အခန်း ၁၁၀၄

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၀၄

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။

မိုဟန်က မျက်လုံးကလေး ကလယ်ကလယ်ဖြင့် ပြောသည်။ "ယောက်ျား... ငါ အခုလေးတင် နေသုံးစင်းရဲ့ ဗဟိုချက်ကို ရောက်ခဲ့တယ်။ နောက်ထပ် ဘာဆက်လုပ်ရမလဲ။"

တုပိုင်က တည်ငြိမ်စွာ ပြန်ဖြေလိုက်၏။ "စိတ်မပူပါနဲ့။"

တုပိုင်၏ စော်ကားသည့်စကားများကို ရင်ဆိုင်ရသော်လည်း နတ်ဘုရားမျိုးနွယ်ဝင်များက လုံးဝ တုံ့ပြန်မှု မပြချေ။ ဒေါသထွက်သည်ဟုပင် မခံစားရပေ။

ဤအခြေအနေမှာ ဘတ်စ်ကားပေါ်၌ အော်ဟစ်နေသော အရူးတစ်ယောက်နှင့် ကြုံတွေ့ရသည့် လှပသော အမျိုးသမီးတစ်ယောက်နှင့် များစွာ တူညီနေ၏။

ပုံမှန်အားဖြင့်ဆိုလျှင် ထိုအမျိုးသမီးသည် ဒေါသထွက်ကာ ရဲကို ချက်ချင်း ဖုန်းဆက်ပေလိမ့်မည်။ သို့သော် ထိုအမျိုးသမီးက အော်မေတောင်ပေါ်သို့ သွားပြီး သောင်းကျန်းနေသည့် မျောက်တစ်ကောင်ကို မြင်လိုက်ရမည်ဆိုလျှင်မူ တခစ်ခစ်ရယ်မောကာ ဓာတ်ပုံရိုက်ရန် ဖုန်းကို ထုတ်ယူလိုက်မည်သာ ဖြစ်သည်။

နတ်ဘုရားမျိုးနွယ်ဝင်များအတွက်မူ တုပိုင်၏ စော်ကားမှုများမှာ မျောက်တစ်ကောင်က သူ့ကိုယ်သူ အရူးလုပ်နေသည်ထက် မပိုချေ။

နတ်ဘုရားမျိုးနွယ်ဝင်တစ်ဦးက အေးစက်စွာ အမိန့်ပေးလိုက်သည်။ "အသင့်ပြင်။"

"သုံး...။"

"နှစ်...။"

"တစ်...။"

"ဖျက်ဆီးပစ်။"

မျက်စိတစ်မှိတ်အတွင်းမှာပင် စွမ်းအင်ဝင်္ကပါ နှစ်ခုမှ မျက်စိကျိန်းမတတ် အလင်းရောင်များ ပေါက်ကွဲထွက်လာ၏။ တုပိုင်နှင့် မိုဟန်တို့၏ ခန္ဓာကိုယ်များ ချက်ချင်း ပျောက်ကွယ်သွားကာ ရေတွက်၍မရနိုင်သည့် စွမ်းအင်အမှုန်လေးများအဖြစ် ပြောင်းလဲပြန့်ကျဲသွားပြီး သာမန်မျက်စိဖြင့် လုံးဝ မမြင်နိုင်တော့ချေ။

လက်ခုပ်တီးသံများ မရှိသကဲ့သို့ အားပေးအော်ဟစ်သံများလည်း ထွက်ပေါ်မလာပေ။ မျောက်နှစ်ကောင်ကို သတ်ပစ်လိုက်ရခြင်းနှင့် ပတ်သက်၍ မည်သည့်အရာက အောင်ပွဲခံစရာ ရှိနေမည်နည်း။

ဤသည်က သူတို့၏ စမ်းသပ်မှုအတွင်းရှိ အသေးအဖွဲ အမှားအယွင်းတစ်ခုကို ဖြေရှင်းလိုက်ရုံသာ ဖြစ်၏။ ထိုသို့သော ဖြစ်ရပ်များက ရှားပါးသော်လည်း ရံဖန်ရံခါတော့ ဖြစ်ပေါ်လေ့ရှိသည်။

