အခန်း ၁၂၃၁

အခန်း (၁၂၃၁) နတ်ဘုရားမင်းဆက်၏ လမ်းကြောင်းသုံးသွယ် ၂

"မင်း အဲဒီမှာနေသရွေ့၊ အထက် သူတော်စင်ဂိုဏ်းချုပ်နဲ့ အဆက်အသွယ် မလုပ်နိုင်ရင်တောင်၊ အဲဒီဘုန်းကြီးတွေ မင်းကိုအနိုင်ကျင့်နေတာကို သူတို့ လက်ပိုက်ကြည့်နေမှာ မဟုတ်ဘူး။"

"အဲဒီနောက်... မြောက်ပိုင်းတိုက်ကြီးမှာပဲ နေ၊ သိုသိုသိပ်သိပ်နေပြီး ဒုတိယအဆင့်ကို တက်လှမ်းဖို့ နည်းလမ်းရှာ။ ဒီအဆင့်က ကောင်းကင်ကို တက်ရသလိုခက်ခဲတယ်၊ ဒါပေမယ့် မင်းသာ အောင်မြင်သွားရင် မင်းအသက်ကို ကာကွယ်နိုင်လိမ့်မယ်။"

လူသားဧကရာဇ်က ပျင်းရိစွာအကြောဆန့်လိုက်ရာ အရက်ရေစက်များလွင့်စဉ်သွားသည်။ "ဒီသတင်းအချက်အလက်လေးက မင်းရဲ့အောင်မြင်မှုတွေနဲ့ ယှဉ်လို့မရပါဘူး။ ပြောပါ ဧကရာဇ်ချီကလွဲရင် မင်းကို ငါ ဘာကူညီပေးရမလဲ။"

ဤကဲ့သို့ ရက်ရောပုံရသော စကားများ ထပ်မံ ထွက်ပေါ်လာပြန်သည်။

ရှန်းယီက ကူကယ်ရာမဲ့စွာကြည့်လိုက်ပြီး လူသားဧကရာဇ်၏ကပ်စေးနှဲမှုကို အတော်လေး အသားကျနေပြီ ဖြစ်သည်။

နတ်ဆိုးသုတ်သင်ရေးဌာနမှ စုဆောင်းထားသော ကျင့်ကြံသူများအပြင်၊ အင်ပါယာခုံရုံး၏တပ်စွဲထားသော အင်အားစုများနှင့် လူသားဧကရာဇ် ကိုယ်တိုင်၏ကျင့်ကြံခြင်းများ အားလုံးက ကောင်းကင်နှင့် မြေပြင် ဧကရာဇ်ချီမှ ဆင်းသက်လာခြင်းဖြစ်ကြောင်း တစ်ဖက်လူက ထောက်ပြခဲ့ပြီး ဖြစ်သည်။

လုံးဝ ကွဲပြားခြားနားသော လမ်းကြောင်းများ ဖြစ်သည်။

ဤအခြေအနေတွင်၊ တကယ့် အကျိုးအမြတ်များကို မေ့ထားလိုက်ပါ။ ဧကရာဇ် ခြောက်ပါးထဲမှ တစ်ပါးဖြစ်သော ဤပုဂ္ဂိုလ်ကြီးက သူ၏ကျင့်ကြံခြင်းအတွက် လမ်းညွှန်မှုအချို့ပေးရန်ပင် မဖြစ်နိုင်ပေ။

"တိုက်ကြီးလေးခုနဲ့ လမ်းစဉ်သုံးသွယ်ဆီက သတင်းတွေကို ကျွန်တော် အမြဲသိနေဖို့ လိုတယ်။" ရှန်းယီက အလျှော့ပေးလိုက်သည်။

တောင်ပိုင်းတိုက်ကြီးရှိ အဖြစ်အပျက်များကို ကြုံတွေ့ခဲ့ရပြီးနောက် သတင်းအချက်အလက် ကွန်ရက်များ၏အရေးကြီးပုံကို သူ နက်နက်ရှိုင်းရှိုင်း နားလည်သွားခဲ့ပြီး၊ တစ်ခါတစ်ရံတွင် အသုံးဝင်သော မှော်ရတနာလက်နက်များထက်ပင် အသက်ကို ပို၍ကယ်တင်နိုင်ကြောင်း သိရှိသွားသည်။

