အခန်း ၁၂၄၇

အခန်း (၁၂၄၇) စီနီယာအစ်ကိုက မင်းကို ခဏတာတော့ကာကွယ်ပေးထားမယ်

လင်းရွှီဂူ၊ တစ်ပိုင်းပြိုကမ်းပါး..

အစစ်အမှန်အရှင် ယွင်မြောင်က ရှေ့သို့ ဖြည်းညှင်းစွာလျှောက်သွားပြီး အရှေ့မှပုံရိပ်ကို လှမ်းခေါ်လိုက်၏။ "ဆေးဧကရာဇ်ဂျူနီယာညီလေး၊ မင်း ကောင်းကင်မျှော်စင်တောင်ကို စောင့်ရှောက်နေတာ မဟုတ်ဘူးလား။ ဘာလို့ ပြန်လာတာလဲ။"

ယခုလေးတင် ဆင်းသက်လာသော ရှန်းယီက အနည်းငယ် လန့်သွားပြီးနောက် ရှင်းပြရန် လက်ယှက်လိုက်သည်။ "အစစ်အမှန်အရှင်မ လင်းစုက မကြာသေးခင်က စိတ်မသက်မသာဖြစ်နေလို့ စိတ်ပြေလက်ပျောက် အပြင်ထွက်သွားတယ်လို့ ဂိုဏ်းက တပည့်တွေဆီကနေ ကျွန်တော် ကြားလိုက်တယ်။ အဲဒါက ကျွန်တော့်ကြောင့်များလားလို့ အကြာကြီးစဉ်းစားပြီး စိတ်ပူနေမိတယ်။ ဒါကြောင့် ဂူထဲပြန်လာပြီး အချိန်အတိုင်းအတာတစ်ခုအထိ ကျင့်ကြံဖို့ စီစဉ်လိုက်တာပါ။"

"..."

အစစ်အမှန်အရှင် ယွင်မြောင်၏မျက်နှာက အနည်းငယ် အေးခဲသွား၏။ ဤကဲ့သို့သော ကိစ္စမျိုးကိုတုံ့ပြန်ရန်အချိန်အကြာကြီး စဉ်းစားဖို့ အမှန်တကယ် လိုအပ်သည်လော။

သို့သော် သူ ထပ်မံ စဉ်းစားလိုက်ပြန်သည်။ တောင်ပိုင်းတိုက်ကြီးက မကျိုးပျက်သေးပေ။ တစ်ဖက်လူက ယုံကြည်မှုစွမ်းအင်များကို ခွဲဝေသည့် ကိစ္စရပ်များကို မထိတွေ့ဖူးသေးသလို အတွင်းရေးနည်းလမ်းများကိုလည်း နားမလည်သေးသည်မှာ အတော်လေး ယုတ္တိတန်၏။

ယခုအချိန်မှ သံသယကင်းရှင်းရန် ရှောင်ရှားဖို့ သတိရခြင်းက အနည်းငယ် နောက်ကျနေမည်သာ ဖြစ်သည်။

အစစ်အမှန်အရှင် ယွင်မြောင်က သက်ပြင်းချလိုက်ပြီး အတင်းအကျပ်ပြုံးလိုက်၏။ "ဆေးဧကရာဇ် ဂျူနီယာညီလေး၊ မင်း အရမ်း တွေးလွန်နေပါပြီ။ သူ စိတ်ပြေလက်ပျောက် အပြင်ထွက်သွားတာကြောင့်ကိုပဲ မင်းက ကောင်းကင်မျှော်စင်တောင်မှာ နေပြီး စောင့်ကြည့်ပေးဖို့ ပိုတောင် လိုအပ်သေးတယ်။"

