အခန်း ၈၂၇

အခန်း (၈၂၇) - လူနှင့်အစီအရင် ပေါင်းစည်းခြင်း၊ အစစ်အမှန်နေမင်းမီးတောက်၊ သတ္တမအဆင့်အစီအရင်၏ စွမ်းပကားနှင့် ခန္ဓာပေါင်းစည်းခြင်းအဆင့် စွမ်းအား (၂) ။

ဤသည်မှာ အဘယ်ကြောင့် ခန္ဓာပေါင်းစည်းခြင်းအဆင့် ကျင့်ကြံသူများသာလျှင် မြို့တည်ဆောက်ခွင့်ရှိရသနည်းဟူသော အကြောင်းရင်းပင် ဖြစ်လေသည်။

အကယ်၍ ခန္ဓာပေါင်းစည်းခြင်းအဆင့် ကျင့်ကြံသူများ၏ ကာကွယ်စောင့်ရှောက်မှုသာ မရှိပါက သာမန်လူသားကျင့်ကြံသူများအနေဖြင့် မျိုးနွယ်ခြားများ၏ တိုက်ခိုက်မှုကို ရင်ဆိုင်၍ အသက်ရှင်သန်ရန် အလွန်ခက်ခဲပေလိမ့်မည်။

"ဒါပေမဲ့ အခု ငါတို့ ဘယ်လိုလုပ်ကြမလဲ...”

"ဒီမျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူက ကြည့်ရတာ ရက်စက်ကြမ်းကြုတ်မယ့်ပုံပဲ။ ငါတို့ကတော့ သူ့ပြိုင်ဘက် ဖြစ်လာမှာမဟုတ်ဘူး...”

"ဒီကိစ္စကို ဖုန်းရှီးအရှင်ကို အကြောင်းကြားလိုက်ရမလား...”

တစ်စုံတစ်ယောက်က မနေနိုင်ဘဲ မေးလိုက်သည်။ မည်သို့ပင်ဆိုစေကာမူ ခန္ဓာပေါင်းစည်းခြင်းအဆင့် ကျင့်ကြံသူများကို ခန္ဓာပေါင်းစည်းခြင်းအဆင့် ကျင့်ကြံသူအချင်းချင်းသာလျှင် ရင်ဆိုင်နိုင်မည် ဖြစ်၏။

သူတို့ကဲ့သို့ လေဟာနယ်သန့်စင်ခြင်းအဆင့် ကျင့်ကြံသူများသာ မြို့ပြင်ထွက်၍ တိုက်ခိုက်ပါက မျက်စိတစ်မှိတ်အတွင်းမှာပင် အသတ်ခံရမည်မှာ သေချာလှသည်။

အဘယ်ကြောင့်ဆိုသော် ခန္ဓာပေါင်းစည်းခြင်းအဆင့် ကျင့်ကြံသူများသည် ကောင်းကင်မြေကြီး ဓမ္မသဏ္ဌာန်နှင့် ပေါင်းစည်းထားသောကြောင့် ခန္ဓာကိုယ်ကို အလွန်အမင်း အစွမ်းထက်စေပြီး အကာအကွယ်အလွှာဖြင့် လွှမ်းခြုံထားသောကြောင့် သာမန် ကောင်းကင်အဆင့် ဝိညာဉ်ရတနာများ၏ စွမ်းအားဖြင့်ပင် သူတို့၏ ခန္ဓာကိုယ်အကာအကွယ်ကို ချိုးဖျက်နိုင်မည် မဟုတ်ချေ။

၎င်းအပြင် ခန္ဓာပေါင်းစည်းခြင်းအဆင့် ကျင့်ကြံသူများ၏ မူလဝိညာဉ်စွမ်းအားမှာ အလွန်တရာ ကြီးမားလှပြီး နေရာရွှေ့ပြောင်းခြင်းစွမ်းအားကို ကျွမ်းကျင်ရုံသာမက လေဟာနယ်စွမ်းအားကိုပင် အနည်းငယ် အသုံးပြုနိုင်ကာ ကြောက်မက်ဖွယ်ကောင်းသော တိုက်ခိုက်ရေးစွမ်းအားများကိုပါ ပေါက်ကွဲထွက်စေနိုင်သည်။

လေဟာနယ်သန့်စင်ခြင်းအဆင့် ကျင့်ကြံသူ ထောင်ပေါင်းများစွာ ပါဝင်တိုက်ခိုက်လျှင်ပင် ဤအဆင့်ရှိ အစွမ်းထက်သူများကို မည်သို့မျှ ယှဉ်နိုင်မည် မဟုတ်ပေ။

ခန္ဓာပေါင်းစည်းခြင်းအဆင့် ကျင့်ကြံသူဆိုသည်မှာ ဝိညာဉ်ကမ္ဘာ၏ နယ်စားပယ်စားတစ်ဦးဖြစ်သည်ဆိုသော စကားမှာ အတုအယောင် မဟုတ်ပေ။

"အခု ဖုန်းရှီးက တံခါးပိတ်ကျင့်ကြံပြီး ဒဏ်ရာတွေကို ကုသနေတုန်းပဲ...”

