အခန်း ၁၄၈၁

အခန်း ၁၄၈၁ Microsoft ၏ အစစ်အမှန် ရည်ရွယ်ချက်

"Boss ဘီလ်ဂိတ်က ဝန်ထမ်းသစ်တွေကို သူကိုယ်တိုင်အင်တာဗျူးပေးမယ်လို့ ကြေညာထားတယ်။ အခုတော့ လူတော်တော်များများက ဘီလ်ဂိတ်နဲ့ တွေ့ရဖို့အတွက် Microsoft ဆီကို ရူးရူးမူးမူး ကိုယ်ရေးအကျဉ်းတွေ ပို့နေကြတယ်" ခါမီဒါ မာဆာအိုသည် ဤစကားကို ပြောလိုက်ချိန်တွင် မည်သည့် စိတ်ပျက်နေသည့် မျက်နှာအမူအရာမျှမရှိပေ။

ဘီလ်ဂိတ်၏ နာမည်ကျော်ကြားမှုသည် ခါမီဒါ မာဆာအို၊ ကျုံးချင်းရှန် အစရှိသူတို့ထက် များစွာပိုမြင့်မားနေဆဲ ဖြစ်သည်။ သူသည် သူ၏ နာမည်ဂုဏ်သတင်းကို အသုံးပြုကာ အခြေအနေကို ချက်ချင်းပြောင်းလဲပစ်လိုက်သည်။

ဖုန်းယွီသည် ဖရဲစေ့ခွာစားရင်း ရုပ်ရှင်ကြည့်နေလေသည်။ သူက ဖရဲစေ့တစ်ဆုပ်ကို လက်ဖြင့်ယူကာ ခါမီဒါ မာဆာအိုထံသို့ ကမ်းပေးလိုက်သည်။ "ထိုင် စားရင်းနဲ့ ပြောကြတာပေါ့"

ခါမီဒါ မာဆာအိုသည် ခေတ္တမျှ ကြောင်အသွားသော်လည်း၊ ဖရဲစေ့ကို အမြန်လှမ်းယူလိုက်ပြီး ဖုန်းယွီ၏ ဘေးတွင် ထိုင်လိုက်သည်။ သို့သော်လည်း သူက လုံးဝ ခွာမစားပေ။ သူဌေးက စကားပြောရင်း ဖရဲစေ့ခွာစားနိုင်သော်လည်း၊ သူကမူ ထိုသို့မလုပ်နိုင်ပေ။

"Microsoft က တကယ်ပဲ ငါတို့ မျှော်လင့်ထားသလို လူသစ်တွေအများကြီး ခေါ်လိုက်တယ်၊ ပေးတဲ့ လစာကလည်း အရင်အတိုင်းပဲ၊ တချို့ဆိုရင် နည်းနည်းတောင် တိုးလာသေးတယ်"

ဖုန်းယွီသည် လက်ကို ဖုန်ခါလိုက်ပြီး၊ လက်ဖက်ရည်ခွက်ကို မကာ လက်ဖက်ရည်တစ်ငုံ သောက်လိုက်သည်။ ထို့နောက် သူက ဖြည်းညင်းစွာ မေးလိုက်သည်။ "မင်းထင်တာအခု Microsoft မှာ လူတွေ ဘယ်လောက်တောင် ဖောင်းပွနေပြီလို့ထင်လဲ။ သူတို့က သူတို့ အင်အားကြီးနေတုန်းပဲဆိုတာကို သက်သေပြဖို့၊ ငါတို့နဲ့ အပြိုင်အဆိုင်ဖြစ်ဖို့အတွက် ငါတို့ဆီက လူတွေကို စတင်လုယူနေကြတာပဲ။ သူတို့က ငါတို့ တိုးချဲ့နေတဲ့ အချိန်ဖြစ်ပြီး၊ ငါတို့ရဲ့ဝန်ထမ်းအရေအတွက်က သူတို့ထက် အများကြီးနည်းနေတယ်ဆိုတာကို မမြင်နိုင်ကြဘူးလား"

