစ်မှန် စွမ်းအားတွေ လှည့်လည် စီးဆင်းသွားရင်း အဲဒီစွမ်းအင်တွေကနေ ကောင်းကင် ကြယ်တွေ၊ မြေပြင်မိစ္ဆာတွေနဲ့ လူသားခန္ဓာကိုယ်ရဲ့ အပ်စိုက်မှတ်တွေအဖြစ် ပြောင်းလဲ သွားပြီး၊ တစ်ပြိုင်တည်း ပေါက်ကွဲထွက်လာကာ ကွင်းဆက်တုံ့ပြန်မှုတွေကို ဖြစ်ပေါ်စေ တာပဲ။ တကယ့်ကို အစွမ်းထက်တဲ့ ပညာရပ်ပဲ…”

ကျိုးယွိအကယ်ဒမီ၏ အပြင်ဘက်တွင် ဆီးနှင်းများမှာ တစ်ဖွဲဖွဲ ကျဆင်းနေသည်။

ကောင်းကင်နှင့် မြေကြီးအကြားတွင် အေးစက်လှသော လေထုမှာ လွှမ်းခြုံနေလေသည်။

သို့သော် ‘ပြောင်းလဲခြင်းမျှော်စင်’ ၏ အမြင့်ဆုံး အခန်းအတွင်းမှာမူ နွေဦးကာလကဲ့သို့ နွေးထွေးနေသည်။ ကြည်လင်တောက်ပသော မှော်သင်္ကေတများက အပြင်ဘက်မှ အအေး ဒဏ်ကို ပိတ်ဆို့ထားသော်လည်း၊ အလင်းရောင်ကိုမူ အနည်းငယ်မျှ ဟန့်တားထားခြင်း မရှိပေ။ ဤအချိန်တွင် ကောင်းကင်ယံထက်မှ ဆီးနှင်းများ ကျဆင်းနေသည်ကို မြင်တွေ့ရ သည်။ အလွန်မြင့်မားသော မျှော်စင်ပေါ်မှ လှမ်းကြည့်လိုက်လျှင် တောင်တန်းများ၊ မြစ်ချောင်းများနှင့် သစ်ပင်တောအုပ်များမှာ ဆီးနှင်းများကြောင့် ဖြူဖွေးနေပြီး၊ စိတ်နှလုံးကို အေးချမ်းစေသည့် မြင်ကွင်းတစ်ခုအဖြစ် တည်ရှိနေပါသည်။

ဤသည်မှာ ကွန်ဖြူးရှပ် မဟာပညာရှင်ကြီးများအတွက် စိတ်ကို တည်ငြိမ်အောင် ကျင့်ကြံ ပြီး စိတ်ဝိညာဉ်ကို ပြုစုပျိုးထောင်ရန် အကောင်းဆုံး နည်းလမ်းတစ်ခုလည်း ဖြစ်ပေသည်။

‘ပြောင်းလဲခြင်းမျှော်စင်’ မှာ အလွန်မြင့်မားလှရာ ကျောက်စိမ်းမြို့တော် တစ်ခုလုံးကို အပေါ်စီးမှ မြင်တွေ့နိုင်သည်။ သို့သော် ယခုအချိန်တွင် မြို့တော်တစ်ခုလုံးမှာ မြူခိုးများ အတွင်း ဝေဝါးနေပြီး မြင်ကွင်းမှာ တံလျှပ်တစ်ခုကဲ့သို့ပင်။

၎င်းမှာ မြေကြီးစွမ်းအင်များ၏ စုစည်းမှုကြောင့် ဖြစ်ပေါ်လာသော နိမိတ်တစ်ခု ဖြစ်ပြီး၊ မြို့တော်အတွင်း အလွန်အစွမ်းထက်သော ပညာရှင်တစ်ဦး နေထိုင်နေကြောင်း ဖော်ပြနေ သည်။ မည်သည့် တာအိုပညာရပ်နှင့်မျှ ထိုမြူခိုးများကို ဖောက်ထွင်းမြင်နိုင်မည် မဟုတ် သော်လည်း သာမန်လူသားများအတွက်မူ မည်သည့် အဟန့်အတားမျှ ရှိမည် မဟုတ်ပေ။

ကမ္ဘာကြီးကို ဆီးနှင်းများ ဖုံးလွှမ်းထားသော ဤနေ့တွင် ဟုန်ယွိသည် မည်သည့် လိုအင် ဆန္ဒမျှမရှိဘဲ မျှော်စင်အတွင်း၌ တင်ပလ္လင်ခွေ ထိုင်နေခဲ့ပါသည်။ သူသည် သူ၏ စစ်မှန် သော စွမ်းအားကို ညှိနှိုင်းခြင်း၊ စိတ်ဝိညာဉ်စွမ်းအင်များကို စုဆောင်းခြင်း၊ မိစ္ဆာစွမ်းအင် များကို သန့်စင်ခြင်း၊ မူလစွမ်းအင် ကို ထိန်းသိမ်းခြင်း၊ အကာအကွယ် အငွေ့အသက်ကို မြှင့်တင်ခြင်းနှင့် နတ်ဘုရားစွမ်းအင်များကို သန့်စင်ခြင်းတို့ကို တစ်ဦးတည်း လုပ်ဆောင်နေ ခဲ့ပါသည်။

သဲကန္တာရအတွင်း၌ လျှို့ဝှက်ဆန်းကျယ်သော အမျိုးသမီးနှင့် တိုက်ခိုက်ခဲ့ပြီးနောက်၊ ဟုန်ယွိသည် ကျိုးယွိအကယ်ဒမီသို့ ပြန်လာကာ ပြောင်းလဲခြင်းကျမ်း၏ အကူအညီဖြင့် အလင်းနှင့်အမှောင် အကာကွယ်ကို ဖျက်ဆီးနိုင်ခဲ့သော သူမ၏ နောက်ဆုံး အသေသတ် တိုက်ကွက်ဖြစ်သော ‘ကောင်းကင်နှင့် မြေကြီး အတူရှင်သန်ခြင်း’ ကို သေချာစွာ ဆန်းစစ် လေ့လာနေခြင်း ဖြစ်သည်။

ဤတိုက်ကွက်မှာ အလွန်တရာ နက်နဲလှသော်လည်း၊ ဟုန်ယွိက ‘ပြောင်းလဲခြင်းကျမ်း’ ကို အသုံးပြု၍ တွက်ချက်လိုက်သောအခါ အလွန်တရာ အံ့ဩဖွယ်ကောင်းသော အနုစိပ် အချက်အလက်များမှာ တဖြည်းဖြည်း ရှင်းလင်းလာခဲ့ပါသည်။

သူသည် ကောင်းကင်အပြင်ပနယ်မြေ ဗဟိုကမ္ဘာ၏ တာအိုပညာအချို့ကို ပိုမို ရင်းနှီး ကျွမ်းဝင်လာခဲ့ပါသည်။

“‘ကောင်နဲ့ဟွမ်’ ဆိုတဲ့ အပ်စိုက်မှတ် နှစ်ခုဟာ ကောင်းကင်နဲ့ မြေကြီးရဲ့ သက်တမ်း တည်ရှိ ရာနေရာပဲ။ ဆေးဝါးတွေ မကုသနိုင်တဲ့ နေရာပေါ့။ ဟုတ်ပြီ... ဒါပဲ။ အဲ့ဒီနေရာတွေကို ဖွင့်နိုင်မှပဲ ကောင်းကင်နဲ့ မြေကြီးရဲ့ သက်တမ်းအတိုင်း အတူတူ နေထိုင်နိုင်မှာ။ ငါ့ရဲ့ ရုပ်ခန္ဓာကိုယ်ဟာ ထာဝရသက်တမ်း ရရှိဖို့အတွက် အဲ့ဒီနေရာတွေကို သန့်စင်ရမယ်။ မဟုတ်ရင် နှစ်ပေါင်းတစ်ရာကြာလို့ အိုမင်းခြင်းစွမ်းအင်တွေက အဲဒီ အပ်စိုက်မှတ်တွေထဲ ကို ဝင်သွားရင် အားလုံး နောက်ကျသွားလိမ့်မယ်။ ငါ့ရဲ့ ခန္ဓာကိုယ်ဟာ သေဆုံးသွားပြီး ငါ့ရဲ့ တာအိုဟာလည်း ကွယ်ပျောက်သွားလိမ့်မယ်။ ဘယ်လို နတ်ဆေးပဲဖြစ်ဖြစ် ကယ်နိုင်မှာ မဟုတ်ဘူး။”

သူ၏ အဆင့်ဆင့်သော တွက်ချက်မှုများကြားတွင်၊ ရုတ်တရက် ဟုန်ယွိ၏ ခန္ဓာကိုယ်ပေါ်ရှိ မဖွံ့ဖြိုးသေးသော အပ်စိုက်မှတ် နှစ်ခုမှာ ရုတ်တရက် ပြင်းထန်စွာ တုန်ခါလာသည်။

ဤတစ်ကြိမ်တွင် ထိုအပ်စိုက်မှတ် နှစ်ခု၏ တုန်ခါမှုမှာ ‘ရှင်ခြင်းနှင့်သေခြင်း လျှို့ဝှက် တံခါး’၊ ‘ဒန်ထျန်မျိုးစေ့’ နှင့် ‘ခြောက်ပါးညီညွတ်ခြင်းတံခါး’ တို့ ပွင့်စဉ်ကထက်ပင် ပို၍ ပြင်းထန်ကာ ထူးခြားဆန်းကြယ်လှသည်။ အပ်စိုက်မှတ်များ ပွင့်သွားသည်နှင့် တစ်ပြိုင် နက် မူလစွမ်းအင်များမှာ အလုံးအရင်းနှင့် စီးဝင်လာပြီး၊ ဟုန်ယွိ၏ စိတ်နှလုံးအတွင်း၌ မပျက်စီးနိုင်သော ထာဝရသက်တမ်းဟူသော ခံစားချက်တစ်ခု စီးဆင်းသွားလေသည်။

ဤအပ်စိုက်မှတ် နှစ်ခုမှာ ဒဏ္ဍာရီလာ အမြင့်ဆုံး အပ်စိုက်မှတ်များ ဖြစ်ကြသော ‘ကောင်’ နှင့် ‘ဟွမ်’ တို့ပင် ဖြစ်သည်။