"ပြီးတော့ အရေးကြီးတဲ့အချိန်ရောက်နေပြီဆိုတော့ အချိန်တိုအတွင်းမှာ သူမရဲ့ ဒဏ်ရာကုသတာကို သွားအနှောင့်အယှက် ပေးလို့မဖြစ်ဘူး...”

"တကယ်လို့ မတတ်သာတဲ့ အခြေအနေမျိုး မဟုတ်ဘူးဆိုရင် သူမကိုသွားပြီး အနှောင့်အယှက် ပေးလို့မရဘူး...”

"မဟုတ်ရင် ဒါက သူမရဲ့ ပြန်လည်ကောင်းမွန်လာမယ့် လုပ်ငန်းစဉ်ကို ထိခိုက်စေလိမ့်မယ်...”

"တစ်ခါသွားအနှောင့်အယှက်ပေးလိုက်တာနဲ့ ပြန်လည်ကောင်းမွန်ဖို့ အချိန်က နောက်ထပ် နှစ်ရာပေါင်းများစွာ ကြာသွားနိုင်တယ်လေ။ အကျိုးထက်အပြစ်က ပိုများသွားလိမ့်မယ်...”

ထောင်ချီလီက ခေါင်းယမ်းလိုက်၏။

သူမသည် တံခါးပိတ်ကျင့်ကြံနေသော ဖုန်းရှီးတာအိုအရှင်ကို ယခုအချိန်တွင် အနှောင့်အယှက်ပေးရန် လုံးဝ သဘောမတူပေ။ အဘယ်ကြောင့်ဆိုသော် ဖုန်းရှီးတာအိုအရှင်၏ ဒဏ်ရာအခြေအနေကို သူမ ကောင်းစွာသိထားပြီး အခြေအနေက သိပ်မကောင်းလှသောကြောင့် ဖြစ်လေသည်။

ထို့ကြောင့်သာမဟုတ်ပါက နှစ်တစ်ရာတိုင်တိုင် တံခါးပိတ်ကျင့်ကြံနေမည်မဟုတ်သလို မည်သည့်သတင်းအချက်အလက်မျှလည်း ထွက်ပေါ်မလာခြင်း ဖြစ်နိုင်ပါမည်လော။

အကယ်၍ တစ်ဖက်လူ၏ ဒဏ်ရာကုသမှု လုပ်ငန်းစဉ်ကို အနှောင့်အယှက်ပေးမိပါက ရောဂါပျောက်ကင်းမည့် အချိန်ကို ပိုမိုကြန့်ကြာသွားစေနိုင်သည်။

သေရေးရှင်ရေး အကျပ်အတည်းအချိန်သို့ ရောက်မနေသရွေ့ သူမသည် တစ်ဖက်လူကို လုံးဝ အနှောင့်အယှက်ပေးမည် မဟုတ်ချေ။

"ပြောတာမှန်တယ်။ ပြီးတော့ အခု ငါတို့က သေရေးရှင်ရေး အကျပ်အတည်းအချိန်ကို ရောက်နေတာမှ မဟုတ်တာ...”

"ဖုန်းရှီးမြို့တော်မှာ သတ္တမအဆင့်အစီအရင်ရဲ့ ကာကွယ်မှုရှိတယ်။ ခန္ဓာပေါင်းစည်းခြင်းအဆင့် ကျင့်ကြံသူဖြစ်နေရင်တောင် ငါတို့ကို ဘာမှလုပ်နိုင်မှာ မဟုတ်ဘူး...”

"ငါတို့ ဖုန်းရှီးမြို့တော်ထဲကနေ မထွက်သွားသရွေ့တော့ ဘာပြဿနာမှ ရှိလာမှာ မဟုတ်ဘူး...”

