အခန်း ၁၂၀၇
Vol. 104 Ch. 1207
အခန်း ၁၂၀၇
ရဟတ်ယာဉ်သည် မသေမျိုးမြူခိုးများ၏ အထက် ငါးမီတာခန့်အကွာ၌ ဝဲပျံနေ၏။
ရှောင်းယီသည် ပထမဆုံးအဖြစ် ဇစ်လိုင်းကြိုးကို ဆုပ်ကိုင်ကာ အောက်သို့ လျှောဆင်းသွားခဲ့ပြီး ကျန်းယွင်ထျန်းနှင့် ဒူခန်းတို့က နောက်မှ ထပ်ကြပ်မကွာ လိုက်ပါလာကြသည်။
“အားလုံးပဲ သတိထားကြ။ အောက်ရောက်တာနဲ့ ငါ့နောက်ကနေပဲ လိုက်ခဲ့။”
ရှောင်းယီက လျှောဆင်းနေရင်း လေးနက်သောလေသံဖြင့် ပြောလိုက်သည်။ လူတိုင်း၏ နားတွင်မူ စကားပြောစက်အသေးစားလေးများကို ချိတ်ဆွဲထားကြသည်။
“ဟုတ်ကဲ့။”
မကြာမီပင် ရှောင်းယီသည် မြေပြင်ပေါ်သို့ ခြေချမိသွား၏။ ဘေးပတ်ပတ်လည်ရှိ မသေမျိုးမြူခိုးများမှာ အလွန်ထူထပ်လှပြီး မြင်ကွင်းမှာ လုံးဝ သုညအဆင့်သို့ ရောက်ရှိနေခဲ့သည်။
သို့သော်လည်း ရှောင်းယီသည် ဘေးပတ်ဝန်းကျင်၏ အခြေအနေကို အထင်အရှား အာရုံခံနိုင်စွမ်း ရှိနေဆဲပင်။
ရုတ်တရက် ရှောင်းယီသည် ရွှမ်းယွမ်ဓား ကို ဆွဲထုတ်လိုက်ပြီး ဘေးတစ်ဖက်သို့ ထိုးနှက်လိုက်၏။
“ကလန်...”
ရှောင်းယီသည် အလွန်မာကျောသော သတ္တုတစ်တုံးကို ထိုးစိုက်မိလိုက်သကဲ့သို့ ခံစားလိုက်ရသည်။
သူသည် တစ်ချက်တည်းနှင့် အပြတ်မသတ်နိုင်ခဲ့သော်လည်း ပြိုင်ဘက်၏ တိုက်ခိုက်မှုကိုမူ အောင်မြင်စွာ ကာကွယ်တားဆီးနိုင်ခဲ့သည်။
ကျန်းယွင်ထျန်းနှင့် အခြားသူများလည်း သူ့နောက်မှ အောက်သို့ လျင်မြန်စွာ လျှောဆင်းလာခဲ့ကြသည်။
ရှောင်းယီက မည်သည့်တွန့်ဆုတ်မှုမျှမရှိဘဲ လေးနက်သောလေသံဖြင့် ပြောလိုက်၏။
“ငါ့နောက်က လိုက်ခဲ့။”
ထို့နောက် ရှောင်းယီသည် စောစောက သူ့ကို ချောင်းမြောင်းတိုက်ခိုက်ရန် ကြိုးပမ်းခဲ့သည့် မသေမျိုး မျိုးနွယ်စုဝင်ကို ဂရုမစိုက်တော့ဘဲ နောက်လှည့်ကာ မသေမျိုးမြူခိုးများ၏ အနက်ရှိုင်းဆုံးနေရာဆီသို့ ဦးတည်လျှောက်လှမ်းသွားတော့သည်။
ထိုအချိန်တွင် အခြားသူများမှာလည်း ရှေ့ကလူ၏ နောက်သို့ ထပ်ကြပ်မကွာ လိုက်ပါသွားကြရုံမှတစ်ပါး အခြားရွေးချယ်စရာ မရှိကြချေ။
