အခန်း ၃၉၆

အခန်း (၃၉၆) ဖျက်ဆီးပစ်ခြင်း

ဌာနေပြန်ဓားမျှော်စင်၏ ပင်မတောင်ထွတ်မှာ ပြင်းထန်စွာ တုန်လှုပ်သွားပြီးနောက် နောက်ဆုံးတွင် ငြိမ်သက်သွား၏။

စွေဝမ်ကုန်းသည် သူ၏ ဓားရှည်ကို ကိုင်ဆောင်လျက် ခြေလှမ်းအနည်းငယ် နောက်ဆုတ်သွားခဲ့သည်။

အခြားသူများက စွေဝမ်ကုန်းကို စိုးရိမ်တကြီး ကြည့်လိုက်ကြ၏။

အစောက တိုက်ခိုက်မှုမျိုးကို ဤနေရာတွင် ရှိနေသူများအနက် စွေဝမ်ကုန်းမှလွဲ၍ မည်သူမျှ တားဆီးနိုင်စွမ်း မရှိချေ။

အစီအရင်၏ စွမ်းအားများကို သူတို့အပေါ် ပေါင်းစပ်ပေးထားလျှင်ပင် ရလဒ်က အတူတူပင် ဖြစ်လိမ့်မည်။

ထိုကဲ့သို့သော တိုက်ခိုက်မှုကို ထိပ်တိုက် ရင်ဆိုင်ရန်အတွက်ပင် ကြီးမားလှသော သတ္တိများ လိုအပ်ပြီး အနည်းငယ်မျှ အမှားအယွင်း ဖြစ်သွားပါက သေဆုံးသွားနိုင်ပေသည်။

"ငါ အဆင်ပြေပါတယ်..."

စွေဝမ်ကုန်းက အသံနိမ့်ဖြင့် ပြောလိုက်၏။

စွေဝမ်ကုန်း၏ စကားကို ကြားသောအခါ အခြားသူများက သက်ပြင်းတစ်ချက် ချလိုက်နိုင်ကြသည်။

ရှင်းရှင်းကျောက်က အနည်းငယ် တုန်ယင်နေသော စွေဝမ်ကုန်း၏ လက်မောင်းကို တစ်ချက် ကြည့်လိုက်၏။

စွေဝမ်ကုန်းက အတတ်နိုင်ဆုံး ထိန်းချုပ်ထားသော်လည်း လုံးဝ ရှောင်လွှဲ၍မရနိုင်ချေ။

ဒွာရသန့်စင်ခြင်း အထွတ်အထိပ်အဆင့် တိုက်ခိုက်မှုမျိုးကို ခံနိုင်ရည်ရှိရန် မလွယ်ကူလှပေ။

စွေဝမ်ကုန်း၏ လက်မောင်း အနည်းငယ် ဒဏ်ရာရသွားခြင်းကပင် အလွန် ကံကောင်းနေပြီဟု ဆိုနိုင်ပေသည်။

ဂိုဏ်းတံခါးအပြင်ဘက်တွင် ထိုကဲ့သို့သော တိုက်ခိုက်မှုမျိုးနှင့် ကြုံတွေ့ရပါက ဤနေရာတွင် ရှိနေသူ မည်သူမျှ လွတ်မြောက်နိုင်မည် မဟုတ်ဘဲ စွေဝမ်ကုန်း ကိုယ်တိုင်လည်း ချွင်းချက် မဟုတ်ချေ။

စွေဝမ်ကုန်း ဆက်လက် စကားပြောရန် ပြင်လိုက်စဉ်မှာပင် ရုတ်တရက် ရှေ့သို့ စိုက်ကြည့်လိုက်ရာ ထိုအန္တရာယ်ရှိသော ခံစားချက်က ထပ်မံ ပေါ်ပေါက်လာပြန်၏။

တစ်ဖက်လူ၏ တိုက်ခိုက်မှုက အဆုံးသတ်ရန် ဝေးကွာနေသေးပေသည်။

အစီအရင်က အားလုံး၏ အရှိန်အဝါကို ချိတ်ဆက်ထားသဖြင့် စွေဝမ်ကုန်းက အခြေအနေကို အာရုံခံမိသကဲ့သို့ အခြားသူများကလည်း အာရုံခံမိကြသည်။

အစောက မြားချက်ကြောင့် ဌာနေပြန်ဓားမျှော်စင်၏ အစီအရင်တွင် ပျက်စီးမှုများ ရှိနေပြီ ဖြစ်၏။

ထိုကဲ့သို့သော တိုက်ခိုက်မှုမျိုး ထပ်မံ ဖြစ်ပွားပါက စွေဝမ်ကုန်းအတွက် ခုခံရန် ပို၍ပင် ခက်ခဲသွားလိမ့်မည်။