လက်ရှိအကြိမ်၌မူ စမ်းသပ်ခံ တုပိုင် သေကိုသေရမည် ဖြစ်၏။ စိတ်ဝိညာဉ် ချိတ်ဆက်ထားကြသည့် အထီးနှင့် အမ တိရစ္ဆာန်များဖြစ်သော တုပိုင်နှင့် မိုဟန်တို့ကို အတိအကျ တစ်ချိန်တည်းမှာပင် သတ်ပစ်သောကြောင့် သူ ထပ်မံ အသက်ရှင်လာနိုင်မည့် ဖြစ်နိုင်ခြေ လုံးဝ မရှိတော့ချေ။

အစိမ်းရောင် နတ်ဘုရားမျိုးနွယ်ဝင်က ချက်ချင်း လှည့်ထွက်သွား၏။ အမျိုးသမီး ဆိုဖီယာက မျက်မှောင်ကြုတ်လိုက်သည်။ ဤကဲ့သို့ အမှိုက်တစ်ကောင်ကို ဖျက်ဆီးပစ်ရန် အချိန်လေးနှစ်တောင် ကြာမြင့်ခဲ့ရသည်။

သေချာပေါက်ပင် လေးနှစ်ဆိုသည်မှာ ဘီလီယံနှင့်ချီသည့် ဘဝသက်တမ်းနှင့် ယှဉ်လျှင် မည်သည့်အရာမျှ မဟုတ်ချေ။

နတ်ဘုရားမျိုးနွယ်ဝင်အားလုံး စတင် ထွက်ခွာသွားကြ၏။ ဆိုဖီယာလည်း ထွက်သွားရန် လှည့်လိုက်သည်။ ရှင်းပြ၍မရနိုင်သည့် အကြောင်းရင်းတစ်ခုကြောင့် ရုတ်တရက် ပျို့အန်ချင်စိတ် ဖြစ်ပေါ်လာ၏။ သို့သော် တံခါးပေါက်သို့ ရောက်ချိန်၌ တစ်ခုခု မှားယွင်းနေကြောင်း ခံစားလိုက်ရသည်။ သူမ အနေဖြင့် နောက်သို့ လှည့်မကြည့်ဘဲ မနေနိုင်ချေ။

ထို့နောက် အကြွင်းမဲ့ ထိတ်လန့်တုန်လှုပ်မှု လှိုင်းလုံးကြီးတစ်ခုက ဆိုဖီယာ့ကို လွှမ်းမိုးသွားသည်။

ထိုမြင်ကွင်းကို မယုံကြည်နိုင်စွာ စိုက်ကြည့်ရင်း ဦးရေပြားများ ထုံကျဉ်သွားသည်ဟု ခံစားလိုက်ရ၏။ မည်သို့ ဖြစ်နိုင်မည်နည်း။ တုပိုင် ထပ်မံ အသက်ရှင်လာပြန်လေပြီ။ ဤအရာက လုံးဝ မဖြစ်နိုင်ချေ။

ရေတွက်၍မရနိုင်သည့် စွမ်းအင်အမှုန်လေးများက နောက်တစ်ကြိမ် စတင် စုစည်းလာပြန်ပြီး ပထမဆုံးအနေဖြင့် အလင်းရောင် အရိပ်တစ်ခု ဖြစ်ပေါ်လာကာ ရုပ်ပိုင်းဆိုင်ရာ ခန္ဓာကိုယ်တစ်ခုအဖြစ် အလျင်အမြန် ခိုင်မာလာ၏။

တုပိုင်က ထိုနေရာ၌ တိတ်ဆိတ်စွာ လဲလျောင်းနေသည်။ သူ၏ ဘေး၌ အရူးပုံပေါက်နေသည့် နဂါးမျိုးနွယ်ဝင် မိန်းကလေး မိုဟန်မှာလည်း အထိအခိုက် လုံးဝမရှိဘဲ လဲလျောင်းနေ၏။

