အခန်း ၁၂၅၉

အခန်း (၁၂၅၉) ဘက်ပြောင်းသွားတာလား

အရှင် ရှုယွီ က ဤကိစ္စကို ပေါ့ပေါ့ပါးပါးပင် အဆုံးသတ်လိုက်သည်။

မသေမျိုးသုံးပါးဂိုဏ်းတွင် သူ၏အင်အားမှာ အထူးတလည် ထင်ရှားခြင်း မရှိသော်လည်း ယိုယောင်ကဲ့သို့သော စီနီယာအစ်မ တစ်ဦး ရှိနေသဖြင့် သူမလက်ရှိ နေရာသို့ တစ်ဆင့်ချင်း မည်သို့ တက်လှမ်းလာခဲ့သည်ကို ကိုယ်တွေ့ မျက်မြင် တွေ့ရှိခဲ့ရ၏။

ထို့ကြောင့် မဟာကပ်ဘေးကြီး အပေါ် သူ၏ နားလည်မှုက အခြား ဂိုဏ်းတူတပည့်များထက် များစွာ ပိုမို ရှင်းလင်းနေသည်။

လင်းရွှီဂူမှ ယွင်မြောင်ကို ဥပမာအဖြစ် ကြည့်နိုင်သည်။

ယနေ့အချိန်အထိ အရှင် ရှုယွီက ဤသူ အမှန်တကယ် မည်မျှစွမ်းအားကြီးမားကြောင်းကို မသိရှိသေးသော်လည်း မည်သို့ပင်ဖြစ်စေ မျိုးဆက်တစ်ခုလုံး၏စီနီယာအစ်ကို ဖြစ်လာနိုင်ခြင်းနှင့်အတူ ကိုးနှင့်ကိုး အဆုံးစွန်အသွင်ပြောင်းလဲခြင်း၏ အထွတ်အထိပ်သို့ ရောက်ရှိနေခြင်းကြောင့် သူ၏ခွန်အားက ဆိုးရွားနိုင်မည်မဟုတ်ကြောင်း ထင်ရှားသည်။

သို့သော် တုံ့ဆိုင်းမှုနှင့် ဆုံးဖြတ်ချက် မပြတ်သားမှုတို့ကြောင့် ယခုအခါ သူက အခြားမျိုးဆက်ခွဲများမှ တပည့်များကိုကူညီပေးနေရပြီး အခြားသူများဝေမျှပေးမည့်အချိန်ကို စောင့်ဆိုင်းနေရသည့် အခြေအနေသို့ ကျဆင်းသွားခဲ့သည်။

ဤမဟာကပ်ဘေးကြီးတွင် သူတို့က ထာဝရရှင်သန်ရန် ယုံကြည်မှုစွမ်းအင်အတွက် တိုက်ခိုက်နေကြခြင်းဖြစ်ပြီး အခြေအနေများက လျင်မြန်စွာ ပြောင်းလဲနေ၏။ ဧကရာဇ်ချီများ ထပ်ပေါင်းထည့်လိုက်သဖြင့် ဂိုဏ်းတူတပည့်များ၏ကျင့်ကြံခြင်း တိုးတက်လာခြင်းမှာ ယခင်က မကြုံဖူးသော အဆင့်သို့ ရောက်ရှိနေခဲ့သည်။

သနားညှာတာမှုကင်းမဲ့စွာဖြင့် အခွင့်အရေးကို ဆုပ်ကိုင်ပြီး မိမိစွမ်းဆောင်နိုင်သမျှ ယုံကြည်မှုစွမ်းအင်တိုင်းကို ရယူနိုင်ရန် ကြိုးစားမှသာ အနာဂတ်ကပ်ဘေးများတွင် ဖယ်ထုတ်မခံရစေရန် သေချာစေနိုင်မည် ဖြစ်သည်။

"မင်းတို့နှစ်ယောက်စလုံးက တောင်ပိုင်းတိုက်ကြီးက လာတာဆိုတော့ အတိတ်ကို ပြန်ပြောင်းပြောချင်တဲ့ အကြောင်းပြချက်နဲ့ သူ့ကို အပြင်ဖိတ်ထုတ်လိုက်"

