အခန်း ၂၁၉၂

အခန်း (၂၁၉၂) တာ့ခ် ဝံပုလွေဘုရင် မဟာအလင်းစက်ကွင်း

"ဟူး…"

"ဒုန်း ဒုန်း ဒုန်း!"

စစ်ဗုံသံများနှင့် ခရုသင်းသံများမှာ ကောင်းကင်ယံအထိ ပဲ့တင်ထပ်သွားခဲ့ပြီး စစ်မြေပြင်၏ အနောက်ဘက်တွင် တစ်ပြိုင်နက်တည်း ထွက်ပေါ်လာတော့သည်။

နိုင်ငံအသီးသီး၏ မဟာမိတ်တပ်ဖွဲ့ဘက်တွင် မူလက နောက်တန်း၌ စောင့်ကြပ်နေသည့် စစ်သည် တစ်သန်းခန့် ရှိနေခဲ့သော်လည်း၊ နိုင်ငံအသီးသီးမှ ဘုရင်များ၏ အမိန့်ပေးချက်နှင့်အတူ သူတို့မှာ ရူးသွပ်နေသည့်အလား ပင်လယ်လှိုင်းကြီး တစ်ခုအလား ရှေ့တန်းသို့ အစွမ်းကုန် ချီတက်လာကြတော့သည်။

နိုင်ငံအသီးသီးမှ မဟာမိတ်တပ်ဖွဲ့၏ အတော်ဆုံး ဆိုသော စစ်သည်များ အားလုံး အရှိန်အပြည့်ဖြင့် ထွက်ပေါ်လာကြသည့်အခါ၊ ထိုအရှိန်အဝါမှာ ကောင်းကင်ယံကို ဖုံးလွှမ်းကာ ပင်လယ်လှိုင်းသံများအလား ဖြစ်ပေါ်နေခဲ့ပြီး မြေပြင်ကြီးပင်လျှင် ဤတုန်ခါမှုများကို မခံနိုင်တော့ဘဲ အချိန်မရွေး ကွဲအက်သွားတော့မည့်အလား ဖြစ်နေတော့သည်။

ဤမျှသာမက မြင်းဟီသံကြီးများ ထွက်ပေါ်လာခဲ့ပြီး စစ်အလံများအောက်တွင် မတ်မတ်ရပ်နေကြသော ဝူဆူမစ်ရှ် ခါဂန်း၊ယွန်းဂျယ်စိုးမွန်း နှင့် ခီတန်ဘုရင် အပါအဝင် လူတိုင်းမှာ အေးစက်လှသော မျက်လုံးများဖြင့် စိုက်ကြည့်နေကြကာ ကိုယ်ပေါ်မှ အရှိန်အဝါများမှာလည်း အလွန်ပင် ရက်စက်ကြမ်းတမ်းလှပေရာ၊ တစ်ဦးပြီးတစ်ဦး မိမိတို့၏ မြင်းများပေါ်သို့ တက်ရောက်လိုက်ကြတော့သည်။

ဝမ်ချောင်၏ဂုဏ်သတင်းမှာ အလွန်ပင် ကျော်ကြားလွန်းလှပြီး သူ၏ ခွန်အားမှာလည်း အလွန်ပင် ကြီးမားလှသဖြင့် ရှေ့တန်းရှိ ဗိုလ်ချုပ်များ တစ်ဦးတည်းဖြင့်မူ မည်သို့မျှ တားဆီးနိုင်မည် မဟုတ်ပါချေ။ လူတိုင်း အတူတကွ ပူးပေါင်း တိုက်ခိုက်မှသာလျှင် ဝမ်ချောင်ကို ခြိမ်းခြောက်နိုင်မည် ဖြစ်ပေသည်။

ထို့ပြင် သူတို့၏ရင်ထဲ၌ စကားလုံးဖြင့် ဖော်ပြရန် ခက်ခဲသော မျှော်လင့်ချက်နှင့် စောင့်မျှော်မှု အချို့လည်း ရှိနေကြသည်။

ဝမ်ချောင်မှာ လက်ရှိအချိန်တွင် အမြင့်ဆုံး အထွတ်အထိပ်၌ ရှိနေသည်မှာ မှန်သော်ငြားလည်း၊ ယခုအချိန်အထိ ဝူဆူမစ်ရှ် ခါဂန်းဖြစ်စေ၊ ယွန်းဂျယ်စိုးမွန်း ဖြစ်စေ၊ သို့မဟုတ် ခီတန်ဘုရင်ဖြစ်စေ၊ မည်သူမျှ ဤ "ကမ္ဘာ့အတော်ဆုံး စစ်ဗျူဟာ နတ်ဘုရား"နှင့် ထိပ်တိုက် ရင်ဆိုင် တိုက်ခိုက်ဖူးခြင်း မရှိသေးပါချေ။