မိုဟန်က ကိုယ့်ကိုယ်ကိုယ် အထက်အောက် ကြည့်လိုက်ပြီး အံ့ဩတကြီး မေးလိုက်သည်။ "ယောက်ျား... ငါ ဘယ်လိုလုပ်ပြီး ပြန်အသက်ရှင်လာတာလဲ။"

ဆိုဖီယာက အရေးပေါ် ကြေညာလိုက်၏။ "အားလုံးပဲ ပြန်လာကြ။ ပြင်းထန်တဲ့ စမ်းသပ်မှု မတော်တဆမှုတစ်ခု ဖြစ်သွားပြီ။ ငါတို့ရဲ့ အထီးရော အမ စမ်းသပ်ခံနှစ်ယောက်လုံး ပြန်လည် အသက်ရှင်လာတယ်။ ထပ်ပြောမယ်။ အလွန်ပြင်းထန်တဲ့ စမ်းသပ်မှု မတော်တဆမှုတစ်ခု ဖြစ်သွားပြီ။"

**--**--**--**--**--**--**--**

ဤတစ်ကြိမ်၌ ရာနှင့်ချီသည့် နတ်ဘုရားမျိုးနွယ်ဝင်များက တုပိုင်နှင့် မိုဟန်တို့ကို ဝိုင်းရံလာကြ၏။ သေချာပေါက်ပင် သူတို့၏ မျက်လုံးထဲရှိ အကြည့်များမှာ ဂေါ်ရီလာမျောက်ဝံများကို ကြည့်နေသည့်ပုံ ပေါ်နေဆဲပင်။ သို့သော် လူတိုင်း၏ မျက်နှာအမူအရာများမှာ အလွန်အမင်း လေးနက်တည်ကြည်နေကြသည်။

မည်သို့ ဖြစ်နိုင်မည်နည်း။

ဤသို့သော အရာမျိုးက ယခင်က တစ်ခါမှ မဖြစ်ဖူးခဲ့ချေ။ တုပိုင်မှာ သူတို့၏ စမ်းသပ်ခံ ဓာတ်ခွဲခန်းကြွက်တစ်ကောင်သာ ဖြစ်ပြီး မည်သို့ သတ်မသေ ဖြစ်နိုင်မည်နည်း။

တုပိုင် မသေဆုံးနိုင်သည့် အကြောင်းရင်းကို ကြိုတင်၍ ရှင်းလင်းစွာ ရှာဖွေတွေ့ရှိပြီးဖြစ်ရာ ထို့ကြောင့်ပင် စိတ်ဝိညာဉ် ချိတ်ဆက်ထားသည့် အခြားတစ်ယောက်နှင့်အတူ တစ်ပြိုင်တည်း သတ်ပစ်ခြင်း ဖြစ်၏။

အဘယ်ကြောင့် သေမသွားရသည်နည်း။ အဘယ်ကြောင့် ထပ်မံပြီး အသက်ပြန် ရှင်လာရသည်နည်း။

ကြီးမားလှသည့် မတော်တဆမှုကြီးတစ်ခု ဖြစ်ပွားသွားပြီ ဖြစ်၏။

ဤဖြစ်ရပ်က အလွန်တရာ ပြင်းထန်လှသည်။ သေချာပေါက် ဤစမ်းသပ်ခံနှစ်ယောက်က သူတို့အတွက် ခြိမ်းခြောက်မှုတစ်ခု ဖြစ်လာခြင်းကြောင့်တော့ မဟုတ်ပေ။

စမ်းသပ်ခံ တုပိုင်က မိုဟန်ထက် အများကြီး ပိုမို အစွမ်းထက်သော်လည်း နတ်ဘုရားမျိုးနွယ်ဝင်များ၏ စွမ်းအင် အကန့်အသတ်ကို ဘယ်သောအခါမှ ဖြတ်ကျော်နိုင်မည် မဟုတ်ချေ။

