အခန်း ၂၁၉၃

အခန်း (၂၁၉၃) တစ္ဆေ ငရဲ စစ်တပ်ကြီး

ချွင် ချွင် ချွင်

တာ့ခ် ဝံပုလွေဘုရင် မဟာအလင်းစက်ကွင်း၏ အကျိုးသက်ရောက်မှု အောက်တွင် အဝေးဆီရှိ ဝံပုလွေ သံချပ်ကာမြင်းတပ်ပင်လျှင် အလင်းစက်ကွင်း၏ ပံ့ပိုးမှုကို ရရှိသွားခဲ့ပြီး၊ တစ်ဦးချင်းစီ၏ အရှိန်အဝါများမှာ ကြီးမားစွာ မြင့်တက်သွားကြကာ မြင်းဟီသံများနှင့်အတူ တစ်ကြိမ်တည်းသော တိုက်ခိုက်မှုဖြင့် မျက်နှာချင်းဆိုင်ရှိ ထုံလော့သံချပ်ကာမြင်းတပ်ကို အချိန်တိုအတွင်း၌ပင် ဖိနှိပ်ထားနိုင်ခဲ့တော့သည်။

"ဒီလောက် သွေးဆူပြီး စိတ်လှုပ်ရှားစရာ ကောင်းတဲ့ တိုက်ပွဲမျိုးကို မမျှော်လင့်ခဲ့ရတာ တော်တော် ကြာနေပြီပဲ"

"ဝမ်ချောင်... ငါ့ကို စိတ်မပျက်စေနဲ့!"

အခြားတစ်ဖက်တွင်မူ ယွန်းဂျယ်စိုးမွန်းက အရိုးအဆစ်များကို အနည်းငယ် လှုပ်ရှားလိုက်ရာ တဂျွတ်ဂျွတ် မြည်သံများ ဆက်တိုက် ထွက်ပေါ်လာခဲ့ပြီးနောက်၊ အေးစက်ပြီး ရက်စက်လှသော မျက်လုံးများဖြင့် မျက်နှာချင်းဆိုင်ရှိ ဝမ်ချောင်ကို ပစ်မှတ်ထား စိုက်ကြည့်လိုက်တော့သည်။

ဝုန်းခနဲ မြည်ဟည်းသံကြီး ထွက်ပေါ်လာတော့သည်။

နောက်တစ်ခဏတွင် ယွန်းဂျယ်စိုးမွန်း၏ဝမ်းဗိုက်မှနေ၍ ပြင်းထန်စွာ တုန်ခါသွားခဲ့ပြီး ကိုယ်တွင်းရှိ ဂန်ချီများ လောင်ကျွမ်းသွားတော့သည်။ တစ်ချိန်တည်းမှာပင် ခရမ်းရင့်ရောင် အလင်းစက်ကွင်း တစ်ခုမှာ မြည်ဟည်း တုန်ခါလျက် စစ်မြေပြင် တစ်ခုလုံးကို လျင်မြန်စွာ လွှမ်းခြုံသွားတော့သည်။

ယီလီခဲ ရွှီမီ အလင်းစက်ကွင်း။

ဤသည်မှာ ဂိုဂူလျော အင်ပါယာ၏ ဒဏ္ဍာရီလာ အစွမ်းအထက်ဆုံးသော အလင်းစက်ကွင်းတစ်ခုဖြစ်ပြီး၊ ယွန်းဂျယ်စိုးမွန်းအနေဖြင့် တစ်ကြိမ် အန္တရာယ် ကြုံတွေ့ရစဉ် ရေအောက်သို့ နစ်မြုပ်သွားခဲ့ရာမှ ရေအောက် ဂူတစ်ခု အတွင်းမှ ရရှိခဲ့သော လောကတွင် ပြိုင်ဘက်ကင်းသည့် ပညာရပ် တစ်ခုပင် ဖြစ်သည်။

ဂိုဂူလျော သမိုင်းတွင် ဤအစွမ်းထက်လှသော စစ်ပွဲ အလင်းစက်ကွင်းမှာ နှစ်ပေါင်း တစ်ထောင့်ငါးရာခန့် ပျောက်ဆုံးနေခဲ့ပြီ ဖြစ်ကာ၊ ယွန်းဂျယ်စိုးမွန်း မှာ ဤအရာကြောင့်ပင် ဂိုဂူလျော အင်ပါယာ ၏ အစွမ်းအထက်ဆုံး စစ်နတ်ဘုရားဟူသော ဘွဲ့ကို ရရှိခဲ့ခြင်း ဖြစ်သည်။

ဂိုဂူလျော ဘာသာစကားတွင် "ယီလီခဲရွှီမီ"၌ နောက်ထပ် အဓိပ္ပာယ် တစ်ခု ရှိသေးသည်၊ ၎င်းမှာ "အမြင့်မြတ်ဆုံး"ဟူ၍ ဖြစ်သည်။

