အခန်း ၃၆၄

အခန်း။ ၃၆၄

သူတို့၏ မျိုးနွယ်စုကြီးမှာ ဤခေတ်ကာလကို လွှမ်းမိုးထားသည့် အဓိကအင်အားစုတစ်ခုဖြစ်ပြီး တစ်ရက်အတွင်းမှာပင် ပျက်သုဉ်းသွားကာ ဘာမှမကျန်ရစ်တော့မည်ဟု သူတို့ လုံးဝမထင်မှတ်ထားခဲ့ကြပေ။

ချန်ကျီရှင်း၏ အကြည့်များ သူတို့ထံသို့ ရောက်ရှိလာသောအခါ စိတ်ဓာတ်ခိုင်မာမှုမရှိသူများသည် ကြောက်လန့်တုန်လှုပ်ကာ မြေပြင်ပေါ်သို့ ပြိုလဲကျကုန်ပြီး အချို့မှာ အကြောက်လွန်၍ ထိန်းချုပ်နိုင်စွမ်းပင် ပျောက်ဆုံးသွားကြသည်။

ချန်ကျီရှင်း၏ အကြည့်တို့သည် သူတို့ကို ခဏတာမျှသာ ကြည့်ရှုပြီးနောက် စီကုံးမျိုးနွယ်စု၏ နယ်မြေရှေ့တွင် တိုက်ပွဲဝင်ရန် အသင့်အနေအထားဖြင့် ရပ်နေကြသည့် နိဗ္ဗာနအဆင့်ပုဂ္ဂိုလ် ငါးပါးထံသို့ ပြောင်းလဲသွားသည်။

ဤတိုက်ပွဲတွင် ချန်ကျီရှင်းသည် စီကုံးရွှမ်းကျီနှင့် အရှင်ထျန်းလော့တို့ ဦးဆောင်သော ထိပ်တန်းနိဗ္ဗာနအဆင့်ပုဂ္ဂိုလ် ငါးဦးကို သတ်ဖြတ်ခဲ့သော်လည်း ကျန်ရှိနေသည့် အခြားနိဗ္ဗာနအဆင့် ငါးဦးမှာမူ ဒဏ်ရာရခြင်းမရှိသလောက်ပင်။

"ချန်ကျီရှင်း မင်းလို လူယုတ်မာကများ အနိုင်ရတဲ့သူက ဘုရင်ဖြစ်ပြီး အရှုံးသမားကတော့ လူဆိုးဖြစ်တာပဲ ထပ်ပြောစရာမလိုတော့ဘူး"

"ဟမ့် သတ်ချင်ရင်လည်း သတ် နှိပ်စက်ချင်ရင်လည်း နှိပ်စက်စမ်း"

"ဟားဟားဟား နှစ်ထောင်ပေါင်းများစွာ ကောင်းကင်မှာ လင်းလက်နေတဲ့ နေမင်းကြီးလို စီကုံးမျိုးနွယ်စုက မင်းလို လူယုတ်မာတစ်ယောက်လက်ချက်နဲ့ပဲ ပျက်စီးသွားရပြီပဲ"

နိဗ္ဗာနအဆင့်ရှိသူ ငါးဦးထဲမှ အချို့မှာ ဒေါသတကြီး ဟိန်းဟောက်နေကြပြီး အချို့မှာမူ ရယ်မောငိုယိုနေကာ အချို့မှာမူ တိတ်ဆိတ်စွာပင် ငေးမောနေကြသည်။

ဝူး….

အဝေးမှ လေပြေညင်းတစ်ချက် တိုက်ခတ်လာပြီး ချန်ကျီရှင်း၏ဘေးတွင် လာရောက်

ရပ်တန့်သွားသည်။

ထိုသူမှာ တစ်ဖက်တွင် မီးအိမ်တစ်ခု တစ်ဖက်တွင် မှန်တစ်ခုကို ကိုင်စွဲထားသည့် ရှေးဟောင်းအဝတ်အစားဖြင့် အကြီးအကဲတစ်ဦး ဖြစ်သည်။

နိဗ္ဗာနအဆင့်ပုဂ္ဂိုလ် ငါးဦးဖြစ်စေ၊ စီကုံးမိသားစု၏ အခြားတပည့်များဖြစ်စေ၊ ထိုအကြီးအကဲ၏ လက်ထဲတွင်ရှိသော ရှေးဟောင်းကြေးဝါမှန်ကို မြင်လိုက်ရသည့်အခါ သူတို့၏ ဝိညာဉ်များချက်ချင်းပင် ပျက်စီးသွားပြီး မျက်ဝန်းထဲမှ အရောင်အဝါတို့ ကွယ်ပျောက်သွားတော့သည်။

"ဘိုးဘေး... ကျဆုံးသွားပြီ..."