"ကောင်းပြီ၊ မင်းနဲ့ ဆက်သွယ်ဖို့ သီးသန့် တာဝန်ယူမယ့် မင်းယုံကြည်ရတဲ့ သူတစ်ယောက်ကို အင်ပါယာမြို့တော်မှာ ချန်ထားခဲ့။"

လူသားဧကရာဇ်က ချက်ချင်းသဘောတူလိုက်ပြီးနောက် နောက်ဆုံးတွင် အရက်ကန်ထဲမှ ထွက်လာသည်။ သူက မသိစိတ်အရ မျက်မှောင်ကြုတ်သွားသော်လည်း မကြာမီ သူ၏မျက်နှာပေါ်ရှိ သက်တောင့်သက်သာမရှိမှုကို ဖုံးကွယ်လိုက်ပြီး ကျောက်စိမ်းလင်ပန်းကိုင်ဆောင်ထားသော အပြင်ဘက်ရှိ အစေခံမလေးကို လက်ယမ်းခေါ်လိုက်၏။

လင်ပန်းထဲတွင် ကြိုတင်ပြင်ဆင်ထားသော အရက်ကောင်းများပါရှိသည်။

သူက အရက်ရေစက်များကျနေသော ခန္ဓာကိုယ်ကို ရှေ့တိုးကာ အရက်ခွက် နှစ်ခွက်ကို ကိုယ်တိုင်ကိုယ်ကျငှဲ့ကာ တစ်ခွက်ကို ရှန်းယီထံ ကမ်းပေးရင်း နောက်ပြောင်လိုက်၏။ "စိတ်မပူပါနဲ့၊ ကန်ထဲက ခပ်လာတာမဟုတ်ပါဘူး။"

"..."

ရှန်းယီက အရက်ခွက်ကို ယူကာ သူနှင့်အတူ သောက်လိုက်သည်။

သူ၏အင်္ကျီလက်ဖြင့် နှုတ်ခမ်းထောင့်ကို သုတ်လိုက်ပြီးနောက် လူသားဧကရာဇ်က နောင်တရသည့် အရိပ်အယောင်ဖြင့် သက်ပြင်းချလိုက်၏။ "နှမြောစရာပဲ။ ငါတို့ရဲ့ စိတ်နေစိတ်ထားတွေသာ တူညီခဲ့မယ်ဆိုရင် မင်းရဲ့အကူအညီနဲ့ အောင်မြင်နိုင်ခြေက အနည်းဆုံးနောက်ထပ် ဆယ်ရာခိုင်နှုန်းလောက် တက်လာမှာ။"

ခွပ်..

သူက အရက်ခွက်ကို ချလိုက်ပြီးရေကန်ထဲသို့ ပြန်လှည့်သွားကာ အချိန်အတော်ကြာတုံ့ဆိုင်းနေပြီးနောက် စကားအနည်းငယ် ထပ်ဖြည့်ပြောလိုက်သည်။ "ငါ ကိုင်ဆောင်ထားတဲ့ ဓားကတစ်ချက်ပဲ ခုတ်ခွင့်ရှိတယ်။ဒါက မွေးရာပါ ရက်စက်ကြမ်းကြုတ်မှုကြောင့် မဟုတ်ဘဲ ငါ ရှုံးနိမ့်လို့ မရလို့ပဲ။"

"တောင်ပိုင်းတိုက်ကြီးကို ကယ်တင်ပေးတဲ့အတွက် ကျေးဇူးတင်ပါတယ်။"

"ကောင်းကောင်း ရှင်သန်ပါ။ ဒီလောကကြီးကို ငါ တည်ငြိမ်အောင်လုပ်ပြီးတဲ့အခါ မင်းက ငါ့ နတ်ဘုရားမင်းဆက်ရဲ့ပထမအဆင့် မဟာစစ်သူကြီး အဖြစ် ပြန်လာရမယ်။"

"အကယ်၍ ငါ ရှုံးနိမ့်ခဲ့ရင်... ကျေးဇူးပြုပြီး မသေမျိုးအရှင်ဗောဓိသတ္တ၊ သာမန်ပြည်သူတွေအပေါ် ကရုဏာထားပေးပါ။"

"ဂရုစိုက်ပါ။"

ရှန်းယီကို စကားပြောရန်အခွင့်အရေး ထပ်မပေးတော့ဘဲ လူသားဧကရာဇ်က သူ၏အကြည့်ကို ရုပ်သိမ်းလိုက်ပြီး အစေခံမလေးအား ရှန်းယီကို အပြင်သို့ ပို့ဆောင်ပေးရန် တိုက်ရိုက် တောင်းဆိုလိုက်သည်။

အချိန်ကား ညဉ့်နက်နေလေပြီ..

