အခန်း ၄၀၅

အခန်း (၄၀၅) ဆယ်ယောက်ကို တိုက်ခိုက်ခြင်း

"ချင်းယွီ မျှော်စင်"

ချန်ဖေးက လမ်းမများနှင့် လမ်းကြား အနည်းငယ်ကို ဖြတ်သန်းသွားပြီးနောက် အဆောက်အအုံ တစ်ခုရှေ့တွင် ရပ်တန့်လိုက်၏။

အဝင်ဝတွင် လူများ အဝင်အထွက် များပြားနေပြီး အခြား ဆိုင်များနှင့် နှိုင်းယှဉ်ပါက ချင်းယွီ မျှော်စင်သည် ရမ္မက်ဆန်သော ရယ်မောသံများနှင့် ရံဖန်ရံခါ ထွက်ပေါ်လာသော မြူဆွယ်သည့် အသံများဖြင့် ပြည့်နှက်နေပေသည်။

"သခင်လေး... အတွင်းကို ဝင်ပြီး ခဏလောက် အနားယူပါဦးလား"

တံခါးဝရှိ မိန်းကလေးက ချန်ဖေး ရပ်တန့်သွားသည်ကို မြင်သောအခါ အမြန်ပင် နွေးထွေးစွာ ဖိတ်ခေါ်လိုက်၏။

ကျန်နန်၏ ညင်သာသော မိုးစက်များကဲ့သို့ နူးညံ့သိမ်မွေ့သော မိန်းကလေး၏ အကြည့်က မိမိ၏ ချစ်သူကို ငေးကြည့်နေသည့်အလား ဖြစ်နေကာ လူတစ်ဦးကို နစ်မြုပ်သွားချင်စိတ် ပေါ်လာစေသည်။

"ကိစ္စလေးတွေ ရှိနေသေးလို့ပါ... နောက်တစ်ခေါက်မှ လာခဲ့ပါ့မယ်"

ချန်ဖေးက ပြုံးလိုက်ပြီး လက်ကို ဝှေ့ယမ်းကာ အခြား နေရာတစ်ခုသို့ ထွက်ခွာသွားခဲ့၏။

ပြီးခဲ့သည့် အကြိမ်က ချီရှူချင်းနှင့်အတူ ကျင့်ကြံခဲ့ပြီးနောက်ပိုင်း ရက်အတော်ကြာ ကုန်လွန်သွားခဲ့ပြီ ဖြစ်သည်။

အကယ်၍ ဤကဲ့သို့သောအရာများကို ပုံမှန် မကြုံတွေ့ရပါက အတွေးများ အနည်းငယ် နည်းပါးသွားနိုင်ပေသည်။

သေချာသည်မှာ အနည်းငယ်သာ လျော့နည်းသွားခြင်း ဖြစ်၏။

မည်သို့ပင်ဆိုစေ ဤသည်က လူသားတို့၏ ပင်ကိုယ်ဗီဇများထဲမှ တစ်ခုဖြစ်ပြီး စိတ်ဓာတ်ခွန်အားအပေါ် မှီခိုရုံသက်သက်ဖြင့် တစ်ခါတစ်ရံ ဖိနှိပ်ရန် ခက်ခဲလှပေသည်။

သို့သော် အကယ်၍ အကြိမ်ကြိမ် ကြုံတွေ့ရပါက အရသာခံမိပြီး အနားယူချိန် အနည်းငယ် ကြာမြင့်သွားပါက အလိုအလျောက် သတိရလွမ်းဆွတ်လာမည် ဖြစ်၏။

မည်သို့ပင်ဆိုစေ နူးညံ့သိမ်မွေ့သော နယ်မြေဆိုသည်မှာ သူရဲကောင်းများ၏ သင်္ချိုင်းဂူပင် ဖြစ်သည်။

သို့သော် ဤချင်းယွီ မျှော်စင်ကို ချန်ဖေးက တစ်ချက်သာ ကြည့်ခဲ့ပြီး အမှန်တကယ် ဝင်ရောက်ရန် ချန်ဖေး မစဉ်းစားခဲ့ချေ။

သူက သန့်ရှင်းမှုကို အလွန်အမင်း ဂရုစိုက်လွန်းသူ မဟုတ်သော်လည်း ထိုမိန်းကလေးများက မတောင့်ခံနိုင်မည်ကို စိုးရိမ်သောကြောင့်သာ ဖြစ်၏။

ချီရှူချင်း ကိုယ်တိုင်ပင်လျှင် ဒွာရသန့်စင်ခြင်း အဆင့် ပညာရှင်တစ်ဦး ဖြစ်သော်လည်း ရေရှည် ပူးပေါင်းကျင့်ကြံမှုကို မတောင့်ခံနိုင်ခဲ့ချေ။

