အခန်း ၁၂၃

အခန်း ၁၂၃။ သတို့သားကို ကြိုဆိုခြင်း……. ခြေလေးဖက်ဖြူသည့် မီးတောက်မြင်း

အချိန်များ လျင်မြန်စွာ ကုန်ဆုံးသွား၏။

လျိုနှင့် ကျောက် မျိုးနွယ်စုများ အမြစ်ပြတ်ချေမှုန်းခံရပြီး သမိုင်းစင်မြင့်ထက်မှ လုံးဝ ပျောက်ကွယ်သွားခဲ့သည်မှာ ဆယ်လကြာမြင့်ခဲ့ပြီ ဖြစ်ပေသည်။ ဤဆယ်လတာကာလအတွင်း ဝမ်မျိုးနွယ်စု၌ မင်္ဂလာသတင်းများ ဆက်တိုက်ဆိုသလို ပေါ်ပေါက်ခဲ့သည်။ ဘိုးဘိုးခြောက် ဝမ်ရှောင်ဟန်၏ ဝိညာဉ်ပလ္လင်အဆင့် တက်လှမ်းခြင်း အခမ်းအနားကို အလွန် စည်ကားသိုက်မြိုက်စွာ ကျင်းပနိုင်ခဲ့ပြီးနောက်၊ အစ်မဖြစ်သူ ဝမ်လော်ရီနှင့် ချန်ဖန်ကျယ်တို့၏ မင်္ဂလာပွဲကိုလည်း ကျင်းပနိုင်ခဲ့သည်။

ယခု ရက်အနည်းငယ်အတွင်း သူ၊ ဝမ်ရှိုကျဲ့၏ မင်္ဂလာပွဲကြီး ကျင်းပတော့မည် ဖြစ်ပေသည်။

ဝမ်မျိုးနွယ်စုမှာ သတင်းကောင်းများ ဆက်တိုက်ထွက်ပေါ်လျက် အလွန် တိုးတက်ကြီးပွားနေပေသည်။ ယခုအချိန်သည် ဆောင်းဦးရာသီ ကောက်ရိတ်သိမ်းချိန်လည်း ဖြစ်၏။

ဖုန်းကု လယ်ယာမြေ အတွင်း၌…..

ထောင်နှင့်ချီသော ဧကများရှိ မြေဩဇာကောင်းမွန်သော လယ်ကွင်းပြင်များတွင် အသီးအနှံများ ရင့်မှည့်နေသော စပါးခင်းများသည် ပင်လယ်လှိုင်းတံပိုးများအလား လေတိုက်ရာသို့ ယိမ်းနွဲ့နေကြရာ မြင်ကွင်းမှာ အလွန်ပင် ခမ်းနားလှပေသည်။ လယ်သမားများသည် လယ်ကွင်းများထဲတွင် အလုပ်ရှုပ်နေကြပြီး စပါးပင်များကို ဂရုတစိုက် ပြုစုခြင်း၊ လိုအပ်သည့်နေရာများတွင် မြေဩဇာကျွေးခြင်းနှင့် ပိုက်ကွန်မှ လွတ်ထွက်သွားသော ငါးများကဲ့သို့ စပါးပင်များကြားတွင် ရောနှောနေသော ပေါင်းပင်များကို ရှာဖွေဖယ်ရှားခြင်းများကို လုပ်ဆောင်နေကြသည်။

ပေါင်းပင်နှင့် စပါးပင်တို့မှာ အလွန် ဆင်တူကြပြီး စပါးပင်များ၏ ဘိုးဘေးများဟုပင် ဆိုနိုင်ပေသည်။ ဘိုးဘေးများသည် ပေါင်းပင်များကို မျိုးဆက်တစ်ခုပြီးတစ်ခု ရွေးချယ်စိုက်ပျိုးခဲ့ရာမှ ယနေ့ခေတ် စပါးပင်များ ဖြစ်လာခဲ့ခြင်း ဖြစ်သည်။ ၎င်းတို့သည် အရိုင်းသဘာဝအတိုင်း ကြီးထွားကြပြီး အမြစ်ပြတ်ရန် ခက်ခဲကာ စပါးပင်များ၏ အဖိုးတန် အာဟာရများကို လုယူစားသုံးတတ်ကြ၏။

သေချာစွာ မရှင်းလင်းပါက စပါးအထွက်နှုန်းကို သေချာပေါက် ထိခိုက်စေမည် ဖြစ်ပေသည်။

လယ်သမားများသည် ကြိုးစားပမ်းစား အလုပ်လုပ်နေကြသော်လည်း ယခုနှစ်တွင် သူတို့အားလုံး၏ မျက်နှာပေါ်၌ ပင်ပန်းနွမ်းနယ်မှုနှင့်အတူ ပျော်ရွှင်မှု အရိပ်အယောင်များလည်း ယှဉ်တွဲပေါ်လွင်နေပေသည်။ အကြောင်းမူကား ယခုနှစ်တွင် သခင်လေးက စပါးမျိုးသစ် တစ်မျိုး ယူဆောင်လာခဲ့သောကြောင့် ဖြစ်၏။ ဖုန်းကု လယ်ယာမြေ၏ ထက်ဝက်ကို ဤစပါးမျိုးသစ်ဖြင့် စိုက်ပျိုးထားသည်ဟု သိရသည်။

အစပိုင်းတွင် လယ်သမားများမှာ စပါးမျိုးသစ်က ဤမြေနှင့် ကိုက်ညီမှုမရှိဘဲ အထွက်နှုန်း ကျဆင်းသွားပါက ၎င်းတို့၏ ဝေစုကိုပါ ထိခိုက်မည်ကို စိုးရိမ်သဖြင့် တိတ်တဆိတ် ညည်းညူခဲ့ကြသေးသည်။ ကံကောင်းထောက်မစွာပင် သခင်လေးမှာ သဘောကောင်းလှပြီး စပါးမျိုးသစ် စိုက်ပျိုးသော လယ်သမားများကို ယခင်နှစ်များက ပျမ်းမျှဝင်ငွေအတိုင်း အနည်းဆုံး ခွဲဝေပေးမည်ဖြစ်ကြောင်း၊ အထွက်နှုန်း ကောင်းမွန်ပါက အပိုဆုကြေးများပါ ရရှိနိုင်ကြောင်း ကတိပေးခဲ့ပေသည်။

ဤစိုက်ပျိုးရာသီ ပြီးဆုံးပြီးနောက်…..

စပါးနှံများ ရင့်မှည့်လာလေလေ၊ လယ်သမားများသည် စပါးမျိုးသစ်၏ စွမ်းရည်ကို ပိုမို တွေ့ရှိလာရလေလေ ဖြစ်သည်။ စပါးပင်များမှာ အရပ်ရှည်ပြီး လဲကျရန် မလွယ်ကူရုံသာမက စပါးနှံများမှာလည်း ပိုမိုကြီးမားပြီး စပါးစေ့များမှာလည်း သာမန်မျိုးများထက် ပိုမိုများပြားလှပေသည်။

လယ်သမား အများစုမှာ ဝါရင့်လယ်သမားကြီးများ ဖြစ်ကြရာ ဤအတိုင်းသာ ဆက်သွားပါက ယခုနှစ်တွင် လယ်တစ်ဧကလျှင် စပါးတစ်တင်းခန့် ပိုမိုထွက်ရှိနိုင်ပြီး အရည်အသွေးမှာလည်း ပိုမိုကောင်းမွန်လာနိုင်ကြောင်း သိရှိထားကြ၏။ ယခုအခါ စပါးသစ် ဈေးနှုန်းမှာ အနည်းငယ် ပိုမိုမြင့်မားနေသော်လည်း မူလဈေးနှုန်းအတိုင်း တွက်ချက်မည်ဆိုပါကပင် ဧကနှစ်ဆယ်တိုင်းအတွက် ရွှေတာရာ တစ်ပြားခန့် အပိုဝင်ငွေ ရရှိမည် ဖြစ်ပေသည်။ ဤဝင်ငွေမှာ အခွန်၊ မြေဩဇာ၊ ကျွဲနွား၊ လုပ်အားခ အစရှိသည်တို့ကို နုတ်ပယ်ပြီးသား သီးသန့် အပိုဝင်ငွေများ ဖြစ်ပေသည်။