လေဟာနယ်သန့်စင်ခြင်းအဆင့် ဘိုးဘေးတစ်ဦးက ခေါင်းညိတ်လိုက်သည်။

ဖုန်းရှီးမြို့တော်အတွင်း၌သာ နေထိုင်မည်ဆိုပါက မျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူက အသေအလဲ တိုက်ခိုက်လျှင်ပင် ဖုန်းရှီးမြို့တော်သည် မည်သည့်ထိခိုက်ပျက်စီးမှုမျှ ရှိမည်မဟုတ်ကြောင်း သူက ယူဆထားလေသည်။

"မိုက်မဲလိုက်တာ။ မျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်တည်းက ငါတို့ကို ဘာမှမလုပ်နိုင်တာ မှန်ပေမယ့် မျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူ အများကြီးကသာ တစ်ပြိုင်နက် တိုက်ခိုက်လာမယ်ဆိုရင်တော့… အဲဒီအချိန်ကျရင် ငါတို့ သေရင်တောင် မြှုပ်စရာမြေ ရှိမှာမဟုတ်တော့ဘူး...”

"ပြောတာ မှန်တယ်။ ဒီနေရာက ကြယ်ကွဲပင်လယ်ဆိုတာကို သိထားဖို့လိုတယ်။ အခြေခံအားဖြင့် အထီးကျန်ကျင့်ကြံသူတွေ ရှင်သန်ရပ်တည်ဖို့ နေရာမရှိသလောက်ပါပဲ။ အများစုက မျိုးနွယ်စုကြီးတွေရဲ့ နယ်မြေတွေချည်းပဲ…”

“အခု မျက်စိရှေ့က ဒီမျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူရဲ့ နောက်ကွယ်မှာ သေချာပေါက် ထိပ်တန်းမျိုးနွယ်စုကြီးတွေရဲ့ ကျောထောက်နောက်ခံ ရှိနေမှာပဲ...”

"ဒါက တကယ်ကို ဒီလိုပဲလေ။ အကယ်လို့ ဒီမျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူက ငါတို့ကို ဘာမှမလုပ်နိုင်ဘူးလို့ထင်ပြီး သူ့မျိုးနွယ်စုဆီ ပြန်ပြေးသွားပြီး စစ်ကူတောင်းမယ်ဆိုရင်တော့ ငါတို့ ဖုန်းရှီးမြို့တော်က သေချာပေါက် ပျက်စီးသွားလိမ့်မယ်...”

"ဟုတ်တယ်။ ငါတို့ ဖုန်းရှီးမြို့တော်က ဒီလောက်ကြီးတာ၊ ကြယ်ကွဲပင်လယ်အကြောင်းကိုလည်း ကောင်းကောင်းမသိသေးဘူး။ ဘယ်ကို ပြေးလို့ရမှာလဲ...”

"အရင်တုန်းက မိုးကြိုးတောင်တန်းမှာဆိုရင် ငါတို့ ပြေးလို့ရသေးတယ်။ အခုကတော့ ပြေးလို့လွတ်မှာ မဟုတ်ဘူးထင်တယ်...”

လေဟာနယ်သန့်စင်ခြင်းအဆင့် ဘိုးဘေးများစွာ၏ မျက်နှာများမှာ အလွန်အမင်း ပျက်ယွင်းနေကြတော့သည်။

သူတို့သည် ဤဖိတ်ခေါ်မထားသော ဧည့်သည်က ဖုန်းရှီးမြို့တော်ကို ထိခိုက်နစ်နာစေမည်ကို စိုးရိမ်နေကြခြင်း မဟုတ်ဘဲ နောက်ဆက်တွဲ ဆက်တိုက်ဖြစ်ပေါ်လာမည့် အကျိုးဆက်များကို စိုးရိမ်နေကြခြင်း ဖြစ်သည်။

ဤကမ္ဘာလောကရှိ ခန္ဓာပေါင်းစည်းခြင်းအဆင့် ကျင့်ကြံသူများက တစ်ဦးတည်း မဖြစ်နိုင်ပေ။ သူတို့၏ နောက်ကွယ်တွင် ကြီးမားလှသော မျိုးနွယ်စုကြီးတစ်ခု သေချာပေါက် ရှိနေမည်သာ ဖြစ်၏။

အကယ်၍ ထိုထိပ်တန်းမျိုးနွယ်စုကြီးကိုသာ လန့်နိုးသွားစေပါက ဖုန်းရှီးမြို့တော်သည် ပြာကျသွားမည်မှာ သေချာသလောက်ပင် ဖြစ်သည်။ ယခု ချက်ချင်းမသေလျှင်ပင် အနှေးနှင့်အမြန်ဆိုသလို အခြားသော မျိုးနွယ်စုများ၏ လက်ချက်ဖြင့် သေဆုံးရမည်သာ ဖြစ်လေသည်။

"စိုးရိမ်မနေကြပါနဲ့...”