ဤမိန်းကလေးများမှာ အခြေခံအားဖြင့် ကြွက်သားသန့်စင်ခြင်း အဆင့်များသာ ဖြစ်ပြီး မိန်းမသား တစ်ယောက်အနေဖြင့် မည်သို့ တောင့်ခံနိုင်မည်နည်း။

တစ်ပြိုင်နက်တည်း ဆယ်ယောက်လောက် ခေါ်လို့မှ မရနိုင်တာ မဟုတ်ဘူးလား။

‘အင်း... မဖြစ်နိုင်တာတော့ မဟုတ်ဘူး’

ချန်ဖေး၏ မျက်နှာတွင် အပြုံးတစ်ခု ပေါ်လာသော်လည်း သူက ခေါင်းခါလိုက်ပြီး ချင်းယွီ မျှော်စင်ဆီသို့ အမှန်တကယ် လှည့်မသွားခဲ့ချေ။

ယင်းအစား သူက ဆက်လက် လျှောက်လှမ်းသွားပြီး နောက်ဆုံးတွင် ဆိုင်တစ်ဆိုင်ရှေ့၌ ရပ်တန့်လိုက်၏။

‘ချန်းပေါင်ရတနာဆိုင်’

အစောက ချန်ဖေး လှည့်လည်သွားလာခဲ့သော ဆိုင်နှစ်ဆိုင်ကဲ့သို့ပင် အစွမ်းထက်သော ဆိုင်တစ်ဆိုင် ဖြစ်သည်။

ချန်ဖေးက မူလဖိနှိပ်ခြင်း မှန်ကို ရောင်းချသူအဖြစ် ချန်းပေါင်ရတနာဆိုင်ကို ရွေးချယ်ခဲ့ခြင်း မဟုတ်ဘဲ ဤနေရာက တည်းခိုခန်းနှင့် အဝေးဆုံး ဖြစ်နေသောကြောင့်သာ ဖြစ်၏။

"သခင်လေး... ဘာများ အလိုရှိပါသလဲ"

ဆိုင်ရှင်က ချန်ဖေးကို မြင်သောအခါ အခြား ဆိုင်နှစ်ဆိုင်နည်းတူ စိတ်အားထက်သန်စွာဖြင့် ရှေ့သို့ တိုးလာခဲ့သည်။

"အထက်တန်းအဆင့် ဝိညာဉ်လက်နက် တစ်ခု ရောင်းချင်လို့"

ချန်ဖေးက တိုးညင်းစွာ ပြောလိုက်၏။

"အထက်တန်းအဆင့် ဝိညာဉ်လက်နက်"

ဆိုင်ရှင်၏ ရင်ထဲ၌ ခုန်ပေါက်သွား၏။

အစောက ချန်ဖေး၏ ဒွာရသန့်စင်ခြင်း အလယ်အလတ်အဆင့် ကျင့်ကြံမှုကို သူ သတိပြုမိခဲ့ပြီး အရောင်းအဝယ် အကြီးကြီးတစ်ခု ဖြစ်လာမည်ဟု ထင်ခဲ့သော်လည်း ဆိုင်ရှင်သည် ဤမျှ ကြီးမားသော အရောင်းအဝယ်တစ်ခု ဖြစ်လာမည်ဟု မမျှော်လင့်ထားခဲ့ချေ။

ချန်းပေါင်ရတနာဆိုင်သည် အင်ပါယာ မြို့တော်အတွင်း၌ နှစ်ပေါင်းများစွာ လည်ပတ်နေခဲ့ရာ အထက်တန်းအဆင့် ဝိညာဉ်လက်နက်များကို သဘာဝကျစွာပင် အရောင်းအဝယ် ပြုလုပ်ခဲ့ဖူးသော်လည်း အချိန်ကာလကို ချုံ့ကြည့်ပါက တစ်နှစ်လျှင် တစ်ကြိမ်ပင် အထက်တန်းအဆင့် ဝိညာဉ်လက်နက်များကို မြင်တွေ့ရမည် မဟုတ်ချေ။

"သခင်လေး... အတွင်းကို ကြွပါ"

ဆိုင်ရှင်က အမြန်ပင် ချန်ဖေးကို အတွင်းခန်းသို့ ခေါ်ဆောင်သွားရာ အစေခံများက အမြန်ပင် လက်ဖက်ရည်များ ယူဆောင်လာပေးပြီး လက်ဖက်ရည် မွှေးရနံ့က အခန်းအတွင်း ချက်ချင်း ပြည့်နှက်သွား၏။

ချန်ဖေးက လက်ဖက်ရည်ခွက်ကို ယူ၍ ဖွဖွလေး တစ်ငုံ သောက်လိုက်ရာ သူ၏ ပါးစပ်ထဲတွင် မွှေးရနံ့များ ချက်ချင်း ပြည့်နှက်သွားခဲ့သည်။