ပျမ်းမျှအားဖြင့် လယ်သမားတစ်ဦးလျှင် ကြေးပြားကြီး သုံးဆယ်ခန့် အပိုရရှိနိုင်မည် ဖြစ်သည်။ အကယ်၍ ဂျုံမျိုးကောင်းများပါ ရှိလာပါက တစ်နှစ်လျှင် ကြေးပြားကြီး ခြောက်ဆယ်ခန့် အပိုရရှိနိုင်မည် မဟုတ်ပါလော။

လယ်သမားများ မည်သို့လျှင် မပျော်ရွှင်ဘဲ နေနိုင်ပါမည်နည်း။

ဤအပိုဝင်ငွေများကို နောင်တွင် ၎င်းတို့၏ ကလေးများ မင်္ဂလာဆောင်သည့်အခါ တင်တောင်းရန်အတွက် အပြည့်အဝ စုဆောင်းထားနိုင်ပေသည်။ သို့မဟုတ် ကလေးများကို လက်မှုပညာ သင်ကြားပေးရန်အတွက်လည်း အသုံးပြုနိုင်ပေသည်။ လက်မှုပညာ တတ်မြောက်ထားပါက လယ်ယာလုပ်ငန်းကဲ့သို့ ပင်ပန်းစွာ လုပ်ကိုင်စရာ မလိုတော့ဘဲ ဝင်ငွေလည်း ပိုမိုကောင်းမွန်ကာ ဇနီးမယား ရရှိရန်လည်း များစွာ လွယ်ကူသွားမည် ဖြစ်ပေသည်။

လယ်သမား အများအပြားမှာ အနာဂတ်အတွက် တွေးတောစိတ်ကူးယဉ်နေကြပြီ ဖြစ်သည်။ ဤနည်းအားဖြင့် လယ်ယာမြေ လုံလောက်စွာ ဝယ်ယူနိုင်ရန် ရွှေတာရာများကို ပိုမို မြန်ဆန်စွာ စုဆောင်းနိုင်ပြီး ၎င်းတို့၏ သားသမီး မြေးမြစ်များမှာ ကိုယ်ပိုင်လယ်လုပ်သူများ ဖြစ်လာနိုင်မည် ဖြစ်ပေသည်။

ထိုအတွေးဖြင့် သူတို့သည် ပိုမို ကြိုးစားပမ်းစား အလုပ်လုပ်ကြတော့သည်။

......

တစ်ချိန်တည်းမှာပင်…..

လယ်ကွင်းထိပ်တွင် စိတ်အားထက်သန်နေသော ဘိုးဘိုးလေး ဝမ်ရှောင်ကျီက စိတ်လှုပ်ရှားစွာ ပြောလိုက်သည်။

"ရှိုကျဲ့.. မင်း သုတေသနပြုလုပ်ထားတဲ့ ဝမ်အမှတ်(၉) စပါးမျိုးက တကယ်ကို အရည်အသွေးမြင့် စပါးမျိုးပဲ.. ငါတို့ လယ်ယာမြေတွေ အားလုံးမှာသာ ဝမ်အမှတ်(၉) ကို စိုက်ပျိုးနိုင်မယ်ဆိုရင် ဒီနှစ်မှာ ငါတို့ ဝင်ငွေတွေ အများကြီး ပိုရလာတော့မှာပဲ"

ယခုအခါ ဝမ်မျိုးနွယ်စုတွင် အသားများ ပေါများလာပြီဖြစ်ရာ ယခင်က ချွေတာစွာ နေထိုင်ခဲ့ကြသော ဝမ်ရှောင်ကျီနှင့် အခြား မျိုးနွယ်စု အကြီးအကဲများကို ဝိညာဉ်အစားအစာများ စားသုံးရန်၊ အခြေခံတည်ဆောက်ခြင်း ဆေးလုံးငယ်များ အသုံးပြုရန်နှင့် ကြိုးစားပမ်းစား ကျင့်ကြံရန် ညွှန်ကြားထားခဲ့ပေသည်။

ထို့ကြောင့် ဝမ်ရှောင်ကျီမှာ ယခုနှစ်တွင် အလွန် ကျန်းမာပုံရပြီး ပိုမို နုပျိုလာသကဲ့သို့ ရှိနေပေသည်။ ဤတစ်သက်တွင် ဝိညာဉ်ပလ္လင်အဆင့်သို့ တက်လှမ်းရန် မျှော်လင့်ချက် မရှိတော့လျှင်တောင် အနည်းဆုံး ကျန်းမာစွာဖြင့် နောက်ထပ် နှစ်အနည်းငယ်မျှ ဆက်လက် နေထိုင်နိုင်မည် ဖြစ်ပေသည်။

မျိုးနွယ်စုအတွက် တစ်သက်လုံး ကြိုးစားပမ်းစား လုပ်ကိုင်ပေးခဲ့ပြီး မျိုးဆက်ပေါင်းများစွာကို ပြုစုပျိုးထောင်ပေးခဲ့သော ဤမျိုးနွယ်စု အကြီးအကဲများ အသက် ရှစ်ဆယ်အရွယ်တွင် လမ်းမလျှောက်နိုင်တော့ဘဲ အထီးကျန်ဆန်သော အိုမင်းခြင်းဘဝမျိုးနှင့် ကြုံတွေ့ရမည်ကို ဝမ်ရှိုကျဲ့ မမြင်လိုချေ။

"ဘိုးဘိုးလေး.. နောက်နှစ်ကျရင် တခြား မြေကွက်တစ်ကွက်မှာ စိုက်ကြည့်ရအောင်.. ဘာပြဿနာမှ မရှိဘူးဆိုရင် ဝမ်အမှတ်(၉) ကို အပြည့်အဝ ပြောင်းစိုက်ကြတာပေါ့"

သူ ခက်ခက်ခဲခဲ ဖော်ထုတ်ထားသော ဝမ်အမှတ်(၉) အပေါ် ဝမ်ရှိုကျဲ့ အတော်လေး ကျေနပ်အားရနေသည်။

သူ စပါးမျိုးသစ်ကို ဖော်ထုတ်နိုင်ခဲ့ခြင်းမှာ သူ၏ လျှို့ဝှက်ဆန်းကြယ်လှသော သွေးဆက် စွမ်းရည်ကြောင့်ပင် ဖြစ်ပေသည်။ သေဆုံးနေသော သစ်ပင်များကို ရှင်သန်လာစေနိုင်ပြီး ပန်းများကို ချက်ချင်း ပွင့်လာစေနိုင်ကြောင်း သူ တွေ့ရှိခဲ့ချိန်ကတည်းက ဝိညာဉ်ဆေးပင်များနှင့် ဝိညာဉ်ကောက်နှံများကို စိုက်ပျိုးရန် တွေးတောခဲ့ပြီး ဖြစ်သည်။

သို့သော် ဝမ်းနည်းစရာကောင်းသည်မှာ သုတေသနအချို့ ပြုလုပ်ပြီးနောက် သူ၏ အတွေးများမှာ ရိုးရှင်းလွန်းနေကြောင်း သူ တွေ့ရှိခဲ့ရ၏။

