အခန်း ၁၂၃၃

အခန်း (၁၂၃၃) အဆင်မပြေသော အစ

ထိုအချိန်တွင် သာယာသော ကြိုးကြာငှက် အော်သံတစ်ခု ကောင်းကင်မှ ပဲ့တင်ထပ်လာပြီး အတောင်ပံခတ်သံများနှင့်အတူ ထွက်ပေါ်လာသည်။ စီးဆင်းနေသော အလင်းတန်းတစ်ခု ကျဆင်းလာပြီး နှုတ်ခမ်းနီနီ၊ သွားဖြူဖြူနှင့် အဖြူအမည်း ငှက်မွေးဝတ်ရုံဝတ်ဆင်ထားသော လူငယ်တစ်ဦးအဖြစ် ပြောင်းလဲသွား၏။

"မသေမျိုးဆရာသခင် နှစ်ပါးကို ဂါရဝပြုပါတယ်။" ထိုလူငယ်က ရိုသေစွာဦးညွှတ်လိုက်၏။ တောင်ပိုင်းတိုက်ကြီးတွင် ရှိစဉ်က သူ၏ပျင်းရိပြီး ပေါ့ပေါ့ဆဆနေတတ်သော အမူအရာနှင့် လုံးဝ ကွဲပြားခြားနားနေခဲ့သည်။

"ဒီလောက် တရားဝင် ဖြစ်နေစရာ မလိုပါဘူး ကလေးငယ်။" အစစ်အမှန်အရှင် ယွင်မြောင် က ခေါင်းကိုအနည်းငယ်ညိတ်ပြပြီး တုံ့ပြန်သည့်အနေဖြင့် လက်ကိုမြှောက်လိုက်သည်။

တစ်ဖက်လူက နတ်ဆိုးမျိုးနွယ်မှ ဖြစ်သော်လည်း သူသည် တပည့်တစ်ဦးမဟုတ်ဘဲ အကြီးအကဲ ချင်းကွမ်း လက်အောက်မှလူတစ်ဦး ဖြစ်သည်။

ဤသည်မှာ နတ်ဆိုးမျိုးနွယ် အများစုအတွက် အကောင်းဆုံးလမ်းကြောင်းပင်။

ထို့အပြင် သူက နှစ်ပေါင်းများစွာ ကျင့်ကြံခဲ့ပြီး ယွင်မြောင် ကိုယ်တိုင်နှင့် ယှဉ်ပြိုင်နိုင်လောက်အောင် နက်ရှိုင်းသော နယ်ပယ်များကို ရရှိထားပြီး ဖြစ်သည်။ သူ၏ သခင်သည် ယွင်မြောင် ၏ စီနီယာ ဦးလေး ဖြစ်ပြီး ဂိုဏ်းတွင်း သူ၏နေရာက ယွင်မြောင်၏ဆရာထက်ပင် သိသာထင်ရှားစွာ သာလွန်သည်။

ဘုန်းကြီးကို မလေးစားလျှင်ပင် ဘုရားကိုတော့ ရိုသေရမည်။

ထို့ကြောင့် အစစ်အမှန်အရှင် ယွင်မြောင်က မမောက်မာခဲ့ပေ။ သူက တိုးညှင်းစွာ ပြောလိုက်သည်။ "ကောင်လေး ငါ့ လင်းရွှီဂူကို လာတာ၊ အကြီးအကဲချင်းကွမ်းဆီက အမိန့်စာ ပါလာလို့လား။"

လင်းစုက နှုတ်ခမ်းဆူလိုက်ပြီး ထျန်းယွမ် စံအိမ်အကြောင်း တွေးမိကာ အနည်းငယ် စိတ်မရှည် ဖြစ်နေသော်လည်း သူမ၏ စီနီယာ အစ်ကိုရှေ့တွင် မလုပ်ရဲသဖြင့် မျက်နှာတွင် အတင်းပြုံးထားကာ နောက်ကွယ်တွင် တိတ်တဆိတ် ခြေဆောင့်နေသည်။

"မဟုတ်ပါဘူး၊ အမိန့်စာ မဟုတ်ပါဘူး။ မကြာသေးခင်က တောင်ပိုင်းတိုက်ကြီးက လူတစ်ယောက် လင်းရွှီဂူကို ရောက်လာသေးလားဆိုပြီး မေးခွန်းတစ်ခု မေးရုံသက်သက်ပါ။" ကြိုးကြာကလေး က တောင်ပေါ်သို့ လှမ်းကြည့်လိုက်၏။

"တောင်ပိုင်းတိုက်ကြီး"

ဤစကားကို ကြားသောအခါ လင်းစုက တစ်ခဏတာ မှင်တက်သွားပြီး မသိစိတ်အရ သူမ၏စီနီယာ အစ်ကိုကို ကြည့်လိုက်သည်။