Microsoft ၏ အင်ဂျင်နီယာအရေအတွက်မှာ သောင်းဂဏန်းမျှရှိပြီး၊အခြားသော အလုပ်သမားများလည်း ရှိသေးသည်။ တစ်ကမ္ဘာလုံးရှိ ဝန်ထမ်းအရေအတွက်မှာ တစ်သိန်းခွဲ ကျော်နေပြီဖြစ်သည်။

Microsoft ၏ လွန်ခဲ့သော နှစ်နှစ်က အမြတ်အစွန်း ရှာဖွေနိုင်စွမ်းဖြင့်ဆိုရလျှင်၊ ဤလူများသည်လုံးဝ ကိစ္စမရှိပေ။ လူနှစ်သိန်းကိုပင် လွယ်ကူစွာ ကျွေးမွေးထားနိုင်သည်။ သို့သော်လည်း ယခုအခါ Microsoft ၏ထုတ်ကုန်များမှာ အမြတ်အစွန်း ရှာဖွေနိုင်စွမ်း သိသိသာသာကျဆင်းသွားပြီ ဖြစ်သည်။

ရုံးသုံးဆော့ဖ်ဝဲလ်များသည် Lenovo-Kingsoft၏ထုတ်ကုန်များကြောင့် ဈေးကွက်ရိုက်ခတ်မှုကို ခံခဲ့ရသည်။ သူတို့ကိုယ်တိုင်လည်း ဈေးနှုန်းကို တက်ကြွစွာ လျှော့ချခဲ့ရာ၊ အမြတ်အစွန်းမှာ အလွန်အမင်း ကျဆင်းသွားခဲ့သည်။ ထို့အပြင် XP စနစ် ကို ယခုအခါ မရောင်းတော့ဘဲ၊ VISTA စနစ် သည်လည်း ရောင်းမစွံသည့် ပြဿနာထဲသို့ ကျဆင်းသွားခဲ့သည်။ သူတို့၏အဓိက အမြတ်အစွန်းရလမ်း နှစ်ခုစလုံးမှာ Lenovo-Kingsoft၏ဝေစုခွဲယူခြင်းကို ခံလိုက်ရသည်။

ပုံမှန်အားဖြင့် အမြတ်အစွန်း ကျဆင်းချိန်တွင်၊ ဝန်ထမ်းလျှော့ချခြင်းကဲ့သို့သော ကုန်ကျစရိတ်ကို ထိန်းချုပ်ရန် နည်းလမ်းများကို စဉ်းစားသင့်သည်။

သို့သော်လည်း Microsoft သည် ဝန်ထမ်းလျှော့ချရန် မပြင်ဆင်သည့်အပြင်၊ ဆက်လက် တိုးချဲ့ကာအစွမ်းကုန် အလုပ်ခေါ်ယူနေသည်။

ဝင်ငွေလျော့နည်းပြီး သုံးစွဲမှု များပြားလာသဖြင့်၊ Microsoft ၏အမြတ်အစွန်းသည် တဖြည်းဖြည်း နည်းပါးလာမည် ဖြစ်သည်။ သုတေသနနှင့်ဖွံ့ဖြိုးတိုးတက်ရေးဘက်သို့ရင်းနှီးမြှုပ်နှံနိုင်သည့်ကုန်ကျစရိတ်များလည်း တဖြည်းဖြည်း နည်းပါးလာမည် ဖြစ်သည်။ ထိုအခါ Lenovo-Kingsoftနှင့် Microsoft တို့အကြား ကွာဟချက်သည်လည်း တဖြည်းဖြည်း သေးငယ်လာမည် ဖြစ်သည်။