ခပ်သိမ်းသောအရာတို့သည် အောက်၌သာရှိပြီး၊ ဤအရာသာလျှင် အထွတ်အထိပ်၌ တည်ရှိပေသည်။

ဤသည်မှာ ယီလီခဲရွှီမီ၏ စစ်မှန်သော အဓိပ္ပာယ်ပင် ဖြစ်တော့သည်။

ယွန်းဂျယ်စိုးမွန်း၏ ဤအလင်းစက်ကွင်း ထွက်ပေါ်လာသည်နှင့် တစ်ပြိုင်နက် သောင်းနှင့်ချီသော ဂိုဂူလျော စစ်သည်များ၏ ခြေအောက်တွင် အလင်းစက်ကွင်းများ ပေါ်ထွက်လာခဲ့ပြီး၊ တစ်ချိန်တည်းမှာပင် သူတို့၏ကိုယ်ပေါ်ရှိ ဂန်ချီ စွမ်းအင်များမှာ မီးတောက်များအလား လောင်ကျွမ်းသွားတော့သည်။

လူတိုင်း၏ ခန္ဓာကိုယ် အတွင်းသို့ စွမ်းအားသစ်တစ်ခု ဝင်ရောက်လာသကဲ့သို့ ခံစားလိုက်ရပြီး၊ မျက်တောင်တစ်ခတ်အတွင်း လူတိုင်းမှာ နဂါးနှင့် ကျားများအလား အသက်ဝင်လာကြကာ၊ ခန္ဓာကိုယ်အတွင်း၌ မည်မျှပင် အသုံးပြုစေကာမူ ကုန်ဆုံးသွားမည် မဟုတ်သော ခွန်အားများ ရှိနေသကဲ့သို့ ခံစားလာရသည်။ တိုက်ရည်ခိုက်ရည်မှာလည်း အဆင့်များစွာ တိုက်ရိုက် မြင့်တက်သွားခဲ့ပြီး မည်သည့် ရန်သူကိုမဆို အနိုင်ယူနိုင်စွမ်း ရှိကာ ရန်သူအားလုံးကို ဓားတစ်ချက်တည်းဖြင့်ပင် ခုတ်ပိုင်းပစ်နိုင်မည့် ခံစားချက်မျိုးကို ရရှိလာကြတော့သည်။

"သတ်စမ်း"

ဂိုဂူလျော စစ်တပ်ဘက်တွင် လူတိုင်း၏ စိတ်ဓာတ်များ အလွန်အမင်း မြင့်တက်သွားကြပြီး လူနှင့်ဓား တစ်သားတည်း ဖြစ်သွားကြကာ လိမ့်ဆင်းလာသော ဓားရောင် တစ်ခုအလား မဟာထန်ရှိရာ အရပ်ဆီသို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

မျက်တောင်တစ်ခတ်အတွင်းမှာပင် ကျန်းရှို့ကွေးနှင့် အာပုစစ်တို့နှစ်ဦး ခံစားရသော ဖိအားမှာ ချက်ချင်းပင် အဆများစွာ မြင့်တက်သွားတော့သည်။

သို့သော် ဝူဆူမစ်ရှ် ခါဂန်းနှင့် ယွန်းဂျယ်စိုးမွန်းတို့ တိုက်ခိုက်ခြင်း၏ ပစ်မှတ်မှာ ဤနှစ်ဦး မဟုတ်ပါချေ။ သူတို့၏ လက်အောက်ရှိ စစ်တပ်များ ပစ်မှတ်ထားနေသည်မှာ ဝမ်ချောင်၏စစ်တပ် သုံးသိန်းကျော်ကိုပင် ဖြစ်တော့သည်။

ပေ တစ်သောင်း

ပေ ငါးထောင်!

နှစ်ဖက်စလုံး၏ အကွာအဝေးမှာ ပိုမို နီးကပ်လာခဲ့သည်။

"ချွေချန်းယုံကို အမိန့်ပေးလိုက်စမ်း၊ တစ္ဆေ ငရဲစစ်တပ်ကြီးကို ထွက်တိုက်ခိုင်းလိုက်တော့!"

လေပြင်းများ တိုက်ခတ်နေသော ဧရာမ ယိုကျိုး စစ်အလံကြီးအောက်တွင် အန်းလုရှန်း၏ မျက်ဝန်းထဲ၌ ကြောက်မက်ဖွယ်ကောင်းသော သတ်ဖြတ်လိုသည့် အလင်းတန်းတစ်ချက် လက်သွားခဲ့ပြီး ရုတ်တရက် စကားဆိုလိုက်တော့သည်။

"တစ္ဆေ ငရဲ စစ်တပ်ကြီး လား။ သခင်ကြီး... အခု ချက်ချင်း အဲဒီစစ်အစီအရင်ကို အသုံးပြုချင်လို့လား"

ကောင်းရှန်း၏အမူအရာ လှုပ်ရှားသွားခဲ့ပြီး ရုတ်တရက် ဆိုလိုက်တော့သည်။

တစ္ဆေ ငရဲ စစ်တပ်ကြီးမှာ ယိုကျိုး စစ်တပ် သိန်းနှင့်ချီသော အထဲမှ တပ်ဖွဲ့ တစ်ဖွဲ့သာ ဖြစ်ပြီး၊ "ယို"ဟူသော စာလုံး မပါဝင်သည့် တစ်ခုတည်းသော ထိပ်တန်း တပ်ဖွဲ့လည်း ဖြစ်သည်။

