အခန်း ၂၈၅

အခန်း(၂၈၅)

“ ဂိုဏ်းတူအကိုကြီး… ဒီရက်တွေမှာ အရိုးဖြူစွန့်ပစ်ကုန်းမြေက တစ်ခုခု လွဲမှားနေတဲ့ပုံပဲ… နင်သတိထားမိလား မသိဘူး မရဏကျီးကန်းတွေက အရိုးဖြူစွန့်ပစ်ကုန်းမြေပေါ်မှာ ခေါက်တုံ့ခေါက်ပြန် ပျံဝဲနေကြတယ်… တစ်စုံတစ်ခုက ငါတို့ကို စိုက်ကြည့်နေသလိုပဲ ”

ဆွဲဆောင်မှုရှိပြီး ချောမောလှပသော မိန်းကလေးက ကောင်းကင်ကို မော့ကြည့်လိုက်သည်။ ဇဝေဇဝါဖြစ်သော အကြည့်က သူ့မျက်လုံးထဲမှာ ထွက်ပေါ်လာသည်။

ဤအခိုက်အတန့်မှာ ကောင်းကင်ပေါ်တွင် မီးခိုးရောင်အစက်တစ်စက်က မြန်ဆန်စွာ ရွေ့လျားနေသည်။ တစ်စုံတစ်ယောက်သည် သေချာမကြည့်လျှင် ထိုမီးခိုးရောင်အစက်ကို သတိထားမိလိမ့်မည် မဟုတ်ချေ။ သို့သော် မသေမျိုးကျင့်ကြံသူများ၏ အမြင်အာရုံက သာမန်လူများထက် အဆပေါင်းများစွာ ပိုပြီးစူးရှသည်။ ထို့ကြောင့် သူတို့က မီးခိုးရောင်အစက်၏ စစ်မှန်သော အသွင်သဏ္ဍာန်ကို အကြည့်တစ်ချက်ဖြင့် မြင်နိုင်ကြသည်။

“ ဂိုဏ်းတူညီမလေး… မင်းမပြောရင်တောင် အဲ့ဒါကို ငါသိထားပြီးပြီ… အဲ့ဒီမီးခိုးရောင်အစက်က အရင်တစ်ခေါက် ငါတို့တွေ့ဆုံခဲ့ကြတဲ့ မရဏကျီးကန်းအုပ်စုပဲ… ဒါပေမဲ့ စိတ်မပူပါနဲ့… မရဏကျီးကန်းက ဘယ်လောက်ပဲ အစွမ်းထက်ပါစေ တစ်ကောင်နှစ်ကောင်ကတော့ ငါတို့အတွက် ဘာပြဿနာမှမရှိပါဘူး… တကယ်လို့ မရဏကျီးကန်းတွေ အုပ်စုလိုက် ထွက်ပေါ်လာမယ်ဆိုရင်လည်း ငါတို့ဆီမှာ ထွက်ပြေးနိုင်တဲ့ နည်းလမ်းရှိပါတယ် ”

“ ဟွန့်… အဲ့ဒီကျီးကန်းစုတ်တွေက ငါ့ကို တကယ် ဒေါသထွက်စေတယ်… တခြားဂိုဏ်းတူညီအကိုတွေကို သွားရှာပြီး အစီအရင်မြေပုံကို အပြည့်အစုံဖြစ်အောင် ပေါင်းစပ်မယ်… အစီအရင်မြေပုံ ပြည့်စုံသွားတဲ့အခါ အဲ့ဒီမရဏကျီးကန်းအုပ်စုကို ငါဖျက်ဆီးပစ်မယ် ”

ဂိုဏ်းတူအကိုကျန်းသည် အစကတည်းက ရုပ်ဆိုးအကျည်းတန်သည်။ ယခု သူက အကြီးအကျယ် ဒေါသထွက်နေလေရာ ပိုပြီးအရုပ်ဆိုးသွားသည်။ သူက ဘီလူးတစ်ကောင်နှယ် ကြောက်စရာကောင်းလာသည်။

ဤလောကတွင် မည်သူမှ ငတုံးမဟုတ်ကြချေ။

အတိတ်မှာ သူတို့က ထိုမိစ္ဆာကောင်ကို သတ်ဖြတ်ရန် ကြိုးစားခဲ့သောကြောင့် မရဏကျီးကန်းအုပ်စုက သူတို့ကို ပစ်မှတ်ထားနေခြင်းဖြစ်ကြောင်း သူတို့နှစ်ယောက်စလုံး နားလည်ကြသည်။ သို့သော် တောင်ပိုင်းမြေရိုင်းဒေသက သူတို့၏ အမြင်မှာ သာမန်တောင်တန်းဒေသတစ်ခုမျှသာ ဖြစ်၏။ ဤနေရာသည် အန္တရာယ်မရှိပေ။ မရဏကျီးကန်းအုပ်စုက အင်အားကြီးမားသော်လည်း တောင်ပိုင်းမြေရိုင်းဒေသ၏ စစ်မှန်သော အရှင်သခင်များက မိစ္ဆာအမြူတေဓာတ်လုံး ဖွဲ့စည်းထားပြီးသော အစစ်အမှန် မိစ္ဆာများ ဖြစ်ကြသည်။ ကျန်မိစ္ဆာသားရဲများကိုတော့ သူတို့က အလေးမထားပေ။ အကယ်၍ သူတို့က မပြည့်စုံသော အစီအရင်မြေပုံအားလုံးကို ပြီးပြည့်စုံစွာ ပြန်ပေါင်းစပ်လိုက်မည်ဆိုလျှင် အစစ်အမှန်မိစ္ဆာများကိုပင် ကြောက်စရာမလိုတော့ပေ။