ထို့အပြင် မြားချက် ထိမှန်ပြီးနောက် ဌာနေပြန်ဓားမျှော်စင်၏ အစီအရင် ပျက်စီးမှုက ပိုမို ဆိုးရွားလာမည်ဖြစ်ပြီး သံသရာလည်ကာ တတိယမြောက် မြားချက်အရောက်တွင် စွေဝမ်ကုန်း ဒဏ်ရာရသွားမည်ဖြစ်ပြီး ပင်မတောင်ထွတ်၏ အစီအရင်မှာလည်း တိုက်ရိုက် ပြိုကွဲသွားလိမ့်မည်။

ဌာနေပြန်ဓားမျှော်စင်၏ အစီအရင်က ထူးခြားဆန်းပြားလှသော်လည်း အလွန်ဆုံး ဒွာရသန့်စင်ခြင်း နောက်ဆုံးအဆင့်ကိုသာ ကာကွယ်နိုင်စွမ်း ရှိသည်။

ဒွာရသန့်စင်ခြင်း အထွတ်အထိပ်အဆင့်သို့ ရောက်ရှိသွားပါက ဤခုခံမှုက အလွန်အမင်း ခက်ခဲသွားပေသည်။

အကယ်၍ ရှင်းရှင်းကျောက်သာ ဒဏ်ရာမရထားပါက ဒွာရသန့်စင်ခြင်း နောက်ဆုံးအဆင့် နှစ်ယောက် ပေါင်းစပ်၍ ဒွာရသန့်စင်ခြင်း အထွတ်အထိပ်အဆင့်၏ တိုက်ခိုက်မှုကို တားဆီးနိုင်ရန် မျှော်လင့်ချက် အနည်းငယ် ရှိသေးသည်။

သို့သော် ယခုအခါ ရှင်းရှင်းကျောက်က ဒဏ်ရာရနေသဖြင့် စွေဝမ်ကုန်း တစ်ယောက်တည်း တောင့်ခံထားနိုင်စွမ်း မရှိချေ။

"အစောက ချီစွမ်းအင် အငွေ့အသက်ကို ကြည့်ရတာ ပြီးခဲ့တဲ့အကြိမ်က ငါတို့ကျင့်စဉ်ကို ခိုးယူသွားတဲ့ ကောင်လေးနဲ့ တူတယ်..."

စွေဝမ်ကုန်းက ရှင်းရှင်းကျောက်ကို လှည့်ကြည့်ကာ ပြောလိုက်၏။

"ဟုတ်တယ်... ဒါပေမဲ့ အဲဒီအချိန်တုန်းက အဲဒီကောင်လေးရဲ့ အမြင့်ဆုံး ကျင့်ကြံမှုက ဒွာရသန့်စင်ခြင်း အလယ်အလတ်အဆင့်ပဲ ရှိသေးတာ..."

ရှင်းရှင်းကျောက်က မျက်မှောင်ကို ပြင်းပြင်းထန်ထန် ကုတ်လိုက်သည်။

အကယ်၍ ထိုစဉ်က ချန်ဖေးသာ ဒွာရသန့်စင်ခြင်း နောက်ဆုံးအဆင့် ဖြစ်နေခဲ့ပါက ချွီချင်းရှန်း၊ ကျိုးကျိရွမ်တို့နှင့် ပူးပေါင်း၍ ရှင်းရှင်းကျောက်၏ ဒွာရများ အားလုံးကို ဖျက်ဆီးပစ်နိုင်မည်ဖြစ်ပြီး သူ လွတ်မြောက်ရန် လုံးဝ နည်းလမ်းရှိမည် မဟုတ်ချေ။

ယခုအခါ နှစ်ဝက်ခန့်သာ ကုန်လွန်သွားခဲ့ပြီး သူ၏ ကျင့်ကြံမှုက မည်မျှပင် ရူးသွပ်စွာ တိုးတက်လာစေကာမူ ဒွာရသန့်စင်ခြင်း အထွတ်အထိပ်အဆင့်အထိ မြင့်တက်သွားရန် လုံးဝ အကြောင်းပြချက် မရှိချေ။

"ဒီလို တိုက်ခိုက်မှုမျိုးကို လုပ်နိုင်ဖို့ တစ်ဖက်လူက အချိန်အကြာကြီး အားယူထားတာ ဆိုရင်တော့ ဖြစ်နိုင်တယ်..."