သူက ခေါင်းခါလျက် ပြောလိုက်သည်။ "မင်းက မြောက်ပိုင်းတိုက်ကြီးကို အခုမှရောက်လာတာဆိုတော့ သိပ်နားမလည်သေးဘူး။ ဒီကျယ်ပြောလှတဲ့ နယ်မြေကြီးက ငါတို့ မသေမျိုးသုံးပါးဂိုဏ်းရဲ့ တာအိုနယ်မြေတွေနဲ့ ပြည့်နေပေမယ့် ဂိုဏ်းချုပ်သုံးပါးနဲ့ အရပ်ငါးမျက်နှာ ဧကရာဇ်တွေရဲ့အောက်မှာ မရေမတွက်နိုင်တဲ့ မသေမျိုး မျိုးဆက်တွေ လက်ဆင့်ကမ်းလာခဲ့တာပဲ။ ငါတို့ လင်းရွှီဂူက အဲဒီအထဲက တစ်ခုတည်းပါ။"

"ငါတို့က တစ်ယောက်နဲ့တစ်ယောက် ဂိုဏ်းတူတပည့်တွေလို့ ခေါ်ကြပေမယ့်..."

အစစ်အမှန်အရှင် ယွင်မြောင်သည် ယခင်အုပ်စုထံမှ ရရှိခဲ့သောတုံ့ပြန်မှုကို ပြန်တွေးမိပြီး သူ၏ အပြုံးတွင် လှောင်ပြောင်မှုအချို့မထည့်ဘဲ မနေနိုင်ခဲ့ပေ။ "ဒီဂူတွေကြားက ဆက်ဆံရေးက မင်းထင်သလောက် မသင့်မြတ်ကြဘူး။ တောင်ပိုင်းတိုက်ကြီးမှာ မင်းတို့ဗောဓိဂိုဏ်းနဲ့ ရန်သူတွေလို ဆက်ဆံရေးမျိုးနဲ့တော့ မတူပေမယ့် သိပ်တော့ မကွာပါဘူး။"

"တချို့ အကြီးအကဲတွေဆိုရင် အစတုန်းက အမိန့်ပေးခဲ့တာ ရှင်းနေပေမယ့်၊ ဒီလောက်ကြာတာတောင် မင်းကို မျက်နှာတစ်ချက်တောင် လာမပြသေးတာမျိုးပေါ့။"

လင်းစု ထွက်ခွာသွားခြင်းက အစစ်အမှန်အရှင် ယွင်မြောင်အပေါ် ပြင်းထန်သော ထိုးနှက်ချက်တစ်ခု ဖြစ်စေခဲ့ကြောင်း ရှင်းလင်းနေ၏။

ဤအခိုက်အတန့်တွင် ရှန်းယီကို သိမ်းသွင်းလိုသည့်အပြင် သူ၏စကားများထဲတွင် မကျေနပ်ချက်များစွာလည်း ပါဝင်နေသည်။

"စိတ်ချပါ ဂျူနီယာညီလေး။ မင်း နာကြည်းစရာတွေ အများကြီး ခံစားခဲ့ရတယ်ဆိုတာ ငါ သိပါတယ်။ ဆရာမပြန်လာခင် တခြားသူတွေ မင်းကို အနိုင်ကျင့်နေတာကို ငါ လက်ပိုက်ကြည့်နေမှာ မဟုတ်ပါဘူး။"

"လမ်းညွှန်ပေးတဲ့အတွက် ကျေးဇူးတင်ပါတယ် စီနီယာအစ်ကို ယွင်မြောင်။"

ရှန်းယီသည် မသေမျိုးဂိုဏ်း ဖျက်ဆီးခံရမှုနှင့် ထိုဘုန်းကြီး၏လက်ချက်ဖြင့် ဆရာဖြစ်သူ သေဆုံးခဲ့ရသည်ကို ပြန်လည်သတိရမိဟန်ဖြင့် မျက်လွှာကို အနည်းငယ်ချလိုက်၏။ အချိန်အတော်ကြာ တိတ်ဆိတ်နေပြီးနောက် သူက ညင်သာစွာ သက်ပြင်းချလိုက်သည်။ "ကျွန်တော် ကောင်းကင်မျှော်စင်တောင်ကို အရင် ပြန်သွားပါ့မယ်။ ဒါပေမယ့် အစစ်အမှန်အရှင်မလင်းစုကို စကားတစ်ခွန်းလောက် ပါးပေးပါဦး။"