သို့သော် တစ္ဆေ ငရဲ စစ်တပ်ကြီး အနေဖြင့် အန်းလုရှန်းနှင့်ကောင်းရှန်းတို့အတွက် ဤမျှလောက် ထူးခြားနေရခြင်းမှာ ၎င်းတွင် အထူးလုပ်ဆောင်ချက်တစ်ခု ရှိနေသောကြောင့်ပင် ဖြစ်သည်။

တစ္ဆေ ငရဲ စစ်တပ်ကြီးကို ဗဟိုပြုကာ ယိုကျိုး၏ထိပ်တန်းတပ်ဖွဲ့များအားလုံး စုစည်းလိုက်မည်ဆိုပါက ပြိုင်ဘက်ကင်းပြီး အစွမ်းထက်လှသော ရှေးဟောင်း စစ်အစီအရင် ကြီး တစ်ခုကို ဖန်တီးနိုင်မည် ဖြစ်သည်။

ဤသည်မှာ အန်းလုရှန်းအနေဖြင့် "ထျန်း"ထံမှ တောင်းဆိုထားခဲ့သော ပျောက်ဆုံးနေပြီ ဖြစ်သည့် အစွမ်းထက်သော ပညာရပ် တစ်ခု ဖြစ်ပြီး၊ အန်းလုရှန်းနှင့် ကောင်းရှန်းတို့အနေဖြင့် တစ်လောကလုံးကို သိမ်းပိုက်ပြီး မဟာထန်ကို အမြစ်ပြတ် ချေမှုန်းရန် မျှော်လင့်ထားသော လျှို့ဝှက် လက်နက်တစ်ခုလည်း ဖြစ်သည်။

တစ်ခုတည်းသော ပြဿနာမှာ သူတို့ နှစ်ဦး၏ အစီအစဉ်အရ ဤမဟာစစ်အစီအရင်ကို အသုံးပြုရမည့် အချိန်မှာ ယခု လုံးဝ မဟုတ်သေးပါချေ။

သို့သော်လည်း စစ်ပွဲ၏ အရှိန်အဟုန်မှာ အလွန်ပင် မြန်ဆန်လွန်းနေခဲ့ပြီ ဖြစ်သည်။

"အင်း!"

ရှေ့တည့်တည့်တွင် အန်းလုရှန်းက ခေါင်းကို လေးလံစွာ ညိတ်လိုက်ပြီး၊ သူ၏ အကြည့်များမှာ မျက်နှာချင်းဆိုင်ရှိ ထို လူငယ်လေး ၏ ပုံရိပ်ပေါ်တွင်သာ အမြဲတမ်း ကျရောက်နေတော့သည်။

"ဝမ်ချောင်လည်း ထွက်လာပြီဆိုတော့ ထပ်ပြီး စောင့်နေစရာ မလိုတော့ဘူး၊ မဟာထန်ရဲ့ နောက်ထပ် စစ်ကူတွေ မရောက်လာသေးခင် အခု အချိန်က သူတို့ကို အမြစ်ပြတ် ချေမှုန်းဖို့ အကောင်းဆုံး အခွင့်အရေးပဲ"

အန်းလုရှန်း၏အသံမှာ အလွန်ပင် အေးဆေးတည်ငြိမ်နေတော့သည်။ လက်ရှိ အခြေအနေအထိ ရောက်ရှိလာနိုင်ရန် အန်းလုရှန်းအနေဖြင့် ကံကောင်းမှု တစ်ခုတည်းကိုသာ အားကိုးခဲ့ခြင်း လုံးဝ မဟုတ်ပါချေ၊ စစ်ရေးပိုင်း တွင်လည်း အန်းလုရှန်း၌ ကိုယ်ပိုင် ဆုံးဖြတ်နိုင်စွမ်း ရှိပေသည်။

"ကောင်းပြီ"

ကောင်းရှန်းက ခဏမျှ တွေးတောလိုက်ပြီးနောက် ပြတ်သားစွာ ဆုံးဖြတ်ချက် ချလိုက်ကာ လျင်မြန်စွာ ခေါင်းညိတ်လိုက်သည်။

ယခင်က တွက်ချက်ထားသော အချိန်ထက် များစွာ စောနေသေးသည် ဆိုသော်ငြားလည်း၊ လက်ရှိ စစ်မြေပြင်ပေါ်တွင် မဟာထန်ဘက်မှ စစ်သည် ခြောက်သိန်းခွဲခန့် အနည်းဆုံး စုစည်းနေပြီဖြစ်ရာ အခြေအနေများ ပြည့်စုံနေပြီ ဖြစ်သည်။ ဤအချိန်တွင် ထိုမဟာစစ်အစီအရင်ကို စတင်အသုံးပြုရန် အချိန်အခါ သင့်တော်ပြီ ဖြစ်၏။