၎င်းတို့သည် ဆေးဝါးများ သို့မဟုတ် အပ်စိုက်ကုသမှုများပင် မရောက်ရှိနိုင်သော လျှို့ဝှက် ချက်များ ဖြစ်ကြသည်။ အကယ်၍ ဖျားနာမှု သို့မဟုတ် အိုမင်းခြင်း အငွေ့အသက်များ ထိုနေရာသို့ စိမ့်ဝင်သွားပါက မည်သည့် ဆေးနည်းနှင့်မျှ ကုသ၍ မရနိုင်တော့ပေ။ ရုပ်ခန္ဓာ ပျက်စီးခြင်းမှာ အချိန်ကုန်ဆုံးခြင်းကဲ့သို့ပင် တားဆီး၍ မရနိုင်သောအရာ ဖြစ်သည်။ ‘ယန်နတ်ဘုရား’ အဆင့်ရှိသော ပညာရှင်တစ်ဦးပင်လျှင် အချိန်၏ ကုန်ဆုံးမှုကို မတားဆီးနိုင်ပေ။

“ဒါကြောင့်ကိုး...၊ ဒါ့ကြောင့်ကို….၊ ဒါကပဲ ကောင်းကင်နဲ့မြေကြီးအတိုင်း ထာဝရ သက်ရှည်နိုင်မယ့် အစစ်အမှန် လျှို့ဝှက်ချက်ပဲ။ ဒီအပ်စိုက်မှတ်တွေကို ဖွင့်နိုင်တာက လူတစ်ယောက်ရဲ့ သက်တမ်းကို အတိုင်းအဆမရှိ တိုးမြင့်စေနိုင်တယ်။”

ရုတ်တရက် ဟုန်ယွိ၏ စိတ်မှာ လှုပ်ရှားသွားသည်။ သူ၏ စိတ်အာရုံမှာ သူ့နှလုံးသား၏ အောက်ခြေရှိ အလွန်လျှို့ဝှက်နက်နဲသော အမြှေးပါးလွှာ တစ်ခုအတွင်းသို့၊ တည်ရှိခြင်းနှင့် မတည်ရှိခြင်းကြားရှိ ဟင်းလင်းပြင် နယ်ပယ်နှစ်ခုအတွင်းသို့ နက်နက်ရှိုင်းရှိုင်း ဝင်ရောက် သွားသည်။

ဝုန်း….

ဟုန်ယွိ၏ စိတ်မှာ မတူညီသော ကမ္ဘာနှစ်ခုသို့ ရောက်ရှိသွားသကဲ့သို့ ခံစားလိုက်ရသည်။ သူ၏ခန္ဓာကိုယ်အတွင်းရှိ ထိုအပ်စိုက်မှတ် နှစ်ခုနှင့် လျှို့ဝှက်ဟင်းလင်းပြင် နေရာများသည် ကမ္ဘာငယ်လေး တစ်ခုကို ဖုံးကွယ်ထားခြင်း ဖြစ်သည်။

ထိုကမ္ဘာငယ်လေး နှစ်ခုအတွင်း၌ ဟုန်ယွိ၏ စိတ်သည် မှောင်မိုက်သော ယင်စွမ်းအင် များ စွာကို ခံစားလိုက်ရသည်။ ထိုယင်စွမ်းအင်များအတွင်း၌ သေးငယ်သော ပိုးမွှားများစွာမှာ တွားသွားနေကြရာ တကယ့်ကို ထိတ်လန့်ဖွယ်ရာ မြင်ကွင်းတစ်ခုပင်။

တစ်ချိန်တည်းမှာပင် ဟုန်ယွိသည် ခန္ဓာကိုယ်၏ အသက်ရှူသွင်းမှုတိုင်းတွင် အလွန်တရာ သေးငယ်သော ပိုးမွှားများမှာ ထိုကမ္ဘာအတွင်းသို့ ဝင်ရောက်လာပြီး မူလစွမ်းအင်များကို ဝါးမြိုနေကြသည်ကို ခံစားလိုက်ရသည်။

“ငါ့ရဲ့ခန္ဓာကိုယ်ဟာ နတ်ဘုရားကျောက်တုံး ဝိညာဉ်သန္ဓေသား ဖြစ်နေပေမဲ့၊ ဒီလောကရဲ့ အငွေ့အသက်တွေကြောင့် ညစ်ညမ်းနေတုန်းပဲ။ ဒီနေရာတွေမှာ ပိုးမွှားတွေ အနှံ့အပြား ရှိနေတာပဲ။ တကယ်လို့, ဒီနေ့ ငါသာ ဒီနေရာကို မဖွင့်နိုင်ခဲ့ရင် ဒီလောက် ကြောက်စရာ ကောင်းတဲ့ မြင်ကွင်းမျိုးကို မြင်ရမှာ မဟုတ်ဘူး။ ဒီနေရာဟာ ဆေးဝါးတွေ မရောက်နိုင်တဲ့ နေရာဆိုတာ အမှန်ပဲ။ ဘယ်လောက်ပဲ စွမ်းအင်တွေနဲ့ ခန္ဓာကိုယ်ကို သန့်စင်ပါစေ၊ ဒီလျှို့ဝှက်တဲ့ နေရာက ပိုးမွှားတွေကိုတော့ မသတ်နိုင်ခဲ့ဘူး။”

သူ၏ ‘ကောင်’ နှင့် ‘ဟွမ်’ ကမ္ဘာအတွင်းရှိ ထိုပိုးမွှားလေးများကို မြင်သော်လည်း ဟုန်ယွိက အံ့ဩခြင်း မရှိပေ။

ဗုဒ္ဓမြတ်စွာက ရေခွက်တစ်ခွက်ထဲတွင် ပိုးမွှားပေါင်း ရှစ်သောင်းလေးထောင် ရှိသည်ဟု ဟောကြားခဲ့သည်မှာ အမှန်ပင် ဖြစ်ပါသည်။ တာအိုကျင့်စဉ် မြင့်မားသူများသာလျှင် ဤအရာကို ရှင်းရှင်းလင်းလင်း မြင်တွေ့နိုင်သည်။ မူလက ‘လူသားအင်မော်တယ်’ အဆင့် ရုပ်ခန္ဓာသည် သန့်စင်ပြီးသား ဖြစ်သော်လည်း၊ အသက်ရှူသွင်းမှု ကျင့်စဉ်များ ပြုလုပ်စဉ် အတွင်း အိုမင်းခြင်းနှင့် ညစ်ညမ်းသော စွမ်းအင်အချို့သည် ခန္ဓာကိုယ်အတွင်းသို့ ခိုအောင်း ဝင်ရောက်လာကြခြင်း ဖြစ်သည်။

“ဉာဏ်ပညာမီးလျှံဖြင့် ‘ကောင်’ နှင့် ‘ဟွမ်’ ကို သန့်စင်စမ်း၊ သန့်စင်တဲ့ စွမ်းအင်တွေ စကြဝဠာကို ဖြည့်စမ်း။”

ဤအခြေအနေကို မြင်လိုက်ရသောအခါ ဟုန်ယွိသည် သူ၏ စိတ်အတွင်း၌ ဉာဏ်ပညာ မီးလျှံတစ်ခုကို ဖန်တီးလိုက်ပြီး ထိုကမ္ဘာငယ်လေး တစ်ခုလုံးကို လွှမ်းခြုံလိုက်သည်။ တစ်ခဏချင်းမှာပင် ညစ်ညမ်းသော စွမ်းအင်များနှင့် သန်းပေါင်းများစွာသော ပိုးမွှားများမှာ ပြာအဖြစ် ပြောင်းလဲသွားပြီး ပျောက်ကွယ်သွားလေတော့သည်။

ရှူးးး...

သန့်စင်မှု ပြီးဆုံးသွားပြီးနောက် ဟုန်ယွိ၏ စိတ်ဝိညာဉ်မှာ သူ၏ ခန္ဓာကိုယ်အတွင်းသို့ ပြန်လည် ဝင်ရောက်လာသည်။ ချက်ချင်းပင် သူသည် တစ်ခါမျှ မခံစားဖူးသော လန်းဆန်းမှု ကို ခံစားလိုက်ရသည်။ သူ၏ သက်တမ်းမှာလည်း ဤကမ္ဘာကြီးနှင့် တိုက်ရိုက် ဆက်နွှယ် နေသကဲ့သို့ ခံစားလိုက်ရသည်။

ကောင်းကင်၏ သက်တမ်းမှာ မြေကြီး၏ သက်တမ်းနှင့် တူညီပြီး၊ မြေကြီး၏ သက်တမ်းမှာ သူ၏ သက်တမ်းနှင့် တူညီသွားလေပြီ။ ခန္ဓာကိုယ်၏ နောက်ထပ် လျှို့ဝှက်ချက်တစ်ခုကို သူ ဖော်ထုတ်နိုင်ခဲ့ပြီ ဖြစ်သည်။

ရှူး... ရှူး... ရှူး...

မူလစွမ်းအင် အမြောက်များမှာ ထို ‘ကောင်’ နှင့် ‘ဟွမ်’ ကမ္ဘာငယ်လေးအတွင်းသို့ တစ်ပြိုင် တည်း စီးဝင်လာပြီး၊ အပ်စိုက်မှတ်နှစ်ခု၏ စွမ်းအားကို လှုံ့ဆော်ပေးလိုက်သည်။ တစ်ချိန် တည်းမှာပင် ထိုအပ်စိုက်မှတ် နှစ်ခု၏ စွမ်းအားမှာလည်း အပြည့်အဝ နိုးထလာခဲ့ပါသည်။

ဟုန်ယွိက အသက်ရှူသွင်းလိုက်ရာ သူ၏ခန္ဓာကိုယ်ရှိ အပ်စိုက်မှတ် ၂၀၀ ကျော်မှာ တစ်ပြိုင်တည်း လှုပ်ရှားလာပြီး၊ ပြင်းထန်သော စွမ်းအင်လှိုင်းတစ်ခုမှာ ထွက်ပေါ်လာ သည်။

“နတ်ဘုရားကျောက်တုံး ဝိညာဉ်သန္ဓေသားရဲ့ အပ်စိုက်မှတ်တွေကို သန့်စင်ပြီးပြီဆိုတော့ ငါ့ရဲ့ အစစ်အမှန် ခန္ဓာကိုယ်ကို သွားကြည့်ရဦးမယ်။”

ဝူး….