စွေဝမ်ကုန်း၏ မျက်လုံးများ အနည်းငယ် အရောင်လဲ့သွား၏။

အန္တရာယ်ကို ပထမဆုံး စတင် အာရုံခံမိချိန်မှစ၍ နောက်ဆုံး အစစ်အမှန် တိုက်ခိုက်မှု ရောက်ရှိလာချိန်အထိ အမှန်တကယ်ပင် အချိန်များစွာ ကြာမြင့်ခဲ့သည်ကို ပြန်လည် စဉ်းစားမိလိုက်သည်။

ဒွာရသန့်စင်ခြင်း အလယ်အလတ်အဆင့် တစ်ယောက်က ဤကဲ့သို့သော အဆင့်ရှိ တိုက်ခိုက်မှုကို မည်သို့ လုပ်ဆောင်နိုင်သနည်း ဟူသည်ကိုမူ သူတို့ စဉ်းစား၍ မရနိုင်ချေ။

သို့သော် တစ်ဖက်လူကို အားယူရန် အချိန်မပေးသရွေ့ ပြဿနာ၏ ထက်ဝက်က ပြေလည်သွားပြီ ဖြစ်သည်။

သို့သော် ယခုအခါ တစ်ခုတည်းသော ပြဿနာမှာ ချန်ဖေးက သူတို့ကို အဝေးမှ တိုက်ခိုက်နိုင်သော်လည်း သူတို့တွင် ချန်ဖေးကို အဝေးမှ တိုက်ခိုက်နိုင်မည့် နည်းလမ်း မရှိခြင်းပင် ဖြစ်သည်။

ချန်ဖေး အားယူနေသည်ကို ဟန့်တားလိုပါက သူတို့က ရှေ့သို့ ပြေးထွက်ရမည် ဖြစ်၏။

သို့သော် ထိုသို့ လုပ်ဆောင်ခြင်းက ဂိုဏ်းတံခါး အစီအရင်၏ အားသာချက်ကို စွန့်လွှတ်လိုက်ခြင်းနှင့် အတူတူပင် ဖြစ်သည်။

"ယွမ်ချန်ဓားဂိုဏ်းက အင်အား အားလုံးကို စေလွှတ်ဖို့ မဖြစ်နိုင်ဘူး... ငါတို့ အတူတကွ သွားကြမယ်... ပြီးရင် မင်းနဲ့ငါက ချွီချင်းရှန်းနဲ့ ကျိုးကျိရွမ်ကို ရင်ဆိုင်မယ်... ကျန်တဲ့သူတွေက အခြားသူတွေကို သတ်ကြ..."

ရှင်းရှင်းကျောက်က ပြောလိုက်၏။

ယုတ္တိဗေဒအရဆိုလျှင် ဤကဲ့သို့ အချိန်ကြာမြင့်စွာ အားယူရပြီး လုံလောက်သော တိုက်ခိုက်ရေးစွမ်းအား ရှိသည့် ဒွာရသန့်စင်ခြင်း နောက်ဆုံးအဆင့်၏ သိုင်းကွက်ကို ဆက်တိုက် အသုံးပြုရန် ခက်ခဲသင့်ပြီး တစ်ချက် ထိမှန်ပါက တစ်ခါတစ်ရံတွင် အပြန်အလှန် ထိခိုက်နစ်နာစေသော သိုင်းကွက် ဖြစ်နိုင်သည်။

သို့သော် စွေဝမ်ကုန်းနှင့် ရှင်းရှင်းကျောက်တို့က လောင်းကြေး မထပ်ဝံ့ကြချေ။

အဘယ်ကြောင့်ဆိုသော် အစောက တိုက်ခိုက်မှုမျိုး ထပ်မံ ဖြစ်ပေါ်လာပါက အစီအရင်၏ အစိတ်အပိုင်း အများစု ပျက်စီးသွားမည်ဖြစ်ပြီး စွေဝမ်ကုန်း ကိုယ်တိုင်လည်း ဒဏ်ရာရသွားကာ သူ၏ တိုက်ခိုက်ရေး စွမ်းအား တစ်ခုလုံး လျော့ကျသွားမည် ဖြစ်သည်။

မည်သို့ပင်ဆိုစေ ထိုအခိုက်အတန့်၌ အဝေးမှ အရှိန်အဝါများ မြင့်တက်လာနေပြီး လှည့်စားမှု မဟုတ်ချေ။

အကယ်၍ သူတို့က အလွန်အမင်း သတိထားနေပြီး ဆက်တိုက် တိုက်ခိုက်ခံရပါက နောက်ဆုံးတွင် ခုခံရန် ခွန်အားပင် ရှိတော့မည် မဟုတ်ချေ။

ပုံမှန်အားဖြင့် ဤကဲ့သို့သော ဒွာရသန့်စင်ခြင်း အထွတ်အထိပ်အဆင့်၏ တိုက်ခိုက်မှုများကို ဆက်တိုက် လုပ်ဆောင်ရန် မဖြစ်နိုင်ပေ။

သို့သော် အကယ်၍ သူ့တွင် အလွန် အစွမ်းထက်သော ထိပ်တန်း ဝိညာဉ်လက်နက် တစ်ခု ရှိနေပါက ဖြစ်နိုင်ချေရှိသည်။

အထက်တန်းအဆင့် ဝိညာဉ်လက်နက်ဖြစ်နိုင်သည်။

"သွားကြစို့..."