ရှန်းယီက ခြံဝင်းထဲမှဖြည်းညှင်းစွာ ထွက်လာပြီး လူသူကင်းမဲ့နေသော လမ်းမရှည်ကြီးကို ကြည့်လိုက်၏။ အချိန်အတော်ကြာ တိတ်ဆိတ်နေပြီးနောက် သူက တိုးညှင်းစွာသက်ပြင်းချလိုက်သည်။

"ဟူး။"

အင်ပါယာမြို့တော်သို့ ဤခရီးစဉ်က မည်သည့် တကယ့် အကျိုးအမြတ်မျှမရရှိခဲ့ပုံပေါ်သည်။

သို့သော် လူသားဧကရာဇ်က ဖော်ပြ၍မရနိုင်လောက်အောင် အဖိုးတန်သောလက်ဆောင်တစ်ခုကို ပေးခဲ့ပါသည်။

ရှန်းယီပ တောင်ပိုင်းဍုမေဏုမှ ထွက်ခွာပြီး အစွန်းရှစ်ပါးချိုင့်ဝှမ်းသို့ ဦးတည်ကာ အရပ်ငါးမျက်နှာ ဗောဓိသတ္တကို သတ်ဖြတ်ရန် ရွေးချယ်ခဲ့စဉ်က သူက နတ်ဘုရားမင်းဆက်နှင့် သူ့ကိုယ်သူ ကိုယ်တိုင်ချည်နှောင်ခဲ့ခြင်း ဖြစ်သည်။

သို့သော် လူသားဧကရာဇ်၏နောက်ဆုံးစကားများက ဤကြိုးကိုဖြည်ပေးခဲ့ပြီး သူ့ကို လွတ်လပ်ခွင့် ပေးခဲ့သည်။

ဘက်ရွေးချယ်ရန် မလိုတော့ဘဲ ငြိမ်းချမ်းစွာ ရှင်သန်ရန်သာဖြစ်သည်။

မည်သည့်ဘက်က နိုင်သည်ဖြစ်စေ ရှန်းယီက အနိုင်ရသူအဖြစ်ဆက်လက် တည်ရှိနေမည်။ နတ်ဘုရားမင်းဆက်၏မဟာစစ်သူကြီးအဖြစ် ရှေ့ဆက်နိုင်သကဲ့သို့ ဗောဓိဂိုဏ်း၏ကျားနဂါးဖိနှိပ်ခြင်း ဗောဓိသတ္တ သို့မဟုတ် မသေမျိုးသုံးပါးဂိုဏ်း၏ထိုက်ရွှီ ဆေးဧကရာဇ် အဖြစ်သို့လည်း ဆုတ်ခွာနိုင်ပါသည်။

လူသားဧကရာဇ်၏ရည်ရွယ်ချက်မှာ ရှင်းလင်းသည်။ တောင်ပိုင်းတိုက်ကြီးကို ကယ်တင်ခြင်းက လုံလောက်ပြီဖြစ်ပြီး ကျန်တာက သူ့အပေါ်မှာသာ မူတည်သည်။

"..."

ရှန်းယီ၏အမူအရာက ရှုပ်ထွေးလာခဲ့၏။ အရေးမပါသည့်နေရာမှထွက်ပေါ်လာသူ တစ်ဦးအနေဖြင့် လောကကြီးကို စစ်တုရင်ခုံတစ်ခုအဖြစ် မြင်ပြီး သက်ရှိများကို စစ်တုရင်ရုပ်များအဖြစ် ရှုသော လူသားဧကရာဇ်ကဲ့သို့ သူရဲကောင်းတစ်ဦးအပေါ် ချစ်ခင်နှစ်သက်မှု ထားရှိရန်ခက်ခဲသည်။

မည်သို့ပင်ဆိုစေ မည်သူမျှစတေးခံရသော နယ်ရုပ် မဖြစ်ချင်ကြပေ။

သို့သော် ရှုပ်ထွေးမှုမှာ အချိန်အတော်ကြာ တွေးတောပြီးနောက်တွင်ပင် ရှန်းယီက အောင်ပွဲဆီသို့ သွားမည့်အခြားလမ်းကြောင်းတစ်ခုကို မစဉ်းစားနိုင်ခဲ့ပေ။

