သင်္ချိုင်း မြေနှင့် ထွက်ပေါ်လာသော အထွတ်အထိပ်အရိုး

ချင်းရွှမ်ဂိုဏ်း အုပ်စုကို ရှင်းလင်းပြီးနောက် ရှုချွမ်းသည် ဦးစွာ သူတို့၏ သိုလှောင်လက်စွပ်အားလုံးကို သိမ်းဆည်းလိုက်ပြီးနောက် ကျောက်စိမ်းရိုးမှိုရှိရာသို့ လျှောက်သွားခဲ့သည်။

သူသည် လက်လှမ်း၍ မှိုကို မြေစာခဲနှင့်တကွ ဆွတ်ယူလိုက်ပြီး ဦးစွာ ကျောက်စိမ်းသေတ္တာထဲသို့ ထည့်ကာ အလယ်အလတ် ယွမ်ဝိညာဉ်ကျောက်တုံး တစ်တုံးကို အထဲသို့ ထည့်သွင်းလိုက်ပြီးမှ သူ၏ သိုလှောင်လက်စွပ်ထဲသို့ သိမ်းဆည်းလိုက်သည်။

ဤသို့လုပ်ဆောင်မှသာ ကျောက်စိမ်းရိုးမှို၏ အသက်စွမ်းအား မဆုံးရှုံးစေရန် အာမခံနိုင်မည် ဖြစ်သည်။

မြင့်မြတ်နယ်မြေသို့ ပြန်ရောက်မှသာ ဆက်လက် စိုက်ပျိုးနိုင်ပေလိမ့်မည်။

“စီနီယာအစ်ကို ရှု”

“အစ်ကို ဘာမှမဖြစ်လို့ တကယ် ဝမ်းသာပါတယ်”

စုမြောင်ရင်မှာ ယခုမှပင် သတိပြန်ဝင်လာတော့သည်။

ရှုချွမ်း ဒဏ်ရာအနည်းငယ်မျှ မရသည်ကို မြင်သောအခါ သူမသည် ဝမ်းသာလွန်း၍ မျက်ရည်များ ကျလာပြီး သူ၏ ရင်ခွင်ထဲသို့ တိုးဝင်ဖက်ထားလိုက်မိသည်။

ရှုချွမ်း မြားနှစ်စင်း အထိခံလိုက်ရသည့် ခဏမှာ သူမက ရူးမတတ် ဖြစ်သွားခဲ့ရသည်။

အကယ်၍ ရှုချွမ်း တစ်ခုခုဖြစ်သွားခဲ့လျှင် ချင်းရွှမ်ဂိုဏ်း တစ်ခုလုံးကို အသေအလဲ ပေးဆပ်စေမည်ဟု သူမ၏ စိတ်ထဲတွင် တိတ်တဆိတ် ကျိန်ဆိုခဲ့သည်။

ကံကောင်းထောက်မစွာဖြင့် ရှုချွမ်းမှာ အသက်ဘေးမှ လွတ်မြောက်ခဲ့ရုံတင်မက ပြင်းထန်သော ဒဏ်ရာပင် မရရှိခဲ့ပေ။

“ကဲပါ... တော်တော့၊ မငိုနဲ့တော့၊ အဲဒီမြားနှစ်စင်းက ငါ့ကို ဘယ်လိုလုပ် ဒဏ်ရာပေးနိုင်မှာလဲ”

ရင်ခွင်ထဲမှ အလှပဂေးလေး၏ ဆံနွယ်များကို အသာအယာ ပွတ်သပ်ပေးရင်း ရှုချွမ်းက ညင်သာစွာ နှစ်သိမ့်လိုက်သည်။

မြားနှစ်စင်း ပေါက်ကွဲသည့် ခဏမှာပင် ရှုချွမ်းသည် သူ၏ ဆရာသင်ကြားပေးထားသော 'ရှင်းယန် မီးထိန်းချုပ်ခြင်း သိုင်းပညာ'ကို အသုံးပြုခဲ့သည်။

မျက်စိတစ်မှိတ်အတွင်းမှာပင် နေမင်းအစစ်အမှန် မီးတောက်များက သူ၏ တစ်ကိုယ်လုံးကို လွှမ်းခြုံသွားသည်။