သေဆုံးနေသော သစ်ပင်များကို ရှင်သန်လာစေခြင်းနှင့် ပန်းများကို ချက်ချင်း ပွင့်လာစေခြင်းမှာ သာမန် အပင်များပေါ်တွင်သာ အသုံးပြု၍ ရနိုင်ပေသည်။ ထို့အပြင် ၎င်းတို့ကို အာဟာရဖြည့်တင်းမှု မရှိဘဲ အလွန်တိုတောင်းသော အချိန်အတွင်း ချက်ချင်း ကြီးထွားလာစေရန် ဖန်တီး၍မရနိုင်ချေ။ လျင်မြန်စွာ ဖန်တီးလိုက်ပါက ၎င်းတို့၏ အသက်စွမ်းအင်များကို ကုန်ဆုံးစေပြီး လျင်မြန်စွာ ညှိုးနွမ်းသွားမည် ဖြစ်ပေသည်။

ဝိညာဉ်ကောက်နှံများနှင့် ဝိညာဉ်အပင်များအတွက်မူ သေချာပေါက် ကြီးထွားမှုကို အရှိန်မြှင့်တင်ပေးနိုင်သည့် အာနိသင် ရှိပေသည်။

သို့သော် သာမန် ကျောက်စိမ်းဖြူ ဝိညာဉ်စပါး တစ်ပင်ကိုပင် အလွန်တိုတောင်းသော အချိန်အတွင်း ချက်ချင်း ကြီးထွားလာစေရန် ဖန်တီးလိုက်ပါက နောက်ဆုံးတွင် ရရှိလာမည့် စပါးခွံများမှာ အခွံလွတ်များသာ ဖြစ်နေမည် ဖြစ်ပေသည်။

ပုံမှန်အတိုင်း စိုက်ပျိုးပြီး အာဟာရကို တိုးမြှင့်ပေးမည်ဆိုပါက ကျောက်စိမ်းဖြူ ဝိညာဉ်စပါး တစ်ပင် ရင့်မှည့်လာစေရန် ဝမ်ရှိုကျဲ့အတွက် ဆယ်ရက်ကျော် အချိန်ယူရမည် ဖြစ်သည်။ ထို့အပြင် အပင်တစ်ပင်တည်းသာ ဖြစ်သဖြင့် ကုန်ကျစရိတ်နှင့် အကျိုးအမြတ် တွက်ခြေမကိုက်လှပေ။

ဂျင်ဆင်းနှင့် အခြား ဝိညာဉ်ဆေးပင်များကို စိုက်ပျိုးခြင်းနှင့် ပတ်သက်၍မူ ပြောစရာပင် မလိုတော့ချေ။ ဆယ်ရက်ကျော်ကြာ ပင်ပန်းခံ၍ ကြီးထွားစေသော်လည်း ထိုဂျင်ဆင်းကို သက်တမ်း တစ်နှစ်ခန့်သာ ပိုမိုရရှိစေနိုင်ပေသည်။ ကြီးထွားမှု အရှိန်မြှင့်တင်ခြင်း၏ အကျိုးသက်ရောက်မှုမှာ စားရမှာလည်း သဲတရှပ်ရှပ်၊ ပစ်ရမှာလည်း အဆီတဝင်းဝင်း ဆိုသကဲ့သို့ အသုံးမဝင်လှပေ။

သို့သော် သူ၏ လျှို့ဝှက်ဆန်းကြယ်သော သွေးဆက်အဆင့်မှာ နိမ့်ကျလွန်းပြီး အားနည်းလွန်းနေသောကြောင့် ဖြစ်မည်ဟု ဝမ်ရှိုကျဲ့ ခန့်မှန်းမိသည်။ တစ်နေ့နေ့ တစ်ချိန်ချိန်တွင် ထိုလျှို့ဝှက်ဆန်းကြယ်သော သွေးဆက်မှာ အထွတ်အထိပ်သို့ ရောက်ရှိနိုးထလာပါက နှစ်တစ်ရာ သက်တမ်းရှိ ဂျင်ဆင်းတစ်ပင်ကို ချက်ချင်း ကြီးထွားလာစေရန် အမှန်တကယ် ဖန်တီးနိုင်မည် ဖြစ်ပေလိမ့်မည်။

သို့သော် လက်ရှိ အခြေအနေအရ ဝိညာဉ်မျိုးစေ့များကို ကြီးထွားအောင် ပြုလုပ်ရသည်မှာ အလွန်ပင်ပန်းလွန်းပြီး အကျိုးအမြတ်လည်း မရှိလှပေ။

သေချာစွာ စဉ်းစားချင့်ချိန်ပြီးနောက် ဝိညာဉ်မျိုးစေ့များကို စိုက်ပျိုးရန် အလျင်စလို ပြုလုပ်မည့်အစား သာမန် စပါးနှင့် ဂျုံမျိုးစေ့များကို ဦးစွာ တိုးတက်အောင် ပြုလုပ်ခြင်းက ပိုကောင်းမည်ဟု ဝမ်ရှိုကျဲ့ ဆုံးဖြတ်လိုက်သည်။ ထို့ကြောင့် သူသည် ဓာတ်ခွဲခန်းတစ်ခု တည်ဆောက်ကာ စပါးမျိုးစေ့များကို အသေးစား စမ်းသပ်မှုများ စတင်ပြုလုပ်ခဲ့ပေသည်။

သူ၏ သွေးဆက်စွမ်းရည်မှာ သာမန်အပင်များနှင့် နှိုင်းယှဉ်ပါက များစွာ အသာစီးရရှိပေသည်။

ဖန်လုံအိမ် စမ်းသပ်လယ်ကွက် အနည်းငယ်မျှဖြင့် လယ်ကွင်းအတွင်းရှိ အာဟာရဓာတ်များ လုံလောက်စွာ ရှိနေသမျှ ကာလပတ်လုံး ရက်အနည်းငယ်အတွင်း စပါးမျိုးစေ့များကို ရင့်မှည့်လာစေရန် ဖန်တီးနိုင်ပြီး ရိတ်သိမ်းနိုင်ပေသည်။ ထို့ကြောင့် စပါးမျိုးစေ့များကို စိုက်ပျိုးရန် သူ၏ စွမ်းရည်သစ်ကို အသုံးပြုရန် ဆုံးဖြတ်လိုက်သည်။

ကနဦး စပါးမျိုးစေ့များကို အထွက်နှုန်း သိသိသာသာ ကျဆင်းသွားသဖြင့် ကြည့်ရဆိုးလောက်အောင် ဖြစ်နေခဲ့သော လျိုနှင့် ကျောက် မျိုးနွယ်စုများ၏ လယ်ယာမြေများမှ ရရှိခဲ့ခြင်း ဖြစ်သည်။ ဤမျှ အထွက်နှုန်း ကျဆင်းနေသည့်တိုင် အသက်ရှင်သန်နိုင်ဆဲဖြစ်သော စပါးပင်များမှာ ပိုးမွှားနှင့် ရောဂါဘေးဒဏ်များကို ပိုမို ခံနိုင်ရည်ရှိသော အပင်များ ဖြစ်ရပေမည်။ ဤအခြေခံမှ စတင်ခြင်းက များစွာ ရိုးရှင်းပေလိမ့်မည်။

ထို့နောက် သူသည် မျိုးဆက်တစ်ခုပြီးတစ်ခု စပါးမျိုးသစ်များကို စိုက်ပျိုးထုတ်လုပ်ခဲ့သည်။ သူ၏ ယခင်ဘဝမှ စိုက်ပျိုးရေးနှင့် မျိုးပွားခြင်းဆိုင်ရာ မပြည့်စုံသော အသိပညာများကို တဖြည်းဖြည်း အသုံးချလာနိုင်ခဲ့၏။ နှစ်ဝက်ခန့် အချိန်ယူပြီးနောက် သူ့ကိုယ်ပိုင် အားသာချက်များ ရှိသည့် စပါးမျိုး တစ်ဆယ့်ငါးမျိုးကို ဖော်ထုတ်နိုင်ခဲ့ပေသည်။