သူရဲကောင်း တို့၏ သွေးမှာ အမြဲတမ်း ပူနွေးနေတတ်သည်၊ သူတို့ သုံးဦးစလုံးမှာ ဘုရင်များ ဖြစ်ကြသလို တစ်လောကလုံးရှိ အတော်ဆုံးဆိုသော အင်အားကြီး ပုဂ္ဂိုလ်များလည်း ဖြစ်ကြသဖြင့်၊ ရင်ထဲ၌ ဤကဲ့သို့သော ပြင်းထန်လှသည့် တိုက်ပွဲမျိုးကို အမှန်တကယ်ပင် တောင့်တနေကြခြင်း ဖြစ်သည်။

ဝုန်းခနဲ အသံများ ထွက်ပေါ်လာပြီးနောက် စစ်တပ်ကြီးများ ချီတက်လာကြတော့သည်။ ခီတန်ဘုရင်နှင့် ခီတန် မျိုးနွယ်စု ရှစ်စု၊ ယွန်းဂျယ်စိုးမွန်းနှင့် ဂိုဂူလျော အင်ပါယာ၏ အတော်ဆုံး စစ်တပ်များ၊ ဝူဆူမစ်ရှ် ခါဂန်းနှင့်အတူ အထက်တန်းလွှာ သံချပ်ကာမြင်းတပ် သိန်းချီတို့မှာ ရှေ့တန်းဆီသို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

စစ်မြေပြင် တစ်ခုလုံးတွင် သတ်ဖြတ်လိုသည့် အရှိန်အဝါများမှာ ချက်ချင်းပင် အဆများစွာ ပိုမို ပြင်းထန်လာတော့သည်။

အဝေးဆီတွင်မူ နိုင်ငံအသီးသီး၏ မဟာမိတ်တပ်ဖွဲ့များမှာ တောင်ပြိုသံ၊ ပင်လယ်လှိုင်းသံများအလား တဟုန်ထိုး တိုးဝင်လာနေကြသော်ငြားလည်း ဝမ်ချောင်ကမူ အေးဆေးစွာ ပြုံးလိုက်ပြီး မည်သည့်အရာမျှ မရှိသကဲ့သို့ ဂရုစိုက်မနေတော့ပါချေ။

"တိုက်ခိုက်ကြစမ်း!"

ဝမ်ချောင်က လက်ဝါးကို ဝှေ့ယမ်းလိုက်ပြီး တိုက်ခိုက်ရန် ရိုးရှင်းလှသော အမိန့်ကိုသာ ပေးလိုက်သည်။

ဝမ်ချောင်၏ အမိန့်နှင့်အတူ မဟာထန်စစ်တပ် နှစ်သိန်းကျော်မှာ စနစ်တကျ ဖွဲ့စည်းထားပြီး၊ ဖြည်းညင်းသော်လည်း အလွန်ပင် ခိုင်မာလှသော ခြေလှမ်းများဖြင့် ရှေ့တန်း စစ်မြေပြင်ဆီသို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

စစ်တပ်ကြီး ချီတက်နေစဉ်အတွင်းမှာပင်…

စစ်တပ်ကြီးမှာ ရုတ်တရက် ရေလှိုင်းများကဲ့သို့ နှစ်ခြမ်း ကွဲထွက်သွားခဲ့ပြီး အလယ်ဗဟို၌ ဖုံးကွယ်ထားသော တပ်ဖွဲ့ တစ်ဖွဲ့ ပေါ်ထွက်လာတော့သည်။

ငွေရောင် တောက်ပနေသော သံချပ်ကာများ နှင့် ထက်မြက်လှသော မြားတံများ၏ အရိပ်အယောင်များကို မြင်တွေ့လိုက်ရသည့် အခိုက်အတန့်မှာပင် စစ်မြေပြင်ပေါ်ရှိ နိုင်ငံအသီးသီး၏ မဟာမိတ်တပ်ဖွဲ့များမှာ အလွန်အမင်း ထိတ်လန့်သွားကြရတော့သည်။

"စစ်ရထားလေးများ"

ကြောက်မက်ဖွယ်ကောင်းပြီး ထိတ်လန့်စရာကောင်းသော အော်ဟစ်သံများမှာ စစ်မြေပြင်တစ်ခုလုံးတွင် ဟိန်းထွက်လာခဲ့ပြီး ဟာလာဟင်းလင်းပြင်ကြီးကိုပင် ဖောက်ထွက်သွားတော့သည်။

ထိတ်လန့်ကြောက်ရွံ့မှုများမှာ ကပ်ရောဂါဆိုး တစ်ခုအလား စစ်မြေပြင် တစ်ခုလုံးတွင် ပျံ့နှံ့သွားခဲ့ပြီး မရေမတွက်နိုင်သော နိုင်ငံအသီးသီး၏ စစ်သည်များမှာ အနောက်သို့ ပြေးလွှား ဆုတ်ခွာနေကြပါသော်လည်း အရာရာတိုင်းမှာ နောက်ကျသွားခဲ့ပြီ ဖြစ်သည်။

ဝုန်း ဝုန်း ဝုန်း!