ပေါက်ကွဲမှုမှ ထွက်ပေါ်လာသော စွမ်းအားများကို ထိုကြောက်မက်ဖွယ် မီးတောက်များက ချေဖျက် သန့်စင်ပစ်လိုက်သဖြင့် သူ့ကို အနည်းငယ်မျှ မထိခိုက်နိုင်ခြင်း ဖြစ်သည်။

“ကဲ... ငါတို့ ဒီအခွင့်အရေးကို ရပြီဆိုတော့ ဒီနားမှာ တခြား အရင်းအမြစ်တွေလည်း မရှိတော့ဘူး၊ သွားကြစို့”

ရှုချွမ်းက ပြော လိုက်သည်။

“ဟုတ်ကဲ့၊ စီနီယာအစ်ကို ရှု ပြောတဲ့အတိုင်း လုပ်ပါ့မယ်”

စုမြောင်ရင်က မျက်ရည်များကို သုတ်လိုက်ပြီး ခေါင်းညိတ်ပြသည်။

ထို့နောက်မှ သူမသည် ရှုချွမ်း၏ ရင်ခွင်ထဲသို့ အတင်းတိုးဝင်ခဲ့မိသည်ကို သတိရသွားကာ ရှက်ကိုးရှက်ကန်း ဖြစ်ပြီး ပါးပြင်လေးများ နီမြန်းသွားတော့သည်။

ထိုသို့ဖြင့် ရှုချွမ်းသည် စုမြောင်ရင်ကို ခေါ်ဆောင်ကာ ဤနေရာမှ ထွက်လာခဲ့သည်။

ရှုချွမ်းသည် ချင်းရွှမ်ဂိုဏ်း တပည့်များ၏ အလောင်းများကို မဖျောက်ဖျက်ခဲ့ပေ။

ပြင်းထန်သော သွေးညှီနံ့ကြောင့် မကြာမီမှာပင် ဤနယ်မြေရှိ သားရဲများ ရောက်ရှိလာမည် ဖြစ်ကာ ထိုတပည့်များ၏ နောက်ဆုံး နားခိုရာနေရာမှာ သားရဲများ၏ မစင်ပုံထဲတွင်သာ ဖြစ်ပေလိမ့်မည်။

ရှုချွမ်း၏ နောက်ထပ် ပန်းတိုင်မှာ 'သင်္ချိုင်း မြေ' တစ်ခုပင် ဖြစ်သည်။

ဒါက သူက ပါရမီရှင်တစ်ဦးထံမှ ရရှိခဲ့သော အချက်အလက် ဖြစ်သည်။

ထိုနေရာတွင် 'အထွတ်အထိပ်အရိုး'တစ်ခု ပေါ်ထွက်လာလိမ့်မည်။

မူလကတော့ ၎င်းကို ယန်ရှန်းက ရရှိသွားခဲ့ခြင်း ဖြစ်သည်။

ဒါက ရှုချွမ်း လုံးဝ လက်ခံနိုင်သည့် အရာမဟုတ်ပေ။

အထွတ်အထိပ်အရိုး ဆိုသည်မှာ အလွန် အဖိုးတန်လှသော အရာဖြစ်ပြီး အင်အားကြီးမားသော 'ဧကရာဇ်အရှင်နယ်ပယ်' သိုင်းပညာရှင်ကြီးတစ်ဦး သေဆုံး ပြီးနောက် ကျန်ရစ်ခဲ့သော ထူးခြားသည့် အရိုးတစ်ခု ဖြစ်သည်။

ဤအရိုးတွင် ဧကရာဇ်အရှင်တစ်ပါး၏ သိုင်းတာအို များ စုစည်းနေသဖြင့် ၎င်းကို ရရှိသူသည် ဧကရာဇ်အရှင်နယ်ပယ် သိုင်းပညာရှင်တစ်ဦး၏ တစ်သက်တာ ကျင့်ကြံခြင်း အတွေ့အကြုံများကို နားလည် သဘောပေါက်နိုင်မည် ဖြစ်သည်။