ဆန့်ကျင်ဘက်တွင် မရေမတွက်နိုင်သော ဧကရာဇ်များ၊ အစစ်အမှန် ဗုဒ္ဓများ၊ ဂိုဏ်းချုပ်ခြောက်ဦး ရှိနေစဉ် နတ်ဘုရားမင်းဆက်၏သက်ရှိများ အနောက်တွင်မူ ဧကရာဇ်ခြောက်ပါးထဲမှ တစ်ပါးတည်းသာ ရှိသည်။

လူသားဧကရာဇ်က ပထမအဆင့် ခွန်အားကို ပိုင်ဆိုင်ထားသော်လည်း နတ်ဘုရားမင်းဆက် ဝါးမြိုခံရသည်ကို ကူကယ်ရာမဲ့စွာဖြင့်သာ ကြည့်နေနိုင်သည်။ ထို့အပြင် သူ၏သက်တမ်းက အခြား ဂိုဏ်းချုပ်များ၊ ဧကရာဇ်များ သို့မဟုတ် ဒုတိယအဆင့် မဟာလွတ်လပ်ခြင်းရှိသူများနှင့် နှိုင်းယှဉ်ပါကများစွာ လျော့နည်းပြီး တာ့လော်မသေမျိုး တစ်ပါးထက်ပင် ပို၍ကြာရှည်မခံပေ။

သူသေဆုံးသွားပြီးနောက် နောက်လူသားဧကရာဇ်ကရော ဓားကို ကောက်ကိုင်ရန် သတ္တိရှိပါဦးမည်လော။

ထို့အပြင်..

ရှန်းယီက မိမိကိုယ်ကိုကာကွယ်ရန် ခက်ခဲနေချိန်တွင်ပင် တစ်ဖက်လူ၏မျှော်လင့်ချက်များဝန်ထုပ်ဝန်ပိုးများကိုခံစားခဲ့ရပြီး သူ၏အိမ်ကို အခြားသူများဖျက်ဆီးမည်ကို စိုးရိမ်နေခဲ့ခြင်းဖြစ်သည်။

တာဝန်များအားလုံးကို ယူပြီး သူ၏အသက်ကို ကယ်တင်ရန်အမြန်ထွက်သွားရန် တိုက်တွန်းသူမျိုးကို သူရှားရှားပါးပါးသာကြုံတွေ့ခဲ့ဖူးသည်။

ဤမျှော်လင့်မထားသော သက်သာရာရမှုက အမှန်တကယ်ပင် ရှားပါးလှသည်။

"ဟူး။"

ရှန်းယီ လမ်းမရှည်ကြီးအတိုင်း ဆက်လျှောက်သွားရာ သူ၏မျက်လုံးများထဲရှိ ဇဝေဇဝါဖြစ်မှုများ လျော့ကျသွားသည်။

သူက လူသားဧကရာဇ်၏အတွေးများကို နားလည်နိုင်သော်လည်း လိုက်နာ၍ မရနိုင်ပေ။ မတူညီသောသဘောထားများကြောင့်မဟုတ်ဘဲ မတူညီသော စံနှုန်းများကြောင့်သာဖြစ်ပြီး ၎င်းမှာ ပုံမှန်ပင်။

ထို့ကြောင့် တစ်ဖက်လူမှာ လူသားဧကရာဇ်၊ သူရဲကောင်းတစ်ဦးဖြစ်ပြီး သူကမူ ဖြစ်နိုင်သည့် အရာများကိုသာ လုပ်ဆောင်နိုင်စွမ်းရှိသော သာမန်ပုဂ္ဂိုလ်လေးတစ်ဦးအဖြစ် ဆက်လက် တည်ရှိနေသည်။

ဧကရာဇ် ခြောက်ပါးထဲမှ တစ်ပါး၏လမ်းညွှန်မှုဖြင့် ရှန်းယီ၏အတွေးများ များစွာ ပိုမို ရှင်းလင်းလာပါသည်။

သူ ယဲ့လန်ကို သွားရှာတော့မည့် အချိန်တွင် အရှေ့၌ ရထားလုံးတစ်စီး ဖြည်းညှင်းစွာ ရပ်တန့်သွားပြီး သူ၏လမ်းကို ပိတ်ဆို့လိုက်သည်ကို မြင်လိုက်ရ၏။

"စစ်သူကြီးနန်ယန်"

