အခန်း ၆၀
Vol. 6 Ch. 60
အခန်း (၆၀) နတ်ဘုရားစွမ်းအားနယ်ပယ် သို့ ပြီးပြည့်စုံစွာ တက်လှမ်းခြင်းနှင့် မွေးရာပါနတ်ဘုရားစွမ်းရည် နိုးထခြင်း
“ကဲ... အားလုံးပဲ လူစုခွဲကြတော့”
ထိုက်ယိမြင့်မြတ်နယ်မြေအရှင်က လက်ဝှေ့ယမ်းပြလိုက်ရင်း ဘေးပတ်ဝန်းကျင်ရှိ စောင့်ကြည့်နေကြသော လူများကို လူစုခွဲလိုက်တော့သည်။
“တပည့်ကို သွား ခွင့်ပြုပါ”
ရှုချွမ်းက ယန်ရှန်းကို ဆက်၍ အာရုံစိုက်မနေတော့ဘဲ နောက်တစ်ကြိမ် ဦးညွှတ်ဂါရဝပြုပြီးနောက် ထိုနေရာမှ ထွက်လာခဲ့သည်။
သူက သူ့ အင်မော်တယ် ဂူအတွင်းသို့ ပြန်လည်ဝင်ရောက်ကာ တံခါးပိတ်ကျင့်ကြံရန်၊ ဤရွှေကျီးကန်း သွေးအနှစ်သာရ တစ်စက်ကို သန့်စင်ရန်၊ သူ၏ အခြေခံအုတ်မြစ်ကို ခိုင်မာအောင်ပြုလုပ်ရန်နှင့် နတ်ဘုရားစွမ်းအားနယ်ပယ် သို့ အောင်မြင်စွာ တက်လှမ်းနိုင်ရန်အတွက် လိုအပ်နေခြင်း ဖြစ်သည်။
သူ၏ ကျန့်ယန်တောင်ထိပ် အင်မော်တယ် ဂူ သို့ ပြန်လည်ရောက်ရှိပြီးနောက် ရှုချွမ်းက မည်သူမျှ လာရောက်နှောင့်ယှက်ခြင်း မရှိစေရန် သေချာအောင် ပြုလုပ်ပြီးမှ အင်မော်တယ် ဂူ ၏ အကာအကွယ် အစီအရင်ကို အသက်သွင်းလိုက်တော့သည်။
ရှုချွမ်းက ရွှေကျီးကန်း သွေးအနှစ်သာရကို သန့်စင်ရန်အတွက် သူ့ကိုယ်သူ အကြွင်းမဲ့ ယုံကြည်ချက် ရှိနေခဲ့သည်။
ပြင်ဆင်မှုအားလုံး ပြီးပြည့်စုံသွားခဲ့ပြီးနောက် ရှုချွမ်းက ထိုင်ဖျာပေါ်တွင် တင်ပျဉ် ခွေ ထိုင်လိုက်တော့သည်။
တစ်ခဏအတွင်းမှာပင် သူ၏ ခန္ဓာကိုယ်ထံမှ သွေးနီရောင် အလင်းတန်းဖျော့ဖျော့လေးတစ်ခု စတင်၍ ထွက်ပေါ်လာခဲ့သည်။
ပတ်ဝန်းကျင်တွင်ရှိသော ကောင်းကင်နှင့်မြေကြီး ၏ မူလချီ များသည်လည်း ရူးသွပ်သွားသည့်အလား သူ့ထံသို့ တဟုန်ထိုး စီးဆင်းလာခဲ့ကြသည်။
သူက သူ့ အခြေအနေကို အကောင်းမွန်ဆုံးသော အဆင့်သို့ ပြန်လည်ရောက်ရှိအောင် ပြုလုပ်ရမည်ဖြစ်ပြီး ထိုအချိန်ကျမှသာ ရွှေကျီးကန်း သွေးအနှစ်သာရကို သန့်စင်ရန်အတွက် အကောင်းဆုံးသော အချိန်ဖြစ်လိမ့်မည် ဖြစ်သည်။
