အခန်း ၁၄၈၅

အခန်း ၁၄၈၅ Lenovo၏ ထုတ်ကုန်သစ်… မည်သူက ယှဉ်ပြိုင်ဝံ့မည်နည်း။

"Lenovo Group က ကမ္ဘာပေါ်မှာ အပေါ့ပါးဆုံးနဲ့ အပါးလွှာဆုံးလက်တော့ပ် ကွန်ပျူတာကို မိတ်ဆက်လိုက်ပြီ"

"Lenovo Groupရဲ့ ထုတ်ကုန်သစ်၊ ပြိုင်ဘက်ကင်းတဲ့အလွန်သယ်ဆောင်ရလွယ်ကူသော လက်တော့ပ်ကွန်ပျူတာ"

"Lenovo ရဲ့ အလွန်ပါးလွှာမှုနဲ့၊ ဘယ်သူကများ ယှဉ်ပြိုင်ဝံ့မှာလဲ"

……

Lenovo Group ၏ ထုတ်ကုန်သစ်ဖြစ်သော Ultrabookကို မိတ်ဆက်လိုက်သည့်အချိန်တွင်၊ ကြော်ငြာများကိုလည်း နေရာအနှံ့အပြား၌စတင် ဖြန့်ကြက်လာခဲ့သည်။

တစ်ချိန်တည်းမှာပင် AMDအစရှိသည်တို့ကလည်း ပူးပေါင်း၍ သတင်းဖြန့်ကြော်ငြာလာကြပြီး၊ ၎င်းတို့၏ ဗို့အားနည်းကာ၊ စွမ်းအင်သုံးစွဲမှုနည်းပါးသည့် ထုတ်ကုန်သစ်များကို ဈေးကွက်သို့ မိတ်ဆက်ပေးလိုက်ပြီဖြစ်ကြောင်း ကြေညာခဲ့ကြသည်။

ယခင် Netbookတုန်းက၊ Lenovo Group သည်တရားဝင် ဝက်ဘ်ဆိုက်မှတစ်ဆင့် မှာယူစေခြင်းနှင့်၊ အင်တာနက်မှတစ်ဆင့် ကြော်ငြာခြင်းများကိုသာ အသုံးပြုခဲ့သည်။ ဤတစ်ကြိမ်တွင်မူ လျူချွမ်းကျစ်က ထုတ်ကုန်သစ် မိတ်ဆက်ပွဲအခမ်းအနားကို အဓိကထား၍ ကျင်းပရန် တွန်းအားပေးခဲ့ပြီး၊ ဤအလွန်ပါးလွှာသော လက်တော့ပ်များကို စီးရီးတစ်ခုအဖြစ် ဖန်တီးကာ စံချိန်များကို အဆက်မပြတ် ချိုးဖျက်သွားရန် ရည်ရွယ်ထားသည်။

သို့သော် ဤထုတ်ကုန်သစ် မိတ်ဆက်ပွဲကိုမူ Lenovo Group ၏ စီအီးအိုရန်ယွမ်ချင်းက ဦးဆောင်ကျင်းပခဲ့ခြင်းဖြစ်ပြီး၊ ရန်ယွမ်ချင်းအား ကမ္ဘာ့မီဒီယာများပေါ်တွင် မျက်နှာပိုမိုပြသခွင့်ရရှိစေရန်အတွက်လည်း ဖြစ်သည်။

"လူကြီးမင်းတို့ ကျေးဇူးပြု၍ ကြည့်ရှုပေးကြပါ။ ဒါကတော့ ကျွန်တော်တို့ Lenovo Groupကနေ မိတ်ဆက်လိုက်တဲ့ ကမ္ဘာပေါ်မှာ အပေါ့ပါးဆုံးနဲ့ အပါးလွှာဆုံးလက်တော့ပ် ကွန်ပျူတာပဲ ဖြစ်ပါတယ်။ ကျွန်တော်တို့ဟာ AMDရဲ့ လုံးဝအသစ်ဖြစ်တဲ့ဗို့အားနည်း 12GHZ Dual-core CPU ကိုအသုံးပြုထားပြီး၊ Nvidia ရဲ့ကီးဘုတ်စီမံမှုအပိုင်းမှာလည်း၊ ကျွန်တော်တို့က ထုတ်ကုန်ကို ပိုမိုပါးလွှာသွားစေဖို့အတွက် ဒေါင်လိုက် အကွာအဝေးကို လျှော့ချထားပါတယ်”