ဟုန်ယွိ၏ စိတ်ဝိညာဉ်မှာ သူ၏ အစစ်အမှန် ခန္ဓာကိုယ်အတွင်းသို့ ပြန်လည် ဝင်ရောက် လာသည်။ သူ၏ အစစ်အမှန် ခန္ဓာကိုယ်မှာ ယခုမှ ကနဦး ‘လူသားအင်မော်တယ်’ အဆင့် မှာပင် ရှိပါသေးသည်။

သူသည် ‘ကောင်းကင်နှင့် မြေကြီး အတူရှင်သန်ခြင်း’ နည်းစနစ်ကို အသုံးပြု၍ သူ၏ အစစ်အမှန် ခန္ဓာကိုယ်ရှိ ‘ကောင်’ နှင့် ‘ဟွမ်’ အပ်စိုက်မှတ် နှစ်ခုကိုလည်း ချက်ချင်းပင် ဖွင့်လိုက်သည်။ ချက်ချင်းပင် ဟုန်ယွိ မြင်တွေ့လိုက်ရသည်မှာ သူ၏ အစစ်မှန် ခန္ဓာကိုယ် အတွင်းရှိ ပိုးမွှားများနှင့် ညစ်ညမ်းသော အငွေ့အသက်များမှာ နတ်ဘုရားကျောက်တုံး ဝိညာဉ်သန္ဓေသားထက် ဆယ်ဆမျှ ပိုမို ကြီးမားနေသည်။

အမှန်စင်စစ် ထိုပိုးမွှားများနှင့် ညစ်ညမ်းသော စွမ်းအင်များမှာ တဖြည်းဖြည်းနှင့် ပုံသဏ္ဌာန် ပေါ်လာကာ ကလေးငယ် နှစ်ဦးကဲ့သို့ ရုပ်သွင်များအဖြစ် ပြောင်းလဲကာ လူသားပုံသဏ္ဌာန် ဖြစ်လာတော့မည့်အလား ရှိနေပါသည်။

“ဘုရားရေ... ဒါဟာ တကယ့်ကို ‘ကောင်နဲ့ဟွမ်’ အပ်စိုက်အမှတ်အထိ ရောဂါကျွမ်းနေပဲ။” ဟုန်ယွိ သက်ပြင်းချရင်း ရေရွတ်မိသည်။ “လူသားအင်မော်တယ်တွေဟာ ဒီလောက် အစွမ်းထက်ပါလျက်နဲ့ ဘာလို့ သက်တမ်းမရှည်ကြလဲဆိုတာ အံ့ဩစရာ မရှိတော့ဘူး။ သူတို့ရဲ့ သက်တမ်းဟာ နှစ်ပေါင်းနှစ်ရာလောက်ပဲ ရှိတာဆိုတော့ သာမန်လူတွေနဲ့ ဘာများ ခြားနားလို့လဲ။”

မျက်စိတမှိတ် အတွင်းမှာပင် ဟုန်ယွိသည် သူ၏ ‘ဉာဏ်ပညာမီးလျှံ’ ကို အသုံးပြု၍ ဖျားနာခြင်း အိုမင်းခြင်း အရှိန်အဝါများကို သန့်စင်လိုက်ပြီး၊ ထိုနယ်ပယ်ကို အားကောင်း စေရန် မူလစွမ်းအင်များဖြင့် ပြန်လည်ဖြည့်သွင်းပေးလိုက်သည်။

တစ်ခဏချင်းမှာပင် သူ၏ အစစ်အမှန် ခန္ဓာကိုယ်သည် ပြန်လည်စုစည်းသွားပြီး တစ်ကိုယ် လုံး စွမ်းအားများ ပြည့်လျှံလာခဲ့သည်။

ဒေါင်... ဒေါင်... ဒေါင်... ဒေါင်...

ဟုန်ယွိ မျက်လုံးဖွင့်လိုက်ချိန်တွင် ယောင်ယွဲ့ရူ လှေကားမှ တက်လာသည်ကို မြင်လိုက်ရ သည်။ သူမသည် လှေကားထိပ်တွင် ရပ်လိုက်ပြီး “သခင်လေး... မင်းသားယု ရောက်နေပါ တယ်ရှင်” ဟု ပြောလိုက်သည်။

ယောင်ယွဲ့ရူသည် ဟုန်ယွိ၏ ‘ကျိုးယိအကယ်ဒမီ’တွင် နေထိုင်နေသူဖြစ်ပြီး၊ ယခုအခါ သူမသည် သူမ၏ တာဝန်ဝတ္တရားများကို ကောင်းစွာ နားလည်သဘောပေါက်နေပြီ ဖြစ်သည်။

“ငါတို့က အဖေတူ မအေကွဲ မောင်နှမတွေပဲ။ ဒါကြောင့် ငါ့ကို သခင်လေးလို့ ခေါ်ဖို့ မသင့်တော်ဘူး။ ငါက ကျိုးယိအကယ်ဒမီရဲ့ ကျောင်းအုပ်ဖြစ်ပြီး၊ မင်းကလည်း ဒီအကယ်ဒမီကပဲဆိုတော့ ငါ့ကို ‘ကျောင်းအုပ်ကြီး’ လို့ပဲ ခေါ်ပါ။” ဟုန်ယွိက သူမကို ကြည့်ကာ ပြောလိုက်သည်။

“အော်... အဲဒီလိုလား” ယောင်ယွဲ့ရူ၏ မျက်ဝန်းများ ဝင်းလက်သွားသည်။ “ကောင်းပါပြီ။ မင်းသားယု ရောက်နေပါတယ် ကျောင်းအုပ်ကြီး။ ကျောင်းအုပ်ကြီးက သူ့ကို တွေ့ချင်ပါသ လား။”

“တွေ့ရမှာပေါ့။ သူ့ကို အပေါ်ထပ်ကို ဖိတ်လိုက်ပါ။ ငါ ဒီမှာပဲ စောင့်နေမယ်” ဟုန်ယွိက ခေါင်းညိတ်ပြလိုက်သည်။ သူသည် ယခုအခါ ‘ပြောင်းလဲခြင်းကျမ်း’၊ ထိုက်ကျိနှင့် ဟေက်စ်ဇာဂရမ် ရှစ်မျိုးတို့ကို ဖန်တီးထားသူအဖြစ် ကျော်ကြားနေပြီး၊ အထက်တန်းလွှာ မျိုးနွယ်ဝင်များသာမက တော်ဝင်မိသားစုဝင်များပင် သူ၏ရှေ့တွင် မာန်မာန မထောင်နိုင် ကြသော်လည်း၊ ဟုန်ရွှန်ကျိကို လက်စားချေရန်အတွက်မူ သူသည် မင်းသားယုကို အားကိုး ရဦးမည် ဖြစ်သည်။

ခဏအကြာတွင် ခရမ်းရွှေရောင်သရဖူကို ဆောင်းထားပြီး၊ ကြယ်တာရာမျက်ခုံးနှင့် တောက်ပသော မျက်ဝန်းပိုင်ရှင် မင်းသားယု ဝင်လာခဲ့သည်။ ယခုအချိန်တွင် မင်းသားယု၌ ခန့်ညားထည်ဝါသော အရှိန်အဝါများ ရှိနေပြီး၊ သူ လမ်းလျှောက်လိုက်တိုင်း ဧကရာဇ် တစ်ပါး၏ အရှိန်အဝါများ ပေါ်လွင်နေသည်။ သူ၏ ရှင်ခြင်းနှင့်သေခြင်းကို စီရင်နိုင်သော အရှိန်အဝါမှာ ယခင် ချန်ပီယံမြို့စားထက်ပင် မနိမ့်ကျတော့ပေ။

မင်းသားယု၏ နောက်ကွယ်တွင်မူ အစွမ်းထက် ပညာရှင်အချို့ ပါလာကြသည်။ ၎င်းတို့ အနက် တစ်ဦးမှာ အနောက်ဘက်ဒေသမှ သိုင်းသူတော်စင် တစ်ဦးဖြစ်ပြီး၊ သူကား လွန်ခဲ့သော နှစ်အနည်းငယ်က အဖမ်းခံခဲ့ရသည့် ‘ကျူးလစ်မျိုးနွယ်စု၏ ကျူးလစ်မြို့စား လော့ခင်ပင် ဖြစ်သည်။ သူသည် ‘နတ်ဘုရားတန်ခိုးရှင် ဘုရင်ယန်တူး’ ထံမှတစ်ဆင့် မင်းသားယုထံသို့ မည်သို့ရောက်ရှိလာသည်ကိုမူ မည်သူမျှ မသိကြပေ။

“မတွေ့ရတာ လအနည်းငယ် ကြာပြီဖြစ်ပေမဲ့ မင်းသားရဲ့ အရှိန်အဝါက တကယ့်ကို တိုးတက်လာတာပဲ” ဟုန်ယွိက ဆိုကာ မင်းသားယုကို ထိုင်ရန် ဖိတ်ခေါ်လိုက်သည်။

“မင်းတို့ ခဏ ထွက်သွားကြဦး။ ငါ ညီတော်ဟုန်ယွိနဲ့ စကားပြောချင်လို့” မင်းသားယုက လက်ဝှေ့ယမ်းကာ အမိန့်ပေးလိုက်ရာ သူ၏နောက်လိုက်များ ချက်ချင်း ထွက်သွားကြပြီး ‘ကျူးလစ်မြို့စား’ လော့ဒင် တစ်ဦးတည်းသာ ကျန်ရစ်တော့သည်။

“အထွေအထူးတော့ မဟုတ်ပါဘူး။ ငါ မကြာသေးခင်ကမှ အာဏာအချို့ကို ကိုင်တွယ်ခွင့်ရ ခဲ့ပြီး တာဝန်အချို့ကို ထမ်းဆောင်နေရလို့ပါ။ ငါ့ရဲ့ အရှိန်အဝါဆိုတာကလည်း ကျားမှီပြီး ဝါကြွားရတဲ့ မြေခွေးလိုပဲ တခြားသူတွေကို ခြိမ်းခြောက်ဖို့လောက်ပါပဲ။ ဒါက တကယ့် ရှင်ခြင်းသေခြင်းကို ဆုံးဖြတ်နိုင်တဲ့ အာဏာမျိုး မဟုတ်ပါဘူး။ ဒါပေမဲ့ ဟုန်ယွိ... မင်းက တော့ တကယ့်ကို အံ့ဩစရာပဲ။ အခုဆိုရင် မင်းရဲ့အဆင့်က ငါ့ခမည်းတော်နဲ့တောင် တန်းတူဖြစ်နေပြီ” မင်းသားယုက ပြုံးပြီး ပြောလိုက်သည်။