အရှင် ရှုယွီက မျက်လုံးများကို ဖြည်းညှင်းစွာ မှိတ်လိုက်၏။ ယခု မြောက်ပိုင်းတိုက်ကြီးတွင် ဤကဲ့သို့သော ဘေးဒုက္ခမျိုးပေါ်ပေါက်လာပြီဖြစ်ရာ မိတ်ဆွေများထံ အလည်အပတ်သွားခြင်းနှင့် တာအိုအကြောင်းဆွေးနွေးခြင်းများဖြင့် အချိန်ဖြုန်းလေ့ရှိသော အကြီးအကဲများနှင့် လင်းရွှီဂူမှ ဆရာဦးလေး အပါအဝင် ပြန်လည်ရောက်ရှိလာဖွယ် ရှိနေသည်။

လင်းရွှီဂူတွင် ယာယီ တည်းခိုနေသော တောင်ပိုင်းတိုက်ကြီးမှ ကျင့်ကြံသူတစ်ဦးအပေါ် ဤဆရာဦးလေးက မည်သို့ ရှုမြင်မည်ကို သူ စွန့်စား၍ လောင်းကြေးမထပ်လိုပေ။

ထို့အပြင် မသေမျိုးများက သေမျိုးများရှေ့တွင် တိုက်ခိုက်လေ့မရှိခြင်းမှာ မြောက်ပိုင်းတိုက်ကြီး၏ရေးသားမထားသော စည်းမျဉ်းတစ်ခု ဖြစ်သည်။ ကိစ္စရပ်များကို ကိုင်တွယ်ဖြေရှင်းရာတွင် မဟာဂိုဏ်းကြီးတစ်ခုမှ မျှော်လင့်ထားသည့် ဂုဏ်သိက္ခာနှင့်အညီ လုပ်ဆောင်သင့်၏။

"စီနီယာအစ်ကို..." ရှန်းတောင် ဘိုးဘေး က နှုတ်ခမ်းလှုပ်ရုံ ပြောလိုက်သည်။

"ဘာလဲ၊ မင်း မသွားချင်ဘူးလား" အရှင် ရှုယွီ က မျက်မှောင်ကြုတ်လိုက်ပြီး သူ၏ လေသံမှာ အနည်းငယ် အေးစက်နေသည်။

"အဲဒီလို မဟုတ်ပါဘူး။ ဂျူနီယာညီလေးက ဒီဆေးဧကရာဇ်ကို အထင်မသေးဖို့ပဲပြောချင်တာပါ။ ကျွန်တော် သူ့ကို တစ်ခါမှ မမြင်ဖူးပေမယ့် ကျားနဂါးဖိနှိပ်ခြင်းဗောဓိသတ္တ ရဲ့ နည်းစနစ်တွေကို ကိုယ်တိုင်ကိုယ်ကျ ကြုံတွေ့ခဲ့ဖူးပါတယ်။ ဒီရက်စက်တဲ့ နတ်ဘုရားဆီကနေ လွတ်မြောက်လာတာက သာမန်လူတစ်ယောက်ရဲ့ လုပ်ရပ် မဟုတ်ပါဘူး"

ဤမြောက်ပိုင်းတိုက်ကြီးမှ ကျင့်ကြံသူများတွင် နည်းလမ်းမြောက်မြားစွာ ရှိကြောင်း ရှန်းတောင် ဘိုးဘေး သိထားသော်လည်း တစ်ဖက်လူ အမှားလုပ်မိပြီး ဆုံးရှုံးမှုနှင့် ရင်ဆိုင်ရမည်ကို သူ ကြောက်ရွံ့နေဆဲပင်။

