အခန်း ၈၁၁

အခန်း (၈၁၁) - နှစ်တစ်ရာကြာပြီးနောက် ရွှမ်ဟွမ်ကမ္ဘာ၊ အလယ်အလတ်ကမ္ဘာငယ်များစွာကို ဖမ်းယူခြင်းနှင့် ဂိုဏ်း၏ကံကြမ္မာစွမ်းအားများ ကောင်းကင်ထိတိုင် ထိုးတက်သွားခြင်း(၁)။

အချိန်များက လျင်မြန်စွာ ကုန်လွန်သွားခဲ့ရာ မျက်စိတစ်မှိတ်အတွင်းမှာပင် နှစ်တစ်ရာအချိန်ကာလ ကုန်လွန်သွားခဲ့လေပြီ။ ကျင့်ကြံခြင်းလောကတွင် အချိန်ကာလဟူသည် မရှိဟုပင် ဆိုရပေမည်။

ရွှမ်ဟွမ်ကမ္ဘာ၊ ယွီကျိုးကုန်းမြေတိုက်ကြီး။

ထာဝရစိမ်းလန်းအင်မော်တယ်နွယ်ပင် ကြီးထွားလာပြီးကတည်းက အလယ်အလတ်ကမ္ဘာငယ်များကို အခါအားလျော်စွာ ဖမ်းယူခဲ့လေသည်။ လွန်ခဲ့သောနှစ်ပေါင်းနှစ်ရာအတွင်း အလယ်အလတ်ကမ္ဘာငယ် အမြောက်အမြားသည် ရွှမ်ဟွမ်ကမ္ဘာထဲသို့ ပေါင်းစည်းသွားခဲ့ပြီ ဖြစ်၏။

ဤသည်က ရွှမ်ဟွမ်ကမ္ဘာ၏ ထုထည်နှင့် မျက်နှာပြင်ဧရိယာကို အလွန်အမင်း တိုးတက်လာစေခဲ့၏။

တစ်ချိန်တည်းမှာပင် အလယ်အလတ်ကမ္ဘာငယ်အသီးသီးမှ သက်ရှိများသည်လည်း ရွှမ်ဟွမ်ကမ္ဘာအတွင်းသို့ ပေါင်းစည်းဝင်ရောက်လာခဲ့ကြသည်။

ရွှမ်ဟွမ်ကမ္ဘာ၏ အုပ်စိုးသူဂိုဏ်းကြီးဖြစ်သော ရွှမ်ဟွမ်ဂိုဏ်းသည် ရွှမ်ဟွမ်ကမ္ဘာထဲသို့ တလောကမှ ဝင်ရောက်လာကြသော ဤသက်ရှိများကို စီမံခန့်ခွဲရန် တာဝန်ယူရမည်မှာ သဘာဝပင် ဖြစ်လေသည်။

ထိုသို့မဟုတ်ပါက ကသောင်းကနင်းဖြစ်မှုများ အလွယ်တကူ ဖြစ်ပေါ်လာနိုင်သည် မဟုတ်ပါလော။

ယခုအချိန်တွင် ယွီကျိုးကုန်းမြေတိုက်ကြီး၏ ခေါင်ဖျားသောနေရာတစ်ခု၌ မီးခိုးရောင်မြူခိုးများ ဖုံးလွှမ်းနေလေသည်။

အကယ်၍ ဤနေရာတွင် ရွှမ်ဟွမ်ဂိုဏ်းမှ တပည့်တစ်ဦးဦးသာ ထွက်ပေါ်လာပါက သေချာပေါက် သိရှိမည်ဖြစ်သည်။

ဤသည်မှာ ယွီကျိုးကုန်းမြေတိုက်ကြီးထဲသို့ ကမ္ဘာတစ်ခု မကြာမီ ပေါင်းစည်းဝင်ရောက်လာတော့မည် ဖြစ်ခြင်းပင်။

