အခန်း ၈၂၈

အခန်း (၈၂၈) - လူနှင့်အစီအရင် ပေါင်းစည်းခြင်း၊ အစစ်အမှန်နေမင်းမီးတောက်၊ သတ္တမအဆင့်အစီအရင်၏ စွမ်းပကားနှင့် ခန္ဓာပေါင်းစည်းခြင်းအဆင့် စွမ်းအား (၃) ။

ဤသည်ကား ဤသတ္တမအဆင့်အစီအရင်ကြီး၏ အကြီးမားဆုံးသော စွမ်းအားပင် ဖြစ်၏။

နေကိုးစင်း ကောင်းကင်ကို ဖြတ်သန်းခြင်းပင်။

"ဘယ်လိုလုပ် ဖြစ်နိုင်မှာလဲ...”

"ကိုးရောင်ခြယ်နေမင်းအစီအရင်ကို အပြည့်အဝ အသက်သွင်းနိုင်တယ်ပေါ့...”

"ဒါက တကယ်ပဲ ဘယ်လိုလုပ်နိုင်တာလဲ...”

"နေပါဦး မဟုတ်သေးဘူး။ ဒီအစီအရင်ရဲ့ ထိန်းချုပ်ခွင့်က ငါ့လက်ထဲမှာ ရှိနေတာပဲ။ သူ ဘယ်အချိန်တုန်းက လုယူသွားတာလဲ...”

ထောင်ချီလီမှာ မျက်လုံးအဝိုင်းသား ဖြစ်သွားပြီး လုံးဝ ကြက်သေသေသွားလေ၏။ ဘာပြောရမှန်းပင် မသိတော့ချေ။

အဘယ်ကြောင့်ဆိုသော် သူမလက်ထဲတွင် ဤသတ္တမအဆင့် အဆင့်မြင့်အစီအရင်ဖြစ်သော 'ကိုးရောင်ခြယ်နေမင်းအစီအရင်' ၏ အမိန့်ပေးအလံ ရှိနေသောကြောင့်ပင်။

ထိုအလံကို ကိုင်ဆောင်ထားသောကြောင့်သာလျှင် သူမက ဤအစီအရင်၏ ထိန်းချုပ်ခွင့်ကို ရရှိထားခြင်း ဖြစ်၏။

အစီအရင်အတွင်း၌ ရှိနေချိန်တွင် သူမသည် သဘာဝကျကျပင် ပြိုင်ဘက်ကင်းသော တည်ရှိမှုတစ်ခု ဖြစ်ပေသည်။

သို့သော်လည်း ယခုအခါတွင်မူ 'ကိုးရောင်ခြယ်နေမင်းအစီအရင်' အပေါ် သူမ၏ ထိန်းချုပ်နိုင်စွမ်းက မည်သည့်အချိန်တွင် လုံးဝပျောက်ကွယ်သွားသည်ကိုပင် သူမ မသိလိုက်ချေ။

သူမက ဤအစီအရင်ကို အသက်သွင်းရန် ကြိုးစားကြည့်သော်ငြား မည်သို့မျှ အသုံးမဝင်ကြောင်း တွေ့လိုက်ရလေသည်။

အမှန်အတိုင်းပြောရလျှင် 'ကိုးရောင်ခြယ်နေမင်းအစီအရင်' ကို ထိန်းချုပ်ထားသူမှာ ကျိုးစွေ့သာ မဟုတ်ပါက သူမ၏အာဏာကို တစ်စုံတစ်ယောက်က လုယူသွားပြီဟုပင် ထင်မှတ်မိ‌ပေမည်။

ပြဿနာမှာ ပုံမှန်အားဖြင့်ဆိုလျှင် ဤအစီအရင်၏ ထိန်းချုပ်ခွင့်မှာ သူမ၏လက်ထဲတွင် အစောကြီးကတည်းက ရှိနေသင့်ခြင်းပင်။ သူမရှေ့ရှိ ဤအမျိုးသားက မည်သည့်အချိန်တွင် သူမ၏ ထိန်းချုပ်ခွင့်ကို တိတ်တဆိတ် လုယူပြောင်းလဲသွားသနည်း။

