အခန်း (၂၆၁၁-၂၆၁၂)

အပိုင်း(၂၆၁၁)

ပြူးကျယ်နေပြီးသားဖြစ်သော တီလီ၏ မျက်လုံးများသည် ပို၍ ပြူးကျယ်သွားခဲ့သည်။ ဝေ့ဝူယင်သည် ပြိုင်ဘက်ကင်း ဆွဲဆောင်မှု တစ်ခုကို ထုတ်လွှတ်လိုက်ကာ နတ်ဘုရားဆန်ဆန် တောက်ပသော အပြုံးတစ်ခုကို ပြသလိုက်၏။

တီလီသည် တံတွေးကို ပြင်းထန်စွာ မြိုချလိုက်မိသည်။ သူမ၏ နှလုံးသားသည် သူမ၏ ဖွံ့ဖြိုးသော ရင်အုံထဲမှ ပေါက်ကွဲထွက်လာတော့မည့်အလား ခြိမ်းခြောက်နေပုံရ၏။ သူမသည် အမည်မသိ အရာတစ်ခုအပေါ် ကြီးထွားလာသော မျှော်လင့်ချက်များမှ သက်သာရာရလိုသည့်အလား သူမ၏ လက်များကို အသုံးပြုကာ ဝေ့ဝူယင်၏ ဝတ်ရုံကို ဆုပ်ကိုင်ထားလိုက်သည်။

ဝေ့ဝူယင်သည် နံရံဘက်သို့ လှည့်လိုက်ပြီး သူ၏ လက်ချောင်းများပေါ်မှ ဖြတ်သန်းစီးဆင်းသွားသော အပျက်အစီး စွမ်းအင်များကို ခံစားလိုက်သည်။ သန့်စင်သော အပျက်အစီး စွမ်းအင်များဖြင့် ဆေးကြောခံထားရသော သက်သေခံ သင်္ကေတ သည် သူ၏ လက်ထဲတွင် ပေါ်လာခဲ့၏။

"အဂ္ဂိရတ် တာအို ရဲ့ ဖန်တီးခြင်း ပညာရှင်၊ ၄၄ ခုမြောက် ရဲ့ တပ်မှူးဖြစ်တဲ့ ငါက စစ်ကြေညာတယ်..."

သူ၏ မျက်လုံးများထဲတွင် ရူးသွပ်မှုများ လွှမ်းမိုးလာခဲ့သည်။ လွတ်လပ်စွာ၊ ထိန်းချုပ်မှု ကင်းမဲ့စွာဖြင့်... ပြိုင်ဘက်ကင်း မာနနှင့် ခိုင်မာသော လောဘတို့ဖြင့် အားဖြည့်ထား၏။ သူ၏ ငယ်ရွယ်စဉ်ကာလများ ကတည်းက သယ်ဆောင်လာခဲ့သော နှလုံးသားထဲမှ ငုပ်လျှိုးနေသည့် ဆန္ဒတစ်ခုသည် အချည်အနှောင်ကင်းစွာဖြင့် ပေါက်ကွဲထွက်လာခဲ့သည်။

"အခြား ဇုံအားလုံးအပေါ်... ဖန်တီးခြင်း စစ်ပွဲတစ်ရပ်ကို ငါ ကြေညာတယ်..."

ဘုန်း...

၂,၉၉၉ ခုသော ဂိုင်ယာ မျှော်စင် များက ကြယ်တာရာ စည်းမျဉ်း စစ်မြေပြင် တစ်ခုလုံးကို လင်းထိန်သွားစေသည်နှင့်အမျှ နေရာအနှံ့တွင် ပေါက်ကွဲမှုများ တောက်လောင်သွားခဲ့တော့သည်။

"ဟား... ဟား... ဟား... ဟား..."

ရည်မှန်းချက်ကြီးမားသော ရူးသွပ်မှုများနှင့် အကြွင်းမဲ့ ယုံကြည်မှုများ အပြည့်အဝ ပါဝင်နေသည့် ကျယ်လောင်သော ရယ်မောသံကြီးတစ်ခုသည် ကောင်းကင်ယံတစ်ခွင် ဟိန်းထွက်သွားခဲ့သည်။ သူ၏ ရဲတင်းသော ကြေညာချက်ကို တုံ့ပြန်လိုက်သည့်အလား ဖန်တီးခြင်း ပညာရှင်များ ၏ ကြီးကျယ်ခမ်းနားပြီး ကျယ်ပြောလှသော စစ်မြေပြင်ဖြစ်သည့် ဂိုင်ယာ တစ်ခွင်လုံးရှိ ဖန်တီးခြင်း အလင်းလုံးများသည် တောက်ပသော အလင်းလှိုင်းများကို တစ်သုတ်ပြီးတစ်သုတ် ထုတ်လွှတ်လိုက်ကြတော့သည်။

ဝမ်... ဝမ်... ဝမ်...

ဂိုင်ယာ မျှော်စင် ၂,၉၉၉ ခုထံမှ စိတ်လှုပ်ရှားဖွယ်ရာ အသံများလည်း ထွက်ပေါ်လာခဲ့သည်။ ၎င်းတို့က သက်ဆိုင်ရာ ဇုံအသီးသီးရှိ သက်သေခံ သင်္ကေတ ပိုင်ရှင်တိုင်းကို ချဉ်းကပ်လာနေသော စစ်ကြေညာချက်အကြောင်း သတိပေးလိုက်ကြခြင်း ဖြစ်၏။ ချဉ်းကပ်လာနေသော... မဟုတ်သေးချေ... ၎င်းက ဤနေရာတွင် ရောက်ရှိနေပြီ ဖြစ်သည်။

"စစ်ပွဲ..."