“ ဒါပေမဲ့… မကောင်းတဲ့ ခံစားချက်ကို ငါရနေတယ်… ဒီနေရာမှာ အချိန်ကြာကြာ ဆက်နေမယ်ဆိုရင် အန္တရာယ်တစ်စုံတစ်ရာက ငါတို့အပေါ် ကျရောက်လာလိမ့်မယ်လို့ ငါအာရုံရနေတယ်… ဒီကနေ အမြန်ထွက်သွားတာ ကောင်းလိမ့်မယ် ”

ဂိုဏ်းတူညီမကျန်းက စိုးရိမ်ပူပန်သော အမူအရာဖြင့် ပြောသည်။ သူ့စိတ်ထဲမှာ မကောင်းသော ခံစားချက် ထွက်ပေါ်နေလေရာ ဤအရိုးဖြူစွန့်ပစ်ကုန်းမြေမှ အမြန်ဆုံး သူထွက်သွားချင်လာသည်။

“ ဂိုဏ်းတူညီမကျန်း… မင်း ဘာမဟုတ်တာတွေ လျှောက်ပြောနေတာလဲ… ဆရာက ငါတို့ကို မသေမျိုးအရိုးစုတွေ စုဆောင်းဖို့ ဒီကို လွှတ်လိုက်တာလေ… ပြီးတော့ ဒီအရိုးဖြူစွန့်ပစ်ကုန်းမြေထဲမှာ တခြားဂိုဏ်းတူညီအကိုဆယ့်လေးယောက် ရှိသေးတယ်ဆိုတာ မင်းမမေ့နဲ့ဦး… အခု ငါတို့ ပြန်သွားမယ်ဆိုရင် ဆရာရဲ့ အရှေ့မှာ ငါတို့ရဲ့ အဆင့်အတန်းက လျော့ကျသွားလိမ့်မယ်… အဲ့ဒီအခါ ဆရာရဲ့ အမွေအနှစ်တွေကို ဘယ်လိုလုပ် ဆက်ခံနိုင်တော့မှာလဲ ”

“ ဘာမှမစိုးရိမ်ပါနဲ့… ငါတို့က မသေမျိုးအရိုးစုတွေ စုဆောင်းဖို့ မရဏလောကဆီ သွားနေတာမှ မဟုတ်တာ… ဒီနေရာက တောင်ပိုင်းမြေရိုင်းဒေသထဲက အရိုးဖြူစွန့်ပစ်ကုန်းမြေလေးပါပဲ… ဟဲ ဟဲ ဘာမှမစိုးရိမ်ပါနဲ့… တကယ်လို့ အန္တရာယ်ကြုံလာရင် အကိုက မင်းကို အရှေ့ကနေ ကာကွယ်ပေးမယ် ”

သူက ပထမစကားကို လေးနက်စွာ ပြောသည်။ သို့သော် နောက်ပိုင်း သူဆက်ပြောသော စကားထဲမှာ တခြားအဓိပ္ပာယ်တစ်ခု ပါဝင်နေသည်။ သူ၏ နှုတ်ခမ်းထောင့်က အပေါ်သို့ တွန့်ကွေးသွားသည်။ သူ့ဘေးမှ ဆွဲဆောင်မှုရှိသော အမျိုးသမီးကို ကြည့်လိုက်သည့်အခါ သူ၏ မျက်လုံးက အရောင်ဝင်းလက်သွားသည်။

“ ဟဲ ဟဲ… တကယ်လို့ ဂိုဏ်းတူညီမက စိုးရိမ်နေတယ်ဆိုရင် ငါတို့အတူတူ ကျင့်ကြံမယ်ဆိုရင်ရော… ”

“ ဘာကို ကျင့်ကြံမှာလဲ… ”

“ နဂါးဖီးနစ်ဖိုမကျင့်စဉ်ကိုပေါ့… ဟဲ ဟဲ… ”

“ အို… ဂိုဏ်းတူအကိုကလည်း ဘာတွေပြောနေတာလဲ… နားရှက်စရာချည်း… ”

