အခန်း ၆၈၄

အခန်း ၆၈၄ - နှစ်နှစ်အကြာ သားရဲတစ်သောင်း လျှို့ဝှက်နယ်မြေ၊ လူသားမျိုးနွယ် ပါရမီရှင်များ ဆက်တိုက် ရောက်ရှိလာခြင်း။

မျက်တောင်တစ်ခတ် အတွင်းမှာပင် နှစ်နှစ်တာကာလ လျင်မြန်စွာ ကုန်လွန်သွားခဲ့၏။

ကျန်းဖန်သည် နဂါးနက်ပင်လယ်ဒေသရှိ ကျူးမိသားစုကျွန်းပေါ်တွင် ကျင့်ကြံခြင်းဖြင့် အချိန်အများစုကို ကုန်ဆုံးခဲ့သော်ငြားလည်း၊ သားရဲတစ်သောင်း လျှို့ဝှက်နယ်မြေ၏ ဖွံ့ဖြိုးတိုးတက်မှုမှာ ပုံမှန်အတိုင်း ဆက်လက် လည်ပတ်နေခဲ့သည်။

အနောက်ပိုင်းတိုက်ကြီးပေါ်ရှိ မိစ္ဆာမျိုးနွယ်စုကြီးများကြားမှ ကြီးမားသော တိုက်ပွဲကြီးများကြောင့် မူလအင်းဂိုဏ်းသည် အလွန်အမင်း လျင်မြန်စွာ ကြီးထွားလာနေခဲ့ပေသည်။

ဤအခြေအနေကို အခွင့်ကောင်းယူ၍ သွေးဓားတာအိုမိတ်ဆွေနှင့် အခြားသူများသည် မွေးမြူခံထားရသော လူသားအမြောက်အမြားကို ကယ်တင်နိုင်ခဲ့ကြသည်။ ထို့ကြောင့် သားရဲတစ်သောင်း လျှို့ဝှက်နယ်မြေ၏ လူဦးရေမှာ သုံးသန်းအထိ တဟုန်ထိုး မြင့်တက်လာခဲ့ပြီး သိသိသာသာ တိုးပွားလာခဲ့၏။

သေချာသည်မှာ သွေးဓားတာအိုမိတ်ဆွေနှင့် ရွှေအမြုတေကျင့်ကြံသူများချည်းသက်သက်ဖြင့် ဤအရာကို အောင်မြင်နိုင်စွမ်း မရှိပါချေ။

အရေးအကြီးဆုံးသော အချက်မှာ ကျန်းဖန်၏ ကိုယ်ပွားပင် ဖြစ်သည်။

သူ၏ ခန္ဓာကိုယ်အစစ်သည် ကျင့်ကြံခြင်းအပေါ် လုံးလုံးလျားလျား အာရုံစိုက်နေခဲ့သော်လည်း သူ၏ ကိုယ်ပွားမှာ လွတ်လပ်စွာ လှုပ်ရှားသွားလာနိုင်စွမ်း ရှိပေသည်။

ကိုယ်ပွား၏ တိုက်ခိုက်ရေး စွမ်းအားသည် ခန္ဓာကိုယ်အစစ်လောက် မသန်မာခဲ့လျှင်တောင်မှ ၎င်းမှာ ယွမ်ယင်းအဆင့်တွင် ရှိနေဆဲဖြစ်ရာ၊ သွေးဓားတာအိုမိတ်ဆွေနှင့် အခြား ရွှေအမြုတေ ကျင့်ကြံသူများထက် အဆပေါင်းများစွာ ပိုမိုအစွမ်းထက်လှပေသည်။

ထို့ကြောင့် ကျန်းဖန်၏ ကိုယ်ပွား၏ အကာအကွယ်အောက်တွင် သွေးဓားတာအိုမိတ်ဆွေနှင့် အခြားသူများ၏ လှုပ်ရှားမှုများမှာ အလွန်အမင်း အောင်မြင်ခဲ့ခြင်း ဖြစ်၏။