"ဒီထုတ်ကုန်ရဲ့ အပါးဆုံးနေရာက ၈ မီလီမီတာပဲ ရှိပြီး၊ အထူဆုံးနေရာဆိုရင်တောင် အထူက ၁၈၁ မီလီမီတာသာ ရှိပါတယ်၊ ရိုးရာ ၅၀ မီလီမီတာဝန်းကျင် အထူရှိတဲ့လက်တော့ပ် ကွန်ပျူတာတွေနဲ့ ယှဉ်လိုက်ရင် အဆင့်မြှင့်တင်မှုက နည်းနည်းလေးတင် မကပါဘူး။ စက်တစ်လုံးလုံးရဲ့ အလေးချိန်ကလည်း ၁၁၈ကီလိုဂရမ်ပဲ ရှိတာမို့၊ ရိုးရာ လက်တော့ပ်တွေထက် တစ်ဝက်မကကိုပိုပေါ့ပါးသွားပါတယ်”

"၁၀ လက်မအရွယ် LCD Display ဖြစ်ပြီး၊ အသုံးပြုချိန် ၄နာရီအထိ ရရှိနိုင်ပါတယ်။ ဒါပေမဲ့ ကျွန်တော်တို့က Power Adapterမှာလည်း ဆန်းသစ်တီထွင်မှုတွေ လုပ်ထားပါသေးတယ်၊ ဒါကတော့ ကျွန်တော်တို့ရဲ့ကိုယ်ပိုင် မူပိုင်ခွင့်နည်းပညာပါဝင်တဲ့ Power Adapterအမျိုးအစားသစ် ဖြစ်ပါတယ်၊ တခြားတစ်မျိုး ပြောရရင် PowerAdapterနဲ့ Power Bankကို ပေါင်းစပ်ထားတဲ့ ထုတ်ကုန်တစ်ခုဖြစ်ပြီး အားအပြည့် သွင်းထားပြီးတဲ့နောက်မှာတော့ လက်တော့ပ်ကို နှစ်နာရီကြာအောင် အသုံးပြုနိုင်ဖို့ ထောက်ပံ့ပေးနိုင်ပါတယ်”

"ဒါ့အပြင် စွမ်းအင်သုံးစွဲမှုတွေ လျော့ကျသွားတဲ့အတွက်ကြောင့်၊ ဒီထုတ်ကုန်က မူလNetbookတွေလိုမျိုး၊ အပူစွန့်ထုတ်မှုသိပ်မကောင်းတဲ့ ပြဿနာမျိုး ရှိမှာ မဟုတ်ပါဘူး။ မူလNetbookတွေရဲ့ အသံထွက် အရည်အသွေး ညံ့ဖျင်းတဲ့ ပြဿနာကိုလည်း ကျွန်တော်တို့က ဖြည့်ဆည်းပေးထားပြီး USBပေါက် တစ်ခုကိုပါ တိုးမြှင့်ထည့်သွင်းပေးထားပါတယ်”

"ဒါဟာ ခေတ်သစ်ကို လမ်းဖွင့်ပေးမယ့် ထုတ်ကုန်တစ်ခုဖြစ်ပြီး၊ ကျွန်တော်တို့Lenovo Groupကို ကိုယ်စားပြုကာ၊ အနာဂတ်မှာ ပိုမိုပေါ့ပါးပါးလွှာပြီး သယ်ဆောင်ရလွယ်ကူတဲ့ လက်တော့ပ်တွေကို သင်တို့ဆီ ယူဆောင်လာပေးသွားမှာပါ"

ဖြောင်း ဖြောင်း ဖြောင်း….

စင်အောက်ရှိ လူအားလုံးက အားပါးတရ လက်ခုပ်တီးနေကြပြီး၊ သူတို့သည် ဤထုတ်ကုန်ကြောင့်အမှန်တကယ်ပင် တုန်လှုပ်အံ့သြသွားခဲ့ကြသည်။

Lenovo Group သည် သယ်ဆောင်ရလွယ်ကူမှုကို အဓိက ရောင်းကွက်အဖြစ် အမှန်တကယ်ပင် အသုံးပြုခဲ့ရာ၊ ဤအရာက အခြားသော လက်တော့ပ်များထက်သယ်ဆောင်ရန် ပိုမိုသင့်တော်ပြီး၊ ဘက်ထရီခံနိုင်ရည် စွမ်းအားအတွက်လည်းလုံလောက်သော အာမခံချက် ရှိနေပေသည်။

