အခန်း ၈၂၅

အခန်း (၈၂၅) - ကျန်းငါးထောင်ရှည်သော ကံကြမ္မာရွှေနဂါး၊ လူသားမျိုးနွယ်၏ ကံကြမ္မာအား စုစည်းခြင်းနှင့် သတ္တမအဆင့် အစီအရင်ပညာရှင် (၅) ။

မရေမရာသော အနာဂတ်ထဲ၌ ကြီးမားလှသော ကပ်ဘေးကြီးတစ်ခုက ဖုန်းရှီးမြို့တော်တစ်ခုလုံးကို လွှမ်းခြုံကာ မကြာမီ ကျရောက်တော့မည်ကို သူမ မြင်တွေ့လိုက်ရသကဲ့သို့ ရှိသည်။

ထိုအချိန်တွင် သူမသည်လည်း မိမိ၏အမျိုးသားကို အလွန်အံ့ဩစွာ စိုက်ကြည့်မိသွား၏။

အမှန်အတိုင်းဆိုရလျှင် သူမသည် ဤအမျိုးသားမှာ ဗေဒင်ဟောကိန်းထုတ်ခြင်း အတတ်ကိုပင် ကျွမ်းကျင်လိမ့်မည်ဟု မမျှော်လင့်ထားခဲ့ချေ။ မရေမရာသော အနာဂတ်ကို ကြိုတင်မြင်နိုင်ရုံသာမက မိမိထက်ပင် ပိုမိုထက်မြက်နေသေးသည်။

"ခန္ဓာပေါင်းစည်းခြင်းအဆင့် စွမ်းအားရှင်ကြီး ဟုတ်လား..."

ဤစကားကို ကြားလိုက်ရချိန်တွင် ထောင်ချီလီနှင့် ပိုင်စုကျဲ့တို့၏ မျက်နှာများ ချက်ချင်း ပျက်သွားကြတော့သည်။

ခန္ဓာပေါင်းစည်းခြင်းအဆင့် စွမ်းအားရှင်ကြီးများ မည်မျှအထိ ကြောက်စရာကောင်းကြောင်းကို သူတို့ ကောင်းစွာ သိရှိထားကြသည်။

ခန္ဓာပေါင်းစည်းခြင်းအဆင့် စွမ်းအားရှင်သည် လေဟာနယ်သန့်စင်ခြင်းအဆင့်ထက် အဆင့်တစ်ခုတည်းသာ ပိုမိုမြင့်မားသော်လည်း သူတို့အကြားရှိ စွမ်းအားကွာခြားမှုမှာ ကောင်းကင်နှင့်မြေကြီးကဲ့သို့ပင် ဖြစ်၏။

ခန္ဓာပေါင်းစည်းခြင်းအဆင့်သို့ ရောက်ရှိသွားသည်နှင့် ကောင်းကင်မြေကြီး ဓမ္မသဏ္ဌာန်ကို မိမိ၏ ခန္ဓာကိုယ်အတွင်းသို့ ပေါင်းစပ်ထည့်သွင်းနိုင်ပေသည်။

ဤသည်က ခန္ဓာပေါင်းစည်းခြင်းအဆင့် စွမ်းအားရှင်၏ ရုပ်ခန္ဓာကို အတိုင်းအထက်အလွန် အစွမ်းထက်လာစေကာ ခြေလှမ်းတိုင်း၊ လှုပ်ရှားမှုတိုင်းက ကန္တာရသားရဲတစ်ကောင်ကဲ့သို့ ပြင်းထန်ပေလိမ့်မည်။

ကျင့်ကြံသူတစ်ဦး၏ ကောင်းကင်မြေကြီး ဓမ္မသဏ္ဌာန်သည် ပိုမိုအစွမ်းထက်လေလေ ၎င်း၏ရုပ်ခန္ဓာသည်လည်း ပိုမိုကြံ့ခိုင်သန်မာလာလေလေ ဖြစ်၏။