ထို့ကြောင့် နတ်ဘုရားများကို ထိခိုက်ပျက်စီးအောင် ဘယ်သောအခါမှ ပြုလုပ်နိုင်မည် မဟုတ်ပေ။ ဤသည်မှာ စွမ်းအင် နိယာမများက သတ်မှတ်ထားသည့် အကြွင်းမဲ့ စည်းမျဉ်းတစ်ခုပင်။

သူတို့ ကြောက်သည်မှာ တုပိုင်၏ မသေဆုံးနိုင်ခြင်းက သူတို့ နတ်ဘုရားမျိုးနွယ်ဝင်များ၏ သိမြင်နားလည်မှုကို လုံးဝ ဆန့်ကျင်နေသောကြောင့် ဖြစ်သည်။

အမည်မသိ အရာများက အမြဲတမ်း အကြောက်ရဆုံးပင်။ ဤသည်မှာ တစ်ခုခုက သူတို့၏ ထိန်းချုပ်မှုအောက်မှ လုံးဝ ကျော်လွန်နေကြောင်းကို ဆိုလိုနေ၏။ ထို့အပြင် စွမ်းအင်အပေါ် အခြေခံ နားလည်သဘောပေါက်မှု ချို့ယွင်းချက် ရှိနေနိုင်ကြောင်းကိုပင် သွယ်ဝိုက်ဖော်ပြနေသည်။

နောက်ဆက်တွဲအနေဖြင့် တုပိုင်နှင့် မိုဟန်တို့မှာ ရေတွက်၍မရနိုင်အောင် အကြိမ်ကြိမ် သတ်ဖြတ်ခံရသည်။ ဒါဇင်နှင့်ချီ၍ ၊ ရာနှင့်ချီ၍ ၊ ထောင်နှင့်ချီ၍ ၊ သောင်းနှင့်ချီ၍ပင်။ နတ်ဘုရားမျိုးနွယ်ဝင်များက စဉ်းစား၍ရနိုင်သည့် နည်းလမ်းပေါင်းစုံကို ကြိုးစားကြ၏။

ခေါင်းဖြတ်ခြင်း ၊ ဗုံးခွဲခြင်း ၊ လေဆာဖြင့် ပစ်ခတ်ခြင်း ၊ အေးခဲစေခြင်း ၊ ပြင်းထန်လှသည့် ဆွဲငင်အားအောက်၌ ဖိချေခြင်း... ထိုသို့တိုင် မည်မျှပင် ကြိုးစားစေကာမူ တုပိုင်နှင့် မိုဟန်တို့မှာ သေမသွားချေ။ သူတို့က အမြဲတမ်း ပြန်လည် အသက်ရှင်လာကြသည်။

ထို့နောက် တုပိုင်ကို အပိုင်းပိုင်းဖြတ်ကာ လေ့လာကြ၏။ ဤအပိုင်းပိုင်းဖြတ်သည်ဆိုခြင်းမှာ ခန္ဓာကိုယ်ကို တစ်ပိုင်းချင်းစီ လှီးဖြတ်ခြင်း မဟုတ်ဘဲ ရေတွက်၍မရနိုင်သည့် စွမ်းအင်အမှုန်အမွှားလေးများအဖြစ်သို့ တိုက်ရိုက် ပေါက်ကွဲစေခြင်း ဖြစ်သည်။ ထို့နောက် ထိုအမှုန်အမွှားလေးများကို အသေးစိတ် လေ့လာကြ၏။

ထောင်နှင့်ချီသည့် နတ်ဘုရားမျိုးနွယ်ဝင်များက တုပိုင်၏ အတိတ်အချက်အလက်များအားလုံးကို အပိုင်းလိုက် ခွဲခြမ်းစိတ်ဖြာကြသည်။ ဤသည်မှာ မှတ်တမ်းတင်ထားသည့် အချက်အလက်များပင်။ နှစ်ပေါင်းများစွာ ကြာမြင့်သွားလေပြီ။ သို့သော်လည်း တုပိုင်၏ မသေဆုံးနိုင်ခြင်း နောက်ကွယ်ရှိ အကြောင်းရင်းကို သူတို့ ရှာမတွေ့နိုင်ကြသေးချေ။

