အခန်း ၁၁၀၀

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၀၀

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။

တုပိုင်က ထိုမူမမှန်သည့် သက်ရှိပင်။

ရွှေရောင်မျက်နှာဖုံးရှင် နတ်ဘုရားမျိုးနွယ်ဝင် အမျိုးသမီးက ရှင်းပြလိုက်၏။ သူမ၏ လေသံမှာ အလွန် မောက်မာနေသည်။ "ငါတို့ရဲ့ ကနဦးပုံစံချထားမှုအရ မျိုးနွယ်စုနှစ်ခုထဲက တစ်ခုက အနိုင်ရသွားမယ်။ ဒါမှမဟုတ် အချင်းချင်း ဖျက်ဆီးပစ်ကြလိမ့်မယ်။ ဒါပေမဲ့ ဒီမျိုးနွယ်စုနှစ်ခုက မျိုးစိတ်သစ်တစ်ခု မွေးဖွားဖို့ အားလုံးကို စတေးခဲ့ကြတယ်။ ကမ္ဘာပျက်ခေါင်းလောင်းသံကြီး တီးခတ်ပြီးတဲ့နောက် စမ်းသပ်မှုအဆုံးသတ်မှာတောင် သူ အသက်ရှင်ကျန်ရစ်ခဲ့တယ်။"

အမျိုးသမီးက ဆက်ပြောသည်။ "ဒါ့အပြင် မျှော်လင့်မထားတဲ့ ဒီမျိုးစိတ်သစ်က ငါတို့မျိုးနွယ်ရဲ့ စွမ်းအင်နိယာမတွေအပေါ် နားလည်မှုနဲ့ ကျွမ်းကျင်မှုရဲ့ တစ်ဝက်တိတိကို ဆုပ်ကိုင်ထားနိုင်တယ်။ သူ့ရဲ့ ဉာဏ်ရည်က အဆင့်မြင့် မျိုးနွယ်တစ်ခုရဲ့ တစ်ဝက်နဲ့ ညီမျှနေပြီ။"

ဤမြင်ကွင်းကို လူအများစု ရင်းနှီးနေကြမည် ဖြစ်၏။ မရေမတွက်နိုင်သည့် သိပ္ပံဇာတ်ကားများ၌ လူသားသိပ္ပံပညာရှင်တစ်စုက ဖမ်းဆီးထားသော လူဝံကြီးတစ်ကောင်ကို ဝိုင်းရံထားသည့် မြင်ကွင်းမျိုး အမြဲတမ်း ပါဝင်တတ်သည်။

စမ်းသပ်ကုတင်တစ်ခုထက်၌ ချည်နှောင်ထားပြီး ခန္ဓာကိုယ်ထဲသို့ ပြွန်မျိုးစုံ တပ်ဆင်ထားကာ ထိုလူဝံကြီးမှာ အဆုံးအစမရှိသည့် စူးစမ်းလေ့လာမှုများအတွက် အရာဝတ္ထုတစ်ခု ဖြစ်လာရ၏။

ထို့နောက် ထိုသတ္တဝါကြီးသည် အရွယ်ရောက်ပြီး လူသားတစ်ယောက်၏ ဉာဏ်ရည်တစ်ဝက်ခန့်ကို ပိုင်ဆိုင်ထားကာ အသက်ခြောက်နှစ် ၊ ခုနစ်နှစ်အရွယ် ကလေးတစ်ယောက်နှင့် ခန့်မှန်းခြေ ညီမျှနေကြောင်း သိပ္ပံပညာရှင်များက အံ့သြချီးကျူးကြပေလိမ့်မည်။

လက်ရှိအခြေအနေ၌ တုပိုင်မှာ ထိုလူဝံကြီးဖြစ်နေပြီး သိပ္ပံပညာရှင်များမှာ နတ်ဘုရားမျိုးနွယ်ဝင်များပင်။