"အမှန်ပါပဲ၊ ကျင့်ကြံသူ တစ်ယောက် ရောက်လာပြီး ထိုက်ရွှီနတ်ဘုရားမျိုးဆက် ကလို့ ဆိုတယ်။ ဒီလူက ချင်းကွမ်းဂူ နဲ့ အဆက်အသွယ် ရှိလို့လား။" ယွင်မြောင်က လင်းရွှီဂူ၏ စီနီယာ အစ်ကိုဖြစ်ရာ သူ၏တုံ့ပြန်မှုတွင် ထက်မြက်ပြီး သတင်းအချက်အလက်များများစားစား မထုတ်ဖော်ဘဲ မတူညီသော တုံ့ပြန်မှုများကို အသုံးပြုနိုင်ရန် ပြန်လည်မေးခွန်းထုတ်လိုက်သည်။

"မရှိပါဘူး၊ သူက ငါတို့ရဲ့ အစစ်အမှန်အရှင် နဲ့ ဘာအဆက်အသွယ်မှ မရှိပါဘူး။" ကြိုးကြာကလေး က ရယ်မောကာ ခေါင်းခါလိုက်သည်။

"ကျွန်တော် ကိုယ်တိုင် စူးစမ်းချင်လို့ပါ။ အခု သူ ဘယ်လိုနေလဲ။"

"ဟူး။"

ထိုသူက အကြီးအကဲ ချင်းကွမ်း နှင့် မည်သည့် ပတ်သက်မှုမျှ မရှိကြောင်း သိလိုက်ရသဖြင့် လင်းစု က သက်သာရာရစွာ သက်ပြင်းချလိုက်ပြီး ဖြတ်ပြောလိုက်သည်။ "သူ့ကို အနားယူဖို့ နှစ်ရက်လောက် နေခွင့်ပြုလိုက်တယ်၊ ဒါပေမယ့် အခု သူ ဘယ်ရောက်နေလဲဆိုတာ သေချာ မသိဘူး။ ထွက်သွားလောက်ပြီ... နင်က လင်းရွှီဂူကို ပိုးကောင်နတ်ဆိုးတစ်ကောင်နဲ့ ပတ်သက်ဖို့ အတင်းအကျပ်ဖိအားမပေးလောက်ဘူး မဟုတ်လား။"

သူမက ဟန်ဆောင်အပြုံးဖြင့် လှမ်းကြည့်လိုက်၏။

ကြိုးကြာကလေးက တောင်ပိုင်းတိုက်ကြီးသို့ သွားရောက်ခဲ့ပြီး ထိုကျင့်ကြံသူနှင့် တွေ့ဆုံခဲ့ပုံရသဖြင့် သူမက တစ်ဖက်လူဆက်ပြောရန်စကားလမ်းကြောင်းကိုကြိုတင် ပိတ်ထားလိုက်သည်။

"ဘယ်လိုလုပ် အဲဒီလို ဖြစ်နိုင်မှာလဲ။" ကြိုးကြာကလေး က လင်းစု၏ ရည်ရွယ်ချက်ကို နားလည်ပြီး သူ၏အပြုံးက မပြောင်းလဲဘဲ ပေါ့ပေါ့ပါးပါး ပြောလိုက်၏။

"ကျွန်တော် တောင်ပိုင်းတိုက်ကြီးက ကျောက်စိမ်းရေကန် နဲ့ ရှန်းတောင်တို့နဲ့ ရက်အနည်းငယ်လောက် စကားပြောဖြစ်ပြီး အကြောင်းအရာ အများကြီး ကြားခဲ့ရတယ်။ တောင်ပိုင်းဍုမေဏုမှာ ကျားနဂါးဖိနှိပ်ခြင်း ဗောဓိသတ္တ လို့ခေါ်တဲ့ ကောင်းကင်ပါရမီရှင် လူငယ်တစ်ယောက် ပေါ်ထွက်လာတယ်လို့ ဆိုကြတယ်။"

"ဒီလူက ရက်စက်တဲ့စိတ်နေစိတ်ထား ရှိပြီး ယုံကြည်မှုစွမ်းအားအတွက် ယှဉ်ပြိုင်ဖို့ တစ်ဂိုဏ်းတည်းက ဂိုဏ်းတူဗောဓိသတ္တတွေကို အဆင်အခြင်မဲ့ သတ်ဖြတ်ခဲ့တယ်။ သူ တစ်ယောက်တည်းက တတိယအဆင့် ကျွမ်းကျင်သူ ခြောက်ယောက်ကို တစ်ပြိုင်နက်တည်း ရင်ဆိုင်ခဲ့ပြီး အဲဒီအထဲမှာ အစစ်အမှန်အရှင် ချီးမြှင့်ထားတဲ့ မှော်ရတနာလက်နက်တွေကို ကိုင်ဆောင်ထားတဲ့ ငါတို့ ဂိုဏ်းက နှစ်ယောက်လည်း ပါဝင်တယ်။"