“ငါ ဒီနေ့ လာတာက အကြောင်းရင်း နှစ်ခုရှိတယ်။ ပထမတစ်ခုက မင်းဆီကနေ သိုင်းပညာ အချို့ သင်ယူချင်လို့၊ ဒုတိယတစ်ခုကတော့ နောက်ရက်အနည်းငယ်ကြာရင် ဟုန်ရွှန်ကျိက ကိုယ်လုပ်တော် တစ်ဦးကို ထပ်မံ လက်ထပ်တော့မယ်ဆိုတာ မင်း သိလား။”

“ငါ သိပါတယ်” ဟုန်ယွိက ခေါင်းညိတ်လိုက်သည်။ “ယခု ကျောက်စိမ်းမြို့တော်ရဲ့ အခြေအနေက အလွန် ရှုပ်ထွေးနေတယ်။ မင်းသားက သိုင်းသူတော်စင် အဆင့်ကို ရောက်နေပြီဆိုပေမဲ့ ဒီအခြေအနေကို ထိန်းချုပ်နိုင်ဖို့ ခက်ခဲလိမ့်မယ်။ အိမ်ရှေ့စံမင်းသား၊ မင်းသားဟီနဲ့ တခြား မင်းသားတွေရဲ့ အင်အားကလည်း တိုးတက်လာနေတယ်။ တကယ်လို့ ငါသား မင်းသားရဲ့ နောက်ကွယ်မှာ မရှိရင် မင်းသား ရှုံးနိမ့်သွားတာ ကြာပြီ။”

“ဟုတ်ပါတယ်၊ အခု ခမည်းတော်က မင်းသားချန်နဲ့ မင်းသားမီတို့ကို ဘွဲ့ထူးတွေ အပ်နှင်းထားတယ်။ သူတို့က တော်ဝင်မိသားစုဝင်တွေ ဖြစ်ပေမဲ့ ရုတ်တရက် ဘာလို့ ဒီလောက် အစွမ်းထက်လာလဲဆိုတာ ငါ တကယ့်ကို နားမလည်နိုင်ဘူး” မင်းသားယုက ဇဝေဇဝါဖြစ်စွာ မေးလိုက်သည်။

“သူတို့က တကယ့် ပညာရှင်ကြီး နှစ်ယောက်ပဲ။ တစ်ယောက်က ထိုက်ရှီတောင်က ‘နဂါးဝိညာဉ်’ ပဲ၊ နောက်တစ်ယောက်က ‘မိစ္ဆာဂိုဏ်းရဲ့ ကောင်းကင်ဖြိုဧကရာဇ်’ ပဲ။ သူတို့ က နှစ်ပေါင်း တစ်ထောင်မှာ တစ်ယောက် ပေါ်ထွန်းခဲတဲ့ သူရဲကောင်းတွေပဲ။ ဒါပေမဲ့ ယန်ဖန်က တကယ့်ကို တော်တယ်၊ သူတို့ကို တော်ဝင်မိသားစုဝင်တွေအဖြစ် ပြန်လည် ဝင်စားစေပြီး ထိန်းချုပ်ထားနိုင်တာပဲ” ဟုန်ယွိက အဖြစ်အပျက် အားလုံးကို ရှင်းပြလိုက် သည်။

“ဘာ” မင်းသားယု၏ မျက်နှာမှာ ပျက်သွားပြီး ချက်ချင်းပင် ထရပ်လိုက်သည်။ ဤသတင်း မှာ သာမန်သတင်း မဟုတ်ပေ။

“ဒါက ကမ္ဘာမီးလောင်မယ့် ကိစ္စမဟုတ်ပါဘူး။ ဟုန်ရွှန်ကျိနဲ့ ယန်ဖန်တို့သာ ကျရှုံးသွားရင် ကျန်တဲ့လူတွေက ရွှံ့ရုပ်တွေ၊ မြေအိုးတွေလိုပါပဲ။ ငါ သူတို့ကို အချိန်မရွေး ဖမ်းဆီးပြီး နှိမ်နင်းနိုင်ပါတယ်” ဟုန်ယွိက ဆိုသည်။

“ဟုန်ယွိ မင်းဆီက ဒီစကားကို ကြားရတော့မှပဲ ငါ စိတ်အေးရတော့တယ်။ ကျိုးယိ အကယ်ဒမီက မြို့တော်ရဲ့ အပြင်ဘက်မှာ ရှိနေတော့ တစ်ခုခု ဖြစ်လာရင် မင်း အချိန်မရွေး ကူညီနိုင်မှာပဲ။ ဒါပေမဲ့ အိမ်ရှေ့စံမင်းသားနဲ့ မင်းသားဟီတို့ ဘက်မှာလည်း ‘လူသား အင်မော်တယ်’ တွေ ရှိနေတယ်လို့ ငါ ကြားထားတယ်၊ ဒါကို သတိထားရမယ်” မင်းသားယု က ပြောလိုက်သည်။

“ဘာ” ဟုန်ယွိ၏ မျက်ခုံးများ တွန့်သွားသည်။ “လူသားအင်မော်တယ်တွေဆိုတာ သေးငယ် တဲ့ကိစ္စ မဟုတ်ဘူး။ သူတို့နားမှာ လူသားအင်မော်တယ်တွေ ရှိနေတယ် ဟုတ်လား။ ယောင်ယွဲ့ရူ... ယူလူလက်ကို ဒါကို သေချာ စုံစမ်းခိုင်းလိုက်စမ်း။”

“ဟုတ်ကဲ့ပါ” ယောင်ယွဲ့ရူ ခေါင်းညိတ်ပြကာ ထွက်သွားရန် ပြင်လိုက်ချိန်တွင် ဟုန်ယွိက ရုတ်တရက် တားလိုက်သည် “နေဦး”

“ကျောင်းအုပ်ကြီး... ဘာခိုင်းစရာ ရှိလို့လဲရှင်။” ယောင်ယွဲ့ရူမှာ ဟုန်ယွိ၏ စိတ်ကူးကို နားမလည်နိုင် ဖြစ်သွားရသည်။

“ဘာမှ မဟုတ်ပါဘူး။ ဒီနေ့ ငါ အစွမ်းထက်တဲ့ နတ်ဘုရားစွမ်းရည်တစ်ခုကို သိရှိခဲ့တယ်။ အဲဒါက မင်းရဲ့ သက်တမ်းကို ရှည်စေလိမ့်မယ်။”

ဟုန်ယွိ ပြောလိုက်သည်နှင့် တစ်ပြိုင်နက် သူ၏ လက်ချောင်းများမှ အစစ်မှန် စွမ်းအင် တစ်ခု ထွက်ပေါ်လာပြီး ယောင်ယွဲ့ရူ၏ ခန္ဓာကိုယ်ကို လွှမ်းခြုံလိုက်သည်။ ချက်ချင်းပင် ယောင်ယွဲ့ရူသည် သူမ၏ နှလုံးအောက်ခြေရှိ အမြှေးပါးလွှာအတွင်း၌ လျှို့ဝှက်နေရာ တစ်ခုမှာ ထိုစွမ်းအင်ကြောင့် အတင်းအကျပ် ပွင့်သွားသည်ကို ခံစားလိုက်ရပြီး၊ ညစ်ညမ်း သော စွမ်းအင်လှိုင်းများ ထွက်ပေါ်လာလေသည်။

ဝါး… ဝါး… ဝါး… ဝါး… ဝါး… ဝါး...

ထိုစွမ်းအင်များကို ဆွဲထုတ်လိုက်ချိန်တွင် ကြောက်မက်ဖွယ်ကောင်းသော အမည်းရောင် ကလေးငယ်တစ်ဦး၏ ပုံသဏ္ဌာန်မှာ ဟုန်ယွိ၏ လက်ထဲတွင် ပေါ်လာပြီး ထိတ်လန့်ဖွယ်ရာ ငိုယိုသံများ ထွက်ပေါ်လာသည်။

“အား…”

ယောင်ယွဲ့ရူမှာ ထိတ်လန့်တကြား ခုန်ဆုတ်သွားရသည်။ သူမသည် သိုင်းသူတော်စင် အဆင့်သို့ ရောက်ရှိထားသူ ဖြစ်သော်လည်း၊ သူမ၏ ခန္ဓာကိုယ်အတွင်းမှ ဤကဲ့သို့သော မိစ္ဆာသန္ဓေမျိုး ထွက်လာလိမ့်မည်ဟု လုံးဝ မထင်ထားခဲ့ပေ။

“မလန့်ပါနဲ့၊ ဒါက ရောဂါဘယနဲ့ အညစ်အကြေးတွေကြောင့် ဖြစ်ပေါ်လာတဲ့ အငွေ့အသက် တွေပါ၊ တကယ့် ကလေးမဟုတ်ပါဘူး” ဟုန်ယွိက ဆိုကာ ထိုအရာကို ချေဖျက်လိုက်ပြီး မီးဖြင့်သန့်စင်လိုက်သည်။ ထိုမီးလျှံအတွင်း၌ ပုံကြီးချဲ့ထားသော ကြောက်မက်ဖွယ်ကောင်း သည့် ပိုးမွှားများကို အားလုံး မြင်တွေ့လိုက်ရသည်။

ထို့အတူပင် ဟုန်ယွိသည် မင်းသားယု၏ ခန္ဓာကိုယ်အတွင်းမှလည်း ထိုကဲ့သို့သော မိစ္ဆာ သန္ဓေကို ဆွဲထုတ်ပေးလိုက်ရာ၊ မင်းသားသည် သူ၏ ခန္ဓာကိုယ်မှာ သိသိသာသာ ပေါ့ပါးသွားပြီး အားအင်များ အဆမတန် ပြည့်ဝလာသည်ကို ခံစားလိုက်ရသည်။

“လာပါ မင်းသားယု... ဒီနေ့ ငါ မင်းကို သာမန်လူသား ခန္ဓာကိုယ်ကနေ ရုန်းထွက်ပြီး အရိုးတွေကို လဲလှယ်ပေးမယ်။ မင်းရဲ့ အပ်စိုက်မှတ်တွေကို ဖွင့်ပေးပြီး အမြင့်ဆုံး သိုင်းပညာနယ်ပယ်ကို ရောက်အောင် ကူညီပေးမယ်။ ဒီစွမ်းအားနဲ့ဆိုရင် မင်း နန်းတွင်းကို ကောင်းကောင်း နှိမ်နင်းနိုင်လိမ့်မယ်။ ဟုန်ရွှန်ကျိရဲ့ လက်ထပ်ပွဲကိုတော့ ငါ ကိုယ်တိုင် သွားပြီး ဂုဏ်ပြုပေးမှာပေါ့။”