မကြာမီမှာပင် ရှောင်းယီသည် မျဉ်းဖြောင့်အတိုင်း လျှောက်လှမ်းနေခြင်းမဟုတ်ကြောင်း သူတို့ သတိပြုမိသွားကြ၏။
“ကျွန်းပိုင်ရှင်ရှောင်း မင်းရဲ့ လမ်းကြောင်းက လွဲနေတာလား။”
ကျိကျိယင်းက မျက်မှောင်ကြုံ့ကာ မေးလိုက်သည်။
“ဒီလိုသွားမှ မသေမျိုးမျိုးနွယ်စုရဲ့ ကင်းလှည့်တပ်ဖွဲ့တွေကို ရှောင်ကွင်းသွားနိုင်လိမ့်မယ်။ ငါတို့မှာ ဒီနေရာမှာ အချိန်ဖြုန်းနေဖို့ အချိန်မရှိဘူး။ ဟင်းလင်းပြင် အက်ကွဲကြောင်း ရှိတဲ့နေရာကို အမြန်ဆုံး ရောက်အောင်သွားပြီး အဲ့ဒီ မဟာအကြီးအကဲ ကိုးယောက်ကို ရှာရမယ်။”
ရှောင်းယီက လေးနက်သော လေသံဖြင့် ပြန်ဖြေလိုက်သည်။ ထိုစကားကို ကြားလိုက်ရသောအခါ ကျန်ရှိနေသော မဟာမိတ်အဖွဲ့ဝင်များအားလုံး အံ့ဩတုန်လှုပ်သွားကြသည်။
“သူဌေးက ဒီအမည်းရောင်မြူခိုးတွေထဲမှာ မသေမျိုး မျိုးနွယ်စုဝင်တွေ လုံးဝမရှိသလောက် နည်းပါးတဲ့ လမ်းကြောင်းကို တကယ်ကြီး ရှာတွေ့နိုင်တာလား။”
“သူဌေး ဘယ်လိုလုပ်လိုက်တာလဲ။ ဒါက တကယ်ကို လန်းလွန်းတယ်။”
“ဒါနဲ့ သူဌေးက ဒီအမည်းရောင်မြူခိုးတွေကို ကိုင်တွယ်ဖို့ နည်းလမ်းရှိတယ်လို့ ပြောခဲ့တယ်မဟုတ်လား။ ငါတို့ ဘာလို့ ဒီမြူခိုးတွေကို တိုက်ရိုက်မရှင်းပစ်တာလဲ။ အဲ့ဒါဆို သွားရလာရတာ ပိုပြီး အဆင်မပြေသွားဘူးလား။”
“ဟုတ်တယ်။ ငါတို့တွေ အောက်တောင် ရောက်နေပြီပဲ။ ဘာလို့ ထုတ်မသုံးသေးတာလဲ။ သူဌေး... ခင်ဗျား ကျုပ်တို့ကို ညာနေတာတော့ မဟုတ်ပါဘူးနော်။”
ရှောင်းယီသည် အဖွဲ့ကို ဦးဆောင်ကာ ဘေးတစ်ဖက်သို့ လမ်းခွဲလိုက်၏။
“ငါ့မှာရှိတဲ့ အမည်းရောင်မြူခိုးတွေကို ရှင်းထုတ်မယ့် စက်က အတိုင်းအတာတစ်ခုအထိပဲ ရှင်းလင်းပေးနိုင်တယ်။ တကယ်လို့ အခုချက်ချင်း ထုတ်သုံးလိုက်ရင် မသေမျိုး မျိုးနွယ်စုရဲ့ မဟာအကြီးအကဲ ကိုးယောက်က သိသွားပြီး သတိထားသွားကြလိမ့်မယ်။ ငါ ပြိုင်ဘက်ကို အလစ်အငိုက် ဖမ်းချင်သေးတယ်။”
“ဩော်... သူဌေးက ဒါကိုပါ ကြိုတင်စဉ်းစားထားတာကိုး။ ငါ စိုးရိမ်လွန်နေမိတာပဲ။”
