အခန်း ၃၀၄

အခန်း ၃၀၄။ ပုန်ကန်မှု နတ်ဆိုး

【နတ်ဆိုး ကတ်ပြား · ပုန်ကန်မှု】

【ပေါင်းစည်းခြင်း။ နတ်ဆိုးနှင့် ပေါင်းစည်းခြင်း】

【စိုက်ကြည့်ခြင်း။ ပုန်ကန်မှုကို စိုက်ကြည့်ခြင်း】

【...။ နတ်ဆိုး ကတ်ပြား ဖျက်ဆီးယိုယွင်းခြင်းမှ အမည်မသိစွမ်းရည်တစ်ခုဖြင့် ချေမွကာ အသွင်ပြောင်းလဲထားသော ပြိုင်ဘက်ကင်း တစ်ခုတည်းသော နတ်ဆိုး ကတ်ပြား】

【???။ "ဖျက်ဆီးယိုယွင်းခြင်း" က ကတ်ပြားပိုင်ရှင်ကို နတ်ဆိုးဘုရင်၏ပုံစံအား ရယူနိုင်စေမည့် အထူးစွမ်းရည်တစ်ခု ပေးအပ်ရန်ဖြစ်သည်။ ယခုအခါတွင်တော့ ၎င်းက ထွက်ပေါ်လာမည်မဟုတ်ပေ။ အကြောင်းမူကား သင်က အသွင်ပြောင်းရန်မလိုဘဲ နတ်ဆိုးများ၏ ဘုရင်တစ်ပါး ဖြစ်နေပြီးသားမို့ပင်။ သင်က နတ်ဆိုးတွေရဲ့ သစ္စာခံမှုကို တကယ်ပဲ ပိုင်ဆိုင်ထားတာလား】

【ဘယ်လို ထူးဆန်းတဲ့ သစ္စာခံမှုမျိုးလဲ...】

【XXX။ ပေါင်းစည်းခြင်း။ သင်ပိုင်ဆိုင်ထားသော မည်သည့် နတ်ဆိုးစွမ်းရည်ကိုမဆို အသုံးပြုနိုင်ပါသည်】

【XXX။ စိုက်ကြည့်ခြင်း။ ပုန်ကန်မှု နတ်ဆိုးအား ဆင့်ခေါ်ပါသည်】

ပုန်ကန်မှုတဲ့လား။ ဒါက ဒီနတ်ဆိုး ကတ်ပြားရဲ့ နာမည်ပေါ့လေ။

"မူလက ဖျက်ဆီးယိုယွင်းခြင်း ဖြစ်နေရမှာလား။ ဘာတွေများ ဖြစ်ကုန်တာလဲ"

ရဲချီယန်က ဤနတ်ဆိုး ကတ်ပြားကို ထိတွေ့ပြီးနောက် ဖြစ်ပျက်ခဲ့သမျှ အရာအားလုံးကို သေသေချာချာ ပြန်လည်စဉ်းစားကြည့်လိုက်လေ၏။

ထိုအိပ်မက်ကဲ့သို့သော အခြေအနေမျိုးတွင် ရှိနေစဉ်... သူ၏ ပါရမီဖြစ်သော အဆင့်မြင့် အသွင်ကူးပြောင်းခြင်း စွမ်းရည်ကို မသိလိုက်မသိဘာသာ အသုံးပြုမိသွားခဲ့ပုံရပေသည်။

ပစ်မှတ်က ဤနတ်ဆိုး ကတ်ပြား ဖြစ်နေခဲ့သည်လား။ ဒါက တော်တော်လေး ထူးဆန်းနေချေပြီ။

သူက အခြားနတ်ဆိုး ကတ်ပြားများကို ခေတ္တမျှ စမ်းသပ်ကြည့်လိုက်သော်လည်း ၎င်းတို့မှာ အဆင့်မြင့် အသွင်ကူးပြောင်း၍မရနိုင်သော အခြေအနေ၌ပင် ရှိနေဆဲဖြစ်သည်။ စမ်းသပ်ရန် အခွင့်အရေး မရရှိမီ မည်သည့်အဆင့်အထိ တိုးတက်ရန် လိုအပ်နေသေးသည်ကို သူမသိနိုင်သေးချေ။

