အခန်း ၂၁၉၀

အခန်း (၂၁၉၀) ထုံလော့VS ခီတန်

တွေးတောနေစဉ်အတွင်းမှာပင် အဝေးဆီရှိ အခြားသော စစ်မြေပြင် တစ်နေရာတွင် ခွာသံများ ဆူညံစွာ ထွက်ပေါ်လာခဲ့ပြီး ကမ္ဘာပေါ်ရှိ ထိပ်တန်း သံချပ်ကာမြင်းတပ် အချို့မှာ အချင်းချင်း ပိုမိုနီးကပ်လာခဲ့ကြရာ၊ စစ်တပ်ကို ဦးဆောင်ကာ အပြင်းအထန် တိုက်ခိုက်နေသော အာပုစစ်ပင်လျှင် ဤကြီးမားလှသော ခြိမ်းခြောက်မှု သုံးခု လျင်မြန်စွာ နီးကပ်လာနေသည်ကို သတိပြုမိသွားတော့သည်။

"လာကြစမ်း! ဒီအချိန်အထိ မင်းတို့တွေ ဘာကို အားကိုးပြီး ပုန်ကန်ရဲတာလဲ၊ မဟာထန်ကို ဆန့်ကျင်ရဲတာလဲ ဆိုတာကို ငါ ကိုယ်တိုင် ကြည့်ရသေးတာပေါ့!"

မျက်တောင်တစ်ခတ်အတွင်းမှာပင် အာပုစစ်၏ ကိုယ်ပေါ်မှ ပြင်းထန်လှသော သတ်ဖြတ်လိုသည့် အရှိန်အဝါ တစ်ခု ပေါက်ကွဲထွက်ပေါ်လာတော့သည်။

"ချွင်!"

ဓားရှည်များ အိမ်မှ ကျွတ်ထွက်လာသည့် အသံနှင့်အတူ မျက်တောင်တစ်ခတ်အတွင်း အာပုစစ်၏ လက်ထဲရှိ ဓားရှည်မှာ အထက်သို့ မြှောက်တက်သွားခဲ့ပြီး မျက်နှာချင်းဆိုင်ရှိ ကမ္ဘာပေါ်တွင် အတော်ဆုံးဆိုသော သံချပ်ကာမြင်းတပ် သုံးဖွဲ့ဆီသို့ အဝေးမှ ညွှန်ပြလိုက်တော့သည်။

"စစ်တပ် အားလုံး အမိန့်ကို နာခံကြ၊ ငါနဲ့အတူ တိုက်ခိုက်ကြစမ်း!"

"မဟာထန်ကို ကျူးကျော်တဲ့သူတိုင်း ဘယ်လောက်ပဲ ဝေးဝေး သေချာပေါက် သုတ်သင်ပစ်ရမယ်!"

အာပုစစ်၏ အရှိန်အဝါမှာ အလွန်ပင် ခန့်ညားထည်ဝါလှပေရာ ထိုဩဇာပါလှသော အသံကြီးမှာ ခေါင်းလောင်းသံကြီး တစ်ခုအလား စစ်မြေပြင်တစ်ခုလုံးတွင် ပဲ့တင်ထပ်သွားတော့သည်။

ဟီးခနဲ မြင်းဟီသံများ ထွက်ပေါ်လာတော့သည်။

စစ်မြင်းများ၏ ဟိန်းဟောက်သံများမှာ သံမဏိများ ထိခတ်မိသကဲ့သို့ပင် ပြင်းထန်လှပေရာ၊ အာပုစစ်၏ ဦးဆောင်မှုအောက်တွင် သောင်းနှင့်ချီသော မဟာထန် သံချပ်ကာမြင်းတပ်များမှာ တဟုန်ထိုး ပြေးထွက်သွားကြပြီး ထိုသံချပ်ကာမြင်းတပ်များထဲမှ တစ်ဖွဲ့ဆီသို့ ဦးတည်ကာ စတင်တိုက်ခိုက်လိုက်တော့သည်။

တစ်ဖွဲ့ချင်းစီကို ခွဲထုတ်ပြီး ချေမှုန်းခြင်းဆိုသည်မှာ စစ်ဗျူဟာထဲတွင် အလွန်ပင် ရိုးရှင်းလှသော အခြေခံ သဘောတရားတစ်ခုဖြစ်ရာ၊ အာပုစစ်အနေဖြင့် တစ်ဖက်လူ၏ စစ်တပ်ကြီးများ အားလုံး စုစည်းမိသွားပြီး ပူးပေါင်း တိုက်ခိုက်လာမည့် အခွင့်အရေးကို သေချာပေါက် ပေးလိမ့်မည် မဟုတ်ပါချေ။

"ကလေးတို့... ဒီထန်လူမျိုးတွေက တကယ်ပဲ ငါတို့ကို ရွေးချယ်လိုက်တာပဲ"

အဝေးဆီတွင် အာပုစစ်က စစ်တပ်ကြီးကို ဦးဆောင်ကာ သူတို့ဆီသို့ ပြေးဝင်လာသည်ကို မြင်တွေ့လိုက်ရသည့်အခါ ရှေ့ဆုံးမှ ခီတန် ဗိုလ်ချုပ်တစ်ဦးက နှုတ်ခမ်းကို သပ်လိုက်ပြီး သွေးဆာနေသော အပြုံးတစ်ခုကို ပြသလိုက်တော့သည်။