သေမင်း၏ သီချင်းသံများအလား မြည်ဟည်းသွားခဲ့ပြီး၊ မြားတံများမှာ ပြောင်းဝမှ တဟုန်ထိုး ထွက်ပေါ်လာခဲ့ကာ ဖျက်ဆီးနိုင်စွမ်းရှိသော ခွန်အားများကို သယ်ဆောင်လျက် မျက်နှာချင်းဆိုင်ရှိ နိုင်ငံအသီးသီး၏စစ်တပ်ကြီးဆီသို့ ပြင်းထန်စွာ ရိုက်ကျသွားတော့သည်။

စစ်သည် အတန်းလိုက်၊ အတန်းလိုက်မှာ ကောက်ရိတ်စက်အောက်ရှိ စပါးနှံများအလား တစ်ဦးပြီးတစ်ဦး လဲကျသွားကြရတော့သည်။

သူတို့၏ ကိုယ်ပေါ်ရှိ သံချပ်ကာများမှာ စက္ကူစများအလား ပျော့ညံ့လွန်းလှသဖြင့် မည်သည့် ခုခံတားဆီးနိုင်စွမ်းမျှ မရှိကြပါချေ။

စစ်ပွဲ စတင်ကတည်းက စုဟန်ရှင်းဦးဆောင်သော စစ်ရထားလေး တပ်ဖွဲ့မှာ ဒိုင်းလွှားလှည်းများ၏ တားဆီးမှုများကြောင့် အကျိုးသက်ရောက်မှု အနည်းငယ်သာ ရှိခဲ့ပါသော်လည်း ဤစစ်ရထားလေးများ၏ အဓိက အခန်းကဏ္ဍမှာ ရှီဘုရင်မ ဖန်တီးထားသော ကုန်းမြေ ရေခဲတံတား များကို ပစ်ခတ်ဖျက်ဆီးရန်ပင် ဖြစ်တော့သည်။

အချိန်များစွာ ကြာမြင့်သွားခဲ့ပြီ ဖြစ်သဖြင့် လူတိုင်းမှာ ထိုစစ်ရထားလေးများ၏ အန္တရာယ်ကို လုံးဝမေ့လျော့နေခဲ့ကြပြီး၊ မဟာထန်ဘက်တွင် အစွမ်းထက်လှသော သတ်ဖြတ်နိုင်သည့် လက်နက်တစ်ခု ရှိနေသေးသည်ကို လုံးဝထည့်သွင်း စဉ်းစားခြင်း မရှိခဲ့ကြပါချေ။

သို့သော် စစ်ပွဲမှာ လက်ရှိအချိန်အထိ ရောက်ရှိလာခဲ့ပြီဖြစ်ရာ အရာရာတိုင်းမှာ လုံးဝ ပြောင်းလဲသွားခဲ့ပြီ ဖြစ်သည်၊ အန်းလုရှန်းပြင်ဆင်ထားသော ဒိုင်းလွှားလှည်းများမှာ အနည်းဆုံး တစ်ဝက်ခန့် ပျက်စီးသွားခဲ့ပြီးဖြစ်ရုံသာမက၊ ယခင်တိုက်ပွဲများအတွင်းမှာလည်း တပ်ဖွဲ့ အသီးသီးက ဒိုင်းလွှားလှည်း များကို ရည်ရွယ်ချက်ရှိရှိ ဖျက်ဆီးခဲ့ကြသဖြင့်၊ ၎င်းတို့၏ အရေအတွက်မှာ ယခင်ကဲ့သို့ စိပ်လှစွာ ပြည့်နှက်မနေတော့ပါချေ၊ ထို့ကြောင့် စစ်ရထားလေး တပ်ဖွဲ့အတွက် ခြိမ်းခြောက်မှုမှာလည်း အဆများစွာ လျော့နည်းသွားခဲ့ပြီ ဖြစ်သည်။

"ပစ်!"

စစ်တပ်ကြီး၏ ရှေ့တန်းတွင် စုဟန်ရှင်းက ဓားရှည်ကို ကိုင်ဆောင်လျက် တောင်ကြီးတစ်လုံးအလား မတ်မတ်ရပ်နေခဲ့ပြီး ရှေ့တန်း၌ အစုလိုက်အပြုံလိုက် သေဆုံးနေကြသော နိုင်ငံအသီးသီး၏ စစ်သည်များကို ကြည့်ရင်း အေးစက်စက် ပြုံးလိုက်သည်။

တကယ်ပဲ စစ်အစီအရင် အချို့ကို အသုံးပြုထားတဲ့ ဒိုင်းလွှားလှည်းတွေနဲ့ သူ့ရဲ့စစ်ရထားလေး တပ်ဖွဲ့ကို တားဆီးနိုင်မယ်လို့ ထင်နေကြတာလား။

စစ်ရထားလေး တပ်ဖွဲ့ ဆိုသည်မှာ ရိုးရှင်းစွာ ပစ်ခတ်ခြင်းမျှသာ မဟုတ်ပါချေ၊ ဤလူများက မဟာထန်ကို အလွန်ပင် ရိုးရှင်းလွန်းသည်ဟု ထင်နေကြခြင်း ဖြစ်သည်။

"ဝုန်း!"