သို့သော်လည်း။

ရဲချီယန်က သူ၏ ကိုယ်ရေးအချက်အလက်ကို ဆွဲဖွင့်ကြည့်လိုက်လေ၏။

【ကိုယ်ခံစွမ်းအား။ ၁၆၄】 【စိတ်စွမ်းအား။ ၂၀၉ (အမှန်နှင့် အတုအယောင်ကို မျက်မြင်တွေ့ရှိခြင်း)】

ကိုယ်ခံစွမ်းအား လျော့ကျသွားရခြင်းမှာ လှေကားထစ်များကို တက်လာခဲ့သောကြောင့် ဖြစ်နိုင်သော်လည်း စိတ်စွမ်းအားကတော့...

ယခင်က သူ၏ စိတ်စွမ်းအားမှာ အမြင့်ဆုံး ပမာဏတွင်ရှိနေခဲ့ကြောင်း ရဲချီယန် အတိအကျ မှတ်မိနေပေသည်။

တစ်နည်းအားဖြင့် ပြောရလျှင် ယခုလေးတင် သူ၏ စိတ်စွမ်းအား တစ်မှတ် သုံးစွဲခံလိုက်ရခြင်းပင်။

ထိုတစ်မှတ်တည်းသော စိတ်စွမ်းအားက 【ဖျက်ဆီးယိုယွင်းခြင်း】 ဟု အမည်တွင်ရမည့် နတ်ဆိုး ကတ်ပြားကို 【ပုန်ကန်မှု】 အဖြစ်သို့ ပြောင်းလဲသွားစေခဲ့ခြင်းလား။

"မင်း တစ်ခုခု လုပ်လိုက်တာလား"

သူက အဝတ်အစားများကို ပင့်တင်ကြည့်လိုက်လေ၏။

သေးငယ်သော အိပ်မက်စားသုံးသူ လောက်ကောင်လေးမှာ သူ၏ ရင်ဘတ်ပေါ်၌ အားအင်ကုန်ခမ်းနေဟန်ဖြင့် ခွေခွေလေး လဲလျောင်းနေပေသည်။ ကြောက်မက်ဖွယ်ကောင်းသော တိုက်ပွဲတစ်ခုကို ဆင်နွှဲထားခဲ့ရသည့်အလားပင်။ ၎င်းက ရဲချီယန်၏ အဝတ်အစားများကို ဖွဖွလေး ကိုက်ဆွဲပြီးနောက် နှစ်နှစ်ခြိုက်ခြိုက် အိပ်မောကျသွားလေတော့သည်။

【အိပ်မက်စားသုံးသူ လောက်ကောင် (အိပ်မောကျနေသည်)】

【၎င်း၏ စွမ်းအားအားလုံး ကုန်ခမ်းသွားပါပြီ။ ပို၍အနားယူပါက ပိုမိုမြန်ဆန်စွာ နာလန်ထူလာပါလိမ့်မည်】

"...ထင်ထားတဲ့အတိုင်းပဲ အိပ်မက်စားသုံးသူကြောင့်များလား"

ရဲချီယန်က အသက်ပြင်းပြင်း တစ်ချက်ရှူသွင်းလိုက်လေ၏။

သူ၏ ပတ်ပတ်လည်တွင် ဝဲလည်နေဆဲဖြစ်သော နတ်ဆိုး ကတ်ပြားများကို ကြည့်ရှုရင်း ပုန်ကန်မှု ဟု အမည်ရသော နတ်ဆိုးကိုလည်း စက်ဝိုင်းထဲသို့ ထည့်သွင်းလိုက်ပေသည်။