သူ၏အနောက်ဘက်ရှိ နေမင်းလိုက် သံချပ်ကာမြင်းတပ် ခုနစ်ထောင်ခန့်မှာလည်း ချက်ချင်းပင် လှောင်ပြောင် သရော်သည့် အသံများဖြင့် ပြင်းထန်စွာ ရယ်မောလိုက်ကြတော့သည်။

စစ်မြေပြင်တွင် ဤကဲ့သို့သော ပြိုင်ဘက်မျိုးကို သူတို့ အများအပြား မြင်တွေ့ခဲ့ဖူးပြီးပြီ ဖြစ်သည်။ သူတို့၏ အရေအတွက် နည်းပါးသည်ကိုမြင်ပြီး အားနည်းသူကို အနိုင်ကျင့်လိုသည့် သဘောဖြင့် သူတို့ကို ဦးစွာ ပစ်မှတ်ထားလေ့ ရှိကြပါသော်လည်း၊ နောက်ဆုံးတွင်မူ ခြွင်းချက်မရှိ အားလုံးမှာ သူတို့၏ ခုတ်ပိုင်း သတ်ဖြတ်ခြင်းကို ခံလိုက်ရပြီး အဆုံးသတ်သွားကြသည် ချည်းသာ ဖြစ်၏။

ထိပ်တန်း သံချပ်ကာမြင်းတပ် သုံးဖွဲ့ထဲတွင် သူတို့ နေမင်းလိုက် သံချပ်ကာမြင်းတပ် ၏ အရေအတွက်မှာ အနည်းဆုံး ဖြစ်ရာ၊ ဤသည်မှာလည်း ထန် လူမျိုးများက သူတို့ကို ဦးစွာ ရွေးချယ်ခဲ့ရသည့် အကြောင်းရင်းပင် ဖြစ်ကြောင်း သိသာလှပေသည်။

"ဒီ ထန်လူမျိုးတွေကို ငါတို့ ဘယ်လို ကိုင်တွယ်ကြမလဲ"

ရှေ့ဆုံးမှ ခီတန် ဗိုလ်ချုပ်က ကျယ်လောင်စွာ ဟစ်အော်လိုက်သည်။

"အကုန် သတ်ပစ်!"

"သူတို့ရဲ့ လည်ချောင်းတွေကို ဆွဲဖြဲပစ်!"

"အရှင်လတ်လတ် ဝါးစားပစ်ကြစမ်း!"

......

ခီတန်၏ နေမင်းလိုက် သံချပ်ကာမြင်းတပ် တစ်အုပ်မှာ တဟုန်ထိုး ပြေးဝင်လာကြရင်း ကျယ်လောင်စွာ ရယ်မောလိုက်ကြတော့သည်။

"ဟုတ်တယ်၊ သူတို့ကို အကုန် သတ်ပစ်ကြ! သူတို့ကို မျက်စိပွင့်သွားအောင် လုပ်ပေးလိုက်၊ "ရှစ်မျိုးနွယ်စုရဲ့ ဘုရင်"ဆိုတာ ဘာလဲ ဆိုတာကို သိသွားအောင် လုပ်ပေးလိုက်ကြစမ်း!"

သူတို့ထက် အရေအတွက် အဆမတန် များပြားလှသော မျက်နှာချင်းဆိုင်မှ ထုံလော့သံချပ်ကာမြင်းတပ်ကို ရင်ဆိုင်ရာတွင် နေမင်းလိုက် သံချပ်ကာမြင်းတပ် ခုနစ်ထောင်ခန့်မှာ ရူးသွပ်စွာ ရယ်မောလိုက်ကြပြီး၊ အနောက်သို့ ဆုတ်ခွာသွားခြင်း မရှိသည့်အပြင် မိုးကြိုးလျှပ်စီးနှယ် မြန်ဆန်လှသော အရှိန်ဖြင့် အရှိန်ပိုတင်လိုက်ကြကာ မျက်နှာချင်းဆိုင်မှ ထုံလော့သံချပ်ကာမြင်းတပ်ဆီသို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

နှစ်ဖက်စလုံး၏ အကွာအဝေးမှာ ပိုမို နီးကပ်လာခဲ့သည်။

ပေ ၃၀၀!

ပေ ၁၅၀!

နောက်တစ်ခဏတွင် မရေမတွက်နိုင်သော လူများ၏ အကြည့်များ အောက်တွင် နေမင်းလိုက် နှင့် ထုံလော့၊ ကမ္ဘာပေါ်တွင် အစွမ်းအထက်ဆုံး နှင့် အကြမ်းတမ်းဆုံးသော သံချပ်ကာမြင်းတပ် နှစ်ဖွဲ့မှာ ပြင်းထန်စွာ ဝင်တိုက်မိကြတော့သည်။

ဝုန်း!