"ငါတို့ရဲ့ ဖုန်းရှီးမြို့တော်က ပျက်စီးသွားမှာ မဟုတ်ပါဘူး...”

"ပြီးတော့ ဒီမျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူကလည်း စစ်ကူတောင်းဖို့ ပြန်သွားနိုင်မှာ မဟုတ်ဘူး။ ဒီနေ့ သူ ဒီမှာပဲ သေရတော့မှာ...”

ဤအချိန်တွင် ကျိုးစွေ့က ထွက်လာကာ လူအများကို တစ်ချက်ဝေ့ကြည့်လိုက်ပြီး ပြောလိုက်သည်။

သူ၏အသံတွင် အဆုံးမဲ့ ဘုန်းတန်ခိုးအာဏာများ ပါဝင်နေပြီး 'နတ်ဘုရားညို့ငင်အသံ' ပင် ဖြစ်လေသည်။ ဤကဲ့သို့သော အသံမျိုးတွင် ကြီးမားလှသော ဆွဲဆောင်သိမ်းသွင်းနိုင်စွမ်းများ ပါဝင်နေပြီး လူအများကို ယုံကြည်သွားစေကာ ယုံကြည်မှုများ အဆရာချီတက်စေနိုင်သည်။

"ကျိုးတာအိုရောင်းရင်း၊ ခင်ဗျားမှာများ အဲဒီမျိုးနွယ်ခြား ခန္ဓာပေါင်းစည်းခြင်းအဆင့် ကျင့်ကြံသူကို ဖြေရှင်းနိုင်မယ့်နည်းလမ်း ရှိနေလို့လား...”

ထိုစကားကို ကြားသောအခါ လေဟာနယ်သန့်စင်ခြင်းအဆင့် ဘိုးဘေးများစွာက ကျိုးစွေ့ကို စူးစမ်းစွာဖြင့် ကြည့်လိုက်ကြသည်။

နှစ်တစ်ရာခန့် အတူတကွနေထိုင်လာခဲ့ပြီးဖြစ်ရာ သူတို့သည် မျက်မှောက်ရှိ ဤအမျိုးသားက မည်မျှအထိ ကြောက်မက်ဖွယ်ကောင်းကြောင်းကို သဘာဝကျကျ သိရှိထားကြပေသည်။

သားရဲထိန်းကျောင်းခြင်း ပညာရပ်တစ်ရပ်ကို ကျွမ်းကျင်ပြီး ကန္တာရသားရဲများကို ယဉ်ပါးအောင် ဆုံးမနိုင်ရုံသာမက ဆဌမအဆင့် ဆေးဖော်စပ်ပညာရှင်တစ်ဦးလည်း ဖြစ်ကာ အစီအရင်များနှင့် ပတ်သက်၍လည်း များစွာ သုတေသနပြုထားပုံရပြီး အရာအားလုံးစွမ်းဆောင်နိုင်သည့် ပါရမီရှင်တစ်ဦးပင် ဖြစ်လေသည်။

ကျင့်ကြံသည့်အချိန် အလွန်တိုတောင်းလွန်းခြင်းသာ မရှိပါက လူသားမျိုးနွယ်စုတွင် အရေးပါအရာရောက်သည့် နေရာတစ်ခုကို ရယူထားပြီးလောက်မည် ဖြစ်၏။

မှန်ပေသည်၊ ယခု ဖုန်းရှီးမြို့တော်တွင် နေထိုင်နေလျှင်ပင် သူသည် မြို့တော်ဝန်မှလွဲ၍ ဒုတိယမြောက် သြဇာအာဏာအရှိဆုံးသူပင် ဖြစ်လေသည်။

ထိုအချိန်တွင် ကျိုးစွေ့က စကားမပြောတော့ဘဲ အတွေးတစ်ချက်လှုပ်ရှားလိုက်ကာ 'အစီအရင်နှလုံးသားကူ' နှင့် ချက်ချင်း ချိတ်ဆက်လိုက်လေသည်။

ဝုန်း...။

မျက်စိတစ်မှိတ်အတွင်းမှာပင် ဖုန်းရှီးမြို့တော်ကို လွှမ်းခြုံထားသော သတ္တမအဆင့် အထွတ်အထိပ်အစီအရင်ဖြစ်သည့် ကိုးရောင်ခြယ်နေမင်းအစီအရင်ကြီးက ချက်ချင်း လည်ပတ်လာပြီး ၎င်းအပေါ်ရှိ ထိန်းချုပ်ခွင့်ကို သူ ပထမဆုံးအကြိမ်အဖြစ် လုယူလိုက်တော့သည်။