"ရွှေ့ပြောင်းခြင်းက စွမ်းရည်စောင့်ဆိုင်းချိန် ရှိနေသေးတာဆိုတော့ ဒီနေရာမှာပဲ သူ့ရဲ့ စွမ်းအားကို စမ်းသပ်ကြည့်လိုက်တာ ကောင်းမယ်"

"ပထမတစ်ခုကနေ စလိုက်ရအောင်"

【ပုန်ကန်မှု】 ကို အသက်သွင်းလိုက်လေ၏။

ရဲချီယန်က နတ်ဆိုး ကတ်ပြားနှင့် သူ့ကို ဆက်သွယ်ထားသော အရောင်အသွေးစုံလင်သည့် ချည်မျှင်ကြိုးများကို ချက်ချင်း မြင်တွေ့လိုက်ရပေသည်။

အနက်ရောင်ကြိုးကို သူ ထိကိုင်လိုက်၏။

၎င်းမှာ ကြိုတင်သတိပေးသူကို ကိုယ်စားပြုသော အရောင်ပင်ဖြစ်သည်။

နောက်တစ်ခဏမှာပင် ကြိုတင်သတိပေးသူမှာ သူ၏ လက်ခုံပေါ်၌ တွယ်ကပ်နေသော အနက်ရောင် ကျီးကန်းနတ်ဆိုး အလင်းပုံစံအဖြစ်သို့ ပြောင်းလဲသွားလေတော့သည်။ ကျီးကန်းနတ်ဆိုး၏ စွမ်းရည်များအားလုံးကို အသုံးပြုနိုင်စွမ်းရှိနေကြောင်း ရဲချီယန် ခံစားလိုက်ရလေ၏။

"ကုန်ကျစရိတ်အနေနဲ့ဆိုရင် စိတ်စွမ်းအား ၁၀ မှတ်ပဲ လိုအပ်တာလား။ တော်တော်လေး နည်းတာပဲ"

"မျက်ရည်နီကို စမ်းကြည့်ရအောင်"

ပုန်ကန်မှုက ကူးပြောင်းသွားလေ၏။

သူ၏ လက်ခုံပေါ်ရှိ အလင်းပုံစံမှာ အနီရောင် ပေါင်းစပ်ပုံသဏ္ဌာန်အဖြစ်သို့ ပြောင်းလဲသွားပေသည်။

မျက်ရည်နီနှင့် ပေါင်းစည်းလိုက်သည်နှင့် တစ်ပြိုင်နက် ရဲချီယန်၏ မျက်လုံးများမှာ အနီရောင်အဖြစ်သို့ ပြောင်းလဲသွားချေပြီ။

အပေါ်သို့ မော့ကြည့်လိုက်ရာ ဤနေရာမှာ မြေအောက်နေရာလွတ်ဖြစ်နေလင့်ကစား မိုးတိမ်မည်းများက အမှန်တကယ်ပင် ထွက်ပေါ်လာခဲ့လေ၏။ ကြိုတင်သတိပေးသူနှင့် မတူညီဘဲ သူက မျက်ရည်နီကိုပါ အမှန်တကယ် ဆင့်ခေါ်နိုင်စွမ်း ရှိနေဆဲပင်။

"တော်တော်လေး အသုံးဝင်သားပဲ။ ဟူး နောက်တစ်ခုကို စမ်းကြည့်ရအောင်။ ပုန်ကန်မှု နတ်ဆိုးကို ဆင့်ခေါ်မယ် ဟုတ်လား။ ဘယ်လိုပုံစံမျိုး ဖြစ်နေမလဲ"

ပထမစွမ်းရည်ကို ပိတ်လိုက်ပြီး ပုန်ကန်မှု၏ ဒုတိယစွမ်းရည်ကို ဖွင့်လိုက်လေ၏။

အစိတ်စိတ်အမွှာမွှာ ကွဲအက်နေသော သရဖူတစ်ခုနှင့် အနက်ရောင် ပြောင်းပြန် ခရစ်ယာန်လက်ဝါးကပ်တိုင်တစ်ခုက လေထဲတွင် ထွက်ပေါ်လာပေသည်။ ယင်း၏ အောက်ဘက်တွင်မူ အလားတူပင် ကျိုးပဲ့ပျက်စီးနေသော ပလ္လင်တစ်ခုက ခရစ်ယာန်လက်ဝါးကပ်တိုင်ကို အထောက်အပံ့ပြုထားလေ၏။