"ကောင်းမွန်တဲ့ လက်ဖက်ရည်ပဲ"

ချန်ဖေးက ချီးကျူးလိုက်၏။

"သခင်လေး နှစ်သက်တယ်ဆိုရင် နောက်ကျရင် နှစ်ပိဿာလောက် ယူသွားပါ... ကျွန်တော်တို့ ဆိုင်ငယ်လေးက အမှတ်တရ လက်ဆောင်အဖြစ် သဘောထားပေးပါ"

ဆိုင်ရှင်က ပြုံးလျက် ပြောလိုက်သည်။

သဘာဝကျစွာပင် လက်ဖက်ရည်သည် လက်ဖက်ရည်ကောင်း ဖြစ်ပြီး မူလချီစွမ်းအင်များ ပြည့်နှက်နေသော နေရာတွင် တိုက်ရိုက် စိုက်ပျိုးကာ ရေလောင်းရန် အသုံးပြုသော ရေမှာလည်း ဝိညာဉ်ကျောက်တုံးများ စိမ်ထားသော ရေဖြစ်၏။

တစ်ချိန်တည်းမှာပင် လက်ဖက်ခူးသူများနှင့် လက်ဖက်ခြောက် ပြုလုပ်သူများ အားလုံးမှာ ငယ်ရွယ်သော မိန်းကလေးများ ဖြစ်ကြသည်။

အဆင့်တိုင်းက အလွန် သေသပ်လှပသော လိုအပ်ချက်များ ရှိပေသည်။

ထို့ကြောင့် အင်ပါယာ မြို့တော်ရှိ အဆင့်မြင့် အရာရှိကြီးများနှင့် သူကောင်းမျိုးများပင်လျှင် ဤကဲ့သို့သော လက်ဖက်ရည်မျိုးကို သောက်ရခဲလှပြီး တစ်ကြိမ်လျှင် နှစ်ပိဿာ သယ်ဆောင်သွားရန် ဆိုလျှင် ပို၍ပင် ဝေးကွာလှပေသည်။

သို့သော် နောက်လာမည့် အထက်တန်းအဆင့် ဝိညာဉ်လက်နက် အရောင်းအဝယ်နှင့် နှိုင်းယှဉ်ပါက သာမန်လူများ အဖိုးမဖြတ်နိုင်ဟု ယူဆသော လက်ဖက်ခြောက်မှာ အလွန် သာမန်ဖြစ်သွားပုံ ရပေသည်။

"မလိုအပ်ပါဘူး"

ချန်ဖေးက လက်ကို ဝှေ့ယမ်းလိုက်ပြီး မူလဖိနှိပ်ခြင်း မှန်ကို ထုတ်ယူကာ စားပွဲပေါ် တင်လိုက်ပြီး ပြောလိုက်၏။

"ဆိုင်ရှင်... ဒီဝိညာဉ်လက်နက်က ဝိညာဉ်ကျောက်တုံး ဘယ်လောက်ရနိုင်မလဲ ကြည့်ပေးပါဦး"

ဆိုင်ရှင်က လက်အိတ်စွပ်ကာ ချန်ဖေးကို တစ်ချက် လှမ်းကြည့်လိုက်ပြီး ချန်ဖေးက ကန့်ကွက်ခြင်း မရှိသည်ကို မြင်သောအခါ နောက်ဆုံးတွင် မူလဖိနှိပ်ခြင်း မှန်ကို ကောက်ယူကာ ဂရုတစိုက် စတင် စစ်ဆေးခဲ့၏။

ချန်ဖေးက ဘေးနားတွင် ထိုင်လျက် ရံဖန်ရံခါ လက်ဖက်ရည် သောက်ကာ ဆိုင်ရှင်က မူလဖိနှိပ်ခြင်း မှန်ကို စစ်ဆေးနေသည်ကို တိတ်ဆိတ်စွာ စောင့်ဆိုင်းနေခဲ့သည်။

ဆယ့်ငါးမိနစ် အကြာတွင် ဆိုင်ရှင်က မူလဖိနှိပ်ခြင်း မှန်ကို ပြန်ချလိုက်ရာ သူ၏ မျက်နှာပေါ်တွင် အပြုံးများ အပြည့် ရှိနေပြီ ဖြစ်၏။

အမှန်တကယ်၌ ဝိညာဉ်လက်နက် အများအပြားမှာ အကဲဖြတ်ရန် မလိုအပ်ဘဲ ဝိညာဉ်လက်နက် ဗဟိုရှိ တက်ကြွသော ဝိညာဉ်စွမ်းအင်ကို တစ်ချက် ကြည့်လိုက်ရုံဖြင့် ရှင်းလင်းစွာ မြင်တွေ့နိုင်ပေသည်။