အလုံးစုံပေါင်းစည်းမှု ပြီးစီးသွားမှသာလျှင် မီးခိုးရောင်မြူခိုးများ အပြီးတိုင် ပျောက်ကွယ်သွားမည်ဖြစ်ပြီး ယွီကျိုးကုန်းမြေတိုက်ကြီးနှင့် တစ်သားတည်း ဖြစ်သွားပေမည်။

ယွီကျိုးကုန်းမြေတိုက်ကြီးနှင့် ပေါင်းစည်းတော့မည့် ဤကမ္ဘာ၏ အမည်မှာ ယင်ရှားကမ္ဘာဟု ခေါ်ဆိုလေသည်။

ဤအမည်ခေါ်ဆိုရခြင်း၏ အကြောင်းရင်းမှာ ဤကမ္ဘာကို နတ်ဘုရားအသွင်ပြောင်းအဆင့်ရှိသော ယင်ရှားဂိုဏ်းက အုပ်ချုပ်ထားသောကြောင့်ပင် ဖြစ်၏။ ၎င်းသည် မိစ္ဆာလမ်းစဉ် ထွန်းကားသော ကမ္ဘာတစ်ခုဖြစ်ပြီး သာမန်လူများစွာမှာ ယင်ရှားဂိုဏ်း၏ အစားအစာများသာ ဖြစ်ကြလေသည်။

ယင်ရှားကမ္ဘာတွင် နေထိုင်ကြသော သာမန်လူများ၏ဘဝမှာ အလွန်တရာ သနားစရာကောင်းလှသည်။ သူတို့သည် ယင်ရှားဂိုဏ်းမှ တပည့်များ၏ သတ်ဖြတ်ခြင်းကို အလွယ်တကူ ခံရတတ်ပြီး၊ အခန့်မသင့်တိုင်း မြို့တစ်မြို့၊ သို့မဟုတ် နိုင်ငံတစ်နိုင်ငံလုံးပင် သတ်ဖြတ်ခံရလေ့ရှိ၏။

ဤသည်ကပင် ဤကမ္ဘာ၌ နာကြည်းချက်အငွေ့အသက်များ ကောင်းကင်သို့ ထိုးတက်နေစေပြီး မိစ္ဆာ၊ သရဲတစ္ဆေများ သောင်းကျန်းနေစေရန် ဖြစ်ပေါ်စေခဲ့လေသည်။

သို့တိုင် မည်သူကမျှ ယင်ရှားဂိုဏ်းကို မလှုပ်ခတ်နိုင်ကြချေ။

အဘယ်ကြောင့်ဆိုသော် ယင်ရှားဂိုဏ်းသည် ခွန်အားကြီးမားပြီး အနည်းဆုံး နတ်ဘုရားအသွင်ပြောင်းအဆင့် ကျင့်ကြံသူ ရာဂဏန်းခန့်က စောင့်ကြပ်နေသောကြောင့်ပင် ဖြစ်လေသည်။

ထိုမျှပင်မက ထောင်သောင်းချီသော ဝိညာဉ်သန္ဓေသားအဆင့် ဘိုးဘေးများလည်း ရှိနေသေး၏။

သာမန်လူများစွာသည် မည်မျှပင် ဒေါသထွက်၍ နာကြည်းနေစေကာမူ ဘာမှမတတ်နိုင်ကြချေ။

ဤအချိန်၌ ယင်ရှားဂိုဏ်း၏ စိတ်ဝိညာဉ်စိုက်ခင်းတစ်ခုတွင်…။

အဝတ်အစား စုတ်ပြတ်သတ်နေသော လယ်ကျွန်များစွာသည် စိတ်ဝိညာဉ်ဆန်များကို စိုက်ပျိုးရန် လယ်ထွန်နေကြလေသည်။

"အကုန်လုံး မှတ်ထားကြစမ်း။ ရိုးရိုးသားသား လယ်ထွန်ကြ။ ဒီနှစ် မင်းတို့ထဲက ဘယ်သူ့ရဲ့ စိတ်ဝိညာဉ်စိုက်ခင်းကမှ အသီးအနှံမလောက်ဘူးဆိုရင် မင်းတို့ရဲ့ အသက်နဲ့ ပြန်ပေးဆပ်ရမယ်။ ငါ ကြိုမပြောဘူးလို့ မင်းတို့ အပြစ်မတင်နဲ့...”