၎င်းတို့ ထွက်ပေါ်လာသည့် အခိုက်အတန့်မှာပင်။

ဝမ်းနည်းကြေကွဲဖွယ်ကောင်းသော်လည်း စိတ်အားထက်သန်ဖွယ်ကောင်းသော သံစုံတီးဝိုင်းသံကြီးက ပတ်ဝန်းကျင် လေထုထဲတွင် ပဲ့တင်ထပ်သွားလေတော့သည်။

နတ်ဆိုးဘုရင်၏ ပလ္လင်ရှေ့တွင် ရပ်နေသော သူရဲကောင်းတစ်ဦးက နောက်ဆုံးတိုက်ပွဲကို အဆုံးသတ်ပြီးနောက် နတ်ဆိုးဘုရင်၏ ခေါင်းကို ကိုင်ဆောင်ကာ ထိုပလ္လင်ပေါ်တွင် ထိုင်လိုက်သည့်အလားပင်။

"ကြည့်ရတာ တော်တော်လေး မိုက်သားပဲ။ ဒါပေမဲ့ သာမန် အလှဆင်ထားတာသက်သက်တော့ မဟုတ်လောက်ဘူးမလား"

ရဲချီယန်က အမိန့်အမျိုးမျိုးပေးကာ စမ်းသပ်မှုများကို စတင်လိုက်လေ၏။

နောက်ဆုံးတွင်တော့ ဤအရာ၌ မည်သည့် တိုက်ခိုက်ရေးစွမ်းရည်မျှ မရှိကြောင်း ကောက်ချက်ချလိုက်ပေသည်။ သို့သော်လည်း ၎င်းကို ဆင့်ခေါ်ပြီးနောက်တွင် ရဲချီယန်၏ နတ်ဆိုးများအားလုံး၏ စွမ်းရည်များမှာ အနည်းနှင့်အများဆိုသလို ပိုမိုအားကောင်းလာခဲ့လေ၏။

"နတ်ဆိုးတွေအတွက် သီးသန့် အထောက်အပံ့ပေးတဲ့ စွမ်းရည်လား"

"စိတ်ဝင်စားစရာပဲ"

ဤပုန်ကန်မှု ကတ်ပြား၏ စွမ်းရည်များကို နားလည်သဘောပေါက်သွားပြီးနောက် ရဲချီယန်က အကြောဆန့်လိုက်ကာ ပတ်ဝန်းကျင်ကို ဝေ့ကြည့်လိုက်လေရာ သူ၏ နှုတ်ခမ်းထောင့်များမှာ ထိန်းမရသိမ်းမရ တွန့်ကွေးသွားလေတော့သည်။

ဖြားယောင်းသွေးဆောင်ခြင်း၊ ကြိုတင်သတိပေးသူ၊ မျက်ရည်နီ၊ မာနတရား၊ လောဘတကြီး စားသောက်ခြင်း နှင့် ဤအသစ်စက်စက် ပုန်ကန်မှု။

ကတ်ပြား ခြောက်ကတ်။

သူ၏ လက်ထဲရှိ နတ်ဆိုး ကတ်ပြား အရေအတွက်မှာ ခြောက်ကတ်အထိ ရောက်ရှိလာခဲ့ချေပြီ။

ထို့အပြင် ကောင်းကင်ယံဥယျာဉ်ရှိ ရထားမောင်းနှင်သူ တစ်ဦးမှာ နတ်ဆိုး ကတ်ပြား တစ်ကတ်ကို ပိုင်ဆိုင်ထားသေးကြောင်း သူ ယခုအခါ သိရှိထားပေသည်။ လူလိမ်မ ကျူရှင်းထူ၏ လက်ထဲသို့ အမှန်တကယ် ရောက်ရှိသွားပြီလား ဆိုသည်ကိုတော့ သူမသိနိုင်သေးချေ။