ယိုကျိုးတွင် ထိပ်တန်း အင်ပါယာ ဗိုလ်ချုပ်သုံးဦးရှိရာ ၎င်းတို့မှာ ချွေချန်းယုံ၊ ထျန်းချန်ကျန်းနှင့် ထျန်းချန်စစ်တို့ ဖြစ်ကြပြီး၊ ထိုအထဲတွင် ချွေချန်းယုံက ခေါင်းဆောင်ဖြစ်ကာ၊ အနောက်တန်းတွင်သာ အမြဲတမ်း ကွပ်ကဲနေခဲ့ပြီး ရှေ့တန်း စစ်ပွဲများတွင် တိုက်ရိုက် ပါဝင်ပတ်သက်မှု သိပ်မရှိလှပါချေ။

ယခုအခါ အန်းလုရှန်း၏အမိန့်ကို ရရှိလိုက်သည်နှင့် ချွေချန်းယုံမှာ ဝတ်ရုံများ လွင့်ပျံလျက် အနည်းငယ်မျှ တွေဝေခြင်း မရှိဘဲ စတင် လှုပ်ရှားလိုက်တော့သည်။

ချွေချန်းယုံမှာ လူနှင့်မြင်း အတူတူတစ်သားတည်း ဖြစ်သွားကာ နဂါးတစ်ကောင်အလား လေထဲသို့ ခုန်တက်သွားခဲ့ပြီး ခြေတစ်လှမ်းလျှင် ပေဆယ်ကျော်ခန့် ရောက်ရှိသွားတော့သည်။

သူ၏ဘေးပတ်ဝန်းကျင်တွင်မူ တစ္ဆေ အရှိန်အဝါများ ပြည့်နှက်နေပြီး၊ မျက်နှာပေါ်တွင် အနက်ရောင် တစ္ဆေ ငရဲမျက်နှာဖုံးများကို တပ်ဆင်ထားကာ၊ မုန်တိုင်းများအလား ပြင်းထန်လှသော အရှိန်အဝါများရှိသည့် ယိုကျိုးထိပ်တန်း သံချပ်ကာမြင်းတပ်အဖွဲ့မှာ အနောက်မှနေ၍ လေထုကို ဖောက်ထွက်ကာ လိုက်ပါလာကြတော့သည်။

ဤသည်မှာ တစ္ဆေ ငရဲ စစ်တပ်ကြီး ပင် ဖြစ်တော့သည်!

အရှိန်အဝါ တစ်ခုတည်းကိုသာ ယှဉ်မည်ဆိုလျှင် ဤစစ်တပ်မှာ သံမဏိများအလား ခိုင်မာလှပြီး၊ ဝံပုလွေ တပ်ဖွဲ့၊ ခီတန်၏ နေမင်းလိုက် သံချပ်ကာမြင်းတပ် တို့ထက်ပင် သာလွန်လှပေသည်။

ထိုစစ်တပ်ကြီး တဟုန်ထိုး ထွက်ပေါ်လာသည့် တစ်ချိန်တည်းမှာပင် ဘေးပတ်ဝန်းကျင်တွင် အနက်ရောင် မီးခိုးငွေ့များ တလိမ့်လိမ့် ထွက်ပေါ်လာခဲ့ပြီး သရဲတစ္ဆေ မျိုးနွယ်စုများနှင့် မိစ္ဆာများ၏ ပုံရိပ်ယောင်များ အမြောက်အမြား ထွက်ပေါ်လာတော့သည်။

ဤမျှသာမက တစ္ဆေ ငရဲ စစ်တပ်ကြီး ထွက်ပေါ်လာသည်နှင့် တစ်ပြိုင်နက် ယိုကျိုးဒေသ တစ်ခုလုံးရှိ ထိပ်တန်း သံချပ်ကာမြင်းတပ် အားလုံးမှာလည်း အနောက်မှနေ၍ တဟုန်ထိုး ပြေးထွက်လာကြတော့သည်။

တိုက်ဆိုင်စွာပင် ဂိုဂူလျော ၏ စစ်တပ်ကြီး နှင့်အတူ ပူးပေါင်းလိုက်ရာ အရပ်မျက်နှာ သုံးခုမှ စစ်တပ်ကြီးများမှာ လျင်မြန်စွာပင် ဧရာမ ပိုက်ကွန်ကြီးတစ်ခုအဖြစ် ပြောင်းလဲသွားခဲ့ပြီး၊ ဝမ်ချောင်ဦးဆောင်သော စစ်တပ်ကြီး သုံးသိန်းခွဲခန့်ကို ဝိုင်းဝန်း ပိတ်ဆို့ရန် တိုးဝင်လာကြတော့သည်။

ဟာလာဟင်းလင်းပြင်ကြီး အတွင်း၌ သတ်ဖြတ်လိုသည့် အရှိန်အဝါများမှာ ပြည့်နှက်နေခဲ့ပြီး အမြင့်ဆုံး အထွတ်အထိပ်သို့ ရောက်ရှိနေတော့သည်။

"ဟက်"