ဖုန်းယွီသည် စဉ်းစားလိုက်သည်။ တစ်ခါတစ်ရံ Microsoft သည် လူများအားလုံးကို အလုပ်ခန့်လိုက်ပြီး၊ Lenovo-Kingsoft ကဲ့သို့သော ကုမ္ပဏီများတွင် သုတေသနလုပ်ရန် အင်ဂျင်နီယာများ မရှိတော့စေရန်နှင့် သူတို့၏ ဦးဆောင်မှုကို ဆက်လက်ထိန်းသိမ်းထားနိုင်ရန် ရည်ရွယ်ခြင်း ဖြစ်ကောင်းဖြစ်နိုင်သည်။

တစ်ချိန်တည်းမှာပင်၊ Microsoft ၏ အင်ဂျင်နီယာအရေအတွက် ပိုများလာသောကြောင့်၊ ထုတ်ကုန်သစ်များကို တီထွင်ရန် အင်အားရှိလာနိုင်ပေသည်။

ဖုန်းယွီသည် ရုတ်တရက် သတိဝင်လာခဲ့သည်။ "ခါမီဒါ Microsoft ကိုယ်တိုင်က လုပ်ငန်းအရွယ်အစားကို ချဲ့ထွင်ဖို့ ရည်ရွယ်ထားတာဖြစ်နိုင်မလား"

ခါမီဒါ မာဆာအိုသည် ခေါင်းခါလိုက်သည်။ "မဖြစ်နိုင်ပါဘူး ကျွန်တော် ရဲလ်ဖ်တို့နဲ့ ဒီပြဿနာကို ဆွေးနွေးဖူးပါတယ်။ အကယ်၍ Microsoft က လုပ်ငန်းအရွယ်အစားကို ချဲ့ထွင်ချင်တယ်ဆိုရင် ထုတ်ကုန်သစ်တွေ တီထွင်ရမှာပါ။ ဒါပေမဲ့ သူတို့ အခု PC Operating System ပေါ်က ဈေးကွက်ဝေစုကို ပြန်လည်ဆယ်ယူဖို့ နည်းလမ်းရှာရမှာမဟုတ်ဘူးလား"

"သူတို့ ဒီတစ်ကြိမ်မှာ ဒီလောက်ကြီးမားတဲ့ အမှားအယွင်းတွေ ဖြစ်ခဲ့တယ်။ ကျွန်တော်တို့ရဲ့ XOS ရောင်းအားက အရင်ကထက်တောင် ပိုကောင်းနေတယ်၊ သူတို့က ကျွန်တော်တို့ဆီက အင်ဂျင်နီယာတွေကိုတောင် လုယူနေကြတုန်းပဲ။ သူတို့လုပ်ငန်းအရွယ်အစားကို ချဲ့ထွင်ချင်တယ်ဆိုရင်တောင်၊ ဘာလုပ်နိုင်မှာလဲ။ Application Software အသစ်တွေ လုပ်မှာလား"

ဖုန်းယွီသည် ရုပ်ရှင်ကို ပိတ်လိုက်ပြီး လေးနက်စွာ မေးလိုက်သည်။ "သူတို့ Operating System အသစ်ကို တီထွင်ဖို့ ရည်ရွယ်ထားတာ ဖြစ်နိုင်မလား"

"ဟင်… ဒီ Operating Systemက ပေါ်လာတာ ခြောက်လပဲ ရှိသေးတယ်လေ၊ သူတို့က အသစ်ကိုတီထွင်တော့မလို့လား။ ဒါဆို အမေရိကန်ဒေါ်လာ ဘီလီယံဆယ်ချီ ကုန်ကျထားတဲ့ရင်းနှီးမြှုပ်နှံမှုကို ပြန်မလိုချင်တော့ဘူးလား။ သူတို့ရဲ့ ဒီVISTA စနစ်က သမိုင်းတစ်လျှောက် အမြင့်ဆုံး စံချိန်တင် ဈေးနှုန်းနော်"