ဧကရာဇ်အရှင်၏ အမွေအနှစ်ကို ရရှိကာ 'ဧကရာဇ်အရှင်လောင်းလျာ' လမ်းစဉ်ပေါ်သို့ပင် တက်လှမ်းနိုင်ပေလိမ့်မည်။

အရိုးနှင့် အကြောများကို သန့်စင်ပေးကာ ပါရမီကို မြှင့်တင်ပေးနိုင်သည့် အစွမ်းမှာမူ အထက်ပါ အချက်နှစ်ချက်နှင့် နှိုင်းယှဉ်လျှင် အရေးမပါသလောက်ပင်။

စနစ်၏ အချက်အလက်များအရ ယန်ရှန်းသည် အထွတ်အထိပ်အရိုးကို ရရှိပြီးနောက် ဧကရာဇ်အရှင်နယ်ပယ် ကျင့်ကြံခြင်း အတွေ့အကြုံနှင့် အမွေအနှစ်ကို ရရှိခဲ့သည်။

ထို့နောက် ၎င်းကို အသုံးပြုကာ သူ၏ အစွမ်းကို အဆမတန် မြှင့်တင်လိုက်ပြီး ဤရှေးဟောင်း နန်းတော်အတွင်းမှ အခြားသော အခွင့်အရေးများကိုပါ ရယူကာ နောက်ဆုံးတွင် ပြိုင်ဘက်ကင်း ပါရမီရှင်တစ်ဦးအဖြစ် ဤနေရာမှာတင် လုံးဝ နိုးထလာခဲ့ခြင်း ဖြစ်သည်။

“မဖြစ်ဘူး၊ ဒီအထွတ်အထိပ်အရိုးကို ယန်ရှန်း ရသွားတာ လုံးဝ ခွင့်မပြုနိုင်ဘူး”

ရှုချွမ်း စိတ်ထဲက တွေးနေမိသည်။

ယန်ရှန်းသည် သူ့အပေါ် ရန်ငြိုးထားပြီးသား ဖြစ်ရာ အကယ်၍ သူကသာ အထွတ်အထိပ်အရိုးကို ရသွားပါက အခြေအနေမှာ ထိန်းမနိုင် သိမ်းမရ ဖြစ်သွားလိမ့်မည်။

ထိုအချိန်ကျလျှင် သူကိုယ်တိုင် ဒုက္ခရောက်ရနိုင်သလို ယန်ရှန်း၏ လက်ချက်ဖြင့်ပင် သေဆုံးသွားနိုင်ပေသည်။

ဘာပဲဖြစ်ဖြစ် သူက ဇာတ်ညွှန်းတစ်ခုရဲ့ ဇာတ်လိုက် ဖြစ်နေပြီး ကံတရားရဲ့ မျက်နှာသာပေးမှုကို ရထားတဲ့သူ မဟုတ်ပါလား။

………

သင်္ချိုင်းမြေ

ဤအချိန်တွင် ထိုနေရာ၌ လူအုပ်ကြီး စုဝေးနေကြပြီ ဖြစ်သည်။

သူတို့အားလုံးမှာ ဂိုဏ်းအသီးသီးမှ ပါရမီရှင်များ ဖြစ်ကြပြီး တစ်ကိုယ်တော် ကျင့်ကြံသူဟူ၍ ခပ်ရှားရှားသာ ရှိသည်။

သူတို့အားလုံးမှာ မြေစာပုံလေး တစ်ခုကို ဝိုင်းရံထားကြပြီး လေးနက်သော အမူအရာများဖြင့် စိုက်ကြည့်နေကြသည်။

ထိုမတိုင်မီက

တစ်ကိုယ်တော် သိုင်းသမား အနည်းငယ်သည် ဤ သင်္ချိုင်းမြေ၌ ရတနာတစ်ခု ပေါ်ထွက်တော့မည်ကို ရှာဖွေတွေ့ရှိခဲ့ကြသည်။

ရတနာ ပေါ်လာမည့်အချိန်ကို စောင့်ဆိုင်းနေစဉ်မှာပင် ထိုအုပ်စုကြားတွင် အငြင်းပွားမှုများ ဖြစ်ပေါ်ခဲ့သည်။