အမျိုးသမီးက မေး၏။ "ဒီစမ်းသပ်မှုကနေ မတော်တဆ ထွက်ပေါ်လာတဲ့အရာကို ဘယ်လို ဖြေရှင်းသင့်လဲ။"

အရပ်ပုပု အစိမ်းရောင်အသားအရေနှင့် နတ်ဘုရားမျိုးနွယ်ဝင်က မျက်မှောင်ကြုတ်လိုက်သည်။ "စမ်းသပ်မှုရဲ့ အကြွင်းအကျန်တွေအကုန် ရှင်းပြီးပြီလား။"

အမျိုးသမီးက ခေါင်းညိတ်လိုက်၏။ "အကုန် ပြီးပြီ။ တခြား သက်ရှိတွေကို ဖျက်ဆီးပစ်လိုက်ပြီမလို့ ဒီမူမမှန်မှုတစ်ခုပဲ ကျန်တော့တယ်။ စောင့်ကြည့်လေ့လာဖို့ သူ့ကို ဆက်ဖမ်းထားသင့်လား ၊ ဒါမှမဟုတ် ဖယ်ရှားပစ်ရမလား။"

အစိမ်းရောင်အသားအရေနှင့်သူက မေးသည်။ "သူ့ခန္ဓာကိုယ်မှာ ထူးခြားတဲ့ စွမ်းရည်တွေ ပြသနေတာ ရှိလား။"

အမျိုးသမီးက ဂရုမစိုက်သည့်ဟန်ဖြင့် ပြောလိုက်၏။ "မရှိဘူး။ အရင်ကလည်း ဆင်တူတဲ့ မူမမှန်မှုမျိုး သုံးသောင်းကျော် ရှိခဲ့ဖူးတယ်။ အစပိုင်းမှာတော့ ငါတို့မျိုးနွယ်နဲ့ တူညီတဲ့ သက်ရှိတွေအဖြစ် ဆင့်ကဲပြောင်းလဲလာမလားဆိုတဲ့ မျှော်လင့်ချက်နဲ့ ဖမ်းဆီးပြီး ပြုစုပျိုးထောင်ဖို့ ကြိုးစားခဲ့ကြတယ်။ ချွင်းချက်မရှိ အကုန် ကျရှုံးခဲ့တယ်။ နောက်ဆုံးတော့ အဆင့်နိမ့် စမ်းသပ်ခံတွေအဖြစ် ပေါင်းစပ်သွားရုံပဲ။ သူတို့ရဲ့ ဉာဏ်ရည်မှာ တိကျတဲ့ အကန့်အသတ်တစ်ခု ရှိနေတယ်။"

အမျိုးသမီးက ခေတ္တရပ်ပြီးနောက် ဆက်ပြောသည်။ "ဒါကြောင့် နောက်ပိုင်းပေါ်လာတဲ့ မူမမှန်တာတွေအကုန်လုံးကို စတင်ဖယ်ရှားပစ်ခဲ့တယ်။ သူတို့က သိပ်ကို သာမန်ဆန်လွန်းနေကြတယ်လေ။ ဆက်ဖမ်းထားမယ်ဆိုရင် အရင်းအမြစ်တွေကို အကြီးအကျယ် ဖြုန်းတီးရာကျလိမ့်မယ်။"

မရေမတွက်နိုင်သည့် နဂါးများနှင့် မိစ္ဆာများက သူတို့၏ အသက်များကို စတေးကာ တုပိုင်ကို ဖန်တီးရန် စွမ်းအားအကုန် ပေးအပ်ခဲ့ကြ၏။ ဤအသစ်မွေးဖွားလာသည့် မျိုးနွယ်မှာ ကုဋေတစ်ထောင်၌ တစ်ခုသာ ပေါ်ထွက်တတ်သော အံ့ဖွယ်အရာတစ်ခု ဖြစ်သည်။