ဟုန်ယွိသည် ရုတ်တရက် မတ်တပ်ရပ်လိုက်ပြီး လေးနက်စွာ ပြောလိုက်လေတော့သည်။

အခန်း (၆၄၈)။

“ဟစ်…”

အော်ဟစ်သံတစ်ချက်နှင့်အတူ မင်းသားယု၏ ခန္ဓာကိုယ်သည် ‘ထိုက်ကျိမိုးကြိုးရေကန်’ အတွင်းမှ ခုန်ထွက်လာခဲ့သည်။ သူ၏ ခန္ဓာကိုယ်တစ်ခုလုံးတွင် သိပ်သည်းလှသော မိုးကြိုး လျှပ်စီးမှော်သင်္ကေတများ ရစ်ပတ်နေပြီး၊ ကြီးမားလှသော အစီအရင်များစွာက သူ့ကို ဝန်းရံကာ အနှိုင်းမဲ့ စွမ်းအားများကို ထုတ်ဖော်နေသည်။

“ယန်ချန်း... ရှင်ခြင်းနဲ့ သေခြင်း၊ အောင်မြင်ခြင်းနဲ့ ရှုံးနိမ့်ခြင်းဆိုတာ အခုအချိန်ပေါ်မှာပဲ မူတည်တယ်။ ငါက ‘ထိုက်ကျိမိုးကြိုးရေကန်’ ရဲ့ စွမ်းအားကို သုံးပြီး မင်းရဲ့ ခန္ဓာကိုယ်ထဲက အပ်စိုက်မှတ်ပေါင်း နှစ်ရာကျော်ကို ဖွင့်ပေးခဲ့ပြီးပြီ။ ဒါ့အပြင် ‘ဘိုးဘေးနဂါးရဲ့ အဆီအနှစ်’ နဲ့ ‘အနန္တရွှေဆေးလုံး’ ရဲ့ အာနိသင်တွေကို သုံးပြီး မင်းရဲ့ ရုပ်ခန္ဓာကို ‘လူသားအင်မော် တယ်’ အဆင့်ရောက်အောင် အတင်းအကျပ် မြှင့်တင်ပေးထားတယ်။ အခု ငါ မင်းကို ‘သူရဲကောင်းမှတ်တမ်း’ ထဲကို ပို့ပေးမယ်။ အဲဒီမှာ မဟာကျိုးမင်းဆက်ကို တည်ထောင်ခဲ့ တဲ့ ဘိုးဘေးကြီး ကျိုးထိုက်ကျူ၊ ယုဝမ်မူ၊ အရိုးဖြူပညာရှင်၊ ခွန်အားနတ်ဘုရားနဲ့ မူလ ဝိညာဉ်နတ်ဘုရားတို့ရဲ့ အတွေ့အကြုံတွေ၊ မှတ်ဉာဏ်တွေနဲ့ အသိစိတ်တွေကို စုပ်ယူရ မယ်။ တကယ်လို့ မင်းသာ ဒီမှတ်ဉာဏ်ထုကြီးကို ခံနိုင်ရည်ရှိမယ်ဆိုရင် တစ်ထိုင်တည်းနဲ့ အစစ်အမှန် လူသားအင်မော်တယ်တစ်ပါး ဖြစ်လာလိမ့်မယ်။ ဒါပေမဲ့ ဒီနည်းလမ်းက အလွန်အန္တရာယ်များပြီး စိတ်ဖောက်ပြန်သွားနိုင်တယ်။ ငါကတော့ ဒီနည်းလမ်းကို သဘောမတူပေမဲ့ မင်းက တောင်းဆိုနေတော့လည်း ငါ မင်းရဲ့ဆန္ဒကို ဖြည့်ဆည်းပေးရမှာ ပဲ။”

ဟုန်ယွိသည် ထိုက်ကျိမိုးကြိုးရေကန် ဘေးတွင် ရပ်ကာ ရေကန်အတွင်းမှ ခုန်ထွက်လာ သော မင်းသားယုကို ကြည့်ရင်း လေးနက်စွာ ပြောလိုက်သည်။

တစ်ချိန်တည်းမှာပင် သူသည် ‘သူရဲကောင်းမှတ်တမ်း’ ကို ဖွင့်လှစ်လိုက်ပြီး မင်းသားယုကို ထိုအတွင်းသို့ တိကျစွာ ခုန်ဝင်စေလိုက်သည်။ အဆင့်မြင့်နတ်ဘုရား ငါးဦးခြောက်ဦးခန့်၊ နှစ်ပေါင်းတစ်ထောင်သက်တမ်းရှိ မိစ္ဆာကြီးတစ်ဦးနှင့် ဧကရာဇ်အကြံပေးတစ်ဦး (ယုဝမ်မူ) တို့၏ ကြီးမားလှသော မှတ်ဉာဏ်များနှင့် ထူးခြားဆန်းပြားသော ဘဝအတွေ့အကြုံများကို မင်းသားယု ခံစားနိုင်ရန် သူ အစွမ်းကုန် ကြိုးစားပေးနေသည်။

ထိုနှစ်က ‘မူလဝိညာဉ်နတ်ဘုရား’ သည် ‘ဘုံသုံးပါးမူလစွမ်းအင်ရေကန်’ ကို အသုံးပြု၍ ချန်ပီယံမြို့စားကို လူသားအင်မော်တယ် ဖြစ်အောင် ပြုလုပ်ပေးခဲ့ဖူးသည်။

ယခုအခါ ဟုန်ယွိ၌မူ ‘ဘုံသုံးပါးမူလစွမ်းအင်ရေကန်’ ထက် ဆယ်ဆမျှ ပိုမိုစွမ်းအားကြီးမား သော ‘သူတော်စင်ပေါင်းစုံ ခန်းမဆောင်’ ရှိနေပြီဖြစ်သည်။ ထိုက်ကျိမိုးကြိုးရေကန်၊ ရှေးဟောင်း ရာမွန်ရှိုတံခါးမှ ပေါင်းစပ်ထားသော သူရဲကောင်းမှတ်တမ်းနှင့် အင်မော်တယ် ကျောက်စာတိုင်တို့အပြင်၊ သူ၏ကျင့်စဉ်အဆင့်မှာလည်း ‘ဖန်ဆင်းရှင်’ အဆင့်သို့ ရောက်ရှိ နေပြီ ဖြစ်သည်။ ၎င်းအပြင် နဂါးစွယ်ဆန်၊ အနန္တရွှေဆေးလုံးကလေးငယ် စသည်တို့လည်း ရှိနေသေးသည်။

သူတော်စင်ပေါင်းစုံခန်းမ၏ ထုတ်တန်းပေါ်ရှိ ‘ဆာဟာရတနာသစ်ပင်’ မှာလည်း ကျင့်ကြံခြင်းအတွက် အလွန်ပင် အကျိုးရှိသော မနှိုင်းယှဉ်နိုင်သည့် ရတနာတစ်ခု ဖြစ်သည်။

ဤစုဆောင်းမှုအားလုံးမှာ မူလဝိညာဉ်နတ်ဘုရားထက် များစွာ သာလွန်နေပြီး၊ တိုင်ရှန် တာအိုဂိုဏ်းချုပ် မုန့်ရှန်းကျီထက်ပင် ပိုမိုတောင့်တင်းခိုင်မာနေသည်။

ထို့ကြောင့် မင်းသားယု၏ ရုပ်ခန္ဓာကို လူသားအင်မော်တယ်အဖြစ် အတင်းအကျပ် သန့်စင် ပေးခြင်းမှာ ဟုန်ယွိအတွက် ကြီးမားသော ကိစ္စမဟုတ်ပေ။ အနှစ်သာရ စွမ်းအင်များစွာ ကုန်ဆုံးသွားရုံသာ ရှိသည်။

အမှန်စင်စစ် ဟုန်ယွိသည် ဤနည်းလမ်းကို အသုံးပြု၍ သူ၏ နောက်လိုက်များကို အင်အား တောင့်တင်းအောင် ပြုလုပ်ပေးနိုင်သည်။ သို့သော် ခိုင်မာသော အခြေခံရရှိရန်အတွက် အဆင့်ဆင့် ကျင့်ကြံအားထုတ်ရန် လိုအပ်သည်။ လူသားအင်မော်တယ်အဖြစ်သို့ အလောတကြီး မြှင့်တင်ခြင်းမှာ ဘေးထွက်ဆိုးကျိုး များလှသည်။ သို့သော် မင်းသားယုမှာ အရေးပါသော ပုဂ္ဂိုလ်တစ်ဦးဖြစ်သလို၊ ဟုန်ယွိ လက်စားချေနိုင်ရန်အတွက် အဓိက သော့ချက်လည်း ဖြစ်သည်။ ထို့ကြောင့် အန္တရာယ်ကို မမှုဘဲ အင်အားကို အမြန်ဆုံး တိုးမြှင့်လိုသော မင်းသားယု၏ ဆန္ဒကို ဟုန်ယွိက ဖြည့်ဆည်းပေးလိုက်ခြင်း ဖြစ်သည်။

အပ်စိုက်မှတ်များ အားလုံးပွင့်သွားပြီး သိုင်းကျမ်းများစွာနှင့် ပြောင်းလဲခြင်းတာအို၏ အဆီအနှစ်များကို သင်ယူပြီးနောက်၊ မင်းသားယုသည် စိတ်ကို တည်ငြိမ်အောင် ထားလိုက် စဉ်မှာပင် ပုံရိပ်ယောင် လျှို့ဝှက်တံခါးတစ်ခုက သူ့ကို ‘သူရဲကောင်းမှတ်တမ်း’ အတွင်းသို့ ဆွဲခေါ်သွား လေသည်။

၎င်းနောက်တွင် မရေမတွက်နိုင်သော မှတ်ဉာဏ်များမှာ သူ၏ စိတ်အတွင်းသို့ စီးဝင်လာ ပြီး၊ ဘဝပေါင်းများစွာကို ကိုယ်တိုင် ဖြတ်သန်းနေရသကဲ့သို့ ခံစားလိုက်ရသည်။