"ကျွန်တော် မြောက်ပိုင်းတိုက်ကြီးကို လာတာက ထွက်ပြေးဖို့ သက်သက်မဟုတ်ဘဲ ရှန်းရွှီတောင်အတွက်တရားမျှတမှုကို ရှာဖွေဖို့လည်း ပါပါတယ်။ ကျွန်တော် တာအိုနယ်မြေ လိုချင်ရင်တောင် ကျွန်တော့်ဘာသာ ရှာပါ့မယ်။ အစစ်အမှန်အရှင်မ လင်းစု ပြန်လာတဲ့အခါ ကောင်းကင်မျှော်စင်တောင်က သူ့နေရာအဖြစ်ပဲ ဆက်ရှိနေပါလိမ့်မယ်။"

"..."

အစစ်အမှန်အရှင် ယွင်မြောင်က အသာအယာသာ ခေါင်းညိတ်ပြလိုက်၏။

လွန်ခဲ့သောတစ်ကြိမ်က ရှန်းယီ ထွက်သွားစဉ် ပြသခဲ့သည့် ပြင်းထန်ပြီးအလျှော့မပေးသော အမူအရာအပေါ် အခြေခံကြည့်လျှင် ဤစကားက လောလောဆယ်တွင် အမှန်ပင်။

သို့သော် တာအိုနယ်မြေတစ်ခု၏အကျိုးအမြတ်များနှင့် ဧကရာဇ်ချီ၏အရသာကို သူ အမှန်တကယ် မြည်းစမ်းမိသွားပြီး ကောင်းကင်မျှော်စင်တောင်ကို ပြန်လွှဲပြောင်းပေးရန် တောင်းဆိုခံရသည့် နေ့တွင်မူ သူ၏အတွေးများက ကွဲပြားသွားနိုင်ပေသည်။

"နှုတ်ဆက်ပါတယ် စီနီယာအစ်ကို။"

ရှန်းယီသည် လှည့်ကာ ထိုက်ရွှီထဲသို့ ပြန်လည် ဝင်ရောက်သွားသည်။

ဤအပြန်ခရီးစဉ်က လင်းရွှီဂူ၏အကြီးဆုံး စီနီယာအစ်ကို၏ သဘောထားကို အဆုံးအဖြတ်ပေးမည် ဖြစ်သည်။

လွန်ခဲ့သောတစ်ကြိမ်က ယွင်မြောင်အား လင်းစု ကြည့်ခဲ့သော အကြည့်အပေါ် အခြေခံ၍ သူ့ကို ကိုင်တွယ်မည့် အစီအစဉ်များနှင့် ပတ်သက်ပြီး လင်းစု သေချာပေါက် အသိပေးမည်မဟုတ်ကြောင်း ရှန်းယီ သေချာနေခဲ့သည်။ ထို့အတူ ၎င်းက အမှန်တကယ်ပင် ဖြစ်လာခဲ့၏။

ထို့ကြောင့် မြောက်ပိုင်းတိုက်ကြီးသို့ ပေါင်းစည်းဝင်ရောက်မည့် ရှန်းယီ၏လမ်းကြောင်းက တစ်ဝက် ပွင့်သွားပြီ ဖြစ်၏။

ယခုအခါ ရှန်းယီ၏အကြီးမားဆုံး ပြဿနာများမှာ ဗောဓိဂိုဏ်းနှင့် စာရင်းရှင်းရန် ကိစ္စနှင့် ဒုတိယအဆင့် တာအိုလမ်းကြောင်းကို မည်သို့ ဖြတ်ကူးရမည်နည်း ဆိုသည်တို့ဖြစ်ကြောင်း သံသယရှိစရာ မလိုပေ။