ဝမ်ချောင်က မြင်းပေါ်တွင် မတ်မတ်ရပ်နေလျက် အသာအယာ ရယ်မောလိုက်သည်။ သူ၏အကြည့်များမှာ အရပ်မျက်နှာ အားလုံးသို့ ရောက်ရှိနေပြီး၊ မျက်စိတစ်ဆုံး ပင်လယ်ကြီးအလား အဆုံးအစမရှိ များပြားလှသော နိုင်ငံအသီးသီး၏ စစ်တပ်ကြီးများက မိမိဆီသို့ ဝိုင်းဝန်း လာနေသည်ကို မြင်တွေ့နေရသော်လည်း မျက်ဝန်းထဲ၌ အနည်းငယ်မျှ စိုးရိမ်ပူပန်မှု အရိပ်အယောင် မရှိပါချေ။

"အချိန်ကျပြီ"

ဝမ်ချောင်က အနည်းငယ် ပြုံးလိုက်ပြီး သူ တစ်ယောက်တည်းသာ ကြားနိုင်သော စကားတစ်ခွန်းကို ပြောလိုက်သည်။

"ကော်ကျစ်ရီ၊ စွန်ကျီမင်၊ ကျောက်ကျင်းတျန်... မဟာစစ်အစီအရင်ကို စတင်ဖို့ ပြင်ကြစမ်း!"

နောက်တစ်ခဏတွင် ဝမ်ချောင်က အနောက်သို့ လှည့်မကြည့်ဘဲ ဆိုလိုက်သည်။

"ဟုတ်ကဲ့"

ခဏတာ အချိန်တိုလေး အတွင်းမှာပင် အလွန်ရိုသေလေးစားမှု အပြည့်ပါသောအသံ သုံးသံမှာ အနောက်ဘက်မှနေ၍ ဆက်တိုက် ထွက်ပေါ်လာတော့သည်။

ဝမ်ချောင်၏ အမိန့်နှင့်အတူ ကော်ကျစ်ရီ၊ စွန်ကျီမင်၊ ကျောက်ကျင်းတျန်သုံးဦးမှာ ချက်ချင်းပင် ခေါင်းလှည့်ကာ မိမိတို့ ဦးဆောင်သော စစ်တပ်များ ရှိရာအရပ်ဆီသို့ ပြေးထွက်သွားကြတော့သည်။

ခဏတာ အတွင်းမှာပင် ဝမ်ချောင်ဦးဆောင်သော စစ်တပ်ကြီး၏ အနောက်ဘက်တွင် မရေမတွက်နိုင်သော မဟာထန်စစ်တပ်ကြီးများမှာ လှုပ်ရှားလာကြတော့သည်။

ဤ စစ်တပ်ကြီး သိန်းနှင့်ချီမှာ မူလက အနောက်ဘက်တွင် စိပ်လှစွာ ပြည့်နှက်နေခဲ့ပြီး စနစ်တကျ ဖွဲ့စည်းထားသော စစ်တပ်ကြီးအတွင်း၌ အသင့်အနေအထားဖြင့် စောင့်ဆိုင်းနေခဲ့ကြခြင်း ဖြစ်သည်။ သို့သော် ဤအခိုက်အတန့်၌ ရှေ့တန်းရှိ စုဟန်ရှင်း နှင့် ဘေးနှစ်ဖက်ရှိ စစ်တပ်များ လှုပ်ရှားမှု မရှိသည်မှလွဲ၍ ကျန်ရှိသော စစ်တပ်များ အားလုံးမှာ လမ်းကြောင်း ရှင်းလင်းသွားခဲ့ပြီး ပွင့်အာလာသော ပန်းပွင့် တစ်ပွင့်အလား ဘေးပတ်ဝန်းကျင်သို့ လျင်မြန်စွာ ပြန့်ကားသွားကြတော့သည်။

ဤအရာ အားလုံးမှာ တိတ်တဆိတ် လုပ်ဆောင်နေခြင်းဖြစ်ရာ ကြီးမားလှသော အာရုံစိုက်မှုများကို မဖြစ်ပေါ်စေခဲ့ပါချေ။

ဝမ်ချောင်၏ လှုပ်ရှားမှုများကို ခဏထားလိုက်ပါဦး၊ အခြားတစ်ဖက်တွင်မူ နိုင်ငံအသီးသီးမှာ သတ်ဖြတ်လိုသော အရှိန်အဝါများ ပြည့်နှက်နေလျက် ပိုမို နီးကပ်လာနေကြပြီ ဖြစ်သည်။

ပေ သုံးထောင်!

ပေ နှစ်ထောင်!