စီကုံးမိသားစုမှ အကြီးအကဲတစ်ဦးသည် ချန်ထျန်ယွမ်၏ လက်ထဲတွင်ရှိသော ကြေးဝါမှန်ကို မြင်လိုက်ရသည့်အခါ မျက်ရည်များ တပေါက်ပေါက်ကျလာသည်။

"ဘိုးဘေးက တိုက်ပွဲမှာ ကျဆုံးသွားပြီ။ ငါတို့ ဒီလောကမှာ ဘာဆက်လုပ်ဖို့ အသက်ရှင်နေရတော့မှာလဲ"

စီကုံးမျိုးနွယ်စုမှ ထိုအကြီးအကဲသည် သူ၏လက်ဖြင့် နဖူးကို ပြင်းပြင်းထန်ထန် ရိုက်ချလိုက်ပြီး ထိုနေရာမှာပင် ကိုယ့်ကိုယ်ကိုယ် အဆုံးစီရင်သွားတော့သည်။

"ဘိုးဘေး အပင်ပန်းခံပေးခဲ့တာ ကျေးဇူးတင်ပါတယ်"

ချန်ကျီရှင်းသည် ဘေးတွင်ရှိနေသော ချန်ထျန်ယွမ်ကို လှည့်ကြည့်ကာ ရိုသေစွာ ဦးညွတ်လိုက်သည်။ သူအောင့်ထားခဲ့သော အသက်ရှုသံတို့မှာလည်း အပြီးအပိုင် လွတ်မြောက်သွားတော့သည်။

ဤတိုက်ပွဲတွင် စီကုံးရွှမ်းကျီတို့နှင့် ယှဉ်ပြိုင်ရခြင်းမှာ အလွန်အရေးကြီးသော်လည်း ချန်ထျန်ယွမ်နှင့် စီကုံးချိုက်ချောင်တို့၏ အထွတ်အထိပ်တိုက်ပွဲမှာ ပို၍ပင် အရေးပါလှသည်။

ထိုတိုက်ပွဲကသာ ကံကြမ္မာကို ဆုံးဖြတ်ပေးမည့် တိုက်ပွဲဖြစ်သောကြောင့်ပင်။

"ကိစ္စမရှိပါဘူး ဒီတစ်ခါတော့ ကောင်းကင်ဘုံနတ်ဘုရားလှိုင်းသူတော်စင်နယ်မြေက အကြီးအကဲကို ကျေးဇူးတင်ရမယ်။ သူသာမကူညီခဲ့ရင် ငါ့ရဲ့ စွမ်းအားသက်သက်နဲ့ဆိုရင် စီကုံးချိုက်ချောင်ကို လွတ်မထွက်အောင်ပဲ တားဆီးနိုင်မှာဖြစ်ပြီး လုံးဝသတ်ဖြတ်နိုင်မှာ မဟုတ်ဘူး"

ချန်ထျန်ယွမ်က ပြုံးရွှင်စွာ ပြောသည်။

ထို့နောက် သူ၏အကြည့်တို့သည် ကျန်ရစ်နေသော စီကုံးမိသားစုဝင်များထံသို့ ရောက်သွားပြီး "သူတို့ကို ဘာလုပ်ဖို့ ရည်ရွယ်ထားသလဲ။ ငါ့အမြင်အရတော့ အချို့ကို ကျွန်တော်တို့ ချန်

မိသားစုအတွက် အသုံးပြုဖို့ ကျိန်စာတံဆိပ်ထိုးထားသင့်တယ်လို့ ထင်တယ်"

"မလိုပါဘူး"

ချန်ကျီရှင်းက ခေါင်းခါလိုက်ပြီး တည်ငြိမ်စွာပင် ပြောလိုက်သည်။

"အားလုံးကို သတ်ပစ်လိုက်ပါ။ အမြစ်ပြတ်အောင် ရှင်းပစ်ပြီး သူတို့ရဲ့မျိုးနွယ်စုကို ဖျက်ဆီးလိုက်ပါ။ နောင်တစ်ချိန်မှာ အန္တရာယ်မဖြစ်လာအောင် အပြီးအပိုင် ရှင်းထုတ်ရမယ်"