"ဟက်" အရှင် ရှုယွီ က ရယ်မောလိုက်ပြီး လှောင်ပြောင်ဟန်ဖြင့် လှမ်းကြည့်လိုက်၏။

"မင်းလည်း သူ့လက်ထဲကနေ လွတ်လာတာပဲလေ။ စီနီယာအစ်ကိုရဲ့မျက်လုံးတွေက ကန်းနေလို့ ဂျူနီယာညီလေး ရှန်းတောင် ရဲ့ ထူးခြားတဲ့ သဘာဝကို မသိမြင်နိုင်ခဲ့တာပဲ ဖြစ်ရမယ်"

"အဲဒါ... အဲဒါက မတူဘူးလေ" ရှန်းတောင် ဘိုးဘေး က အထစ်ထစ်အငေါ့ငေါ့ဖြင့် ရှင်းပြရန် လက်ကို ဝှေ့ယမ်းလိုက်သည်။

"ငါတို့ လွတ်မြောက်လာတာက..."

"စိတ်အေးအေးထားပါ၊ ငါ ဘာလုပ်နေလဲဆိုတာ ငါသိပါတယ်"

အရှင် ရှုယွီက နောက်ပြောင်ခြင်းကို ရပ်တန့်လိုက်ပြီး အင်္ကျီလက်ကို ဝှေ့ယမ်းကာ တစ်ဖက်လူ၏ စကားကို ဖြတ်လိုက်၏။

သူသည် မတော်တဆမှုများကို ဘယ်သောအခါမျှ မယုံကြည်ပေ။ သို့မဟုတ် ပို၍ တိတိကျကျ ပြောရလျှင် တစ်စုံတစ်ယောက်တွင် အမှန်တကယ် ခွန်အားရှိပါက ထိုမတော်တဆမှုများကို ဖြေရှင်းနိုင်စွမ်း ရှိရမည်ဖြစ်သည်။

ဘယ်လောက်ပဲ ပြောပြောနောက်ဆုံးတွင် ကျားနဂါးဖိနှိပ်ခြင်း ဗောဓိသတ္တ၏ နည်းစနစ်များက လုံလောက်မှု မရှိခဲ့ခြင်းသာဖြစ်၏။

ဂိုဏ်းတူတပည့်များကြားအတွင်းရေး ပဋိပက္ခတွင် ပါဝင်ပြီး အနာဂတ်ဗုဒ္ဓ၏ တပည့် ရွှေဖားပြုတ်ကိုပင် သတ်ဖြတ်ခဲ့သော်လည်း အသက်ရှင်လျက် လွတ်မြောက်ခွင့်ပြုလိုက်သည်မှာ တစ်ယောက်တည်း မဟုတ်ဘဲ သုံးယောက်တိတိ ဖြစ်နေသည်။

ဤကဲ့သို့သော စွမ်းရည်မျိုးဖြင့် ယုံကြည်ရန် အလွန် ခက်ခဲလှသည်။

သေချာပေါက်ပင် အရှင် ရှုယွီက ဤကိစ္စ၏ လေးနက်မှုကိုလည်း နားလည်ထား၏။

ဆိုးရွားလာသော အခြေအနေများကြောင့် ရွယ်တူများကြားတွင် အသေအပျောက်အချို့ မလွဲမသွေ ရှိလာမည်ကို လူတိုင်း သိထားကြသော်လည်း ထိုက်ရွှီ ဆေးဧကရာဇ်မှာ ရွယ်တူတစ်ဝက်မျှသာ သတ်မှတ်ခံရလျှင်ပင် သူဘက်က စတင်ရန် ဆိုသည်မှာ လုံးဝလက်ခံနိုင်စရာမရှိပေ။

အကယ်၍ သူ၏ ဂုဏ်သတင်းသာ ညစ်နွမ်းသွားပါက ၎င်းက သူ့ကို လူတိုင်း၏ ပစ်မှတ်အဖြစ် လွယ်ကူစွာ ပြောင်းလဲသွားစေလိမ့်မည်။

မည်သို့ပင်ဆိုစေ အထက်မှ ဖိအားများကို ခံစားပေးရန် သူ့တွင် စီနီယာအစ်မ ယိုယောင် ရှိနေသဖြင့် စိုးရိမ်ပူပန်နေရမည်မှာ အခြား မျိုးဆက်ခွဲများမှ တပည့်များသာ ဖြစ်သင့်၏။