IBM၊ Dell အစရှိသည့် စီးပွားရေးလုပ်ငန်းသုံးလက်တော့ပ်များသည်လည်း ကောင်းမွန်သော ဘက်ထရီခံနိုင်ရည် စွမ်းအား ရှိသည်ဟု ဆိုရမည်ဖြစ်သော်လည်း အလွန်ပင် လေးလံထိုင်းမှိုင်းလှပြီး၊ သယ်ဆောင်ရန် လုံးဝမသင့်တော်ပေ။

Lenovo Group သည် မမျှော်လင့်ဘဲ လမ်းကြောင်းအသစ်တစ်ခုကို ဖောက်ကာ၊ Power Bank လုပ်ဆောင်ချက်ပါဝင်သည့် Power Adapterတစ်ခုကို ဖန်တီးထုတ်လုပ်လာခဲ့ခြင်းဖြစ်ရာ၊ ဤအရာကို သူတို့ ယခင်က လုံးဝတွေးမထားခဲ့မိပေ။

စင်အောက်တွင် ထိုင်နေသော Apple Company၏ ဒီဇိုင်နာ၏မျက်နှာပေါ်တွင် အလွန်ခါးသီးနေသော အမူအရာပေါ်လွင်နေခဲ့သည်။ Power Bankလုပ်ဆောင်ချက်ပါဝင်သည့် Power Adapterကို သူတို့လည်း သုတေသန ပြုလုပ်နေကြပြီး၊ မကြာမီမှာပင် အောင်မြင်တော့မည် ဖြစ်သည်။

ယခုကြည့်ရသည်မှာ၊ Lenovo Group ၏ မူပိုင်ခွင့်နှင့်တိုက်ဆိုင်နေခြင်း ရှိမရှိကို ကြည့်ရတော့မည်ဖြစ်သည်။ အကယ်၍ တိုက်ဆိုင်နေမည်ဆိုပါက၊ သူတို့၏ အကောင်းဆုံးသော နည်းလမ်းမှာ မူပိုင်ခွင့်ခွင့်ပြုချက်ကို ဦးစွာ ရယူပြီးမှသာ၊ ဆန်းသစ်တီထွင်မှု ပြောင်းလဲချက်များကို ပြုလုပ်ရန် နည်းလမ်းရှာရမည် ဖြစ်သည်။

လက်တော့ပ်များ ပိုမိုပေါ့ပါးလာရန်၊ ပိုမိုပါးလွှာလာရန်နှင့် သယ်ဆောင်ရ ပိုမိုလွယ်ကူလာစေရန်မှာ Apple Company၏ ရည်မှန်းချက် ကိုယ်တိုင်လည်း ဖြစ်သည်။ သို့သော် Lenovo Group ကလည်း ဤကဲ့သို့ပင် လုပ်ဆောင်နေမည်ဟု သူတို့ မထင်မှတ်ထားခဲ့သလို၊ ဤမျှ လျင်မြန်စွာပင် အချောသတ် ထုတ်ကုန်ကို ထုတ်ပြလာနိုင်မည်ဟုလည်း မထင်ထားခဲ့ပေ။

သူတို့၏ ယခင်က ကြိုးစားအားထုတ်မှုများအားလုံးမှာ၊ အလဟဿ ဖြစ်သွားခဲ့ပြီ မဟုတ်လော။

ကမ္ဘာ့နံပါတ်တစ် ဟူသော ဂုဏ်ပုဒ်ကို Lenovo Group မှရရှိသွားခဲ့ခြင်းက၊ မည်မျှကောင်းမွန်သောကြော်ငြာတစ်ခု ဖြစ်လိုက်သနည်း။

ကြည့်ရသည်မှာ ကုမ္ပဏီ၏ သုတေသနနှင့် ဖွံ့ဖြိုးရေး ဝန်ထမ်းများကို ချက်ချင်းအကြောင်းကြားပြီး၊ ထုတ်ကုန်ကို ပိုမိုပေါ့ပါး ပါးလွှာလာစေရန် နည်းလမ်းရှာမှသာ၊ ဝယ်ယူသုံးစွဲသူများ၏ နှစ်သက်မှုကို ရရှိနိုင်မည် ဖြစ်သည်။