သို့သော် နောက်ဆုံးတွင် သာမန် အထွက်နှုန်းသာ ရှိပြီး ပိုးမွှားနှင့် ရောဂါဘေးဒဏ်ကို ခံနိုင်ရည်ရှိမှုမှာလည်း သိပ်မထူးခြားလှသော ဝမ်အမှတ်(၉) ကို အကြီးစား စမ်းသပ်မှုများအတွက် ရွေးချယ်ခဲ့သည်။ အကြောင်းရင်းမှာ ရိုးရှင်းလှသည်။ ဤစပါးမျိုးတွင် မျိုးဗီဇပြောင်းလဲမှု၌ ထူးခြားချက် တစ်ခုရှိသည်။ ၎င်းမှာ အာရုံစူးစိုက်မှုနည်းသော ဆားရည်တွင် စိမ်ထားသော မျိုးစေ့များသည် မျိုးပွားနိုင်စွမ်း မရှိခြင်းပင် ဖြစ်သည်။

ရိုးရိုးရှင်းရှင်း ပြောရလျှင် ဝမ်မျိုးနွယ်စု တစ်ခုတည်းကသာ မူလမျိုးစေ့အဖြစ် ပထမမျိုးဆက်ကို စိုက်ပျိုးထုတ်လုပ်နိုင်မည် ဖြစ်သည်။ ဆားရည်တွင် စိမ်ထားသော မျိုးစေ့များမှ ထွက်ရှိလာသော စပါးများကို စားသုံးရန်အတွက်သာ အသုံးပြုနိုင်ပြီး မျိုးစေ့ကောင်းများအဖြစ် အသုံးပြု၍ မရနိုင်ချေ။

ဤသည်မှာ မျိုးစေ့ကောင်းများ အပြင်သို့ ပေါက်ကြားသွားခြင်းကို ထိရောက်စွာ ကာကွယ်နိုင်ပေသည်။

ဝမ်ရှိုကျဲ့ သိထားသလောက် သမိုင်းကြောင်း ရှည်လျားသော မျိုးနွယ်စုများ သို့မဟုတ် အင်အားကြီးမားသော မျိုးနွယ်စုများစွာသည် အထွက်နှုန်းကောင်းမွန်သော သို့မဟုတ် အရည်အသွေးမြင့်မားသော မျိုးစေ့ကောင်းများကို မျိုးဆက်တစ်ခုပြီးတစ်ခု စိုက်ပျိုးထုတ်လုပ်လေ့ ရှိကြသည်။

ဤမျိုးစေ့ကောင်းများကို ၎င်းတို့က တန်ဖိုးထားကြပြီး ၎င်းတို့၏ ကိုယ်ပိုင် လယ်ယာမြေများတွင်သာ အသုံးပြုကြသည်။ အပြင်သို့ ရောင်းချသောအခါတွင် အခွံချွတ်ပြီးမှသာ ရောင်းချလေ့ရှိ၏။ အကြောင်းမှာ မျိုးစေ့အဖြစ် ရောင်းချလိုက်ပါက မျိုးစေ့တစ်ခုလုံး ပြန့်နှံ့သွားမည် ဖြစ်သောကြောင့်ပေတည်း။

သို့သော် ဝမ်ရှိုကျဲ့၏ ဝမ်အမှတ်(၉) တွင်မူ ထိုကဲ့သို့ စိုးရိမ်စရာ မရှိချေ။

ဝမ်ရှိုကျဲ့ စဉ်းစားခန်း ဝင်နေစဉ် ဝမ်ရှောင်ကျီက ပြောလိုက်သည်။

"ရှိုကျဲ့.. မင်း ဒီအထွက်နှုန်းတိုးရေးကို အာရုံစိုက်နေတယ် ဆိုတာကိုတော့ ဘိုးဘိုးလေး သိပါတယ်.. ဒါပေမဲ့ မင်း အမြန် ပြန်သင့်ပြီ.. မင်းရဲ့ မင်္ဂလာပွဲက ရက်အနည်းငယ်ပဲ လိုတော့တာ.. တစ်မိသားစုလုံး မင်းရဲ့ မင်္ဂလာပွဲအတွက် ပြင်ဆင်နေကြတာ အလုပ်တွေ ရှုပ်နေတာပဲ.. မင်းက လယ်ကွင်းထဲချည်း လာလာနေလို့ ဘယ်ဖြစ်ပါ့မလဲ"

"ကျွန်တော် လာကြည့်ရုံလေး လာကြည့်တာပါ.. ပြန်တော့မယ်.. ပြန်တော့မယ်"

ဝမ်ရှိုကျဲ့က ပြုံးကာ နှုတ်ဆက်ရင်း ပြန်ပြောလိုက်သည်။

ဝမ်မျိုးနွယ်စုသည် သူ၏ မင်္ဂလာပွဲအတွက် အချိန်ကြာမြင့်စွာကပင် ပြင်ဆင်နေခဲ့ကြောင်း သူ သိထားသည်။ မင်္ဂလာဝတ်စုံနှင့် အခြားအရာများ အားလုံးကို လဝက်ခန့် ကြိုတင်၍ ပြင်ဆင်ထားခဲ့ကြပြီး ဖြစ်သည်။

သူ၏ အစ်ကိုလတ် ဝမ်ရှိုရီသည်လည်း လွန်ခဲ့သော လဝက်ခန့်ကပင် လုံကျိုးစီရင်စုနှင့် ပတ်ဝန်းကျင် ဒေသများမှ အဆင့်မြင့် ဟင်းလျာ ကုန်ကြမ်းများကို ဝယ်ယူရန် ကုန်သည် အမျိုးမျိုးကို တာဝန်ပေးအပ်ထားခဲ့သည်။ ကျန်ရှိသော မိသားစုဝင်များမှာလည်း အချိန်အတန်ကြာ အလုပ်ရှုပ်နေခဲ့ကြသည်။

ဤအချိန်တွင် အိမ်ထောင်ကျသွားသော သမီးများစွာသည် ခင်ပွန်းများနှင့် ကလေးများကို ခေါ်ဆောင်ကာ ဝမ်ပင်မစံအိမ်သို့ ပြန်လာကြပြီး ဂုဏ်ပြုရန်နှင့် ကူညီလုပ်ကိုင်ပေးရန် ရောက်ရှိနေကြပြီ ဖြစ်ပေသည်။

ရထားလုံးဖြင့် အပြန်လမ်းတွင် ဝမ်ရှိုကျဲ့သည် သက်ပြင်းတစ်ချက် ချလိုက်မိသည်။ ခံစားချက်မျိုးစုံ ရောထွေးနေမှုကို သူ မထိန်းချုပ်နိုင်ခဲ့ချေ။ မသိလိုက်မသိဘာသာနှင့်ပင် သူ အိမ်ထောင်ကျတော့မည် မဟုတ်ပါလော။

သူ့ကို အံ့ဩစေဆုံးအရာမှာ သတို့သားနှင့် သတို့သမီးတို့မှာ တစ်ကြိမ်တစ်ခါမျှ မတွေ့ဖူးကြခြင်းပင် ဖြစ်သည်။

တစ်ယောက်၏ ရုပ်ရည်သွင်ပြင်ကို နောက်တစ်ယောက်က လုံးဝ မသိရှိကြချေ။ ထို့အပြင် ယခုအချိန်အထိ သူတို့နှစ်ဦးမှာ အဝေးမှနေ၍ အသေးအဖွဲ စကားအနည်းငယ်မျှသာ ပြောဆိုခဲ့ဖူးကြပေသည်။ ဤသည်မှာ ကမ္ဘာမြေပေါ်ရှိ ဝမ်ရှိုကျဲ့၏ အွန်လိုင်း အချစ်ရေးများထက်ပင် ပိုမိုလွန်ကဲနေသေးပေသည်။

