အခန်း ၃၀၃

အခန်း ၃၀၃ 【နတ်ဆိုး ကတ်ပြား · ပုန်ကန်မှု】

"စကားမစပ် မင်း ဒီမှာ နေချင်ရင် နေခဲ့လို့ရတယ်။ ဒီကနေ လူတိုင်းရဲ့ လှုပ်ရှားမှုတွေကို မြင်နိုင်တယ်လေ"

လက်ရှိအခြေအနေကို လုံးဝနားမလည်နိုင်ဖြစ်နေသော ကျောက်လင်အား ထိုစကားတစ်ခွန်းသာ ချန်ရစ်ထားခဲ့ပြီးနောက်။

ရဲချီယန်က တိတ်ဆိတ်သော နေရာတစ်ခုသို့ သွားရောက်ကာ တရားသူကြီး၏ စွမ်းရည်ကို အသုံးပြု၍ ဝေါလီအား သူ၏ရှေ့မှောက်သို့ တည်နေရာရွှေ့ပြောင်းလိုက်လေ၏။

စက်ရုပ်ငယ်လေးက သူ၏လက်များကို ဝှေ့ယမ်းပြကာ ရဲချီယန်၏ ဘောင်းဘီစကို ဖွဖွလေး အကြိမ်အနည်းငယ် ဆွဲလိုက်လေသည်။

သူ၏ အခြားစက်ယန္တရား လက်တံကတော့ လမ်းကြောင်းတစ်ခုဆီသို့ ညွှန်ပြနေပေသည်။

"အဲဒီနေရာလား"

"ကောင်းပြီ သွားကြတာပေါ့"

ရတနာသေတ္တာကိုတော့ ကျောက်လင်က ကံကောင်းထောက်မစွာဖြင့် ရှာတွေ့သွားခဲ့ပြီဖြစ်သည်။

ထို့ကြောင့် ဤမှတ်တိုင်အတွက် ဝေါလီ ရှာဖွေတွေ့ရှိနိုင်သော ရတနာမှာ ထိုအမည်မသိ နတ်ဆိုး ကတ်ပြားပင် ဖြစ်ကြောင်း ယုံမှားသံသယဖြစ်ဖွယ် မရှိတော့ချေ။

ဝေါလီက ရှေ့မှ လမ်းပြပေးလေ၏။

ထိုနေရာသို့ သွားရာလမ်းတွင် ကံဆိုးနေသော ရထားမောင်းနှင်သူ အနည်းငယ်နှင့် မထင်မှတ်ဘဲ ဆုံတွေ့ခဲ့ရပေသည်။

ရဲချီယန်နှင့် သူ့နောက်မှ နတ်ဆိုးများ၊ စက်ယန္တရားများကို မြင်လိုက်ရသောအခါ သူတို့၏ တုံ့ပြန်မှုများက ကွဲပြားခြားနားနေကြ၏။

အချို့က ကြောက်လန့်တကြားဖြစ်နေကြပြီး အချို့ကမူ သူ့ကို ချုံခိုတိုက်ခိုက်ရန် ထောင်ချောက်များ ဆင်ထားကြကာ အချို့ကတော့ ကမန်းကတန်း ထွက်ပြေးသွားကြလေတော့သည်။

သို့သော်လည်း သူတို့၏ ဇာတ်သိမ်းများမှာတော့ ချွင်းချက်မရှိ အားလုံး သတိလစ်မေ့မြောသွားခြင်းဖြင့်သာ အဆုံးသတ်သွားခဲ့ရပေသည်။

အို တကယ်တမ်းကျတော့ ချွင်းချက်တစ်ခု ရှိခဲ့လေ၏။

ရဲချီယန်ကို ချုံခိုတိုက်ခိုက်ရန် ထောင်ချောက်ဆင်ခဲ့သော ကောင်မှာ မျက်ရည်နီက ထောင်ချောက်ကို ဖြတ်တောက်လိုက်စဉ်မှာပင် အခုတ်ခံလိုက်ရခြင်းဖြစ်သည်။ တစ်နည်းအားဖြင့် ပြောရလျှင် ထိုသည်ကလည်း သတိလစ်သွားခြင်းတစ်မျိုးဟု ဆိုနိုင်သော်လည်း ဘယ်တော့မှ ပြန်မနိုးလာနိုင်တော့သည့် အမျိုးအစားပင်။