သို့သော် ဤနတ်ဘုရားမျိုးနွယ်ဝင်များ၏ မျက်လုံးထဲ၌မူ သူသည် သာမန်မျှသာဖြစ်ကာ ညံ့ဖျင်းပြီး အရည်အသွေး ကင်းမဲ့နေ၏။

မျောက်တစ်သောင်းထဲမှ အချောမောဆုံး မျောက်တစ်ကောင်ကို ရွေးချယ်လိုက်သကဲ့သို့ပင်... နောက်ဆုံး၌မူ မျောက်တစ်ကောင်သာ ဖြစ်နေဆဲပင်။

ဤအခြေအနေမှာ Million Arthur ဂိမ်းဇာတ်အိမ်နှင့် များစွာ တူညီနေသည်။ ကျောက်တုံးထဲမှ ဒဏ္ဍာရီလာဓားကို ဆွဲနုတ်နိုင်သည့်အတွက် ဂုဏ်ပြုပါသည်။ သင်သည် ဇာတ်လိုက်ဖြစ်လာလေပြီ။ သို့သော် တောင်းပန်ပါသည်။ သင်သည် ဤဓားကို ဆွဲနုတ်နိုင်သော ၁.၃ သန်းမြောက် လူတစ်ယောက်သာဖြစ်ပြီး ဘုရင်အာသာ တစ်သန်းထဲမှ တစ်ယောက်သာလျှင် ဖြစ်၏။

အစိမ်းရောင်အသားအရေနှင့်သူက အေးစက်စွာ ပြောလိုက်သည်။ "ဒါဆို... ရှင်းလိုက်။"

အမျိုးသမီးက ခေါင်းညိတ်လိုက်၏။ "နားလည်ပါပြီ။"

အစိမ်းရောင်အသားအရေနှင့်သူက ထပ်မံ သတိပေးလိုက်သည်။ "မဖယ်ရှားခင် အချက်အလက်တွေ အကုန် သိမ်းထားဖို့ သေချာလုပ်ပါ။ အရင်းအမြစ် သိပ်ကုန်ကျမှာ မဟုတ်ဘူး။"

အမျိုးသမီးက ခေါင်းညိတ်လိုက်၏။ "နားလည်ပါပြီ။ မူမမှန်မှု သူအတွက် စွမ်းအင်အချက်အလက်တွေ အကုန် သိမ်းဆည်းနေပါတယ်။"

စွမ်းအင်စက်ရုပ်က စက်သံသဲ့သဲ့ဖြင့် ပြောလိုက်သည်။ "အမိန့်ကို လက်ခံရရှိပါပြီ။"

ထို့နောက် ဟိုလိုဂရမ် မှန်ပြင်တစ်ခု ထုတ်လွှင့်လိုက်ပြီး တုပိုင်၏ အချက်အလက်များ အကုန်လုံးကို နတ်ဘုရားမျိုးနွယ်၏ ဆာဗာများထဲသို့ စတင် ဒေါင်းလုဒ်လုပ်လိုက်၏။

စက္ကန့်အနည်းငယ် အကြာ၌ စက်ရုပ်က သတင်းပို့လိုက်သည်။ "အချက်အလက်များကို အပ်လုဒ်လုပ်ပြီး သိမ်းဆည်းမှု ပြီးစီးပါပြီ။"

ထိုမခါ အစိမ်းရောင်အသားအရေနှင့်သူက ပြတ်သားစွာ ပြောလိုက်၏။ "ဖျက်ဆီးလိုက်တော့။"

အမျိုးသမီးက ခလုတ်တစ်ခု နှိပ်လိုက်သည်။ "ဖျက်ဆီးခြင်း စတင်နေပါတယ်။ စမ်းသပ်ခံရဲ့ လည်ပတ်နဲ့ စိတ်ဝိညာဉ်ကို သော့ဖွင့်နေပါတယ်။"