ဖန်တီးခြင်း ပညာရှင်များသည် သူတို့၏ တဲများနှင့် နေအိမ်များထဲမှ အလန့်တကြား ထွက်လာကြပြီး သူတို့ဇုံအတွင်းရှိ ဂိုင်ယာ မျှော်စင် အသီးသီးကို စိုက်ကြည့်လိုက်ကြသည်။

"နောက်ထပ် စစ်ပွဲက ရာစုနှစ် နှစ်ခုလောက် ကြာမှ ဖြစ်ရမှာ မဟုတ်ဘူးလား..."

အမျိုးသမီး အစီအရင် သခင် တစ်ဦးက အော်ဟစ်လိုက်သည်။ သူတို့၏ ဇုံသည် သေဆုံးမှုများကို ထိန်းချုပ်ရန်အတွက် စစ်ပွဲများကို ကြိုတင် စီစဉ်ထားလေ့ ရှိသည်။ ရန်ငြိုးများ သို့မဟုတ် အကျိုးစီးပွားများကသာ ဤအခြေအနေကို အခြားနည်းလမ်းဖြင့် အတင်းအကျပ် ပြောင်းလဲပစ်နိုင်ပေမည်။ အများဆုံး ဖြစ်နိုင်ခြေရှိသည်မှာ ပွတ်တိုက်မှု အသေးစားများ ဖြစ်ပွားခြင်းသာ ဖြစ်၏။

ဖန်တီးခြင်း ပညာရှင် အဖွဲ့တစ်ဖွဲ့သည် ဂိုင်ယာ မျှော်စင် ၏ အထပ်တစ်ခုချင်းစီကို တိုက်ခိုက်ကာ ပျက်စီးစေပြီးနောက် ကုသိုလ် မှတစ်ဆင့် စစ်ဝိညာဉ်များ စုဆောင်းရန်အတွက် ၎င်းကို ဖျက်ဆီးပစ်ခြင်းမျိုး ဖြစ်ပေသည်။

"ရာစုနှစ် နှစ်ခုလား... နေပါဦး..."

အရိုးအဆစ် ကြီးမားသော အဂ္ဂိရတ် ပညာရှင် တစ်ဦးသည် သူ၏ သက်သေခံ သင်္ကေတ ကို မြှောက်လိုက်ရင်း အာမေဍိတ်သံ ပြုလိုက်သည်။

"ဒါက ငါတို့ရဲ့ အိမ်နီးချင်း အောက်ပိုင်း အနည်ကျဇုံ မဟုတ်ဘူး... အောက်ပိုင်း ကျောက်လွှာဇုံ ကွ..."

အောက်ပိုင်း ကျောက်လွှာဇုံ သည် စစ်ပွဲတစ်ရပ်ကို ဆင်နွှဲလိုက်ခြင်းပင် ဖြစ်၏။

"၄၄ ခုမြောက် ဇုံလား... အဲဒါက ငါတို့နဲ့ မိုင်ပေါင်း မယုံနိုင်လောက်အောင် ဝေးတဲ့ နေရာမှာ ရှိတာ မဟုတ်ဘူးလား... ငါတို့က အဲဒီဇုံနဲ့ ဘာပဋိပက္ခ ဒါမှမဟုတ် ရန်ငြိုးရန်စတွေများ ရှိလို့လဲ..."

ဘောင်းဘီပွပွ ဝတ်ဆင်ထားပြီး ပခုံးပေါ်တွင် သံတူရွင်းကြီး တစ်လက်ကို တင်ထားသော အံ့အားသင့်နေသည့် အမျိုးသမီး ပန်းပဲဆရာ တစ်ဦးက အခြားသူများကို ဇဝေဇဝါဖြင့် မေးလိုက်သည်။ သူမထံမှ လျှို့ဝှက် အာဏာရှင် တစ်ယောက်၏ အော်ရာများ ထွက်ပေါ်နေခဲ့၏။

အတက်ကြွဆုံးသော ဖန်တီးခြင်း ပညာရှင်များ မှာ လျှို့ဝှက် အာဏာရှင်များ ဖြစ်ကြသည်။ သူတို့သည် တပ်မှူးများ ဖြစ်ကြ၏။ ဤအဆင့်အတန်းသည် စည်းမျဉ်း စစ်မြေပြင် တွင် လျော့ကျသွားခြင်း မရှိပေ။ ထိုခွဲခြားသတ်မှတ်မှုက သူတို့ကို အချို့သော အာဏာပိုင်ဆိုင်ခွင့်များ ပေးအပ်ထားသည်။ သူတို့သည် စစ်ပွဲ စတင်သည့် အချိန်မှသာ အသက်ဝင်လာခြင်း ဖြစ်သည်။ သူတို့သည် ပြင်ပရန်သူများကို ဆန့်ကျင်တိုက်ခိုက်မည့် အဓိက အင်အားစုများ ဖြစ်ကြပေသည်။