ယင်ရှားဂိုဏ်း၏ အတွင်းစည်းတပည့်တစ်ဦးက လယ်ကျွန်များစွာကို ရက်စက်ကြမ်းကြုတ်သော မျက်နှာဖြင့် စိုက်ကြည့်နေပြီး သတ်ဖြတ်လိုသော အငွေ့အသက်များ ပြည့်နှက်နေလေသည်။

သူ၏လက်ထဲတွင် အနက်ရောင် ကြာပွတ်တစ်ချောင်းကို ကိုင်ဆောင်ထား၏။

၎င်းမှာ ယင်ရှားဂိုဏ်းမှ ဖန်တီးထားသော ဆူးကြာပွတ် မှော်လက်နက်ဖြစ်ပြီး ဤကြာပွတ်ဖြင့် လူများကို ရိုက်နှက်ပါက သေကျေဒဏ်ရာရမှုများ မဖြစ်ပေါ်စေဘဲ အဆုံးမဲ့သော နာကျင်မှုကိုသာ ဖြစ်ပေါ်စေသည်။ မရေမတွက်နိုင်သော ပုရွက်ဆိတ်များ ကိုက်ဖြတ်နေသကဲ့သို့ အသက်ရှင်ရသည်ထက် သေရသည်က ပိုကောင်းသကဲ့သို့ ခံစားရစေပေမည်။

လယ်ကျွန်များစွာမှာ မကျေနပ်ကြသော်လည်း ဖွင့်ဟမပြောရဲကြချေ။

ယခုအချိန်တွင် သူတို့သည် လုံးဝ ထုံထိုင်းသွားကြပြီဖြစ်ကာ ယင်ရှားဂိုဏ်းအတွက် နာခံမှုရှိရှိဖြင့် လယ်ထွန်ပြီး စိတ်ဝိညာဉ်ဆန်များကိုသာ စိုက်ပျိုးပေးနိုင်တော့၏။

မှန်ပေသည်၊ ဤလယ်ကျွန်များသည်လည်း စိတ်ဝိညာဉ်အမြစ်များ ပိုင်ဆိုင်ထားသော ကျင့်ကြံသူများ ဖြစ်ကြသည်။ သို့သော် အဆင့်နိမ့် စိတ်ဝိညာဉ်အမြစ်ကိုသာ ပိုင်ဆိုင်ထားခြင်းဖြစ်လေသည်။

ယင်ရှားဂိုဏ်းအတွက် အဆင့်နိမ့် စိတ်ဝိညာဉ်အမြစ်ရှိသော ကျင့်ကြံသူများသည် ပျိုးထောင်ပေးရန် တန်ဖိုးမရှိလှပေ။

အဆင့်မြင့် စိတ်ဝိညာဉ်အမြစ်ရှိသော ကျင့်ကြံသူများသာလျှင် ယင်ရှားဂိုဏ်း၏ အတွင်းစည်းတပည့်များ ဖြစ်လာနိုင်ပြီး အစစ်အမှန်အမွေအနှစ်များကို ရရှိနိုင်လေသည်။

သို့တိုင် ယင်ရှားဂိုဏ်းက ဤအဆင့်နိမ့် စိတ်ဝိညာဉ်အမြစ်ရှိသော ကျင့်ကြံသူများကို ကျင့်ကြံရန် သင်ကြားပေးနေဆဲပင် ဖြစ်၏။