ဤအကွာအဝေးတွင်မူ အစွမ်းထက်လှသော စစ်ရထားလေး တပ်ဖွဲ့နှင့် အနောက်ဘက်တွင် အခြားသူများထက် ထင်ရှားစွာ မတ်မတ်ရပ်နေသော စုဟန်ရှင်းကို မြင်တွေ့နေရပြီဖြစ်ကာ၊ ပို၍ အနောက်ကျသော နေရာရှိ နတ်ဘုရား တစ်ပါးအလား အရပ်မျက်နှာ အားလုံးကို လွှမ်းမိုးထားသော ဝမ်ချောင်ကိုပါ မြင်တွေ့နေရပြီ ဖြစ်သည်။

သို့သော် ဤသို့ဖြစ်နေလင့်ကစား ဝူဆူမစ်ရှ် ခါဂန်း ဖြစ်စေ၊ ယွန်းဂျယ်စိုးမွန်း ဖြစ်စေ နှစ်ဖက်စလုံး၌ အနောက်သို့ ဆုတ်ခွာမည့် အရိပ်အယောင် အနည်းငယ်မျှ မရှိကြပါချေ。

"စစ်ရထားလေး တပ်ဖွဲ့ကို အရင် သတ်ပစ်မယ်၊ ပြီးမှ မဟာထန်စစ်တပ်ကို ဝိုင်းဝန်း ချေမှုန်းကြတာပေါ့!"

မြင်းပေါ်တွင် ဝူဆူမစ်ရှ် ခါဂန်း၏မျက်လုံးများမှာ တောက်ပနေခဲ့ပြီး၊ အရှိန်အပြည့်ဖြင့် တဟုန်ထိုး ပြေးဝင်နေစဉ်အတွင်းမှာပင် သူ၏စိတ်ထဲ၌ လှုပ်ရှားသွားခဲ့ကာ ကြီးမားလှသော စိတ်စွမ်းအင် တစ်ခုမှာ လေဟာနယ်ကို ဖောက်ထွက်သွားပြီး အခြားတစ်ဖက်ရှိ ယွန်းဂျယ်စိုးမွန်းနှင့် ဆက်သွယ်လိုက်တော့သည်။

"ကောင်းပြီ!"

ယွန်းဂျယ်စိုးမွန်း၏အရှိန်အဝါမှာ ကျားတစ်ကောင်အလား ဖြစ်နေပြီး ရိုးရှင်းလှသော စကားတစ်ခွန်းကိုသာ ပြန်ဆိုလိုက်သည်။

ချွင်ခနဲ မြည်သံနှင့်အတူ ဓားရှည်ကို လက်ထဲတွင် ကိုင်ဆောင်လိုက်ပြီး ဓားရှည် တစ်စင်းကို လေထဲသို့ မြှောက်တင်ကာ ပါးစပ်ဖြင့် ဓားရိုးကို ကိုက်ထားလိုက်သည်။ တစ်ချိန်တည်းမှာပင် အခြားဓားရှည်နှစ်စင်းကို ချိုင်းအောက်တွင် ညှပ်ထားကာ အနောက်သို့ ညွှန်ပြထားလိုက်ပြီး၊ တစ်လောကလုံး၌ ကျော်ကြားလှသော သူ၏နာမည်ကြီး ပညာရပ် ဖြစ်သည့် ‘ဓားခြောက်လက် နတ်ဘုရား ထိန်းချုပ်မှု သိုင်း’ကို ချက်ချင်းပင် ထုတ်ဖော်လိုက်တော့သည်။

ယွန်းဂျယ်စိုးမွန်း၏ ဓားခြောက်လက် နတ်ဘုရား ထိန်းချုပ်မှုသိုင်းတွင် အမှန်တကယ် မြင်တွေ့နိုင်သည်မှာ အမြဲတမ်း ဓားငါးလက်သာ ဖြစ်သည်။ ဆဋ္ဌမမြောက်ဓားနှင့် ပတ်သက်၍မူ ၎င်းမှာ အန္တရာယ် အများဆုံးသော ဓားတစ်ချက်ဖြစ်ပြီး မည်သို့ အသုံးပြုသည်ကို မည်သူမျှ မသိရှိကြပါချေ။

သူ့အား ဆဋ္ဌမမြောက်ဓားကို အသုံးပြုစေနိုင်သူမှာ အလွန်ပင် ရှားပါးလှပြီး၊ မြင်တွေ့ခဲ့ရသူများ အားလုံးမှာလည်း များသောအားဖြင့် အစောကြီးကတည်းက သေဆုံးသွားခဲ့ကြပြီ ဖြစ်သည်။

အင်ပါယာ ဧကရာဇ် နှစ်ဦးမှာ အလင်းစက်ကွင်းများ ဖုံးလွှမ်းနေလျက် အရှိန်အဝါများ ပြင်းထန်နေခဲ့ပြီး၊ နိုင်ငံနှစ်ခုမှ ဗိုလ်ချုပ် အများအပြားကို ဦးဆောင်ကာ စစ်မြေပြင်ပေါ်ရှိ မုန်တိုင်း နှစ်ခုအလား အရှိန်အပြည့်ဖြင့် ရှေ့သို့ ပြေးဝင်လာကြရာ လူတိုင်း၏ အာရုံစိုက်မှုကို ဆွဲဆောင်သွားတော့သည်။

ပေ တစ်ထောင်

ပေ သုံးရာ

တိုက်ပွဲမှာ အချိန်မရွေး ဖြစ်ပွားတော့မည့် အနေအထားတွင် ရှိနေပြီး တာ့ခ် အင်ပါယာနှင့် ဂိုဂူလျော အင်ပါယာတို့၏ ဧရာမစစ်တပ်ကြီးများမှာ နှင်းတောင်ပြိုကျလာသည့်အလား တဟုန်ထိုး တိုးဝင်လာကြတော့သည်။

သို့သော် ထိုအချိန်မှာပင်

"ဝုန်း!"