"တော်တော်လေး ခေါင်တဲ့နေရာပဲ"

ဝေါလီ၏ လမ်းပြမှုအောက်တွင် ရဲချီယန်သည် ရဲတိုက်အပြင်ဘက်ရှိ ချောက်ကမ်းပါးထိပ်သို့ ရောက်ရှိလာခဲ့လေ၏။

အောက်ဘက်တွင်တော့ ရေလှိုင်းများက ကြမ်းတမ်းစွာ ရိုက်ခတ်နေကြသည်။

သာမန်လူတစ်ယောက်သာ အောက်သို့ ပြုတ်ကျသွားခဲ့လျှင် ချက်ချင်းပင် မျိုချခံလိုက်ရဖို့သာ ရှိပေသည်။

"ချောက်ကမ်းပါးပေါ်မှာလား"

"စောစောက မင်း ဘယ်လိုဆင်းသွားခဲ့တာလဲ"

ရဲချီယန်က ဝေါလီ၏ ခေါင်းကို ပုတ်ကာ မေးလိုက်ရာ စက်ရုပ်ငယ်လေးက မလှမ်းမကမ်းရှိ ချောိစိစိဖြစ်နေသော နွယ်ပင်တစ်ခုကို လက်ဖြင့် ညွှန်ပြလေ၏။

"မင်း တကယ်ပဲ ပင်ပန်းသွားခဲ့ပြီ"

တရားသူကြီး၏ စွမ်းရည်ကိုသာ အသုံးမပြုနိုင်ခဲ့လျှင် ဤကဲ့သို့သော အခြေအနေမျိုး၌ ဝေါလီတစ်ကောင်တည်း ရထားပေါ်သို့ ပြန်ရောက်ရန်ဆိုသည်မှာ လုံးဝ မဖြစ်နိုင်သလောက်ပင်။

သူက မေးထရစ်ထဲမှ ရထားကို ချောက်ကမ်းပါးစွန်းတွင် ချထားလိုက်လေသည်။

ချက်ချင်းဆိုသလိုပင်။

"ကောင်းကင်ကြယ်တံခွန် မောင်းနှင်မှု"

မျက်မှန်ကို တပ်ဆင်လိုက်သည်နှင့် ရဲချီယန်၏ ပတ်ပတ်လည်တွင် အနီရောင် အလင်းတန်း အပိုင်းအစများနှင့် ဓာတ်ငွေ့များ ပန်းထွက်လာလေတော့သည်။

သူက ဝေါလီကို ဆွဲကိုင်ကာ အောက်သို့ ခုန်ချလိုက်လေ၏။

ပင်လယ်ရေပြင်နှင့် ထိခါနီးဆဲဆဲတွင် အပေါ်သို့ အရှိန်မြှင့်တင်လိုက်ရာ မျက်စိတစ်မှိတ်အတွင်းမှာပင် ကောင်းကင်ယံသို့ ပျံတက်သွားခဲ့ချေပြီ။ ဤနေရာတွင် သူ၏လက်ထဲ၌ ကိုင်ထားသော ဝေါလီက သူ၏ စက်ယန္တရား လက်တံများကို အဆက်မပြတ် ဝှေ့ယမ်းကာ လမ်းကြောင်းတစ်ခုဆီသို့ ညွှန်ပြနေပေသည်။

လျှပ်စီးတစ်ချက် လက်သွားလေ၏။

ထိုချောက်ကမ်းပါး နံရံပေါ်တွင် သေသေချာချာ မမြင်ရဘဲ ထောက်လှမ်းသိရှိရန် အလွန်ခက်ခဲလှပေသည်။

"တကယ်ကို သေချာဖွက်ထားတာပဲ။ ဝေါလီသာ မရှိခဲ့ဘူးဆိုရင် ဘယ်သူကများ ဒီနေရာကို ရှာတွေ့နိုင်မှာလဲ"

ရဲချီယန်က တုံ့ဆိုင်းမနေဘဲ ထိုနေရာအတွင်းသို့ ပျံသန်းဝင်ရောက်သွားလေသည်။

အမှောင်အတိ ကျနေသော လိုဏ်ဂူအတွင်း၌ သန့်စင်သော မြေစွဲကျောက်တုံး၏ အလင်းရောင်က တစ်နေရာလုံးကို လင်းထိန်သွားစေ၏။