ပြင်းထန်သော တိုက်ပွဲတစ်ခုအပြီးတွင် နှစ်ဦးသာ ကျန်ရစ်တော့သည်။

တစ်ဦးမှာ ထွက်ပြေးသွားပြီး ထိုနေရာတွင် ရတနာရှိကြောင်း သတင်းဖြန့်လိုက်သည်။

ထိုသတင်းကို ကြားသည်နှင့် ထိပ်သီး ပါရမီရှင် များမှာ ချက်ချင်း ရောက်ရှိလာကြတော့သည်။

ကျန်ရှိနေသော တစ်ကိုယ်တော် သိုင်းသမားကို ရှင်းလင်းပြီးနောက် သူတို့သည် မြေပုံလေးရှေ့တွင် စိတ်ရှည်လက်ရှည် စောင့်ဆိုင်းနေကြသည်။

ဘာကြောင့်လဲဆိုတော့ သူတို့သည်လည်း ဤမြေပုံထဲတွင် ပုန်းကွယ်နေသော ရတနာ၏ ထူးခြားလှသော သဘာဝကို အာရုံခံမိနေကြသောကြောင့် ဖြစ်သည်။

အချိန်ကုန်လွန်လာသည်နှင့်အမျှ ဆန်းကြယ်သော အော်ရာ တစ်ခု ထိုမြေပုံမှ စတင် ထွက်ပေါ်လာသည်။

ဤအော်ရာ ကြောင့်ပင် ပါရမီရှင်များ ပို၍ ပို၍ ဆွဲဆောင်ခံရပြီး ဤနေရာသို့ အုပ်စုလိုက် ရောက်ရှိလာကြခြင်း ဖြစ်သည်။

ဤမြေပုံထဲရှိ ရတနာမှာ အလွန် ထူးကဲသော အရာဖြစ်လိမ့်မည်ဟု သူတို့ အားလုံး ယုံကြည်နေကြသည်။

ဘုန်း...

နာရီဝက်ခန့် ကြာပြီးနောက် ခုနစ်ရောင်ခြည် အလင်းတန်းတစ်ခုသည် မြေပုံထဲမှ ရုတ်တရက် ပွင့်ထွက်လာပြီး ကောင်းကင်ယံသို့ ထိုးတက်သွားသည်။

ကောင်းကင်တစ်ဝက်မှာ ထိုရောင်စုံ အလင်းတန်းများကြောင့် လင်းထိန်သွားတော့သည်။

ဤမြင်ကွင်းကို မြင်လိုက်ရသောအခါ...

ဤနေရာသို့ စုဝေးရောက်ရှိနေကြသော ပါရမီရှင်များမှာ သူတို့၏ ယခင်အတွေးများ မှန်ကန်ကြောင်း ပို၍ သေချာသွားကြသည်။

“ထူးခြားတဲ့ သဘာဝ ဖြစ်စဉ်ပဲ၊ ဒါဟာ အဖိုးမဖြတ်နိုင်တဲ့ ရတနာတစ်ခု ပေါ်ထွန်းလာတာပဲ”

“မြန်မြန်သွားကြစို့၊ ရတနာကို တစ်ချက်လောက် မြင်ရရင်တောင် တန်တယ်”

“ဒီလို ထူးခြားတဲ့ ဖြစ်စဉ်ကို ဖြစ်ပေါ်စေနိုင်တဲ့ ရတနာဆိုတာ သာမန်အရာ မဟုတ်ဘူး၊ ငါတို့ လက်မလွှတ်နိုင်ဘူး”

...

ဤတောက်ပသော အလင်းတန်း ပေါ်ထွက်လာမှုကြောင့် တစ်ကမ္ဘာလုံး ရုတ်ရုတ်သည်းသည်း ဖြစ်သွားခဲ့သည်။

အရပ်မျက်နှာ အသီးသီးမှ သိုင်းသမား အမြောက်အမြားသည် သင်္ချိုင်း‌မြေ ဆီသို့ အလုအယက် ပြေးဝင်လာကြသည်။

ဤနေရာသို့ ရောက်ရှိလာသော သိုင်းသမား ဦးရေမှာလည်း လျင်မြန်စွာ တိုးတက်လာနေသည်။

ရှုချွမ်းသည်လည်း ထိုရောင်စုံ အလင်းတန်းကို မြင်တွေ့လိုက်ရသည်။

သူသည် စုမြောင်ရင်ကို ဦးဆောင်ကာ အလင်းတန်း ထွက်ပေါ်ရာ နေရာဆီသို့ အရှိန်အဟုန်ဖြင့် ပြေးထွက်ခဲ့သည်။

ဘုန်း ဘုန်း ဘုန်း...