ကျယ်လောင်စွာ မြည်ဟည်းသံကြီး တစ်ခုကိုသာ ကြားလိုက်ရပြီး၊ လူတိုင်း မထင်မှတ်ထားသော ကိစ္စရပ် တစ်ခု ဖြစ်ပေါ်လာတော့သည်။ စစ်ရထားလေး တပ်ဖွဲ့ သောင်းနှင့်ချီ၏ အနောက်ဘက်တွင် မည်သည့် နိမိတ်လက္ခဏာမျှ မရှိဘဲ ဟာလာဟင်းလင်းပြင်ကြီး အတွင်းမှနေ၍ ယန်ချီများမှာ ကောင်းကင်ယံသို့ တဟုန်ထိုး တက်သွားတော့သည်။ တစ်ချိန်တည်းမှာပင် ဧရာမ မိုးကြိုးသံကြီးတစ်ခုမှာ သိန်းနှင့်ချီသော စစ်တပ်ကြီး၏ ကောင်းကင်ယံ၌ ပေါက်ကွဲထွက်ပေါ်လာတော့သည်။

တိမ်မည်းများ တလိမ့်လိမ့် ထွက်ပေါ်လာခဲ့ပြီး လျှပ်စီးများ လက်ကာ မိုးချုန်းသံများ ထွက်ပေါ်လာတော့သည်။ မြေပြင်မှ ပေ သောင်းနှင့်ချီ မြင့်မားသော ကောင်းကင်ယံ၌ မရေမတွက်နိုင်သော ဝေဝါးနေသည့် ပုံရိပ်ယောင်များ ရုတ်တရက် ပေါ်ထွက်လာခဲ့ပြီး မယုံနိုင်စရာ ကောင်းလောက်အောင် မြန်ဆန်လှသောအရှိန်ဖြင့် လျင်မြန်စွာ ပီပြင်လာတော့သည်။

ထိုမရေမတွက်နိုင်သော အလင်းနှင့် အရိပ်များအကြား၌ မီတာ ထောင်နှင့်ချီ ရှည်လျားသော ဧရာမ သံကြိုးကြီး တစ်ချောင်းမှာ ရမ်းခါနေခဲ့ပြီး မီးပွင့်များ ရစ်ပတ်နေလျက် လူတိုင်း၏ အမြင်အာရုံ အတွင်းသို့ ဝင်ရောက်လာခဲ့ရာ လူတိုင်း၏အာရုံစိုက်မှုကို ဆွဲဆောင်သွားတော့သည်။

မျက်တောင်တစ်ခတ်အတွင်းမှာပင် မဟာထန်စစ်တပ်ကြီး သုံးသိန်းခွဲခန့်မှ ထွက်ပေါ်နေသော သတ်ဖြတ်လိုသည့် အရှိန်အဝါများမှာ ချက်ချင်းပင် ဆယ်ဆမက ပိုမို ပြင်းထန်လာတော့သည်။

"စစ်အစီအရင် ကောင်းကင်ဖြစ်စဉ်"

စစ်တပ်ကြီး အတွင်း၌ အရှိန်အပြည့်ဖြင့် ပြေးဝင်လာသော ဝူဆူမစ်ရှ် ခါဂန်း၏ တစ်ကိုယ်လုံးမှာ တုန်ခါသွားခဲ့ပြီး တိုးညှင်းစွာ ရေရွတ်လိုက်ကာ ရုတ်တရက် ပေါ်ထွက်လာသော ဤ ထူးဆန်းသည့် ဖြစ်စဉ်ကို ချက်ချင်းပင် မှတ်မိသွားတော့သည်။

စစ်အစီအရင် ကောင်းကင်ဖြစ်စဉ်။

စစ်တပ်က၏ စစ်အစီအရင်ကို အမြင့်ဆုံး အထွတ်အထိပ်သို့ ရောက်ရှိအောင် အသုံးပြုလိုက်သည့်အခါတွင် ထွက်ပေါ်လာသော ဤပုံရိပ်ယောင်များကို၊ တာ့လာစ် စစ်ပွဲပြီးနောက် ဝမ်ချောင်နှင့် တျန်းလန်ဗိုလ်ချုပ် ဒူဝူစီလီတို့ နှစ်ဦးကြောင့် တစ်လောကလုံး၌ ကျော်ကြားသွားခဲ့ပြီး ဖြစ်သည်။ အထူးသဖြင့် ဒူဝူစီလီ အနေဖြင့် အနောက် တာ့ခ်သို့ ပြန်ရောက်ပြီးနောက် စစ်အစီအရင် ကောင်းကင်ဖြစ်စဉ်ကို တိတ်တဆိတ် လေ့ကျင့်ရာမှ အတွင်းအားများ လမ်းကြောင်းမှားယွင်းကာ ရူးသွပ်သွားခြင်းကြောင့် တစ်လောကလုံးရှိ နိုင်ငံအသီးသီးမှ မသိသူ မရှိလောက်အောင်ပင် ဖြစ်သွားခဲ့ရသည်။

"သတိထားကြ၊ သူတို့ စစ်အစီအရင် ကောင်းကင်ဖြစ်စဉ် ကို အသုံးပြုနေကြပြီ!"