ဤအချက်မှာ စစ်ပွဲ စစ်မြေပြင် အတွက်လည်း မှန်ကန်ပေသည်။ ကျဆုံးသွားသော ကောင်းချီးခံ ကျင်းကျူးနှင့် ပတ်သက်ဆက်နွှယ်နေသည့် အမျိုးသမီး ပါရမီရှင် ချိုက်လျို့ယန်သည် အခြားသူများ၏ ဝင်ရောက်စွက်ဖက်မှုကို ဂရုမစိုက်ဘဲ ဝေ့ဝူယင် ကို တိုက်ခိုက်ခဲ့သည်။

ပုံမှန်အားဖြင့် စစ်ပွဲ စစ်မြေပြင် တွင် လျှို့ဝှက် အာဏာရှင်များ ကို စစ်မြေပြင်အထက်ရှိ အခြားသော တပ်မှူးများက ဟန့်တားထားလေ့ရှိသည်။

တစ်ခါတစ်ရံတွင် တပ်မှူးများ ကျဆုံးသွားတတ်ပြီး အကယ်၍ လစ်ဟာသွားသော နေရာကို အလျင်အမြန် မဖြည့်တင်းနိုင်ပါက လျှို့ဝှက် အာဏာရှင်များသည် ကြောက်မက်ဖွယ် ကောင်းသော အဟုန်ဖြင့် ကောင်းကင်ယံမှ ဆင်းသက်လာကာ ကြောက်မက်ဖွယ် ဝံပုလွေကြီး ရှေ့တွင် မြူးတူးနေသော သိုးပေါက်လေးများ အလား အစုလိုက်အပြုံလိုက် သတ်ဖြတ်မှုများကို ကျူးလွန်ကြပေမည်။

ချိုက်လျို့ယန် ဆင်းသက်လာခြင်းက လျှို့ဝှက် အာဏာရှင်များသည် သာမန် သေမျိုး များအပေါ် မည်မျှအထိ ပြင်းထန်စွာ ဖျက်ဆီးပစ်နိုင်ကြောင်း သက်သေပြနေခဲ့သည်။ စွမ်းအားတူ သို့မဟုတ် ပိုမိုအားကောင်းသော တပ်မှူးများက မဟန့်တားထားပါက စစ်မြေပြင်သည် ငြင်းပယ်၍ မရနိုင်သော စစ်ပွဲ၏ အမှန်တရား တစ်ခုကို ပြသနေပေလိမ့်မည်။ ထိုအရာကတော့ စစ်ပွဲသည် တရားမျှတမှု မရှိ ဆိုခြင်းပင်တည်း။

ယခုအခါ တပ်မှူးများသည် သူတို့၏ တပ်ဖွဲ့များကို စုစည်းကာ သူတို့၏ ဇုံများနှင့် မျှော်စင်များကို ကာကွယ်ရန် အဖွဲ့များ ဖွဲ့စည်းကြတော့မည် ဖြစ်သည်။ မမျှော်လင့်ထားသော အခြေအနေများ ဖြစ်ပေါ်လာသော်လည်း သူတို့ထဲမှ မည်သူမျှ ငြိမ်သက်မနေခဲ့ကြပေ။ သူတို့သည် သူတို့၏ အာဏာကို အသုံးပြုရန် ကြိုးပမ်းရင်း တပ်ဖွဲ့များကို ဖွဲ့စည်းရန် အပြေးအလွှား လုပ်ဆောင်ခဲ့ကြ၏။ အရေအတွက် ကန့်သတ်ချက် ဆိုသည်မှာ မရှိပေ။

တကယ်တမ်းတွင် လူတိုင်း ပါဝင်ခွင့် ရှိကြသည်။ သို့သော် ထိုကတိကဝတ်ကို ပြုလုပ်ခြင်းက ရှုံးနိမ့်သွားသည့်အခါ ကျဆင်းလာမည့် ကမောက်ကမ ကျဆင်းမှု ကို မျှဝေခံစားရမည်ဟု အဓိပ္ပာယ်ရသည်။ အန္တရာယ်က ကြီးမားလွန်းလှ၏။

သို့တိုင် တပ်မှူးများ၏ စစ်ပွဲခေါ်သံကို ကြားရပြီးနောက် အကယ်၍ သူတို့က ပါဝင်ရန် ငြင်းဆန်ခဲ့ပါက စစ်ပွဲအပြီးတွင် နှင်ထုတ်ခံရခြင်း သို့မဟုတ် အပြစ်ပေးခံရခြင်းတို့ကို ခံရနိုင်ပေသည်။ တပ်မှူးများက ဤသူရဲဘောကြောင်သော စည်းမျဉ်း စစ်သည်တော်များကို ရှင်းလင်းပစ်ခဲ့သည့် အခြေအနေများလည်း ရေတွက်၍ မရနိုင်အောင် ရှိခဲ့ဖူးသည်။

ထို့ကြောင့် အချို့က အချိန်မတိုင်မီ ထွက်ခွာသွားရန် စဉ်းစားခဲ့ကြ၏။

ကံကောင်းထောက်မစွာပင် စစ်ပွဲ စစ်မြေပြင် နှင့် မတူညီသည်မှာ စည်းမျဉ်း စစ်မြေပြင်သည် သက်ဆိုင်ရာ ဖန်တီးခြင်း တာအို များ၏ ကျွမ်းကျင်မှုအပေါ်တွင် အခြေခံထားသောကြောင့် သူတို့သည် လုံလောက်သော စွမ်းအားဖြင့် တုံ့ပြန်နိုင်ကြခြင်း ဖြစ်သည်။ စည်းမျဉ်း စစ်မြေပြင်၏ စစ်ပွဲ လုပ်ငန်းစဉ်ကို အဆင့်များ ခွဲခြားထားပေသည်။

အဆင့် သုံးဆင့်...