ပေါက်ကွဲသံကြီးတစ်ခု ထွက်ပေါ်လာခဲ့ပြီး မြားတံများမှာ သေမင်း၏ အအေးဓာတ်များ တောက်ပနေလျက် နောက်တစ်ကြိမ် တဟုန်ထိုး ထွက်လာပြန်သည်။

ယခင်ကနှင့် မတူညီသည်မှာ ယခုတစ်ကြိမ်တွင်မူ လူတိုင်းက ရှေ့တန်းရှိ ဒိုင်းလွှားလှည်း များအားလုံးကို ရှောင်ကွင်းသွားကြပြီး ဒိုင်းလွှားလှည်းများကြားရှိ ဟာကွက်များကို တိကျစွာ ပစ်ခတ်လိုက်ခြင်းပင် ဖြစ်သည်။

"ဘုန်း!"

မြားတံ တစ်လှိုင်းတည်းဖြင့်ပင် နိုင်ငံအသီးသီးမှ စစ်သည် ခုနစ်ထောင် ရှစ်ထောင်ခန့်မှာ အသံတစ်ချက်မျှပင် မထွက်နိုင်ဘဲ မြေပြင်ပေါ်သို့ ပြုတ်ကျသွားကြတော့သည်။

"ပစ်!"

စုဟန်ရှင်း၏ အမူအရာမှာ အေးစက်နေပြီး ထပ်မံ၍ အမိန့်ပေးလိုက်သည်။

တစ်သောင်းခြောက်ထောင်…

နိုင်ငံအသီးသီး၏ စစ်အင်အား ဆုံးရှုံးမှုမှာ အလွန်ပင် ကြောက်မက်ဖွယ် ကောင်းလွန်းလှပေသည်။

"သူတို့ကို သတ်ပစ်ကြစမ်း"

"စစ်ရထားလေးတွေကို ဖျက်ဆီးပစ်ကြ!"

"သူတို့ကို လွတ်လွတ်လပ်လပ် ပစ်ခတ်ခွင့် မပေးနဲ့၊ မဟုတ်ရင် ငါတို့ အကုန်လုံး သေကုန်လိမ့်မယ်!"

မဟာမိတ်တပ်ဖွဲ့မှ စစ်သည် တစ်ဦးပြီးတစ်ဦး ထိတ်လန့်တကြား အော်ဟစ်လိုက်ကြသည်။

စုဟန်ရှင်း၏တပ်ဖွဲ့မှာ အလွန်ပင် ကြောက်မက်ဖွယ် ကောင်းလွန်းလှသည်။

အကယ်၍ သူတို့ကို အနည်းငယ်မျှ အခွင့်အရေး ပေးလိုက်မည်ဆိုပါက စုဟန်ရှင်း၏ စစ်ရထားလေး တပ်ဖွဲ့မှာ မျက်တောင်တစ်ခတ်အတွင်း ထိတ်လန့်စရာကောင်းသော အစွမ်းသတ္တိများကို ပေါက်ကွဲထွက်ပေါ်လာစေနိုင်ပေသည်။

ပို၍အရေးကြီးသည်မှာ သူတို့၏ အနောက်တွင် ပြည့်နှက်နေသော စစ်တပ်ကြီးများ ရှိနေခြင်းပင်ဖြစ်ပြီး၊ နိုင်ငံအသီးသီး၏ အထက်တန်းလွှာ စစ်တပ်ကြီးများ အားလုံးမှာ ရှေ့သို့ တိုးဝင်လာနေကြသဖြင့် လူတိုင်းမှာ နောက်သို့ ဆုတ်ခွာရန် လမ်းကြောင်း မရှိတော့ပါချေ။

"သတ်စမ်း!"