ဤအခိုက်အတန့်၌ ဖြစ်ပေါ်လာသော တိုက်ခိုက်မှုကြီးကို မည်သူမျှ စကားလုံးဖြင့် ပုံဖော်နိုင်စွမ်း မရှိကြပါချေ၊ အလင်းစက်ကွင်း၊ စစ်မြင်းများ၊ လက်နက်များ၊ သံချပ်ကာများ... အားလုံးမှာ အနည်းငယ်မျှ ချန်လှပ်ထားခြင်း မရှိဘဲ အချင်းချင်း ပြင်းထန်စွာ ဝင်တိုက်မိကြတော့သည်။ ထိုအခိုက်အတန့်၌ အချိန်များပင်လျှင် ရပ်တန့်သွားသကဲ့သို့ ခံစားလိုက်ရပြီး၊ ပြင်းထန်လှသော တိုက်ခိုက်သံကြီးမှာ စစ်မြေပြင် တစ်ဝက်ခန့်ရှိ အသံများကို တိုက်ရိုက်ပင် ဖုံးလွှမ်းသွားတော့သည်။

ဤအခိုက်အတန့်မှာပင် မရေမတွက်နိုင်သော ရာစုနှစ်များစွာ ဖြတ်သန်းသွားသကဲ့သို့ ခံစားလိုက်ရပြီး၊ မရေမတွက်နိုင်သော လူများ၏ အကြည့်များ အောက်တွင်…

ဝုန်းခနဲ ဟာလာဟင်းလင်းပြင်ကြီး တုန်ခါသွားခဲ့ပြီး နေမင်းလိုက် သံချပ်ကာမြင်းတပ် ခုနစ်ထောင်ခန့်မှာ စိပ်လှသော စစ်ကြောင်းကြီးကို ဖွဲ့စည်းထားကြကာ ထုံလော့သံချပ်ကာမြင်းတပ်၏ ပြိုင်ဘက်ကင်းပြီး ဝါးအစည်းပြေသည့်အလား တိုက်ခိုက်လာသော အရှိန်အဟုန်ကို မယုံနိုင်စရာ ကောင်းလောက်အောင်ပင် အောင်မြင်စွာ တားဆီးနိုင်ခဲ့ကြသည်။ သံချပ်ကာမြင်းတပ် နှစ်ဖွဲ့မှာ နွားလားကုသိုက် နှစ်ကောင် ချိုချင်း ချိတ်မိနေသကဲ့သို့ အချင်းချင်း ရောယှက်နေကြတော့သည်။

ထုံလော့သံချပ်ကာမြင်းတပ်က နေမင်းလိုက် သံချပ်ကာမြင်းတပ် ကို ဖောက်ထွင်းနိုင်ခြင်း မရှိခဲ့ပါချေ!

နေမင်းလိုက် သံချပ်ကာမြင်းတပ်ကလည်း ထုံလော့သံချပ်ကာမြင်းတပ်ကို ဖောက်ထွင်းနိုင်ခြင်း မရှိခဲ့ပါချေ!

ထိုအခိုက်အတန့်၌ ကောင်းကင်နှင့် မြေကြီးကြားတွင် တိတ်ဆိတ်သွားခဲ့ရပြီး မည်သည့်အသံမျှ ထွက်ပေါ်ခြင်း မရှိတော့ပါချေ၊ လူတိုင်းမှာ ဤမြင်ကွင်းကြောင့် မှင်တက်သွားကြရသည်။

အဝေးဆီတွင် မတ်မတ်ရပ်နေသော ဝမ်ချောင်ပင်လျှင် ဤမြင်ကွင်းကို မြင်တွေ့လိုက်ရသည့်အခါ မျက်ခုံးများ ပင့်သွားခဲ့ပြီး ရင်ထဲ၌ အနည်းငယ် တုန်လှုပ်သွားတော့သည်။

ထုံလော့သံချပ်ကာမြင်းတပ်၏ တိုက်ရည်ခိုက်ရည်ကို သူ အလွန်ပင် ကောင်းကောင်း သိရှိထားပါသည်။ ဝူရှန်း သံချပ်ကာမြင်းတပ်ကို မယှဉ်နိုင်သေးဘူး ဆိုလင့်ကစား တစ်လောကလုံးရှိ အစွမ်းထက်လှသော ထိပ်တန်း သံချပ်ကာမြင်းတပ် အများအပြားကိုမူ ကျော်လွန်နေခဲ့ပြီ ဖြစ်သည်။

ဤနေမင်းလိုက် သံချပ်ကာမြင်းတပ်မှာ အရေအတွက် အားဖြင့် ခုနစ်ထောင်သာ ရှိပါသော်လည်း၊ ထုံလော့သံချပ်ကာမြင်းတပ် နှစ်သောင်း၏ အစွမ်းအထက်ဆုံးသော ပထမဆုံး တိုက်ခိုက်မှု အရှိန်အဟုန်ကို တားဆီးနိုင်ခဲ့ခြင်းက သူတို့၏ တိုက်ရည်ခိုက်ရည်မှာ တစ်လောကလုံးရှိ မည်သည့် အင်အားစုကိုမဆို တုန်လှုပ်သွားစေရန် လုံလောက်လှကြောင်း ပြသနေပေသည်။

ဤအချက် တစ်ခုတည်းနှင့်ပင် ဤနေမင်းလိုက် သံချပ်ကာမြင်းတပ်အနေဖြင့် ဂုဏ်ယူဝင့်ကြွားနိုင်ပြီ ဖြစ်တော့သည်။

"ဟားဟားဟား၊ ထုံလော့ဆိုတာ ဒီလောက်လေးပဲလား!"

"မင်းတို့ကို ငါ အရှင်လတ်လတ် ဆွဲဖြဲပစ်မယ်!"