သုံးဆင့်တည်းသာ ဖြစ်သည်။

ပထမအဆင့်မှာ ကြေညာခြင်း အဆင့် ဖြစ်ပြီး ကြေညာသည့် ဇုံအား ဦးဆောင်မှု အားသာချက်ကို ရရှိစေပေသည်။ ထိုဦးဆောင်မှုကမူ...

...

“ဟား... ဟား... ဟား... ဟား...”

ရူးသွပ်မှုများ ခပ်ပါးပါး ရောယှက်နေသော ဝေ့ဝူယင်၏ ရယ်မောသံကို တီလီသည် သူမ၏ ဘဝတစ်သက်တာတွင် တစ်ခါမျှ မဖြစ်ဖူးလောက်အောင် ပြူးကျယ်နေသည့် မယုံကြည်နိုင်သော မျက်လုံးများဖြင့် တုံ့ပြန်လိုက်၏။ ၎င်းက မကြာသေးမှီက အထွတ်အထိပ်သို့ ရောက်ရှိခဲ့သော သူမ၏ ခံစားချက် တုံ့ပြန်မှုနှင့်သာ နှိုင်းယှဉ်နိုင်မည် ဖြစ်သည်။ ထိုခံစားချက်က အလွန် နက်ရှိုင်းစွာ စွဲထင်နေသောကြောင့် သူမသည် ဤအမျိုးသားနောက်သို့ ဆန္ဒအလျောက် လိုက်ပါနေမိပြီး ခံစားချက်များသည်လည်း စတင် ဖူးပွင့်လာခဲ့ပြီ ဖြစ်ပေသည်။

သို့သော် ဝေ့ဝူယင်က စစ်ကြေညာလိမ့်မည်ဟု သူမ၏ ဘဝတွင် တစ်ခါမှ တွေးထင်ထားခဲ့မည် မဟုတ်ပေ။ စည်းမျဉ်းများအရ စစ်ကြေညာရန် ဆန္ဒရှိသူများသာ ပါဝင်ခွင့်ရှိပြီး မဟာမိတ် မရှိဘဲ အတင်းအကျပ် စစ်သားစုဆောင်းခြင်းကို တားဆီးထားသည်။ ထို့ကြောင့်... ၄၄ ခုမြောက် ဇုံ မှ မည်သည့် ဖန်တီးခြင်း ပညာရှင် ကမျှ လိုက်ပါလုပ်ဆောင်မည် မဟုတ်ပေ။ သူသည် တစ်ကိုယ်တော် အနေဖြင့် တကယ်ကြီး စစ်ကြေညာနေခဲ့ခြင်း ဖြစ်၏။

ပို၍ အရေးကြီးသည်မှာ သူသည် မျက်နှာစာစုံ စစ်ပွဲ တစ်ရပ်ကို ကြေညာနေခြင်းပင် ဖြစ်သည်။ ဇုံ အများအပြားကို တစ်ပြိုင်နက်တည်း တိုက်ခိုက်သည့် စစ်ပွဲမျိုးသည် အများအားဖြင့် လွှမ်းမိုးလိုသော လုပ်ရပ်တစ်ခု ဖြစ်၏။ ၎င်းကို မိမိဆန္ဒအလျောက် လုပ်ဆောင်ခြင်းထက် အတင်းအကျပ် အခြေအနေများကြောင့်သာ ဆင်နွှဲလေ့ ရှိကြသည်။ ဤစစ်ပွဲမျိုးသည် အများအားဖြင့် နှစ်ဇုံ နှင့် တစ်ဇုံ၊ သို့မဟုတ် သုံးဇုံ နှင့် နှစ်ဇုံ တိုက်ခိုက်ခြင်းမျိုးသာ ဖြစ်ပေသည်။ လွန်ခဲ့သော အချိန်ကာလ အတော်ကြာက ခြောက်ဇုံ နှင့် ရှစ်ဇုံ တိုက်ခိုက်ခဲ့ခြင်းမှာ အကြီးမားဆုံး စစ်ပွဲကြီး ဖြစ်ခဲ့၏။

ဤသည်မှာ ယခင်က မကြုံစဖူးသော ကြေညာချက်တစ်ခုပင် ဖြစ်သည်။

တစ်ဇုံတည်းနှင့်…

နှစ်ထောင့် ကိုးဆယ့် ကိုးဇုံ…

ဇုံ အားလုံးကို တိုက်ခိုက်မည် ဖြစ်သည်။

ဝေ့ဝူယင်၏ ဖန်တီးခြင်း အလင်းလုံးသည် ကောင်းကင်ယံရှိ သတ်မှတ်ထားသော အမြင့်တစ်ခုတွင် ရပ်တန့်နေခဲ့သည်။ ထိုအချိန်တွင် အခြားသော ဖန်တီးခြင်း အလင်းလုံးများသည် အောက်သို့ စတင်ကျဆင်းလာကြ၏။ ၎င်းတို့သည် သေးငယ်သွားကာ သက်ဆိုင်ရာ ဖန်တီးခြင်း ပညာရှင်များ ၏ ခေါင်းပေါ်တွင် စောင့်ဆိုင်းရင်း ဝဲပျံနေကြသည်။

ဝေ့ဝူယင်သည် တီလီ၏ နူးညံ့သော ခါးလေးကို လွှတ်ပေးလိုက်ပြီး အပြုံးတစ်ခုကို ချန်ထားရစ်ခဲ့သည်။

"ငါ အခုချက်ချင်း ပြန်လာခဲ့မယ်..."