လွတ်မြောက်ရန် လမ်းကြောင်း မရှိတော့သည်ကို မြင်တွေ့လိုက်ရသည့်အခါ မရေမတွက်နိုင်သော တာ့ခ် သံချပ်ကာမြင်းတပ်များမှာ ရက်စက်ကြမ်းတမ်းသော အမူအရာများ ပေါ်ထွက်လာပြီး၊ သေခြင်းတရား၏ လှုံ့ဆော်မှုအောက်တွင် တစ်ဦးပြီး တစ်ဦး နောက်ပြန် လှည့်လာခဲ့ကာ စုဟန်ရှင်း၏ စစ်ရထားလေးတပ်ဖွဲ့ဆီသို့ တဟုန်ထိုး ပြေးဝင်တိုက်ခိုက်လိုက်ကြတော့သည်။

စစ်မြေပြင်တွင် အသက်ကို ပဓာနမထားဘဲ ရဲရင့်သူများမှာ အမြဲတမ်း ရှိနေစမြဲပင်၊ မဟာထန်ဖြစ်စေ၊ နိုင်ငံအသီးသီး ဖြစ်စေ အားလုံး အတူတူပင် ဖြစ်သည်။

ဝုန်းခနဲ မြည်ဟည်းသံကြီးများနှင့်အတူ မြင်းခွာသံများ ဆူညံသွားခဲ့ပြီး၊ အရပ်မျက်နှာ အသီးသီးမှ စစ်တပ် သောင်းနှင့်ချီမှာ စုဟန်ရှင်းရှိရာ အရပ်ဆီသို့ တဟုန်ထိုး တိုးဝင်လာကြတော့သည်။ ဤမျှသာမက ဒိုင်းလွှားလှည်း များမှာလည်း အရှိန်အပြည့်ဖြင့် ရှေ့သို့ တိုးဝင်လာကြပြီး စစ်ရထားလေးတပ်ဖွဲ့၏ ပစ်ခတ်နိုင်သည့် နယ်ပယ်ကို အားကုန် ပိတ်ဆို့ရန် ကြိုးစားနေကြရာ၊ ခဏတာအတွင်းမှာပင် စုဟန်ရှင်း၏ စစ်ရထားလေး တပ်ဖွဲ့မှာ အန္တရာယ်ကြီးမားသည့် အခြေအနေသို့ ရောက်ရှိသွားတော့သည်။

နှစ်ဖက်စလုံး၏ အကွာအဝေးမှာ အလွန်ပင် နီးကပ်လွန်းလှပေသည်။

"ဟွန်း"

သို့သော်လည်း ဤမြင်ကွင်းကို မြင်တွေ့လိုက်ရသည့်အခါ စုဟန်ရှင်းက အေးစက်စက် ရယ်မောလိုက်သည်။

နိုင်ငံအသီးသီး မှာ သူ့ကို အလွန်ပင် ရိုးရှင်းသည်ဟု ထင်မှတ်နေကြခြင်းပင် ဖြစ်သည်။ မဟာထန်အင်ပါယာ ၏ နာမည်ကျော်ကြားလှသော အေးစက်လှသည့် လူသတ်နတ်ဘုရား တစ်ဦးအနေဖြင့် မည်သည့် ပြင်ဆင်မှုမျှ မရှိဘဲ စွန့်စားပြီး ရှေ့သို့ ထွက်လာမည်ဟု ထင်နေသလား?

"ဒိုင်းလွှားတပ်တွေ ထွက်တိုက်ကြစမ်း!"

စုဟန်ရှင်း၏ မျက်ဝန်းထဲ၌ အေးစိမ့်လှသော အလင်းတန်း တစ်ချက် လက်သွားခဲ့ပြီး ပြင်းထန်စွာ ဟောက်လိုက်တော့သည်။

"ဝုန်း!"

စကားသံ မဆုံးမီမှာပင် ပြည့်နှက်နေသော စစ်ရထားလေး တပ်ဖွဲ့၏ အနောက်ဘက်တွင် သံချပ်ကာများ ထိခတ်မိသံများ ထွက်ပေါ်လာခဲ့ပြီး၊ မျက်တောင်တစ်ခတ်အတွင်းမှာပင် သန်မာတောင့်တင်းလှသော မဟာထန်ဒိုင်းလွှားတပ်သားများမှာ လေးလံလှသော ဒိုင်းလွှားကြီးများကို ကိုင်ဆောင်လျက် မြေပြင်ပေါ်သို့ ပြင်းထန်စွာ ရိုက်ချလိုက်ကာ စစ်ရထားလေး တပ်ဖွဲ့၏ ရှေ့တည့်တည့်တွင် လူသားတို့ဖြင့် ဖွဲ့စည်းထားသော သံမဏိ တံတိုင်းရှည်ကြီး တစ်ခုအဖြစ် ပိတ်ဆို့ထားလိုက်ကြတော့သည်။

ထို့ပြင် အနောက်ဘက်တွင်မူ သောင်းနှင့်ချီသော ဒိုင်းလွှားတပ်သားများ၊ ပုဆိန်တပ်သားများမှာ သစ်ပင်များအလား စိပ်လှစွာ စုစည်းနေကြပြီး လေးကြိုးများ တင်းနေသကဲ့သို့ အချိန်မရွေး ထွက်တိုက်ရန် အသင့် ဖြစ်နေကြတော့သည်။

အရာရာတိုင်းမှာ ဤမျှနှင့် ပြီးဆုံးသွားခြင်း မဟုတ်သေးပါချေ။

"ဟီးးးး"