ခါမီဒါ မာဆာအိုသည် ဖုန်းယွီအား အနည်းငယ်အံ့အားသင့်စွာ ကြည့်လိုက်သည်။ သူဌေးက ဘယ်လိုလုပ်ပြီး ဒီလောက်လက်တွေ့မကျတဲ့ အတွေးမျိုး တွေးနိုင်ရတာလဲ။ Microsoft ၏လက်ရှိ စနစ်ပြဿနာပင် မဖြေရှင်းရသေးဘဲ၊ အသစ်တစ်ခုကို သုတေသနလုပ်ရဦးမည်ဆိုလျှင်၊ သူတို့တွင် ထိုမျှများပြားသော တီထွင်ဖန်တီးမှု အသစ်များကို မည်သည့်နေရာမှ ရနိုင်မည်နည်း။

"ဒါပေမဲ့ မင်းလည်း မြင်တဲ့အတိုင်းပဲ၊ ဒီအော်ပရေးတင်းစနစ်ရဲ့ ဂုဏ်သတင်းက ဘယ်လောက်တောင် ဆိုးရွားနေလဲဆိုတာ၊ Microsoft ရဲ့ ရောင်းအားတွေက ဆက်တိုက် ကျဆင်းနေတယ်။ ဒီကိစ္စတွေ ဖြစ်ပြီးတဲ့နောက် ရောင်းအားက ပိုလို့တောင် အေးသွားတဲ့ ကာလကို ရောက်သွားတယ်။ အသုံးပြုသူ တော်တော်များများကတောင် ဒီ VISTA က XPလောက် သုံးရတာ အဆင်မပြေဘူး၊ Microsoft ရဲ့ ထုတ်ကုန်တွေက နောက်ပြန်ဆုတ်သွားတယ်လို့ ပြောနေကြတယ်"

"ဒီလိုအချိန်မှာ မင်းသာ Microsoft ရဲ့ ဦးဆောင်သူဆိုရင် ဘယ်လိုရွေးချယ်မလဲ။ ဆက်ပြီး အတင်းတောင့်ခံထားမလား၊ ဒါမှမဟုတ် ဒီလမ်းကို ရှောင်ကွင်းပြီး လမ်းသစ်တစ်ခုကို ဖောက် ဆုံးရှုံးသွားတာတွေကို ပြန်သိမ်းပိုက်မလား"

ခါမီဒါ မာဆာအိုသည် မှင်သက်သွားခဲ့သည်။ ဟုတ်ပေသည်၊ Microsoft သည် ဤအချိန်တွင် နောက်ဆုတ်စရာ လမ်းမရှိတော့သည့် အခြေအနေသို့ ရောက်နေပြီ ဖြစ်သည်။ အကယ်၍ Lenovo-Kingsoftသာ ထွက်ပေါ်လာပြီး မနှောင့်ယှက်ခဲ့လျှင်၊ Microsoft ၏ ဤစနစ်သည် ရောင်းမကောင်းလျှင်ပင်၊ XP ကို အဆင့်မြှင့်တင်ထိန်းသိမ်းမှု ရပ်နားလိုက်ခြင်းကြောင့်၊ အသုံးပြုသူများသည် မဖြစ်မနေ VISTA စနစ် ကို ဝယ်ယူရမည် ဖြစ်သည်။

သို့သော်လည်း ယခုအခါ အသုံးပြုသူများတွင် ရွေးချယ်စရာ အသစ်ရှိလာခဲ့သည်။ VISTAထက် ဂုဏ်သတင်း ပိုကောင်းသည့် XOSရှိနေသောကြောင့်၊ Microsoft သည် XP ကို အဆင့်မြှင့်တင်ထိန်းသိမ်းမှု အမှန်တကယ် ရပ်နားလိုက်လျှင်၊ ၎င်းသည် ကိုယ့်သေတွင်း ကိုယ်တူးခြင်းပင်ဖြစ်သည်။

ဤအချက်ကို Microsoft မှ ဤကိစ္စကို ကြေညာပြီးနောက်၊ XOS ရောင်းအား သိသိသာသာ တိုးလာခြင်းမှ မြင်တွေ့နိုင်သည်။