အမွှေးတိုင်တစ်တိုင်စာခန့် ကြာမြင့်ပြီးနောက် ရှုချွမ်းက အသက်ကို ပြင်းပြင်းရှူလိုက်ရင်း သူ၏ မျက်လုံးများကို ရုတ်တရက် ဖွင့်လိုက်သည်။
လက်ရှိအချိန်တွင် သူ၏ အခြေအနေမှာ အထွတ်အထိပ်သို့ ပြန်လည်ရောက်ရှိသွားခဲ့ပြီ ဖြစ်သည်။
သူက တုံ့ဆိုင်းမနေတော့ဘဲ အတွေးတစ်ချက် နှင့် သူ၏ သိုလှောင်လက်စွပ်အတွင်းမှ ရွှေကျီးကန်း သွေးအနှစ်သာရ ပါဝင်သော ကျောက်စိမ်းပုလင်းလေးကို ထုတ်ယူလိုက်သည်။
ထို့နောက်တွင် သူက ထိုရွှေကျီးကန်း သွေးအနှစ်သာရကို သူ၏ လက်ဖဝါးပေါ်သို့ လောင်းချလိုက်တော့သည်။
ရှုချွမ်းက ရွှေကျီးကန်း သွေးအနှစ်သာရကို လောင်းချလိုက်သည့် ထိုခဏ၌ပင် အင်မော်တယ် ဂူ အတွင်း၌ စူးရှလှသော သားရဲ အော် သံတစ်ခု ပဲ့တင်ထပ်သွားခဲ့ရသည်။
ထို့နောက်တွင် ရွှေကျီးကန်းတစ်ကောင်၏ ပုံရိပ်ယောင်တစ်ခုက အနှိုင်းမဲ့သော ဖိအားများနှင့်အတူ အင်မော်တယ် ဂူ အတွင်း ထွက်ပေါ်လာခဲ့တော့သည်။
ဤဖိအားက ရှုချွမ်းကို လွှမ်းမိုးထားခဲ့သဖြင့် သူ၏ ခန္ဓာကိုယ်မှာလည်း အလိုလို တင်းမာသွားခဲ့ရသည်။
သူ၏ လက်ဖဝါးပေါ်ရှိ သွေးအနှစ်သာရ တစ်စက်ကို စိုက်ကြည့်ရင်း ရှုချွမ်း၏ မျက်လုံးများအတွင်း၌ ရွှေရောင်အလင်းတန်းတစ်ခု ဖြတ်သန်းသွားခဲ့သည်။
“တကယ့်ကို ကြောက်စရာကောင်းတဲ့ ဖိအားပဲ၊ ဒါ ရွှေကျီးကန်း သွေးအနှစ်သာရရဲ့ စွမ်းအားလား ဒီရွှေကျီးကန်း အသက်ရှိ တုန်းက သူ့ရဲ့ ခွန်အားက ကောင်းကင်တက်လှမ်းခြင်းနယ်ပယ် ကို သေချာပေါက် ကျော်လိမ့်မယ်”
“သွေးအနှစ်သာရ တစ်စက်တည်းတင်ပဲ ငါ့ကို ဒီလောက်အထိ ကြီးမားတဲ့ ဖိအားကို ပေးနိုင်နေတာ”
ရှုချွမ်းက တိုးတိုးလေး ရေရွတ်လိုက်မိသည်။
သူက ဤသွေးအနှစ်သာရ တစ်စက်ထံမှ အဆုံးမရှိသော စွမ်းအားများကို အာရုံခံမိနေခဲ့ပြီး ဖြစ်သည်။
၎င်းက သူ့ကို အလွန်ပင် သတိကြီးစွာ ထားစေခဲ့သည်။
သို့သော်လည်း ပြီးပြည့်စုံသော အခြေခံအုတ်မြစ်ကို တည်ဆောက်နိုင်ရန်အတွက် ရှုချွမ်းက သွားကို တင်းတင်းကြိတ်လျက် ရွှေကျီးကန်း သွေးအနှစ်သာရကို သူ၏ ဝမ်းဗိုက်အတွင်းသို့ တိုက်ရိုက်ပင် မျိုချလိုက်တော့သည်။
ဘုန်း...