သူ၏ မူလဝိညာဉ်ကလည်း 'အစီအရင်နှလုံးသားကူ' ၏ ခန္ဓာကိုယ်ထဲသို့ ပေါင်းစည်းသွားလေသည်။

ချက်ချင်းပင် 'အစီအရင်နှလုံးသားကူ' သည် ကိုးရောင်ခြယ်နေမင်းအစီအရင်ကြီး၏ အစီအရင်ဝိညာဉ်အဖြစ်သို့ ပြောင်းလဲသွားကာ သတ္တမအဆင့်အစီအရင်ပညာရှင်တစ်ဦး၊ ခန္ဓာပေါင်းစည်းခြင်းအဆင့် ကျင့်ကြံသူတစ်ဦးက ဤသတ္တမအဆင့် အထွတ်အထိပ် အစီအရင်ကြီးကို ထိန်းချုပ်နေသည့်အလား အစီအရင်၏ စွမ်းပကားကို ပြီးပြည့်စုံစွာ ထုတ်ဖော်ပြသနိုင်စွမ်း ရှိသွားလေသည်။

ဤသည်မှာလည်း ကျိုးစွေ့၏ ယုံကြည်မှုများထဲမှ တစ်ခုပင် ဖြစ်၏။

ဖုန်းရှီးမြို့တော်အတွင်း၌သာ ရှိနေပြီး ကိုးရောင်ခြယ်နေမင်းအစီအရင်ကြီးကို ထိန်းချုပ်ထားနိုင်သရွေ့ သတ္တမအဆင့် ဝိညာဉ်ကြော၏ ကြီးမားလှသော စွမ်းအင်ကို အသုံးချကာ ခန္ဓာပေါင်းစည်းခြင်းအဆင့် ကျင့်ကြံသူနှင့် တိုက်ခိုက်ရမည်ဆိုလျှင်ပင် မဖြစ်နိုင်သည့်ကိစ္စရပ် မဟုတ်ပေ။

ထိုခဏတွင် သူ၏ မူလဝိညာဉ်သည် ဤသတ္တမအဆင့်အစီအရင်ကြီးထဲသို့ ပေါင်းစည်းသွားသကဲ့သို့ ခံစားလိုက်ရသည်။

အစီအရင်အချိတ်အဆက်ပေါင်း တစ်သိန်းနှစ်သောင်းကိုးထောင်ခြောက်ရာက သူ၏ မူလဝိညာဉ်နက်ရှိုင်းသည့်နေရာတွင် ပေါ်ထွက်လာပြီး အစီအရင်အချိတ်အဆက်တိုင်းသည် ကြယ်ရောင်များကဲ့သို့ စူးရှတောက်ပသော အလင်းရောင်များကို ထုတ်လွှတ်ကာ အစွမ်းထက်သော စွမ်းအားများနှင့် အငွေ့အသက်များကို ထုတ်လွှတ်နေကြသည်။

အစီအရင်ကို လည်ပတ်လိုက်သည့်အချိန်တွင် အစီအရင်အချိတ်အဆက်ပေါင်း တစ်သိန်းနှစ်သောင်းကိုးထောင်ခြောက်ရာသည် ချက်ချင်း တုန်ခါလာပြီး မြေကြီးနက်ရှိုင်းသည့်နေရာရှိ သတ္တမအဆင့်ဝိညာဉ်ကြောနှင့် ချိတ်ဆက်မိသွားပုံရကာ အဆုံးမဲ့ ကောင်းကင်မြေကြီး ဝိညာဉ်ချီများက လှိုင်းလုံးကြီးများကဲ့သို့ ရိုက်ခတ်လာလေသည်။

ဝိုးတဝါးဖြင့်ပင် အစီအရင်ကြီးမှာ လှုံ့ဆော်မှုခံလိုက်ရပြီး ကောင်းကင်နှင့်မြေကြီးကြားရှိ သန့်စင်သော ယန်စွမ်းအား၊ မီးလျှံစွမ်းအားများအားလုံး စုစည်းသွားကြကာ တောက်ပသော နေမင်းများအဖြစ် ဖြစ်ပေါ်လာပြီး အစီအရင်၏ မတူညီသော နေရာကိုးခုတွင် လွင့်မျောနေကြတော့သည်။