“မင်းသားယုရဲ့ စိတ်ဓာတ်က ထူးထူးခြားခြား ကြံ့ခိုင်တာပဲ။ ဧကရာဇ်တစ်ပါး ဖြစ်ချင်တဲ့ သူ့ရဲ့စိတ်ဆန္ဒက ကျောက်ဆောင်ကြီးတစ်ခုလို ခိုင်မာနေတယ်။ အဆုံးမရှိတဲ့ မှတ်ဉာဏ် တွေ ကြားမှာ သူ့စိတ်က ပျောက်ဆုံးမသွားခဲ့ဘူး။ သူက တကယ့်ကို အဖိုးတန်တဲ့ လူသား အရင်းအမြစ်ပဲ။ နောင်တစ်ချိန်မှာ သူသာ ဧကရာဇ်တစ်ပါး ဖြစ်လာရင် တကယ့်ကို ကြောက်စရာ ကောင်းတဲ့ ပုဂ္ဂိုလ်တစ်ယောက် ဖြစ်လာမှာပဲ” ဟုန်ယွိက မှတ်တမ်းအတွင်းရှိ မင်းသားယု၏ အခြေအနေကို အာရုံစိုက် စောင့်ကြည့်ရင်း တွေးလိုက်သည်။

ယခုအချိန်တွင် မင်းသားယု ဖြတ်သန်းနေရသော ဘဝမှာ ကျိုးမင်းဆက်ကို တည်ထောင်သူ ဘိုးဘေးကြီး ကျိုးထိုက်ကျူ၏ ဘဝဖြစ်စဉ် ဖြစ်သည်။ သူသည် စစ်ဗျူဟာများတွင် အနှိုင်းမဲ့ ပြီး၊ တစ်ကမ္ဘာလုံးကို သိမ်းပိုက်အောင်နိုင်ခဲ့သူ ဖြစ်သည်။

ကျိုးထိုက်ကျူ၏ မှတ်ဉာဏ်များကို ရရှိခြင်းမှာ သာမန်လူများအတွက် ခံနိုင်ရည်ရှိရန် ခက်ခဲလှသည်။ သို့သော် ဧကရာဇ်တစ်ပါး ဖြစ်လိုသော မင်းသားယုကဲ့သို့ သူများအတွက်မူ အသင့်တော်ဆုံးပင် ဖြစ်သည်။

အခက်အခဲအားလုံးကို ကျော်ဖြတ်နေစဉ်အတွင်း မင်းသားယု၏ စိတ်ဓာတ်မှာ အကြိမ်ကြိမ် တုန်လှုပ်ခဲ့သော်လည်း၊ သူ၏ ပြင်းထန်လှသော စိတ်ဆန္ဒဖြင့် ပြန်လည်ထိန်းချုပ်နိုင်ခဲ့ သည်။ ဟုန်ယွိသည် ၎င်းကိုကြည့်ကာ တိတ်တဆိတ် ချီးကျူးမိသည်။

“ကောင်းကင်ဘုံ၏ အမိန့်တော်ကို ခံယူလျက်၊ ထာဝရ သာယာဝပြောမှုကို ခံစားစေအံ့”

ပြင်းထန်လှသော အတွေးစ စွမ်းအင်များမှာ စာအုပ်အတွင်းမှ ရုတ်တရက် ပေါက်ကွဲထွက် လာပြီး မင်းသားယု၏ ခန္ဓာကိုယ်မှာ စာအုပ်အတွင်းမှ ခုန်ထွက်လာသည်။ သူ၏ မျက်ဝန်း များတွင် ရက်စက်ပြီး အာဏာစက်ပြင်းထန်သော အရှိန်အဝါများအပြင်၊ တစ်ကမ္ဘာလုံးကို အုပ်စိုးမည့် တကယ့် တည်ထောင်သူ ဧကရာဇ်တစ်ပါး၏ နတ်ဘုရားတာအိုများ ထင်ဟပ် နေသည်။

“ဟားဟားဟား... ဟားဟားဟား...”

မင်းသားယုသည် ခုန်ထွက်လာပြီးနောက် ကျယ်လောင်စွာ ရယ်မောလိုက်သည်။ သူ၏ ရယ်သံမှာ ကျိုးထိုက်ကျူနှင့် ထပ်တူထပ်မျှပင်။ ကျိုးထိုက်ကျူ ပြန်လည်ရှင်သန်လာပြီး မင်းသားယု၏ ခန္ဓာကိုယ်ကို သိမ်းပိုက်လိုက်သကဲ့သို့ပင် ရှိတော့သည်။

“ဟုန်ယွိ... မင်း ငါ့ကို သတ်လို့မရဘူး။ ငါ့မှာ မဟာဖျက်ဆီးခြင်း နတ်ဘုရားရှိတယ်...” ကျိုးထိုက်ကျူ၏ အသံမှာ မင်းသားယု၏ ပါးစပ်မှ ထွက်ပေါ်လာသည်။ ဟုန်ယွိက သူ့ကို သန့်စင်လိုက်သည့် အချိန်၌ သူသည် လူ့လောကသို့ ပြန်လည်ရောက်ရှိလာသကဲ့သို့ပင်။

“ဟွန့်” ဟုန်ယွိသည် နေရာမှ မရွေ့ဘဲ နှာခေါင်းတစ်ချက် ရှုံ့လိုက်သည်။ ထိုအသံသည် လေထုကို တုန်ခါသွားစေပြီး၊ သူ၏ အတွေးစွမ်းအင်များ ထွက်ပေါ်လာကာ မင်းသားယုကို အရပ်မျက်နှာအနှံ့မှ လွှမ်းခြုံလိုက်သည်။

ရုတ်တရက် ကျိုးထိုက်ကျူ၏ အသံမှာ တိတ်ဆိတ်သွားတော့သည်။

“အံ့ဩစရာပဲ။ ငါ ခုနက ဝိညာဉ်ပူးကပ်ခံလိုက်ရသလို ခံစားလိုက်ရတယ်” မင်းသားယုက သတိပြန်ဝင်လာပြီး တုန်တုန်ရင်ရင် ပြောလိုက်သည်။

“ဒါဟာ ဝိညာဉ်ပူးတာ မဟုတ်ပါဘူး။ ကျိုးထိုက်ကျူရဲ့ မှတ်ဉာဏ်တွေက မင်းကို ဝါးမြိုသွား တာပါ။ တကယ်လို့ ငါသာ မင်းကို မကာကွယ်ပေးခဲ့ရင် မင်းဟာ အဲဒီ ဘိုးဘေးကြီးလိုပဲ မင်းလည်း အာဏာမက်တဲ့ ဧကရာဇ်တစ်ပါး ဖြစ်သွားလိမ့်မယ်” ဟုန်ယွိက ပြုံးလျက် ဆိုသည်။ “ဘယ်လိုလဲ... ဘယ်လိုခံစားရလဲ။”

“ငါ အခု ဧကရာဇ်တို့ရဲ့လမ်းစဉ်ကို တကယ် နားလည်သွားပြီလို့ ခံစားရတယ်။ ဒါဟာ နန်းတွင်းမှာ အာဏာလုဖို့အတွက် လုံလောက်ပြီ။ ဒါ့အပြင် ကျိုးထိုက်ကျူရဲ့ ထူးခြားတဲ့ သိုင်းပညာတွေကလည်း ငါ့အတွက် အများကြီး အကျိုးရှိစေတယ်” မင်းသားယုက ခဏ စဉ်းစားပြီး ပြန်ပြောသည်။

“ကောင်းပြီ။ ဒီနေ့ မင်း ဒီ ‘သူတော်စင်ပေါင်းစုံ ခန်းမ’ မှာပဲ ကျင့်ကြံပါ။ မနက်ဖြန်ကျရင် နောက်ထပ် ပညာရှင်တစ်ယောက်ရဲ့ ဘဝကို ဖြတ်သန်းရမယ်။ ကိုးရက်အကြာမှာတော့ ဟုန်ရွှန်ကျိရဲ့ ကိုယ်လုပ်တော် လက်ထပ်ပွဲကို ဂုဏ်ပြုဖို့ ဝူဝမ်မြို့စား စံအိမ်တော်ကို ငါတို့ သွားကြတာပေါ့” ဟုန်ယွိက ပြောလိုက်သည်။

နောက်ရက်အနည်းငယ်အတွင်း ဟုန်ယွိ၏ အပြည့်အဝ ကာကွယ်စောင့်ရှောက်မှုအောက် တွင် မင်းသားယုသည် ယုဝမ်မူ၊ အရိုးဖြူပညာရှင်နှင့် ခွန်အားကြီးနတ်ဘုရားတို့၏ ဘဝများ ကို ဖြတ်သန်းခဲ့သည်။ အန္တရာယ်များစွာကို ဟုန်ယွိက ကျော်ဖြတ်ပေးခဲ့ပြီး၊ အင်မော်တယ် ကျောက်စာတိုင်၏ အကူအညီလည်း ပါဝင်သည်။ ထိုကျောက်စာတိုင်ပေါ်တွင် ဝိညာဉ်ကို နှိမ်နင်းနိုင်သော အစီအရင်များစွာ ရှိနေသောကြောင့် ဖြစ်သည်။

ဤရက်များအတွင်း မင်းသားယု၏ သိုင်းပညာမှာ အံ့မခန်း တိုးတက်လာခဲ့သည်။ တစ်ချိန် တည်းမှာပင် ဟုန်ယွိသည် ‘ကောင်းကင်သခင်အကြွင်းမဲ့’ ထံမှ ရရှိထားသော ‘မိုးမြေသခင် ဝတ်ရုံတော်’ နှင့် ‘လိုတရတောင်ဝှေး’ တို့ကို ‘အရုဏ်ဦးချပ်ဝတ်’ နှင့် ပေါင်းစပ်လိုက်သည်။ သူသည် ၎င်းတို့ကို အလွန်စွမ်းအားကြီးမားသော သံချပ်ကာဝတ်ရုံတစ်ခုအဖြစ် သန့်စင် လိုက်ပါသည်။

“နဂါး၊ ချီလင်၊ ဇမ္ဗူအစီအရင်၊ တောင်တန်းနှင့်မြစ်တံတား၊ ရှီကျိ၊ နေ၊ လ၊ ကြယ်တာရာ၊ ထိုက်ကျိ အဋ္ဌဂံပုံရိပ်ကားချပ်၊ ယင်ယန်နှင့် ဓာတ်ကြီးငါးပါး၊ ကောင်းကင်အလင်း ဦးချို နတ်ဘုရားချပ်ဝတ်၊ သေမင်းအလင်းနတ်ဘုရားလှံ... စုစည်းကြစမ်း။”