အရေးကြီးဆုံး ပြဿနာမှာ တုပိုင်က အမှန်တကယ်ပင် မသေဆုံးနိုင်ဘဲ ဖျက်ဆီး၍မရနိုင်ခြင်း ဖြစ်နေ၏။ ဤသည်က နတ်ဘုရားမျိုးနွယ်ဝင်များကို ဖြတ်ကျော်သွားပြီဟု ဆိုလိုနေခြင်း မဟုတ်ပါလော။ ဤအရာက မျိုးနွယ်စုကြီး တစ်ခုလုံး၏ အဆုံးစွန်ဆုံးနှင့် အတောင့်တဆုံးသည့် ပန်းတိုင် ဖြစ်နေသည် မဟုတ်ပါလော။

**--**--**--**--**--**--**--**

နောက်ဆုံး၌ နတ်ဘုရားမျိုးနွယ်ဝင်များက အတိုက်ရိုက်ဆုံး နည်းလမ်းကို အသုံးပြုလာကြသည်။ တုပိုင်ကို အတင်းအကျပ် စကားပြောစေပြီး ထိုလျှို့ဝှက်ချက်ကို ကိုယ်တိုင် ဖွင့်ဟခိုင်းမည် ဖြစ်၏။ အဘယ်ကြောင့် မသေနိုင်ရသည်နည်း။

မိုဟန်မှာ ကုတင်တစ်ခုပေါ်၌ ချည်နှောင်ခံထားရသည်။

ဆိုဖီယာက အေးစက်စွာ ​ပြောလိုက်သည်။ "လူသားတွေရဲ့ အလှအပ ရှုထောင့်ကနေ ကြည့်ရင် နင့်ရဲ့ လက်တွဲဖော် မိုဟန်က ပြိုင်ဘက်ကင်း အလှလေးပဲ။ နင်တို့ နှစ်ယောက်က အိပ်စက်ဖော်တွေ သက်သက်ပဲလား။"

မိုဟန်က ဒေါသတကြီး ပြင်ပြောလိုက်၏။ "ငါတို့က လင်မယားတွေဟဲ့။"

ဆိုဖီယာက မထီမဲ့မြင် ပြောလိုက်သည်။ "တုပိုင်... နင့်ဆီမှာ ပိုင်ဆိုင်လိုစိတ်နဲ့ အိမ်ထောင်ရေး သစ္စာရှိမှုဆိုတဲ့ အယူအဆလိုမျိုး အဆင့်နိမ့် လူသားတွေရဲ့ ခံစားချက်တွေအားလုံး ရှိနေဆဲပဲ။ ဒါကြောင့် နင့်စိတ်ထဲမှာ ဦးထုပ်စိမ်း ဆောင်းပေးခံရတာက လုံးဝ သည်းခံနိုင်စရာ မရှိဘူး မဟုတ်လား။"

တုပိုင်၏ မျက်နှာအမူအရာက ကင်းမဲ့နေဆဲပင်။

ဆိုဖီယာက လှောင်ပြောင်လိုက်၏။ "နင်က ဒီအရာတွေကို ဂရုစိုက်နေလို့ပဲ ဒီလောက် အားနည်းနေရတာ။ နားလည်လား။ ဒါပေမဲ့ ငါတို့က နင့်ရဲ့ ဒီအားနည်းချက်ကို အသုံးချနိုင်တယ်။ နင့်ရဲ့ မသေဆုံးနိုင်တဲ့ လျှို့ဝှက်ချက်ကို ငါတို့ကို ပြောပြစမ်း တုပိုင်။ အဲဒီလိုမှ မဟုတ်ရင်တော့ နင် ဦးထုပ်စိမ်း ဆောင်းပေးခံရလိမ့်မယ်။ အတင်းအကျပ် ဆောင်းခိုင်းခံရမှာ။ ပြီးတော့ တစ်လုံးတည်း မကဘူးနော်။"