ပြည့်စုံသော နတ်ဆိုး ကတ်ပြား အစီအစဉ်ကို စုဆောင်းရရှိရန် သူ တဖြည်းဖြည်း နီးကပ်လာခဲ့ပြီ ဖြစ်လေ၏။

"ဒါနဲ့ ပြောရရင် ဒီတစ်ခါ နတ်ဆိုး ကတ်ပြားက စွမ်းရည်တွေရဲ့ အကြောင်းအရာကို တိုက်ရိုက် ပေးစွမ်းနေတာလား။ ပြီးတော့ ဒီ 'XXX' အမှတ်အသားတွေက ဘာတွေလဲ"

စနစ်ထံသို့ မေးမြန်းကြည့်လိုက်သော်လည်း မည်သည့် တုံ့ပြန်မှုမျှ မရရှိခဲ့ပေ။ ရဲချီယန်က ခေါင်းခါမ်းလိုက်ကာ အလွန်အမင်း တွေးတောနေခြင်းကို ရပ်တန့်လိုက်လေတော့သည်။

ရွှေ့ပြောင်းခြင်း အတွက် တစ်နာရီကြာ စွမ်းရည်စောင့်ဆိုင်းချိန် အပြည့်အဝ ပြီးဆုံးသွားသောအခါ သူက ကတ်ပြား အစီအစဉ် တစ်ခုလုံးကို သိမ်းဆည်းလိုက်ပြီး ရွှေ့ပြောင်းခြင်းကို စတင်လိုက်လေ၏။

ရင်းနှီးနေသော နစ်မြုပ်သွားသည့် ခံစားချက်၊ ရင်းနှီးနေသော ခံစားမှုမျိုးသာ ဖြစ်ပေသည်။

မျက်လုံးများ ဖွင့်လိုက်ချိန်တွင် သူသည် နူးညံ့သိမ်မွေ့မှုများကြားမှ နိုးထလာခဲ့ချေပြီ။

ရဲချီယန်သည် သူ၏ရထား စက်ခေါင်းတွဲဆီသို့ ပြန်ရောက်လာလေ၏။

လီဆက်က ဤနေရာတွင် စောင့်ကြိုနေနှင့်ပြီး ဖြစ်သည်။

သူ၏ အမိန့်ကြောင့် အလိုအလျောက် ပြန်ရောက်နေခဲ့ကြသော ဝေါလီနှင့် အီဗ်တို့က သူ့ထံသို့ ပြေးဝင်လာကြလေတော့သည်။

"ကောင်းပါပြီ ကောင်းပါပြီ ငါ ဘာမှမဖြစ်ပါဘူး။ ဟေး တော်တော်လေး ကြီးမားတဲ့ ဆုလာဘ်တွေ ရခဲ့တာပဲ"

အမှန်တကယ်ပင် ကြီးမားသော ဆုလာဘ်များ ဖြစ်လေ၏။ ရတနာသေတ္တာများ၊ သယံဇာတ အမျိုးအစားစုံလင်— သာမန် အဆင့် ၅ ပလက်ဖောင်းတစ်ခုအတွက်ဆိုလျှင်ပင်။

ဘုရားစူး ကတ်ပြား၏ အပိုင်းအစများမှလွဲ၍ ကတ်ပြား အစီအစဉ်တစ်ခုမှ ကတ်ပြားတစ်ခုထက် မည်သည့်အရာက ပို၍ အဖိုးတန်နိုင်ဦးမည်နည်း။

"ဘူတာရုံကနေ ထွက်ခွာဖို့ အချိန်ကျပြီပဲ။ အို ဟုတ်သားပဲ ကျောက်လင်နဲ့ တခြားသူတွေ ဘယ်လို အဆုံးသတ်သွားလဲ သိချင်မိသား"