အဘယ်ကြောင့်ဆိုသော် အစီအရင်၏ ထိန်းချုပ်ခွင့်ကို အသံတိတ် လုယူပြောင်းလဲရန်ဟူသည်မှာ လုံးဝနီးပါး မဖြစ်နိုင်သော ကိစ္စတစ်ခု ဖြစ်သောကြောင့်ပင်။

အထူးသဖြင့် သူမကိုယ်တိုင်က သတ္တမအဆင့်အစီအရင်ပညာရှင်တစ်ယောက် ဖြစ်နေသောကြောင့် ဖြစ်လေသည်။

လောကကြီးတွင် အစီအရင်အပေါ် သူမ၏ ထိန်းချုပ်နိုင်စွမ်းကို အသံတိတ် လုယူနိုင်လောက်သည့်အထိ စွမ်းဆောင်နိုင်သော ဤမျှအဆင့်မြင့်သည့် အစီအရင်ပညာရှင်မျိုး မည်ကဲ့သို့ ရှိနေနိုင်မည်နည်း။

ကိုယ်တိုင် မျက်မြင်ကိုယ်တွေ့ မကြုံရပါက ဤမျှ အဓိပ္ပာယ်မဲ့သော ကိစ္စမျိုးကို မည်သူက ယုံကြည်နိုင်ပါမည်နည်း။

သူမရှေ့ရှိ အမျိုးသား၏ အစီအရင်နှင့်ပတ်သက်သော နားလည်သဘောပေါက်မှုအဆင့်မှာ သူမထင်ထားသည်ထက်ပင် ပို၍ ကြောက်မက်ဖွယ်ကောင်းနေသည်ဟုသာ ပြောရမည် ဖြစ်၏။

'ဒီလူ အစောကြီးကတည်းက အဋ္ဌမအဆင့် အစီအရင်ပညာရှင် ဖြစ်နေတာတော့ မဟုတ်ပါဘူးနော်...'

ဝုန်း... ဝုန်း... ဝုန်း...။

ကျိုးစွေ့အနေဖြင့် ဤအရာကို မည်သို့လုပ်ဆောင်ခဲ့သည်ကို ထောင်ချီလီ နားလည်အောင် တွေးတောချိန်ပင် မရလိုက်ချေ။ ထိုအချိန်၌ပင် ကျိုးစွေ့က 'ကိုးရောင်ခြယ်နေမင်းအစီအရင်' ၏ စွမ်းအားများကို ချက်ချင်း ကြိုးကိုင်ခြယ်လှယ်ကာ နေမင်းကိုးစင်းအဖြစ်သို့ စုစည်းလိုက်လေသည်။

အဆုံးမဲ့သော အစစ်အမှန်နေမင်းမီးလျှံများက တစ်စုတစ်စည်းတည်း ပေါင်းဆုံသွားကြ၏။ ၎င်းတို့အပေါ်တွင် သိပ်သည်းများပြားလှသော နေမင်းမန္တန်အက္ခရာများ ပေါ်လာပြီး အဆုံးအစမဲ့သော အပူရှိန်များကို ထုတ်လွှတ်ကာ ဤကမ္ဘာလောကတစ်ခုလုံးကို လွှမ်းခြုံသွားတော့သည်။

တောင်များကို ပြာကျစေပြီး ပင်လယ်များကို ခန်းခြောက်စေနိုင်သည့် အစွမ်းသတ္တိများ ပါဝင်နေသည်ဟုပင် ဆိုရ‌ပေမည်။

"ဘယ်လိုလုပ် ဖြစ်နိုင်မှာလဲ။ သတ္တမအဆင့် အဆင့်မြင့်အစီအရင်ကြီး ဖြစ်နေတာပဲ...”