ရှေ့တန်းတွင် ခန္ဓာကိုယ် တောင့်တင်းခိုင်မာလှသော နေမင်းလိုက် သံချပ်ကာမြင်းတပ်သား တစ်ဦးက ရက်စက်ကြမ်းတမ်းစွာ ရယ်မောလိုက်ပြီး၊ လက်နှစ်ဖက်ကို အားကုန် အသုံးပြုကာ မျက်နှာချင်းဆိုင်ရှိ ထုံလော့သံချပ်ကာမြင်းတပ်သား တစ်ဦး၏ စစ်မြင်းကို ချက်ချင်းပင် ဆုပ်ကိုင်လိုက်တော့သည်။ ထို့နောက် ထိတ်လန့်စရာကောင်းသော ခွန်အားကို အသုံးပြုကာ ထိုထုံလော့သံချပ်ကာမြင်းတပ်သားကို လူကောမြင်းပါ မြေပြင်မှ မတင်လိုက်ပြီး အနောက်ဘက်သို့ ပြင်းထန်စွာ ပစ်ပေါက်လိုက်ရာ၊ မျက်နှာချင်းဆိုင်ရှိ မြေပြင်ပေါ်သို့ ပေ နှစ်ဆယ်ခန့် အကွာအဝေးတွင် ပြင်းထန်စွာ ရိုက်ကျသွားခဲ့ပြီး ဖုန်မှုန့်များ တလိမ့်လိမ့် ထွက်ပေါ်လာတော့သည်။

မလှမ်းမကမ်းရှိ အခြားတစ်နေရာတွင်လည်း နေမင်းလိုက် သံချပ်ကာမြင်းတပ်သား နောက်တစ်ဦးမှာလည်း ရက်စက်စွာ ရယ်မောလိုက်ပြီး ပါးစပ်မှ ဟိန်းဟောက်သံတစ်ခု ထွက်ပေါ်လာခဲ့သည်။ ထို့နောက် တစ်ကိုယ်လုံးရှိ ပြင်းထန်လှသော ဂန်ချီစွမ်းအင်များနှင့် လက်ထဲရှိ ဓားရှည်ကို အသုံးပြုကာ မျက်နှာချင်းဆိုင်ရှိ ထုံလော့သံချပ်ကာမြင်းတပ်သား၏ ခံစစ်ကို ဖောက်ထွင်းလိုက်သည့် အခိုက်အတန့်မှာပင် သူသည် ရုတ်တရက် ခုန်ထွက်သွားခဲ့ပြီး မျက်နှာချင်းဆိုင်ရှိ ထုံလော့သံချပ်ကာမြင်းတပ်သား ၏ စစ်မြင်းပေါ်သို့ ခုန်တက်သွားတော့သည်။ ထို့နောက် သားရဲတစ်ကောင်အလား ပါးစပ်ကို ဟဟကြီး ဖွင့်လိုက်ပြီး ထိုထုံလော့သံချပ်ကာမြင်းတပ်သား၏ အကာအကွယ်မဲ့နေသော လည်ပင်းကို အားကုန် ကိုက်လိုက်ကာ သူ၏သွေးများကို တိုက်ရိုက်ပင် စုပ်ယူ သောက်သုံးလိုက်တော့သည်။

"အားးး!"

ထိုထုံလော့သံချပ်ကာမြင်းတပ်သားမှာ နာကျင်စွာ အော်ဟစ်လိုက်ပြီး တစ်ကိုယ်လုံးမှ သွေးများ ပန်းထွက်လာတော့သည်။

ဤထူးဆန်းပြီး ရက်စက်ကြမ်းတမ်းလှသော တိုက်ခိုက်ရေး ပုံစံများက ရှေ့တန်းရှိ ထုံလော့သံချပ်ကာမြင်းတပ်များကြားတွင် လုံးဝဖရိုဖရဲ ဖြစ်သွားစေတော့သည်။

မြင်းတပ်သား များအတွက် စစ်မြင်း ဆိုသည်မှာ သူတို့၏ ဒုတိယ အသက်ပင် ဖြစ်ရာ၊ မြင်းတပ်သား အချင်းချင်း တိုက်ခိုက်ရာတွင် ယခုကဲ့သို့ မိမိ၏စစ်မြင်းပေါ်မှ ခုန်ဆင်းပြီး တစ်ဖက်လူဆီသို့ ပြေးဝင်တိုက်ခိုက်လေ့ လုံးဝမရှိကြပါချေ။ ဤလူရိုင်းများအလား ဖြစ်နေသော ခီတန်လူမျိုးများက လူသားများ၏သွေးကိုပါ သောက်သုံးကြသည်ဆိုပါက ပို၍ပင် ဆိုဖွယ်ရာ မရှိတော့ပါချေ။

အာပုစစ်၏ လက်အောက်ရှိ ထုံလော့သံချပ်ကာမြင်းတပ်များမှာ အကြိမ်ပေါင်းများစွာ ရိုက်နှက်ပုံသွင်းခြင်း ခံထားရပြီး ကြီးမားလှသော စစ်ပွဲကြီးများစွာကို ဖြတ်သန်းလာခဲ့ဖူးသည် ဆိုလင့်သော်ငြား ဤကဲ့သို့သော တိုက်ခိုက်ရေး ပုံစံမျိုးကို တစ်ခါမျှ မကြုံတွေ့ခဲ့ဖူးပါချေ။

ဤမြင်ကွင်းကို မြင်တွေ့လိုက်ရသူတိုင်းမှာ ဤအခိုက်အတန့်၌ ရင်ထဲတွင် အလွန်အမင်း တုန်လှုပ်သွားကြရသည်။