"ဒီ Ultrabookရဲ့ရောင်းဈေးက ဘယ်လောက်များလဲလို့ မေးပါရစေ" လူတစ်ဦးက မေးလိုက်သည်။

လျူချွမ်းကျစ်က ပြုံးရွှင်စွာဖြင့် ပြောလိုက်သည်။ "တရုတ်မှာ ရောင်းချမယ့် ဈေးနှုန်းက ယွမ် ၃၄၉၉ ဖြစ်ပြီး၊ နိုင်ငံခြားမှာ ရောင်းချမယ့်ဈေးနှုန်းကတော့ အမေရိကန်ဒေါ်လာ ၅၄၉ ဝန်းကျင် ဖြစ်ပါတယ်”

ဘာ… ဒီလောက်တောင် ဈေးပေါတာလား။

ဤအချိန်တွင် Netbook၏ ရောင်းဈေးသည် တရုတ်တွင် သုံးထောင်ယွမ်အောက်သို့ ယခုလေးတင် ကျဆင်းသွားခဲ့ပြီး၊ နိုင်ငံခြားရှိ ရောင်းဈေးမှာလည်း အမေရိကန်ဒေါ်လာ လေးရာ့ငါးဆယ်အထက်တွင် ရှိနေဆဲဖြစ်သည်။ ဤထုတ်ကုန်သစ်သည် ထိုNetbookများထက် ဤမျှများစွာ ပိုမိုကောင်းမွန်နေသော်လည်း၊ ရောင်းဈေးက ဤမျှ အနည်းငယ်မျှသာ မြင့်တက်လာခဲ့သည်လား။

သူတို့၏ ခန့်မှန်းချက်များအရ၊ ဤထုတ်ကုန်၏ နိုင်ငံခြားတွင် ရောင်းချမည့်ဈေးနှုန်းသည် အမေရိကန်ဒေါ်လာ ခြောက်ရာအထက်တွင် ရှိသင့်ပြီး၊ တရုတ်ရှိ ရောင်းဈေးသည်လည်း ယွမ်လေးထောင်အထက်တွင် ရှိသင့်ပေသည်။ ထို့အပြင် သယ်ဆောင်ရလွယ်ကူခြင်းဟူသော စကားလုံးနှစ်လုံးကို အလွန်ပင် ပီပြင်စွာဖော်ပြနိုင်ခဲ့သောကြောင့်၊ ဤထုတ်ကုန်အလွန် အရောင်းသွက်မည်ဖြစ်ကြောင်းကိုလည်း အပြည့်အဝ အာမခံနိုင်ပေသည်။

ဒါပေမဲ့ Lenovo Group က ဘာဖြစ်သွားတာလဲ၊ မမျှော်လင့်ဘဲ ရောင်းဈေးကို ဒီလောက်အနိမ့်ကြီး သတ်မှတ်ထားတယ်။ နည်းပညာပိုင်းမှာ ဦးဆောင်နေချိန် ဒီလောက်နိမ့်ကျသော ရောင်းဈေးကို သတ်မှတ်ထားခြင်းက အခြားထုတ်လုပ်သူတွေကို ဘာဆက်လုပ်ခိုင်းနေတာလဲ။ သူတို့ရဲ့ Netbook တွေကို ရောင်းမထွက်တော့အောင် လုပ်နေတာလား။

"ဒီနေ့ရဲ့ ထုတ်ကုန်သစ် မိတ်ဆက်ပွဲမှာ၊ ဒီ Ultrabookတစ်ခုတည်းသာ မဟုတ်ပါဘူး၊ ကျွန်တော်တို့က Multimedia Notebookလို့ သတ်မှတ်ထားတဲ့ လက်တော့ပ် ကွန်ပျူတာတစ်မျိုးလည်း ရှိပါသေးတယ်”

အခြားသူများ အလွန်အံ့အားသင့်သွားကြသည်။ Lenovo Group သည်တစ်ချိန်တည်းမှာပင် ထုတ်ကုန်သစ် နှစ်မျိုးကို ဒီဇိုင်းဆွဲခဲ့သည်လား။ ထို့အပြင် အားလုံးမှာ လုံးဝအသစ်တဖန် နေရာချထားသော ထုတ်ကုန်သစ်များဖြစ်ပြီး၊ မည်သည့်စီးရီးတစ်ခု၏ အဆက်မျှ မဟုတ်ဘူးလား။