စွေဝမ်ကုန်းက အသံနိမ့်ဖြင့် အော်ဟစ်လိုက်ပြီး သူ၏ ပုံရိပ်က လျှပ်တစ်ပြက် လှုပ်ရှားကာ ရှေ့ဆုံးမှ ပြေးထွက်သွား၏။

အစီအရင်ကို ကြီးကြပ်ရန် နောက်ချန်ထားခဲ့သူမှလွဲ၍ ဌာနေပြန်ဓားမျှော်စင်၏ အခြား အကြီးအကဲများ အားလုံး နောက်မှ လိုက်ပါသွားကြသည်။

မိုင်အနည်းငယ် အကွာအဝေးတွင် ချန်ဖေးသည် လေးရှည်ကို ကိုင်ဆောင်ထားပြီး လျှပ်စီးကြောင်းများ တောက်ပနေကာ အရှိန်အဝါများ အဆက်မပြတ် မြင့်တက်လာနေ၏။

တစ်ချက် ပစ်ခတ်လိုက်သည်နှင့် လေးနှင့် မြား ပျက်စီးသွားမည်ကို ချန်ဖေး ကြာမြင့်စွာကတည်းက သိရှိထားသဖြင့် ဤနေရာသို့ မလာရောက်မီ ချန်ဖေးသည် ရှီးယွင်မြို့အတွင်း၌ သန့်စင်သော သံမဏိလေးရှည် ဆယ်လက်ကျော်ကို အထူးတလည် ဝယ်ယူခဲ့ခြင်း ဖြစ်သည်။

ဤအဆင့်ရှိ ဝိညာဉ်လက်နက် လေးနှင့် မြားများကို ရှာဖွေရန် ခက်ခဲသော်လည်း ဤသန့်စင်သော သံမဏိလေးရှည်များမှာမူ အလွန် ပေါများလှပေသည်။

မြားတစ်စင်း ပစ်ခတ်လိုက်တိုင်း လေးတစ်လက် ပျက်စီးသွားသော်လည်း ချန်ဖေး၏ ရင်ထဲ၌ နှမြောတသမှု တစ်စက်မျှ မရှိချေ။

ချန်ဖေးသည် ဝိညာဉ်လက်နက်တစ်ခု ရယူရန် စဉ်းစားခဲ့ဖူးသော်လည်း ဤအားယူ တိုက်ခိုက်မှုက အလွန် အစွမ်းထက်လှသဖြင့် အဆင့်နိမ့် ဝိညာဉ်လေးရှည်က တောင့်ခံထားနိုင်လျှင်ပင် အသုံးပြုလိုက်တိုင်း ဝိညာဉ်စွမ်းအင်များကို မလွဲမသွေ ထိခိုက်စေမည် ဖြစ်သည်။

ထို့အပြင် ဤကဲ့သို့သော ထိခိုက်မှုမျိုးက ပြန်လည် ကုစား၍မရနိုင်လုနီးပါး ဖြစ်ပြီး ဝိညာဉ်လေးရှည်ကို ထာဝရ ပျက်စီးသွားစေမည် ဖြစ်သည်။

အကြိမ်အနည်းငယ် အသုံးပြုပြီးနောက် ဝိညာဉ်စွမ်းအင်များ ကုန်ခမ်းသွားကာ သာမန် လေးနှင့် မြားသာ ကျန်ရစ်တော့မည် ဖြစ်၏။

အဆင့်နိမ့် ဝိညာဉ်လေးရှည်သည် ဤကဲ့သို့သော လျှပ်စစ်သံလိုက် အမြောက်အတွက် ပံ့ပိုးမှု အနည်းငယ်သာ ရှိပြီး တစ်ကြိမ် အသုံးပြုပြီးသည်နှင့် ပျက်စီးသွားမည် ဖြစ်ရာ ချန်ဖေးသည် စဉ်းစားပြီးနောက် သာမန် သံမဏိလေးရှည်များကိုသာ ကုန်ကြမ်းအဖြစ် အသုံးပြုရန် ဆုံးဖြတ်ခဲ့ခြင်း ဖြစ်သည်။

လျှပ်စစ်မီးပွားများ တဖြတ်ဖြတ် မြည်နေပြီး မရေမတွက်နိုင်သော လျှပ်စီးကြောင်းများက ချန်ဖေး၏ ပတ်ဝန်းကျင်တွင် တောက်ပနေကာ ကောင်းကင်ဘုံ၏ အရှိန်အဝါကို ရင်ဆိုင်နေရသည့်အလား ဖြစ်နေ၏။