ဝုန်း~

ဤအခိုက်အတန့်တွင် နောက်ထပ် လူသားတစ်အုပ်စုသည် သားရဲတစ်သောင်း လျှို့ဝှက်နယ်မြေဆီသို့ ကယ်တင်ခြင်း ခံလိုက်ရပြန်သည်။

ဤလူသားများသည် ထိတ်လန့်တုန်လှုပ်မှု၊ အံ့အားသင့်မှုများဖြင့် သားရဲတစ်သောင်း လျှို့ဝှက်နယ်မြေသို့ ရောက်ရှိလာခဲ့ကြပြီး သူတို့ရှေ့မှောက်ရှိ ကြီးကျယ်ခမ်းနားလှသော လူသားမျိုးနွယ် မြို့တော်ကြီးကို ငေးမောကြည့်ရှုနေမိကြ၏။

သူတို့သည် ဤမျှလောက် အချိန်အကြာကြီး အသက်ရှင်နေထိုင်ခဲ့ကြသော်လည်း လူသားမျိုးနွယ်မြို့တော်တစ်ခုကို ပထမဆုံးအကြိမ်အဖြစ် မြင်တွေ့ဖူးခြင်း ဖြစ်သည်။

ယခင်က သူတို့သည် ဆိုးရွားလှသော လူနေမှုဘဝများဖြင့် မိစ္ဆာမျိုးနွယ်များ၏ မွေးမြူထားခြင်းကို ခံခဲ့ရပြီး ဤကဲ့သို့သောနေရာမျိုးကို ဘယ်သောအခါကမျှ မမြင်တွေ့ခဲ့ဖူးပါချေ။

"ဒါက အစစ်လား၊ အတုလား။ လူသားတွေက တကယ်ပဲ ကိုယ်ပိုင်မြို့တော်တစ်ခုကို ပိုင်ဆိုင်ထားနိုင်တာလား။ ဒီကုန်းမြေပေါ်မှာ ဒီလိုနေရာမျိုး ဘယ်လိုလုပ် ရှိနေနိုင်တာလဲ။ ယုံနိုင်စရာတောင် မရှိဘူး။"

အချို့မှာ အလွန်အမင်း အံ့အားသင့်နေကြပြီး ဤသည်မှာ ယုံကြည်နိုင်စရာမရှိလောက်အောင် ဆန်းကြယ်လွန်းသည်ဟု တွေးတောနေမိကြ၏။

အစောပိုင်းက လူသားများဆိုသည်မှာ အချိန်တန်လျှင် စားသုံးခံရမည့် မိစ္ဆာကျင့်ကြံသူများ၏ အစားအစာ သက်သက်မျှသာ ဖြစ်သည်ဟု သူတို့ ယုံကြည်ခဲ့ကြသည်။

လူသားများတွင် ကိုယ်ပိုင်မြို့တော်နှင့် နယ်မြေ ရှိနေလိမ့်မည်ဟု မည်သူမျှ စိတ်ကူးပင် မယဉ်ဝံ့ခဲ့ကြချေ။

ဤကဲ့သို့သော အယူအဆမှာ သူတို့၏ ကမ္ဘာအမြင်တစ်ခုလုံးကို ပြောင်းပြန်လှန်ပစ်လိုက်ပြီ ဖြစ်သည်။

"ဟက်... အတုတွေ၊ အားလုံး အတုတွေချည်းပဲ။ လူသားတွေက ဒီလိုနေရာမျိုးကို ဘယ်လိုလုပ် ပိုင်ဆိုင်ထားနိုင်မှာလဲ။"

"အမှန်ပဲ။ မိစ္ဆာမျိုးနွယ်တွေက အရမ်းကို အစွမ်းထက်ကြတာ၊ လူသားတွေက ဘယ်လိုမှ ယှဉ်ပြိုင်နိုင်မှာ မဟုတ်ဘူး။"