သို့သော် အထက်တန်းအဆင့် ဝိညာဉ်လက်နက်၏ တန်ဖိုးက မြင့်မားလွန်းသဖြင့် အနည်းငယ် ကွာခြားမှုကပင် ဝိညာဉ်ကျောက်တုံး ရာဂဏန်းချီ၍ အတက်အကျ ဖြစ်စေနိုင်ရာ ဆိုင်ရှင်မှာ အလွန် သတိထားနေရခြင်း ဖြစ်သည်။

" ဒီမှန်အလင်းတန်းက ပေါင်တစ်ထောင် အလေးချိန်ရှိတဲ့ စွမ်းအားကို ပိုင်ဆိုင်တယ်... လူတွေကို ပိတ်လှောင်ဖို့ပဲဖြစ်ဖြစ်၊ ရန်သူတွေကို သတ်ဖြတ်ဖို့ပဲဖြစ်ဖြစ် ကိုယ်ပိုင် အံ့ဖွယ်အာနိသင်တွေ ရှိပါတယ်"

ချန်ဖေးက ရှင်းပြလိုက်၏။

"အဖိုးတန် ရတနာကောင်း တစ်ခုပါပဲ"

ဆိုင်ရှင်က ခေါင်းညိတ်လိုက်ပြီး ချန်ဖေးနှင့် ပတ်သက်၍ မည်သည့် ကန့်ကွက်မှုမျှ မရှိချေ။

ဆိုင်ရှင်က ခေတ္တမျှ စဉ်းစားပြီးနောက် ဆက်လက် ပြောလိုက်၏။

"အထက်တန်းအဆင့် ဝိညာဉ်လက်နက်တွေအတွက် ကျွန်တော်တို့ဆိုင်မှာ ရွေးချယ်စရာ နှစ်ခု ရှိပါတယ်... တစ်ခုက မှန်ကို တိုက်ရိုက် ဝယ်ယူတာဖြစ်ပြီး နောက်တစ်ခုကတော့ ကိုယ်စားလှယ်နဲ့ ရောင်းချပေးဖို့ ထားခဲ့တာပါ... ရောင်းထွက်သွားပြီးရင်တော့ ဆိုင်က ဝန်ဆောင်ခ အနည်းငယ် ယူပါလိမ့်မယ်"

ချန်ဖေး၏ မျက်နှာထား အနည်းငယ် ပြောင်းလဲသွား၏။

အထက်တန်းအဆင့် ဝိညာဉ်လက်နက်အတွက် ကိုယ်စားလှယ်ဖြင့် ရောင်းချသော နည်းလမ်းပင် ရှိနေလိမ့်မည်ဟု သူ မမျှော်လင့်ထားခဲ့ချေ။

သို့သော် လူအများအပြားက ဆိုင်များကို တိုက်ရိုက် ရောင်းချခြင်းက အနည်းငယ် ရှုံးသည်ဟု ထင်မြင်ကြသဖြင့် အချိန်ကြာလာသည်နှင့်အမျှ ဤဒုတိယ နည်းလမ်း ပေါ်ထွက်လာခြင်း ဖြစ်ပေမည်။

ထို့အပြင် ယှဉ်ပြိုင်မှုကလည်း ပြင်းထန်ပြီး အင်ပါယာ မြို့တော်တွင် အထက်တန်းအဆင့် ဝိညာဉ်လက်နက်များကို ဝယ်ယူနိုင်စွမ်းရှိသော ဆိုင်အများအပြား ရှိနေသဖြင့် ရောင်းချသူများ ကျေနပ်စေရန် သဘာဝကျစွာပင် လိုအပ်ပေသည်။

"အကယ်၍ ဒီမှန်ကို ကျွန်တော်တို့ဆိုင်ကို တိုက်ရိုက်ရောင်းမယ်ဆိုရင် ချက်ချင်းပဲ ဝိညာဉ်ကျောက်တုံး တစ်ထောင့်ကိုးရာ ပေးပါ့မယ်... ကိုယ်စားလှယ်နဲ့ ရောင်းမယ်ဆိုရင်တော့ ဧည့်သည်တော်က ရောင်းရငွေရဲ့ ထက်ဝက်ကိုပဲ ကြိုယူထားလို့ ရပါတယ်"

ဆိုင်ရှင်က ရှင်းပြလိုက်၏။

‘ဝိညာဉ်ကျောက်တုံး တစ်ထောင့်ကိုးရာ…’

ဤဈေးနှုန်းက မနိမ့်သော်လည်း အလွန် မြင့်မားသည်တော့ မဟုတ်ချေ။ ပုံမှန် ဈေးနှုန်းတစ်ခု ဖြစ်သည်။

