အခန်း ၁၁၁၇

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၁၇

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။

တုပိုင် သူ၏ တွင်းနက်ကို ထိန်းချုပ်ကာ ပတ်ဝန်းကျင်ရှိ အရာအားလုံးကို အဆက်မပြတ် ဝါးမျိုပစ်နေ၏။

မျှော်လင့်ထားသည့်အတိုင်းပင် သူ၏ တွင်းနက်ပတ်လည်၌ ဆန့်ကျင်ဘက် အမှုန်များစွာ ဖြစ်ပေါ်လာပြီး အနုတ်လက္ခဏာ စွမ်းအင် အမြောက်အများကို ဖန်တီးပေးနေသည်။ ထိုအရာကို တုပိုင် ရှင်းလင်းစွာ ခံစားသိရှိနိုင်သော်လည်း... လုံးဝ ထိန်းချုပ်၍ မရဖြစ်နေသည်။

အဘယ်ကြောင့်ဆိုသော် သူ၏ တွင်းနက်က ယုံကြည်သူများ၏ စိတ်ဝိညာဉ်များကို မဟုတ်ဘဲ သူစိမ်းများ၏ စိတ်ဝိညာဉ်များကို ဝါးမျိုနေသောကြောင့်ပင်။ ဤသူစိမ်း စိတ်ဝိညာဉ်များမှ ဖြစ်တည်လာသည့် အနုတ်လက္ခဏာ စွမ်းအင်များက တုပိုင်၏ အမိန့်များကို နာခံခြင်း မရှိချေ။

တစ်နည်းအားဖြင့် တုပိုင်၏ တွင်းနက်သည် သူ့ကို တိုက်ရိုက်ဖြစ်စေ ၊ သွယ်ဝိုက်၍ဖြစ်စေ ယုံကြည်ကိုးကွယ်သူများ၏ စိတ်ဝိညာဉ်များကိုသာ ဝါးမျိုရမည် ဖြစ်၏။

ဤသည်မှာ အလွန် ရက်စက်လှသည့် အမှန်တရားပင်။

နတ်ဘုရားတို့၏ဘုရင် တစ်ကြိမ်က ပြောခဲ့ဖူး၏။ နတ်ဘုရားဆိုသည်မှာ မည်သည့်အရာနည်း။ အဆုံးအစမဲ့ သေဆုံးခြင်းများကသာ နတ်ဘုရားတစ်ပါးကို ဖန်တီးပေးသည်။

ဤစကားမှာ နေရာတိုင်း၌ မှန်ကန်နေ၏။ ရှေးဟောင်း တရုတ်ဆိုရိုးစကား တစ်ခု၌ စစ်သူကြီးတစ်ဦး၏ အောင်မြင်မှုသည် သေလွန်သွားသော စစ်သည်သောင်းချီ၏ အရိုးစုများအပေါ်၌ တည်ဆောက်ထားသည်ဟု ဆိုထားသကဲ့သို့ပင်။

စစ်သူကြီးတစ်ဦး စစ်ပွဲဆင်နွှဲသည့်အခါ သူသည် သူ၏ ကိုယ်ပိုင် စစ်သားများကိုသာ အမိန့်ပေးနိုင်သောကြောင့် သူ၏ ကိုယ်ပိုင် စစ်တပ်ကိုသာ သေရာဆီသို့ စေလွှတ်ရမည် ဖြစ်၏။ နတ်ဘုရားတစ်ပါး တိုက်ခိုက်သည့်အခါ၌လည်း သူ၏ ယုံကြည်သူများကသာ ရှေ့သို့ ပြေးထွက်ကာ သူတို့ကိုယ်သူတို့ စတေးကြရမည်သာ။

ရလဒ်အနေဖြင့် တုပိုင်၏ တွင်းနက်က သူ၏ ကိုယ်ပိုင် ယုံကြည်သူများကို ရူးသွပ်စွာ ဝါးမျိုလာတော့၏။

သူစိမ်းများ အသက်ရှင်ကျန်ရစ်ခဲ့သော်လည်း သူ၏ ယုံကြည်သူများမှာ သေဆုံးသွားကြရလေပြီ။ ဤသည်မှာ သစ္စာအရှိဆုံးသော နောက်လိုက်များ၏ စတေးမှုများမှတဆင့် နိုင်ငံသစ်တစ်ခု မွေးဖွားလာပုံနှင့် အတိအကျ တူညီနေသည်။