ရထားလုံးပေါ်မှပိန်ပါးသော ပုံရိပ်တစ်ခု ဆင်းလာပြီး ခေါင်းညိတ်ကာ ရှန်းယီကိုပြုံးပြလိုက်သည်။ "မသေမျိုးဌာနက လင်ရှုးယာပါ၊ ကျုပ်တို့ ပြီးခဲ့တဲ့အကြိမ်က ရေကန်ဘေးမှာ တွေ့ခဲ့ကြတယ်။"

ထိုသို့ပြောပြီးနောက် သူက ကျောက်စိမ်းပြား တစ်ချပ်ကို ကမ်းပေးလိုက်၏။ "ဒါက လင်းရွှီကျစ်ရဲ့ ဂူတည်နေရာပါ၊ အရှင်မင်းကြီးက မင်းကို ပေးလိုက်ခိုင်းလို့ပါ။"

"ကျေးဇူးတင်ပါတယ် သခင်ကြီးလင်။"

ရှန်းယီက ကျောက်စိမ်းပြားကို ယူပြီး ဂရုတစိုက် သိမ်းဆည်းလိုက်၏။ သူ ပြန်မော့ကြည့်လိုက်သောအခါ လင်ရှုးယာက ထွက်သွားမည့် အရိပ်အယောင်မပြဘဲ ရထားလုံးဆီသို့ လက်ဆန့်တန်းကာ နွေးထွေးစွာပြောလာသည်ကို တွေ့လိုက်ရသည်။ "စစ်သူကြီးနန်ယန် ထွက်ခွာတော့မယ်ဆိုတာ ကျွန်တော် သိပါတယ်၊ ကျွန်တော် အချိန်မဆွဲရဲပါဘူး။ မိုးမလင်းသေးတော့ စစ်သူကြီးကိုကျွန်တော့် စံအိမ်မှာ စကားပြောဖို့ ဖိတ်ခေါ်ချင်ပါတယ်။"

သူ စကားပြောနေစဉ် လင်ရှုးယာက သူ၏ရှေ့ရှိ လူငယ်လေးကို လေးနက်စွာ လေ့လာနေသည်။

ထိုအစီရင်ခံစာတွင် အရှင်မင်းကြီး တစ်ခုခု မှားယွင်းနေကြောင်း သတိထားမိရုံသာမက သူကိုယ်တိုင်လည်း စာကြောင်းများကြားရှိ ထူးဆန်းမှုတစ်ခုကိုခံစားမိခဲ့ပြီး စကားလုံးတိုင်းက ကျောချမ်းဖွယ်ရာကိုကိုယ်စားပြုနေသည်။

ရေကန်ဘေးရှိ အစေခံမလေး၏အစီရင်ခံစာအရ ဤစစ်သူကြီးက အရှင်မင်းကြီးနှင့် မတူညီသော အယူအဆများ ရှိနေပုံရသည်။

ဤသည်က လင်ရှုးယာ၏ယခင် သံသယနှင့် အမှန်တကယ်ပင် ကိုက်ညီနေသည်။

တောင်ပိုင်းတိုက်ကြီးကို ရေနှင့်မီး ဘေးမှ ကယ်တင်ခဲ့သော အမြင့်မြတ်ဆုံး ကောင်းကင်ပါရမီရှင်တစ်ဦးအနေဖြင့် ဤကဲ့သို့သော လူတစ်ယောက်က အရှင်မင်းကြီး၏ယုတ္တိမတန်ပြီး ရူးသွပ်သောအစီအစဉ်များကို မည်သို့ သည်းခံနိုင်မည်နည်း။

ရှန်းယီ တိတ်ဆိတ်နေသည်ကို မြင်သောအခါ သူက အတင်းပြုံးလိုက်၏။ "စကားပြောရုံ သက်သက်ပါ၊ တခြား ဘာမှမရှိပါဘူး။ တစ်ခါတစ်လေ... ကျုပ်တို့က မဟာမိတ်တွေဖြစ်နိုင်တယ်လေ။"

ဤစကားကို ကြားသောအခါ ရှန်းယီက ရုတ်တရက် ရယ်မောလိုက်၏။

လင်ရှုးယာ မှင်တက်သွားကာ သူ၏အပြုံးက တောင့်တင်းသွားသည်။ "စစ်သူကြီးနန်ယန် ဘာလို့ ရယ်တာလဲ။"

"ဘာမှမဟုတ်ပါဘူး။"