သူက စိတ်ပိုင်းဆိုင်ရာ ကြိုတင်ပြင်ဆင်ထားခဲ့သည့်တိုင်အောင် ဤသွေးအနှစ်သာရ တစ်စက်ထံမှ ကြီးမားလှသော စွမ်းအယးများမှာ သူ၏ ဝမ်းဗိုက်အတွင်း၌ တိုက်ရိုက်ပင် ပေါက်ကွဲထွက်လာခဲ့ရသည်။
ထိုစွမ်းအားမှာ ပူပြင်းလှသော ရေစီးကြောင်းတစ်ခုအလား သူ၏ ခြေလက်အင်္ဂါများနှင့် အရိုးအဆစ်များဆီသို့ စီးဆင်းသွားခဲ့ပြီး သူ၏ ခန္ဓာကိုယ်ကို စိတ်တိုင်းကျ မွှေနှောက်ဖျက်ဆီးနေခဲ့တော့သည်။
ရှုချွမ်း၏ ခန္ဓာကိုယ်မှာ ပြင်းထန်စွာ တုန်ခါသွားခဲ့ရသည်။ သူ၏ ခန္ဓာကိုယ်အတွင်း၌ ကြီးမားလှသော မီးတောက်ကြီးတစ်ခု ရှိနေပြီး သူ၏ သွေးကြောများ၊ အရိုးများနှင့် အသားအရေများကို လောင်ကျွမ်းစေနေသည့်အလား သူ ရှင်းလင်းစွာ ခံစားလိုက်ရသည်။
တစ်ခဏအတွင်းမှာပင် စူးရှလှသော နာကျင်မှုဝေဒနာက ရှုချွမ်း၏ စိတ် ကို တိုက်ခိုက်လာခဲ့တော့သည်။
နာကျင်လိုက်တာ၊ တကယ်ကို နာကျင်လွန်းလှပေသည်
ဤခံစားချက်မှာ သူ၏ ခန္ဓာကိုယ် ဖွဲ့စည်းပုံ ပြောင်းလဲသွားခဲ့စဉ်တုန်းက ခံစားချက်နှင့် တစ်ပုံစံတည်း ဖြစ်နေခဲ့သည်။
မူလက သူသည် ဤကဲ့သို့သော နာကျင်မှုမျိုးကို ကျင့်သားရနေပြီဟု ထင်မှတ်ထားခဲ့သော်လည်း ၎င်းကို တကယ်တမ်း ကြုံတွေ့လိုက်ရသည့်အခါမှသာ ရွှေကျီးကန်း သွေးအနှစ်သာရက သူ၏ ခန္ဓာကိုယ်အတွင်း သောင်းကျန်းနေမှုကြောင့် ဖြစ်ပေါ်လာသော နာကျင်မှုကို သူ အထင်သေးမိသွားကြောင်း သိလိုက်ရတော့သည်။
ရှုချွမ်းက ဤသွေးအနှစ်သာရ တစ်စက်မှ ယူဆောင်လာသော စွမ်းအားများကို သန့်စင်ရန်နှင့် သူကိုယ်သူ့ သန်မာလာစေရန်အတွက် 'မဟာယန် လျှို့ဝှက်ကျင့်စဉ် ' ကို လျင်မြန်စွာပင် လည်ပတ်စေလိုက်သည်။
ထို မှသာ နာကျင်မှုမှာ အနည်းငယ် လျော့ပါးသွားခဲ့ရသည်။