ရုတ်တရက်... တုပိုင် သူ၏ စိတ်နှင့် စိတ်ဝိညာဉ်တို့ လုံးဝ ဗလာကျင်းသွားသကဲ့သို့ ခံစားလိုက်ရ၏။ ချည်နှောင်ထားသော စွမ်းအင်လှိုင်းတစ်ခုက ရိုးရှင်းစွာပင် ပျောက်ကွယ်သွားသကဲ့သို့ပင်။

အိပ်မက်ဆိုး မိစ္ဆာဘုရင်မှာ အသက်ပေးခဲ့ရသည့်တိုင် စမ်းသပ်မှုလည်ပတ်မှ ရုန်းထွက်ရန် ကျရှုံးခဲ့ရ၏။ သို့သော် ယခုအခါ၌မူ ထိုလည်ပတ်မှာ လုံးဝ အားစိုက်ထုတ်စရာမလိုဘဲ ဖယ်ရှားခံလိုက်ရလေပြီ။

ဤအခြေအနေမှာ ဗီဒီယိုဂိမ်းတစ်ခုနှင့် တူညီနေသည်။ ဇာတ်ကောင်တစ်ကောင်သည် ပရိုဂရမ်ဆွဲထားသည့် သတ်မှတ်ချက်များမှ ဘယ်သောအခါမှ မလွတ်မြောက်နိုင်သော်လည်း ဂိမ်းရေးဆွဲသူများက ခလုတ်တစ်ချက် နှိပ်ရုံဖြင့် လွယ်ကူစွာ ဖယ်ရှားပေးနိုင်၏။

"ကလစ်..."

တုပိုင်၏ လည်ပင်းမှ လည်ပတ်မှာ ပွင့်ထွက်သွားသည်။ စွမ်းအင်စက်ရုပ်တစ်ခုက ရှေ့တိုးလာပြီး လည်ပတ်ကို ယူဆောင်လိုက်၏။ နတ်ဘုရားမျိုးနွယ်ဝင်များအတွက်မူ ပြန်လည်အသုံးပြုနိုင်သည့် ဤလည်ပတ်မှာ တုပိုင်ထက်ပင် များစွာ တန်ဖိုးရှိနေသည်။

စက်ရုပ်က သတင်းပို့လိုက်၏။ "စမ်းသပ်မှုလည်ပတ်ကို ပြန်လည်ရယူပြီးပါပြီ။"

အမျိုးသမီးက ပြတ်သားစွာ ပြောလိုက်သည်။ "ကွပ်မျက်လိုက်တော့။"

စက်ရုပ်က တုံ့ပြန်လိုက်၏။ "အမိန့်ကို လက်ခံရရှိပါပြီ။"

ထို့နောက် ဆေးထိုးအပ်တစ်ခုကို ထုတ်ယူလိုက်သည်။ ဆေးထိုးအပ်အတွင်း၌ အလွန် သိပ်သည်းလွန်းလှသဖြင့် သေးငယ်သည့် အနက်ရောင်တွင်းနက်တစ်ခုနှင့် ဆင်တူနေသည့် စွမ်းအင်တစ်ခု လည်ပတ်နေ၏။ ဆေးထိုးအပ်ကို တုပိုင်၏ ဦးနှောက်ထဲသို့ တိုက်ရိုက် ထိုးသွင်းလိုက်ပြီး အမှောင်စွမ်းအင်များကို ဖြည်းညင်းစွာ ထိုးထည့်လိုက်သည်။

ချက်ချင်းဆိုသလိုပင် တုပိုင်၏ သူငယ်အိမ်များ အဆမတန် ကျယ်လာ၏။ သူ၏ စိတ်ဝိညာဉ်မှာ ချက်ချင်းပင် ငြိမ်းသတ်ခံလိုက်ရသည်။ ဖယောင်းတိုင်အား မှုတ်လိုက်သကဲ့သို့ပင်။

ဤသည်မှာ နတ်ဘုရားမျိုးနွယ်ဝင်များ ကွပ်မျက်မှု ပြုလုပ်သော ပုံစံပင်။ အနည်းငယ်မျှ ပြဇာတ်ဆန်ခြင်း သို့မဟုတ် ခမ်းနားကြီးကျယ်ခြင်းမျိုး မရှိချေ။