"ဗောဓိသတ္တတွေ အားလုံး သေဆုံးသွားခဲ့ပြီး တောင်ပိုင်းဍုမေဏုကနေ ဖြတ်သွားတဲ့ ကိုးနှင့်ကိုး အသွင်ပြောင်းလဲခြင်း အဆုံးစွန်မဟာနတ်ဆိုးကြီး တစ်ကောင်က နဂါးဖိနှိပ်ခြင်းရဲ့ အာရုံစိုက်မှုကို ဆွဲဆောင်ပြီး သူ့ကိုလိုက်မဖမ်းခဲ့ရင် ရှန်းတောင် နဲ့ ကျောက်စိမ်းရေကန်တို့လည်း သေဆုံးသွားခဲ့ရမှာပဲ။"

"..."

အစစ်အမှန်အရှင် ယွင်မြောင် က တိတ်ဆိတ်စွာ နားထောင်နေပြီး သူ၏မျက်လုံးများထဲတွင် ရှုပ်ထွေးသော အမူအရာတစ်ခု လင်းလက်သွားသည်။ "သတင်းလာပေးတဲ့အတွက် ကျေးဇူးတင်ပါတယ်။"

မြောက်ပိုင်းတိုက်ကြီးက နတ်ဘုရားမင်းဆက်၏ လေးပုံတစ်ပုံကိုသာ နေရာယူထားပြီး မသေမျိုးသုံးပါးဂိုဏ်း၏ကျယ်ပြန့်သော အင်အားစုက နေရာအနှံ့ ပြန့်နှံ့နေရန် မဖြစ်နိုင်ပေ။

ထိုဘုန်းကြီးများ၏ အခြေခံအုတ်မြစ်ကို ကြိုတင် နားလည်ထားခြင်းက အကျိုးရှိသည်။

သို့သော် လင်းစု မှာမူ ဤကိစ္စများသည် သူမနှင့် မသက်ဆိုင်ပုံရသဖြင့် အနည်းငယ် စိတ်လွင့်နေသည်။

ထိုစဉ် ကြိုးကြာကလေး က နောက်တစ်ကြိမ် ခေါင်းခါလိုက်၏။ "မသေမျိုးဆရာသခင် ယွင်မြောင် နားလည်မှု လွဲနေပြီ။ ကျွန်တော့မှာ ပြောစရာ ရှိပါသေးတယ်။"

သူတို့နှစ်ဦး၏ဇဝေဇဝါဖြစ်နေသော အကြည့်အောက်တွင်..

သူက အနည်းငယ် လေးနက်သွားသည်။ "ကျောက်စိမ်းရေကန်ရဲ့ အဆိုအရ မဟာတောင်ပိုင်းတိုက်ကြီးမှာရှိတဲ့ မသေမျိုးအရှင်ဗောဓိသတ္တ အားလုံးထဲမှာ သူမနဲ့ ရှန်းတောင် မတော်တဆ လွတ်မြောက်လာတာကလွဲရင် နဂါးဖိနှိပ်ခြင်း နဲ့ ရင်ဆိုင်ရတာကနေ ရှန်းရွှီတောင်က ထိုက်ရွှီ ဆေးဧကရာဇ် တစ်ယောက်တည်းသာ အသက်ရှင်ကျန်ရစ်ခဲ့တယ်။"

"ဒါ့အပြင် ထိုက်ရွှီဆေးဧကရာဇ် ဟာ နဂါးဖိနှိပ်ခြင်း လိုပဲ လူငယ်မျိုးဆက်ကဖြစ်ပြီး လျင်မြန်စွာ တိုးတက်လာခဲ့တယ်။ တောင်ပိုင်းတိုက်ကြီးရဲ့ သတင်းစကားအချက်တွေအရဆိုရင် သူ့ရဲ့ ပါရမီက နဂါးဖိနှိပ်ခြင်း နဲ့ ယှဉ်နိုင်တယ်၊ ငါတို့ ဂိုဏ်းနဲ့ အလှမ်းဝေးလို့သာ ရှုံးနိမ့်သွားတာ ဖြစ်နိုင်ပြီး နဂါးဖိနှိပ်ခြင်း ကတော့ တောင်ပိုင်းဍုမေဏုရဲ့ အခြေခံအုတ်မြစ်ကနေ အကျိုးအမြတ် ရရှိနေတာပဲ။"

"သူက ချင်းကွမ်းဂူကို မသွားတဲ့အတွက် လင်းရွှီဂူကို ရောက်လာတာလို့ ကျွန်တော် သံသယရှိပါတယ်။"

"ဒါ..."