သူက ကောင်းကင်ကြယ်တံခွန် မောင်းနှင်မှုကို ရပ်တန့်လိုက်သည်။

ရဲချီယန် အထဲသို့ ဝင်ရောက်ရန် ပြင်လိုက်ချိန်မှာပင် အီဗ်၏ အဖြူရောင် ပုံရိပ်လေးက အပြင်ဘက်မှ ပျံသန်းဝင်ရောက်လာလေသည်။

"မင်းက ဘာလို့ နောက်ကနေ လိုက်လာရတာလဲ။ ထားပါတော့ ရောက်လာမှတော့လည်း"

ရဲချီယန်က သန့်စင်သော မြေစွဲကျောက်တုံးကို အီဗ်၏ ခေါင်းပေါ်သို့ ပစ်တင်ပေးလိုက်လေ၏။

အီဗ်က ပျော်ရွှင်စွာဖြင့် လေထဲတွင် ဝဲပျံနေကာ တောက်ပပြီး နူးညံ့သော လွင့်မျောမီးအိမ်လေးသဖွယ် ဖြစ်နေလေတော့သည်။

အတွင်းဘက်သို့ ဆက်လက် ဝင်ရောက်လာခဲ့သည်။

လိုဏ်ဂူ၏ အနက်ပိုင်းသို့ ရောက်လာလေလေ အပူချိန်က ပိုပိုပြီး ကျဆင်းလာလေလေဖြစ်ကာ အချိန်တစ်ခုအရောက်တွင် ရေခဲမှတ်အောက်သို့ပင် ကျဆင်းသွားခဲ့ပြီဖြစ်ပုံရ၏။

"တော်တော်လေး အေးတာပဲ။ စဉ်းစားကြည့်တော့ ငါ့ဆီမှာ အအေးဒဏ်ကို ကာကွယ်ပေးနိုင်မယ့် ပစ္စည်းတစ်မျိုး တကယ် လိုအပ်နေတာပဲ"

အတွင်းဘက်နှင့် အောက်ဘက်သို့ ဆင်းသက်လာရင်း ရဲချီယန်က သူ၏ အိတ်ဆောင်နာရီပေါ်ရှိ အချိန်ကို တစ်ချက် ကြည့်လိုက်လေသည်။

မိနစ် လေးဆယ်။

သူတို့ ဒီနေရာမှာ လမ်းလျှောက်နေခဲ့တာ မိနစ် လေးဆယ် ရှိသွားခဲ့ချေပြီ။

သူတို့၏ အမြန်နှုန်းအရ အနည်းငယ် တွက်ချက်ကြည့်မည်ဆိုလျှင်။

သူတို့သည် ပင်လယ်ရေမျက်နှာပြင်အောက် ရောက်ရှိနေလောက်ပြီ ဖြစ်သည်။

တိုးတိုးတိတ်တိတ် ရေရွတ်သံများ

ဂနာမငြိမ်မှုများ

ပိုမိုကျယ်ဝန်းနက်ရှိုင်းလာသော ဤလိုဏ်ဂူထဲတွင် ရှင်းပြ၍မရနိုင်သော အသံများက ရံဖန်ရံခါ ပဲ့တင်ထပ်နေလေ၏။

ဒါက နတ်ဆိုး ကတ်ပြားရဲ့ လွှမ်းမိုးမှုများလား။

အောက်သို့ နောက်ထပ် အောက်ဘက်သို့။

ရဲချီယန်၏ ရှေ့မှောက်၌ ဧရာမ နေရာလွတ်ကြီးတစ်ခု ပေါ်လာသောအခါ။

သူ မြင်တွေ့လိုက်ရလေပြီ။

၎င်းက ထိုနေရာ၌ပင် ရှိနေပေသည်။

နံရံများတွင် မြှုပ်နှံထားသော မရေမတွက်နိုင်သည့် တောက်ပသော ကျောက်မျက်ရတနာများ၏ အလင်းရောင်များကြားရှိ အလင်းဖောက်ထွင်းနိုင်သော အကာအကွယ်တစ်ခု အတွင်း၌။