ရှန်းယီက ခေါင်းခါလိုက်၏။ မကြာမီက စကားပြောဆိုမှုက တစ်ဖက်လူ၏နားထဲသို့ မည်မျှလျင်မြန်စွာရောက်ရှိသွားသနည်း ဆိုသည်ကို အံ့သြနေမိရုံသာဖြစ်ပြီး ဤအရာ၏ပုံမှန်မဟုတ်သော အခြေအနေကိုပြန်လည် တွေးတောမိခြင်းဖြစ်သည်။

အထူးသဖြင့် ထိုသူက လူသားဧကရာဇ်က အယုံကြည်ရဆုံးသော မသေမျိုးဌာန၏အကြီးအကဲ ဖြစ်နေခြင်းကြောင့်ပင်။

"ကျွန်တော်က တစ်ယောက်တည်း လျှောက်ရတာ ပိုအသားကျတယ်။"

ရှန်းယီက လင်ရှုးယာ၏ကမ်းလှမ်းမှုကို ယဉ်ကျေးစွာ ငြင်းပယ်လိုက်ပြီး ရထားလုံးကို ကွေ့ပတ်ကာ လျှောက်သွားလိုက်၏။

ဤအင်ပါယာမြို့တော်၏နက်ရှိုင်းမှုက သူ၏စိတ်ကူးထက် ကျော်လွန်နေပါသည်။

အသက်အန္တရာယ်ရှိသော ဤအခြေအနေများတွင် ရှန်းယီက သူတို့၏ခံယူချက်ဆိုင်ရာ အငြင်းပွားမှုများတွင် ပါဝင်ပတ်သက်ရန် ဆန္ဒမရှိပေ။

"..."

လင်ရှုးယာက မလှုပ်မယှက်ရပ်နေပြီး ရှန်းယီ၏ပုံရိပ် ညအမှောင်ထဲတွင် ပျောက်ကွယ်သွားသည်အထိ တိတ်ဆိတ်စွာ စောင့်ကြည့်နေခဲ့သည်။

သူက မျက်လွှာချလိုက်ပြီး လက်ကို ရုပ်သိမ်းလိုက်၏။

အချိန်အတော်ကြာပြီးနောက် ပိန်ပါးသော လူလတ်ပိုင်းအမျိုးသားက ရုတ်တရက်လှောင်ပြောင်လိုက်သည်။

"ဟမ့်။"

အမှန်တကယ်ပင် ဤရာထူးမြင့်မားသူများ အားလုံးသည် အတူတူပင်။ လောက၏လုံခြုံရေးထက် သူတို့ကိုယ်ပိုင်ကျင့်ကြံခြင်းကို ပို၍ အရေးကြီးသည်ဟု သတ်မှတ်ကြသည်။

နတ်ဘုရားမင်းဆက်က အပျက်အစီးများကြားတွင် ရှိနေသော်လည်း သူတို့၏နှလုံးသားများက ထုတ်ပေးခြင်းမရှိသေးသော ထိုဧကရာဇ်ချီ ဆုလာဘ်အပေါ်တွင်သာ စွဲလမ်းနေကြဆဲပင်။

ဒါက ရန်ငြိုးဖွဲ့နေတာပဲ။

အကယ်၍ တစ်စုံတစ်ဦးက အမှန်တကယ် ကယ်တင်လိုပြီးလွတ်မြောက်ခြင်းကို ပေးစွမ်းချင်ပါက မိမိကိုယ်တိုင်ကဲ့သို့ သာမန်လူများကိုသာ အားကိုးရပါလိမ့်မည်။

သာမန်လူများကသာ အခြားသူများကို လူများဟု မြင်ကြပေ၏။

"သခင်ကြီး၊ဒီစစ်သူကြီးရဲ့ မကျေနပ်မှုကို ပြေလျော့သွားအောင် တခြားတိုက်ကြီးတွေဆီက ဧကရာဇ်ချီဝေစုတစ်ခုကို လွှဲပြောင်းပေးရမလား။" ရထားလုံးမောင်းနှင်နေသော မသေမျိုးဌာန အရာရှိက တိုးညှင်းစွာ မေးလိုက်သည်။

"မလိုပါဘူး။"

လင်ရှုးယာ၏အမူအရာက တည်ငြိမ်နေဆဲဖြစ်ပြီး သူလှည့်ကာကုလားကာကို မတင်ပြီး ရထားလုံးပေါ်သို့ တက်လိုက်၏။ "ငါ အကဲဖြတ်တာ မှားသွားတယ်၊ သူက ငါရှာနေတဲ့ လူစားမျိုး မဟုတ်ဘူး။"