သို့သော် ဤကမ္ဘာတွင်မူ မွန်မြတ်သော မျိုးနွယ်စုများမှ တရားဝင် သားသမီးများ၏ လက်ထပ်ပွဲများမှာ ဤကဲ့သို့ စီစဉ်ပေးမှုမျိုးက အလွန်ပင် ပုံမှန်ဖြစ်နေပေသည်။ ချန်ဖန်ကျယ်နှင့် သူ၏အစ်မ ဝမ်လော်ရီတို့ လက်မထပ်မီကလည်း ဝမ်ပင်မစံအိမ်သို့ တစ်ကြိမ်သာ လာရောက်လည်ပတ်ဖူးပြီး ထို့နောက်တွင် ပင်မစံအိမ်သို့ ထပ်မလာရဲကြတော့ချေ။ စည်းကမ်းဖောက်ဖျက်မိပြီး ဝမ်ရှိုကျဲ့၏ သတ်ဖြတ်ခြင်းကို ခံရမည်ကို စိုးရိမ်သောကြောင့် ဖြစ်ပေသည်။

"ဟီး ဟီး.. ဒါပေမဲ့ ဒီလို မိဘပေးစားတဲ့ အိမ်ထောင်ရေးကလည်း မဆိုးပါဘူး"

ဝမ်ရှိုကျဲ့ ရယ်မောလိုက်သည်။ ကမ္ဘာမြေပေါ်တွင် ချစ်သူရည်းစားထားရန်နှင့် လက်ထပ်ရန်မှာ အလွန် ပြဿနာများလှပေသည်။

......

ရက်အနည်းငယ် ကုန်လွန်သွားခဲ့သည်။

ရွှေရောင်လွှမ်းသော အောက်တိုဘာ ဆောင်းဦးရာသီ….

ဆောင်းဦးရာသီသည် မြင့်မားနေပြီး လေထုမှာလည်း လန်းဆန်းနေပေသည်။ ဤရာသီသည် ကောက်ရိတ်သိမ်းချိန်ဖြစ်ပြီး လက်ထပ်မင်္ဂလာပွဲများ ကျင်းပရန် သင့်လျော်သော ရာသီလည်း ဖြစ်၏။

ချန်နင် အစောင့်တပ်စခန်းရှိ ရှန်းယင် မြို့နယ်အတွက်မူ ဤရာသီသည် အလွန် အရေးပါသော ရာသီတစ်ခုလည်း ဖြစ်ပေသည်။ အကြောင်းမှာ လျိုမျိုးနွယ်စုက အကြွင်းမဲ့ အာဏာစွဲကိုင်ထားသော ရှန်းယင် မြို့နယ်တွင် သူတို့၏ တရားဝင် သမီးတော် ရွှေတာရာလေး ယနေ့ လက်ထပ်တော့မည် ဖြစ်သောကြောင့်ပေတည်း။

ဤမင်္ဂလာသတင်းကို ဂုဏ်ပြုသောအားဖြင့် လျိုမျိုးနွယ်စုသည် ၎င်းတို့၏ ပိုင်နက်နယ်မြေအတွင်းရှိ လယ်မြေကောင်းများ အားလုံးကို ယခု ဆောင်းဦး ကောက်ရိတ်သိမ်းချိန်အတွက် မျိုးနွယ်စု အခွန်ကင်းလွတ်ခွင့် ပြုမည်ဖြစ်ကြောင်း ကြေညာထားခဲ့ပေသည်။

အလွန် ကြီးကျယ်ခမ်းနားလှသော လုပ်ရပ်ပင် ဖြစ်ပေသည်။

လျိုမျိုးနွယ်စု၏ ပိုင်နက်နယ်မြေအတွင်း မျိုးနွယ်စု အခွန်ပေးဆောင်ရမည့် လယ်မြေကောင်း ဧက ခုနစ်သောင်းခန့် ရှိသည်ကို သင် သိထားသင့်ပေသည်။ လျှော့ချပေးလိုက်သော မျိုးနွယ်စု အခွန်ပမာဏမှာ ရွှေတာရာ ခုနစ်ရာကျော်ပင် ရှိပေသည်။ သာမန် လယ်သမား အများစုအတွက်မူ ဤသည်မှာ ကြီးမားလှသော ပျော်ရွှင်မှုကြီး ဖြစ်သည်။ ဆောင်းဦး ကောက်ရိတ်သိမ်းချိန်တွင် အခွန်သက်သာခွင့် ရရှိခြင်းက သူတို့အတွက် တစ်နှစ်တာလုံး ပြည့်စုံကြွယ်ဝသော ဘဝကို ရရှိစေနိုင်ပေသည်။

လျိုမျိုးနွယ်စု၏ ဘက်စုံ ငွေကြေးအင်အား တောင့်တင်းမှုကို ပြသနေခြင်းလည်း ဖြစ်၏။ ရွှေတာရာ ခုနစ်ရာကျော် ဆုံးရှုံးမှုမှာ သာမန် မျိုးနွယ်စုများနှင့် နှိုင်းယှဉ်၍ မရနိုင်သော သေးငယ်သည့် ပမာဏတစ်ခုသာ ဖြစ်ပေသည်။

ရှန်းယင် မြို့နယ်၏ ထိန်းချုပ်မှုအောက်ရှိ နယ်မြေအဝင်ဝတွင် တံခါးပေါက် မျှော်စင်တစ်ခု ရှိပေသည်။ မျှော်စင်ပေါ်တွင် 'ရှန်းယင်' ဟူသော စာလုံး ရေးထိုးထားသည့် ကျောက်စာချပ် တစ်ခု ရှိသည်။ထိုအရာက ကာကွယ်ရေးလိုင်းနှင့် စစ်ဆေးရေးဂိတ် တစ်ခုဖြစ်ပြီး လျိုမျိုးနွယ်စုဝင် တစ်ဦးနှင့် မိသားစု အစောင့်များ၊ အစေခံများ ပါဝင်သော အဖွဲ့တစ်ဖွဲ့က တစ်နှစ်ပတ်လုံး တပ်စွဲထားလေ့ရှိသည်။ ရှန်းယင် မြို့နယ်အတွင်းသို့ ဝင်ရောက်လာသူ မည်သူ့ကိုမဆို၊ အထူးသဖြင့် ပြန့်ကျဲနေသော ကျင့်ကြံသူများနှင့် ခရီးသွား ကုန်သည်များကို မေးမြန်းစစ်ဆေးပြီး စာရင်းသွင်းလေ့ရှိသည်။

ထိုအရာက ရှန်းယင်ကို အခြားမြို့များနှင့် ကွဲပြားစေသော အချက်ပင် ဖြစ်သည်။ ၎င်းသည် ထွက်ပြေးတိမ်းရှောင်လာသူ အများစုကို ဝင်ရောက်ခွင့် မပြုဘဲ တားဆီးနိုင်ပြီး ပြစ်မှုကျူးလွန်လိုသူများကိုလည်း အကြောက်တရား ဝင်စေနိုင်ပေသည်။

ထို့ကြောင့် ရှန်းယင် အတွင်းရှိ ပြစ်မှုကျူးလွန်နှုန်းမှာ ချန်နင် အစောင့်တပ်စခန်းရှိ မြို့နယ်အားလုံးတွင် အမြဲတမ်း အနိမ့်ဆုံးဖြစ်ပြီး တည်ငြိမ်အေးချမ်းသော ဘဝများကို ပိုင်ဆိုင်ထားကြပေသည်။

တစ်ချိန်တည်းမှာပင် တံခါးပေါက် မျှော်စင်ဘေးရှိ ကွင်းပြင်ကျယ်ကြီး တစ်ခုတွင် လျိုမျိုးနွယ်စုဝင်များ နေရာယူထားကြပြီး နေကာမိုးများ တပ်ဆင်ထားကာ အသင့်တီးခတ်နိုင်သော ဗုံနှင့် နှဲ အဖွဲ့တစ်ဖွဲ့လည်း ရှိနေပေသည်။

နံနက်ခင်း အချိန်….