မြားတံပေါ်တွင် တွယ်ကပ်နေသော စွမ်းအားများက တဖြည်းဖြည်း မြင့်တက်လာပြီး အစောပိုင်းကနှင့် နှိုင်းယှဉ်ပါက ချန်ဖေးသည် အသေးစိတ် အချက်အလက် အချို့ကို ပိုမို ကျွမ်းကျင်လာသဖြင့် ဤအခိုက်အတန့်၌ သူ၏ အားယူမှု အရှိန်က သိသိသာသာ မြန်ဆန်လာခဲ့သည်။

ရုတ်တရက် ချန်ဖေး၏ မျက်နှာထား အနည်းငယ် ပြောင်းလဲသွားပြီး အဝေးမှ အနက်ရောင် အစက်အပြောက်အချို့က ဤနေရာဆီသို့ ပြေးဝင်လာသည်ကို တွေ့လိုက်ရ၏။

ချန်ဖေးက မျက်လုံးများကို အနည်းငယ် မှေးလိုက်ရာ အဝေးမှ အနက်ရောင် အစက်အပြောက်များက နီးကပ်လာခဲ့သည်။ ထိုအစက်အပြောက်လေးများမှာ ဌာနေပြန်ဓားမျှော်စင်မှ လူများပင် ဖြစ်၏။

ချန်ဖေးက တစ်ချက် ကြည့်လိုက်ရာ ဌာနေပြန်ဓားမျှော်စင်၏ အကြီးအကဲ အားလုံးနီးပါး ထွက်လာကြသည်ကို တွေ့လိုက်ရသည်။

အစောက မြားချက်ကြောင့် ဌာနေပြန်ဓားမျှော်စင်မှ လူများ အနည်းငယ် ထိခိုက်သွားခဲ့ပြီ ဖြစ်ကြောင်း ထင်ရှားပေသည်။

အဓိကအချက်မှာ သူတို့က ထိခိုက်ခံနေရပြီး ပြန်လည် မတိုက်ခိုက်နိုင်ခြင်းက အလွန် စိတ်ပျက်ဖွယ် ကောင်းလှသည်။

ချန်ဖေး၏ မျက်နှာတွင် သဲ့သဲ့ အပြုံးတစ်ခု ပေါ်လာပြီး သူ၏ လေး ချိန်ရွယ်ရာ အရပ်ကို ဌာနေပြန်ဓားမျှော်စင်မှ လူများဘက်သို့ ပြောင်းလဲလိုက်၏။

"လူစုခွဲ..."

ရှေ့ဆုံးမှ ပြေးလာသော စွေဝမ်ကုန်းသည် သူ၏ ရင်ထဲ၌ အေးစက်သော ခံစားချက်တစ်ခု ပေါ်လာပြီး သူ၏ မျက်နှာထား သိသိသာသာ ပြောင်းလဲသွား၏။

အော်ဟစ်လိုက်ပြီးနောက် စွေဝမ်ကုန်း၏ ပုံရိပ်က စတင်၍ လျှပ်တစ်ပြက် လှုပ်ရှားသွားခဲ့သည်။

စွေဝမ်ကုန်း၏ စကားကို ကြားသောအခါ အခြားသူများကလည်း တုံ့ဆိုင်းမနေဝံ့ကြချေ။

သူတို့သည် ချက်ချင်း လူစုခွဲလိုက်ကြပြီး အားလုံးက ကြီးမားသော အကွာအဝေးကို ထိန်းသိမ်းကာ ပစ်မှတ်ထားခြင်းမခံရစေရန် သူတို့၏ ခန္ဓာကိုယ်များကို နည်းလမ်းမျိုးစုံဖြင့် စတင် ရွှေ့ပြောင်းလိုက်ကြသည်။

ချန်ဖေးသည် သူ၏ လေးကို ခေတ္တမျှ အာရုံခံလိုက်ပြီးနောက် နောက်ဆုံးတွင် လေးနှင့် မြားကို ထပ်မံ မြှောက်လိုက်ပြီး ဌာနေပြန်ဓားမျှော်စင်၏ ပင်မတောင်ထွတ်ဆီသို့ ချိန်ရွယ်လိုက်၏။

အလွန်အမင်း အစွန်းရောက်သော အခြေအနေမျိုးတွင် လျှပ်စစ်သံလိုက် အမြောက်ဖြင့် လူတစ်ဦးတည်းကို ပစ်မှတ်ထားရန် ကြိုးစားခြင်းက အမှန်တကယ်ပင် ခက်ခဲလှသည်။

အဘယ်ကြောင့်ဆိုသော် အဆုံး၌ ချန်ဖေး၏ ဤမြားအပေါ် ထိန်းချုပ်နိုင်စွမ်းက အလွန် အားနည်းသွားသောကြောင့် ဖြစ်သည်။

သူ၏ စွမ်းအင် အားလုံးနီးပါးကို မြားပေါ်ရှိ စွမ်းအား အမျိုးမျိုးကို ချိန်ညှိကာ ဟန်ချက်ညီစေရန်အတွက် အသုံးပြုခဲ့ရပြီး ပစ်မှတ်ကို မထိမှန်မီ လေထဲတွင် ပေါက်ကွဲမသွားစေရန် ထိန်းသိမ်းရခြင်း ဖြစ်သည်။