သူသည် ဖန်တီးခြင်း အလင်းလုံး ထဲသို့ မပျံသန်းမီ ပြောလိုက်၏။ ကြောက်ရွံ့ခြင်း အလျဉ်းမရှိဘဲ အားလုံးကို စိန်ခေါ်ဝံ့သော ပြိုင်ဘက်ကင်း ရုပ်သွင်ကို တီလီ တစ်ယောက် ပူပြင်းသော မျက်လုံးများဖြင့် ငေးကြည့်နေခဲ့သည်။

ဤမြင်ကွင်းမှာ စိတ်ကူး၍ပင် မရနိုင်လောက်အောင် ဖြစ်ပြီး သူမ၏ နှလုံးသားနှင့် မှတ်ဉာဏ်ထဲတွင် ထာဝရ စွဲထင်သွားတော့မည်မှာ သေချာလှပေသည်။

ဤအခြေအနေသည် အခြားသူများ အားလုံးအတွက်မူ ယုံကြည်နိုင်စရာ အကြောင်း မရှိခဲ့ပေ။

***

အပိုင်း(၂၆၁၂)

"ဘာ..."

သက်ကြီးရွယ်အို တပ်မှူး တစ်ဦးက ရုတ်တရက် အော်ဟစ်လိုက်သည်။ သူ၏ ပါးပြင်လေးဖက်စလုံးရှိ အဆီပိုများ တုန်ခါသွားပြီး ပြူးကျယ်နေသော မျက်လုံးများဖြင့် ယိုင်နဲ့သွားခဲ့၏။ သူသည် တုန်ယင်နေသော လက်ချောင်းဖြင့် ညွှန်ပြကာ သူ၏ အမြင်အာရုံထဲရှိ အမှန်တရား တစ်ခုဆီသို့ အာရုံစိုက်လိုက်သည်။ ဖန်တီးခြင်း အလင်းလုံး တစ်ခုတည်းကသာ ထိုနေရာတွင် တည်ရှိနေပြီး အသစ်တဖန် ဖန်တီးထားသော အော်ရာများကို ထုတ်လွှတ်ကာ အလင်းရောင်များ တောက်ပနေပေသည်။

"အလင်းလုံး တစ်လုံးတည်းလား..."

အောက်ပိုင်း ကျောက်လွှာဇုံ ရှိသူများသည် တုံ့ပြန်မှုများ စတင် ပြုလုပ်လာကြသည်။ ဘယ် တပ်မှူး က စစ်ကြေညာလိုက်သနည်း။ ဘယ်သူ့ကိုနည်း။ ဘာကြောင့်နည်း။

"သူက ဘယ်သူ့ကို စစ်ကြေညာတာလဲ..."

လူငယ် အဆောင်သခင်တစ်ဦးက ဤအရာအားလုံးကို စိတ်ဝင်စားဖွယ်အဖြစ် ခံစားမိကာ သူ၏ အကြီးအကဲကို မေးလိုက်သည်။ သို့သော် သူ၏ အကြည့်က အကြီးအကဲဖြစ်သူထံ ရောက်သွားချိန်တွင် သူ၏ နှလုံးသားသည် သတိပေးချက်မရှိဘဲ ခုန်ပေါက်လာခဲ့၏။ အကြောင်းရင်းကို သူ မသိသော်လည်း နောက်ထပ် ထွက်ပေါ်လာမည့် စကားလုံးများသည် သူ၏ ဘဝတစ်သက်တာတွင် အကြီးမားဆုံးသော တုန်လှုပ်မှုကို ဖြစ်စေလိမ့်မည်ဟု သူ သိနေခဲ့သည်။

သူ သိနေခဲ့သည်။ အကြီးအကဲကလည်း သူ့ကို စိတ်ပျက်မသွားစေခဲ့ပေ။ ငရဲ၏ အနက်ရှိုင်းဆုံး အလွှာထက် ပိုမိုနက်ရှိုင်းကာ ကောင်းကင်ဘုံများ၏ အလေးချိန်ထက် ပိုမိုလေးလံသော အသံကြီးတစ်ခု ထွက်ပေါ်လာခဲ့၏။

"အားလုံးပဲ..."

ဖန်တီးခြင်း အလင်းလုံး တစ်ခုတည်းက ကောင်းကင်ယံကို ၎င်း၏ တောက်ပမှုများဖြင့် အလှဆင်နေသည်။ ဤကမ္ဘာတွင် အသစ်တဖန် ဖန်တီးထားခြင်း ဖြစ်သော်လည်း ကြောက်ရွံ့ခြင်း အလျဉ်းမရှိဘဲ ၎င်း၏ အလင်းရောင်များကို ရဲတင်းစွာ ထုတ်လွှတ်နေ၏။ ၎င်းက ဖန်တီးခြင်း ပညာရှင် တစ်ဦးတည်းကိုသာ ကိုယ်စားပြုနေပြီး ကြည့်ရှုနေသူများအားလုံး ပါးစပ်အဟောင်းသားဖြင့် ငြိမ်သက်သွားစေခဲ့သည်။ ကျင့်ကြံခြင်း အဆင့်အတန်းကို မခွဲခြားဘဲ မျက်လုံးများအားလုံးက ၎င်းအပေါ်သို့သာ အာရုံစိုက်နေကြသောကြောင့် မည်သည့် လှုပ်ရှားမှုမျှ မရှိခဲ့ပေ။ ယခုအချိန်သည် ဦးဆောင်တိုက်ခိုက်မည့် တပ်မှူး ၏ အမိန့်အောက်တွင် သူတို့ ပါဝင်ပတ်သက်ရမည့် အချိန်ပင် ဖြစ်သည်။