စူးရှလှသော စစ်မြင်းများ၏ ဟိန်းဟောက်သံများ ထွက်ပေါ်လာခဲ့ပြီး စုဟန်ရှင်း၏ စစ်ရထားလေး တပ်ဖွဲ့၏ ဘေးနှစ်ဖက်မှနေ၍ အထက်တန်းလွှာ မဟာထန်သံချပ်ကာမြင်းတပ် အဖွဲ့တစ်ဖွဲ့ပြီး တစ်ဖွဲ့မှာ မြားဦးပုံစံ စစ်ကြောင်းကို ဖွဲ့စည်းလိုက်ကြကာ လူနှင့်မြင်း တစ်သားတည်း ဖြစ်သွားပြီး၊ မိုးကြိုးလျှပ်စီးနှယ် မြန်ဆန်လှသော အရှိန်အဝါများဖြင့် မျက်နှာချင်းဆိုင်ရှိ အရှိန်အပြည့်ဖြင့် ပြေးဝင်လာသော နိုင်ငံအသီးသီး၏ သံချပ်ကာမြင်းတပ်များဆီသို့ ချက်ချင်းပင် တဟုန်ထိုး ပြေးဝင် တိုက်ခိုက်လိုက်ကြတော့သည်။

"သတ်စမ်း"

ဝမ်ချောင်က အနောက်ဘက်တွင် မတ်မတ်ရပ်နေလျက် မြင်းပေါ်မှနေ၍ ဖြည်းညင်းစွာ မြင်းကို စီးနင်းကာ ထွက်ပေါ်လာတော့သည်။

သူ၏ ရိုးရှင်းလှသော အမိန့်တစ်ခုနှင့်အတူ ထိုတစ်သောင်းကျော်သော မျက်နှာချင်းဆိုင်မှ ပြေးဝင်လာသော နိုင်ငံအသီးသီး၏ သံချပ်ကာမြင်းတပ် များမှာ လေပြင်းတိုက်ခတ်ရာတွင် ပျက်စီးသွားသော စပါးနှံများအလား တစ်ခါတည်းပင် လုံးဝအမြစ်ပြတ် ချေမှုန်းခြင်း ခံလိုက်ရတော့သည်။

စစ်မြေပြင်ဆိုသည်မှာ ဤနိုင်ငံအသီးသီး၏ အလေ့အကျင့်မရှိသော သံချပ်ကာမြင်းတပ်များအတွက် တစ်ဦးချင်းစီ၏ရဲရင့်မှုကို ပြသရာနေရာ မဟုတ်ပါချေ။ စစ်ကြောင်း မရှိသော စစ်တပ်ကြီးတစ်ခုမှာ ဝမ်ချောင်၏ရှေ့မှောက်တွင်မူ အမှိုက်တစ်စမျှသာဖြစ်ရာ မည်သည့် ခြိမ်းခြောက်မှုမျှ မရှိပါချေ။

စုဟန်ရှင်း၏ စစ်ရထားလေးတပ်ဖွဲ့၏ တိုက်ခိုက်နိုင်စွမ်းမှာ အလွန်ပင် ကြီးမားလှသော်လည်း ခံစစ်စွမ်းအားမှာမူ အလွန်ပင် နည်းပါးလှသည်။ ၎င်းမှာ သူတို့၏ အားနည်းချက် တစ်ခု ဖြစ်သည်။ သို့သော် ဝမ်ချောင်သည် စစ်တပ်ကြီး သုံးသိန်းကျော်ကို ဦးဆောင်ကာ ထွက်ပေါ်လာချိန်တွင် ဤအားနည်းချက်မှာ လုံးဝပျောက်ကွယ်သွားခဲ့ပြီ ဖြစ်သည်။

"ရှေ့သို့"

ဝမ်ချောင်က အေးဆေးတည်ငြိမ်စွာ ဆိုလိုက်ပြီး အမိန့်တစ်ခုကို ထပ်မံပေးလိုက်သည်။

ဝမ်ချောင်၏အမိန့်နှင့်အတူ ဤစစ်တပ်ကြီးမှာ ထပ်မံလှုပ်ရှားလာခဲ့သည်။

စစ်တပ်ကြီး သုံးသိန်းကျော်မှာ ဧရာမ ယန္တရားကြီး တစ်ခုအလား အံ့ဩဖွယ်ကောင်းသော ပုံစံဖြင့် ရှေ့သို့တိုးဝင်လာခဲ့ကြသည်။ ဒိုင်းလွှားတပ်သားများ၊ စစ်ရထားလေးတပ်ဖွဲ့၊ လေးသမားများ၊ သံချပ်ကာမြင်းတပ်များ၊ အားလုံးမှာ ဤဧရာမသတ္တဝါကြီး၏ တစ်စိတ်တစ်ပိုင်း ဖြစ်နေကြသည်။