ဒီ Multimedia Notebook ဆိုတာက နာမည်ကိုကြားလိုက်ရုံနဲ့တင်၊ ရုပ်ရှင်ဗီဒီယိုနဲ့အသံပိုင်းဆိုင်ရာကို အဓိကထားတယ်ဆိုတာလား။

"အားလုံးပဲ ကျေးဇူးပြုပြီး ကြည့်ပေးကြပါ၊ ဒါကတော့ ကျွန်တော်တို့ Lenovo Groupရဲ့ ထုတ်ကုန်သစ် Multimedia Notebookပဲဖြစ်ပါတယ်။ မျက်နှာပြင်က ပိုကြီးသွားပြီး၊ ၁၄ လက်မ ရှိပါတယ်။ ရုပ်ရှင်ကြည့်တဲ့အချိန်မှာ ပိုပြီး သက်တောင့်သက်သာ ဖြစ်စေမှာပါ၊ မျက်နှာပြင် ပြတ်သားမှုကိုလည်း အဆင့်မြှင့်တင်ထားပြီး အဆင့်တစ်ခုကို ရောက်ရှိနေပါတယ်”

"ဒီထုတ်ကုန်မှာလည်း ကျွန်တော်တို့ရဲ့ အသစ်ဖြစ်တဲ့ အတွင်းပိုင်း တည်ဆောက်ပုံဒီဇိုင်းကို အသုံးပြုထားပါတယ်၊ အလားတူပဲ အလွန်ပေါ့ပါးပြီး အလွန်ပါးလွှာပါတယ်၊ ထူးချွန်တဲ့ ဘက်ထရီခံနိုင်ရည် စွမ်းအားလည်းရှိပြီး ဒီထုတ်ကုန်ရဲ့ လက်လီရောင်းဈေးကလည်း၊ ဟို Ultrabookနဲ့ အတူတူပါပဲ၊ မတူညီတဲ့ အသုံးပြုမှု ရည်ရွယ်ချက်တွေအပေါ် မူတည်ပြီး၊အသုံးပြုသူတွေကို ရွေးချယ်စရာ ပိုမိုများပြားအောင်ပေးစွမ်းထားတာပါ"

"ကျွန်တော်တို့ ကုမ္ပဏီရဲ့ မူလNetbookတွေနဲ့ပတ်သက်လို့တော့ ဆက်လက် ထုတ်လုပ်တော့မှာ မဟုတ်ပါဘူး၊ ဒါပေမဲ့ ကျွန်တော်တို့က Huaqing Tongfangနဲ့ကျင်းချန်တက္ကသိုလ်ရဲ့ Fangzheng Groupတို့အတွက် ထုတ်ကုန်သစ် တစ်မျိုးကိုဒီဇိုင်းဆွဲပေးထားပါတယ်၊ သူတို့ကလည်း ကျွန်တော်တို့နဲ့ တစ်ပြိုင်တည်း ဈေးကွက်ထဲကို မိတ်ဆက်ပေးသွားမှာဖြစ်ပြီး၊ အသုံးပြုသူတွေ ရွေးချယ်နိုင်ဖို့ ထောက်ပံ့ပေးသွားမှာပါ"

မူလက Lenovo Group သည် Netbookကို ဆက်လက်မထုတ်လုပ်တော့ဘူးဟု ကြားလိုက်ရချိန်တွင်၊ ထို PC ကွန်ပျူတာထုတ်လုပ်သူများမှာ အနည်းငယ် ဝမ်းသာသွားခဲ့ကြသေးသည်။ Lenovo Group က ထုတ်ကုန်သစ် နှစ်မျိုးကို မိတ်ဆက်လိုက်သည်ဆိုသော်လည်း၊ ဈေးနှုန်းက Netbookထက်အနည်းငယ် ပိုဈေးကြီးနေသေးသဖြင့်၊ သူတို့တွင် ဈေးကွက် ရှိနေသေးသည်။

သူတို့က စိတ်ထဲမှပင် Lenovo Group ကို ဦးနှောက်မရှိဟု တိတ်တဆိတ် ပြောဆိုနေခဲ့ကြသေးသည်။ မင်းတို့ ကိုယ်တိုင် ဖော်ထုတ်ထားတဲ့ Netbookဈေးကွက်က၊ အခု ဈေးကွက် အကောင်းဆုံးအချိန် ရောက်နေတာကို မင်းတို့က နုတ်ထွက်သွားပြီလား။