အကယ်၍ သူက ဤဝိညာဉ်ကျောက်တုံး တစ်ထောင့်ကိုးရာကို ရရှိနိုင်ပါက အစောက ချန်ဖေး ရောင်းချခဲ့သော ဝိညာဉ်ကျောက်တုံးများနှင့် ပေါင်းလိုက်လျှင် ချန်ဖေးသည် ဒွာရသန့်စင်ခြင်း အထွတ်အထိပ်အဆင့်သို့ ကျင့်ကြံရန် အရင်းအမြစ် အနည်းငယ်မျှသာ လိုအပ်ပြီး အားလုံးနီးပါး စုဆောင်းမိပြီ ဖြစ်၏။

သေချာသည်မှာ အခြားသော ဒွာရသန့်စင်ခြင်း နောက်ဆုံးအဆင့်များ အနေဖြင့် ဤဝိညာဉ်ကျောက်တုံးများဖြင့်သာ ဒွာရသန့်စင်ခြင်း အထွတ်အထိပ်အဆင့်သို့ ရောက်ရှိရန် လုံးဝ မဖြစ်နိုင်ချေ။

ကျင့်စဉ်က ကြီးမားသော အကြောင်းရင်း တစ်ခုဖြစ်ပြီး လွှမ်းမိုးနိုင်သော အင်အားစုများသာလျှင် ဒွာရသန့်စင်ခြင်း အထွတ်အထိပ်အဆင့်သို့ ကျင့်ကြံနိုင်သော ကျင့်စဉ်များ ရှိကြသဖြင့် သာမန် ဒွာရသန့်စင်ခြင်း အဆင့်များ အနေဖြင့် ဤအဆင့်သို့ ကျင့်ကြံနိုင်ရန် လုံးဝ မဖြစ်နိုင်ချေ။

ကျင့်စဉ် ရှိလျှင်ပင် ကျင့်စဉ်ကို အထွတ်အထိပ်သို့ နားလည် သဘောပေါက်နိုင်မလား ဆိုသည်မှာလည်း ပြဿနာတစ်ခု ဖြစ်၏။

သေချာသည်မှာ အရေးအကြီးဆုံးမှာ စိတ်စွမ်းအားက လိုက်မီနိုင်မလား ဆိုသည်ပင် ဖြစ်သည်။

ဒွာရများ ဖွင့်လှစ်ခြင်းနှင့် နှိုင်းယှဉ်ပါက စိတ်ဝိညာဉ် ကျင့်ကြံခြင်းက အမှန်တကယ်ပင် အခက်ခဲဆုံး ဖြစ်သည်။

မည်သို့ပင်ဆိုစေ ဒွာရများအတွက် အရင်းအမြစ်များ ရှိပြီး ကျင့်စဉ် နားလည် သဘောပေါက်မှုက လိုက်မီပါက ဖွင့်လှစ်ရန် အတော်လေး လွယ်ကူလှပေသည်။

သို့သော် စိတ်စွမ်းအား ကိုမူ အချိန်ဖြင့်သာ ယူရလေ့ ရှိသည်။

သို့မဟုတ်ပါက လုံလောက်သော စိတ်ဝိညာဉ် ဆေးလုံးများ ရှိရန် လိုအပ်ပြီး စိတ်ဝိညာဉ်ကို အထောက်အကူပြုသော ဆေးလုံးများ၏ ဈေးနှုန်းက မူလစွမ်းအား ဆေးလုံးများထက် များစွာ ပိုမို ဈေးကြီးလှပေသည်။

ထို့ကြောင့် ဤဝိညာဉ်ကျောက်တုံး အရေအတွက်က အခြားသူများအတွက် လုံးဝ မလုံလောက်သော်လည်း ချန်ဖေးတွင် ကျောထောက်နောက်ခံအဖြစ် နှလုံးသားနယ်မြေ ရှိနေသဖြင့် ဒွာရများ ကျင့်ကြံမှုကို အလေးအနက်ထား မြှင့်တင်ရန်သာ လိုအပ်ပေသည်။

"တကယ်လို့ ကိုယ်စားလှယ်နဲ့ ရောင်းချမယ်ဆိုရင် အချိန်ဘယ်လောက် ကြာမလဲ"

ချန်ဖေးက မေးလိုက်၏။ အချိန်က အလွန် ကြာမြင့်မည်ဆိုပါက ချန်ဖေး သဘာဝကျစွာပင် ရွေးချယ်မည် မဟုတ်ချေ။