"ချီးတဲ့မှ… ဒီနေရာမှာ သတ္တမအဆင့်အစီအရင်ပညာရှင်တစ်ယောက် ပုန်းကွယ်နေတာပဲ။ ပြီးတော့ ခန္ဓာပေါင်းစည်းခြင်းအဆင့် ကျင့်ကြံသူ ဖြစ်နေသေးတယ်...”

ထိုအချိန်၌ပင် သွေးလမင်းမျိုးနွယ်စု၏ ခန္ဓာပေါင်းစည်းခြင်းအဆင့် ကျင့်ကြံသူ သွေးဝမ်ယန်မှာ ချက်ချင်း ကြက်သေသေသွားတော့၏။

မူလက သူသည် အဆင့်မြင့် ကောင်းကင်အဆင့်ဝိညာဉ်ရတနာ 'သွေးမီးလျှံလှံရှည်' ၏ စွမ်းအားများကို ဆက်လက်လည်ပတ်စေပြီး ဤသတ္တမအဆင့်အစီအရင်ကို ထိုးခွဲဖျက်ဆီးရန် ရည်ရွယ်ထားခဲ့ခြင်း ဖြစ်သည်။

သတ္တမအဆင့်အစီအရင်သာ ပျက်စီးသွားပါက ဤမြို့တော်အတွင်းရှိ သက်ရှိများကို သတ်ဖြတ်ရန်မှာ လက်ဖဝါးလှန်တာထက်ပင် လွယ်သေးသည် မဟုတ်ပါလော။

ထိုအချိန်ရောက်လျှင် ပါးစပ်တစ်ချက်ဟလိုက်ရုံဖြင့် ဤအားနည်းသော သက်ရှိများကို သွေးမြစ်တစ်စင်းအဖြစ် ချက်ချင်း သန့်စင်ပစ်နိုင်မည် ဖြစ်သည်။

ထိုသွေးမြစ်၏ စွမ်းအားကို အသုံးပြု၍ ၎င်း၏ ကျင့်ကြံမှုအဆင့်ကို အလျင်အမြန် ပြန်လည်ကောင်းမွန်လာစေနိုင်ရုံသာမက ကျင့်ကြံမှုအဆင့်ကိုလည်း ထပ်မံတိုးတက်စေနိုင်မည် ဖြစ်၏။ ခန္ဓာပေါင်းစည်းခြင်းအဆင့် အလယ်အလတ်သို့ပင် တက်လှမ်းနိုင်ကောင်း တက်လှမ်းနိုင်ပေမည်။

သို့သော် ယခုအခါတွင်မူ သူ့အနေဖြင့် ဤသူစိမ်းမြို့တော်၏ အင်အားကို အထင်သေးမိခဲ့ကြောင်း သိလိုက်ရလေပြီ။

သတ္တမအဆင့်အစီအရင် ခင်းကျင်းထားရုံ သာမန်မျှမဟုတ်ဘဲ ခန္ဓာပေါင်းစည်းခြင်းအဆင့် သတ္တမအဆင့်အစီအရင်ပညာရှင်တစ်ယောက်ပါ ရှိနေပုံရ၏။

ထိုနှစ်ခုပေါင်းစပ်၍ ထွက်ပေါ်လာသော စွမ်းအားမှာ လုံးဝ နှိုင်းယှဉ်၍မရနိုင်လောက်အောင် ကြီးမားလှသည်။

'သူ့ကို အင်အားသုံးပြီး ရင်ဆိုင်လို့မရဘူး။ အမြန် ထွက်ပြေးမှ ဖြစ်မယ်...'