မိမိ၏ ကိုယ်ပိုင် ခွန်အားထက် များစွာ ကျော်လွန်နေသော ဤကဲ့သို့သော တိုက်ခိုက်မှုမျိုးတွင် အားနည်းချက် ရှိနေပေသည်။

သို့သော် ဤအားနည်းချက်ကို ချန်ဖေးက ကြာမြင့်စွာကတည်းက မျှော်လင့်ထားပြီး ဖြစ်၏။

မိမိတို့ကိုယ်တိုင် ပစ်မှတ်ထားခြင်း မခံရကြောင်း အာရုံခံမိသောအခါ ဌာနေပြန်ဓားမျှော်စင်မှ လူများ အားလုံး သက်ပြင်းချလိုက်နိုင်ကြသည်။

မည်သို့ပင်ဆိုစေ အစောကကဲ့သို့သော တိုက်ခိုက်မှုမျိုး၏ ပစ်မှတ်ထားခံရခြင်းက အချိန်တိုလေးအတွင်းမှာပင် သူတို့၏ ကျောရိုးတစ်လျှောက် ချမ်းစိမ့်သွားစေသည်။

အကယ်၍ တစ်ယောက်ယောက်က ရှောင်တိမ်းရန် ပျက်ကွက်ခဲ့ပါက နေရာမှာတင် ပေါက်ကွဲထွက်သွားမည့် ရလဒ်သာ ဖြစ်လာမည်ဖြစ်ပြီး အံ့အားသင့်စရာ မရှိချေ။

အနည်းငယ် ပွတ်တိုက်မိရုံဖြင့်ပင် သေချာပေါက် ပြင်းထန်စွာ ဒဏ်ရာရသွားမည် ဖြစ်၏။

ချန်ဖေးက ဌာနေပြန်ဓားမျှော်စင်မှ လူများ နီးကပ်လာသည်ကို လျစ်လျူရှုကာ ဆက်လက် အားယူနေခဲ့သည်။

မြား၏ စွမ်းအား အထွတ်အထိပ်သို့ ရောက်ရှိသွားကြောင်း ခံစားလိုက်ရချိန်တွင် ချန်ဖေးက မြားကို လွှတ်လိုက်၏။

"ဘုန်း..."

နောက်ထပ် အသံထက်မြန်သော ပေါက်ကွဲသံတစ်ခုက ချန်ဖေး၏ နောက်ကျောတွင် ပေါ်လာပြီး ကြီးမားလှသော စွမ်းအားတစ်ခုက ချန်ဖေး ရပ်နေသော နေရာကို အက်ကွဲကြောင်းများ အကြိမ်ကြိမ် ဖြစ်ပေါ်သွားစေသည်။

သူတို့၏ ခြေအောက်ရှိ ကျောက်ဆောင်များက အချိန်မရွေး ပြိုကျသွားတော့မည့်အလား ကြီးမားလှသော အက်ကွဲကြောင်းကြီးတစ်ခုက အရပ်မျက်နှာ အနှံ့အပြားသို့ ဆန့်ထွက်သွား၏။

ဌာနေပြန်ဓားမျှော်စင်၏ ပင်မတောင်ထွတ်တွင် အစီအရင်ကို ကြီးကြပ်ရန် ကျန်ရစ်ခဲ့သော ယွမ်နန်ယွင်သည် သူ၏ နှလုံးသားနှင့် ဝိညာဉ်ကို ထိုးဖောက်သွားသော အေးစက်မှုတစ်ခုကို ရုတ်တရက် ခံစားလိုက်ရသည်။

အလိုအလျောက် မော့ကြည့်လိုက်ရာ အဝေးမှ စူးရှတောက်ပသော မိုးကြိုးတစ်ခုက သူ့ဆီသို့ ပြေးဝင်လာသည်ကို မြင်တွေ့လိုက်ရ၏။

ယွမ်နန်ယွင်သည် ထိတ်လန့်သွားပြီး ထွက်ပြေးရန် ကြိုးစားခဲ့သော်လည်း အလွန် နောက်ကျနေပြီ ဖြစ်ကြောင်း တွေ့လိုက်ရသည်။

ယွမ်နန်ယွင်ကို ပင်မတောင်ထွတ်ရှိ စစ်ရေး အုပ်ချုပ်သူအဖြစ် ခန့်အပ်ထားခြင်းမှာ ဤနေရာက နှိုင်းယှဉ်ချက်အရ ပိုမို ဘေးကင်းလုံခြုံသည်ဟု ယူဆထားသောကြောင့် ဖြစ်သည်။