တုပိုင်က သရော်လိုက်သည်။ "ငါ့ဦးနှောက်က မင်းတို့အတွက် ဘာလျှို့ဝှက်ချက်မှ ဖုံးကွယ်ထားလို့မရဘူး မဟုတ်လား။ ငါ့စိတ်ကို တိုက်ရိုက် ဖတ်လိုက်လို့ ရတာပဲ။"

ဆိုဖီယာက အေးစက်စက် ပြန်ဖြေလိုက်၏။ "နင်က မသေဆုံးနိုင်ဘူးဆိုတော့ ငါတို့ စူးစမ်းလေ့လာဖို့ မအောင်မြင်သေးတဲ့ နင့်ဦးနှောက်ရဲ့ အစိတ်အပိုင်းတွေ ရှိနေသေးတယ်ဆိုတာကို ဆိုလိုနေတာပဲ။ ဒါကြောင့် ရိုးရှင်းတဲ့ နည်းလမ်းတွေကို အသုံးပြုခြင်းအားဖြင့် ငါတို့က အံ့သြဖွယ် ရလဒ်တွေကို ရရှိသွားနိုင်တယ်။"

ထို့နောက် သူမက လက်ခုပ်တီးလိုက်သည်။

ဧရာမ အရွယ်အစားရှိပြီး ရုပ်ဆိုးအကျည်းတန်လှသည့် သတ္တဝါအထီးနှစ်ကောင် ဝင်ရောက်လာ၏။ လူသားများနှင့် အနည်းငယ် တူသော်လည်း သားရဲများ၏ ရက်စက်ကြမ်းကြုတ်သည့် လက္ခဏာများကို ပိုင်ဆိုင်ထားသည်။

သို့သော် အနည်းဆုံးတော့ လူသားအမျိုးသားများနှင့် ဆင်တူသည့် အင်္ဂါအစိတ်အပိုင်းများ ရှိနေ၏။ သူတို့က မီတာ နှစ်ခွဲခန့် မြင့်မားကြသည်။

ဆိုဖီယာက ခြိမ်းခြောက်လိုက်သည်။ "လူသားတွေအတွက်တော့ ဒီအထီးကောင် နှစ်ကောင်က ဂေါ်ရီလာတွေနဲ့ အခြေခံအားဖြင့် တူညီနေတယ်။ တုပိုင်... နင့်ရဲ့ မသေဆုံးနိုင်တဲ့ လျှို့ဝှက်ချက်ကို မဖော်ထုတ်ဘူးဆိုရင် နင့်ရဲ့ ဇနီး မိုဟန်က ဒီနှစ်ကောင်ရဲ့ ရက်ရက်စက်စက် အနိုင်ကျင့်စော်ကားတာကို ခံရလိမ့်မယ်။ နင်က ဦးထုပ်စိမ်း နှစ်ထပ် ဆောင်းပေးခံရတော့မှာပဲ။"

တုပိုင်က တည်ငြိမ်စွာ ပြန်ဖြေလိုက်၏။ "ငါ ပြောစရာ ဘာမှ မရှိဘူး။ ငါ့ကိုယ်ငါတောင် ဘာလို့ မသေနိုင်ရတာလဲဆိုတာ မသိဘူး။"

ဆိုဖီယာက ရက်စက်စွာ ခြိမ်းခြောက်လိုက်သည်။ "ငါ ရေတွက်တာကို စတင်တော့မယ်။ ရေတွက်တာ ပြီးဆုံးသွားတဲ့အချိန်မှာ ဒီသားရဲလို လူနှစ်ကောင်က နင့်ဇနီးကို ရက်ရက်စက်စက် အနိုင်ကျင့်လိမ့်မယ်။ ဒီမြင်ကွင်းကို ကြည့်နေရတာက နင့်အတွက် အရင်က တစ်ခါမှ မကြုံဖူးတဲ့ နာကျင်မှုတွေကို သေချာပေါက် ယူဆောင်လာပေးလိမ့်မယ်။"