ရှန်းယင် အရပ်သား အများအပြားသည် တံခါးပေါက် မျှော်စင်အနီးတွင် စုရုံးနေကြပြီ ဖြစ်သည်။ လယ်သမားများ၊ ကုန်သည်ငယ်များ၊ လက်မှုပညာရှင်များ၊ အဆင့်နိမ့် မိသားစုများမှ ရွှမ်ဝူ ကျင့်ကြံသူအချို့၊ ခရီးသွား ကုန်သည်များနှင့် အမှီအခိုကင်းသော ကျင့်ကြံသူ အများအပြားပင် ပါဝင်သည်။ အသက်အရွယ်စုံ၊ ကျားမ မရွေး ရှိနေကြပေသည်။

သူတို့အားလုံးသည် စကားပြောဆို ဆွေးနွေးနေကြပြီး တစ်စုံတစ်ခုကို မျှော်လင့်နေသကဲ့သို့ တံခါးပေါက် မျှော်စင် အပြင်ဘက်သို့ ရံဖန်ရံခါ လှမ်းကြည့်နေကြလေသည်။

"သတို့သားက ဖင်းအန်း မြို့နယ်က ဝမ်မျိုးနွယ်စုရဲ့ မျိုးနွယ်စုခေါင်းဆောင်ငယ်လို့ ကြားတယ်.. ရုပ်ရည်က ဘယ်လိုနေမလဲ မသိဘူး၊ ငါတို့ သခင်မလေး ရွဲ့လန်နဲ့ လိုက်ဖက်ပါ့မလား"

"အစ်ကိုကြီး.. ခင်ဗျား အဲဒီ ခေတ်နောက်ကျနေတဲ့ သတင်းကို ဘယ်က ရလာတာတုန်း.. သတို့သားက ဝမ်မျိုးနွယ်စုရဲ့ မျိုးနွယ်စုခေါင်းဆောင် ဖြစ်နေတာ ကြာပြီ"

"မျိုးနွယ်စု ခေါင်းဆောင်.. ဒါဆို အသက်ဘယ်လောက်တောင် ရှိနေပြီလဲ.. ငါတို့ သခင်မလေး ရွဲ့လန် က မယားငယ် သွားလုပ်ရမှာတော့ မဟုတ်ပါဘူးနော်"

"ဘယ်လိုလုပ်ပြီး မယားငယ် ဖြစ်နိုင်မှာလဲ.. ငါတို့ သခင်မလေး ရွဲ့လန် က ဂုဏ်သတင်း ကြီးမားတဲ့ လျိုမျိုးနွယ်စုရဲ့ တရားဝင် သမီးအကြီးဆုံးလေ.. သူမရဲ့ အဆင့်အတန်းက အလွန် မြင့်မြတ်တယ်.. သတို့သားက အသက် ဆယ့်ကိုးနှစ်ပဲ ရှိသေးတယ်လို့ ကြားတယ်.. လူငယ် လူရွယ်လေးပေါ့၊ သခင်မလေး ရွဲ့လန် ထက် တစ်နှစ်ပဲ ကြီးတာပါ"

"သူ့အသက်နဲ့ အဆင့်အတန်းကတော့ လက်ခံနိုင်စရာပါပဲ.. ဒါပေမဲ့ အဲဒီ ဖင်းအန်း ဝမ်မျိုးနွယ်စုဆိုတာ အန်းမြစ် တောင်ဘက် ထောင့်က ဝေးလံခေါင်ဖျားတဲ့ နေရာမှာ ရှိတဲ့ မိသားစုငယ်လေး တစ်ခု မဟုတ်ဘူးလား"

"ဟုတ်တယ်.. ဖင်းအန်း မြို့နယ်က ဖွံ့ဖြိုးတိုးတက်လာတာ နှစ်တစ်ရာကျော်ပဲ ရှိသေးတယ်.. ပြီးတော့ အဲဒီနယ်မြေထဲမှာ အန္တရာယ်များတဲ့ သားရဲတွေ ရှိနေသေးတယ်လို့လည်း ပြောကြတယ်"

"ဟာ.. ငါတို့ သခင်မလေး ရွဲ့လန် က အဲဒီလို ဆင်းရဲပြီး ရိုင်းစိုင်းတဲ့ နေရာမျိုးမှာ သွားပြီး ဒုက္ခခံရတော့မှာလား.. အန္တရာယ်များတဲ့ သားရဲတွေ ရှိတဲ့နေရာဆိုတော့ အန္တရာယ် မများဘူးလား"

ဤကမ္ဘာတွင် အရပ်သား အများစုမှာ မွေးဖွားရာ နေရာတွင်ပင် သေဆုံးသွားလေ့ ရှိကြသည်။ တစ်သက်လုံး နေထိုင်သွားရာတွင် အစောင့်တပ်စခန်း မြို့တော်သို့ သွားရောက်လည်ပတ်ခွင့် ရရှိခြင်းမှာပင် ဘဝကောင်း တစ်ခုဟု သတ်မှတ်နိုင်ပေသည်။

ဖင်းအန်း မြို့နယ်နှင့် ရှန်းယင် မြို့နယ်တို့မှာ တောင်များ၊ မြစ်များဖြင့် ခြားနားထားပြီး သာမန်လူများမှာ သတင်းအချို့ကိုသာ ကြားသိရပြီး အမှန်တရားကို အမှန်တကယ် မသိရှိနိုင်ကြချေ။

သို့သော် နေရာအနှံ့ ခရီးသွားလာဖူးသော အမှီအခိုကင်းသည့် ကျင့်ကြံသူ အချို့နှင့် ခရီးသွား ကုန်သည်များမှာ ဆက်လက် နားထောင်မနေနိုင်တော့ဘဲ ဖင်းအန်း မြို့နယ်အတွက် ဝင်ရောက် ပြောဆိုပေးလိုက်ကြသည်။

"ဖင်းအန်း မြို့နယ်က အခု ဝမ်မျိုးနွယ်စုရဲ့ လက်အောက်မှာ ရောက်နေပြီ.. သူတို့ရဲ့ ဖွံ့ဖြိုးတိုးတက်မှုက တော်တော်လေး မြန်ဆန်တယ်.. လောလောဆယ် ရှန်းယင်လောက် မတိုးတက်သေးပေမယ့် အနာဂတ်အတွက် ကြီးမားတဲ့ ဖွံ့ဖြိုးတိုးတက်နိုင်စွမ်း ရှိတယ်.. သူတို့နယ်မြေထဲမှာ အန္တရာယ်များတဲ့ သားရဲတွေ ပေါ်လာတာနဲ့ ပတ်သက်လို့ကတော့ တစ်ခါတလေ ဖြစ်တတ်ပေမယ့် နယ်စပ်နဲ့ နီးနေတော့ ရှောင်လွှဲလို့တော့ မရဘူးလေ"

"ဝမ်မျိုးနွယ်စုရဲ့ မျိုးနွယ်စု ခေါင်းဆောင် ဝမ်ရှိုကျဲ့က ထူးချွန်တဲ့ လူငယ်လေး တစ်ယောက်ပါ.. ဖင်းအန်း မြို့နယ်မှာ အလွန် ရိုသေလေးစားခံရပြီး ခင်ဗျားတို့ရဲ့ သခင်မလေး လျို နဲ့လည်း လိုက်ဖက်ပါတယ်"

အမှီအခိုကင်းသည့် ကျင့်ကြံသူများနှင့် ခရီးသွား ကုန်သည်များ၏ ချေပပြောဆိုမှုများကြောင့် ရှန်းယင် အရပ်သား အချို့မှာ ဖင်းအန်း မြို့နယ်နှင့် ဝမ်ရှိုကျဲ့တို့အပေါ် အနည်းငယ် သဘောပေါက်လာကြလေသည်။ သို့သော် အစွဲအလမ်း ကြီးမားနေသူများလည်း အများအပြား ရှိနေဆဲပင် ဖြစ်၏။