သို့သော်... သူတို့၏ ရန်သူအကြောင်း သတင်းများ ပျံ့နှံ့သွားသောအခါ မည်သူကများ ပါဝင်လောက်အောင် မိုက်မဲနေမည်နည်း။ အပျော်သက်သက်ဖြင့် မိမိအသက်ကို စွန့်လွှတ်လောက်အောင် မည်သူကများ ကိုယ့်ကိုယ်ကိုယ် သတ်သေချင်နေမည်နည်း။

"ဒါက တကယ်ရော ဖြစ်နိုင်လို့လား..."

ကြီးကျယ်လှသော အလှတရားနှင့် နုပျိုသော ဆွဲဆောင်မှုရှိသည့် မိန်းမငယ်လေး တစ်ဦးက သူမ၏ ဆရာဖြစ်သူကို မေးလိုက်သည်။ ဆရာဖြစ်သူမှာမူ မျက်မြင်ထင်ရှားပင် ခမ်းနားထည်ဝါသော ဟန်ပန်ရှိသည့် ရင့်ကျက်သော အလှတရားပိုင်ရှင် တစ်ဦး ဖြစ်၏။ သူမသည် တစ်ခုတည်းသော ဖန်တီးခြင်း အလင်းလုံး တစ်ခုတည်းကို မျက်တောင်မခတ်ဘဲ စိုက်ကြည့်နေခဲ့သည်။

"ဆရာ..."

"ဟင်..."

ရင့်ကျက်သော အမျိုးသမီးသည် မေးခွန်းထုတ်နေသော သူမ၏ တပည့်ငယ်ကို ကြည့်လိုက်သည်။ သူမ၏ မျက်လုံးများထဲတွင်လည်း မေးခွန်းများ ပြည့်နှက်နေပြီး ဤအခြေအနေ၏ ကြီးမားလှသော အတိုင်းအတာကို နားမလည်နိုင်ဘဲ ဖြစ်နေခဲ့၏။

"မင်း ဘာပြောလိုက်တာလဲ..."

"ကျွန်မ ပြောတာက... ဒါက ဘယ်လိုလုပ် ဖြစ်နိုင်မှာလဲလို့... ဘာဖြစ်လို့ တပ်မှူး တစ်ယောက်တည်းက ဇုံတစ်ခုထက်ပိုပြီး စစ်ကြေညာခွင့် ရနေတာလဲ... ဒါက လစ်ဟာမှုတစ်ခုလိုပဲ..."

မိန်းမငယ်လေးသည် ဉာဏ်ရည်ထက်မြက်သူဖြစ်ပြီး သူမ၏ မေးခွန်းက ပြန်လည်သုံးသပ်ကြည့်လျှင် မယုံနိုင်လောက်အောင် ရယ်စရာကောင်းသော အချက်တစ်ခုကို မီးမောင်းထိုးပြနေပေသည်။ ဤအရာက မည်ကဲ့သို့ ဖြစ်နိုင်မည်နည်း။ သို့သော် အဖြေမှာ ရယ်စရာကောင်းလောက်အောင်ပင် ရိုးရှင်းလွန်းလှပေသည်။

"စမ်းသပ်မှုတွေမှာ မဖြစ်နိုင်တာတွေကို တားမြစ်ထားလေ့ မရှိဘူးလေ..."

ရင့်ကျက်သော အမျိုးသမီးက ပြောလိုက်သည်။ ထို့နောက် သူမ၏ မျက်နှာအမူအရာ ပြောင်းလဲသွားပြီး ဖန်တီးခြင်း အလင်းလုံး တစ်ခုတည်းဆီသို့ ပြန်လှည့်ကြည့်ကာ သူမစကားကို ပြင်ပြောလိုက်၏။

"ဖြစ်တန်စွမ်း မရှိတာတွေကိုပေါ့..."

သူတို့၏ ကျယ်ပြောလှသော ဉာဏ်ပညာဖြင့် မည်သူက ဤအရာ ဖြစ်လာမည်ကို ကြိုမြင်ပြီး တားမြစ်ထားမည်နည်း။ ၎င်းသည် လုံးဝကို ကျိုးကြောင်းဆီလျော်မှု မရှိသော အမှန်တရားတစ်ခုသာ ဖြစ်ပေသည်။

"ဒါပေမဲ့... ဒီလူက သေချာပေါက် ကိုယ့်ကိုယ်ကိုယ် သတ်သေချင်နေတာပဲ..."