"သူတို့ကို တားကြစမ်း"

ဝူဆူမစ်ရှ် ခါဂန်း၏ ရင်ထဲ၌ ထိတ်လန့်သွားခဲ့ပြီး ချက်ချင်းပင် ကြီးမားလှသော အန္တရာယ် တစ်ခုကို ခံစားလိုက်ရတော့သည်။

အရှေ့မြောက်ဘက် ဒေသတွင် ရှိနေသည် ဆိုသော်ငြားလည်း၊ တာ့လာစ် စစ်ပွဲ ပြီးနောက် ဝူဆူမစ်ရှ် ခါဂန်းသည် ထိုစစ်ပွဲနှင့် ပတ်သက်သော သတင်းအချက်အလက် အများအပြားကို စုဆောင်းထားခဲ့သည်။ အထူးသဖြင့် စစ်အစီအရင် ကောင်းကင်ဖြစ်စဉ် ကဲ့သို့သော ပျောက်ဆုံးနေပြီဖြစ်သည့် ပညာရပ် မျိုးကိုပင်။

ထိုစစ်ပွဲတွင် ဝမ်ချောင်သည်လည်း စစ်အစီအရင် ကောင်းကင်ဖြစ်စဉ်ကို အသုံးပြုခဲ့သည်မှာ မှန်သော်ငြားလည်း၊ လက်ရှိအခြေအနေနှင့် နှိုင်းယှဉ်ပါက... နှစ်ခုမှာ လုံးဝကွဲပြားခြားနားနေတော့သည်။

ကောင်းကင်ယံရှိ ထိုစစ်အစီအရင် ကောင်းကင်ဖြစ်စဉ်၏နယ်ပယ်မှာ အလွန်ပင် ကြီးမားကျယ်ပြန့်လွန်းလှရာ တာ့လာစ် စစ်ပွဲတုန်းကထက် များစွာသာလွန်လှပေသည်။

ထိုအချိန်က ဝမ်ချောင်သည် စစ်အစီအရင် ကောင်းကင်ဖြစ်စဉ်နှင့် ပတ်သက်၍ အလွန်အမင်း ကျွမ်းကျင်မှု မရှိသေးဘဲ စတင်အသုံးပြုကာစသာ ရှိသေးလင့်ကစား ကြီးမားလှသော စွမ်းအားများ ရှိနေခဲ့ပြီး ဖြစ်သည်။ ယခုအချိန်တွင် ဤစစ်အစီအရင် ကောင်းကင်ဖြစ်စဉ် ၏ နယ်ပယ်မှာ ဤမျှလောက် ကြီးမားနေပြီဖြစ်ရာ မည်မျှလောက် အစွမ်းထက်လိမ့်မည်ကို ဝူဆူမစ်ရှ် ခါဂန်းပင်လျှင် တွေးတောဝံ့ခြင်း မရှိပါချေ။

အကယ်၍ ဝမ်ချောင်ကိုသာ အောင်မြင်စွာ အသုံးပြုခွင့် ပေးလိုက်မည်ဆိုပါက နောက်ဆက်တွဲ ရလဒ်များမှာ တွေးဝံ့စရာပင် မဟုတ်တော့ဟု ဝူဆူမစ်ရှ် ခါဂန်း၏ ရင်ထဲ၌ ခံစားနေရသည်။

မျက်တောင်တစ်ခတ်အတွင်း အနည်းငယ်မျှ တွေဝေခြင်း မရှိဘဲ ဝူဆူမစ်ရှ် ခါဂန်းသည် ကိုယ်တွင်းရှိ ဂန်ချီများကို ချက်ချင်း ပေါက်ကွဲထွက်ပေါ်လာစေခဲ့ပြီး၊ စစ်တပ်ကြီးကို ဦးဆောင်လျက် ဓားမြှောင် တစ်စင်းအလား ဝမ်ချောင်ရှိရာ အရပ်ဆီသို့ တဟုန်ထိုး ပြေးဝင်တိုက်ခိုက်လိုက်တော့သည်။

တစ်ချိန်တည်းမှာပင် ဂိုဂူလျော ဧကရာဇ် ယွန်းဂျယ်စိုးမွန်းမှာလည်း ဓားငါးလက်ကို ကိုင်ဆောင်ထားလျက် ဝူဆူမစ်ရှ် ခါဂန်းနှင့် နားလည်မှု ရှိစွာဖြင့် ဘေးနှစ်ဖက်မှနေ၍ ပူးပေါင်းကာ ဝမ်ချောင်၏စစ်တပ်ဆီသို့ ညှပ်ပိတ် တိုက်ခိုက်လိုက်ကြတော့သည်။

******