"မိစ္ဆာမျိုးနွယ်တွေ စိုးမိုးအုပ်ချုပ်နေတဲ့အောက်မှာ ကိုယ်ပိုင်မြေနေရာ တောင်းဆိုဖို့ ကြိုးစားတာက လုံးဝ မဖြစ်နိုင်တဲ့ ကိစ္စပဲ။"

"အကယ်၍ ဒါက အစစ်အမှန်ဖြစ်နေခဲ့ရင်တောင်မှ အဲဒီလူတွေက ငါတို့ကို စေတနာသန့်သန့်နဲ့ ကယ်တင်ခဲ့တာလို့ မင်း ထင်နေသလား။"

"အမှန်ပဲ၊ ဒီလို ကံကောင်းခြင်းကြီးက ဘာအကြောင်းမှမရှိဘဲ ရုတ်တရက်ကြီး ပေါ်လာလိမ့်မယ်လို့ ငါ မယုံဘူး။"

လူသားအများအပြားသည် အကြောက်တရားနှင့် ထိတ်လန့်မှုများ ပြည့်နှက်နေလျက် ငြင်းခုံဆွေးနွေးနေခဲ့ကြ၏။

သူတို့သည် မိစ္ဆာမျိုးနွယ်များ၏ ခြောက်လှန့်မှုများကို လုံးလုံးလျားလျား ခံခဲ့ရပြီး သူတို့ကို အနိုင်မခံအရှုံးမပေးနိုင်သော တည်ရှိမှုများဟု ယုံကြည်ထားခဲ့ကြသည်။

ထို့ကြောင့် မည်သို့ဆိုစေ လူသားများသည် ဤတိုက်ကြီးပေါ်တွင် ကိုယ်ပိုင်မြေနေရာ ပိုင်ဆိုင်နိုင်သည်ကို သူတို့ လုံးဝ ယုံကြည်မည် မဟုတ်ပါချေ။

"တိတ်စမ်း။"

"မင်းတို့ကို အလုပ်လုပ်ဖို့ ဒီကို ခေါ်လာတာ။"

"ဘယ်သူမဆို ညည်းတွားရဲရင် သေမယ်။"

ဤအချိန်တွင် မူလအင်းဂိုဏ်းမှ ကျင့်ကြံသူတစ်ဦးသည် လူသတ်လိုသော ရည်ရွယ်ချက်များ အပြည့်ဖြင့် အော်ဟစ်လိုက်ရာ လူတိုင်းကို ချက်ချင်း ခြိမ်းခြောက်နိုင်ခဲ့တော့သည်။

သူသည် ပြင်ပမှ လူသားများကို ကိုင်တွယ်ဖြေရှင်းရာတွင် အလွန်အမင်း ကျွမ်းကျင်လှ၏။

အပေါ်ယံကြည့်လျှင် ဤလူသားများသည် လူသားများကဲ့သို့ ပုံပေါ်သော်ငြားလည်း မိစ္ဆာမျိုးနွယ်၏ ကျေးကျွန်အဖြစ် အချိန်အကြာကြီး နေထိုင်ခဲ့ရသဖြင့် သူတို့၏ ဝိညာဉ်များတွင် အမှတ်အသားများ စွဲထင်နေခဲ့ပြီ ဖြစ်သည်။

သူတို့၏ ကမ္ဘာအမြင်မှာ အသေပုံသေဖြစ်နေပြီး အခြေခံအားဖြင့် ကယ်တင်၍မရနိုင်တော့သည့် အနေအထားသို့ ရောက်ရှိနေပေပြီ။

သေချာသည်မှာ မူလအင်းဂိုဏ်းအနေဖြင့် ဤလူသားများ၏ ယုံကြည်မှုများကို ပြောင်းလဲပစ်ရန် ရည်ရွယ်မထားပါချေ။