မည်သို့ပင်ဆိုစေ အင်ပါယာ မြို့တော်တွင် ချန်ဖေးသည် မူလ ဝိညာဉ် ဒီရေ ပြီးဆုံးသည်အထိ အများဆုံး စောင့်ဆိုင်းပြီးနောက် ထွက်ခွာမည် ဖြစ်၏။

"အမြန်ဆုံး သုံးရက်ကနေ အကြာဆုံး ဆယ်ရက်အတွင်း သေချာပေါက် ရလဒ်ထွက်ပါလိမ့်မယ်... အကယ်၍ ရလဒ်မထွက်ဘူးဆိုရင် ဒီဝိညာဉ်လက်နက်ကို ကျွန်တော်တို့ဆိုင်က ဝိညာဉ်ကျောက်တုံး နှစ်ထောင်နဲ့ ဝယ်ယူပါ့မယ်"

ဆိုင်ရှင်က ယုံကြည်မှုရှိစွာဖြင့် ပြောလိုက်သည်။

ချန်းပေါင်ရတနာဆိုင်၏ ဆက်သွယ်မှုနှင့် မူလ ဝိညာဉ် ဒီရေ တို့ကြောင့် အမှန်တကယ်တွင် ဝယ်သူရှာရန် သုံးရက်ပင် မလိုချေ။

မည်သို့ပင်ဆိုစေ အထက်တန်းအဆင့် ဝိညာဉ်လက်နက်များမှာ ရှားပါးလှပြီး ဂိုဏ်းတံခါးကို စောင့်ကြပ်ရန် ဝယ်ယူလိုသော ဂိုဏ်းများ အများအပြား ရှိပေသည်။

"ကောင်းပြီ... အဲဒါဆို ကိုယ်စားလှယ်နဲ့ပဲ ရောင်းချလိုက်မယ်"

ချန်ဖေးက ခေါင်းညိတ်လိုက်၏။

ဤကိုယ်စားလှယ်ဖြင့် ရောင်းချခြင်းကြောင့် အခြား ပြဿနာများ ရှိလာနိုင်မလား ဆိုသည်ကိုမူ...

ချန်ဖေးက အမှန်တကယ်ပင် သူ့အတွက် ပြဿနာလာရှာပြီး နောက်ဆုံး လိုအပ်နေသော အရင်းအမြစ် ကွက်လပ်ကို ဖြည့်ဆည်းပေးမည့် သဘောကောင်းသူ မည်သူဖြစ်မည်နည်း ဟူသည်ကို အမှန်တကယ်ပင် သိချင်နေခဲ့၏။

"ဧည့်သည်တော် ဘယ်မှာ တည်းခိုပါသလဲ... သတင်းရတာနဲ့ ဧည့်သည်တော်ဆီ လူလွှတ်ပြီး အကြောင်းကြားပေးပါ့မယ်"

ဆိုင်ရှင်က ပြုံးလျက် ပြောလိုက်သည်။

"ဖူလိုင် တည်းခိုခန်း... အဲဒီမှာ လာရှာလို့ ရပါတယ်"

"ဖူလိုင် တည်းခိုခန်း ဟုတ်လား... ဧည့်သည်တော်... အင်ပါယာမြို့တော်မှာ မူလ ဝိညာဉ် ဒီရေ နီးကပ်လာပြီဆိုတော့ ကျွန်တော်တို့ဆိုင်ပိုင်တဲ့ တောင်တန်း ရင်းမြစ် တည်းခိုခန်းမှာ အခန်းကောင်း အနည်းငယ် ရှိပါသေးတယ်... ဧည့်သည်တော် အလိုရှိရင် တည်းခိုနိုင်ပါတယ်"

ချန်ဖေးက ဆိုင်ရှင်ကို တစ်ချက် လှမ်းကြည့်လိုက်မိ၏။

ဤစီးပွားရေး လုပ်ငန်းက အမှန်တကယ်ပင် ဝန်ဆောင်မှု အပြည့်အဝ ပေးပေသည်။

ထို တောင်တန်း ရင်းမြစ် တည်းခိုခန်းကို ချန်ဖေး သိထားပြီး မူလ ဝိညာဉ် ဒီရေ ဖြစ်ပေါ်မည့် နေရာနှင့် အလွန် နီးကပ်ကာ လွန်ခဲ့သော လအနည်းငယ် ကတည်းက အခန်းလွတ် မရှိတော့ချေ။

"မလိုအပ်ပါဘူး... သတင်းရရင် လာအကြောင်းကြားပေးဖို့ပဲ လိုပါတယ်"

ချန်ဖေးက လက်ကို ဝှေ့ယမ်းလိုက်ပြီး မတ်တတ်ရပ်ကာ အပြင်ဘက်သို့ လျှောက်သွားခဲ့၏။

ဆိုင်ပေါက်ဝသို့ ရောက်သောအခါ ချန်ဖေး၏ ခြေလှမ်းများ အနည်းငယ် ရပ်တန့်သွားပြီး ဤအခိုက်အတန့်၌ အနည်းငယ် ဆူညံနေသော လမ်းမကို လှမ်းကြည့်လိုက်သည်။