"အန္တရာယ်များတဲ့ သားရဲတွေ တစ်ခါတလေ ရှိတယ်ဆို.. သခင်မလေး ရွဲ့လန်တော့ အဲဒီလို အရိုင်းအစိုင်း နေရာမျိုးကို လက်ထပ်သွားရင် ဒုက္ခရောက်တော့မှာပဲ"

"ဝမ်ရှိုကျဲ့.. ဒီနာမည်က သာမန်ပါပဲ.. သူ ဘယ်လိုရုပ်မျိုးလဲ မသိဘူး၊ ရုပ်ချောပြီး သူရဲကောင်းဆန်ဖို့တော့ မျှော်လင့်ပါတယ်.. သခင်လေး ယွမ်ဟွေး လောက်ရဲ့ ခုနစ်ဆယ် ရာခိုင်နှုန်း ရှစ်ဆယ် ရာခိုင်နှုန်းလောက် ကောင်းရင်ကို လုံလောက်ပါပြီ"

"သခင်လေး ယွမ်ဟွေး နဲ့ ဘယ်လိုလုပ်ပြီး ယှဉ်နိုင်မှာလဲ.. သတို့သားက သခင်လေး ယွမ်ဟွေး ရဲ့ တစ်ဝက်လောက် ကောင်းရင်ကို တော်တော် ကောင်းနေပါပြီ"

အမျိုးမျိုးသော ဆွေးနွေးပြောဆိုမှုများ ဆက်လက် ထွက်ပေါ်နေခဲ့သည်။

ရုတ်တရက် လျင်မြန်သွက်လက်သော လူငယ်အချို့သည် အဝေးမှ ပြေးလာကြပြီး သူတို့၏ မျက်နှာများမှာ စိတ်လှုပ်ရှားမှုကြောင့် နီမြန်းနေကာ အော်ဟစ်လိုက်ကြသည်။

"ရောက်လာပြီ.. ရောက်လာပြီ.. ဖင်းအန်း မြို့နယ် ဝမ်မျိုးနွယ်စုရဲ့ မင်္ဂလာယာဉ်တန်းကြီး ရောက်လာပြီ.. သတို့သား ရောက်လာပြီဟေ့"

တစ်ခဏအတွင်းမှာပင်…..

အားလုံး တိတ်ဆိတ်သွားကြပြီး တံခါးပေါက် အပြင်ဘက်သို့ လည်ပင်းရှည်ကာ လှမ်းကြည့်လိုက်ကြလေသည်။ မကြာမီတွင် မင်္ဂလာယာဉ်တန်းကြီးမှာ လမ်းကွေ့မှ ဖြည်းညင်းစွာ ပေါ်ထွက်လာပေသည်။

ယာဉ်တန်း၏ ရှေ့ဆုံးတွင် မင်္ဂလာဝတ်စုံကို ဝတ်ဆင်ထားပြီး ရင်ဘတ်တွင် အနီရောင် ပန်းပွင့်လုံးကြီး တစ်လုံး ဆွဲချိတ်ထားသော လူငယ်တစ်ဦးကို တွေ့မြင်လိုက်ရသည်။ သူသည် ပန်းဖွားများတပ်ဆင်ထားသော ခရမ်းရောင် ကျောက်စိမ်းသရဖူကို ဆောင်းထားပြီး ကိုယ်ကျပ် ကြက်သွေးရောင် မင်္ဂလာဝတ်ရုံကို ဝတ်ဆင်ထားသည်။ ထိုဝတ်ရုံပေါ်တွင် နဂါးပုံစံများ၊ ဖီးနစ်ငှက်နှင့် ငှက်ကလေးများ တေးသီနေသည့် ပုံစံများကို အဓိကထား၍ ပန်းထိုးထားပြီး ဒီဇိုင်းမှာ အလွန် ရှုပ်ထွေးကာ ခမ်းနားလှပေသည်။ ဤသည်မှာ လက်ထပ်ပြီးနောက် မိသားစုကို အတူတကွ ပူးပေါင်းစီမံခန့်ခွဲမည့် မောင်နှံနှစ်ဦး၏ အနာဂတ်မျှော်မှန်းချက်ကို ကိုယ်စားပြုပေသည်။

သူ၏ ခါးတွင် ရတနာများ ထည့်သွင်းထားသော အိတ်တစ်လုံးကို ချိတ်ဆွဲထားပြီး သတို့သား မိသားစု၏ ကြွယ်ဝချမ်းသာမှုကို ကိုယ်စားပြုကာ သတို့သမီးကို ပူပင်သောကကင်းသော ဘဝတစ်ခု ပေးစွမ်းနိုင်ကြောင်း ပြသနေခြင်း ဖြစ်သည်။ ဤရတနာအိတ်ကို သတို့သမီးအား ပေးအပ်ရမည်ဖြစ်ပြီး သတို့သမီးသည် အနာဂတ်တွင် ဘဏ္ဍာရေးကို စီမံခန့်ခွဲရမည်ကို ကိုယ်စားပြုပေသည်။ သူ၏ ညာဘက်ဘေးတွင် ကျောက်စိမ်းဓားတစ်လက်နှင့် သေးငယ်သေသပ်လှပသော ခရမ်းရောင် ရွှေလေး တစ်လက်ကို ချိတ်ဆွဲထားပြီး သတို့သား မိသားစု၏ အင်အားကြီးမားသော စစ်ရေးစွမ်းရည်ကို ကိုယ်စားပြုကာ သူ၏ ဇနီးနှင့် ကလေးများကို ကာကွယ်ပေးနိုင်ကြောင်း ပြသနေခြင်း ဖြစ်သည်။

သူ စီးနင်းထားသော ခြေဖျားများ ကော့တက်နေသည့် ဘွတ်ဖိနပ်များမှာ သတို့သား၏ အနာဂတ် လုပ်ငန်းခွင် တိုးတက်မှုနှင့် မိသားစု၏ ကြီးပွားတိုးတက်လိုသော ဆန္ဒကို ကိုယ်စားပြုပေသည်။ ဤဝတ်စားဆင်ယင်မှုများ အားလုံးကို ဤကမ္ဘာတွင် သေချာစွာ ရွေးချယ်ထားခြင်း ဖြစ်ပေသည်။

မျိုးနွယ်စု ခေါင်းဆောင် သို့မဟုတ် မိသားစု၏ ဆက်ခံသူများအတွက် စံသတ်မှတ်ထားသော ဝတ်စားဆင်ယင်မှု ဖြစ်သည်။ မိသားစု၏ တိုက်ရိုက်မျိုးဆက်များဖြစ်စေ၊ တရားဝင် သားများဖြစ်စေ ထိုမင်္ဂလာဝတ်စုံကို ဝတ်ဆင်ခွင့် မရှိကြချေ။

"ဟာ.. သတို့သားက အရပ်ရှည်ရှည်နဲ့ ရုပ်ချောလိုက်တာ.. တကယ့် သူရဲကောင်းပုံစံပဲ"

ပညာတတ် တစ်ဦးက ချီးကျူးလိုက်သည်။

"သူ မြင်းစီးလာတဲ့ ပုံစံကလည်း တည်ငြိမ်ပြီး အေးဆေးလိုက်တာ.. တော်တော် ကောင်းတယ်"

"သတို့သားရဲ့ မင်္ဂလာဝတ်စုံက အဝေးကကြည့်တာတောင် အနီရောင် အလင်းတန်းလေးတွေနဲ့ ရွှေရောင် အလင်းတန်းတွေ ဖြာထွက်နေတယ်.. ဒါက ဒဏ္ဍာရီထဲက ရွှေနဲ့ မီး ဓာတ်နှစ်မျိုးပါတဲ့ ဝိညာဉ် ပိုးသားဝတ်ရုံ များလား"