ထိုကဲ့သို့သော အစွမ်းထက် တိုက်ခိုက်မှုမျိုးက အစီအရင်ကို လာရောက် တိုက်ခိုက်ရန် မရှိနိုင်ဘဲ ပါရမီရှင်များကို အနိုင်ယူရန်က ပို၍ အရေးကြီးသည် မဟုတ်ပါလော။

သို့သော် ယွမ်နန်ယွင်သည် တစ်ဖက်လူက လုံးဝ ယုတ္တိမတန်သော လှုပ်ရှားမှုတစ်ခုကို ပြုလုပ်ကာ ထိုကဲ့သို့သော တိုက်ခိုက်မှုမျိုးကို သူတို့၏ ဌာနေပြန်ဓားမျှော်စင် အစီအရင်အပေါ် အလဟဿ အသုံးပြုလိမ့်မည်ဟု မမျှော်လင့်ထားခဲ့ချေ။

"ဘုန်း..."

ဌာနေပြန်ဓားမျှော်စင် အစီအရင်က ပြင်းထန်စွာ တုန်ခါသွားပြီး ဒိုင်းလွှား၏ အလင်းတန်းက မှန်းဆ၍မရအောင် ပြောင်းလဲသွားကာ အစီအရင် အတွင်းရှိ ယွမ်နန်ယွင်မှာ ပြင်းထန်စွာ တုန်လှုပ်သွားသဖြင့် ဒွာရ ခုနစ်ပေါက်လုံးမှ သွေးများ ယိုစီးလာခဲ့ပြီ ဖြစ်သည်။

ယခင်က စွေဝမ်ကုန်းသည် မြားများကို တားဆီးခဲ့စဉ်က အစီအရင်က တစ်ဝက်ကို တားဆီးပေးပြီး စွေဝမ်ကုန်းက ကျန်တစ်ဝက်ကို တားဆီးရန် တိုက်ခိုက်ခဲ့ခြင်း ဖြစ်သည်။ သို့မဟုတ်ပါက အစီအရင်၏ ခွန်အား အားလုံး ဆုံးရှုံးသွားပြီး အစီအရင်က သေချာပေါက် ပြိုကွဲသွားလိမ့်မည် ဖြစ်၏။

သို့သော် ယွမ်နန်ယွင်သည် ဒွာရသန့်စင်ခြင်း အစောပိုင်းအဆင့်သာ ရှိသေးပြီး ဤအခိုက်အတန့်၌ အခြား အကြီးအကဲများ၏ ခွန်အား ပံ့ပိုးမှုလည်း မရှိသဖြင့် သူကိုယ်တိုင်က မြားကို လုံးဝ မတားဆီးနိုင်ဘဲ အစီအရင်ကိုသာ အရာအားလုံး တောင့်ခံထားရန် ခွင့်ပြုပေးနိုင်တော့သည်။

"ဂျွတ် ဂျွတ် ဂျွတ်..."

ရုတ်တရက် အက်ကွဲသံများနှင့်အတူ ဒိုင်းလွှားမှာ အက်ကွဲသွားပြီး နောက်တစ်စက္ကန့်တွင် အစီအရင်ကို စောင့်ကြပ်နေသော ယွမ်နန်ယွင်မှာ တမုဟုတ်ချင်း အက်ကွဲသွားကာ လေထဲသို့ သွေးမြူခိုးများ ပန်းထုတ်လိုက်ပြီး မြေပြင်ပေါ်သို့ အားနည်းစွာ လဲကျသွားခဲ့၏။

မြားမှ ကျန်ရစ်သော စွမ်းအားများက ပင်မတောင်ထွတ် တစ်ခုလုံးကို ထိုးဖောက်သွားပြီး အရှေ့နှင့် အနောက်ကို ဖြတ်သန်းသွားသော ဧရာမ အပေါက်ကြီးတစ်ခု ကျန်ရစ်ခဲ့ကာ မြေကြီးတုန်လှုပ်ပြီး တောင်တန်းများ တုန်ခါသွားစေခဲ့သည်။

ဌာနေပြန်ဓားမျှော်စင်၏ တပည့်များက သူတို့ရှေ့ရှိ အရာအားလုံးကို ကြောင်အမ်းအမ်းဖြင့် စိုက်ကြည့်နေကြပြီး နောက်တစ်စက္ကန့်တွင် သူတို့သည် အရပ်မျက်နှာ အနှံ့အပြားသို့ လူစုခွဲကာ ထွက်ပြေးကြတော့ရာ လုံးဝ ပရမ်းပတာ ဖြစ်သွားခဲ့၏။

ဤကဲ့သို့သော စွမ်းအားမျိုးကို ရင်ဆိုင်ရချိန်တွင် ခန္ဓာကိုယ် ကြံ့ခိုင်ခြင်းအဆင့်များ အနေဖြင့် လုံးဝ ခုခံနိုင်စွမ်း မရှိချေ။