ပထမယနှင့် ဒုတိယတို့မှာ တကယ်တမ်းတွင် တူညီသောအရာတစ်ခုတည်းပင် ဖြစ်သည်။

ဆိုလိုသည်မှာ မသေမျိုးသုံးပါးဂိုဏ်းသို့ အမှန်တကယ် ဝင်ရောက်ပြီး စစ်မှန်သော ကျွမ်းကျင်မှုကို ရရှိရန်လုံလောက်သည့် မြင့်မားသော အဆင့်အတန်းတစ်ခု မည်သို့ ရယူမည်နည်း ဆိုသည်ပင်။

ကောင်းကင်မျှော်စင်တောင်ကို ထိန်းချုပ်ရယူခြင်းက ဤအပြောင်းအလဲ၏အစပြုခြင်းကို အမှတ်အသား ပြုနေပေသည်။

နောက်ဆုံးတွင် ကောင်းမွန်သော အစပြုရာနေရာတစ်ခု ရှိလာခဲ့ပြီ ဖြစ်သည်။ ကျန်သည်တို့မှာ ခွန်အားအပေါ်တွင်သာ မူတည်ပါတော့မည်။

ခွဲယူမည့်သူများပြားပြီး ဝေစရာနည်းပါးလှသော မြောက်ပိုင်းတိုက်ကြီးတွင်၊ မိမိကိုယ်ကို အထင်ကြီးနေကြသော ဤမဟာဂိုဏ်းကြီး၏အစစ်အမှန် တပည့်များက ပြင်ပလူတစ်ဦးက တာအိုနယ်မြေတစ်ခုကို ယူသွားသည်ကို ဘယ်သောအခါမျှ လက်ပိုက်ကြည့်နေကြမည် မဟုတ်ပေ။

...

နေနှင့် လတို့ အပြိုင်အဆိုင် ဝင်လိုက်ထွက်လိုက်ဖြင့် နောက်ထပ်နှစ်လကုန်လွန်သွားသည်။

အစစ်အမှန်အရှင် ယွင်မြောင်က ကမ်းပါးစွန်းတွင် ထိုင်လျက် တရားထိုင်ကျက့်ကြံခြင်းကို လုပ်ဆောင်နေဆဲဖြစ်သော်လည်း၊ တစ်ခါတစ်ရံတွင် လင်းစု၏ဂူဆီသို့ လှမ်းကြည့်တတ်၏။ သူ၏ အတွေးများက ကျင့်ကြံခြင်းအပေါ်တွင် မရှိကြောင်း ရှင်းလင်းနေသည်။

သူ တောင်ပေါ်မှ မဆင်းလိုသည့် သူ၏ဆန္ဒမရှိမှုကို ဖုံးကွယ်ရန်အတွက် မလှုပ်ရှားမီပြည့်စုံသော ကြိုတင်ပြင်ဆင်မှုများပြုလုပ်ရန် လိုအပ်သည်ဟူသော ဆင်ခြေကို အမြဲအသုံးပြုလေ့ရှိ၏။

သို့သော် နောက်ဆုံးကျန်ရှိနေသော ဂျူနီယာညီမ ထွက်ခွာသွားခြင်းက သူ၏ဟန်ဆောင်မှုကို ညှာတာမှုကင်းမဲ့စွာ ဆွဲဖြဲပစ်လိုက်ပေသည်။

အကြီးဆုံးစီနီယာအစ်ကိုက ဤနေရာတွင် ထိုင်နေဆဲဖြစ်သော်လည်း မျိုးဆက်တူ ဂျူနီယာညီမလေးက အခြား ဂိုဏ်းတူတပည့်များကို အားကိုးရာရှာဖွေနေရသည်။ ဤကိစ္စသာ သတင်းပြန့်သွားပါက လင်းရွှီဂူမှ အစစ်အမှန်အရှင် ယွင်မြောင်၏ ဂုဏ်သိက္ခာသည် လုံးဝ ပျက်စီးသွားပါလိမ့်မည်။