သားကောင်ကို ပြာကျသွားစေမည့် ကမ္ဘာမြေ တုန်ဟည်းသွားလောက်သည့် လက်ဝါးရိုက်ချက်မျိုး မရှိပေ။ စိတ်ဝိညာဉ်ကို တစ်စစီ ကြေမွသွားစေသော ကြောက်မက်ဖွယ်ကောင်းသည့် မျက်စိကျိန်းမတတ် အလင်းရောင်မျိုးလည်း မရှိချေ။

ကမ္ဘာမြေရှိ အဆိပ်ဆေးထိုး၍ ကွပ်မျက်ခြင်းကဲ့သို့ပင် လုံးဝ ချောမွေ့နေသည်။

ယဉ်ကျေးမှုတစ်ခု ပိုမိုအဆင့်မြင့်လာလေ ကွပ်မျက်မှုနည်းလမ်းများ ပို၍ ရိုးရှင်းလာလေပင်။ ရှေးဟောင်းတရုတ်ပြည်၌ ကွပ်မျက်မှုများမှာ ရက်စက်ကြမ်းကြုတ်သော မြင်ကွင်းများဖြစ်ကြပြီး အသားတစ်စစီလှီးဖြတ် ကွပ်မျက်ခြင်း သို့မဟုတ် မြင်းငါးကောင်ဖြင့် ဆွဲဖြဲခြင်းတို့ ပြုလုပ်ကြ၏။

မြင်ကွင်းမှာ သွေးထွက်သံယိုဖြစ်ကာ အလွန် ကြမ်းတမ်းလှသည်။ သို့သော် အချိန်များ ကုန်လွန်လာသည်နှင့်အမျှ ကွပ်မျက်မှုများက ကြိုးပေးခြင်းမှ သေနတ်ဖြင့်ပစ်ခတ်ခြင်း ၊ ထို့မှတစ်ဆင့် လျှပ်စစ်ကုလားထိုင် ၊ နောက်ဆုံး၌ တိတ်ဆိတ်ပြီး နာကျင်မှုကင်းမဲ့သော အဆိပ်ဆေးထိုးခြင်းများဆီသို့ ဆင့်ကဲပြောင်းလဲလာ၏။

စက်ရုပ်က မေးသည်။ "အလောင်းကို ဘယ်လို စွန့်ပစ်ရမလဲ။"

အမျိုးသမီးက ညွှန်ကြား၏။ "အစုလိုက်အပြုံလိုက် မီးရှို့ဖို့ အမှိုက်စွန့်ပစ်ရာ နေရာဆီ ပို့လိုက်။ စွမ်းအင် တစ်စက်လေးတောင် အလဟဿ မဖြစ်စေနဲ့။"

စက်ရုပ်က တုံ့ပြန်လိုက်သည်။ "အမိန့်ကို လက်ခံရရှိပါပြီ။"

ထို့နောက် စွမ်းအင်စက်ရုပ် နှစ်ခု ရှေ့တိုးလာကာ တုပိုင်၏ အသက်မဲ့နေသည့် ခန္ဓာကိုယ်ကို မ,ချီလိုက်ပြီး အခန်းထဲမှ သယ်ဆောင်သွားကြ၏။

ဓာတ်ခွဲခန်းထဲရှိ နတ်ဘုရားမျိုးနွယ်ဝင် သိပ္ပံပညာရှင်များမှာလည်း လုပ်ငန်းဆောင်တာများ ပြီးစီးသွားသကဲ့သို့ ရိုးရှင်းစွာပင် လူစုခွဲသွားကြသည်။