ထိုစကားများ ထွက်ပေါ်လာချိန်တွင် ချန်ထျန်ယွမ်မှာ ချန်ကျီရှင်းကို အံ့အားသင့်စွာဖြင့် တစ်ချက် ငေးကြည့်လိုက်သည်။

စီကုံးမျိုးနွယ်စုမှ ကျန်ရစ်သူများမှာ ထိတ်လန့်စွာ အော်ဟစ်လိုက်ကြပြီး အချို့မှာမူ ထွက်ပြေးရန် အလင်းတန်းအသွင်ဖြင့် ပျံသန်းထွက်ခွာသွားကြသည်။

"ကောင်းပြီလေ"

ချန်ထျန်ယွမ်က ခေါင်းညိတ်လိုက်သည်။

ချန်ကျီရှင်းသည် လှည့်ထွက်သွားရန် ပြင်ဆင်လိုက်စဉ်မှာပင် တစ်စုံတစ်ခုကို သတိရသွားပြီး သေခြင်းကို မကြောက်မရွံ့ ရင်ဆိုင်နေသည့် အရှင်ချင်းဟုန်ကို ကြည့်ကာ အေးစက်စက် ရယ်မောလိုက်သည်။

"ပြောရဦးမယ် ဘိုးဘေးအနေနဲ့ ဒီလူရဲ့ စွမ်းအားတွေကို ဖျက်ဆီးပေးပြီး ကျွန်တော့်ရဲ့ လက်အောက်ခံ တုကူးနီဆီကို ပို့ပေးလိုက်ပါ"

ထိုစကားကို ကြားလိုက်ရသောအခါ ခံတွင်းမှ သွေးများ စီးကျနေသော တုကူးနီသည် ရုတ်တရက် ခေါင်းမော့ကြည့်လိုက်ပြီး ချန်ကျီရှင်းကို စိုက်ကြည့်လိုက်သည်။

သူ၏ မျက်ဝန်းထဲတွင် ဖော်ပြ၍မရနိုင်သော ခံစားချက်တို့ လှုပ်ခတ်နေသည်။

အရှင်ချင်းဟုန်၏ မျက်လုံးများထဲတွင်မူ ကြောက်မက်ဖွယ်ကောင်းသော ထိတ်လန့်မှုတို့ ချက်ချင်းပင် ပေါ်ပေါက်လာတော့သည်။

စီကုံးမျိုးနွယ်စုနှင့် ပတ်သက်သည့် ကိစ္စရပ်အားလုံးကို အပြီးတိုင် ရှင်းလင်းပြီးချိန်တွင် သုံးရက်တာ ကုန်ဆုံးသွားခဲ့ပြီဖြစ်သည်။

အထွတ်အထိပ်ဘိုးဘေး ချန်ထျန်ယွမ်၏ ကိုယ်တိုင်ဆောင်ရွက်မှုကြောင့် စီကုံးချိုက်ချောင်၏ နောက်လိုက်နောက်ပါများထဲမှ တစ်ဦးတစ်ယောက်မျှ အသက်မရှင်ကျန်ရစ်ခဲ့ပေ။

ချန်ထျန်ယွမ်သည် မျိုးရိုးစဉ်ဆက် ကျိန်စာတိုက်သည့် နည်းလမ်းကိုပါ အသုံးပြု၍ အမြစ်ပြတ်ရှင်းလင်းခဲ့ရာ စီကုံးမိသားစု၏ သွေးတစ်စက်ပင် ပါဝင်နေသူမှန်သမျှ မည်မျှပင် ဝေးကွာသောနေရာတွင် ရှိနေပါစေ သွေးအိုင်များအဖြစ် ပြောင်းလဲကာ သေဆုံးသွားခဲ့ရသည်။

ထိုမျှသာမကသေးပေ။

စီကုံးမျိုးနွယ်စုနှင့် နီးကပ်စွာ ပတ်သက်ဆက်နွယ်နေသည့် ဂိုဏ်းဂဏများကိုပါ ချန်ထျန်ယွမ်က ချန်လှပ်မထားဘဲ တစ်ခုပြီးတစ်ခု အမြစ်ပြတ် ချေမှုန်းပစ်ခဲ့သည်။

သုံးရက်အတွင်းမှာပင် အရှေ့နက်နဲသောနယ်ပယ်တစ်ခုလုံးသည် ကြီးမားသော သန့်စင်ခြင်းကို ခံလိုက်ရသည့်နှယ်ဖြစ်ပြီး အလောင်းများတောင်လိုပုံကာ သွေးချောင်းများ စီးဆင်းနေသည့် မြင်ကွင်းတို့ဖြင့် ပြည့်နှက်သွားသည်။