"ကောင်းပြီ၊ မင်း သွားလို့ရပြီ။ သူ့ကို အပြင်ဖိတ်ထုတ်ပြီးတာနဲ့ ငါ့ကို ဒီမှာ လာရှာ"

အရှင် ရှုယွီက မသေမျိုးရထားလုံးကို အမိန့်ပေး၍ ကောင်းကင်မျှော်စင်တောင်သို့ ရောက်ရှိလာခဲ့သည်။

သူက ကျောက်စိမ်းပြားတစ်ချပ်ကို ပစ်ပေးလိုက်ပြီး ရှန်းတောင်ဘိုးဘေး အောက်သို့ ဆင်းသွားသည်ကို ကြည့်နေ၏။ ထို့နောက်မှသာ သူက တာအိုနယ်မြေအနီးတွင် တပ်စွဲထားသော မဟာနတ်ဆိုးကြီးအနည်းငယ်ကို ရှာဖွေရန် မှော်ရတနာလက်နက်ကို ခေါ်ယူလိုက်သည်။

လူများလျှင်အလုပ်တွင်သည် ဟု ဆိုကြသည့်စကားအတိုင်းပင်။ ထိုက်ရွှီမျိုးဆက်မှ တပည့် ထပ်မံထွက်ပြေးရန် ကြိုးစားလာပါက ကြိုတင်ကာကွယ်နိုင်ရန် အစီအရင်ကို ကြီးကြပ်ဖို့ သူက အနည်းငယ်ကို ခေါ်လိုက်ခြင်း ဖြစ်၏။

ခဏအကြာတွင်

အရှင် ရှုယွီက မသေမျိုး ရထားလုံးကို သိမ်းဆည်းလိုက်ပြီး ဂူအိမ်တော်တစ်ခုရှေ့တွင် ဆင်းသက်လိုက်သည်။

သူက မျက်မှောင် အနည်းငယ် ကြုတ်လိုက်၏။

ယခင်ကဆိုလျှင် သူ၏အငွေ့အသက်ကို ခံစားမိသည်နှင့် ဤမဟာနတ်ဆိုးကြီးများက သူ့ကို ယဉ်ကျေးစွာ ကြိုဆိုရန် ထွက်လာကြမည် ဖြစ်သော်လည်း ယနေ့တွင်မူ အဝင်ဝရောက်နေသည့်တိုင် မည်သည့် တုံ့ပြန်မှုမျှ မရှိပေ။

သူ၏ စိတ်ထဲတွင် လှုပ်ရှားသွားသည်။ အရှင် ရှုယွီ က သူ၏ကျယ်ဝန်းသော အင်္ကျီလက်စကို ပေါ့ပါးစွာဝေ့ယမ်းလိုက်ရာ သူ၏လက်ဖဝါးထဲတွင် တာအိုဓားတစ်လက်ကို ထွက်လာခဲ့၏။

သူက ဓားထဲသို့ကပ်ဘေးစွမ်းအားများ ထည့်သွင်းလိုက်ပြီး နတ်ဘုရားစွမ်းရည်တစ်ခုကို တိတ်တဆိတ်အသက်သွင်းကာ နောက်ဆုံးတွင် ပြောင်းလဲခြင်းမရှိသော အမူအရာဖြင့် ဂူအိမ်တော်ထဲသို့ ခြေလှမ်းဝင်ရောက်သွားသည်။

"..."

အရှင် ရှုယွီက ဖြည်းညှင်းစွာ ရပ်တန့်သွားပြီး ထိခိုက်ခြင်းမရှိသောပတ်ဝန်းကျင်ကို ကြည့်လိုက်၏။ သေချာစွာစုံစမ်းစစ်ဆေးပြီးနောက် တိုက်ခိုက်ထားသော အရိပ်အယောင်များကို သူ မတွေ့ရသော်လည်း နတ်ဆိုးအရှင် လေးပါးမှာမူ မည်သည့်နေရာတွင်မှ မရှိပေ။