ဟုန်ယွိ ပြောလိုက်သည်နှင့် သူ၏ လူသားအင်မော်တယ် ကိုယ်ပွား၊ နတ်ဘုရားကျောက်တုံး ဝိညာဉ်သန္ဓေသားနှင့် ပေါင်းစပ်ထားသော ‘ကောင်းကင်အလင်း ဦးချို နတ်ဘုရားချပ်ဝတ်’ နှင့် ‘သေမင်းအလင်းနတ်ဘုရားလှံ’ တို့ ထွက်ပေါ်လာသည်။

ကောင်းကင်အလင်းဦးချို နတ်ဘုရားချပ်ဝတ်၊ မိုးမြေသခင်ဝတ်ရုံတော်၊ လိုတရတောင်ဝှေး နှင့် အရုဏ်ဦးချပ်ဝတ်တို့ကို မရေမတွက်နိုင်သော မူလစွမ်းအင်များ၊ ရတနာများနှင့် ရောနှောကာ သန့်စင်လိုက်ရာ ဝတ်ရုံတစ်စုံ ပေါ်ထွက်လာခဲ့သည်။ ကောင်းကင်ဘုံ နန်းတော်မှ ထွက်ပေါ်လာသော နတ်စောင်းသံများကံသို့ ဂီတသံစဉ်များ လွင့်ပျံလာသည်။

ဤချပ်ဝတ်မှာ ကျောက်စိမ်းကဲ့သို့ တောက်ပနေပြီး ရွှေချည်မျှင်များ၊ နဂါးအကြေးခွံများ၊ နေ၊ လ၊ ကြယ်တာရာများအပြင် တောင်တန်းနှင့် မြစ်တားပုံများဖြင့် ရက်လုပ်ထားသည်။ ထိုက်ကျိ အဋ္ဌဂံပုံရိပ်ကားချပ်၊ ယင်ယန်၊ ဓာတ်ကြီးငါးပါး၊ လောကသုံးပါး၊ ဆိတ်သုဉ်းခြင်း သုံးပါးနှင့် အချုပ်အနှောင်သုံးပါးတို့၏ အမှတ်အသားများလည်း ပါဝင်နေသည်။ ၎င်းသည် ဧကရာဇ်တစ်ပါး ဆောင်းသော သရဖူနှင့် ဝတ်ဆင်သော နဂါးဝတ်ရုံနှင့်ပင် တူလှသည်။

“ဘယ်လောက်တောင် ထူးခြားလိုက်လဲ။” မင်းသားယုသည် ထိုဝတ်ရုံကို ကြည့်ကာ ဖော်မပြနိုင်သော ခံစားချက်များ ဖြစ်ပေါ်နေသည်။

“ဒီဝတ်ရုံဟာ ငါ အားအစိုက်ဆုံး သန့်စင်ခဲ့တဲ့ အရာပဲ။ ဒါဟာ ကောင်းကင်အလင်းဦးချို နတ်ဘုရားချပ်ဝတ်ထက် သာလွန်ပြီး ‘ကောင်းကင်နဂါးဘုရင် နတ်ဘုရားချပ်ဝတ်’ နဲ့ တောင် ယှဉ်နိုင်စွမ်း ရှိတယ်။ ဒါ့အပြင် ငါ ကောင်းကင်အလင်း ဦးချို နတ်ဘုရားချပ်ဝတ် ကို ပါ ဒီထဲမှာ ပေါင်းစပ်ထားလို့ အသွင်အမျိုးမျိုး ပြောင်းလဲနိုင်တယ်။ ဒီဝတ်ရုံကို ဝတ်ထားရင် ဖန်ဆင်းရှင်အဆင့် ပညာရှင်တစ်ယောက်နဲ့ မတွေ့မချင်း မင်းဟာ တစ်ကမ္ဘာလုံးကို ငုံ့ကြည့်နိုင်လိမ့်မယ်။” ဟုန်ယွိက ဂုဏ်ယူစွာ ပြောလိုက်သည်။

“မင်းရဲ့ အကာကွယ်ဝတ်ရုံဖြစ်တဲ့ ကောင်းကင်အလင်းဦးချို နတ်ဘုရားချပ်ဝတ်ကိုပါ ဒီထဲ မှာ ထည့်လိုက်တာလား။” မင်းသားယု ထိတ်လန့်သွားပါသည်။

“ငါ့ရဲ့ ရုပ်ခန္ဓာက အမြင့်ဆုံးအဆင့်အထိ ရောက်နေပြီဆိုတော့ ဒီချပ်ဝတ်က ငါ့အတွက် မလိုတော့ဘူး။ အဲဒီချပ်ဝတ် ရှိရှိမရှိရှိ ကိစ္စမရှိပါဘူး” ဟုန်ယွိက ပြုံးလျက် ဆိုသည်။ သူပြောသည်မှာ အမှန်ပင် ဖြစ်သည်။ ယခုအခါ နတ်ဘုရားကျောက်တုံး ဝိညာဉ်သန္ဓေသား ၏ စွမ်းအားများ အပြည့်အဝ ထွက်ပေါ်နေပြီဖြစ်ရာ အပ်စိုက်မှတ်တစ်ခု ဖွင့်တိုင်း သူ၏ စွမ်းအားက တိုးတက်နေမည် ဖြစ်သည်။

ကောင်းကင်အလင်းဦးချို နတ်ဘုရားချပ်ဝတ်၊ သေမင်းအလင်းနတ်ဘုရားလှံ၊ အရုဏ်ဦး ချပ်ဝတ်၊ မိုးမြေသခင်ဝတ်ရုံတော်၊ လိုတရတောင်ဝှေးနှင့် တခြားသော ရတနာများ ပေါင်းစပ်ထားသည့် ဤဝတ်ရုံသည် မင်းသားယုအတွက်မူ အကောင်းဆုံးသော လက်ဆောင်ပင် ဖြစ်သည်။

“ဒီဝတ်ရုံကို နာမည်တစ်ခု ပေးသင့်တယ်...” မင်းသားယုက ခန်းမအလယ်တွင် လွင့်ပျံနေ သော ဝတ်ရုံကို ကြည့်ကာ ပြောလိုက်သည်။

“ရှေးယခင်က ဧကရာဇ်ဖန်၊ မူလဧကရာဇ်၊ ရှီဟွမ်ဧကရာဇ် စသဖြင့် ရှိခဲ့ကြတယ်။ မင်းရဲ့ နာမည်ကလည်း မင်းသားယု ဖြစ်နေတော့၊ နောင်တစ်ချိန် မင်း ဧကရာဇ်တစ်ပါး ဖြစ်လာ ရင် ‘ကျောက်စိမ်းဧကရာဇ်’ လို့ ခေါ်ကြမှာပေါ့။ ဟုတ်ပြီ... ကျောက်စိမ်းဧကရာဇ်၊ ဒါကြောင့် ဒီဝတ်ရုံကို ‘ကျောက်စိမ်းဧကရာဇ်ဝတ်ရုံ’ လို့ ခေါ်ရအောင်” ဟုန်ယွိက ခဏမျှ စဉ်းစားပြီး နောက် ပြောလိုက်သည်။

“ကျောက်စိမ်းဧကရာဇ်... ကျောက်စိမ်းဧကရာဇ်... ငါဟာ အခုတော့ မင်းသားယု အဆင့်ပဲ ရှိသေးပေမဲ့ ဟုန်ယွိရဲ့ အကူအညီနဲ့ဆိုရင် ကျောက်စိမ်းဧကရာဇ် အစစ်အမှန် ဖြစ်လာမှာ သေချာတယ်။” မင်းသားယုသည် သူ၏ လက်သီးကို တင်းတင်းဆုပ်လိုက်သည်။

ထို့နောက် ဟုန်ယွိ ဖန်တီးပေးသော ‘ကျောက်စိမ်းဧကရာဇ် ဝတ်ရုံ’ သည် မင်းသားယု၏ ခန္ဓာကိုယ်ပေါ်သို့ ကျရောက်သွားပြီး သူ၏ အရေပြားနှင့် တစ်သားတည်း ပေါင်းစပ်သွား လေသည်။

စွမ်းအားများ အဆုံးမရှိ တိုးတက်လာသည်နှင့်အမျှ မင်းသားယုသည် တကယ့် ကျောက်စိမ်းဧကရာဇ် တစ်ပါးကဲ့သို့ ခေါင်းကို မော့လိုက်လေသည်။

ဟုန်ယွိက မင်းသားယု၏ သိုင်းပညာ တိုးတက်စေရန် စွမ်းအင်များနှင့် ရတနာများကို အသုံးပြု၍ ကူညီပေးနေချိန်တွင်၊ ဟုန်ရွှန်ကျိ ကိုယ်လုပ်တော် လက်ထပ်တော့မည့် သတင်း မှာ ကျောက်စိမ်းမြို့တော် တစ်ခုလုံးသို့ ပျံ့နှံ့သွားခဲ့သည်။

ဟုန်ရွှန်ကျိသည် ယခုအခါ နန်းတွင်း ဧကရာဇ်အကြံပေးတစ်ဦး ဖြစ်နေပြီး၊ ဧကရာဇ် တစ်ပါးတည်း၏ အောက်တွင်ရှိကာ လူအပေါင်း၏ အထက်တွင် ရှိနေသူ ဖြစ်သည်။ သူ၏ အာဏာစက်မှာ ကြီးမားလှသလို၊ သိုင်းပညာမှာလည်း အထွတ်အထိပ်သို့ ရောက်ရှိနေ သည်။ စာပေလောကတွင် သူ၏ ဂုဏ်သတင်းမှာ ဟုန်ယွိကြောင့် မှေးမှိန်သွားခဲ့သော် လည်း၊ ဟုန်ယွိ၏ ဖခင်ဖြစ်နေသောကြောင့် သူ၏ နာမည်မှာလည်း ဆက်လက် ကြီးကျယ် နေဆဲပင်။

သူသည် ကိုယ်လုပ်တော် တစ်ဦးကို လက်ထပ်မည် ဖြစ်သော်လည်း၊ မည်သူ့ကို လက်ထပ် မည်နည်းဟူသော အချက်မှာ လူအများ စိတ်ဝင်စားစရာ ဖြစ်နေသည်။