မည်သို့ပင်ဆိုစေကာမူ ယင်ရှားဂိုဏ်းသည် စိတ်ဝိညာဉ်ဆန်များ စိုက်ပျိုးရန်၊ စိတ်ဝိညာဉ်အသားများ မွေးမြူရန်၊ သတ္တုတူးဖော်ရန် စသည်တို့အတွက် လူအင်အား အမြောက်အမြား လိုအပ်လေသည်။

ဤကြမ်းတမ်းသော အလုပ်များကို အဆင့်နိမ့်ကျင့်ကြံသူများက လုပ်ဆောင်ရန် လိုအပ်ပြီး အဆင့်မြင့်ကျင့်ကြံသူများက အရာရာကို ကိုယ်တိုင်ကိုယ်ကျ လုပ်ဆောင်၍ မရနိုင်ပေ။

ထို့ကြောင့် ဤအဆင့်နိမ့် စိတ်ဝိညာဉ်အမြစ်ရှိသော ကျင့်ကြံသူများသည် ယင်ရှားဂိုဏ်း၏ ကျွန်လုပ်သားများ ဖြစ်လာကြလေတော့သည်။

သူတို့သည် သေသည်အထိတိုင်အောင် အခြေတည်အဆင့်သို့ ထိုးဖောက်ဝင်ရောက်နိုင်မည် မဟုတ်ချေ။

မျိုးဆက်တစ်ခုပြီးတစ်ခုပင်လျှင် သူတို့သည် ယင်ရှားဂိုဏ်း၏ ကျွန်များသာ ဖြစ်လာနိုင်ပြီး ယင်ရှားဂိုဏ်းအတွက် ကျင့်ကြံခြင်း အရင်းအမြစ်များကို ထောက်ပံ့ပေးရမည် ဖြစ်လေသည်။

အကယ်၍ တော်လှန်ဝံ့ပါက အသက်ရှင်ရသည်ထက် သေရသည်က ပိုကောင်းသကဲ့သို့ ခံစားရသည်အထိ ညှဉ်းပန်းနှိပ်စက်ခံရမည် ဖြစ်၏။

"ဟုတ်ကဲ့ပါ၊ သခင်ကြီး...”

လယ်ကျွန်များစွာမှာ တုန်ယင်နေကြပြီး မည်သည့်စကားကိုမျှ မပြောရဲကြချေ။

"ဒါဆိုလည်း ကောင်းပြီ...”

ယင်းစကားကို ကြားသောအခါ ထိုယင်ရှားဂိုဏ်း၏ အတွင်းစည်းတပည့်မှာ အလွန်ကျေနပ်သွားပြီး လှည့်ထွက်သွားလေသည်။

မည်သို့ပင်ဆိုစေ သူသည် မြင့်မြတ်သော အတွင်းစည်းတပည့်တစ်ဦး ဖြစ်ရာ လယ်ကွင်းထဲတွင် လယ်ထွန်ရန် နေရစ်ခဲ့ဖို့ စိတ်ဝင်စားမည် မဟုတ်ပေ။

သူ ဤနေရာသို့ ပေါ်လာရခြင်းမှာ ဤကျွန်များကို မပျင်းရိစေရန် ကြာပွတ်ဖြင့် ရိုက်နှက်ဆုံးမရန် သက်သက်သာ ဖြစ်လေသည်။

ဤအတွင်းစည်းတပည့် ထွက်ခွာသွားပြီးနောက် မျက်နှာပေါ်တွင် ချေးညော်များပေကျံနေသော လယ်ကျွန်လူငယ်တစ်ဦး၏ မျက်နှာထက်၌ မုန်းတီးမှုနှင့် ဒေါသအရိပ်အယောင်များ ပေါ်လာခဲ့ပြီး၊ အခြားလယ်ကျွန်များ၏ ခံစားချက်မဲ့နေသော အမူအရာများနှင့် လုံးဝဆန့်ကျင်ဘက် ဖြစ်နေချေသည်။