ပြောင်းပြန် ခရစ်ယာန်လက်ဝါးကပ်တိုင် ယဇ်ပလ္လင်တစ်ခုက မားမားမတ်မတ် ရပ်တည်နေလေ၏။

"နောက်ဆုံးတော့လည်း ရှာတွေ့ခဲ့ပြီပဲ"

ရဲချီယန်သည် ယဇ်ပလ္လင် အကာအကွယ်၏ အစွန်းတွင် ရပ်လိုက်သည်။

သူက ထိတွေ့ရန် လက်လှမ်းလိုက်လေ၏။

ရင်းနှီးနေသော ခံစားချက်တစ်ခုက တစ်ဖန် ပြန်လည်ပေါ်ပေါက်လာခဲ့ပေသည်။

"ဝှူး"

တိုးတိုးတိတ်တိတ် ရေရွတ်သံများက ပို၍ပို၍ ရှင်းလင်းလာလေ၏။

ရဲချီယန်က သူ၏ လက်နှစ်ဖက်ဖြင့် ဝေါလီနှင့် အီဗ်တို့၏ ခေါင်းများကို အသီးသီး ပုတ်ပေးလိုက်သည်။

"အီဗ် မင်း ဒီကိုလာတဲ့လမ်းကို မှတ်မိသေးတယ်မလား"

အီဗ်က ခေါင်းညိတ်ပြလေ၏။

"ဝေါလီကို ခေါ်သွားပြီး ရထားပေါ်မှာ ငါ့ကို စောင့်နေလိုက်"

သူ၏ လက်ဖဝါးထဲတွင် နေရာရွှေ့ပြောင်းအမှတ်အသား ထွက်ပေါ်လာလေသည်။

"နေရာအတည်ပြုပြီးပြီ အမှတ်အသားချထားလိုက်"

စွမ်းရည်ကို အသုံးပြုလိုက်သည်နှင့် အကာအကွယ်အတွင်း၌ အမှတ်အသားနေရာ တစ်ခု ထွက်ပေါ်လာလေ၏။

ထို့နောက်။

"စတင်ရွှေ့ပြောင်းမယ်"

မျက်လုံးများကို မှိတ်လိုက်ကာ နောက်သို့ မှီချလိုက်လေသည်။

ရေနစ်နေသကဲ့သို့။

ရေအောက်မှ လုံ့ပိတ်နေသော အသံတစ်ခုကဲ့သို့ ခွဲခြား၍မရနိုင်သော တိုးတိုးတိတ်တိတ် ရေရွတ်သံများက ရဲချီယန်၏ နားထဲတွင် ရစ်ဝဲနေလေ၏။

မျက်လုံးများ ပြန်ဖွင့်လိုက်ချိန်တွင်မူ သူသည် အကာအကွယ်အတွင်းသို့ ရောက်ရှိနေခဲ့ချေပြီ။

"မင်းတို့တွေ အရင်သွားနှင့်ကြ"

အမိန့်ပေးလိုက်သည်နှင့် အီဗ်က ဝေါလီကို ပွေ့ချီကာ ဤနေရာမှ တုံ့ဆိုင်းတုံ့ဆိုင်းဖြင့် ထွက်ခွာသွားလေတော့သည်။

ဗလာကျင်းနေသော ဧရာမ မြေအောက်ကမ္ဘာကြီးထဲတွင် ရဲချီယန် တစ်ယောက်တည်းသာ ကျန်ရစ်ခဲ့ပေသည်။

လုပ်စရာ တခြားဘာမှ မရှိတော့၍လည်း ဖြစ်ကောင်းဖြစ်နိုင်ပေ၏။

သူက လှေကားထစ်များကို တက်လှမ်းနေရင်း စိတ်ထဲမှ တိတ်တဆိတ် ရေတွက်နေလိုက်သည်။

"၇၇၆... ၇၇၇..."