ရှုချွမ်းက စိတ်ဓာတ်ကို မြှင့်တင်လိုက်ရင်း 'မဟာယန်လျှို့ဝှက်ကျင့်စဉ် ' ကို ပိုမို၍ အရှိန်မြှင့်တင်ကာ လည်ပတ်စေလိုက်တော့သည်။
“ပိုပြီး သန်မာလာချင်တယ်ဆိုရင်တော့ သန်မာလာခြင်းရဲ့ နောက်ဆက်တွဲ ဝေဒနာတွေကို မဖြစ်မနေ အောင့်ခံရမှာပဲ”
“ဒီနာကျင်မှုက ဘာမို့လို့လဲ လာစမ်းပါ”
'မဟာယန်လျှို့ဝှက်ကျင့်စဉ် ' ၏ အံ့ဖွယ်အာနိသင်ကို ခံစားလိုက်ရပြီးနောက် ရှုချွမ်းက ကျယ်လောင်စွာ အော်ဟစ်လိုက်ပြီး သူ၏ မျက်လုံးများအတွင်း၌ ပြတ်သားလှသော ဆုံးဖြတ်ချက်များ ပြည့်နှက်နေခဲ့သည်။
ထို့နောက်တွင် သူက မျက်လုံးများကို ပိတ်လိုက်ပြီး သူ၏ ခန္ဓာကိုယ်အတွင်းရှိ ရွှေကျီးကန်း သွေးအနှစ်သာရကို ဆက်လက်၍ ဖိနှိပ်မထားတော့ဘဲ ၎င်း၏ စွမ်းအားများကို လွတ်လပ်စွာ ဖြေလျှော့ လိုက်တော့သည်။
ပြင်းထန်လှသော နာကျင်မှုကို အောင့်ခံလျက် 'မဟာယန်လျှို့ဝှက်ကျင့်စဉ် ' ကို ဆက်တိုက်ဆိုသလို လည်ပတ်စေပြီး ဤစွမ်းအားများကို အသုံးပြုကာ သူ့ကိုယ်သူ သန်မာလာစေရန် ပြုလုပ်လိုက်သည်။
ဤစွမ်းအားများ သူ၏ ခန္ဓာကိုယ်အတွင်းသို့ ပေါင်းစပ်သွားသည်နှင့်အမျှ သူ၏ အသားအရေ၊ အရိုးများနှင့် သွေးကြောများမှာ ဆက်တိုက်ဆိုသလို ပြန်လည်သန့်စင်ခြင်းနှင့် သန်မာလာခြင်းတို့ကို ကြုံတွေ့ခဲ့ရသည်။
ဒါက မျက်စိဖြင့် မြင်တွေ့နိုင်သော သန်မာလာမှုမျိုး ဖြစ်ပြီး ရှုချွမ်း၏ တစ်ကိုယ်လုံးမှာ သန့်စင်မွန်မြတ်လှသော အလင်းတန်းတစ်ခုအောက်တွင် ဖုံးလွှမ်းနေခဲ့ပြီ ဖြစ်သည်။
“ဒီရွှေကျီးကန်း သွေးအနှစ်သာရကို စတင်သန့်စင်ရုံတင်ရှိသေးတယ်၊ ဒီလောက်အထိ ကြီးမားတဲ့ ပြောင်းလဲမှုမျိုး ဖြစ်ပေါ်လာလိမ့်မယ်လို့ ငါ ထင်မထားခဲ့ဘူး”
သူ၏ ခန္ဓာကိုယ်အတွင်းမှ ပြောင်းလဲမှုများက ရှုချွမ်းကို အလွန်ပင် ဝမ်းမြောက်သွားစေခဲ့သည်။