ဤအဆင့်သို့ ရောက်ရှိသွားပါက ခန္ဓာပေါင်းစည်းခြင်းအဆင့် ကျင့်ကြံသူကြီးများသည် မိမိတို့၏ရုပ်ခန္ဓာဖြင့်ပင် ဟင်းလင်းပြင်ကို ဖြတ်ကျော်ကာ တစ်ခဏချင်း တည်နေရာရွှေ့ပြောင်းနိုင်စွမ်း ရှိကြလေသည်။

ထို့ကြောင့် သာမန် လေဟာနယ်သန့်စင်ခြင်းအဆင့် ကျင့်ကြံသူတစ်ဦးသည် ခန္ဓာပေါင်းစည်းခြင်းအဆင့် ကျင့်ကြံသူကြီးနှင့် ရင်ဆိုင်ရပါက တစ်ဖက်သတ် အစုလိုက်အပြုံလိုက် သတ်ဖြတ်ခြင်းကိုသာ ခံရမည်ဖြစ်ပြီး ယှဉ်ပြိုင်နိုင်စွမ်း လုံးဝရှိမည်မဟုတ်ပေ။

လူသားမျိုးနွယ်စုတွင် လေဟာနယ်သန့်စင်ခြင်းအဆင့် ကျင့်ကြံသူများသည် မိသားစုတစ်ခု၏ ဘိုးဘေးအဆင့်မျှသာ ဖြစ်နိုင်သော်လည်း ခန္ဓာပေါင်းစည်းခြင်းအဆင့် ကျင့်ကြံသူကြီးများမှာမူ မင်းစိုးရာဇာများအလား နယ်ပယ်တစ်ခုလုံးကို အုပ်ချုပ်စိုးစံနိုင်စွမ်း ရှိကြ၏။

အစစ်အမှန်ဝိညာဉ်မျိုးနွယ်စုများတွင်ပင် ခန္ဓာပေါင်းစည်းခြင်းအဆင့် ကျင့်ကြံသူများသည် အလွန်အမင်း အစွမ်းထက်သော တည်ရှိမှုများ ဖြစ်ကြသည်။

အဘယ်ကြောင့်ဆိုသော် ခန္ဓာပေါင်းစည်းခြင်းအဆင့် ကျင့်ကြံသူကြီးများသည် အစွမ်းထက်သော နယ်ပယ်စွမ်းအားနှင့် နတ်ဘုရားစွမ်းရည် လျှို့ဝှက်ကျင့်စဉ်များကို တတ်ကျွမ်းရုံသာမက ရုပ်ခန္ဓာဖြင့်ပင် တစ်ခဏချင်း တည်နေရာရွှေ့ပြောင်းနိုင်သောကြောင့် ဖြစ်လေသည်။

၎င်းတို့၏ တိုက်ခိုက်ရေးစွမ်းရည်မှာ လေဟာနယ်သန့်စင်ခြင်းအဆင့် ဘိုးဘေးများထက် မည်မျှဆပေါင်းများစွာ သာလွန်မည်ကို ခန့်မှန်းရန်ပင် ခက်ခဲလှပေသည်။

အကယ်၍ ခန္ဓာပေါင်းစည်းခြင်းအဆင့် ကျင့်ကြံသူကြီးတစ်ဦး၏ ပစ်မှတ်ထားခြင်းကို ခံရပါက မျက်တောင်တစ်ခတ်အတွင်းမှာပင် လေဟာနယ်သန့်စင်ခြင်းအဆင့် ကျင့်ကြံသူအများအပြားကို သုတ်သင်ရှင်းလင်းပစ်နိုင်လေသည်။

ဤနှစ်ဦးမှာ အဆင့်အတန်းချင်း လုံးဝမတူညီကြချေ။

"အရင်ဆုံး ကျွန်းရဲ့နေရာအနှံ့အပြားမှာ ပျံ့နှံ့နေတဲ့ လူသားကျင့်ကြံသူတွေကို ပြန်ပြီး စုစည်းလိုက်ရအောင်...”