ဤနေရာသို့ တွေးမိသောအခါ သွေးဝမ်ယန်၏ မျက်နှာက အထူးတလည် ပြောင်းလဲသွားတော့၏။

အကယ်၍ ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်တည်းဆိုလျှင် ထားလိုက်လို့ရပေသည်။ ၎င်းအနေဖြင့် တစ်ဖက်လူနှင့် အကွက်အနည်းငယ်လောက် ယှဉ်ပြိုင်နိုင်သေး၏။ သို့သော် သတ္တမအဆင့်အစီအရင်၏ စွမ်းအားပါ ပေါင်းထည့်လိုက်ပါက လုံးဝကို ကွာခြားသွားပြီ ဖြစ်သည်။

ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်နှင့် အစီအရင်အတွင်း ယှဉ်ပြိုင်တိုက်ခိုက်ခြင်းမှာ ကိုယ့်သေတွင်း ကိုယ်တူးခြင်းပင်။

ရွှီး...။

ချက်ချင်းပင် ၎င်း၏ခန္ဓာကိုယ်က ဖျပ်ခနဲ လှုပ်ရှားသွားပြီး ဤအန္တရာယ်များသော နေရာမှ ထွက်ခွာဖို့ရာ တည်နေရာပြောင်းရွှေ့ခြင်း စွမ်းအားကို အသုံးပြုရန် ကြိုးစားလိုက်လေသည်။

ဤနေရာမှ ထွက်ခွာနိုင်သည်နှင့် သွေးလမင်းမျိုးနွယ်စု စခန်းချရာနေရာသို့ ပြန်သွားမည်ဖြစ်ပြီး၊ ထို့နောက် မျိုးနွယ်စုဝင်အများအပြားကို ခေါ်ဆောင်လာကာ ဤအားနည်းသော မျိုးနွယ်စုများကို အမြစ်ပြတ် သုတ်သင်ပစ်မည် ဖြစ်၏။

၎င်း၏ လက်အောက်ငယ်သားများအတွက်မူ ဤနေရာတွင် ကျဆုံးရုံမှတစ်ပါး အခြားမရှိတော့ချေ။

မည်သို့ပင်ဖြစ်စေ ၎င်းအနေဖြင့် ထိုသူများကို ကယ်တင်နိုင်စွမ်း မရှိတော့ပေ။

ဝုန်း...

သို့သော် ၎င်း ထွက်ပြေးရန် ကြိုးစားချိန်တွင်မူ အလွန် နောက်ကျသွားခဲ့လေပြီ။

နေမင်းကိုးစင်း ကောင်းကင်ယံတွင် ပေါ်ထွက်လာသည့် တဒင်္ဂအတွင်းမှာပင် ဧရာမအစီအရင် အတားအဆီးကြီးတစ်ခုက ကီလိုမီတာ တစ်သန်းအကျယ်အဝန်းအထိ ချက်ချင်း ပြန့်ကျက်သွားကာ ကောင်းကင်နှင့် နေရောင်ကိုပင် ဖုံးကွယ်သွားပြီး လေဟာနယ်ကို ဖြတ်တောက်လိုက်တော့သည်။

ချက်ချင်းပင် ဤဧရိယာအတွင်းရှိ နေရာလွတ်အားလုံးကို ဖြတ်တောက်လိုက်ပြီး လေဟာနယ်ခံတပ်တစ်ခုအဖြစ် ဖန်တီးလိုက်၏။

အုန်း...

ချက်ချင်းပင် သွေးဝမ်ယန်သည် လုံးဝ တည်နေရာပြောင်းရွှေ့၍ မရနိုင်တော့ကြောင်း တွေ့ရှိလိုက်ရသည်။ အဘယ်ကြောင့်ဆိုသော် ၎င်း၏ အရပ်ရှစ်မျက်နှာလုံးကို အစီအရင်အတားအဆီးများက လွှမ်းခြုံထားသောကြောင့်ပင် ဖြစ်လေသည်။