သူ၏မျက်လုံးများတွင် နောက်ဆုံး၌ဇဝေဇဝါဖြစ်မှု အရိပ်အယောင်တစ်ခု ပေါ်လာသည်။

အမိန့်စာ မပါဘဲ ဤနေရာမှမထွက်ခွာရန် သူက ဤမဟာနတ်ဆိုးကြီးများကို တိတိကျကျ အမိန့်ပေးခဲ့ခြင်း ဖြစ်၏။

ထောင်ချောက်ဆင်ထားလော

အတွေးတစ်ချက်ဖြင့် အရှင် ရှုယွီက လှည့်ကာ ဂူအိမ်တော်ထဲမှ လျင်မြန်စွာထွက်လာခဲ့သော်လည်း သူ့ကို ဟန့်တားမည့် မည်သည့်အစီအရင်ကိုမျှ မတွေ့ရပေ။

တာအိုဓားကို ကိုင်ဆောင်ထားလျက် လွတ်ဟာနေသောကောင်းကင် ကန့်လန့်ကာကို သူ စိုက်ကြည့်နေပြီး သူ၏အသက်ရှူနှုန်းများ မြန်ဆန်လာ၏။

အချိန်အတော်ကြာပြီးနောက် သူ၏ မျက်နှာက မှောင်မိုက်သွားသည်။ နောက်ဆုံးတွင် သူက ကျယ်လောင်စွာ ကျိန်ဆဲလိုက်၏။ "ဒီယုတ်မာတဲ့ တိရစ္ဆာန်တွေ"

တိုက်ခိုက်ထားသော အရိပ်အယောင်များ မရှိသလို အခြားသူများ ဆင်ထားသော ထောင်ချောက်လည်း မရှိသဖြင့် ဖြစ်နိုင်ခြေ တစ်ခုသာ ကျန်တော့သည်။

ကပ်ဘေးစတင်ပြီးနောက် မြောက်ပိုင်းတိုက်ကြီးတွင် မဟာနတ်ဆိုးကြီးများက အလွန် ဝယ်လိုအား ကောင်းလာခဲ့ပြီး လူတိုင်းက တတ်နိုင်သရွေ့ ပိုမို စုဆောင်းလိုနေကြ၏။

ထိုရက်စက်သော တိရစ္ဆာန်များက ပိုမိုလိုချင်မက်မောကာ အခြား ယအုပ်စုတစ်ခုဆီသို့ ဘက်ပြောင်းသွားခဲ့ခြင်း ဖြစ်ရမည်။

အရှင် ရှုယွီက အသက်ပြင်းပြင်း အကြိမ်ကြိမ် ရှူလိုက်ပြီး သူ၏ ယရင်ထဲရှိ ဒေါသများကို မျိုသိပ်လိုက်၏။

အလျင်စလို လုပ်ရန် မလိုပေ။ ဤမဟာနတ်ဆိုးကြီးများကို စုဆောင်းရန်ကြီးမားသော ကြိုးပမ်းအားထုတ်မှုများ ပြုလုပ်ခဲ့ရသဖြင့် သူတို့က သေချာပေါက် ဖုံးကွယ်ထားမည် မဟုတ်ပေ။

ဧကရာဇ်ချီ ရိတ်သိမ်းရန် သူတို့ကို အပြင်သို့ စေလွှတ်လိုက်သရွေ့ နောက်ယောင်ခံလိုက်ရန် လမ်းစများရှိလာလိမ့်မည်။

သူတို့ကို မည်သည့် တပည့်များက ခေါ်ဆောင်သွားကြောင်း သိရှိသည်နှင့် ချင်းကွမ်းဂူထံမှ ခိုးယူခြင်း၏တန်ဖိုးကို သူတို့ နားလည်စေရန် သေချာပေါက်လုပ်ဆောင်လိမ့်မည်။

အရှင်ရှုယွီက ဂူအိမ်တော်ဘက်သို့ ပြန်လှည့်လိုက်ပြီး တာအိုဓားကိုစားပွဲပေါ်သို့ ပြင်းထန်စွာ ရိုက်ချလိုက်၏။