ဤဧရာမသတ္တဝါကြီး၏အရှေ့ဆုံးတွင်မူ ငွေရောင် လှည်းလေးများပေါ်တွင် တပ်ဆင်ထားသော ထက်မြက်လှသည့် မဟာထန်စစ်ရထားလေးများမှာ ရှေ့သို့ အဆက်မပြတ် တိုးဝင်လာနေကြသည်။

စုဟန်ရှင်း ဦးဆောင်သော ဤစစ်ရထားလေးတပ်ဖွဲ့မှာ ဤယန္တရားကြီး၏ အထက်မြက်ဆုံးသော ဓားသွားဖြစ်လာခဲ့ပြီး၊ နှစ်ဖက်ရှိ သံချပ်ကာမြင်းတပ်များမှာ ဤစစ်တပ်ကြီး၏ အားအကောင်းဆုံးသော လက်နှစ်ဖက် ဖြစ်လာခဲ့သည်။

တိုက်ခိုက်တိုင်းတွင် စုဟန်ရှင်း၏ စစ်ရထားလေးတပ်ဖွဲ့က အထိရောက်ဆုံးသော နည်းလမ်းဖြင့် ရိတ်သိမ်းလိုက်ပြီး၊ ပြိုင်ဘက်က အရှိန်အပြည့်ဖြင့် ပြေးဝင်လာသော အခါတွင်မူ နှစ်ဖက်ရှိ သံချပ်ကာမြင်းတပ်များက ဘေးတိုက်မှနေ၍ အလစ်အငိုက် တိုက်ခိုက်လိုက်ရာ၊ ပြိုင်ဘက်ကင်းလှသော အရှိန်အဟုန်များဖြင့် နောက်ဆုံး အကြွင်းအကျန်များကိုပါ သုတ်သင်ပစ်လိုက်ကြပြီး၊ မည်သူတစ်ဦးတစ်ယောက်မျှ မတားဆီးနိုင်ခဲ့ပါချေ။

ဤကဲ့သို့သော စစ်ရထားလေး တပ်ဖွဲ့၊ ဒိုင်းလွှားတပ်သား များ နှင့် ဘေးနှစ်ဖက်ရှိ မြင်းတပ်များ ပူးပေါင်း တိုက်ခိုက်သောပုံစံမှာ အလွန်ပင် ရိုးရှင်းလှသော်လည်း အလွန်ပင် ထိရောက်မှု ရှိလှပေသည်။ ဝမ်ချောင်သည် မည်သည့် ရှုပ်ထွေးလှသော စစ်ဗျူဟာ များကိုမျှ အသုံးပြုရန် မလိုဘဲ ဤပူးပေါင်း တိုက်ခိုက်မှုပုံစံဖြင့်ပင် မျက်နှာချင်းဆိုင်ရှိ နိုင်ငံအသီးသီး၏ မဟာမိတ်တပ်ဖွဲ့များကို တစ်ဖွဲ့ပြီးတစ်ဖွဲ့ ရှုံးနိမ့်သွားစေခဲ့ခြင်းပင် ဖြစ်သည်။

နိုင်ငံအသီးသီး၏ စစ်သည်များမှာ ရိတ်သိမ်းခြင်း ခံလိုက်ရသော စပါးနှံများအလား တစ်ဦးပြီးတစ်ဦး လဲကျသွားကြရသည်။

ခြောက်သောင်း

ရှစ်သောင်း

တစ်သိန်း

နိုင်ငံအသီးသီး စစ်တပ်ကြီး၏ဆုံးရှုံးမှုမှာ ထင်မှတ်ထားသည်ထက် များစွာပိုမိုကြောက်မက်ဖွယ် ကောင်းလှပေသည်။ ဂိုဂူလျော စစ်သည်များ၊ ယိုကျိုး စစ်သည်များ၊ တာ့ခ် စစ်သည်များ၊ ခီတန်လူမျိုးများနှင့် ရှီလူမျိုးများ... နိုင်ငံအသီးသီး စစ်သည်များ၏ အလောင်းများမှာ တောင်ပုံရာပုံဖြစ်နေပြီး စစ်မြေပြင်တစ်ခုလုံးတွင် ပျံ့နှံ့နေတော့သည်။

မဟာထန်စစ်တပ်ကြီး သုံးသိန်းကျော်၏ပြိုင်ဘက်ကင်းလှသော အရှိန်အဟုန်ကို မြင်တွေ့လိုက်ရသည့်အခါ ယိုကျိုးဘက်မှ လူတိုင်း၏မျက်နှာအမူအရာများမှာ ပြောင်းလဲသွားကြရသည်။