လေထဲတွင် ပုံရိပ် နှစ်ခု လျှပ်တစ်ပြက် ဖြတ်သန်းသွားပြီး မလှမ်းမကမ်းရှိ မြေကွက်လပ်တစ်ခုပေါ်သို့ ကျဆင်းသွားသည်ကို တွေ့လိုက်ရ၏။

မြေကွက်လပ်ဟု ခေါ်ဆိုခြင်းက မတိကျလှဘဲ အမှန်တကယ်တွင် အင်ပါယာ မြို့တော် အတွင်းရှိ အထူး သတ်မှတ်ထားသော သိုင်းပြိုင်ကွင်း တစ်ခု ဖြစ်သည်။

ဤပုံရိပ် နှစ်ခု ဝင်ရောက်သွားသည်နှင့် တစ်ပြိုင်နက် သိုင်းပြိုင်ကွင်း၏ အစီအရင် ထတက်လာပြီး ပတ်ဝန်းကျင်ကို လုံးဝ ကာကွယ်ပေးလိုက်၏။

သို့သော် အချိန်တိုလေး အတွင်းမှာပင် သိုင်းပြိုင်ကွင်း ပတ်လည်တွင် ပွဲလာကြည့်သူများဖြင့် ပြည့်နှက်သွားခဲ့သည်။

အစီအရင်၏ ကာကွယ်မှု ရှိသဖြင့် ဤလူများက ထိခိုက်ဒဏ်ရာ ရမည်ကို မကြောက်ရွံ့ကြချေ။

ချန်ဖေးက အဝေးတွင် ရပ်လျက် အစီအရင်၏ ခွန်အားကို အာရုံခံကြည့်လိုက်၏။

ဤအစီအရင်ကို ထျန်းရှန် အစီအရင် ဟု ခေါ်ပြီး ကာကွယ်ရေး အလွန် အားကောင်းကာ ဒွာရသန့်စင်ခြင်း နောက်ဆုံးအဆင့် မဟုတ်ပါက မချိုးဖျက်နိုင်ချေ။

ဤအခိုက်အတန့်၌ အစီအရင် အတွင်းရှိ လူနှစ်ယောက်၏ ကျင့်ကြံမှုမှာ ဒွာရသန့်စင်ခြင်း အစောပိုင်းအဆင့်တွင်သာ ရှိသဖြင့် အမှန်တကယ်ပင် စိုးရိမ်စရာ မလိုချေ။

"မကြာသေးခင်က ထျန်းယန် တာအိုဆရာ တပည့်လက်ခံတာရယ်... ပြီးတော့ မူလ ဝိညာဉ် ဒီရေကြောင့် ဒီလို ယှဉ်ပြိုင်မှုမျိုးက ရက်အနည်းငယ်ကြာတိုင်း တစ်ကြိမ်လောက် ရှိတတ်ပါတယ်"

ဆိုင်ရှင်က ချန်ဖေး၏ ဘေးတွင် ရပ်လျက် ရှင်းပြလိုက်၏။

ချန်ဖေးက အနည်းငယ် ခေါင်းညိတ်ပြလိုက်သည်။

ဤအခိုက်အတန့်၌ အင်ပါယာ မြို့တော်သည် နှစ်အနည်းငယ် အတွင်း အစည်ကားဆုံး အချိန် ဖြစ်ပေသည်။

ဤအချိန်တွင် နာမည်ကောင်း ရယူခြင်းက အမှန်တကယ်ပင် မိမိ၏ ဂုဏ်သတင်းကို ပြန့်နှံ့စေနိုင်ပေသည်။

သိုင်းပညာလမ်းစဉ်တွင် အချို့လူများက အကျိုးအမြတ်ကို ရှာဖွေကြပြီး အချို့က နာမည်ဂုဏ်သတင်းကို ရှာဖွေကြကာ အချို့ကမူ နာမည်နှင့် အကျိုးအမြတ် နှစ်ခုစလုံးကို ရယူလိုကြ၏။

သိုင်းပြိုင်ကွင်းပေါ်ရှိ လူနှစ်ယောက်ကို ကြည့်ရသည်မှာ အသက်အရွယ် သိပ်မကြီးလှဘဲ ဤအသက်အရွယ်ဖြင့် ဒွာရသန့်စင်ခြင်းအဆင့် ကျင့်ကြံမှု ရှိနေခြင်းက မည်သည့်နေရာတွင်မဆို ပါရမီရှင် ဟူသော အမည်နာမနှင့် ထိုက်တန်ပေသည်။