တုပိုင်အတွက်မူ နတ်ဘုရားတိုင်းပြည်ဆီ ဝင်ရောက်လာခြင်းမှာ အလွန် ကြီးကျယ်ခမ်းနားပြီး ဘဝကို ပြောင်းလဲစေနိုင်သော အဖြစ်အပျက်တစ်ခုပင်။ သို့သော် ဤသိပ္ပံပညာရှင်များအတွက်မူ တုပိုင် ရောက်ရှိလာခြင်းနှင့် ကွပ်မျက်ခံရခြင်းမှာ သာမန်ဖြစ်ရိုးဖြစ်စဉ် ကိစ္စတစ်ခုသာ ဖြစ်နေ၏။

ဤကဲ့သို့သော ကွပ်မျက်မှုမျိုးကို အကြိမ်ပေါင်းများစွာ ပြုလုပ်ခဲ့ပြီးဖြစ်သည်။ စမ်းသပ်မှု၌ အသုံးဝင်မှု ကုန်ဆုံးသွားပြီဖြစ်သည့် စမ်းသပ်ကြွက်တစ်ကောင်ကို ရှင်းလင်းနေသော သုတေသီတစ်ယောက်ကဲ့သို့ပင် သူတို့၌ သတ်ဖြတ်ရန် ဝန်လေးခြင်း သို့မဟုတ် သနားညှာတာမှုမျိုး အလျဉ်းမရှိနေပေ။

စွမ်းအင်စက်ရုပ် နှစ်ခုက တုပိုင်၏ အလောင်းကို သယ်ဆောင်ကာ ပိရမစ်ကြီး၏ အလယ်ဗဟို တွင်းနက်ကြီးဖြစ်သည့် စွမ်းအင် ဖြိုခွဲရေးနှင့် ပြန်လည်အသုံးချရေး ဗဟိုဌာနဆီ ဦးတည်သွားသော အထူးစင်္ကြံတစ်ခုတစ်လျှောက် လျှောက်သွားကြ၏။

ရိုးရှင်းစွာ ပြောရလျှင် အမှိုက်မီးရှို့ဖျက်ဆီးသည့်စက်ပင် ဖြစ်သည်။

"ဘုတ်..."

စက်ရုပ်များက တုပိုင်၏ ခန္ဓာကိုယ်ကို လေဟာပြင်ထဲ ရက်စက်စွာ ပစ်ချလိုက်ကြ၏။ သူ၏ ခန္ဓာကိုယ်မှာ မီတာသောင်းချီ နက်ရှိုင်းသော အောက်ဘက်ဆီ ပြုတ်ကျသွားသည်။

ပျော့အိနေသည့် အရာဝတ္ထု တောင်ကြီးတစ်ခုပေါ် တုပိုင် ပြင်းထန်စွာ ကျရောက်လာ၏။ အပေါ်စီးမှ ကြည့်လိုက်လျှင် အလောင်းကောင် ပင်လယ်ကြီးတစ်ခုပင်။

အလောင်းကောင်ပေါင်း သောင်းချီကာ ဧရာမတောင်ကြီးတစ်ခုအဖြစ် စုပုံနေ၏။ အလောင်းများမှာ ပုံသဏ္ဌာန် အရွယ်အစား မျိုးစုံရှိကြပြီး တချို့က ဧရာမကြီးများဖြစ်ကာ တချို့က သေးငယ်ကြသည်။ တချို့က လူသားများနှင့် တူညီနေပြီး အခြားအရာများမှာ ရေဘဝဲများ သို့မဟုတ် လိပ်စိမ်းများနှင့် ဆင်တူကာ တချို့မှာမူ ရိုးရှင်းစွာပင် အနက်ရောင် အရိပ်ထုကြီးများ ဖြစ်ကြ၏။