"သူ့ကို ဒီအတိုင်း ဆက်ပြီး တိုက်ခိုက်ခွင့် မပေးရဘူး၊ မဟုတ်ရင် ငါတို့ရဲ့ စစ်အင်အားတွေ အကုန်လုံး ဆုံးရှုံးသွားလိမ့်မယ်။ ငါ ကိုယ်တိုင် စစ်တပ်ကို ဦးဆောင်ပြီး ဘယ်ဘက်ကို တိုက်ခိုက်မယ်၊ ယွန်းဂျယ်စိုးမွန်း ခင်ဗျားက ညာဘက်ကို တိုက်ခိုက်ပါ၊ အန်းလုရှန်း၊ အလယ်လမ်းကြောင်းကို ခင်ဗျားကို အပ်လိုက်မယ်၊ ငါတို့အားလုံး ပူးပေါင်း တိုက်ခိုက်ကြစို့"

နှင်းမုန်တိုင်းကြီးများ တိုက်ခတ်နေခဲ့ပြီး ဝူဆူမစ်ရှ် ခါဂန်းက မြင်းပေါ်တွင် မှောက်လျက် ဒေါသတကြီး အော်ဟစ်လိုက်သည်။

ဧကရာဇ် ဖြစ်လာပြီးနောက် သူသည် စစ်မြေပြင်သို့ မရောက်ရှိလာခဲ့သည်မှာ ကြာမြင့်လှပြီဖြစ်ပြီး တိုက်ခိုက်လိုစိတ်များလည်း ယခင်ကဲ့သို့ ပြင်းပြခြင်း မရှိတော့ပါချေ၊ သို့သော် ယခုအခိုက်အတန့်၌ ဝူဆူမစ်ရှ် ခါဂန်းမှာ ကြီးမားလှသော အန္တရာယ်တစ်ခုကို ခံစားနေရသည်။

နောက်ထပ် အသက်စွန့် တိုက်ခိုက်ခြင်း မပြုလုပ်ပါက ဝမ်ချောင်၏ သတ်ဖြတ်ခြင်းကို ခံလိုက်ရပြီး ယခင်က အာရပ် အင်ပါယာကဲ့သို့ပင် သူတို့၏ မဟာမိတ်တပ်ဖွဲ့ များမှာလည်း လုံးဝပျက်စီးသွားလိမ့်မည်ဟု သူ စိုးရိမ်နေတော့သည်။

"ချွင်"

ဝူဆူမစ်ရှ် ခါဂန်း၏ ဝမ်းဗိုက်မှနေ၍ ပြင်းထန်လှသော စစ်ပွဲ အလင်းစက်ကွင်းများမှာ တောက်ပ လင်းလက်လာခဲ့ပြီး မုန်တိုင်းတစ်ခုအလား စစ်မြေပြင် တစ်ခုလုံးသို့ လျင်မြန်စွာ ပျံ့နှံ့သွားတော့သည်။

စစ်သည်များ၏ အရှိန်အဝါများမှာလည်း ပြင်းထန်စွာ တုန်ခါသွားခဲ့ပြီး သူတို့၏ ခွန်အားများမှာ ချက်ချင်းပင် အဆများစွာ မြင့်တက်သွားကြတော့သည်။

တာ့ခ် ဝံပုလွေဘုရင် မဟာအလင်းစက်ကွင်း။

ဤသည်မှာ မျိုးဆက်အဆက်ဆက် လက်ဆင့်ကမ်းလာခဲ့ပြီး၊ အလွန်ပင် အစွမ်းထက်လှသော ရှေးဟောင်း အလင်းစက်ကွင်း တစ်ခုမှ ပြုပြင်ပြောင်းလဲထားခြင်း ဖြစ်သည်။ ၎င်း၏ ခွန်အားမှာ အလွန်ပင် ပြင်းထန်လှပြီး စစ်သည်များ၏ ခွန်အားကို အဆများစွာ မြှင့်တင်ပေးနိုင်စွမ်းရှိကာ၊ ၎င်း၏ မြှင့်တင်နိုင်စွမ်းမှာ အင်ပါယာ ဗိုလ်ချုပ် အလင်းစက်ကွင်း အားလုံးထက်ပင် များစွာသာလွန်လှပေသည်။

၎င်း၏တစ်ခုတည်းသော အားနည်းချက်မှာ သုံးစွဲသူ၏ ချီကို အလွန်ပင် အကုန်အကျ များစေခြင်းဖြစ်ရာ၊ အလွန်အရေးကြီးသည့် အခြေအနေမျိုး မဟုတ်ပါက အလွယ်တကူ အသုံးပြုလေ့ မရှိပါချေ။ သို့သော် ဝူဆူမစ်ရှ် ခါဂန်းအနေဖြင့် ယခုအချိန်တွင် ထပ်မံ စဉ်းစားနေရန် အချိန်မရှိတော့ပါချေ။

ဝမ်ချောင်၏ နာမည်ကျော်ကြားမှုမှာ အလွန်ပင် ကြီးမားလွန်းလှသည်။ ယခုတစ်ကြိမ် မဖော်ပြပါက နောင်တွင် ထပ်မံ ဖော်ပြရန် အခွင့်အရေး ရှိတော့မည် မဟုတ်တော့ပါချေ။

******