ပို၍အံ့ဩစရာ ကောင်းသည်မှာ လက်ရှိ အခြေအနေများအရ ဤလူရိုင်းများအလား ဖြစ်နေသော ခီတန် နေမင်းလိုက် သံချပ်ကာမြင်းတပ် ခုနစ်ထောင်ခန့်၏ ခွန်အားမှာ အာပုစစ်၏ ထုံလော့သံချပ်ကာမြင်းတပ်ထက်ပင် သာလွန်နေသေးသည်။ ခီတန် လူမျိုးများတွင် ဤကဲ့သို့သော ကြောက်မက်ဖွယ်ကောင်းသည့် တပ်ဖွဲ့မျိုး ရှိနေလိမ့်မည်ဟု လူအများစုက တွေးတောထားခဲ့မိခြင်း မရှိပါချေ၊ အနည်းဆုံးတော့ ထန်လူမျိုးအများစုအတွက်မူ လုံးဝ ထင်မှတ်မထားသော ကိစ္စရပ်ပင် ဖြစ်တော့သည်။

"ဟွန်း!"

သို့သော် မျက်တောင်တစ်ခတ်အတွင်းမှာပင် အာပုစစ်က အေးစက်စက် နှာခေါင်းရှုံ့လိုက်ပြီး သူ၏ခြေအောက်ရှိ အလင်းစက်ကွင်းမှာ တုန်ခါသွားခဲ့ကာ၊ စွမ်းအားသစ်တစ်ခုမှာ ခြေအောက်မှနေ၍ စစ်တပ်ကြီး တစ်ခုလုံးဆီသို့ လျင်မြန်စွာ ပျံ့နှံ့သွားတော့သည်။

"ဝုန်း!"

လေလှိုင်းများ မြည်ဟည်းသွားခဲ့ပြီး ခဏတာမျှ အချင်းချင်း ယှဉ်ပြိုင်နေပြီးနောက် ထုံလော့သံချပ်ကာမြင်းတပ် နှစ်သောင်းခန့်မှာလည်း သူတို့၏ အစစ်အမှန် ခွန်အားများကို ထုတ်ဖော်ပြသလာကြတော့သည်။ အလင်းတန်း တစ်ချက် လက်သွားခဲ့ပြီး ကြေးညိုရောင် ဓားရှည် တစ်စင်းမှာ လေဟာပြင်ကို ပြင်းထန်စွာ ခုတ်ပိုင်းလိုက်ရာ မျက်နှာချင်းဆိုင်ရှိ နေမင်းလိုက် သံချပ်ကာမြင်းတပ်သား၏ လက်နက်ကို တစ်ချက်တည်းဖြင့်ပင် ခုတ်ပိုင်းပစ်လိုက်တော့သည်။ ထက်လှသော ထုံလော့ဓားရှည်ကြီးမှာ လျင်မြန်စွာဖြင့် ဓားရောင် တစ်ချက် ဖြတ်ပြေးသွားခဲ့ပြီး ထိုနေမင်းလိုက် သံချပ်ကာမြင်းတပ်သား၏ လည်ပင်းကို ချက်ချင်းပင် ဖြတ်တောက်လိုက်တော့သည်။

ဓားရောင် ပျောက်ကွယ်သွားသည့် အခိုက်အတန့်မှာပင် ကြီးမားလှသော ဦးခေါင်းကြီး တစ်ခုမှာ လည်ထွက်သွားခဲ့ပြီး အဝေးဆီသို့ လွင့်စင်သွားတော့သည်။

ထိုအချိန်ကျမှသာ ထိုနေမင်းလိုက် သံချပ်ကာမြင်းတပ်သား၏ ပြတ်တောက်သွားသော လည်ပင်းမှနေ၍ ဖရူးးးးအသံနှင့်အတူ သွေးများမှာ ပေ ဆယ်ကျော်ခန့် အမြင့်သို့ တဟုန်ထိုး ပန်းထွက်လာတော့သည်။

"ဘယ်လိုလုပ် ဖြစ်နိုင်မှာလဲ"

သေဆုံးသွားသည့် အချိန်အထိ ထိုရက်စက်ကြမ်းတမ်းလှသော နေမင်းလိုက် သံချပ်ကာမြင်းတပ်သားမှာ မျက်လုံးများကို ပြူးလျက်၊ သူ၏ ဦးခေါင်းနှင့် ခန္ဓာကိုယ် ကွဲကွာသွားသည်၊ တစ်ဖက်လူ၏ လွယ်လင့်တကူ ခုတ်ပိုင်း သတ်ဖြတ်ခြင်းကို ခံလိုက်ရသည်ကို မယုံကြည်နိုင်သော အမူအရာများဖြင့် ကြည့်နေခဲ့တော့သည်။

တဘုန်းဘုန်း မြည်သံများနှင့်အတူ ဦးခေါင်းများ မြေပြင်သို့ ပြုတ်ကျသွားသည့်တိုင်အောင်... မိမိတို့၏လူ ဆယ်ဂဏန်းခန့် အသတ်ခံလိုက်ရသည်ကို မြင်တွေ့လိုက်ရသည့်အခါကျမှသာ နေမင်းလိုက် သံချပ်ကာမြင်းတပ်များမှာ အနည်းငယ်မျှ အံ့ဩထိတ်လန့်သွားကြပြီး သူတို့၏ စစ်ကြောင်းများမှာလည်း အနည်းငယ် ဖရိုဖရဲ ဖြစ်သွားတော့သည်။