ကျယ်လောင်သော ပေါက်ကွဲသံ သုံးကြိမ်အပြီးတွင် အလင်းတန်း၏ အရင်းအမြစ်ဖြစ်သော မြေစာပုံမှာ ပေါက်ကွဲထွက်သွားသည်။

ရုတ်တရက် ပို၍ပင် တောက်ပလှသော အလင်းရောင်များ ပေါ်ထွက်လာပြီး ရှိသမျှ လူအားလုံးကို လင်းထိန်သွားစေသည်။

ထိုရောင်ခြည်များကြားမှ လူတိုင်း မြင်တွေ့လိုက်ရသည်မှာ ကောင်းကင်ယံတွင် လွင့်မျောနေသော၊ စာလုံးများဖြင့် ဖုံးလွှမ်းနေသည့် ရွှေရောင် အရိုးတစ်ခုပင် ဖြစ်သည်။

ဤအရာကို မြင်လိုက်ရသည့် ခဏမှာပင် ရှိသမျှ လူအားလုံးမှာ ပြင်းပြသော လိုချင်တပ်မက်စိတ်များ ဖြစ်ပေါ်လာပြီး ၎င်းကို ပိုင်ဆိုင်လိုစိတ်ဖြင့် လောဘ တက်လာကြတော့သည်။

“ဒါ... ဒါက အထွတ်အထိပ်အရိုးပဲ”

ရုတ်တရက်

လူအုပ်ထဲမှ တစ်ဦးက ထိုအရိုး၏ မူလအစကို မှတ်မိသွားပြီး အံ့ဩတကြီး အော်ဟစ်လိုက်သည်။

ဝှစ်...

ဒါကို ကြားလိုက်ရချိန်မှာတော့ လူတိုင်းမှာ ရူးသွပ်သွားကြပြီး သူတို့၏ မျက်လုံးများမှာ လောဘရိပ်များဖြင့် တောက်ပလာသည်။

သူတို့ရှေ့မှာ ရှိနေတာက အထွတ်အထိပ်အရိုး ပါလား။

ဒါဟာ မြင့်မြတ်နယ်မြေတွေမှာတောင် မရှိနိုင်တဲ့ အဖိုးမဖြတ်နိုင်တဲ့ ရတနာ ဖြစ်သည်။

အထွတ်အထိပ်အရိုး တစ်ခုစီတိုင်းမှာ မြင့်မြတ်နယ်မြေတစ်ခုကို စောင့်ရှောက်နိုင်တဲ့ ရတနာအဖြစ် သတ်မှတ်ဖို့ လုံလောက်လှသည်။

ဤနေရာရှိ လူများမှာ မည်သည့် မြင့်မြတ်နယ်မြေ သို့မဟုတ် အင်အားကြီး အဖွဲ့အစည်းမှ လာသည်ဖြစ်စေ အထွတ်အထိပ်အရိုးကို ကိုယ်တိုင်ကိုယ်ကျ တစ်ခါမှ မမြင်ဖူးကြသော်လည်း ၎င်း၏ ကြီးကျယ်လှသော ဂုဏ်သတင်းကိုတော့ အားလုံး ကြားဖူးကြသည်။

ဒါကြောင့်လည်း သူတို့တွေ ဒီလောက်ထိ ရူးသွပ်နေကြခြင်း ဖြစ်သည်။

ဒဏ္ဍာရီလာ အထွတ်အထိပ်အရိုးက ငါ့ရှေ့မှာတင် လက်တစ်ကမ်းမှာတင် ရှိနေတာပဲ။

“ဒီရတနာက ငါတို့ 'ငွေလ မြင့်မြတ်နယ်မြေ'ရဲ့ ဟာပဲ၊ ဘယ်သူမှ လုဖို့ မကြိုးစားနဲ့”