ထို့ကြောင့် Microsoft ၏ အတင်းတောင့်ခံထားခြင်း၏ ရလဒ်မှာ XOSသည် အနာဂတ်တွင် VISTA ကို ကျော်လွန်သွားမည်ဖြစ်ပြီး၊ Microsoft ကို အောက်သို့ ဖိနှိပ်သွားမည် ဖြစ်သည်။ သို့သော်လည်း ယခု Microsoft သည် စနစ်သစ်ကို တီထွင်ရမည်ဖြစ်သလို၊ VISTA ကို အဆင့်မြှင့်တင်ထိန်းသိမ်းမှု မရပ်နားနိုင်သေးပေ၊ သို့မဟုတ် XP ကိုပါ ဆက်လက်၍ အဆင့်မြှင့်တင်ထိန်းသိမ်းမှုများ ပြုလုပ်ပေးနေရမည်ဆိုလျှင်၊ ၎င်းတို့၏ နည်းပညာဝန်ထမ်းများသည် အမှန်တကယ်ပင် လောက်ငှမည်မဟုတ်ပေ။

Microsoft သည် Lenovo-Kingsoftနှင့်မတူပေ။ ၎င်းတို့၏ ဘာသာစကားမျိုးစုံ ဗားရှင်းထုတ်ကုန်များကို သူတို့၏ကိုယ်ပိုင်ကုမ္ပဏီမှသာ ပြုလုပ်ခြင်း ဖြစ်သည်။ Lenovo-Kingsoftကမူ ပူးပေါင်းဆောင်ရွက်သည့် ကုမ္ပဏီများထံသို့ လွှဲပြောင်းပေးထားခြင်းဖြစ်သည်။

Microsoft ဤသို့လုပ်ခြင်းဖြင့် အကြီးမားဆုံးသော အမြတ်အစွန်းကို အာမခံချက် ပေးနိုင်သည်။ Lenovo-Kingsoft ဤသို့လုပ်ခြင်းဖြင့် ထိုဒေသခံ ကုမ္ပဏီများကို အားကိုးကာ၊ ထုတ်ကုန်များကို မြှင့်တင်နိုင်သဖြင့်၊ ကိုယ့်အားသာချက်နှင့်ကိုယ်ရှိကြသည်။

အကယ်၍ Lenovo-Kingsoftသည် Microsoft ၏ထိုနှစ်များကဲ့သို့ အင်အားကြီးမားခဲ့လျှင်၊ မိမိဘာသာ ရုံးခွဲဖွင့်ခြင်းကပို၍ တွက်ခြေကိုက်မည်မှာ သဘာဝပင် ဖြစ်သည်။

"Boss ဒါဆို ကျွန်တော်တို့က Microsoft ကို ကူညီလိုက်သလို ဖြစ်မသွားဘူးလား” ခါမီဒါ မာဆာအိုသည် သူကိုယ်တိုင် အမှားလုပ်မိသွားပြီဖြစ်ကြောင်း သတိပြုမိသွားသည်။

သူက Bossကို Microsoftမှ လူပိုခေါ်စေရန်နှင့် Microsoft ၏ အသုံးစရိတ်များကို တိုးလာစေရန် ပြောခဲ့ပြီး၊ ထိုမှတစ်ဆင့်Microsoft ၏ အမြတ်အစွန်းများကို ဆွဲချရန်ပြောခဲ့သည်။ သို့သော်လည်း ဤအရာသည် Microsoft ၏ အကြံအစည်ထဲသို့ တည့်တည့်မတ်မတ် ဝင်သွားနိုင်သည်ဟု မတွေးမိခဲ့ပေ။

"ကိစ္စမရှိပါဘူး၊ အကယ်၍ ငါတို့ စဉ်းစားတာ လွန်သွားတယ်ဆိုရင် Microsoft လူခေါ်တာက ကိုယ့်ကိုယ်ကိုယ် ဝန်ထုတ်ဝန်ပိုး တိုးစေတာပါပဲ။ အကယ်၍ ငါတို့ စဉ်းစားတာ မလွန်ဘူးဆိုရင်လည်း၊ Microsoft ရဲ့ လူခေါ်တာက အရမ်း ကမန်းကတန်း ဖြစ်နေပြီး၊ လစာကလည်း ပုံမှန်ထက် ပိုများနေသေးတော့ ဝန်ထုတ်ဝန်ပိုး တိုးတာချင်းက အတူတူပါပဲ"