ရွှေကျီးကန်း သွေးအနှစ်သာရ၏ စွမ်းအားများသည်လည်း သူ၏ ခန္ဓာကိုယ်အတွင်း၌ လုံးဝဥဿုံ သန့်စင်ခြင်း မရှိသေးသော ယန်မူလစွမ်းအား ကိုပါ လှုံ့ဆော်ပေးလိုက်သည်။
ဤစွမ်းအားနှစ်ခုမှာ ရှုချွမ်းနှင့်အတူ ဆက်တိုက်ဆိုသလို ပေါင်းစပ်သွားခဲ့ကြသည်။
သူ၏ အခြေခံအုတ်မြစ်မှာလည်း အဆက်မပြတ် သန်မာလာခဲ့ရသည်။
ကျင့်ကြံမှုအဆင့် အပိုင်းအခြားအရ ကြည့်မည်ဆိုပါက မည်သည့်ပြောင်းလဲမှုမျှ မရှိသေးသကဲ့သို့ ထင်ရသော်လည်း အကယ်၍ သူ၏ ယခင်အခြေခံအုတ်မြစ်က သူ့ကို ကောင်းကင်တက်လှမ်းခြင်းနယ်ပယ်အထိသာ ပံ့ပိုးပေးနိုင်မည်ဆိုပါက ယခုအချိန်တွင်မူ သူ၏ အခြေခံအုတ်မြစ်က သူ့ကို ကောင်းကင်ဘုရင်နယ်ပယ်အထိ အလွယ်တကူ ပံ့ပိုးပေးနိုင်လိမ့်မည် ဖြစ်သည်။
ဧကရာဇ်အရှင်နယ်ပယ် ပင်လျှင် မဖြစ်နိုင်စရာ မရှိတော့ပေ။
မည်သို့ပင်ဖြစ်စေ သူ၏ 'နေသူတော်စင် ခန္ဓာကိုယ်' မှာ နောက်မှ ပြောင်းလဲလာခဲ့ခြင်း ဖြစ်သဖြင့် မွေးရာပါ လိုအပ်ချက်အချို့ ရှိနေခဲ့ခြင်း ဖြစ်သည်။
သို့သော်လည်း သူက သူ့ ခန္ဓာကိုယ်အတွင်းရှိ ရွှေကျီးကန်း သွေးအနှစ်သာရကို လုံးဝဥဿုံ စုပ်ယူပြီးသွားသည်နှင့်တစ်ပြိုင်နက် ထိုနှစ်ခုအကြားတွင် မည်သည့်ကွာဟချက်မျှ ရှိတော့မည် မဟုတ်ပေ။
ဤကဲ့သို့ဖြင့် ရှုချွမ်းက ရွှေကျီးကန်း သွေးအနှစ်သာရကို သန့်စင်ခြင်းအတွင်းသို့ လုံးဝဥဿုံ စိတ်အာရုံ နှစ်မြှုပ်ထားလိုက်တော့သည်။
တစ်လခန့် ကြာမြင့်ပြီးနောက်...
အင်မော်တယ် ဂူအတွင်း၌ ရှုချွမ်းက သူ၏ မျက်လုံးများကို ရုတ်တရက် ဖွင့်လိုက်ရာ နတ်ဘုရားအလင်းတန်းတစ်ခု ပေါက်ကွဲထွက်လာခဲ့သည်။
လက်ရှိအချိန်တွင်... သူက ထိုရွှေကျီးကန်း သွေးအနှစ်သာရ တစ်စက်ကို လုံးဝဥဿုံ သန့်စင်ပြီးသွားခဲ့ပြီ ဖြစ်သည်။