"တကယ်ပဲ ထပ်စောင့်လို့ မရတော့ဘူးလား။"

အစစ်အမှန်အရှင် ယွင်မြောင်က သူ၏ တာအို နှလုံးသားအတွင်းရှိ အနှောင့်အယှက်များကို သတိပြုမိပြီးဘယ်သောအခါမျှ တည်ငြိမ်မသွားနိုင်ခဲ့ပေ။ နောက်ဆုံးတွင် သူက လေးနက်စွာ တရားထိုင်ဟန်ဆောင်ခြင်းကို ရပ်တန့်လိုက်ပြီး မတ်တပ်ရပ်ကာ အနည်းငယ်စိတ်အနှောင့်အယှက်ဖြစ်စွာဖြင့် ဟိုဟိုဒီဒီ လမ်းလျှောက်နေ၏။

ဤနှစ်လအတွင်း တပည့်များသည် မကြာခဏ ပြန်လာ၍ သတင်းပို့လေ့ရှိသည်။

ထိုထိုက်ရွှီဆေးဧကရာဇ်က ကောင်းကင်မျှော်စင်တောင်အတွင်းတွင် နေရာယူထားပြီး ထူးခြားသော အပြုအမူ မရှိပေ။ ကယ်ဆယ်ရေးလုပ်ငန်းများ စီစဉ်ရာတွင် ယှက်ရောလာသာမကဒုက္ခသည်များအတွက် နေအိမ်များကို ပြန်လည်တည်ဆောက်ပေးရန်ပင် တပည့်များကို အမိန့်ပေးထား၏။

သူသည် ဧကရာဇ်ချီ၏အရသာများကို မြည်းစမ်းမိပြီးဖြစ်ကာ၊ ဒုက္ခသည်များက အစစ်အမှန်အရှင်မ လင်းစုကို မေ့ပျောက်သွားစေရန် ဤနည်းဖြင့် လုပ်ဆောင်ဖို့ ရည်ရွယ်ထားပုံရသည်။

လင်းစု အချိန်ကြာမြင့်စွာ ပျောက်ဆုံးနေခြင်းနှင့် ဤအသေးအဖွဲကိစ္စရပ်များအတွက် အစစ်အမှန်အရှင် ယွင်မြောင်က ခေါင်းမရှုပ်နိုင်ပေ။ သူ့ကို အမှန်တကယ် စိတ်မသက်မသာဖြစ်စေခဲ့သည်မှာ တောင်ပိုင်းတိုက်ကြီးမှ ပြင်ပလူတစ်ဦးက တာအိုနယ်မြေတွင် တဖြည်းဖြည်းနေရာယူလာချိန်၌ မျိုးဆက်တစ်ခု၏စီနီယာအစ်ကိုဖြစ်သော သူက ဘာတစ်ခုမှ မရရှိသေးခြင်းပင်။

သူ၏ခြေလှမ်းများ ရပ်တန့်သွားပြီး သူ၏လက်များကို တင်းကျပ်စွာဆုပ်ကိုင်လိုက်သည်။

တစ်ခဏအကြာတွင် အစစ်အမှန်အရှင် ယွင်မြောင်က နောက်ဆုံး၌ဆုံးဖြတ်ချက်တစ်ခု ချလိုက်ပြီး သူ၏ မှော်ရတနာလက်နက်ကိုခေါ်ယူကာ ချင်းကွမ်းဂူဆီသို့ ပျံသန်းသွားခဲ့သည်။

ကိုးနှင့်ကိုး အသွင်ပြောင်းလဲခြင်း၏ အထွတ်အထိပ်သို့ ရောက်ရှိနေပြီဖြစ်သော သူ့လို ကျင့်ကြံသူတစ်ဦးအနေဖြင့် လင်းစုကဲ့သို့ ကောင်းကင်မျှော်စင်တောင်၏မြေတစ်ကွက်ကို ရယူရုံမျှဖြင့်ကျေနပ်နေ၍ မဖြစ်နိုင်ပေ။