သူသည် လှေကားထစ် ခုနစ်ရာ့ခုနစ်ဆယ့်ခုနစ်ထစ်ကို ဖြတ်ကျော်ကာ အထွတ်အထိပ်သို့ တက်ရောက်လာခဲ့လေ၏။

ပြန့်ပြူးပြီး ဗလာကျင်းနေသော ယဇ်ပလ္လင်ပေါ်တွင်တော့ ယခင်က သူရရှိခဲ့ဖူးသော နတ်ဆိုး ကတ်ပြားများကဲ့သို့ပင် တစ်ပုံစံတည်း တူညီနေပေသည်။

လူတစ်ရပ်ထက် ပိုမိုမြင့်မားသော ပြောင်းပြန် ခရစ်ယာန်လက်ဝါးကပ်တိုင်ကြီးတစ်ခုက အလယ်ဗဟိုတည့်တည့်၌ ရှိနေလေ၏။

ရဲချီယန်က ပါးပြင်များကို ပုတ်ကာ အသက်ပြင်းပြင်းရှူလိုက်ပြီးနောက် ရှေ့သို့ တည့်တည့်မတ်မတ် လျှောက်သွားလိုက်သည်။

သူ ဤနေရာသို့ ရောက်ရှိသွားချိန်မှာပင် လုံးဝအသစ်စက်စက် နတ်ဆိုး ကတ်ပြား တစ်ကတ်က ထိုနေရာ၌ တိတ်ဆိတ်စွာ ဝဲပျံနေပေသည်။

ဤနတ်ဆိုး ကတ်ပြားပေါ်တွင်တော့ မြေပြင်၌ ဒူးထောက်ကာ ဆုတောင်းရန် ခေါင်းငုံ့နေသော အမျိုးသမီး နတ်ဆိုးတစ်ကောင်ကို ပုံဖော်ထားပြီး သူမ၏ မျက်နှာကို ခေါင်းစွပ်ဖြင့် ဖုံးကွယ်ထားလေ၏။ လည်ပင်းတွင် သံကြိုးတစ်ချောင်း ချည်နှောင်ထားကာ ထိုသံကြိုး၏ အခြားတစ်ဖက်စွန်းကို လေထဲတွင် ဝဲပျံနေသော နတ်ဆိုးဦးချိုများပါရှိသည့် ပြောင်းပြန် ခရစ်ယာန်လက်ဝါးကပ်တိုင်တစ်ခုအပြင် ၎င်းပေါ်တွင် ချိတ်ဆွဲထားသော အနက်ရောင် သရဖူတစ်ခုနှင့် ချိတ်ဆက်ထားပေသည်။

၎င်းမှာ နတ်ဆိုး ကတ်ပြား၏ အပေါ်ဘက် အရောင်ပါသော အပိုင်းသာဖြစ်လေ၏။

အောက်ဘက်တစ်ဝက်မှာတော့ အဖြူအမည်း သက်သက်သာ ဖြစ်နေပေသည်။

အဖြူအမည်း အရောင်များကြားတွင် နတ်ဆိုးမှာ ဆုတောင်းနေသော သီလရှင်တစ်ပါးအဖြစ်သို့ ပြောင်းလဲသွားကာ ပြောင်းပြန် ခရစ်ယာန်လက်ဝါးကပ်တိုင်မှာလည်း မတ်မတ်ဖြစ်သွားခဲ့ပြီး တစ်ခုတည်းသော ပြောင်းလဲမှုမရှိဘဲ ကျန်ရစ်နေသည့်အရာမှာ ၎င်းပေါ်ရှိ သရဖူသာဖြစ်လေတော့သည်။

ရဲချီယန်၏ နှလုံးခုန်သံများ မြန်ဆန်လာသည်ကို ခံစားလိုက်ရ၏။

သူ၏ လက်က ရှေ့သို့ ဖြည်းညင်းစွာ ရွေ့လျားသွားလေသည်။ ဤနတ်ဆိုး ကတ်ပြားနှင့် ပိုမိုနီးကပ်လာလေလေ ပတ်ဝန်းကျင်ရှိ နယ်ပယ်များက ပို၍ပို၍ နိမ့်ကျလာလေလေဖြစ်ပေသည်။

နောက်ဆုံးတွင်။

ထိတွေ့လိုက်သည်၊

မျက်စိတစ်မှိတ်အတွင်းမှာပင် သူသည် မယုံနိုင်လောက်အောင် ဧရာမကြီးမားလှသော နန်းတော်ကြီးတစ်ခုဆီသို့ ရောက်ရှိသွားသကဲ့သို့ ခံစားလိုက်ရပြီး ကောင်းကင်ယံ၌ အနက်ရောင် သရဖူတစ်ခု ထွက်ပေါ်လာလေ၏။