အစစ်အမှန်အရှင် ယွင်မြောင်က ကြိုးကြာကလေး၏ အဓိပ္ပာယ်ကို ဝေဝါးဝါး နားလည်သွားသော်လည်း အလျင်စလို ကောက်ချက်မချခဲ့ပေ။

"အကြီးအကဲ ချင်းကွမ်း က ဒီလူကို တပည့်အဖြစ် လက်ခံချင်လို့ မင်းကို သူ့ဆီလမ်းညွှန်ဖို့ လွှတ်လိုက်တာလို့ ဆိုလိုတာလား။"

"ဟူး။"

ယွင်မြောင်၏ စူးစမ်းမေးမြန်းမှုကြောင့် ကြိုးကြာကလေး က သက်ပြင်းမချဘဲ မနေနိုင်ခဲ့ပေ။

လင်းရွှီဂူ၏ ဤစီနီယာ တပည့်၏ခွန်အားမှာ ချီးကျူးဖွယ်ကောင်းသော်လည်း သူ၏ကြောက်ရွံ့တတ်မှုနှင့် ဆုံးဖြတ်ချက်မပြတ်သားမှုတို့က တူညီသောနယ်ပယ်ရှိ အခြား တပည့်များနှင့် နှိုင်းယှဉ်ပါက သူ၏ဂုဏ်သတင်းကို ထိခိုက်စေသည်။

"အစစ်အမှန်အရှင်က သူ့ရဲ့ ဂုဏ်သိက္ခာကို တန်ဖိုးထားပြီး တပည့်တွေ ထပ်လက်ခံဖို့ ရည်ရွယ်ချက် မရှိပါဘူး။"

သူက တိုက်ရိုက် ငြင်းဆိုလိုက်သည်။ "ကျွန်တော်က သတင်းလာပေးရုံ သက်သက်ပါ၊ ဘယ်လို ရှေ့ဆက်ရမလဲ ဆိုတာကတော့ မသေမျိုးဆရာသခင် အပေါ်မှာပဲ မူတည်ပါတယ်။"

"..."

စကားမဆုံးမီမှာပင် အစစ်အမှန်အရှင် ယွင်မြောင်၏ အမူအရာက အနည်းငယ် မှောင်မိုက်သွားခဲ့ပြီ ဖြစ်သည်။

ကြိုးကြာကလေး၏ စကားများက ယဉ်ကျေးပုံရသော်လည်း ၎င်းတို့၏အဓိပ္ပာယ်မှာ ရှင်းလင်းနေသည်။

ဤလူက တန်ဖိုးရှိသည့် မျိုးဆက်တစ်ခုပင်။

သို့သော် ချင်းကွမ်းဂူက ဂုဏ်သိက္ခာပိုင်းဆိုင်ရာ စိုးရိမ်မှုများကြောင့် သူ့ကိုငြင်းပယ်ပြီး လင်းရွှီဂူက သူ့ကို လက်ခံလိမ့်မည်ဟု မျှော်လင့်နေပါသည်။

အကြီးအကဲ ချင်းကွမ်း၏ အဆင့်အတန်းအရ သူသည် ဂုဏ်သိက္ခာကို ရွေးချယ်နိုင်သော အခွင့်အရေးရှိပြီး သူ့တွင် တပည့်များ မရှားပါးပေ။ သို့သော် လင်းရွှီဂူက ဟိုမရောက်ဒီမရောက် ဖြစ်နေသဖြင့် ရွေးချယ်စရာမလိုဘဲ မျိုးစေ့ကောင်းများဖြင့် အခွင့်အရေးကို ဆုပ်ကိုင်သင့်သည်။

ကြိုးကြာကလေးက တောင်ပိုင်းတိုက်ကြီးနှင့် ပတ်သက်သောအမိန့်စာ ပြဿနာကြောင့် စေလွှတ်ခံရခြင်း ဖြစ်နိုင်သည်။ အကယ်၍ လျစ်လျူရှုထားပါက ကောလာဟလများက အကြီးအကဲချင်းကွမ်း၏ နာမည်ကို ထိခိုက်စေမည်ဖြစ်ရာ လင်းရွှီဂူက ၎င်းကို စီမံခန့်ခွဲသင့်သည်။

"ငါ နားလည်ပါပြီ။"

အစစ်အမှန်အရှင် ယွင်မြောင် က ခေါင်းညိတ်ပြီး နှုတ်ဆက်ရန် သူ၏လက်ကို မြှောက်လိုက်၏။