အတွေ့အကြုံရှိသော အမှီအခိုကင်းသည့် ကျင့်ကြံသူတစ်ဦးက အံ့ဩတကြီး ရေရွတ်လိုက်လေသည်။

"အစ်ကိုကြီး.. ရွှေနဲ့ မီး ဓာတ်နှစ်မျိုးပါတဲ့ ဝိညာဉ် ပိုးသားဝတ်ရုံ ဆိုတာ ဘာလဲ.. မင်္ဂလာဝတ်ရုံပဲ မဟုတ်ဘူးလား.. ဘာများ အထူးအဆန်း ဖြစ်နေလို့လဲ"

"ဟီး ဟီး.. လောကကြီးမှာ ရေခဲ ဝိညာဉ် ပိုးကောင်၊ မီး ဝိညာဉ် ပိုးကောင်၊ ရွှေ ဝိညာဉ် ပိုးကောင် စတဲ့ ဝိညာဉ် ပိုးကောင် အမျိုးအစားတွေ အများကြီး ရှိတယ်.. ဒါပေမဲ့ ဘယ်လို ဝိညာဉ် ပိုးသားအထည်မျိုးပဲဖြစ်ဖြစ် အားလုံးက အရမ်း ဈေးကြီးတယ်.. သာမန် မွန်မြတ်တဲ့ အမျိုးသမီးတွေအတွက် ဝိညာဉ် ပိုးသား လက်ကိုင်ပဝါလေး တစ်ထည် ရှိတာတောင် ရတနာတစ်ခုလို တန်ဖိုးထားရတာ"

အမှီအခိုကင်းသည့် ကျင့်ကြံသူက ရှင်းပြလိုက်သည်။

"အမျိုးသားတွေရဲ့ မင်္ဂလာဝတ်စုံချုပ်ဖို့ အသင့်တော်ဆုံးကတော့ ဓာတ်နှစ်မျိုးပါတဲ့ ဝိညာဉ် ပိုးသားဝတ်ရုံပဲ.. အဓိကအားဖြင့် မီး ဝိညာဉ် ပိုးသားနဲ့ ပြုလုပ်ထားပြီး ရွှေ ဝိညာဉ် ပိုးသားကို အရန်အဖြစ် ထည့်သွင်းထားတယ်.. ဒီဝိညာဉ် ပိုးသား နှစ်မျိုးက သဘာဝအတိုင်း အနီရောင်နဲ့ ရွှေရောင် ရှိနေတော့ မင်္ဂလာဝတ်ရုံကို အလွန် ခမ်းနားထည်ဝါသွားစေတာပေါ့"

"ဒါပေမဲ့ မင်္ဂလာဝတ်ရုံက ကုန်ကြမ်းတွေ အများကြီး သုံးရပြီး ချုပ်ရတာလည်း ရှုပ်ထွေးတော့ ဈေးက ပိုလို့တောင် ကြီးသေးတယ်.. သတို့သားရဲ့ ဝတ်စုံ တစ်စုံတည်းနဲ့တင် ရွှေတာရာ နှစ်ထောင် အောက်တော့ မနည်းလောက်ဘူးလို့ ငါ ထင်တယ်"

"နှစ်ထောင်တောင်"

သာမန် အရပ်သားများဖြစ်စေ၊ လမ်းပြတောင်းစားသူ ကျင့်ကြံသူများဖြစ်စေ၊ ခရီးသွား ကုန်သည်များဖြစ်စေ အားလုံးမှာ မှင်တက်သွားကြလေသည်။ ထိုပမာဏမှာ နက္ခတ္တဗေဒဆိုင်ရာ ကိန်းဂဏန်း တစ်ခုလို အလွန်များပြားလှပေသည်။ အရေးအကြီးဆုံး အချက်မှာ အမျိုးသားတစ်ဦးသည် သူ၏ ဘဝတစ်သက်တာတွင် မင်္ဂလာဝတ်ရုံကို တစ်ကြိမ်သာ ဝတ်ဆင်လေ့ရှိခြင်းပင် ဖြစ်သည်။ တစ်ခါဝတ်ရန်အတွက် ရွှေတာရာ နှစ်ထောင်ဆိုသည်မှာ အလွန်တရာ ဖြုန်းတီးလွန်းရာ ကျပေသည်။

"လုံကျိုးစီရင်စုမှာတော့ ဒီလို မင်္ဂလာဝတ်ရုံမျိုးကို ငါ မြင်ဖူးတယ်.. ကောင်းကင်လူသား မိသားစုက မျိုးနွယ်စုခေါင်းဆောင်ငယ် တစ်ယောက် လက်ထပ်တုန်းက ဝတ်ခဲ့တာ"

လမ်းပြတောင်းစားသူ ကျင့်ကြံသူက သူ၏ ဗဟုသုတကို ဂုဏ်ယူဝင့်ကြွားစွာ ပြောဆိုလိုက်လေသည်။ ဤမျှ ဈေးကြီးသော မင်္ဂလာဝတ်ရုံကို ဝယ်ယူဝတ်ဆင်နိုင်သော သတို့သားသည် သာမန် မိသားစုမှ ဖြစ်နိုင်ပါမည်လော။

လူတိုင်းနီးပါး တစ်ပြိုင်နက်တည်းမှာပင် သတို့သားအား အံ့ဩရိုသေစွာဖြင့် ကြည့်ရှုလိုက်ကြလေသည်။

"ဟေ့.. ဟေ့.. ဝတ်ရုံကိုချည်းပဲ ကြည့်မနေကြနဲ့ဦး.. သတို့သား စီးလာတဲ့ မြင်းကိုလည်း ကြည့်ကြပါဦး"

အခြား ဗဟုသုတကြွယ်ဝသော လမ်းပြတောင်းစားသူ ကျင့်ကြံသူ တစ်ဦးက အော်ဟစ်လိုက်လေသည်။ သူ၏ သတိပေးမှုကြောင့် လူတိုင်းသည် သတို့သား စီးနင်းလာသော မြင်းမှာ သာမန် မြင်းတစ်ကောင် မဟုတ်ကြောင်း သတိပြုမိသွားကြ၏။

မြင်း၏ ဦးခေါင်းပေါ်တွင် ဦးချိုတစ်ချောင်း ရှိနေပြီး ခန္ဓာကိုယ်မှာ မီးတောက်များကဲ့သို့ တောက်ပသော အနီရောင် ဖြစ်ကာ ခွာများမှာမူ တိမ်တိုက်များကဲ့သို့ ဖြူဖွေးနေသည်ကို သူတို့ မြင်တွေ့လိုက်ရသည်။ မြင်းမှာ သန်စွမ်းပြီး လှပကာ အသက်ဝင် တက်ကြွနေပေသည်။ ၎င်း၏ လှုပ်ရှားမှုများမှာ ပေါ့ပါးသွက်လက်ပြီး ကောင်းကင်ယံရှိ တိမ်တိုက်များကို နင်းလျှောက်ပျံသန်းနေသကဲ့သို့ ရှိနေပေသည်။

"ဒါက.. ဒဏ္ဍာရီထဲက ရွှေတစ်သောင်းတန် ဝိညာဉ်သားရဲ.. နာမည်ကြီး မြင်းပဲ"

"ခြေလေးဖက်ဖြူတဲ့ မီးတောက်မြင်း"

အမှန်တကယ်ပင် ရွှေတစ်ထောင်တန် ဝတ်ရုံနှင့် ရွှေတစ်သောင်းတန် မြင်းကို စီးနင်းကာ သခင်လေးသည် မွန်မြတ်လှသော သခင်မလေးကို လာရောက် တောင်းရမ်းလေပြီ တကား။

...