သူ၏ အခြေခံအုတ်မြစ်မှာ အလွန်တရာ ခိုင်မာသွားခဲ့ရသည့်အပြင် သူက နေသူတော်စင် ခန္ဓာကိုယ်၏ နောက်ထပ် မွေးရာပါ စွမ်းရည်တစ်ခုကိုပါ နိုးထထားနိုင်ခဲ့ပြီ ဖြစ်သည်။
၎င်းမှာ 'နေမင်းအစစ်အမှန်မီးတောက်' ပင် ဖြစ်သည်။
အတွေးတစ်ချက် နှင့်အတူ ရှုချွမ်း၏ လက်ချောင်းထိပ်တွင် ရွှေရောင်မီးတောက်အလင်းတန်းလေးတစ်ခု ချက်ချင်းဆိုသလို ထွက်ပေါ်လာခဲ့သည်။
ဤရွှေရောင်မီးတောက်လေး ထွက်ပေါ်လာသည်နှင့်တစ်ပြိုင်နက် အင်မော်တယ် ဂူတစ်ခုလုံးမှာ လောင်ကျွမ်းတော့မည့်အလား ဖြစ်သွားခဲ့ရပြီး ဟင်းလင်းပြင်ကြီးအတွင်းမှပင် တဖျတ်ဖျတ်မြည်သံများ ထွက်ပေါ်လာခဲ့ရသည်။
“နေမင်းအစစ်အမှန်မီးတောက်လို့ ပြောတာနဲ့တင် ထိုက်တန်ပါတယ်”
ရှုချွမ်းက အတော်အတန် ကျေနပ်သွားခဲ့ရသည်၊ ဒါက သူ၏ လက်ဝယ်တွင် နောက်ထပ် တိုက်ခိုက်မှုနည်းလမ်းတစ်ခု တိုးပွားလာခဲ့ခြင်းကို ဆိုလိုခြင်း ဖြစ်သည်။
နေမင်းအစစ်အမှန်မီးတောက်၏ စွမ်းအားမှာ အလွန်တရာ ကြောက်မက်ဖွယ်ကောင်းလှပေသည်။ အကယ်၍ သူက နောင်အနာဂတ်တွင် အခြားသော မီးတောက် ထိန်းချုပ်မှုသိုင်းပညာ တစ်ခုခုကို ထပ်မံရှာဖွေတွေ့ရှိခဲ့မည်ဆိုပါက ၎င်း၏ အစစ်အမှန် စွမ်းအားကို ထုတ်ဖော်နိုင်လိမ့်မည် ဖြစ်သည်။
နောက်တစ်ဆင့်အနေဖြင့်မူ သူက နတ်ဘုရားစွမ်းအားနယ်ပယ် သို့ စတင်၍ အပြည့်အဝ တက်လှမ်းတော့မည် ဖြစ်သည်။
သူက မျက်လုံးများကို ပြန်ပိတ်လိုက်ရင်း ယွမ်ကျောက်တုံး များကို ထုတ်ယူလိုက်သည်။
ရှုချွမ်းက ၎င်းတို့အတွင်းရှိ စွမ်းအားများကို ရူးသွပ်စွာဖြင့် စုပ်ယူလိုက်တော့သည်။
ပတ်ဝန်းကျင်တွင်ရှိသော ကောင်းကင်နှင့်မြေကြီး ၏ မူလချီ များသည်လည်း သူ၏ ခန္ဓာကိုယ်အတွင်းသို့ ဆက်တိုက်ဆိုသလို စီးဆင်းဝင်ရောက်လာခဲ့ကြသည်။
တစ်နာရီခန့် ကြာမြင့်ပြီးနောက်...