မည်မျှ ဝမ်းနည်းဖွယ် ကောင်းလှသည်နည်း။

တုပိုင်သည် သေးငယ်လှသည့် တွင်းနက်တစ်ခု ဖြစ်လာကာ စိတ်ဝိညာဉ်များကို အဆက်မပြတ် ဝါးမျိုနေပြီး ထိုအရာအားလုံးမှာ သူ၏ ယုံကြည်သူများ၏ စိတ်ဝိညာဉ်များသာ ဖြစ်ကြ၏။

သောင်းနှင့်ချီသည့် နတ်ဘုရားတစ်ပိုင်းများက တုပိုင်ကို ကိုးကွယ်ယုံကြည်ကြ၏။ ဆိုလိုသည်မှာ သောင်းနှင့်ချီသည့် ကမ္ဘာလောကများရှိ စိတ်ဝိညာဉ်များသည် သူ့ကို သွယ်ဝိုက်သော နည်းလမ်းဖြင့် ယုံကြည်နေကြခြင်းပင်။

ပေါင်းစပ်လိုက်ပါက ဤသည်မှာ နက္ခတ္တဗေဒဆိုင်ရာ ကိန်းဂဏန်းတစ်ခုအထိ များပြားလှသော စိတ်ဝိညာဉ် အရေအတွက်ပင် ဖြစ်နေ၏။

တုပိုင်၏ တွင်းနက်က ပို၍ပို၍ ကြီးမားလာ၏။ ဆန့်ကျင်ဘက် အမှုန်များနှင့် အနုတ်လက္ခဏာ စွမ်းအင်များကို ပို၍ပို၍ ထုတ်လုပ်လာသည်။

ထိုအရာများမှာ သူ၏ ယုံကြည်သူများထံမှ လာခြင်းဖြစ်သောကြောင့် တုပိုင်က ဤအနုတ်လက္ခဏာ စွမ်းအင်များကို အပြည့်အဝ ထိန်းချုပ်ထားနိုင်နေ၏။

ဘီလီယံ ရာနှင့်ချီ ၊ ထရီလီယံနှင့်ချီ... အဆုံးအစမဲ့သည့် အနုတ်လက္ခဏာ စွမ်းအင်များပင်။

ထိုဧရာမ အနုတ်လက္ခဏာ စွမ်းအင်များကို ထိန်းချုပ်လိုက်ပြီး နတ်ဘုရားတို့၏ဘုရင်၏ ဦးနှောက်ထဲရှိ ဗဟိုချက် တွင်းနက်ကြီးထဲသို့ ရူးသွပ်စွာ ပြေးဝင်သွားလိုက်၏။

"ဝှစ်... ဝှစ်... ဝှစ်..."

အဆုံးအစမဲ့သည့် အနုတ်လက္ခဏာ စွမ်းအင်များ အလုံးအရင်းဖြင့် ဝင်ရောက်လာ၏။ ချက်ချင်းပင် နတ်ဘုရားတို့၏ဘုရင်၏ ဦးနှောက်ဗဟိုချက်ရှိ တွင်းနက်ကြီး၏ စွမ်းအင်များ စတင် ကျဆင်းလာပြီး ဆက်တိုက်ဆိုသလို ကျဆင်းလာတော့သည်။

နတ်ဘုရားတို့၏ဘုရင်၏ တွင်းနက်ကြီးက ပို၍ပို၍ သေးငယ်လာကာ အပူချိန်မှာလည်း မြင့်တက်လာပြီး ရေဒီယိုသတ္တိကြွမှုများတို့သည်လည်း ပိုမို အားကောင်းလာ၏။

ဤသည်မှာ အလွန်တရာ အန္တရာယ်များလွန်းလှ၏။ နတ်ဘုရားတို့၏ဘုရင်၏ ဗဟိုချက် တွင်းနက်ကြီး၏ စွမ်းအင်များ သတ်မှတ်ထားသည့် ကန့်သတ်ချက် တစ်ခုအောက်သို့ ကျဆင်းသွားသည်နှင့် တစ်ပြိုင်နက် တွင်းနက်ကြီး တစ်ခုလုံး ပေါက်ကွဲသွားပေလိမ့်မည်။