“သူဌေးနောက်ကို လိုက်ပြီး မစ်ရှင်လုပ်တာဆိုတော့ ငါတို့ အမိန့်ကို ကောင်းကောင်းနာခံတဲ့သူတွေပဲ လုပ်ဖို့ လိုတယ်။”
“အတိအကျပဲ။ ငါတို့လိုလူတွေက အဲ့လောက်အများကြီး တွေးနေစရာမလိုဘူး။”
ရှောင်းယီက လေးနက်သော လေသံဖြင့် ပြန်ပြောလိုက်သည်။
“အားလုံးပဲ စိတ်မပူကြပါနဲ့။ ဒီမစ်ရှင်ကို ငါကိုယ်တိုင် ဦးဆောင်နေတာဖြစ်လို့ ငါပဲ ရှေ့ကနေ စံပြအဖြစ် လုပ်ပြသွားမှာပါ။ အားလုံးပဲ သတိထားကြ။ ငါတို့ ဘယ်ဘက်ကနေ အရိုးစုကင်းလှည့်တပ်ဖွဲ့တစ်ဖွဲ့ လာနေတယ်။ သူတို့ရဲ့ အဆင့်က SS အဆင့်ပဲ ရှိသေးတယ်ဆိုပေမဲ့ စွမ်းဆောင်ရည်တွေကတော့ နှစ်ဆနီးပါး မြင့်တက်နေတယ်။”
“တကယ်လို့ စွမ်းဆောင်ရည်နှစ်ဆတက်နေတဲ့ SS အဆင့်ပဲဆိုရင်တော့ ငါတို့ ကိုင်တွယ်နိုင်ပါသေးတယ်။”
တိလင်းထျန်းရှားက ဆိုသည်။
“အားလုံးပဲ အသင့်ပြင်ထားကြ။ တိုက်ပွဲကို မြန်မြန်စပြီး မြန်မြန်အဆုံးသတ်ရမယ်။ ငါတို့မှာ အချိန်က အကန့်အသတ်ရှိတယ်။ မစ်ရှင်ကလည်း အရမ်းအရေးကြီးတယ်။”
“ဟုတ်ကဲ့။”
မကြာမီမှာပင် ဘယ်ဘက်အရပ်မှ အရိုးစုကင်းလှည့်တပ်ဖွဲ့တစ်ဖွဲ့ ပေါ်ထွက်လာခဲ့သည်။ ရှောင်းယီတို့အဖွဲ့သည် ကြိုတင်ပြင်ဆင်ထားခဲ့ကြသည့်အပြင် ရှောင်းယီ၏ တိကျသော သတိပေးချက်ကြောင့် ထိုအရိုးစုကင်းလှည့်တပ်ဖွဲ့ကို တစ်ခဏချင်းအတွင်းမှာပင် အပြတ်အသတ် ချေမှုန်းနိုင်ခဲ့ကြသည်။
“ရှေ့ကို ဆက်ပြီး ချီတက်ကြမယ်။”
ရှောင်းယီက လေးနက်သော လေသံဖြင့် အမိန့်ပေးလိုက်သည်။ လူတိုင်းက ရှောငယီ၏နောက်သို့ ဆက်လက်လိုက်ပါရင်း ရှေ့သို့ ချီတက်ခဲ့ကြ၏။
ထိုသို့ဖြင့် တစ်နာရီခန့် ကြာပြီးနောက်တွင်မူ ရှောင်းယီအပါအဝင် လူနှစ်ဆယ့်သုံးဦးပါဝင်သော အဖွဲ့သည် နောက်ဆုံး၌ ဟင်းလင်းပြင် အက်ကွဲကြောင်းနှင့် တစ်ကီလိုမီတာ အကွာအဝေးအတွင်းသို့ ချဉ်းကပ်မိသွားကြတော့သည်။
ခြောက်ကီလိုမီတာမျှသာရှိသော အကွာအဝေးကို ရှောင်းယီအပါအဝင် ဤ SSS အဆင့် ကျွမ်းကျင်ပညာရှင်အဖွဲ့ကြီးက တစ်နာရီနီးပါး ကြာအောင် လျှောက်လှမ်းခဲ့ရခြင်းဖြစ်သည်။ ဤအချက်ကပင် လမ်းခရီးတစ်လျှောက်၌ အခက်အခဲနှင့် အတားအဆီးများ မည်မျှအထိ များပြားခဲ့သည်ကို သက်သေပြနေခဲ့လေသည်။