"မကြာခင် အဲဒီခန္ဓာပေါင်းစည်းခြင်းအဆင့် ကျင့်ကြံသူကြီးက ငါတို့ရဲ့ ဖုန်းရှီးကျွန်းဆီ ရောက်လာတော့မယ်...”

"တကယ်လို့ သူတို့တွေ အပြင်မှာကျန်ခဲ့ရင် အားလုံး အသက်ဘေးနဲ့ ကြုံရလိမ့်မယ်...”

ကျိုးစွေ့က တည်ကြည်လေးနက်သော လေသံဖြင့် ပြောလိုက်၏။

"ကောင်းပါပြီ။ ကျွန်မ အခုချက်ချင်း အမိန့်ထုတ်ပြီး သူတို့ကို မြန်မြန်ပြန်လာခိုင်းလိုက်ပါ့မယ်။ ပြီးတော့ မြို့တံခါးတွေကိုလည်း အကုန် ပိတ်ထားခိုင်းလိုက်မယ်...”

"ခန္ဓာပေါင်းစည်းခြင်းအဆင့် ကျင့်ကြံသူကြီးကို ခုခံချင်ရင်တော့ ငါတို့ ဖုန်းရှီးမြို့ရဲ့ သတ္တမအဆင့်အစီအရင်ကိုပဲ အားကိုးရတော့မှာပဲ...”

ထောင်ချီလီက သက်ပြင်းတစ်ချက်ချရင်း ကူကယ်ရာမဲ့စွာ ပြောလိုက်လေသည်။

ထို့နောက် အမိန့်များ တစ်ခုပြီးတစ်ခု ထုတ်ပြန်လိုက်လေတော့သည်။

ဖုန်းရှီးကျွန်း၏ နေရာအနှံ့တွင် ရှိနေသော လူသားကျင့်ကြံသူများသည် သတင်းရလျှင်ရချင်း ချက်ချင်းပင် မြို့တော်သို့ ပြန်လည်ရောက်ရှိလာကြပြီး လေဟာနယ်သန့်စင်ခြင်းအဆင့် ဝိညာဉ်သားရဲများလည်း မြို့အတွင်းသို့ ပြန်လည်ဝင်ရောက်လာကြ၏။

လူတိုင်းသည် ကြီးမားသောအန္တရာယ်ကြီးနှင့် ရင်ဆိုင်နေရသကဲ့သို့ စိုးရိမ်တကြီး ပြင်ဆင်နေကြလေသည်။

တစ်နာရီခန့် ကြာပြီးနောက်...။

ဖုန်းရှီးကျွန်း၏ ပြင်ပပင်လယ်ပြင်တွင်။

ပျက်စီးယိုယွင်းနေသော သတ္တမအဆင့် ပျံသန်းရေးသင်္ဘောတစ်စင်းသည် ဖြည်းညှင်းစွာ မောင်းနှင်လာနေသည်။

သင်္ဘော၏ ကိုယ်ထည်ပေါ်တွင် ကြီးမားလှသော သွေးလမင်းပုံသဏ္ဌာန် ရေးဆွဲထားရာ အလွန်ပင် ထူးဆန်းကျောစိမ့်ဖွယ် ကောင်းလှသည်။

ဤပင်လယ်ပြင်တွင် ကာလရှည်ကြာ နေထိုင်ခဲ့ကြသော မျိုးနွယ်စုများသာဆိုလျှင် ဤသင်္ဘောသည် သွေးလမင်းမျိုးနွယ်စုထံမှ ဖြစ်ကြောင်း ချက်ချင်း သိရှိနိုင်ပေသည်။

ဤသင်္ဘော၏ ပိုင်ရှင်မှာ ခန္ဓာပေါင်းစည်းခြင်းအဆင့် အစောပိုင်း ကျင့်ကြံသူတစ်ဦးဖြစ်သော သွေးဝမ်ယန်ပင် ဖြစ်၏။