သူ၏အမည်မှာ ကျိချွမ်းဟု ခေါ်ပြီး ဤနေရာရှိ လယ်ကျွန်တစ်ဦး၊ အဆင့်နိမ့် စိတ်ဝိညာဉ်အမြစ်ရှိသော ကျင့်ကြံသူတစ်ဦးသာ ဖြစ်၏။

အကြောင်းမူကား ထိုအတွင်းစည်းတပည့်သည် သူ၏မိဘများ အလုပ်လုပ်ရာတွင် အနည်းငယ် နှေးကွေးသွားသည်ကို အကြောင်းပြကာ ရက်ရက်စက်စက် သတ်ဖြတ်ပစ်ခဲ့သောကြောင့်ပင် ဖြစ်လေသည်။

သူနှင့် သွေးစွန်းသော ရန်ငြိုးကြီးတစ်ခုကို တည်ဆောက်ခဲ့ခြင်း ဖြစ်၏။

သူသည် ထိုယင်ရှားဂိုဏ်း၏ အတွင်းစည်းတပည့်ကို အပိုင်းပိုင်းအစစ ခုတ်ထစ်ပစ်ချင်နေသည်အထိ မုန်းတီးနေသည်ဟု ဆိုရမည်ပင်။

သို့သော် သူသည် သည်းခံမြိုသိပ်ထားခဲ့လေသည်။

အဘယ်ကြောင့်ဆိုသော် သူသည် ချီသန့်စင်ခြင်းအဆင့် ကျင့်ကြံသူတစ်ဦးသာ ဖြစ်ပြီး၊ ထိုအတွင်းစည်းတပည့်မှာမူ အခြေတည်အဆင့် ကျင့်ကြံသူ ဖြစ်နေသောကြောင့်ပင်။

အကယ်၍ အမှန်တကယ် လှုပ်ရှားရဲပါက သူ သေချာပေါက် သေဆုံးရ‌ပေမည်။

ထိုအချိန်ရောက်လျှင် မိဘများအတွက် ကလဲ့စားမချေနိုင်ရုံသာမက မိမိအသက်ပါ ဆုံးရှုံးသွားနိုင်သဖြင့် အကျိုးထက် ဆုံးရှုံးရသည်က ပိုများပေလိမ့်မည်။

"ဂျိဂျိ… ကောင်လေး၊ မင်း နားလည်သွားပြီမလား။ ဒီကမ္ဘာကြီးက လူလူချင်း ပြန်စားတဲ့ ကမ္ဘာကြီးပဲ။ အားနည်းသူတွေမှာ ဘာအခွင့်အရေးမှ မရှိဘူး။ အားကြီးသူတွေသာလျှင် အရာအားလုံးကို လွှမ်းမိုးချုပ်ကိုင်နိုင်ပြီး လူသောင်းသိန်းချီရဲ့အထက်မှာ ရပ်တည်နိုင်တာ…”

“အကယ်လို့ မင်းသာ ငါ့ရဲ့ ဟွမ်ချွမ်ဂိုဏ်းကျင့်စဉ်ကို ဆက်ခံမယ်ဆိုရင် သာမန် အခြေတည်အဆင့် ကျင့်ကြံသူတစ်ယောက်ကို လက်တစ်ချက်ယမ်းရုံနဲ့ သတ်ပစ်နိုင်လိမ့်မယ်။ မင်းကို စော်ကားဖို့ဆိုတာ လုံးဝ မဖြစ်နိုင်တော့ဘူး...”