**--**--**--**--**--**--**--**

နတ်ဘုရားတို့၏ဘုရင်မှာ ထိတ်လန့်တုန်လှုပ်သွားရသည်။

တုပိုင် သေဆုံးသွားပြီးနောက် သူ၏ ဦးနှောက်ကမ္ဘာထဲသို့ ဝင်ရောက်လာကာ သူ့ကို အနိုင်ယူရန် နည်းလမ်း ရှာတွေ့သွားမည်ဟု သူ ဘယ်သောအခါကမျှ မမျှော်လင့်ထားခဲ့ချေ။ ပို၍ ရူးသွပ်ဖွယ် ကောင်းသည်မှာ တုပိုင်က မသေနိုင်သောကြောင့်ပင်။ တုပိုင်အနေဖြင့် သူ့ကို ခြိမ်းခြောက်နိုင်သည့် တစ်ခုတည်းသော နည်းလမ်းမှာ ဦးနှောက်ကမ္ဘာထဲသို့ ဝင်ရောက်လာခြင်း ဖြစ်၏။

ဤသည်မှာ စစ်တပ်တစ်ခုကဲ့သို့ပင်။ အားအနည်းဆုံး အချက်မှာ သူတို့၏ ကိုယ်ပိုင် ဌာနချုပ် အမြဲတမ်း ဖြစ်နေတတ်သည်။

နတ်ဘုရားတို့၏ဘုရင်အတွက် သူ့ကိုယ်သူ ကယ်တင်ရန် နည်းလမ်း ရှိနေသေးသည်လော။

ရှိနေသည်။ အကယ်၍ သူ၏ ဗဟိုချက် တွင်းနက်ကြီး၏ စွမ်းအင်များ ကျဆင်းနေမည်ဆိုပါက ပြန်လည် မြင့်တက်လာစေရန် အရာအားလုံးကို ဆက်လက် ဝါးမျိုနေရန်သာ လိုအပ်၏။

ဤသည်မှာ ကြားရသည်မှာ အလွန် ရိုးရှင်းသော်လည်း တကယ်တမ်း၌မူ... သူ မလုပ်ဆောင်နိုင်ချေ။

သူ၏ ဦးနှောက်စကြဝဠာ၏ နိယာမများသည် ရေတွက်၍မရနိုင်သည့် နှစ်ပေါင်းများစွာကတည်းက ဖြစ်တည်နေခဲ့ခြင်း ဖြစ်သောကြောင့် ရုတ်တရက် အပြောင်းအလဲ တစ်ခုခုသာ ဖြစ်ပေါ်လာပါက အသက်အန္တရာယ် ရှိနိုင်၏။ အရေးအကြီးဆုံးမှာ တွင်းနက်တစ်ခုသည် အရာဝတ္ထုများကို ဝါးမျိုရန် သူ၏ ဧရာမ ဆွဲငင်အားအပေါ် မှီခိုနေရခြင်းပင်။

သို့သော် စွမ်းအင်များ ကျဆင်းသွားသည်နှင့်အမျှ ဆွဲငင်အားမှာလည်း ကျဆင်းသွား၏။ ဝါးမျိုနိုင်စွမ်းက မြင့်တက်မလာဘဲ ထိုအစား ပိုမို နှေးကွေးသွားသည်။

နတ်ဘုရားတို့၏ဘုရင် လုပ်ဆောင်နိုင်သည့် တစ်ခုတည်းသော အရာမှာ သက်ရှိအသစ်များ ဖန်တီးခြင်းကို ရပ်တန့်လိုက်ရန်နှင့် စွမ်းအင်နှင့် ဒြပ်ဝတ္ထုများကို အသုံးပြုနေခြင်းကို ရပ်တန့်ပစ်ရန်ပင်။ ယခင်က နတ်ဘုရားတို့၏ဘုရင်သည် သူ၏ အားကောင်းလှသည့် ဟန်ချက်ညီမှုကို ထိန်းသိမ်းထားရန် အဆက်မပြတ် ဝါးမျိုကာ အရာအားလုံးကို အဆက်မပြတ် ဖန်တီးခဲ့၏။ လက်ရှိအချိန်၌မူ သူသည် ဖန်တီးခြင်းကို ရပ်တန့်ကာ စွမ်းအင် အသုံးပြုမှုကိုလည်း ရပ်တန့်ပစ်လိုက်ရလေပြီ။

အလုပ်ဖြစ်သွား၏။ နတ်ဘုရားတို့၏ဘုရင်၏ ဗဟိုချက် တွင်းနက်ကြီးမှ စွမ်းအင် ဆုံးရှုံးမှု နှေးကွေးသွားသည်။ သူသည် သူ၏ ကိုယ်ပိုင် ပျက်စီးခြင်းကို အချိန်ဆွဲနိုင်လိုက်လေပြီ။