သင်္ဘောပေါ်တွင် လေဟာနယ်သန့်စင်ခြင်းအဆင့် သွေးလမင်းမျိုးနွယ်စု ကျင့်ကြံသူ ဆယ်ဂဏန်းကျော်နှင့် နတ်ဘုရားအသွင်ပြောင်းအဆင့် ကျင့်ကြံသူ ရာဂဏန်းခန့် ပါရှိလေသည်။

သို့သော်ငြား ယခုအခါတွင်မူ ၎င်းတို့အားလုံးမှာ အလွန်ပင် သနားစရာကောင်းလောက်အောင် ပျက်စီးယိုယွင်းနေပြီး ခန္ဓာကိုယ်ပေါ်တွင်လည်း ဒဏ်ရာအနာတရများစွာ ရရှိထားကြသည်။

"ယုတ်မာလှတဲ့ ငွေဝံပုလွေမျိုးနွယ်စု။ ငါ့ကို နောက်ကွယ်ကနေ ခိုးပြီး တိုက်ခိုက်ဝံ့တယ်ပေါ့...”

"ငါ့အတွက် အခွင့်အရေးသာ ရလာလို့ကတော့ မင်းတို့အားလုံး အသေဆိုးနဲ့ သေရမယ်...”

သွေးလမင်းမျိုးနွယ်စု၏ ခန္ဓာပေါင်းစည်းခြင်းအဆင့် ကျင့်ကြံသူ သွေးဝမ်ယန်က အံများကို တင်းတင်းကြိတ်ကာ ဒေါသတကြီး ပြောလိုက်ရင်း သွေးတစ်လုပ် အန်ထုတ်လိုက်၏။

သူ၏တစ်ကိုယ်လုံးတွင် သွေးစွန်းနေသော ဒဏ်ရာများနှင့် အက်ကွဲကြောင်းများ ပြည့်နှက်နေပြီး ဒဏ်ရာမှာ အလွန်ပြင်းထန်ကြောင်း ထင်ရှားလှပေသည်။

မူလက သူသည် မျိုးနွယ်စုအတွင်းမှ ထွက်ခွာလာပြီး ပြင်ပလောကတွင် အခွင့်အလမ်းကောင်းများ ရှာဖွေရန် ကြံရွယ်ခဲ့ခြင်း ဖြစ်သည်။

သို့သော် မည်သူက ထင်မှတ်ထားပါမည်နည်း။

သွေးလမင်းမျိုးနွယ်စု၏ ကမ္ဘာ့ရန်ဘက်ဖြစ်သော ငွေဝံပုလွေမျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူကြီးတစ်ဦး၏ ချုံခိုတိုက်ခိုက်ခြင်းကို ခံလိုက်ရလေသည်။

ပြင်ဆင်ချိန်မရဘဲ ရုတ်တရက် တိုက်ခိုက်ခံလိုက်ရသဖြင့် သူသည်လည်း ပြင်းထန်စွာ ဒဏ်ရာရရှိသွားခဲ့၏။

ကံကောင်းသည်မှာ သူသည်လည်း လွယ်လွယ်နှင့် အရှုံးပေးမည့်သူ မဟုတ်ပေ။ သူ၏ ပြန်လည်ခုခံတိုက်ခိုက်မှုကြောင့် ထိုငွေဝံပုလွေမျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူလည်း ဒဏ်ရာပြင်းထန်စွာ ရရှိသွားခဲ့သည်။

ထို့နောက် သူသည် သတ္တမအဆင့် ပျံသန်းရေးသင်္ဘောကို အသုံးပြုကာ အခွင့်ကောင်းယူ၍ လွတ်မြောက်အောင် ထွက်ပြေးခဲ့လေသည်။