ရှောင်းယီသည် လူတိုင်းကို ဦးဆောင်ကာ ခပ်နိမ့်နိမ့် ချိုင့်ဝှမ်းနေရာတစ်ခုကို ရှာဖွေလိုက်ပြီး တိုးညှင်းသောလေသံဖြင့် ပြောလိုက်သည်။
“ခဏနေရင် ငါ ဒီမသေမျိုးမြူခိုးတွေကို ရှင်းထုတ်ဖို့ စက်ကို စတင်လည်ပတ်တော့မယ်။ လူတိုင်း မှတ်ထားကြပါ...မြူခိုးတွေ ပျောက်ကွယ်သွားတာနဲ့ တစ်ပြိုင်နက် ငါ့ရဲ့ ညွှန်ကြားချက်ကို အာရုံစိုက်ပြီး အမြန်ဆုံး ဝင်ရောက်တိုက်ခိုက်ကြရမယ် နားလည်လား။”
လူတိုင်းက ခေါင်းညိတ်ပြလိုက်ကြပြီး လေသံတိုးတိုးဖြင့် ကတိပြုလိုက်ကြသည်။
ရှောင်းယီသည် ဘေးပတ်ပတ်လည်ရှိ အမည်းရောင်မြူခိုးများကို အကဲခတ်လိုက်ပြီးနောက် နေရာတစ်ခုဆီသို့ အလျင်အမြန် ပြေးဝင်သွားခဲ့သည်။ သူသည် ပြီးခဲ့သည့် သီတင်းပတ်ကုန်က စနစ်ဆီမှ ရရှိခဲ့သော လေထုသန့်စင် မျှခြေထိန်းစက်ကို စနစ်သိုလှောင်ခန်းထဲမှ ထုတ်ယူကာ စက်ကို စတင်လိုက်ပြီး အမြင့်ဆုံးစွမ်းအားအထိ ဖွင့်ချလိုက်တော့သည်။
စက်ပွင့်သွားသည်နှင့် ဘေးပတ်ပတ်လည်ရှိ အမည်းရောင်မြူခိုးများသည် စက်ထဲသို့ ချက်ချင်း စုပ်ယူခြင်းခံလိုက်ရပြီး သန့်စင်မျှခြေထိန်းညှိပြီးနောက် အပြင်သို့ ပြန်လည်ထုတ်လွှတ်ပေးလိုက်၏။
၎င်း၏ အရှိန်မှာ အလွန်ပင် လျင်မြန်လှသဖြင့် အမည်းရောင်မြူခိုးများမှာ သာမန်မျက်စိဖြင့် မြင်တွေ့နိုင်သော အရှိန်ဖြင့် ကျဲပါးသွားခဲ့သည်။
ထို့ပြင် ဘေးပတ်ဝန်းကျင်၏ အခြေအနေမှာလည်း ဖြည်းဖြည်းချင်း ရှင်းလင်းပြတ်သားလာခဲ့သည်။
ရှောင်းယီနှင့် အခြားသူများသည် မိမိတို့နှင့် မလှမ်းမကမ်းတွင် သစ်သားအိမ်ငယ်တစ်လုံး ရှိနေသည်ကို သတိပြုမိလိုက်ကြပြီး ပို၍ဝေးသောနေရာတွင်မူ ကြီးမားလှသော အနက်ရောင် ဟာလာဟင်းလင်းပြင် တွင်းနက်ကြီးတစ်ခုကို မြင်တွေ့လိုက်ကြရလေသည်။
ထိုအချိန်တွင် ထိုတွင်းနက်ကြီးအတွင်းမှ အမည်းရောင်အငွေ့များစွာ အဆက်မပြတ် ထွက်ပေါ်နေဆဲဖြစ်ပြီး ရံဖန်ရံခါတွင်မူ ထူးခြားဆန်းကြယ်စွာ ကြီးမားလှသော အရိုးနဂါးကြီးများ ၎င်းအတွင်းမှ လျှောက်လှမ်းထွက်ပေါ်လာတတ်သည်။