ရှုချွမ်း၏ ခန္ဓာကိုယ်အတွင်းမှ မိုးခြိမ်းသံကဲ့သို့သော အသံတစ်ခု ထွက်ပေါ်လာခဲ့သည်။
သက်တန့်ရောင် အလင်းတန်းစီးကြောင်းများစွာမှာ ရှုချွမ်း၏ တစ်ကိုယ်လုံးတွင် ထွက်ပေါ်လာခဲ့ပြီး ဆက်တိုက်ဆိုသလို ဖျတ်ဖျတ်လူးနေခဲ့ကြသဖြင့် သူ၏ တစ်ကိုယ်လုံးမှာ အလင်းတန်းတစ်ခုအဖြစ်သို့ ပြောင်းလဲတော့မည့်အလား ထင်မှတ်ရပေသည်။
“နတ်ဘုရားစွမ်းအားနယ်ပယ် အဆင့် ၁... ငါ နောက်ဆုံးတော့ အောင်မြင်စွာ တက်လှမ်းနိုင်ခဲ့ပြီ”
သူ၏ ကျင့်ကြံမှုအတွင်းမှ ပြောင်းလဲမှုများကို ခံစားလိုက်ရသည့်အခါ ရှုချွမ်းအနေဖြင့် ဝမ်းမြောက်စရာ မျက်နှာအမူအရာကို မဖုံးကွယ်နိုင်ခဲ့ပေ။
နှစ်ပေါင်းများစွာကြာအောင် ပြင်းပြင်းထန်ထန် ကျင့်ကြံခဲ့ရပြီးနောက် နောက်ဆုံး ယနေ့တွင်မူ သူက နတ်ဘုရားစွမ်းအားနယ်ပယ် သို့ အောင်မြင်စွာ တက်လှမ်းနိုင်ခဲ့ပြီ ဖြစ်သည်။
သူက နောက်ဆုံးတွင် သိုင်းတာအို ၏ နယ်ပယ် ကိုးခု အနက် အလယ်အဆင့် သုံးခုအတွင်းသို့ ရောက်ရှိခဲ့ပြီ ဖြစ်သည်။
ဒါက အသစ်စက်စက် အစပြုခြင်းတစ်ခု ဖြစ်ပေသည်။
ထို့ပြင် သူ၏ တက်လှမ်းမှုမှာ ပြီးပြည့်စုံလှပြီး သူ၏ အခြေခံအုတ်မြစ်မှာလည်း အလွန်တရာ ခိုင်မာလှပေသည်။
သူ၏ လက်ရှိကျင့်ကြံမှုအဆင့်မှာ နတ်ဘုရားစွမ်းအားနယ်ပယ် အဆင့် ၁ မျှသာ ရှိသေးသော်လည်း နတ်ဘုရားစွမ်းအားနယ်ပယ် အတွင်း၌ မည်သူမျှ သူ့ကို အနိုင်မယူနိုင်ဟု သူ ရဲရဲကြီး ပြောဝံ့ပေသည်။
သူ ဤမျှအထိ သူ့ကိုယ်သူ ယုံကြည်ချက် ရှိနေခဲ့ခြင်း ဖြစ်သည်။
နတ်ဘုရားစွမ်းအားနယ်ပယ် သို့ အောင်မြင်စွာ တက်လှမ်းနိုင်ခဲ့ပြီးနောက် သူက သူ၏ 'မွေးရာပါ နတ်ဘုရားစွမ်းရည်' ကိုလည်း နိုးထနိုင်ခဲ့ပြီ ဖြစ်သည်။
၎င်းမှာ 'အဆတစ်ရာ တိုးခြင်း' ပင် ဖြစ်သည်။
သူ၏ ခန္ဓာကိုယ်ဖွဲ့စည်းပုံကြောင့် ရရှိခဲ့သော 'ရွှေကျီးကန်း သက်တန့်အသွင်ပြောင်းခြင်းကျင့်စဉ် ' နှင့် 'နေမင်းအစစ်အမှန်မီးတောက်' တို့နှင့် မတူညီဘဲ သူ၏ ဤမွေးရာပါ နတ်ဘုရားစွမ်းရည်မှာ နတ်ဘုရားစွမ်းအားနယ်ပယ် သို့ တက်လှမ်းပြီးနောက်မှသာ ထွက်ပေါ်လာခဲ့ခြင်း ဖြစ်သည်။