သတင်းများအရ ဟွာလျှိုမင်းသမီးသည် သူမ၏ တိုင်းပြည် ပျက်စီးတော့မည် ဖြစ်သော ကြောင့် ဧကရာဇ်အကြံပေးထံတွင် ကိုယ်လုပ်တော်အဖြစ် ခိုလှုံရန် ဆုံးဖြတ်ခဲ့ခြင်း ဖြစ်သည်ဟု ဆိုကြသည်။ ကိုယ်လုပ်တော်၏ အဆင့်အတန်းမှာ နိမ့်ကျသော်လည်း ဤလက်ထပ်ပွဲမှာ မြို့တော်တစ်ခုလုံးကို လှုပ်ခတ်စေခဲ့သည်။

သို့သော် အခြေအနေကို နားလည်သော အချို့သော အထက်တန်းလွှာ မျိုးနွယ်စုဝင်များမှာ မူ ဟုန်ရွှန်ကျိ လက်ထပ်မည့် ကိုယ်လုပ်တော်မှာ ‘အနှစ်သာရ နတ်ဘုရားကျောင်း’ နှင့် ပတ်သက်နေသည်ဟု ရိပ်မိကြသည်။ အမှန်စင်စစ် လက်ထပ်မည့်သူမှာ အနှစ်သာရ နတ်ဘုရားကျောင်း၏ ယဇ်ပုရောဟိတ်အရှင်မ ဖြစ်နေသည်ကိုမူ သူတို့ မသိကြပေ။ သို့သော် အားလုံးက ထိုလက်ထပ်ပွဲနေ့တွင် သွားရောက် ဂုဏ်ပြုရန် ပြင်ဆင်နေကြသည်။

တော်ဝင်ချန်မင်းဆက်၏ ၆၅ နှစ်မြောက် ဆောင်းရာသီ အလယ်တွင် ကျောက်စိမ်း မြို့တော်၏ အကြီးကျယ်ဆုံး ဖြစ်ရပ်မှာ နှစ်သစ်ကူးပွဲ မဟုတ်သလို၊ နန်းတွင်း၏ လူငယ် ဗိုလ်ချုပ်လေး (ရှောင်ရှိူုက်) အနောက်ဘက်ဒေသကို သိမ်းပိုက်ခြင်းလည်း မဟုတ်ပေ။ ၎င်းမှာ ဧကရာဇ်အကြံပေး ဟုန်ရွှန်ကျိ၏ ကိုယ်လုပ်တော် လက်ထပ်ပွဲပင် ဖြစ်သည်။

ဟုန်ရွှန်ကျိ၏ သားဖြစ်သူ၊ ကျိုးယိအကယ်ဒမီ၏ ကျောင်းအုပ်ကြီးဖြစ်သော ဟုန်ယွိသည် ထိုပွဲသို့ သွားရောက် ဂုဏ်ပြုပါမည်လော။ လူအပေါင်းက ဤအချက်ကို စောင့်ကြည့်နေကြ သည်။ ဟုန်ယွိနှင့် ဝူဝမ်မြို့စား အိမ်တော်တို့မှာ ဆက်ဆံရေး မကောင်းကြသည်မှာ လူတိုင်း သိထားသော လျှို့ဝှက်ချက် ဖြစ်သည်။

“ဒီတစ်ခါ ဧကရာဇ်အကြံပေးရဲ့ လက်ထပ်ပွဲကို ဟုန်ယွိ တက်ရောက်မလား မသိဘူး။ သားအဖနှစ်ယောက်ကြားမှာ ရန်ငြိုးက တော်တော်လေး နက်ရှိုင်းခဲ့တာကိုး။”

“အဲဒါတော့ ဟုတ်တယ်။ ဟုန်ယွိက အခု ပညာရှင် သူတော်စင် တစ်ပါး ဖြစ်နေပြီလေ။ သူက ဧကရာဇ်အကြံပေးနဲ့ ဂိုဏ်းမတူဘူး။ တစ်ယောက်က ‘ပြောင်းလဲခြင်း’ ပညာရပ်ကို လေ့လာပြီး၊ နောက်တစ်ယောက်က ‘ကွန်ဖြူးရှပ်’ ပညာကို လေ့လာတာ။ ဂိုဏ်းနှစ်ခုကြား မှာ အားပြိုင်မှုကလည်း ပြင်းထန်တယ်။ ‘လေးရာသီအကယ်ဒမီ’ ရဲ့ ကျောင်းအုပ်ကြီး ဟွမ်ထျန်ပေါ်တောင် ဟုန်ယွိရဲ့ ငြင်းခုံမှုကို မခံနိုင်ဘဲ သေသွားရရှာတာ။ ဒါပေမဲ့ ဟုန်ယွိသာ ဒီပွဲကို မလာရင် သူဟာ စည်းမျဉ်းတွေကို မလေးစားရာ ကျလိမ့်မယ်။ အဲဒီလိုဆိုရင်တော့ ငါ သူ့ကို ကန့်ကွက်ရလိမ့်မယ်။”

ကျောက်စိမ်းမြို့တော်ရှိ နန်းတွင်း မဟာပညာရှင်ဟောင်းတစ်ဦး၏ အိမ်တော်တွင် ဝတ်စုံ ပြည့် ဝတ်ဆင်ထားသော အရာရှိနှစ်ဦး စကားပြောနေကြသည်။ ၎င်းတို့မှာ ‘ယဉ်ကျေးမှုနှင့် ဓလေ့ထုံတမ်း ဝန်ကြီးဌာန’ မှ အရာရှိများ ဖြစ်ကြသည်။ ဟုန်ယွိကို ကန့်ကွက်မည်ဟု ပြောဆိုသူမှာ ဒုတိယဝန်ကြီး ကျန်းရင်ဖြစ်ပြီး သူသည် ကွန်ဖြူးရှပ်ဝါဒီ ဂိုဏ်းသားတစ်ဦး ဖြစ်သည်။

“အာ... အဖေ၊ ဘာလို့ ခြံထဲမှာ စာဖတ်နေတာလဲ။” ကျန်းရင် ပြောလိုက်သည်နှင့် ခြံထဲတွင် ‘ပြောင်းလဲခြင်းကျမ်း’ကို ကိုင်ကာ နှင်းထဲတွင် လမ်းလျှောက်ရင်း ဇီးပန်းများကို ကြည့်နေ သော အဘိုးအိုတစ်ဦးကို တွေ့လိုက်ရသည်။ သူကား ကျန်းရင်၏ ဖခင်၊ မဟာပညာရှင်ကြီး ကျန်းရှီကျယ်ပင် ဖြစ်သည်။ သူသည် နှစ်ပေါင်းများစွာ နန်းတွင်းပညာရှင်အဖြစ် တာဝန် ထမ်းဆောင်ခဲ့ပြီး ယခုအခါ အနားယူကာ ကျင့်ကြံနေသူ ဖြစ်သည်။ သူသည်လည်း ကွန်ဖြူးရှပ်ဝါဒီ ဂိုဏ်းသားတစ်ဦးပင်။

“မိုက်မဲတဲ့ကောင်... ဒူးထောက်စမ်း၊ မင်း ခုနက ဘာပြောလိုက်တာလဲ။ မင်းက ဟုန်ယွိကို ကန့်ကွက်မယ် ဟုတ်လား။ မင်းက ဘယ်လောက် ပညာတွေ တတ်နေလို့လဲ။ သူတော်စင် တစ်ပါးကို ကန့်ကွက်ရဲရအောင် မင်းက ဘယ်သူမို့လို့လဲ။ အရှက်မရှိလိုက်တာ။ ငါ စာဖတ် လာတာ အနှစ်ခြောက်ဆယ်ရှိပြီ။ ဒီ ‘ပြောင်းလဲခြင်းကျမ်း’ ရဲ့ နက်နဲမှုကို အခုမှ ငါ နားလည် လာတာ။ မင်းကများ သူတော်စင်တစ်ပါးရဲ့ လက်ရာကို ကန့်ကွက်ရဲတယ်ပေါ့။ ငါ ဇီးပန်းတွေကို ကြည့်ရင်း ဇီပန်းတွေရဲ့ဉပဒေသအချို့ကို ဆင်ခြင်နေတာကို မင်းက လာနှောင့်ယှက်တယ်။ ဒါက မင်း သူတော်စင်တစ်ပါးအပေါ် မလေးမစား ပြောဆိုခဲ့တဲ့ အကျိုးဆက်ပဲ။” မဟာပညာရှင်ကြီး ကျန်းရှီကျယ်က သူ့သားကို ဒေါသတကြီး ကြိမ်းမောင်းလိုက်လေသည်။

“ဒါပေမဲ့ အဖေ... အဖေလည်း ကွန်ဖြူးရှပ်ဝါဒီ ဂိုဏ်းသားတစ်ဦးပဲလေ...” ကျန်းရင်က စောဒကတက်သည်။

“ကွန်ဖြူးရှပ်ဝါဒက ‘ပြောင်းလဲခြင်းကျမ်း’ နဲ့ ဘယ်လိုမှ မနှိုင်းယှဉ်နိုင်ဘူး။ အဲဒါက အကိုင်းအခက်လေး တစ်ခုလောက်ပဲ ရှိတာ။” ကျန်းရှီကျယ်က ဒေါသတကြီး ဆိုသည်။

ဘုတ်….

ကျန်းရင်သည် သူ၏ ဖခင်ကို မလွန်ဆန်ရဲဘဲ ချက်ချင်းပင် ဒူးထောက်လိုက်ရသည်။

“နှင်းထဲမှာ ဒူးထောက်ပြီး ‘ပြောင်းလဲခြင်းကျမ်း’ ကို လေးနာရီကြာအောင် ဖတ်စမ်း။ သူတော်စင်တစ်ပါးရဲ့ လက်ရာဆိုတာ ဘာလဲ မင်း နားလည်သွားအောင် ငါ သင်ပေးမယ်။”

ထို့ကြောင့်ပင် ယဉ်ကျေးမှုနှင့် ဓလေ့ထုံတမ်းဝန်ကြီးဌာနမှ ဒုတိယဝန်ကြီးသည် အအေးဒဏ်ကို အံတုကာ နှင်းထဲတွင် ဒူးထောက်၍ ‘ပြောင်းလဲခြင်းကျမ်း’ ကို ဖတ်ရူနေရ လေတော့သည်။