မိန်းမငယ်လေးသည် ဝေ့ဝူယင် ဝင်ရောက်သွားသည့် တစ်ခုတည်းသော ဖန်တီးခြင်း အလင်းလုံး ဆီသို့ လက်ဟန်ပြလိုက်သည်။ ပါဝင်ပူးပေါင်းရန် အချိန်ကုန်ဆုံးတော့မည်ဖြစ်ပြီး ၎င်းအချိန် ကုန်ဆုံးသွားသည်နှင့် ဤ တပ်မှူး အဆင့်ရှိ ဖန်တီးခြင်း ပညာရှင် တစ်ဦးတည်းက ကြယ်တာရာ စည်းမျဉ်း စစ်မြေပြင် တစ်ခုလုံး၏ အင်အားကို ရင်ဆိုင်ရတော့မည် ဖြစ်၏။

"..."

ရင့်ကျက်သော အမျိုးသမီးက ပြန်မဖြေနိုင်ခဲ့ပေ။ ပေးစရာ အဖြေလည်း မရှိခဲ့ချေ။ သို့တိုင် သူမ၏ အတွေးများမှာ အတော်လေး ဒွိဟဖြစ်နေခဲ့သည်။

'ကိုယ့်ကိုယ်ကိုယ် သတ်သေတာတဲ့လား... တကယ်ပဲ အဲဒီလို ဖြစ်နေတာလား...'

မိမိဘဝကို အဆုံးသတ်ရန် ပို၍လွယ်ကူသော နည်းလမ်းများ ရေတွက်၍မရနိုင်အောင် ရှိပေသည်။ ဒါကြီးကတော့ မဖြစ်နိုင်ပုံပေါ်လှသည်။ သို့သော် ဤနေရာတွင် သူမ၏ အလိုလိုသိမြင်မှုက... မှားယွင်းနေနိုင်မည်လား။

အချိန်များ တဖြည်းဖြည်း ကုန်ဆုံးလာသည်နှင့်အမျှ ခွင့်ပြုထားသော အချိန် ကိုးနာရီ အပြည့်မှာ မကြာမီ ကုန်ဆုံးတော့မည် ဖြစ်သည်။ မည်သူမျှ ဝင်ရောက်မလာပါက ထိုအထီးကျန် ဖန်တီးခြင်း အလင်းလုံး သည် အခြား ဇုံအားလုံးကို ရင်ဆိုင်ရတော့မည် ဖြစ်၏။ သူတို့ဘာသာသူတို့ တစ်ယောက်တည်း ရင်ဆိုင်ရမည် ဖြစ်သည်။

ဆယ် စက္ကန့်...

ရှစ် စက္ကန့်...

ကိုးနာရီပြည့်လုနီးပါး ကုန်လွန်သွားသည့်တိုင် မည်သူမျှ ပါဝင်မလာခဲ့ပေ။ ကောင်းကင်ယံတွင် အထီးကျန်စွာဖြင့် အနီးတစ်ဝိုက်ရှိ ဒေသကို ၎င်း၏ အရောင်အသွေးဖြင့် ခြယ်မှုန်းထားသော ဖန်တီးခြင်း အလင်းလုံး တစ်ခုတည်းသာ ရှိနေခဲ့သည်။ ဤကိုးနာရီအတွင်း အခြားသော ဇုံ ၂,၉၉၉ ခုက တစ်ခုခု ဖြစ်ပျက်နေကြောင်းကို သဘောပေါက်လာခဲ့ကြသည်။ ဂိုင်ယာ မျှော်စင် အားလုံးသည် တက်ကြွစွာ လှုပ်ရှားလာခဲ့၏။ ဤသည်ကို မြင်သောအခါ သူတို့သည် တစ်ပြိုင်နက်တည်း သတိဝီရိယ ရှိလာကြသလို ဇဝေဇဝါလည်း ဖြစ်သွားခဲ့ကြသည်။ ဘာတွေများ ဖြစ်နေသနည်း။

"ငါတို့ ကြေညာခြင်း အဆင့် ပြီးဆုံးတဲ့အထိ စောင့်ရမယ်..."

ရင့်ကျက်သော အမျိုးသမီးက စစ်ပွဲ အစစ်အမှန်ကို တစ်ခါမှ မကြုံဖူးသော သူမ၏ တပည့်ငယ်ကို အသိပေးလိုက်သည်။

"ကြေညာခြင်း အဆင့် ဆိုတာ စစ်ပွဲ စတင်သူတွေက ဦးဆောင်မှု အားသာချက် ရတဲ့ အဆင့် မဟုတ်လား... သူတို့က အဆင့်အတန်း ကို ရွေးချယ်နိုင်ပြီးတော့ ဖန်တီးခြင်း တန်ဖိုး အတွက် အခြေခံအုတ်မြစ် ချမှတ်နိုင်တယ်..."

မိန်းမငယ်လေးသည် ဤစစ်မြေပြင်နှင့် ပတ်သက်၍ သူမ သင်ကြားခဲ့ရသည်များကို ပြန်လည် မှတ်မိသွားခဲ့သည်။

ခြောက် စက္ကန့်...

ရင့်ကျက်သော အမျိုးသမီးက ခေါင်းညိတ်လိုက်သည်။

"မှန်တယ်..."