သူတို့ မျိုးဆက်ပွားနိုင်သရွေ့ လုံလောက်ပေသည်။

ထို့အပြင် သားရဲတစ်သောင်း လျှို့ဝှက်နယ်မြေသည် မြို့များတည်ဆောက်ရန်၊ လယ်ယာစိုက်ပျိုးရန်၊ လမ်းများဖောက်လုပ်ရန် စသည်တို့အတွက် လုပ်သားအင်အား အမြောက်အမြား လိုအပ်နေသဖြင့် ဤလူသားများကို အလုပ်လုပ်ခိုင်းရန်သာ လိုအပ်ပေသည်။

လူသားမျိုးနွယ်၏ အနာဂတ်သည် သူတို့အပေါ် မှီခို၍မရနိုင်ဘဲ သူတို့၏ မျိုးဆက်များအပေါ်တွင်သာ မူတည်နေ၏။

လူသားပညာရေး စနစ်ကို မျိုးဆက်တစ်ဆက်ပြီး တစ်ဆက် သင်ကြားပေးခြင်းဖြင့် မိစ္ဆာမျိုးနွယ်ကို မကြောက်ရွံ့သော လူသားများ ပေါ်ထွက်လာလိမ့်မည်ဟု ယုံကြည်ထားကြသည်။

ဤကျေးကျွန်လူသားများကို ကြင်နာစွာ ဆက်ဆံခြင်းက အချည်းနှီးသာ ဖြစ်သည်။

မိစ္ဆာမျိုးနွယ်များ ပြုလုပ်သကဲ့သို့ သူတို့ကို ကျွန်ပြုဆက်ဆံမှသာ သူတို့ နာခံကြမည်ဖြစ်ပြီး မဆင်မခြင် ပြုမူရဲကြမည် မဟုတ်ချေ။

"ဟုတ်... ဟုတ်ကဲ့ပါ။"

ဤစကားများကို ကြားလိုက်ရသောအခါ လူသားအများအပြားမှာ တုန်ယင်သွားကြပြီး နောက်ထပ် စကားမပြောရဲကြတော့ပေ။

သူတို့ရှေ့မှောက်ရှိ လူသားကျင့်ကြံသူသည် သူတို့ကို အမှန်တကယ် သတ်ဖြတ်လိမ့်မည်ဆိုတာ သူတို့ ကောင်းကောင်း သိထားကြ၏။

အစောပိုင်းက အချို့သော ခေါင်းမာသူများသည် ခုခံကြသဖြင့် နောက်ဆုံးတွင် သုတ်သင်ရှင်းလင်းခြင်း ခံခဲ့ရသည်။

ဤသည်က သူတို့ကို ပြင်းထန်စွာ ခြိမ်းခြောက်နိုင်ခဲ့ပြီး သူတို့၌ ရှိနေနိုင်သည့် မည်သည့်အတွေးအကြံများကိုမဆို ချေမှုန်းပစ်လိုက်ချေပြီ။

ဤလျှို့ဝှက်ဆန်းကြယ်သော လူသားများ၏ ရည်ရွယ်ချက်က ဘာပဲဖြစ်နေပါစေ၊ ယခုအချိန်တွင် သူတို့ ခုခံ၍ မရနိုင်တော့ချေ။

လောလောဆယ်အတွက်မူ သူတို့ လိုက်နာရန်သာ ရှိပေတော့သည်။

"ဒီကုန်းမြေပေါ်မှာ လူသားမျိုးနွယ် မျှော်လင့်ချက် လုံးဝ ကုန်ဆုံးမသွားသေးဘူးဆိုတာ ငါ သိသားပဲ။"

"နောက်ဆုံးတော့ လူသားတွေမှာ ကိုယ်ပိုင်လို့ ခေါ်နိုင်တဲ့ နေရာတစ်ခု ရှိလာပြီပေါ့။"

"အင်အားစုတစ်ခုတောင် ဖွဲ့စည်းထားသေးတယ်။"