ထိုသရဖူက သူ့လက်ထဲသို့ ရောက်ရှိလာသည်အထိ ဖြည်းညင်းစွာ ဆင်းသက်လာခဲ့သည်။

သူ့အား ထိုသရဖူကို ခေါင်းပေါ်၌ ဆောင်းစေချင်နေသည့်အလားပင်။

သို့သော်လည်း ယခုအချိန်လေးမှာပင်။

ချောက်ကမ်းပါးစွန်းတွင်ရှိနေသော မျက်ရည်နီ၊ ကြိုတင်သတိပေးသူနှင့် လောဘတကြီး စားသောက်ခြင်း တို့အားလုံးမှာ သူတို့၏ ကတ်ပြား အစီအစဉ် ပုံစံများအဖြစ်သို့ ပြောင်းလဲသွားကာ ရဲချီယန်၏ ဘေးတွင် ချက်ချင်း ထွက်ပေါ်လာကြလေ၏။

မာနတရား နှင့် ဖြားယောင်းသွေးဆောင်ခြင်း တို့လည်း အတူတကွ ပါဝင်လာပေသည်။

ယခုအချိန်တွင် နတ်ဆိုးများအားလုံးက ရဲချီယန်၏ ပတ်ပတ်လည်၌ ဝဲလည်နေကြလေတော့သည်။

အထူးသဖြင့် မျက်ရည်နီပင်။

သူမက အလယ်ဗဟိုတည့်တည့်၌ ရှိနေပြီး သူမထံမှ ထွက်ပေါ်လာသော မျက်စိကျိန်းမတတ် အနီရောင်အလင်းတန်းက ရဲချီယန် ထိတွေ့နေသော နတ်ဆိုး ကတ်ပြားအား အဆက်မပြတ် တုန်ခါသွားစေလေ၏။

တစ်ချိန်တည်းမှာပင် ရဲချီယန်၏ ရင်ဘတ်ပေါ်၌ အိပ်မောကျနေခဲ့သော အိပ်မက်စားသုံးသူ ကလည်း ရုတ်တရက် နိုးထလာခဲ့ပေသည်။

၎င်းက ရဲချီယန်၏ အသားအရေကို ဖွဖွလေး ကိုက်လိုက်လေ၏။

ထိုအတုအယောင် အိပ်မက်ထဲတွင် ရဲချီယန်၏ ခေါင်းပေါ်သို့ အချိန်မရွေး တင်ခံရတော့မည့်အလား ဖြစ်နေသော သရဖူကြီးမှာ သူ၏ ကိုယ်ပိုင်လက်ဖြင့်ပင် ချေမွခံလိုက်ရလေတော့သည်။

ပတ်ဝန်းကျင်ရှိ မြင်ကွင်းက ချက်ချင်းပင် ပျောက်ကွယ်သွားလေ၏။

ရဲချီယန်၏ လက်ထဲမှ တောက်ပသော အပြာရောင် အလင်းတန်းတစ်ခုက နတ်ဆိုး ကတ်ပြား တစ်ခုလုံးကို ရစ်ပတ်သွားခဲ့ချေပြီ။

ချက်ချင်းဆိုသလိုပင် ဤနတ်ဆိုး ကတ်ပြားသည် အမှန်တကယ်ပင် ကွဲအက်သွားကာ ယခုအချိန်၌ ပြန်လည်ဖွဲ့စည်းခြင်းကို စတင်နေလေတော့သည်။

ပြန်လည်ဖွဲ့စည်းခြင်း ပြီးဆုံးသွားသောအခါ။

ယခုအချိန်၌ စနစ်၏ အလင်းမျက်နှာပြင် ထွက်ပေါ်လာလေ၏။

၎င်းပေါ်တွင်။

အကဲဖြတ်မှု အချက်အလက် စာကြောင်းအသစ်တစ်ခု ပေါ်လာပေသည်။

【နတ်ဆိုး ကတ်ပြား · #￥%】

【အကဲဖြတ်မှု အမှားအယွင်း၊ ပြန်လည် အကဲဖြတ်နေပါသည်】

【ဒင် အကဲဖြတ်မှု အောင်မြင်ပါသည်】

【နတ်ဆိုး ကတ်ပြား · ပုန်ကန်မှု】