နေမင်းလိုက် သံချပ်ကာမြင်းတပ်၏ ခွန်အားမှာ ထုံလော့သံချပ်ကာမြင်းတပ် ထက်ပင် သာလွန်လှသည် ဆိုသော်ငြားလည်း၊ တိုက်ခိုက်ရေး ကျွမ်းကျင်မှုပိုင်းတွင်မူ နေမင်းလိုက် သံချပ်ကာမြင်းတပ်နှင့် ထုံလော့သံချပ်ကာမြင်းတပ်တို့ ကြား၌ များစွာသော ကွာဟချက်များ ရှိနေဆဲပင် ဖြစ်သည်။

"ယုတ်မာလိုက်တဲ့ကောင်တွေ၊ သူတို့ကို အကုန် သတ်ပစ်ကြစမ်း!"

ရှေ့ဆုံးမှ နေမင်းလိုက် သံချပ်ကာမြင်းတပ် ခေါင်းဆောင် တစ်ဦးမှာ ကျယ်လောင်စွာ ဟောက်လိုက်ပြီး မျက်တောင်တစ်ခတ်အတွင်း မျက်လုံးများ နီရဲသွားတော့သည်။

ခီတန် လူမျိုးများ၏ တိုက်ခိုက်ရေး ပုံစံမှာ အလွန်ပင် ကြီးမားကျယ်ပြန့်ပြီး အလွန်ပင် ကြမ်းတမ်းလှသည် ဆိုသော်ငြားလည်း၊ ဤမျှလောက် များပြားလှသော စစ်ပွဲများကို ဖြတ်သန်းလာခဲ့ပြီး ပြိုင်ဘက် အများအပြားကို အနိုင်ယူလာခဲ့သော မျိုးနွယ်စု ရှစ်စု၏ ခေါင်းဆောင် နေမင်းလိုက် သံချပ်ကာမြင်းတပ်အနေဖြင့် သာမန်လူများ ဖြစ်နေမည်လား။

သူတို့၏ တိုက်ခိုက်ရေး ကွက်တိုင်းမှာ အကြိမ်ပေါင်းများစွာ ရိုက်နှက်ပုံသွင်းခြင်း ခံထားရသည်ချည်းသာ ဖြစ်ရာ၊ ဟာကွက်များ ရှိနေသည် ဆိုလျှင်တောင်မှ ပြိုင်ဘက် အနေဖြင့် ထိုဟာကွက်များကို အသုံးချရန် အသက်ရှင်လျက် ရှိနေလိမ့်မည် မဟုတ်ပါချ။

ထုံလော့သံချပ်ကာမြင်းတပ် က ဤ မျက်တောင်တစ်ခတ်အတွင်း ပေါ်ထွက်လာသော ဟာကွက်လေးများကို အသုံးချကာ သူတို့၏ လူ အမြောက်အမြားကို သတ်ဖြတ်နိုင်ခဲ့ခြင်းမှာ နေမင်းလိုက် သံချပ်ကာမြင်းတပ် အတွက်မူ ပထမဆုံး အကြိမ်ပင် ဖြစ်တော့သည်။

သို့သော် ဤအချက်ကြောင့်ပင် မျက်တောင်တစ်ခတ်အတွင်း ခီတန် နေမင်းလိုက် သံချပ်ကာမြင်းတပ် အားလုံး၏ အရိုးထဲတွင် ကိန်းအောင်းနေသော ရူးသွပ်မှုများနှင့် တိုက်ခိုက်လိုစိတ်များကို လုံးဝနှိုးဆွပေးလိုက်သလို ဖြစ်သွားတော့သည်။

အင်အားကြီးမားသော နိုင်ငံများကြားတွင် ညှပ်နေရသော မျိုးနွယ်စုတစ်ခုအနေဖြင့် ခီတန် လူမျိုးများမှာ အမြဲတမ်း ရက်စက်ကြမ်းတမ်းပြီး အသက်စွန့် တိုက်ခိုက်လေ့ ရှိကြကာ၊ ပြိုင်ဘက်က အစွမ်းထက်လေလေ ပိုမို အစွမ်းထက်လာလေလေ ဖြစ်သည်၊ မျိုးနွယ်စု ရှစ်စု၏ ခေါင်းဆောင် နေမင်းလိုက် သံချပ်ကာမြင်းတပ်အတွက်မူ ပို၍ပင်ဆိုဖွယ်ရာ မရှိတော့ပါချေ။

ပြိုင်ဘက်က ပိုမိုအစွမ်းထက်လေလေ သူတို့၏အတွင်းပိုင်း၌ ဖုံးကွယ်နေသော ရက်စက်ကြမ်းတမ်းမှုများကို ပို၍ နှိုးဆွပေးနိုင်လေလေပင်။

"ဟီးး!"