"ငါး...။"

"လေး...။"

"သုံး...။"

"နှစ်...။"

"တစ်...။"

ရေတွက်ခြင်း ပြီးဆုံးသွား၏။

ဆိုဖီယာက အမိန့်ပေးလိုက်သည်။ "လုပ်ကြတော့။ ဒီအားနည်းပြီး လှပတဲ့ အမျိုးသမီးကို ဖျက်ဆီးပစ်ကြစမ်း။"

သို့သော်... ထိုရက်စက်ကြမ်းကြုတ်လှသည့် အထီးကောင်နှစ်ကောင်က အချင်းချင်း တစ်ချက်ကြည့်လိုက်ကြပြီး တုပိုင်ကို လေးစားစွာ ​ပြောလိုက်သည်။ "မသေနိုင်တဲ့သူကြီး... ငါတို့ နတ်ဘုရားတစ်ပိုင်းတွေအတွက် ၊ ပြီးတော့ ငါတို့ စမ်းသပ်ခံ တိရစ္ဆာန်တွေအားလုံးရဲ့ လွတ်လပ်ခွင့်နဲ့ ဂုဏ်သိက္ခာအတွက်... ငါတို့ ထာဝရ တိုက်ပွဲဝင်သွားမယ်။"

ထို့နောက်...

"ဘုန်းးး။"

သတ္တဝါအထီး နှစ်ကောင်က ပျက်သုဉ်းခြင်းကို ရွေးချယ်ကာ ချက်ချင်းပင် ကိုယ့်ကိုယ်ကိုယ် ဖောက်ခွဲပစ်လိုက်ကြ၏။ မိုဟန်ကို ညစ်ညမ်းစေရန် သို့မဟုတ် နတ်ဘုရားမျိုးနွယ်ဝင်များ၏ ရုပ်သေးရုပ်များအဖြစ် ဆက်လက် နေထိုင်ရမည့်အစား သေခြင်းတရားကိုသာ ရွေးချယ်သွားကြသည်။

စမ်းသပ်ခံများအားလုံး၏ နှလုံးသားထဲ၌ တုပိုင်က သူတို့၏ မဟာမိတ်ဖြစ်ရုံသာမက မျှော်လင့်ချက် မီးရှူးတိုင်တစ်ခုလည်း ဖြစ်နေ၏။ သူတို့၏ ကံကြမ္မာများမှာ ယှက်နွယ်နေသည်။ သူတို့အားလုံးမှာ နတ်ဘုရားမျိုးနွယ်ဝင်များ၏ ခြယ်လှယ်ခြင်းကို ခံရသည့် စမ်းသပ်ခံများ ဖြစ်ကြပြီး ရေတွက်၍မရနိုင်သည့် အခြားသူများ၏ စတေးမှုများမှတစ်ဆင့်သာ အသက်ရှင်ကျန်ရစ်ခဲ့ကြသည့် သက်ရှိများ ဖြစ်ကြသည်။

သူတို့သည် တစ်ချိန်က ဘုရင်တကာ့ဘုရင်များ ဖြစ်ခဲ့ကြပြီး လွတ်လပ်ခွင့် ၊ ဂုဏ်သိက္ခာနှင့် ရှင်သန်ရပ်တည်ရေးတို့အတွက် တိုက်ပွဲဝင်ခဲ့ကြသူများ ဖြစ်ကြ၏။ ထို့အပြင် တုပိုင်၏ အကြွင်းမဲ့ မသေဆုံးနိုင်ခြင်း သတင်းက အကျဉ်းချခံထားရသည့် စမ်းသပ်ခံတိုင်း၏ နားထဲသို့ ရောက်ရှိလာပြီး တုပိုင်ကို အဆုံးစွန်ဆုံးသော သူရဲကောင်းနှင့် မျှော်လင့်ချက်တစ်ခုအဖြစ် ပြောင်းလဲလာစေသည်။