ဆက်လက်၍ နတ်ဘုရားတို့၏ဘုရင်သည် တုပိုင် ထိန်းချုပ်ထားသည့် တွင်းနက်ကို ဝါးမျိုပစ်ရမည်ဖြစ်ပြီး တုပိုင်၏ ယုံကြည်သူ အားလုံးကိုပါ ဝါးမျိုပစ်ရမည် ဖြစ်၏။ တုပိုင်သည် ယုံကြည်မှုအပေါ်၌ တည်ဆောက်ထားသည့် နတ်ဘုရားတစ်ပါးပင်။ အကယ်၍ သူ၏ ယုံကြည်သူအားလုံးသာ ဝါးမျိုခံလိုက်ရပါက နတ်ဘုရားဖြစ်သည့် တုပိုင်သည်လည်း သေဆုံးသွားမည်သာ။

သူသည် အသုံးမဝင်သည့် စိတ်ဝိညာဉ်တစ်ခုအဖြစ်သို့ ပြောင်းသွားမည်ဖြစ်ပြီး နတ်ဘုရားတို့၏ဘုရင်၏ ဦးနှောက်ထဲရှိ သာမန် အမှုန်လေးတစ်ခုသာ ဖြစ်သွားမည် ဖြစ်၏။

**--**--**--**--**--**--**--**

ထိုအချိန်၌ တုပိုင်၏ တွင်းနက်က သူ၏ ယုံကြည်သူများ၏ စိတ်ဝိညာဉ်များကို ဆက်လက် ဝါးမျိုနေဆဲပင်။

သူ၏ အနက်ရောင်တွင်းနက်လေးသည်လည်း ဆန့်ကျင်ဘက် အမှုန်များနှင့် အနုတ်လက္ခဏာ စွမ်းအင်များကို ကြမ်းတမ်းစွာ ဖန်တီးနေ၏။ ထို့နောက် ထိုအနုတ်လက္ခဏာ စွမ်းအင်များ အားလုံးကို နတ်ဘုရားတို့၏ဘုရင်၏ ဦးနှောက်ဗဟိုချက်ရှိ တွင်းနက်ကြီးထဲသို့ အလုံးအရင်းဖြင့် ဝင်ရောက်သွားစေရန် အမိန့်ပေးလိုက်သည်။

နတ်ဘုရားတို့၏ဘုရင်က သက်ရှိများ ဖန်တီးခြင်းကို ရပ်တန့်ကာ စွမ်းအင် အသုံးပြုမှုကို ရပ်တန့်ထားသော်ငြား တုပိုင်၏ တိုက်ခိုက်မှုက အလွန်တရာ ပြင်းထန်ပြီး ရူးသွပ်လွန်းနေ၏။

နတ်ဘုရားတို့၏ဘုရင်၏ ဦးနှောက်စကြဝဠာထဲရှိ ဗဟိုချက် တွင်းနက်ကြီး၏ စွမ်းအင်များမှာ ကျဆင်းနေဆဲဖြစ်ပြီး ပို၍ပို၍ သေးငယ်လာတော့သည်။

မကြာမီ၌ ပြင်းထန်သည့် ပြိုကွဲမှုအမှတ်ဆီသို့ ရောက်ရှိသွားတော့မည် ဖြစ်လေ၏။

ဤသည်မှာ ဘီလီယံ ဆယ်ဂဏန်းချီရှိသည့် ပိုင်ဆိုင်မှုများရှိသည့် ဧရာမ ကုမ္ပဏီကြီး တစ်ခုကဲ့သို့ပင်။ ငွေသား ပြတ်တောက်သွားသည့် အခိုက်အတန့်၌ ချက်ချင်းပင် ဒေဝါလီ ခံသွားရတော့သည်။

ကမ္ဘာပျက်ကြီး၏နဂါးဧကရာဇ်။ အပိုင်း ၁၁၁၇ ပြီး။

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ကုန်းကုန်းဧကရာဇ်၏ ဒုတိယအတွဲ။

ပြီးဖို့ ၃ ပိုင်းပဲ လိုတော့တယ်။ တစ်ညလုံး မအိပ်ရသေးဘူး။ အိပ်ငိုက်ပြေအောင် ၂ နာရီ​လောက်​ မှေးလိုက်ဦးမယ်။ နိုးလာမှ ဆက်ရေးတော့မယ် 😭