ဤရက်စက်လှသော အသတ်အဖြတ်ကြောင့် ကမ္ဘာမြေမှာ မှောင်မိုက်သွားသကဲ့သို့ ဖြစ်ရပြီး နေနှင့်လတို့ပင် အရောင်မှိန်သွားရသည်။

အရှေ့နက်နဲသောနယ်ပယ်ရှိ ပြည်နယ်ဆယ့်သုံးခုလုံးသည် ချန်ကျီရှင်း၏ ရက်စက်ပြတ်သားသော နည်းလမ်းများကို ကြောက်ရွံ့တုန်လှုပ်နေကြသည်။

နောက်ဆုံးတွင် အမြဲတမ်း ယဉ်ကျေးသိမ်မွေ့တတ်သည့် ချန်ထျန်ချန်ပင် သည်းမခံနိုင်တော့ဘဲ ချန်ကျီရှင်းရှေ့သို့ ကိုယ်တိုင်သွားရောက်ကာ အပြစ်မဲ့သူများကိုပါ သတ်ဖြတ်ခြင်းမှ ရပ်တန့်ပေးရန် တိုက်တွန်းခဲ့သည်။

"ဘိုးဘေးက ကျွန်တော့်ကို ပြောဖူးတယ်။ အချို့ကိစ္စတွေဆိုတာ လုံးဝမလုပ်ဘဲ နေရမယ် ဒါမှမဟုတ် လုပ်မယ်ဆိုရင်လည်း အမြစ်ပြတ်အောင် လုပ်ရမယ်တဲ့"

စီကုံးမျိုးနွယ်စုနယ်မြေရှိ ခန်းမကြီးထဲတွင် အဖြူရောင်ဝတ်စုံကို ဝတ်ဆင်ထားသည့် ချန်ကျီရှင်းသည် ဆံပင်အဖြူရောင်တို့နှင့်အတူ လက်ဖက်ရည်သောက်ရင်း တည်ငြိမ်အေးဆေးစွာ ပြောလိုက်သည်။

"ဒါပေမဲ့ ကျီရှင်း... ဂိုဏ်းချုပ်ကြီးရယ် အချို့လူတွေက စီကုံးမျိုးနွယ်စုနဲ့ သွေးနှောနေရုံသက်သက်ပဲ။ သူတို့နဲ့ အဆက်အသွယ်ပြတ်သွားတာ ကြာလှပြီ။ သူတို့ကိုပါ သတ်ပစ်တာက အပြစ်မဲ့လွန်းနေသလို မဖြစ်ဘူးလား"

ချန်ထျန်ချန်သည် ချန်ကျီရှင်းရှေ့တွင် ရပ်နေရင်း လေးလံသော စကားလုံးများဖြင့် ပြောဆိုရှာသည်။

ချန်တောက်ယန်တွင် သားလေးယောက် ရှိကာ ဒုတိယသားမှာ ပျောက်ဆုံးသွားသည်မှာ ကြာပြီဖြစ်၍ သူ၏ အကျင့်စရိုက်ကို မသိရပေ။

ချန်ထျန်ရှုံမှာ ချန်တောက်ယန်နှင့် အနီးစပ်ဆုံးဖြစ်ပြီး ကမ္ဘာကိုပင် သိမ်းပိုက်နိုင်မည့် ဟန်ရှိသည်။ ချန်ထျန်လျန်မှာမူ ဓားပြတိုက်ခြင်းကို ဝါသနာပါပြီး နာမည်ပျက်သူ ဖြစ်သည်။

ချန်ထျန်ချန်တစ်ဦးတည်းသာ အင်မတန် နူးညံ့သိမ်မွေ့ပြီး မည်သူ့နှင့်မျှ မယှဉ်ပြိုင်ဘဲ နေထိုင်သူဖြစ်သည်။

"စတုတ္တ ဦးလေး တစ်ချိန်က ခမ်းနားခဲ့တဲ့ မဟာဧကရာဇ်မင်းဆက်တွေတောင် အချိန်ရဲ့လှိုင်းတံပိုးထဲမှာ ပျောက်ကွယ်သွားခဲ့တာပဲ။ ထာဝရအသက်ရှည်ခြင်းကို ရရှိထားတယ်လို့ ကြွေးကြော်ခဲ့တဲ့ အကြီးကျယ်ဆုံးသော ပုဂ္ဂိုလ်တွေတောင် အစအနမကျန် ပျောက်ကွယ်သွားခဲ့တာလေ"