ရှုချွမ်း ယခင်က တွေ့ခဲ့ဖူးသော "ငွေလ မြင့်မြတ်နယ်မြေ"မှ ပါရမီရှင် ယွမ်လီ က အော်ဟစ်လိုက်သည်။

သူသည် ရူးသွပ်နေသော အကြည့်များဖြင့် အထွတ်အထိပ်အရိုး ရှိရာ အရပ်ဆီသို့ အပြင်းအထန် ပြေးဝင်သွားသည်။

ဘယ်သူမှ သတိမထားမိခင်မှာပဲ အထွတ်အထိပ်အရိုးကို အပိုင်သိမ်းချင်နေခြင်း ဖြစ်သည်။

သို့သော်လည်း

သူက အထွတ်အထိပ်အရိုးအနားသို့ မကပ်နိုင်မီမှာပင်

ဓားချီ တစ်ခုသည် ကောင်းကင်ယံမှ ရုတ်တရက် ထွက်ပေါ်လာပြီး သူ့ကို တိုက်ရိုက် ခုတ်ပိုင်းလိုက်သည်။

နိဗ္ဗာနနယ်ပယ် အဆင့် ၄ ရှိသော ယွမ်လီမှာ ထိုတိုက်ခိုက်မှုကြောင့် တိုက်ရိုက်ပင် လွင့်ထွက်သွားပြီး မြေပြင်ပေါ်သို့ ဒဏ်ရာအပြင်းအထန်ဖြင့် လဲကျသွားကာ သွေးများ အန်ထုတ်လိုက်ရသည်။

“ဒါက တကယ်ကို ရယ်စရာကောင်းတာပဲ၊ အထွတ်အထိပ်အရိုး ဆိုတာ မင်းတို့လို သာမန် လူ တွေ လက်ဖျားနဲ့ ထိရဲတဲ့ ရတနာမျိုး မဟုတ်ဘူးကွ”

စကားသံနှင့်အတူ

အဖြူရောင်ဝတ်ရုံကို ဝတ်ဆင်ကာ ဓားတစ်လက်ကို ကိုင်ဆောင်ထားသော လူငယ်တစ်ဦးသည် မြေပြင်ပေါ်တွင် ဒဏ်ရာပြင်းထန်စွာ လဲနေသော ယွမ်လီကို အထင်အမြင်သေးစွာ ကြည့်လျက် ဖြည်းဖြည်းချင်း ဆင်းသက်လာသည်။

သူသည် 'ခွန်းဝူ မြင့်မြတ်နယ်မြေ'မှ တိုက်ရိုက်တပည့်တစ်ဦး ဖြစ်ပြီး နိဗ္ဗာနနယ်ပယ် အဆင့် ၆ ရှိကာ သူ၏ ခွန်အား မှာ ပြိုင်ဘက်ကင်း လှသည်။

နိဗ္ဗာနနယ်ပယ် အဆင့် ၄ ရှိသော ယွမ်လီကို မြေပြင်ပေါ် လဲကျသွားအောင် သူက လက်တစ်ချက် လှုပ်ရုံနှင့် တတ်နိုင်ခြင်းက သူ၏ ခွန်အယး ကို သက်သေပြနေသည်။

ပတ်ဝန်းကျင်ရှိ သိုင်းသမားများမှာလည်း သူ့ကို ကြောက်ရွံ့သွားကြပြီး ခေတ္တမျှ မည်သူမှ မလှုပ်ရှားရဲကြပေ။

ဒါကို မြင်တော့ သူက နှာခေါင်းရှုံ့ လှောင်ပြောင်လိုက်ပြီးနောက် အထွတ်အထိပ်အရိုးကို ယူရန် ရှေ့သို့ တိုးသွားသည်။

သူက အောင်မြင်တော့မည့် အချိန်မှာပင်

မထင်မှတ်ထားသော အပြောင်းအလဲတစ်ခု ဖြစ်ပေါ်လာခဲ့လေတော့သည်။