ရှုချွမ်းက ဤမွေးရာပါ နတ်ဘုရားစွမ်းရည်ကို အသုံးပြုလိုက်သည့်အခါ သူ၏ စွမ်းအားကို ချက်ချင်းဆိုသလို အဆတစ်ရာအထိ တိုးသွားစေနိုင်မည် ဖြစ်သည်။
၎င်းမှာ အလွန်တရာ အစွမ်းထက်လှပေသည်။
သို့သော်လည်း ရှုချွမ်း၏ လက်ရှိကျင့်ကြံမှုအဆင့်နှင့်ဆိုလျှင် ၎င်းကို တစ်ကြိမ်အသုံးပြုပြီးနောက် လဝက်ခန့်အတွင်း နောက်တစ်ကြိမ် ထပ်မံ၍ အသုံးပြုနိုင်လိမ့်မည် မဟုတ်ပေ။
သို့မဟုတ်ပါက သူ၏ ခန္ဓာကိုယ်အပေါ်တွင် ကြီးမားလှသော ထိခိုက်ပျက်စီးမှုများကို ဖြစ်ပေါ်စေလိမ့်မည် ဖြစ်သည်။
သို့သော်လည်း ဤမျှနှင့်တင် ဤမွေးရာပါ နတ်ဘုရားစွမ်းရည်က ရှုချွမ်းကို အလွန်ပင် ဝမ်းမြောက်စေခဲ့သည်။
ဒါက သူ၏ အသက်ဘေးမှ လွတ်မြောက်နိုင်မည့် နောက်ထပ် နည်းလမ်းကောင်းတစ်ခု ဖြစ်ပေသည်။
ရုတ်တရက်ကြီး အဆတစ်ရာ တိုးလာသော စွမ်းအားကို မည်သူက ကြိုတင်၍ ကာကွယ်နိုင်ပါမည်နည်း။
ရှုချွမ်းက ဤကိစ္စအတွက် အောင်ပွဲခံနေဆဲမှာပင် စနစ်၏ စာတစ်စောင် သူ၏ အရှေ့ တွင် ထွက်ပေါ်လာခဲ့တော့သည်။
【 ဂုဏ်ယူပါသည် ပိုင်ရှင်... နတ်ဘုရားစွမ်းအားနယ်ပယ် သို့ အောင်မြင်စွာ တက်လှမ်းနိုင်ခဲ့သည့်အတွက် သင်သည် 'အဆင့်နိမ့် ကံကြမ္မာမဲနှိုက်ခွင့်' တစ်ကြိမ်ကို ရရှိခဲ့ပါသည်။ ယခုချက်ချင်း မဲနှိုက်လိုပါသလား။ 】
ဤစာ ထွက်ပေါ်လာခြင်းက ရှုချွမ်း၏ မျက်လုံးများကို ပိုမို၍ လင်းလက်သွားစေခဲ့သည်။
နတ်ဘုရားစွမ်းအားနယ်ပယ် သို့ တက်လှမ်းခြင်းက သူ့ကို အဆင့်နိမ့် ကံကြမ္မာမဲနှိုက်ခွင့် တစ်ကြိမ် ပေးအပ်လိမ့်မည်ဟု သူ လုံးဝ ထင်မှတ်မထားခဲ့ပေ။
“ယခုချက်ချင်း မဲနှိုက်မယ်”
ရှုချွမ်းက ချက်ချင်းပင် ပြော လိုက်သည်။
【 ကံကြမ္မာမဲနှိုက်ခြင်းကို ပြုလုပ်နေပါသည်၊ ခေတ္တစောင့်ဆိုင်းပေးပါ... 】
ရှုချွမ်းက ဤမဲနှိုက်ခြင်းအပေါ် အလွန်ပင် မျှော်လင့်နေခဲ့သည်။
မည်သို့ပင်ဖြစ်စေ သူ့၌ ကံကြမ္မာများစွာ ရှိနေခြင်းကို မည်သူက ငြင်းပယ်ပါမည်နည်း။
【 မဲနှိုက်ခြင်း ပြီးဆုံးပါပြီ။ 】
【 ဂုဏ်ယူပါသည် သင်သည် အနီရောင်ကံကြမ္မာဖြစ်သည့် 'ပြိုင်ဘက်ကင်း ပြီး သန့်စင် ခြင်း' ကို ရရှိခဲ့ပါသည်။ 】