ဤအချိန်တွင် လူအုပ်ကြားထဲမှ အသက် နှစ်ဆယ့်ခုနစ်၊ နှစ်ဆယ့်ရှစ်နှစ် အရွယ်ခန့်ရှိ လူငယ်တစ်ဦး ထွက်ပေါ်လာခဲ့၏။

သူ၏အမည်မှာ ယင်ကျောက်ဖုန်း ဖြစ်ပြီး အုတ်မြစ်တည်ဆောက်ခြင်း ပထမအလွှာအဆင့်ရှိ ကျင့်ကြံသူတစ်ဦး ဖြစ်သည်။

ရိုးရိုးသားသားပြောရလျှင် သူသည် မတော်တဆမှုတစ်ခုကြောင့် ဖမ်းဆီးခံခဲ့ရခြင်း ဖြစ်၏။

အစောပိုင်းက သူသည် မိစ္ဆာမျိုးနွယ် ကျင့်ကြံသူများ၏ လိုက်လံဖမ်းဆီးခြင်းကို ခံခဲ့ရပြီး သေမင်းနှင့် ရင်ဆိုင်ရမည့် အခြေအနေသို့ပင် ရောက်ရှိလုနီးပါး ဖြစ်ခဲ့သည်။

ကံကောင်းထောက်မစွာဖြင့် ကျန်းဖန်၏ ကိုယ်ပွားရောက်ရှိလာပြီး လိုက်လံဖမ်းဆီးနေသော မိစ္ဆာကျင့်ကြံသူများကို အနိုင်ယူကာ ယင်ကျောက်ဖုန်းကို ကယ်တင်ပေးခဲ့ခြင်း ဖြစ်၏။

ထိုသို့မဟုတ်ပါက သူသည် ကပ်ဘေးတစ်ခုနှင့် သေချာပေါက် ရင်ဆိုင်ခဲ့ရမည် ဖြစ်သည်။

သူသည် အခြားသော အမြောက်စာလူသားများနှင့် ကွဲပြားခြားနားပေသည်။ အဘယ်ကြောင့်ဆိုသော် သူသည် တောရိုင်းများထဲရှိ လူသားရွာတစ်ရွာမှ လာခြင်း ဖြစ်သောကြောင့်တည်း။

အမှန်တကယ်ပင် လူသားရွာတစ်ရွာ ဖြစ်သည်။

အနောက်ပိုင်းတိုက်ကြီးတွင် လူသားများသည် အလွန်အမင်း အခက်အခဲများနှင့် ရင်ဆိုင်ခဲ့ရပြီး အများစုမှာ မိစ္ဆာမျိုးနွယ်များ၏ အစားအစာ ဖြစ်သွားခဲ့သော်ငြားလည်း၊ အနည်းစုမှာမူ ခေါင်ခိုက်သော ဒေသများတွင် အသက်ရှင်သန်နိုင်ခဲ့ကြ၏။

အရည်အချင်းရှိသော လူသားများမှာ ရှားပါးလှပြီး အနောက်ပိုင်းတိုက်ကြီးမှာလည်း ကြီးမားကျယ်ပြန့်လွန်းလှသဖြင့်၊ အကယ်၍ သူတို့သာ မိစ္ဆာကျင့်ကြံသူများ သတိမပြုမိအောင် သတိကြီးစွာဖြင့် ပုန်းအောင်းနေထိုင်မည်ဆိုပါက အချို့သော လူသားများသည် တောရိုင်းများထဲတွင် အသက်ရှင်သန်နိုင်ကြပေသည်။

အချိန်ကြာလာသည်နှင့်အမျှ အနောက်ပိုင်းတိုက်ကြီး တစ်ခွင်တွင် လူသားရွာများ ပိုမို ပေါ်ထွက်လာခဲ့၏။

ကံဆိုးစွာဖြင့် ဤရွာများမှာ အလွန်နည်းပါးပြီး ကွဲကွာပျံ့နှံ့နေကြပေသည်။

……….