တည်နေရာပြောင်းရွှေ့ရန် ကြိုးစားပါကလည်း အစီအရင်အတားအဆီးနှင့် လေဟာနယ်ခံတပ်ကိုသာ ဝင်တိုက်မိမည် ဖြစ်၏။

ဤသည်ကပင် သတ္တမအဆင့်အစီအရင်ကို အစွမ်းကုန် အသက်သွင်းလိုက်သည့်အခါ ဖြစ်ပေါ်လာသော ကြောက်မက်ဖွယ်ရာ စွမ်းအားပင်။

ခန္ဓာပေါင်းစည်းခြင်းအဆင့် ကျင့်ကြံသူပင်လျှင် တည်နေရာပြောင်းရွှေ့၍ ထွက်ပြေးနိုင်မည် မဟုတ်ဘဲ လူတိုင်း၏ ဆုတ်ခွာရာလမ်းကို ဖြတ်တောက်ပစ်လိုက်ခြင်း ဖြစ်ပေသည်။

"ဒုက္ခပဲ။ ဒါက အစစ်အမှန်နေမင်းမီးလျှံတွေပဲ...”

သွေးဝမ်ယန်၏ မျက်နှာမှာ စိမ်းဖန်သွားတော့၏။

ကောင်းကင်ယံရှိ ပူပြင်းသော နေမင်းကိုးစင်းမှာ ယခုအချိန်တွင် တစ်သားတည်း ပေါင်းစည်းသွားသကဲ့သို့ ခံစားလိုက်ရသည်။

အဆုံးမဲ့သော မီးလျှံစွမ်းအားများက တစ်စုတစ်စည်းတည်း ပေါင်းဆုံသွားကြပြီး ရွှေရောင်မီးတောက်များအဖြစ် ဖန်တီးလိုက်လေသည်။

ဤသည်က နာမည်ကျော်ကြားလှသော အစစ်အမှန်နေမင်းမီးလျှံပင် ဖြစ်၏။

ဝိညာဉ်ကမ္ဘာတွင်ပင်လျှင် အစစ်အမှန်နေမင်းမီးလျှံ၏ စွမ်းအားမှာ ထိပ်ဆုံးဆယ်ခုစာရင်းဝင်ပြီး တောင်များကို ပြာကျစေကာ ပင်လယ်များကို ခန်းခြောက်စေနိုင်သည့် အစွမ်းသတ္တိများ ပါဝင်ပေသည်။

တစ်ချက် ထိတွေ့မိသည်နှင့် ခန္ဓာပေါင်းစည်းခြင်းအဆင့် ကျင့်ကြံသူ၏ ခန္ဓာကိုယ်ပင်လျှင် အရိုးအစအနမကျန် ပြကျသွားရပေမည်။

"'ကိုးရောင်ခြယ်နေမင်းအစီအရင်' ရဲ့ စွမ်းအားတွေကို အပြည့်အဝ အသက်သွင်းနိုင်တယ်ပေါ့...”

"နောက်နေတာလား။ ဒါက တကယ်ပဲ ဘယ်လိုလုပ်နိုင်တာလဲ...”

"ဒီလူက လေဟာနယ်သန့်စင်ခြင်းအဆင့် အစောပိုင်း ကျင့်ကြံသူလေးပဲဟာကို...”

သတ္တမအဆင့်အစီအရင်ပညာရှင်ဖြစ်သော ထောင်ချီလီမှာလည်း လုံးဝ ကြက်သေသေသွားပြီး ဘာပြောရမှန်းပင် မသိတော့ချေ။

အဘယ်ကြောင့်ဆိုသော် ဖုန်းရှီးမြို့တော် တည်ထောင်ခဲ့သည့် နှစ်တစ်ထောင်ကျော် ကာလအတွင်း ဤအစီအရင်၏ စွမ်းအားနှစ်ဆယ် သို့မဟုတ် သုံးဆယ်ရာခိုင်နှုန်းခန့်ကိုသာ အသုံးပြုနိုင်ခဲ့သောကြောင့်ပင်။