သို့သော် ကံဆိုးမိုးမှောင်ကျပြီး လမ်းခရီးတွင် ဦးတည်ချက်မဲ့ လေပြင်းမုန်တိုင်းများသာမက ပြင်းထန်သော ပင်လယ်မုန်တိုင်းများနှင့် ထပ်မံတိုးမိပြန်သည်။

ထို့ကြောင့် ဤသတ္တမအဆင့် သင်္ဘောကြီးမှာလည်း ဒဏ်ရာဒဏ်ချက်များကြောင့် ပျက်စီးလုနီးပါး ဖြစ်သွားခဲ့ရ၏။

သူ၏ ဒဏ်ရာများကလည်း ပိုမိုပြင်းထန်လာခဲ့ရသည်။ လက်အောက်ငယ်သားများမှာလည်း အလားတူပင် ဖြစ်ကြ၏။

"သခင်ကြီးဝမ်ယန်... ရှေ့မှာ သတ္တမအဆင့် ကျွန်းတစ်ကျွန်း ရှိနေပုံရပါတယ်ခင်ဗျာ...”

"အဲဒီပေါ်မှာ ကန္တာရသားရဲတွေ အများကြီး ရှိနေလောက်ပါတယ်...”

လေဟာနယ်သန့်စင်ခြင်းအဆင့် သွေးလမင်းမျိုးနွယ်စု ကျင့်ကြံသူတစ်ဦးက ရှေ့မှ ဖုန်းရှီးကျွန်းကို ပထမဦးဆုံး တွေ့ရှိသွားပြီးနောက် ဝမ်းသာအားရ ပြောလိုက်လေသည်။

"ဟားဟား... တကယ်ကို ကောင်းကင်ဘုံက ငါ့ကို လမ်းစပေးလိုက်တာပဲ...”

"ဒီလိုနေရာမျိုးမှာ သတ္တမအဆင့် ကျွန်းတစ်ကျွန်းကို ရှာတွေ့လိမ့်မယ်လို့ မထင်ထားမိဘူး...”

"အဲဒီပေါ်က ကန္တာရသားရဲတွေရဲ့ သွေးကို စုပ်ယူနိုင်ရင် ငါ့ရဲ့ ဒဏ်ရာတွေ အမြန်ဆုံး သက်သာလာမှာ အသေအချာပဲ...”

သွေးဝမ်ယန်က ကျယ်လောင်စွာ ရယ်မောလိုက်ပြီး မျက်နှာတွင် အတိုင်းထက်အလွန် ဝမ်းသာပီတိဖြစ်နေသော အမူအရာများ ပေါ်လွင်နေတော့သည်။

မှန်ပေသည်၊ ဤသည်မှာ သွေးလမင်းမျိုးနွယ်စု၏ ထူးခြားလှသော မွေးရာပါ နတ်ဘုရားစွမ်းရည်ပင် ဖြစ်၏။

၎င်းတို့သည် အခြားသက်ရှိများ၏ သွေးကို စုပ်ယူဝါးမျိုခြင်းဖြင့် တစ်ဖက်လူ၏ သွေးသားအဆီအနှစ်၊ ကျင့်ကြံမှုအဆင့်နှင့် မှန်ဉာဏ်များကိုပါ ရရှိနိုင်ကြပြီး မိမိတို့၏ ကျင့်ကြံမှုကို လျင်မြန်စွာ မြှင့်တင်နိုင်ကြသည်။

ထို့ကြောင့် သွေးလမင်းမျိုးနွယ်စု၏ ကျင့်ကြံသူတိုင်းသည် သတ်ဖြတ်ခြင်းများနှင့်အတူ ကြီးပြင်းလာခဲ့ကြသည်ဟု ဆိုရပေမည်။

၎င်းတို့သည် ဤပင်လယ်ပြင်တွင် အလွန်ကျော်ကြားလှသော တိုက်ခိုက်ရေးမျိုးနွယ်စု ဖြစ်ကြပြီး ရန်သူများကို ကြောက်ဒူးတုန်စေနိုင်စွမ်း ရှိကြ၏။