စိတ်ကူးနှင့်ပင် မှန်းဆ၍ရနိုင်သော ထူးဆန်းသည့် သက်ရှိပုံစံမျိုးစုံ ရှိနေသည်။

သို့သော် ချွင်းချက်မရှိ ထိုအရာအကုန်လုံးမှာ နတ်ဘုရားမျိုးနွယ်၏ စမ်းသပ်မှုမျိုးစုံမှ မတော်တဆ ထွက်ပေါ်လာသည့် သက်ရှိများသာ ဖြစ်ကြ၏။ အလောင်းတစ်ခုချင်းစီတိုင်းက သန်းတစ်ရာ၌ တစ်ယောက်သာရှိသော အံ့ဖွယ်သက်ရှိများပင်။ သူတို့၏ သက်ဆိုင်ရာ ကမ္ဘာလောကများ၌ ဘုရင်များ၏ ဘုရင်များ ဖြစ်ခဲ့ကြပေလိမ့်မည်။

ယခုအခါ၌မူ အကုန်လုံး အမှိုက်များအဖြစ်သာ သတ်မှတ်ခံလိုက်ရပြီး အလောင်းကောင် တောင်ကြီးတစ်ခုအဖြစ် စုပုံခံထားရကာ ပြန်လည်အသုံးချခံရမည့်အချိန်ကို စောင့်ဆိုင်းနေကြသည်။

အချိန်များ ကုန်လွန်သွား၏။

လဝက် ၊ တစ်လ ၊ သုံးလ ၊ ခြောက်လ... အချိန်များ တဖြည်းဖြည်း ကုန်လွန်သွားသည်။

ထိုခြောက်လတာ ကာလအတွင်း နောက်ထပ် အလောင်းပေါင်း ဒါဇင်ချီကာ တွင်းနက်ကြီးထဲ ပစ်ချခံခဲ့ရပြီး ပျမ်းမျှအားဖြင့် ရက်အနည်းငယ်ကြာတိုင်း တစ်လောင်း ကျရောက်လာခြင်း ဖြစ်၏။ နောက်ဆုံး၌ တုပိုင်မှာ ပိုကြီးမားလာသော အလောင်းကောင်ပုံကြီး၏ အောက်ခြေ နက်ရှိုင်းသည့် နေရာ၌ မြုပ်နှံခံလိုက်ရလေတော့သည်။

နောက်ဆုံး၌ အလောင်းကောင် ၃၀၀၀၀ ကိုစုဆောင်းပြီးသွားလေပြီ။ အစုလိုက်အပြုံလိုက် ဖြိုခွဲခြင်းနှင့် ပြန်လည်အသုံးချခြင်းအတွက် သတ်မှတ်အရေအတွက် ပြည့်မီသွားပြီ ဖြစ်သည်။

အစိမ်းရောင်အသားအရေနှင့် နတ်ဘုရားမျိုးနွယ် သိပ္ပံပညာရှင်က ပြောလိုက်၏။ "အမှိုက်တွင်းနက်ကြီး ပြည့်သွားပြီ။ ဖြိုခွဲမှုနဲ့ ပြန်လည်အသုံးချမှုကို စတင်လိုက်တော့။"

စက်ရုပ်က ချက်ချင်း တုံ့ပြန်လိုက်သည်။

နတ်ဘုရားမျိုးနွယ် ပိရမစ်ကြီး၏ စွမ်းအင် ပြန်လည်အသုံးချရေး ဗဟိုဌာနက တဝုန်းဝုန်း မြည်ဟည်းလာ၏။

"ဝုန်းးး"

ရုတ်တရက် နှိုင်းယှဉ်၍မရနိုင်လောက်အောင် တောက်ပနေသည့် အလင်းတိုင်ကြီးတစ်ခု အပေါ်မှနေ၍ ပစ်ချလာသည်။

အမှိုက်တွင်းနက်ကြီးထဲရှိ သောင်းနှင့်ချီသည့် အလောင်းကောင်များမှာ မျက်စိတစ်မှိတ်အတွင်းမှာပင် အငွေ့ပျံသွားကြ၏။

ထိုအချိန်နှင့် ကွက်တိမှာပင်... တုပိုင်၏ မျက်လုံးများ ရုတ်တရက် ပွင့်လာသည်။

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၀၀ ပြီး။

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။