စစ်မြင်းများ မြည်ဟီသွားကြပြီး ခီတန် နေမင်းလိုက် သံချပ်ကာမြင်းတပ်သား တစ်ဦးချင်းစီမှာ ကိုယ်တွင်းရှိ ဂန်ချီ စွမ်းအင်များကို ရူးသွပ်စွာ ပေါက်ကွဲထွက်ပေါ်လာစေခဲ့ပြီး၊ အရူးများအလား သူတို့၏ အလားအလာ အားလုံးကို အပြည့်အဝ အသုံးပြုလိုက်ကြရာ အရှိန်မှာ တဟုန်ထိုး မြင့်တက်သွားခဲ့ပြီး မျက်နှာချင်းဆိုင်ရှိ ထုံလော့သံချပ်ကာမြင်းတပ် ဆီသို့ အသက်စွန့်ကာ ပြေးဝင် တိုက်ခိုက်လိုက်ကြတော့သည်။

ပလွတ်ခနဲ အသံနှင့်အတူ အရပ်ရှည်ပြီး တောင့်တင်းခိုင်မာလှသော နေမင်းလိုက် သံချပ်ကာမြင်းတပ်သား တစ်ဦးမှာ ကျားတစ်ကောင်အလား ဟောက်လိုက်ပြီး၊ အမြင့်ဆုံး အရှိန်ဖြင့် ပြေးဝင်လာသော ထုံလော့သံချပ်ကာမြင်းတပ်သား တစ်ဦးဆီသို့ ဝင်တိုက်လိုက်ရာ၊ လူနှစ်ဦး ဝင်တိုက်မိသည့် အခိုက်အတန့်မှာပင် မြင်းပေါ်ရှိ နေမင်းလိုက် သံချပ်ကာမြင်းတပ်သား၏ ဝမ်းဗိုက်ကို ထုံလော့သံချပ်ကာမြင်းတပ်သားက ဓားဖြင့် ထိုးဖောက်လိုက်တော့သည်။

သို့သော်လည်း အထိုးခံလိုက်ရသည့် တစ်ချိန်တည်းမှာပင် ထို နေမင်းလိုက် သံချပ်ကာမြင်းတပ်သား ခီတန် လူသန်ကြီးမှာ အနောက်သို့ ဆုတ်မသွားဘဲ တစ်ဖက်လူ၏ ဓားရှည်အတိုင်း ရှေ့သို့ တိုးဝင်သွားခဲ့ပြီး၊ အရိုးများနှင့် ကြွက်သားများကို အသုံးပြုကာ တစ်ဖက်လူ၏ ဓားရှည်ကို ညှပ်ထားလိုက်ပြီးနောက် အားကုန်ခုတ်ပိုင်းလိုက်ရာ မျက်နှာချင်းဆိုင်ရှိ ထုံလော့သံချပ်ကာမြင်းတပ်သား၏ ခန္ဓာကိုယ်ကိုပါ ဖောက်ထွင်းပစ်လိုက်တော့သည်။

ဇွတ်ခနဲ အသံနှင့်အတူ ဓားသွားတစ်ပိုင်းမှာ မျက်နှာချင်းဆိုင်ရှိ ထုံလော့သံချပ်ကာမြင်းတပ်သား ၏ ကျောပြင်မှနေ၍ ထွက်ပေါ်လာတော့သည်။

ထိုသူ၏ တစ်ကိုယ်လုံးမှ သွေးများ ပန်းထွက်လာခဲ့ပြီး မျက်နှာပေါ်၌လည်း အလွန်အမင်း တုန်လှုပ်နေသော အမူအရာများ ပေါ်ထွက်နေတော့သည်။

ဤနေမင်းလိုက် သံချပ်ကာမြင်းတပ်သားများမှာ ထုံလော့သံချပ်ကာမြင်းတပ်ကို ရင်ဆိုင်ရန်အတွက် ဤကဲ့သို့ "အတူတကွ သေဆုံးမည့်" နည်းလမ်းမျိုးကို အသုံးပြုလာလိမ့်မည်ဟု မည်သူမျှ မထင်မှတ်ထားခဲ့ကြပါချေ。

ပလွတ် ပလွတ် ပလွတ် မြည်သံများနှင့်အတူ!

မျက်တောင်တစ်ခတ်အတွင်းမှာပင် နှစ်ဖက်စလုံး၌ သေဆုံးမှုများ ရှိလာခဲ့ပြီး၊ နေမင်းလိုက် သံချပ်ကာမြင်းတပ်သားများနှင့် ထုံလော့သံချပ်ကာမြင်းတပ်သားများမှာ မြင်းပေါ်မှနေ၍ အဆက်မပြတ် ပြုတ်ကျနေကြသည်။ ပိုမိုများပြားလှသော နေမင်းလိုက် သံချပ်ကာမြင်းတပ်သားများမှာ မြင်းပေါ်မှနေ၍ တိုက်ရိုက် ခုန်တက်သွားကြပြီး မျက်နှာချင်းဆိုင်ရှိ ထုံလော့သံချပ်ကာမြင်းတပ်သား များဆီသို့ တဟုန်ထိုး ခုန်အုပ်လိုက်ကြတော့သည်။

ခဏတာ အချိန်တိုအတွင်းမှာပင် စစ်မြေပြင် တစ်ခုလုံးမှာ လုံးဝ ဖရိုဖရဲ ဖြစ်သွားတော့သည်။

နေမင်းလိုက် သံချပ်ကာမြင်းတပ်၏ တိုက်ရည်ခိုက်ရည်မှာ မူလကတည်းက အလွန်ပင် အစွမ်းထက်လှပေရာ၊ သေဆုံးရမည်ကို မကြောက်မရွံ့ဘဲ အသက်စွန့် တိုက်ခိုက်လာကြသည့်အခါတွင်မူ ထုံလော့သံချပ်ကာမြင်းတပ်ပင်လျှင် သူတို့ကို လွယ်လင့်တကူ အနိုင်ယူနိုင်ရန် ခဲယဉ်းသွားခဲ့ရပြီ ဖြစ်သည်။

"ယုတ်မာလိုက်တဲ့ကောင်တွေ!"