ဒီလိုမျိုး ဈေးကွက်ကို အလကားသက်သက် အလျှော့ပေးလိုက်တာ၊ Lenovo Groupရဲ့ စီမံခန့်ခွဲမှုအလွှာက လူတွေ ဦးနှောက်များ ချွတ်ယွင်းသွားတာလား။

သို့သော် Lenovo Group က ထုတ်ကုန်သစ်ကို အခြား ကုန်အမှတ်တံဆိပ်နှစ်ခုထံသို့ လွှဲပြောင်းပေးလိုက်ကြောင်း သိရှိလိုက်ရသောအခါမှသာ Lenovo Group သည် မူလကတည်းက ထိုစီးပွားရေးလုပ်ငန်းနှစ်ခုနှင့် မဟာမိတ်ဖွဲ့ထားခြင်းဖြစ်ကြောင်းကို သူတို့နားလည်သွားခဲ့ကြသည်။ Netbookဈေးကွက်ကို၊ သူတို့၏ ကိုယ်ပိုင်လူများကိုသာ ပေးအပ်လိုက်ခြင်းဖြစ်ပြီး၊ အခြားသော ထုတ်လုပ်သူများကို ပေးလိုက်ခြင်း မဟုတ်ပေ။

စင်မြင့်ပေါ်ရှိ ရန်ယွမ်ချင်း၏ မျက်နှာပေါ်တွင် ဂုဏ်ယူဝင့်ကြွားနေသော အမူအရာများပေါ်လွင်နေပြီး၊ စင်အောက်မှ ချီးကျူးသံများမှာလည်းနားထဲတွင် အဆက်မပြတ် ကြားနေရကာ၊ သူသည် Lenovo Group ကိုကိုယ်စားပြု၍၊ ဤချီးကျူးမှုများကို ခံစားနေခဲ့သည်။ သေချာပေါက်ပင် ဤထုတ်ကုန်သစ်များကို သုတေသနပြုလုပ်၍ တီထွင်ရာတွင်လည်း၊ ယခင်က သူကိုယ်တိုင် အဓိကတာဝန်ယူခဲ့ခြင်းဖြစ်ပြီး၊ ထုတ်ကုန် တီထွင်မှု အောင်မြင်ကာ ကုန်ထုတ်လုပ်ငန်းအဖြစ် ပြောင်းလဲနိုင်ခဲ့ခြင်းတွင် သူ၏ကျေးဇူးကိုလည်း ချန်လှပ်ထား၍ မရနိုင်ပေ။

ဤအချိန်မှစ၍ ရန်ယွမ်ချင်းသည် ဖုန်းယွီ၏အမြော်အမြင်အပေါ် အမှန်တကယ်ပင် အပြည့်အဝ ယုံကြည်လေးစားသွားခဲ့သည်။

ဤထုတ်ကုန်သစ်များ၏ လားရာလမ်းကြောင်းများကို၊ ဖုန်းယွီမှအဆိုပြုခဲ့ခြင်းဖြစ်ပြီး၊ သူသည် အကောင်အထည်ဖော်သူတစ်ဦးမျှသာ ဖြစ်သည်။ သို့သော် ယခုအခါ ဤဂုဏ်ကျက်သရေများ အားလုံးမှာ သူ၏ခေါင်းပေါ်သို့ ကျရောက်လာခဲ့သည်။

သူသည် စင်အောက်ရှိ ထိုထုတ်လုပ်သူ ကိုယ်စားလှယ်များကို ဂုဏ်ယူဝင့်ကြွားစွာဖြင့်အကဲခတ်ကြည့်လိုက်သည်။ အထူးသဖြင့် Lenovo ၏ ရှေ့တွင် ယာယီရပ်တည်နေသည့် Dellနှင့် HP တို့ပင်။ Lenovo Groupက မကြာမီ မင်းတို့ကို သေချာပေါက် ကျော်ဖြတ်သွားမှာ။

အနာဂတ်မှာ မန်နေဂျာဖုန်း ပြောခဲ့သလိုမျိုးပဲ ဖြစ်လာရမည်။ Lenovo ၏ ထုတ်ကုန်များနှင့်၊ မည်သူကများ ယှဉ်ပြိုင်ဝံ့မည်နည်း။

******