အချိန်ကို တစ်ချက် ကြည့်လိုက်လေရာ သူ နတ်ဆိုး ကတ်ပြားကို ရှာတွေ့ခဲ့သည်မှာ နှစ်နာရီခန့် ကြာမြင့်သွားခဲ့ပြီ ဖြစ်သည်။ ထိုသို့ဆိုလျှင် ကျောက်လင်ကဲ့သို့သော ရထားမောင်းနှင်သူများကြားထဲတွင် ဤဘူတာရုံမှ ထွက်ခွာရန် အချိန်ကျရောက်သွားသူများ ရှိနေလောက်ပြီ ဖြစ်ပေသည်။

ဤအဆင့်နိမ့် ပလက်ဖောင်းတွင် သူသည် ပလက်ဖောင်း ခေါင်းဆောင်တစ်ဦးအဖြစ် နေထိုင်ရသည့် ခံစားချက်ကို တွေ့ကြုံခံစားခဲ့ရလေ၏။ သူသည် အပျော်သဘောသက်သက်သာဖြစ်သော စမ်းသပ်မှုတစ်ခုကို ဖန်တီးခဲ့ခြင်းဖြစ်သည်။

နောက်ဆုံးတွင် အနိုင်ရရှိသူမှာ ယုံမှားသံသယဖြစ်ဖွယ်မရှိ ကျောက်လင်သာ ဖြစ်ပေလိမ့်မည်။ သူမ မည်သို့သော ဆုလာဘ်မျိုး ရရှိမည်ဆိုသည်ကား ရဲချီယန်နှင့် မည်သို့မျှ သက်ဆိုင်ခြင်း မရှိတော့ချေ။

ထွက်ခွာရမည့် အချိန်ပင်။

သံလမ်းများ ရှည်ထွက်သွားကာ ရထားကြီးက ဟိန်းဟောက်မြည်ဟည်းသွားလေ၏။ ရှေ့တွင်တော့ လေဟာနယ်က ပေါ်ပေါက်လာခဲ့ပေသည်။

လွင်တီးခေါင်ပြင်သို့ ပြန်လည်ရောက်ရှိသွားသည့် အခိုက်အတန့်မှာပင်။

စနစ်၏ ကြေညာသံက ထွက်ပေါ်လာလေတော့သည်။

【ဒင်—စနစ်မှ ထုတ်ပြန်ထားသော ထပ်တိုး တာဝန် ပြီးမြောက်ပါသည်】

【ဆုလာဘ် ရရှိပါသည် ရထားဒင်္ဂါး ၂၁ ပြား】

တော်တော်လေး ရိုးရှင်းပြီး ဟန်ဆောင်မှုမရှိတဲ့ ဆုလာဘ်ပါလား။

အဆင့် ၅ ပလက်ဖောင်းတစ်ခုအတွက်တော့ ညည်းညူစရာ သိပ်မရှိလှပေ။

ပြတင်းပေါက်အပြင်ဘက်ရှိ ကမ္ဘာကြီးက လွင်တီးခေါင်ပြင်ဆီသို့ ပြန်လည်ရောက်ရှိသွားသောအခါ။

ရဲချီယန်က အနောက်သို့ မှီချလိုက်ပြီး သူ၏ရှေ့ရှိ စနစ် အလင်းမျက်နှာပြင် ပေါ်တွင်တော့...

ကျောက်လင်၏ သူငယ်ချင်း ကိုယ်စားပြုပုံလေးက အလင်းတန်းများဖြင့် လင်းလက်နေလေ၏။

သိသာထင်ရှားစွာပင် ဤကံကောင်းသော မိန်းကလေး၌ သူမ အဖြေသိလိုသော မေးခွန်းများစွာ ရှိနေပုံရပေသည်။

ကျောက်လင်။ 【"အစ်ကိုချီယန် ဘာမှမဖြစ်ဘူးမလား"】