ဆိုဖီယာက အကြွင်းမဲ့ အထင်အမြင်သေးမှုများဖြင့် လှောင်ပြောင်လိုက်သည်။ "စိတ်ဝင်စားစရာပဲ။ ဘယ်လောက်တောင် စိတ်ဝင်စားစရာကောင်းလိုက်လဲ...။ ဒါက မျောက်တွေကြားက သစ္စာစောင့်သိမှုဆိုတာလား။"

ထို့နောက် သူမက လက်ခုပ်တစ်ချက် ထပ်တီးလိုက်ပြန်၏။

ဤတစ်ကြိမ်၌ တောရိုင်းဆန်သည့် သားရဲပုံစံ အထီးကောင် လေးကောင် ဝင်ရောက်လာသည်။ ယခင်နှစ်ကောင်ထက်ပင် ပိုမို ရုပ်ဆိုးအကျည်းတန်ကာ ကြောက်မက်ဖွယ် ကောင်းနေ၏။

ဆိုဖီယာက လက်ချောင်းလေးဖြင့် ညင်သာစွာ ခေါက်လိုက်သည်။ ချက်ချင်းဆိုသလိုပင် ထိုအထီးကောင် လေးကောင်၏ စိတ်ဝိညာဉ်များနှင့် စိတ်ဆန္ဒများမှာ ဖယ်ရှားခံလိုက်ရပြီး လမ်းလျှောက်နေသည့် ဖုတ်ကောင်များအဖြစ်သို့ ပြောင်းလဲသွားကြ၏။

ဆိုဖီယာက အမိန့်ပေး တောင်းဆိုလိုက်သည်။ "တုပိုင်... နင့်ရဲ့ မသေဆုံးနိုင်တဲ့ လျှို့ဝှက်ချက်ကို ငါ့ကို ပြောပြစမ်း။ အဲဒီလိုမှ မဟုတ်ရင်တော့ နင့်ဇနီး ဖျက်ဆီးခံရလိမ့်မယ်။ ပြီးတော့ နင်က အတင်းအကျပ် ထိုင်ကြည့်နေရလိမ့်မယ်။"

"သုံး...။"

"နှစ်...။"

"တစ်...။"

ထိုရက်စက်ကြမ်းကြုတ်လှသည့် အထီးကောင် လေးကောင်က မိုဟန်ဆီသို့ ခုန်အုပ်သွားကြသည်။

ထိုအခိုက်၌ပင် တုပိုင်က ကျယ်လောင်စွာ အော်ဟစ်လိုက်၏။ "ရပ်စမ်း။ မင်းတို့ နတ်ဘုရားမျိုးနွယ်က ထာဝရအသက် ၊ ဖျက်ဆီးမရနိုင်မှုနဲ့ အစစ်အမှန် မသေဆုံးနိုင်ခြင်းကို ရှာဖွေနေကြတာပဲ။ ဒီလျှို့ဝှက်ချက်ကို ငါ ပြောပြနိုင်တယ်။ ဒါပေမဲ့ ငါ့မှာ စည်းကမ်းချက်တစ်ခု ရှိတယ်။ ကမ္ဘာမြေပေါ်က လူသားတွေ အားလုံးကို မင်းတို့ ပြန်လည် အသက်သွင်းပေးရမယ်။ တာ့နင်အင်ပါယာက လူအားလုံးကို ပြန်လည် အသက်သွင်းပေးရမယ်။ ပြီးတော့ ငါ့ရဲ့ ဇနီးတွေနဲ့ ကလေးတွေအားလုံးကို ပြန်ခေါ်လာပေးရမယ်။"

နတ်ဘုရားမျိုးနွယ်ကို ဖျက်ဆီးပစ်မည့် တုပိုင်၏ အဆုံးစွန်သော အစီအစဉ်ကြီးက နောက်ဆုံး၌ စတင်လာလေပြီ။

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၀၄ ပြီး။

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။