"ကျွန်တော်တို့ကကော ဒီလောကမှာ အမြဲတမ်း တည်ရှိနေနိုင်မယ်လို့ ဘယ်သူက အာမခံနိုင်မှာလဲ"

"တစ်နေ့ကျရင် ကျွန်တော်တို့လည်း ဒီလောကကို စွန့်ခွာရလိမ့်မယ်။ အဲ့ဒီအချိန်ကျရင် ဒီနေ့ အသက်ရှင်ကျန်ခဲ့တဲ့ စီကုံးမျိုးနွယ်စုရဲ့ အကြွင်းအကျန်တွေက တောမီးလိုမျိုး ပြန်လည်လောင်ကျွမ်းပြီး ကျွန်တော်တို့ ဇီဝေချန်မိသားစုတစ်ခုလုံးကို ဝါးမြိုသွားနိုင်တယ်"

"ဒါကြောင့် ဒီအသတ်အဖြတ်က ကျွန်တော်တို့အတွက်တင်မကဘဲ ကျွန်တော်တို့ ဇီဝေချန်

မိသားစုရဲ့ ထာဝရအုတ်မြစ်အတွက် နောင်လာမယ့်မျိုးဆက်တွေအတွက်ပါပဲ"

"အတိုချုပ်ပြောရရင် စကားလေးခွန်းပဲရှိတယ်။ အန္တရာယ်ကို အမြစ်ပြတ်ရှင်းလင်းပါ"

ချန်ကျီရှင်းသည် လက်ဖက်ရည်ခွက်ကို ချလိုက်ပြီး ချန်ထျန်ချန်ကို စိုက်ကြည့်လိုက်သည်။

ချန်ထျန်ချန်သည် ချန်ကျီရှင်းကို ကြည့်နေရင်း စကားပြောရန် အကြိမ်ကြိမ် ဟန်ပြင်သော်လည်း နောက်ဆုံးတွင် ဘာမျှမပြောနိုင်ခဲ့ပေ။

ကြာမြင့်စွာ တိတ်ဆိတ်နေပြီးနောက် သူသည် ရှုပ်ထွေးသော အမူအရာဖြင့် နောက်ဆုံးတွင် ပြောလိုက်သည်။

"ကျီရှင်း... မင်းက တဖြည်းဖြည်းနဲ့ ဂိုဏ်းချုပ်တစ်ယောက်ရဲ့ ပုံစံမျိုး ဖြစ်လာနေပြီပဲ"

ချန်ကျီရှင်းက ခပ်ပါးပါး ပြုံးလိုက်ပြီး ပြန်မဖြေဘဲ စကားအကြောင်းအရာကို ပြောင်းလိုက်သည်။

"ဦးလေးကော"

ချန်ထျန်ချန်က ကြားလျှင် ခါးသက်သက် ပြုံးကာ ခေါင်းခါလိုက်သည်။

"ကျီရှင်းရာ မင်းဦးလေးရဲ့ စိတ်သဘောထားကို မင်းသိတာပဲ။ သူက အရမ်းမာနကြီးပြီး ယှဉ်ပြိုင်လိုသူပါ။ သူက ဘိုးဘေးကိုတောင် တည့်တည့်ရင်ဆိုင်ပြီး အပြစ်ပေးခံရတော့ ဒေါသတကြီးနဲ့ ထွက်သွားတာလေ"

"အခု မင်းအာဏာရလာတော့ သူက ဘယ်မှာ ဆက်နေပါ့မလဲ။ စီကုံးမိသားစုကိစ္စ ပြတ်တာနဲ့ သူ ထွက်သွားတော့တာပဲ"

ထိုသို့ပြောပြီးနောက် ချန်ထျန်ချန် သက်ပြင်းချလိုက်သည်။

"အင်း... သူက အပြင်လောကမှာ သူ့ကိုယ်ပိုင်လောကကို မတည်ဆောက်နိုင်မချင်းတော့ ပြန်လာမှာ မဟုတ်တော့ပါဘူး"

"အင်းပါ သူ့သဘောအတိုင်း ထားလိုက်ပါ"

ချန်ကျီရှင်းက ခေါင်းညိတ်သည်။ ယခုအခါ သူ့နှင့် ချန်ကျောက်ရှင်းကြားမှ ဆက်ဆံရေးမှာ ပုံမှန်အတိုင်း ပြန်ဖြစ်သွားပြီဖြစ်၍ ထိုဦးလေးအပေါ် မုန်းတီးမှု မရှိတော့ပေ။