မည်သို့ပင်ဆိုစေကာမူ ခန္ဓာပေါင်းစည်းခြင်းအဆင့် ကျင့်ကြံသူများသာလျှင် သတ္တမအဆင့်အစီအရင်၏ စွမ်းအားကို အသက်သွင်းနိုင်သည် မဟုတ်ပါလော။

ပြဿနာမှာ ဖုန်းရှီးတာအိုအရှင်သည် ခန္ဓာပေါင်းစည်းခြင်းအဆင့် ကျင့်ကြံသူ ဖြစ်သော်ငြား အစီအရင်များနှင့်ပတ်သက်၍မူ များများစားစား နားမလည်ခဲ့ပေ။

သဘာဝကျကျပင် ဤသတ္တမအဆင့်အစီအရင်ကို ပြီးပြည့်စုံစွာ မထိန်းချုပ်နိုင်ခဲ့ချေ။

ထောင်ချီလီမှာမူ သတ္တမအဆင့်အစီအရင်ပညာရှင် ဖြစ်သော်လည်း လေဟာနယ်သန့်စင်ခြင်းအဆင့် ကျင့်ကြံသူသာ ဖြစ်နေသောကြောင့် အစွမ်းကုန် အသက်မသွင်းနိုင်ခဲ့ချေ။

ထို့ကြောင့် အကြောင်းရင်းအမျိုးမျိုး ပေါင်းစပ်သွားသောအခါ ယခင် နှစ်တစ်ထောင်ကျော် ကာလအတွင်း ဤသတ္တမအဆင့် အဆင့်မြင့်အစီအရင်၏ စွမ်းအားကို သုံးဆယ်ရာခိုင်နှုန်းခန့်သာ ဖော်ထုတ်နိုင်ခဲ့ခြင်း ဖြစ်လေသည်။

မှန်ပေသည်၊ ထိုသို့ဖြစ်နေလျှင်ပင် စွမ်းအား သုံးဆယ်ရာခိုင်နှုန်းခန့်သာ ဖော်ထုတ်နိုင်သော သတ္တမအဆင့် အဆင့်မြင့်အစီအရင်သည် ဖုန်းရှီးမြို့တော်အား ရှုံးနိမ့်ခြင်းမရှိသည့် အနေအထားတွင် ရပ်တည်နိုင်စေရန် လုံလောက်နေခဲ့ပြီ ဖြစ်၏။

ခန္ဓာပေါင်းစည်းခြင်းအဆင့် ကျင့်ကြံသူ အများအပြား လာရောက်ဝိုင်းဝန်း တိုက်ခိုက်လျှင်ပင် ဖုန်းရှီးမြို့တော်ကို မည်သို့မျှ မတတ်နိုင်ခဲ့ချေ။

သို့သော် ယခုမူ မတူညီတော့ပေ။

'ကိုးရောင်ခြယ်နေမင်းအစီအရင်' သည် တစ်စုံတစ်ယောက်၏ အစွမ်းကုန် အသက်သွင်းခြင်းကို ခံလိုက်ရလေပြီ။

ဤအချိန်တွင် သတ္တမအဆင့် အဆင့်မြင့်အစီအရင်တစ်ခု အစွမ်းကုန် လည်ပတ်သွားသည့်အခါ ထွက်ပေါ်လာသည့်စွမ်းအားမှာ မည်မျှ ကြောက်မက်ဖွယ်ကောင်းကြောင်းနှင့် အစစ်အမှန်နေမင်းမီးလျှံ၏ စွမ်းအားကိုပင် အသက်သွင်းနိုင်ကြောင်း ထောင်ချီလီတစ်ယောက် တကယ့်ကို မျက်မြင်ကိုယ်တွေ့ ကြုံလိုက်ရပြီ ဖြစ်သည်။