ဤအချိန်၌ အေးစက်စက် အသံတစ်သံက သူ၏စိတ်ထဲတွင် ရုတ်တရက် ထွက်ပေါ်လာခဲ့လေသည်။

စကားပြောနေသူမှာ ကျိချွမ်း ကောက်ရထားသော ထူးဆန်းသည့် ရတနာတစ်ခုဖြစ်ပြီး တစ်ဖက်လူက မိမိကိုယ်ကိုယ် အင်မော်တယ်ရတနာ 'ဟွမ်ချွမ်မြေပုံ' ဟု ခေါ်ဆိုလေသည်။ ၎င်းမှာ ကမ္ဘာကြီးတစ်ခုဖြစ်သော ယန်မိုကမ္ဘာမှ လာခြင်းဖြစ်ပြီး တစ်ချိန်က မဟာယာနအဆင့် ဂိုဏ်းကြီးတစ်ခုဖြစ်သည့် 'ဟွမ်ချွမ်ဂိုဏ်း' ၏ ဂိုဏ်းစောင့်ရတနာ ဖြစ်ခဲ့ပေသည်။

သို့သော် တိုက်ပွဲရှုံးနိမ့်ခဲ့ခြင်းကြောင့် နောက်ဆုံးတွင် ဟွမ်ချွမ်ဂိုဏ်း ပျက်စီးသွားခဲ့ပြီး အကြီးအကဲများနှင့် တပည့်များစွာ သေဆုံးခဲ့ရလေသည်။

အင်မော်တယ်ရတနာ 'ဟွမ်ချွမ်မြေပုံ' သည်လည်း အသက်စွန့်ကာ လေဟာနယ်ကို ထိုးခွဲ၍ ယန်မိုကမ္ဘာထဲမှ လွတ်မြောက်လာခဲ့ခြင်း ဖြစ်၏။

နောက်ဆုံးတွင်မှ ဤကမ္ဘာသို့ ရောက်ရှိလာခဲ့ခြင်း ဖြစ်လေသည်။

ထို့နောက်တွင် ကျိချွမ်းက ဤပျက်စီးနေသော အင်မော်တယ်ရတနာကို မတော်တဆကောက်ရခဲ့ပြီး သွေးစက်ချကာ သခင်အဖြစ် အသိအမှတ်ပြုစေခဲ့လေသည်။

ထို့ကြောင့် သူသည်လည်း ဟွမ်ချွမ်ဂိုဏ်း၏ နောက်ဆုံးမျိုးဆက် အမွေခံ ဖြစ်လာခဲ့တော့သည်။

"အကယ်လို့ ဟွမ်ချွမ်ဂိုဏ်းရဲ့ ကျင့်စဉ်ကို သင်ယူခဲ့ရင် ကျွန်တော် ယင်ရှားဂိုဏ်းကို ဖျက်ဆီးပစ်နိုင်မလား...”

ကျိချွမ်းသည် သူ၏လက်သီးများကို ဆုပ်ထားကာ အံကြိတ်လျက် မေးလိုက်လေသည်။

ဤယင်ရှားဂိုဏ်း၏ အတွင်းစည်းတပည့်ကို သတ်ဖြတ်ရုံဖြင့် အလျဉ်းမလုံလောက်ကြောင်း သူ နားလည်ထားသည်။

လောကရှိ မရေမတွက်နိုင်သော လူတို့သည် ယင်ရှားဂိုဏ်း၏ ဖိနှိပ်ခြင်းကို ခံနေကြရ၏။

ယင်ရှားဂိုဏ်း အတွင်းစည်းတပည့်တစ်ဦးကို သတ်ဖြတ်လိုက်လျှင်ပင် နောက်ထပ်သော ယင်ရှားဂိုဏ်းတပည့် သောင်းသိန်းချီက ထွက်လာကြဦးမည်သာ။

ဤဂိုဏ်းကို မဖျက်ဆီးသရွေ့ သူ၏မိဘများကဲ့သို့သော အဖြစ်ဆိုးများသည် ဘယ်တော့မှ ပြီးဆုံးမည် မဟုတ်ချေ။

"ပြဿနာမရှိပါဘူး။ ဒါက ကလေးကလား ကိစ္စလေးပါပဲ။ သာမန် နတ်ဘုရားအသွင်ပြောင်းအဆင့် ဂိုဏ်းတစ်ခုလေးဟာ။ မင်းသာ နတ်ဘုရားအသွင်ပြောင်းအဆင့်ကို ရောက်အောင် ကျင့်ကြံနိုင်ရင် ဒီဂိုဏ်းလေးကို သုတ်သင်ဖို့ဆိုတာ လက်ဖဝါးလှန်တာထက်တောင် လွယ်သေးတယ်...”