“ဒါက ဘာအခြေအနေလဲ။ ဘာလို့ မသေမျိုးမြူခိုးတွေ ပျောက်ကွယ်သွားရတာလဲ။”
ထိုအကြီးအကဲများသည် ထိတ်လန့်စွာဖြင့် ဘေးပတ်ပတ်လည်ကို ကြည့်လိုက်ကြ၏။
“ဟိုမှာ စက်တစ်လုံးရှိနေတယ်။ မြန်မြန် ဖျက်ဆီးပစ်လိုက်စမ်း။”
မဟာအကြီးအကဲသည် လေထုသန့်စင်မျှခြေထိန်းစက်ကို ချက်ချင်း သတိပြုမိသွားခဲ့သည်။
ပြိုင်ဘက်က အမှန်တကယ် စကားပြောနိုင်သည်ကို ကြားလိုက်ရသဖြင့် ရှောင်းယီသည် အနည်းငယ် ကြောင်အမ်းသွားခဲ့ပြီးနောက် ဟစ်အော်အမိန့်ပေးလိုက်၏။
“ကိုယ်ကျပ်ဝတ်စုံ ဝတ်ထားတဲ့သူတွေအားလုံး ငါနဲ့အတူလိုက်ပြီး အဲ့ဒီ မသေမျိုး မျိုးနွယ်စု အကြီးအကဲတွေကို သတ်ကြမယ်။ ကျန်တဲ့သူတွေက ဒီစက်ကို မပျက်စီးအောင် သေသေချာချာ ကာကွယ်စောင့်ရှောက်ထားကြ။”
“ဟုတ်ကဲ့။”
ထိုစက်ကို ဗဟိုပြု၍ မီတာ ၅၀၀ အတွင်းရှိ အမည်းရောင်မြူခိုးများမှာ လုံးဝနီးပါး ကွယ်ပျောက်သွားခဲ့ပြီဖြစ်ရာ ဟင်းလင်းပြင် အက်ကွဲကြောင်းနှင့် မဟာအကြီးအကဲ ကိုးယောက်စလုံးမှာ ထိုဧရိယာအတွင်း၌ ကွက်တိ ပေါ်ထွက်နေကြတော့သည်။
ရှောင်းယီသည် ကိုယ်ကျပ်ဝတ်စုံ ဝတ်ဆင်ထားသော လူကိုးဦးကို ဦးဆောင်ကာ မည်သည့်တွန့်ဆုတ်မှုမျှမရှိဘဲ မသေမျိုးမျိုးနွယ်စု၏ အကြီးအကဲ ကိုးယောက်ရှိရာဆီသို့ ချက်ချင်း ပြေးဝင်သွားတော့သည်။
ကျန်ရှိနေသောသူများမှာမူ သန့်စင်စက်၏ ဘေးတွင် ချက်ချင်း နေရာယူကာ ကာကွယ်စောင့်ရှောက်လိုက်ကြသည်။
ဤအခိုက်အတန့်တွင် ရှောင်းယီသည် မသေမျိုးမျိုးနွယ်စု၏ အကြီးအကဲ ကိုးယောက်စလုံးကို အထင်အရှား ကောင်းကောင်းမွန်မွန် မြင်တွေ့လိုက်ရပြီ ဖြစ်သည်။
“မသေမျိုးမျိုးနွယ်စု မဟာအကြီးအကဲ (SSS+ အဆင့်): စွမ်းဆောင်ရည် မြှင့်တင်ထားသော မသေမျိုး မျိုးနွယ်စု၏ အကြီးအကဲတစ်ဦးဖြစ်ပြီး စိတ်ဝိဉာည် တိုက်ခိုက်မှုများတွင် ကျွမ်းကျင်သည်။ အထူးသတိထားရမည်ဖြစ်ပြီး ခွန်အားနှင့် လျင်မြန်မှုမှာလည်း အားမနည်းပါ...”