ထုံလော့ဗိုလ်ချုပ် အာပုစစ်မှာ ဤအချိန်တွင် ရင်ထဲ၌ အလွန်အမင်း ဒေါသထွက်နေတော့သည်။ အကယ်၍ နေမင်းလိုက် သံချပ်ကာမြင်းတပ်၏ ဤတိုက်ခိုက်ရေး ပုံစံအတိုင်းသာဆိုပါက သူတို့အနေဖြင့် တစ်ဖက်လူကို လုံးဝ အမြစ်ပြတ် ချေမှုန်းနိုင်မည်ဆိုလျှင်တောင်မှ ထုံလော့သံချပ်ကာမြင်းတပ်မှာလည်း လူ ငါးခြောက်ထောင်ခန့် ဆုံးရှုံးသွားရပေလိမ့်မည်။

ထုံလော့လူမျိုးများမှာ တစ်သောင်း မပြည့်ပါက ပြဿနာ မရှိသော်လည်း၊ တစ်သောင်း ကျော်သွားပါက လုံးဝပြိုင်ဘက်ကင်း ဖြစ်သွားတော့သည်။

ထုံလော့လူမျိုးများ၏ အရေအတွက်မှာ မူလကတည်းက နည်းပါးလွန်းလှရာ တစ်ကြိမ်တည်းဖြင့် လူ ငါးခြောက်ထောင်ခန့် ဆုံးရှုံးသွားမည်ဆိုပါက ထုံလော့မျိုးနွယ်စုအတွက် အလွန်ပင် ကြီးမားလှသော ထိုးနှက်ချက်ကြီး တစ်ခု ဖြစ်သွားပေလိမ့်မည်။

သို့သော်လည်း ထုံလော့မျိုးနွယ်စုအနေဖြင့် တစ်လောကလုံး၌ နာမည်ကျော်ကြားခဲ့ခြင်းမှာ ရဲရင့်မှု တစ်ခုတည်း ကြောင့်သာ ဖြစ်ရာ၊ အကယ်၍ လူရိုင်းများ တစ်အုပ် ရှေ့တွင် အနောက်သို့ ဆုတ်ခွာသွားခဲ့ပြီး အရှိန်အဝါများ ကျဆင်းသွားမည် ဆိုပါက နောက်ပိုင်းတွင် တစ်လောကလုံးကို မည်သို့လျှင် ဆက်လက် လွှမ်းမိုးထားနိုင်တော့မည်နည်း။

"ဂန်ချီ စွမ်းအင်တွေကို စုစည်းထားကြ၊ နှလုံးကို ကာကွယ်ထား၊ 'ထုံလော့ဓားရောင်'ကို အသုံးပြုကြစမ်း!"

အာပုစစ်က ကျယ်လောင်စွာ ဟောက်လိုက်သည်။

သူ၏ လက်ထဲရှိ ဓားရှည်ကို တစ်ချက် ဝှေ့ယမ်းလိုက်ရာ ပြိုင်ဘက်ကင်းလှသော ဓားစွမ်းအင်တစ်ခုမှာ လျင်မြန်စွာ ထွက်ပေါ်လာခဲ့ပြီး နေမင်းလိုက် သံချပ်ကာမြင်းတပ်သား ဆယ်ဂဏန်းခန့်ကို ခါးမှနေ၍ တိုက်ရိုက်ပင် အပိုင်းပိုင်း ခုတ်ပိုင်းပစ်လိုက်တော့သည်၊ နှင်းမြူများ တလိမ့်လိမ့် ထွက်ပေါ်လာခဲ့ပြီး ပေ ဆယ်ကျော်ခန့် မြင့်မားစွာ တက်သွားခဲ့သည်။ နောက်တစ်ခဏတွင် အာပုစစ်၏ အမိန့်နှင့်အတူ ထုံလော့သံချပ်ကာမြင်းတပ်၏စစ်ကြောင်းမှာ ရုတ်တရက် ပြောင်းလဲသွားတော့သည်။

ထုံလော့ဓားရောင်…

ဤသည်မှာ ထုံလော့မျိုးနွယ်စု၏ အစွမ်းအထက်ဆုံးသော စစ်ဗျူဟာ စစ်ကြောင်း တစ်ခုဖြစ်ပြီး၊ ထိုက်ကျုံးခေတ်အခါက ထုံလော့မျိုးနွယ်စုများအနေဖြင့် ဧကရာဇ်၏သက်တော်စောင့်များအဖြစ် ရွေးချယ်ခံခဲ့ရပြီးနောက် အစွမ်းထက်သော ရန်သူများကို ကိုင်တွယ်ရန်အတွက် အသုံးပြုခဲ့သော အထူးစစ်ကြောင်းတစ်ခုပင် ဖြစ်သည်။ ရှည်လျားလှသော အချိန်ကာလများကို ဖြတ်သန်းပြီးနောက် နောက်ဆုံးတွင် စစ်မြေပြင်ပေါ်၌ ထပ်မံ ထွက်ပေါ်လာခဲ့ပြီ ဖြစ်တော့သည်။

******