"ဒါကြောင့် ဘယ်လိုပဲဖြစ်ဖြစ် Microsoft က ရှုံးသွားပါပြီ။ အခုငါတို့ လုပ်ရမှာက၊ Microsoft ဟာ အရင်တုန်းက Microsoft မဟုတ်တော့ဘူး၊ နည်းပညာလက်ဝါးကြီးအုပ်မှုကို မလုပ်နိုင်တော့ဘူးဆိုတာကို လူတိုင်းသိအောင် လုပ်ရမှာပဲ"

PC Hardwareပိုင်းတွင် ဖြစ်စေ၊ သို့မဟုတ် အီလက်ထရောနစ်ထုတ်ကုန်များ၏ Transistor အပိုင်းတွင် ဖြစ်စေ၊ နည်းပညာ ဦးဆောင်မှု အားလုံးသည် ပျမ်းမျှအားဖြင့် တစ်နှစ်မှ တစ်နှစ်ခွဲအချိန်အထိသာ အာမခံနိုင်သည်။

တစ်ခါတစ်ရံ ခြောက်လ အချိန်အတွင်းမှာပင်၊ တစ်ဖက်လူက အမီလိုက်နိုင်သွားပြီး၊ တစ်ခါတစ်ရံတွင် နှစ်နှစ် အချိန်ယူရနိုင်သည်။ သို့သော်လည်း မည်သို့ပင်ဖြစ်စေ၊ Hardware၏ ဦးဆောင်မှုသည် အမီလိုက်ရန်ထိုမျှ မခက်ခဲလှပေ။

Software ကမူ မတူညီပေ။ ဥပမာအားဖြင့် Lenovo-Kingsoftသည် Microsoftကို ပြိုင်ဆိုင်ရန်အတွက် စနစ်သစ်ကိုတီထွင်ရန် နှစ်ပေါင်း မည်မျှကြာအောင် လုပ်ခဲ့ရမှ အောင်မြင်ခဲ့သနည်း။ Apple Companyသည် နှစ်ပေါင်းများစွာ လုပ်ခဲ့သော်လည်း ဈေးကွက်ဝေစု အနည်းငယ်သာ ရရှိခဲ့သည်မဟုတ်လော။

ယခုအခါ ဖုန်းယွီသည် Microsoft ၏ ဒဏ္ဍာရီကိုချိုးဖျက်ပြီး၊ အကောင်းဆုံး Softwareကုမ္ပဏီဟူသည့် အလင်းရောင်ဝန်းကို Lenovo-Kingsoft ၏ ခေါင်းပေါ်တွင် စွပ်တင်ပေးလိုခြင်း ဖြစ်သည်။

"Boss ကျွန်တော် ဘာလုပ်ရမလဲ သိပါပြီ" ခါမီဒါ မာဆာအိုသည် ဖုန်းယွီ၏ဆိုလိုရင်းကို နားလည်သွားသည်။

Lenovo-Kingsoftသည် Taihua Holding Group၏ လက်အောက်ခံဖြစ်သော်လည်း၊ ဥရောပနှင့် အမေရိကဘက်ရှိ ဆက်စပ်ကိစ္စရပ်များကိုအမြဲတမ်း Wind and Rain Holding Group မှ လုပ်ဆောင်နေခြင်း ဖြစ်သည်။

ထိုနေ့တွင်ပင် ဘီလ်ဂိတ်သည် Microsoft ကို ကိုယ်စားပြုကာ အရေးကြီးသော သတင်းတစ်ရပ်ကို ကြေညာခဲ့သည်။ Microsoft သည် TabTablet PC ပရောဂျက်ကို ပြန်လည် မြှင့်တင်တော့မည် ဖြစ်သည်။

……

******