လပြည့်ညများတွင်မူ ၎င်းတို့၏ တိုက်ခိုက်ရေးစွမ်းရည်သည် ထိန်းမနိုင်လောက်အောင် ဆပေါင်းများစွာ တိုးတက်လာတတ်သည်။

ထို့အပြင် ၎င်းတို့သည် သွေးကို အသုံးချကာ သွေးကျွန်များကိုလည်း ဖန်တီးနိုင်ကြသေးသည်။

ထို့ကြောင့် သွေးလမင်းမျိုးနွယ်စုသည် ဤပင်လယ်ပြင်တွင် အလွန်အင်အားကြီးမားသော မျိုးနွယ်စုကြီးတစ်ခု ဖြစ်လေသည်။

မဟာယာနအဆင့် ကျင့်ကြံသူကြီးများပင် အပါးနှစ်ဆယ်ကျော် ရှိကြသည်။

ခန္ဓာပေါင်းစည်းခြင်းအဆင့်နှင့် လေဟာနယ်သန့်စင်ခြင်းအဆင့် ကျင့်ကြံသူများမှာမူ ရေတွက်၍ပင် မရနိုင်တော့ချေ။

ဤသို့သောအင်အားမျိုးမှာ ဤပင်လယ်ပြင်တွင် မင်းမူနိုင်သည်ဟု မဆိုနိုင်သော်လည်း အနည်းဆုံးအနေဖြင့် ဤပင်လယ်ပြင်တွင် ရပ်တည်ရှင်သန်နိုင်စွမ်း ရှိသည်။

"သခင်ကြီးဝမ်ယန်... ဒီကျွန်းပေါ်မှာ ကန္တာရသားရဲတွေတင်မကဘူး...”

"သေးငယ်တဲ့ မျိုးနွယ်စုလေးတစ်ခုလည်း နေထိုင်ပုံရပြီး သတ္တမအဆင့် မြို့တော်တစ်ခုကိုတောင် တည်ဆောက်ထားကြပါတယ်ခင်ဗျာ...”

ထိုသတ္တမအဆင့် သင်္ဘောကြီးသည် ဖုန်းရှီးကျွန်း၏ အထက်ကောင်းကင်ယံသို့ ရောက်ရှိလာချိန်တွင် အခြားသော လေဟာနယ်သန့်စင်ခြင်းအဆင့် ကျင့်ကြံသူတစ်ဦးက ကျွန်း၏အလယ်ဗဟိုရှိ ဖုန်းရှီးမြို့တော်ကို လှမ်းမြင်လိုက်ရသဖြင့် သူသိရှိထားသော အချက်အလက်များကို ချက်ချင်း အစီရင်ခံလိုက်လေသည်။

"အိုး... တကယ်ပဲ သေးငယ်တဲ့ မျိုးနွယ်စုလေးပါလား...”

"အရေအတွက်ကတော့ ကုဋေရာချီအထိ ရှိတာပဲ...”

"ဒါပေမဲ့ ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်မှ မရှိဘဲ လေဟာနယ်သန့်စင်ခြင်းအဆင့်လောက်ပဲ ရှိတယ်...”

"မဟာယာနအဆင့် ကျင့်ကြံသူဆိုရင် ပိုပြီးတော့တောင် မရှိနိုင်ဘူး...”

"ဒီလောက်အားနည်းတဲ့ မျိုးနွယ်စုလေးက သတ္တမအဆင့်ကျွန်းပေါ်မှာ မြို့တည်ရဲတယ်ဆိုတော့ ကိုယ့်သေတွင်းကိုယ်တူးနေတာပဲ ဖြစ်ရမယ်...”

သွေးဝမ်ယန်သည်လည်း ဖုန်းရှီးမြို့ကို ချက်ချင်းပင် သတိပြုမိသွားတော့သည်။