အင်မော်တယ်ရတနာ 'ဟွမ်ချွမ်မြေပုံ' က အထင်သေးဟန်ဖြင့် ပြောလိုက်လေသည်။

အကယ်၍ ယန်မိုကမ္ဘာတွင်သာဆိုလျှင် ဤယင်ရှားဂိုဏ်းလေးက ဘာများ အရေးပါမည်နည်း။

မည်သည့် လေဟာနယ်သန့်စင်ခြင်းအဆင့် ဂိုဏ်းတစ်ဂိုဏ်းကမဆို လှုပ်ရှားလိုက်ပါက ဤဂိုဏ်းကို အကြိမ်ပေါင်း ဒါဇင်ချီ ဖျက်ဆီးပစ်နိုင်သည်။ တစ်ဖက်လူကို ဤမျှကြာအောင် ဗိုလ်ကျစိုးမိုးခွင့် ပေးထားမည်မဟုတ်ချေ။

၎င်းအနေဖြင့် အလွန်အမင်း ပျက်စီးနေပြီး မည်သည့်စွမ်းအားကိုမှ မထုတ်ဖော်နိုင်၍သာ၊ ထိုသို့မဟုတ်ပါက ၎င်းကိုယ်တိုင် ပိုင်ဆိုင်ထားသော စွမ်းအားသက်သက်နှင့်ပင် ယင်ရှားဂိုဏ်းတစ်ဂိုဏ်းလုံးကို ဖျက်ဆီးပစ်ရန် လုံလောက်နေပေမည်။

"ကောင်းပြီ၊ ကျွန်တော် ခင်ဗျားဆီကနေ သင်ယူမယ်။ ယင်ရှားဂိုဏ်းကို ဖျက်ဆီးပစ်ဖို့ဆိုရင် ကျွန်တော် ဘာမဆိုလုပ်ဖို့ ဆန္ဒရှိတယ်...”

ကျိချွမ်းက အံကြိတ်လျက် ပြောလိုက်၏။

သူ့အတွက် အခြားရွေးချယ်စရာ မရှိတော့ချေ။

အဘယ်ကြောင့်ဆိုသော် လယ်ကျွန်တစ်ဦးအနေဖြင့် အဆင့်မြင့်ကျင့်စဉ်များကို သင်ယူရန် မဖြစ်နိုင်ပေ။ ယင်ရှားဂိုဏ်း၏ အတွင်းစည်းတပည့်များမှလွဲ၍ ကျန်သူများ ကျင့်ကြံသော ကျင့်စဉ်များအားလုံးမှာ မပြည့်စုံဘဲ ကြီးမားသော ဘေးထွက်ဆိုးကျိုးများ ရှိနေသောကြောင့် ဖြစ်သည်။

ကျင့်ကြံမှုအဆင့်မြင့်လေ၊ သေရတာမြန်လေပင်။

အဘယ်ကြောင့်ဆိုသော် ယင်ရှားဂိုဏ်းသည် ၎င်းတို့ကိုယ်တိုင်အား ပြန်လည်ရင်ဆိုင်မည့် ရန်သူများကို ပျိုးထောင်ပေးမည် မဟုတ်သောကြောင့်ပင် ဖြစ်လေသည်။

ယင်ရှားဂိုဏ်းကို ရင်ဆိုင်ရန်အတွက် သူသည် အခြားနည်းလမ်းတစ်ခုကိုသာ ရှာဖွေရတော့ပေမည်။