သို့သော် ချန်ထျန်ရှုံမှာ မာနကြီးသူဖြစ်၍ သူ့ကို အတင်းအကျပ် ဆက်နေစေပါက ပို၍ဆိုးရွားသွားနိုင်သည်။

ထို့နောက် ချန်ထျန်ချန် လှည့်ထွက်သွားသည်။

စီကုံးမိသားစု ပျက်သုဉ်းသွားသော်လည်း လုပ်စရာကိစ္စများစွာ ကျန်ရှိနေသေးသည်။ စီကုံးမိသားစု၏ ပိုင်ဆိုင်မှုများ၊ နေရာအနှံ့ရှိ ကျောက်စိမ်းတွင်းများကို စာရင်းဇယားကောက်ယူရန်အတွက် ချန်ထျန်ချန်ကို တာဝန်ပေးလိုက်ခြင်းပင်။

ချန်ထျန်ချန် ထွက်သွားပြီးနောက် ချန်ကျီရှင်း အနားယူရန် ပြင်ဆင်နေစဉ် အပြင်ဘက်မှ အလျင်စလို ခြေသံများကို ကြားလိုက်ရသည်။

"ဂိုဏ်းချုပ်ကြီ မလုပ်သင့်ပါဘူး"

အပြင်ဘက်မှ ဝမ်းနည်းပူဆွေးသော အသံတစ်ခု ထွက်ပေါ်လာသည်။

ချက်ချင်းပင် ချန်ကျီရှင်း မော့ကြည့်လိုက်ရာ မဟူရာအကြီးအကဲက စိတ်ပျက်လက်ပျက် အမူအရာဖြင့် အပြင်ဘက်မှ ဝင်လာသည်ကို တွေ့လိုက်ရသည်။

"ဘာကိစ္စရှိလို့လဲ"

ချန်ကျီရှင်းသည် မဟူရာအကြီးအကဲကို ကြည့်ရင်း မျက်မှောင်အနည်းငယ် ကြုတ်လိုက်သည်။

မဟူရာအကြီးအကဲသည် ချန်ကျီရှင်း၏ ရှေ့တွင် တည်ငြိမ်စွာ ရပ်လိုက်ပြီး သူ့ရင်ဘတ်ကို ဖိကိုင်လျက် ပြောလိုက်သည်။

"ဂိုဏ်းချုပ်ကြီး စီကုံးရွှမ်းကျီရဲ့ မယားငယ်တွေက အရမ်းသဘောကောင်းပြီး ယဉ်ကျေးသိမ်မွေ့သူတွေပါ။ ဘာလို့ သူတို့အားလုံးကို သေဒဏ်ပေးရတာလဲ အလကားဖြစ်သွားပြီ။ တကယ့်ကို အလကားပဲ"

"အထူးသဖြင့် စီကုံးရွှမ်းကျီရဲ့ နဝမမြောက် မယားငယ်လေ။ ဂိုဏ်းချုပ်ကြီး မသိမှာစိုးလို့။ သူက အသားအရေက ဖြူဖွေးပြီး ခန္ဓာကိုယ်ကလည်း ကျောက်စိမ်းလို ချောမွေ့တာ။ ပြီးတော့... သူက အလိုရှိသလို ပုံစံပြောင်းနိုင်တဲ့ အရည်အချင်းတွေလည်း ရှိတယ်လေ"

"ဂိုဏ်းချုပ်ကြီး သူတို့ကို စိတ်မဝင်စားမှန်းတော့ သိပါတယ်။ ဒါပေမဲ့ ကျွန်တော့်ကိုသာ အပ်လိုက်ရင် ကျွန်တော် သူနဲ့ အဆင်ပြေအောင် ပေါင်းသင်းပြီး ကျွန်တော်တို့ ဇီဝေမျိုးဆက်အတွက် ကြီးမားတဲ့ အလှူဒါနတွေ ပြုလုပ်ပေးနိုင်မှာပါ..."

မဟူရာအကြီးအကဲ၏ အဆုံးမရှိသော စကားများကို မကြားရခင်မှာပင် အဓိကနေရာတွင် ထိုင်နေသော ချန်ကျီရှင်း၏ မျက်နှာမှာ ပို၍ မှောင်မိုက်လာပြီး ဒေါသကြောင့် နဖူးကြောများပင် ထောင်လာသည်။

နောက်တစ်ခဏတွင်….

"ထွက်သွားစမ်း"