အရိုးသန့်စင်ခြင်းအဆင့် ဖြစ်စေ၊ အတွင်းကလီစာသန့်စင်ခြင်းအဆင့် ဖြစ်စေ အားလုံးမှာ အတူတူပင် ဖြစ်ကြသည်။

စွေဝမ်ကုန်းနှင့် အခြားသူများ ရှေ့သို့ ပြေးလာရင်း ဂိုဏ်းအတွင်းရှိ ပင်မတောင်ထွတ်၏ အခြေအနေကို အာရုံခံမိသောအခါ သူတို့၏ မျက်နှာများ မှောင်မည်းသွားပြီး သူတို့၏ အကြည့်များက အဝေးရှိ ချန်ဖေး၏ ပုံရိပ်ကို ရက်စက်စွာ စိုက်ကြည့်နေကြ၏။

ယခုအခါ နှစ်ဘက်စလုံး အကြား မီတာ ရာဂဏန်းပင် မကျန်တော့ချေ။

ဤနေရာသို့ ရောက်ရှိချိန်တွင် စွေဝမ်ကုန်းနှင့် ရှင်းရှင်းကျောက်တို့ နှစ်ယောက်စလုံး အခြား ယွမ်ချန်ဓားဂိုဏ်းမှ လူများ၏ ချီစွမ်းအင်များကို မခံစားရတော့ချေ။

ချွီချင်းရှန်းလည်း မရှိသလို ကျိုးကျိရွမ်လည်း မရှိချေ။

အဝေးတွင် ချန်ဖေး တစ်ယောက်တည်းသာ ရှိနေ၏။

"ခွေးကောင်လေး... သေစမ်း!"

ရှင်းရှင်းကျောက်က စူးရှသောအသံဖြင့် အော်ဟစ်လိုက်သည်။

"သတ်!"

အခြားသော ဌာနေပြန်ဓားမျှော်စင်မှ အကြီးအကဲများကလည်း အသံကျယ်ဖြင့် အော်ဟစ်လိုက်ကြ၏။

ချန်ဖေး၏ လက်ထဲရှိ လေးရှည်မှာ ပြာအဖြစ် ပြောင်းလဲသွားပြီး သန့်စင်သော သံမဏိလေးရှည် အသစ်တစ်ခုက ချန်ဖေး၏ လက်ထဲသို့ ကျရောက်လာကာ မြားတစ်စင်းကို တပ်၍ လေးကို ဆွဲလိုက်ရာ မိုးကြိုးများ ဟိန်းဟောက်သွား၏။

နောက်တစ်စက္ကန့်တွင် မြားတံသည် အနက်ရောင် လျှပ်စီးကြောင်းအဖြစ် ပြောင်းလဲသွားပြီး ဌာနေပြန်ဓားမျှော်စင်မှ အကြီးအကဲ တစ်ဦးထံသို့ ပျံသန်းသွားခဲ့သည်။

အလွန်အမင်း အစွန်းရောက်သော လျှပ်စစ်သံလိုက် အမြောက်အတွက် ချန်ဖေးသည် ဒွာရသန့်စင်ခြင်း အထွတ်အထိပ်အဆင့် တိုက်ခိုက်မှုမျိုးနှင့် နီးစပ်စေရန် အားယူရန် လိုအပ်ပေသည်။

သို့သော် သာမန် လျှပ်စစ်သံလိုက် အမြောက်အတွက်မူ ချန်ဖေးက အားယူရန် လုံးဝ မလိုအပ်ဘဲ အထွတ်အထိပ်အဆင့်သို့ ရောက်ရှိနေသော မဟာမိုးကြိုးဓားသိုင်း၏ အခြေအနေဖြင့် အလွယ်တကူ လုပ်ဆောင်နိုင်ပေသည်။

ချန်ဖေးသည် ယခုအခါ ဒွာရသန့်စင်ခြင်း နောက်ဆုံးအဆင့်သို့ ရောက်ရှိနေပြီ ဖြစ်ရာ တိုက်ခိုက်မှုတိုင်းက ဒွာရသန့်စင်ခြင်း နောက်ဆုံးအဆင့်၏ စွမ်းအားများ ဖြစ်ပြီး လေးနှင့် မြားကို အသုံးပြုခြင်းက ချန်ဖေးကို အဝေးမှ တိုက်ခိုက်နိုင်စွမ်း ရှိစေရုံသက်သက်သာ ဖြစ်၏။

"ဘုန်း..."

အဆက်မပြတ် လှည့်ပတ်ရှောင်တိမ်းနေသော ဌာနေပြန်ဓားမျှော်စင်မှ အကြီးအကဲထံမှ ညည်းသံ တစ်သံ ထွက်ပေါ်လာပြီး ဤမြားချက်ကြောင့် ပေါက်ကွဲထွက်သွားကာ သွေးမြူခိုးများ ပြန့်ကျဲသွားခဲ့တော့သည်။