မိန်းမငယ်လေး၏ မျက်လုံးများက ဉာဏ်ပညာများဖြင့် တောက်ပလာခဲ့သည်။

"ဖန်တီးခြင်း တန်ဖိုး သတ်မှတ်ပြီးသွားရင် ကာကွယ်သူတွေက သူတို့ရဲ့ ဖန်တီးခြင်း တန်ဖိုး နဲ့ ညီမျှဖို့ ဒါမှမဟုတ် ကျော်လွန်ဖို့ အစွမ်းကုန် ကြိုးစားကြလိမ့်မယ်... ဒီလူက အားလုံးကို စိန်ခေါ်နေတာဆိုတော့ အဲဒါက ဇုံတိုင်းရဲ့ စုပေါင်း တန်ဖိုး ဖြစ်သွားမှာပဲ... သူတို့ တန်ဖိုးချင်း တူညီသွားရင် ကာကွယ်နိုင်လိမ့်မယ်... တကယ်လို့ ကျော်လွန်သွားခဲ့ရင် ကျန်ရှိနေတဲ့ ဖန်တီးခြင်း တန်ဖိုး တွေကို တန်ပြန်တိုက်ခိုက်မှု အဖြစ် ပြောင်းလဲနိုင်တယ်... အဲဒီအခါ တိုက်ခိုက်သူတွေက ကျန်ရှိနေတဲ့ ဖန်တီးခြင်း တန်ဖိုး နဲ့ ညီမျှအောင် ဒါမှမဟုတ် ကျော်လွန်အောင် လုပ်ရမယ်... အဲဒီလိုမှ မလုပ်နိုင်ရင် ကမောက်ကမ ကျဆင်းမှု ကို ခံစားရမှာပဲ..."

"ပါဝင်သူ အားလုံး အသက်ရှင်နေသရွေ့ တိုက်ပွဲငယ် အဆင့် စတင်လိမ့်မယ်... ဟုတ်တယ်မလား... ရလဒ်အပေါ် မူတည်ပြီး ကာကွယ်သူတွေဟာ တတိယအဆင့်မှာ သူတို့ရဲ့ ဂိုင်ယာ မျှော်စင် တွေ ခြိမ်းခြောက်ခံရနိုင်တယ်..."

သူမသည် ဆရာဖြစ်သူထံမှတစ်ဆင့် သူမ၏ အသိပညာများကို အတည်ပြုရင်း တက်ကြွစွာ စိတ်လှုပ်ရှားနေခဲ့သည်။ သူမ၏ အသိပညာအား ဆရာ ဖြစ်သူက အမှားပြင်ဆင်ပေးခြင်း မရှိသည်ကို မြင်သောအခါ သူမသည် စိတ်လှုပ်ရှားမှုဖြင့် ခုန်ပေါက်နေခဲ့တော့သည်။ ဆိုလိုသည်က သူမ၏ စကားလုံးများက မှန်ကန် နေပေသည်။

တစ် စက္ကန့်...

"လူတွေ အများကြီး သေရတော့မယ်..."

အလိုလိုသိမြင်မှုထဲသို့ နိမိတ်မကောင်းသော အတွေးတစ်ခု လွှမ်းမိုးလာစဉ် ရင့်ကျက်သော အမျိုးသမီးက ရေရွတ်လိုက်သည်။ သူမ၏ အတွေးများကို အခြားတစ်ယောက်ယောက်သာ သိသွားခဲ့လျှင် သူမကို ရူးနေသည်ဟု ထင်ကြပေလိမ့်မည်။ လူတစ်ယောက်တည်းဖြင်းလော။ အခြားသူ အားလုံးကို ဆန့်ကျင်ပြီးတော့လော...။ မိုက်မဲလေခြင်း...။

သုည... စက္ကန့်...

ဝေ့ဝူယင် ဝင်ရောက်သွားသော ဖန်တီးခြင်း အလင်းလုံးသည် အလွန်လှပသော အရောင်ခုနစ်မျိုး မြူခိုးအလင်းတန်းများဖြင့် တောက်ပလာခဲ့သည်။ ရုတ်တရက် ဖန်တီးခြင်း အလင်းလုံး သည် စတင် ကျယ်ပြန့်လာပြီး... ကျယ်ပြန့်လာကာ... ကျယ်ပြန့်လာခဲ့သည်။ ပို၍... ပို၍... ပို၍ ကျယ်ပြန့်လာခဲ့တော့သည်။

ရုတ်တရက် တစ်မီတာ အရွယ်အစားသာရှိသော ဖန်တီးခြင်း အလင်းလုံး သည် ကောင်းကင်ယံကို ဖုံးလွှမ်းသွားမတတ် အရွယ်အစားအထိ ရောက်ရှိသွားပြီး အချင်း ၃,၃၃၃ ကီလိုမီတာ အပြည့်အထိ ဖောင်းကားလာကာ လူတိုင်း၏ အမြင်အာရုံကို လွှမ်းမိုးသွားတော့၏။

၎င်း၏ အထက် သက်သေခံ သင်္ကေတ များထဲ၌ ထွင်းထုထားသော သင်္ကေတ အက္ခရာများဖြင့် ဂဏန်းစဉ်တစ်ခု ရှိနေသည်။ ထိုဂဏန်းသည် စစ်ပွဲတွင် ပထမဆုံး ပစ်လွှတ်လိုက်သော ကျောက်ခဲဖြစ်သည့် ဖန်တီးခြင်း တန်ဖိုး ကို ကိုယ်စားပြုပေသည်။ ထိုဂဏန်း၏ အထက်တွင်မူ အဆင့်အတန်း ရှိနေလေရာ...

၎င်းက ဤကဲ့သို့ ရေးသားထား၏။

(အဆင့်) - တာအို

(ဖန်တီးခြင်း တန်ဖိုး) - ၃၃,၃၃၆,၇၄၇

***