မကြာမီမှာပင် အားပေးသံများက သိုင်းပြိုင်ကွင်း ပတ်လည်တွင် ပဲ့တင်ထပ်သွား၏။

ချန်ဖေးက အနည်းငယ် ကြည့်ရှုပြီးနောက် စိတ်ဝင်စားမှု ပျောက်ဆုံးသွားကာ လှည့်၍ ဖူလိုင် တည်းခိုခန်း ရှိရာသို့ လျှောက်သွားခဲ့သည်။

ချန်းပေါင်ရတနာဆိုင် ဆိုင်ရှင်သည် တံခါးဝတွင် ရပ်လျက် ချန်ဖေး ထွက်ခွာသွားသည်ကို ကြည့်နေပြီးနောက် ဆိုင်ထဲသို့ ပြန်ဝင်သွားကာ အထက်တန်းအဆင့် ဝိညာဉ်လက်နက် ကိစ္စကို ပင်မမိသားစုထံသို့ သတင်းပို့လိုက်၏။

အထက်တန်းအဆင့် ဝိညာဉ်လက်နက် ကိစ္စက သေးငယ်သော ကိစ္စမဟုတ်ဘဲ ချန်းပေါင်ရတနာဆိုင် နောက်ကွယ်ရှိ ပင်မမိသားစုက လိုအပ်ပါက သူတို့ကိုယ်တိုင် ယူထားနိုင်ပေသည်။

သို့မဟုတ်ပါက မျက်နှာရစေရန်အတွက် အထက်တန်းအဆင့် ဝိညာဉ်လက်နက် အရေးတကြီး လိုအပ်နေသူ အချို့ကို ရောင်းချနိုင်ပေသည်။

လူသတ်ပြီး ရတနာလုယူမည့် ကိစ္စနှင့် ပတ်သက်၍မူ ဆိုင်ရှင်၏ စိတ်ထဲ၌ တစ်ခဏမျှ ထိုအတွေးမျိုး ဝင်လာခဲ့ဖူး၏။

မည်သို့ပင်ဆိုစေ အောင်မြင်ပါက ဝိညာဉ်ကျောက်တုံး နှစ်ထောင်နီးပါး အမြတ်ရမည် မဟုတ်ပါလော။

ချန်းပေါင်ရတနာဆိုင်၏ အရွယ်အစားဖြင့်ပင် ဤဝိညာဉ်ကျောက်တုံး နှစ်ထောင်ကို ရရှိရန် အလွန် ကြာရှည်သော အချိန်ယူရမည် ဖြစ်သည်။

မည်သည့် အင်အားစုအတွက်မဆို ဤသည်က အလွန် ကြီးမားသော သွေးဆောင်မှုတစ်ခု ဖြစ်၏။

သို့သော် ဆိုင်ရှင်က တွေးရုံသာ တွေးခဲ့ပြီး သူ၏ နောက်ကွယ်ရှိ ပင်မမိသားစုက ထိုကဲ့သို့သော လှုပ်ရှားမှုမျိုး ပြုလုပ်လိမ့်မည်ဟု မထင်ခဲ့ချေ။

ထိုသူက အထက်တန်းအဆင့် ဝိညာဉ်လက်နက်ကို ရောင်းချရန် တစ်ယောက်တည်း လာရဲသည်ဆိုတော့ သူက ဒွာရသန့်စင်ခြင်း အလယ်အလတ်အဆင့် ကျင့်ကြံမှုသာ ရှိသော်လည်း ထိုသူတွင် အခြား အပေါင်းအပါများ ရှိမရှိ မည်သူ သိနိုင်မည်နည်း။

ချန်းပေါင်ရတနာဆိုင် တည်ထောင်ခဲ့သည်မှာ နှစ်ပေါင်းများစွာ ကြာမြင့်ခဲ့ပြီဖြစ်ရာ လူသတ်ပြီး ရတနာလုယူသည့် ကိစ္စများကို သဘာဝကျစွာပင် လုပ်ဆောင်ခဲ့ဖူးသော်လည်း ဒွာရသန့်စင်ခြင်းအဆင့် ပါဝင်လာပါက အလွန် သတိထားရမည် ဖြစ်၏။

ဤကဲ့သို့သော အထက်တန်းအဆင့် ဝိညာဉ်လက်နက်များကို လူသတ်ပြီး ရတနာလုယူသည့် ကိစ္စမျိုးကို တစ်ခါမျှ မလုပ်ခဲ့ဖူးချေ။

ဂုဏ်သတင်းနှင့် အနည်းငယ် သက်ဆိုင်သော်လည်း အများစုမှာ သတိထားမှုကြောင့်သာ ဖြစ်ပေသည်။