စနစ်၏ သတိပေးချက်ကို မြင်လိုက်ရသောအခါ ရှောင်းယီက ချက်ချင်း ပြောလိုက်၏။
“အားလုံးပဲ အထူးသတိထားကြပါ။ ဒီအကြီးအကဲတွေအားလုံးက SSS+ အဆင့်တွေပဲ။ သူတို့အားလုံးက စွမ်းဆောင်ရည် မြှင့်တင်ခံထားရသလို စိတ်ဝိဉာည် တိုက်ခိုက်မှုတွေမှာလည်း အရမ်းကျွမ်းကျင်တယ်။”
ရှောင်းယီ၏ စကားကို ကြားလိုက်ရသောအခါ အားလုံး တုန်လှုပ်သွားကြသည်။
“ဒါက ငါ့အတွက် အဆင့်ကျော် စိန်ခေါ်မှု တစ်ခု ဖြစ်နေတာပေါ့။”
“ဘာလို့ ထပ်ပြီး စိတ်ဝိဉာည် တိုက်ခိုက်မှု သုံးနိုင်တဲ့ကောင်တွေ ဖြစ်နေရတာလဲ။ စိတ်ဝိဉာည် တိုက်ခိုက်မှုတွေက ကာကွယ်ဖို့ အခက်ခဲဆုံးပဲ။”
“အားလုံးပဲ စိတ်မပူကြပါနဲ့။ ငါတို့
ဝတ်ထားတဲ့ ကိုယ်ကျပ်ဝတ်စုံတွေက SSS အဆင့် စိတ်ဝိဉာည် တိုက်ခိုက်မှုတွေကို ပိတ်ဆို့နိုင်စွမ်းရှိတယ်။ ပြိုင်ဘက်က စွမ်းဆောင်ရည် မြှင့်တင်ထားတယ်ဆိုပေမဲ့ ကိုယ်ကျပ်ဝတ်စုံက တိုက်ခိုက်မှုအများစုကို ပိတ်ဆို့ပေးနိုင်တုန်းပဲ။ အဲ့ဒါကြောင့် လူတိုင်းပဲ ဒီအကြီးအကဲတွေရဲ့ အခြားတိုက်ခိုက်မှုတွေကိုပဲ အဓိကထား ကိုင်တွယ်ကြပါ။”
ရှောင်းယီက ပြောလိုက်သည်။
“ဒါဆိုရင်တော့ တော်သေးတာပေါ့။ သူဌေးရဲ့ အသုံးအဆောင်ပစ္စည်းတွေမှာ ဒီလို ထပ်ဆောင်းအကျိုးအာနိသင် ရှိလိမ့်မယ်လို့ မထင်ထားမိဘူး။ တကယ့်ကို ထူးခြားတာပဲ။”
“စကားများမနေကြနဲ့တော့။ အဲ့ဒီ အကြီးအကဲတွေရဲ့ သက်တော်စောင့်တွေ လာနေပြီ။”
တိလင်းထျန်းရှားက သတိပေးလိုက်သည်။
အမှန်ပင်... ၎င်းတို့၏ အရိုးများပေါ်တွင် ရွှေရောင်အလင်းတန်းများ စီးဆင်းနေသော လူသားပုံသဏ္ဌာန် အရိုးစုကင်းလှည့်တပ်ဖွဲ့တစ်ဖွဲ့သည် ၎င်းတို့၏ လက်ထဲ၌ လက်နက်မျိုးစုံကို ကိုင်ဆောင်ထားရင်း အတင်းတိုးဝင်လာကြ၏။
“အကြီးအကဲ သက်တော်စောင့် (SSS အဆင့်): မသေမျိုး မျိုးနွယ်စု အကြီးအကဲများ အထူးသီးသန့် သန့်စင်ပျိူထောင်ထားသော မသေမျိုး မျိုးနွယ်စုဝင်များ ဖြစ်ကြပြီး မာကျောတောင့်တင်းသော ခန္ဓာကိုယ်နှင့် အားကောင်းသော ခွန်အားကို ပိုင်ဆိုင်ထားသည်...”
“မင်းတို့တွေ ဒီအကြီးအကဲ သက်တော်စောင့်တွေကို အမြန်ဆုံး အပြတ်ရှင်းပစ်ကြပါ။ သူတို့အားလုံးက SSS အဆင့်တွေပဲ။ ငါ အဲ့ဒီ အကြီးအကဲတွေကို သွားပြီး တားဆီးထားလိုက်မယ်။”
ရှောင်းယီက လေးနက်သော လေသံဖြင့် ဆိုလိုက်သည်။
အဘယ်ကြောင့်ဆိုသော် ယခုအခိုက်အတန့်တွင် မသေမျိုး မျိုးနွယ်စု၏ အကြီးအကဲ ကိုးယောက်စလုံးသည် ဘေးဘက်ရှိ မသေမျိုးမြူခိုးများထဲသို့ အမှန်တကယ် ပြန်လည်ဆုတ်ခွာရန် ပြင်ဆင်နေကြသောကြောင့်ပင်။