တီးတောင်… တီးတောင်… တီးတောင်…

အချိန်က တရွေ့ရွေ့ ကုန်ဆုံးသွားသည်။

ချိပ်ပိတ်ထားသော လှိုဏ်ဂူထဲတွင် မျက်နှာကြက်ပေါ်၌ ကောင်းကင်ပေါ်ထိ ဆန့်တန်းနေသော အပေါက်တစ်ပေါက်ရှိသည်။ အပေါက်သည် သိပ်မကျယ်ဝန်းပေ။ သို့သော် လရောင်ခြည်က ထိုအပေါက်မှတဆင့် လှိုဏ်ဂူထဲသို့ ကျဆင်းနေသည်။ ဤအခိုက်အတန့်က ညအချိန်ကုန်ဆုံးခါနီး အာရုဏ်ဦးအချိန်ဖြစ်သည်။ သို့ဖြစ်၍ အပေါက်ထဲတွင် အာရုဏ်ဦးနှင်းစက်များက တွဲခိုနေပြီး အောက်သို့ စီးကျလာသည်။ လှိုဏ်ဂူ၏ မြေကြီးပေါ်တွင် သတိမေ့နေသော စက်ကရာ၏ ခန္ဓာကိုယ်က လဲလျောင်းနေသည်။

ထိုစဉ် အာရုဏ်ဦးနှင်းစက်တစ်စက်က သူ့မျက်နှာပေါ်သို့ ကျဆင်းလာသည်။ နှင်းစက်က အလွန်အေးသည်။ အေးစက်မှုက ငြိမ်သက်နေသော သူ၏ စိတ်ကို နှိုးဆော်လိုက်သည်။ တင်းကျပ်စွာ မှိတ်ထားသော သူ့မျက်တောင်က အကြိမ်ရေအနည်းငယ် လှုပ်သွားသည်။ ထို့နောက် မည်သည့်လှုပ်ရှားမှုမှ မရှိတော့ပေ။

ပေါက်… ပေါက်… ပေါက်…

နှင်းစက်များက သူ့မျက်နှာပေါ်သို့ တစ်စက်ပြီးတစ်စက် ကျဆင်းလာသည်။ နှင်းစက်များက သူ၏ မျက်နှာပေါ်မှာ ပြန့်ကျဲသွားသည့်အခါ တင်းကျပ်စွာ မှိတ်ထားသော သူ့မျက်လုံးက ရုတ်တရက် ပြန်ပွင့်သွားသည်။ မျက်လုံးဖွင့်လိုက်သည့်အခိုက် ဇဝေဇဝါဖြစ်မှုက သူ့မျက်လုံးထဲမှာ ထွက်ပေါ်လာသည်။

“ ဟမ်… ငါသတိမေ့သွားတာလား ”

စက်ကရာက မြေကြီးပေါ်မှာ မတ်တတ်ရပ်လိုက်သည်။ သူက ကိုယ့်ကိုယ်ကိုယ် ပြန်စစ်ဆေးကြည့်လိုက်သည်။ မကြာမီ သူ့မျက်လုံးထဲမှာ စူးရှသော အလင်းရောင် ထွက်ပေါ်လာသည်။ သတိမမေ့ခင်က အခြေအနေကို သူပြန်အမှတ်ရသွားသည်။

“ မဟုတ်သေးဘူး… စောစောက ကျားဝိညာဉ်ဓားမော့ကို ငါသန့်စင်နေခဲ့တာပါ… အဲ့ဒါ ဘယ်လိုဆက်ဖြစ်သွားလဲ ”

အစီအရင်ပေါက်ကွဲမှုကို သူစဉ်းစားမိသွားသောအခါ ခါးသီးသော အပြုံးက သူ့မျက်နှာပေါ်မှာ ထွက်ပေါ်လာသည်။

ဝိညာဉ်ဝါးမျိုကျောက်တုံးနှင့် ကျောရိုး၏ အပြန်အလှန် ဆန့်ကျင်မှုက ကြီးမားသော ပေါက်ကွဲမှုကို ဖြစ်ပေါ်စေခဲ့သည်။ နောက်ဆုံးရလဒ်က သူမျှော်လင့်ထားသကဲ့သို့ ဖြစ်မလာမည်ကို စိုးရိမ်သည်။ ကြည့်ရသည်မှာ ဤတစ်ကြိမ်တွင် သူ၏ ကြိုးစားအားထုတ်မှုအားလုံးက အလဟဿ ဖြစ်သွားပုံပေါ်သည်။

“ နှမြောစရာပဲ… တကယ်ဆိုရင် ငါလောဘမကြီးသင့်ဘူး… ဝိညာဉ်ဝါးမျိုကျောက်တုံးကို ထပ်ပေါင်းထည့်လိုက်တာက မိုက်မဲတဲ့လုပ်ရပ်ပဲ… မဟုတ်ရင် ကျားဝိညာဉ်ဓားမော့ကို ငါသန့်စင်နိုင်လောက်တယ် ”

ခါးသီးမှုက သူ့နှလုံးသားထဲမှာ ထွက်ပေါ်လာသည်။ သို့သော်လည်း သူက ကိုယ့်ကိုယ်ကိုယ် အများကြီး အပြစ်မတင်နေပေ။ ဖြစ်ပျက်ပြီးသော ကိစ္စများက ပြီးဆုံးသွားပြီ ဖြစ်၏။ ယင်းတို့ကို ပြန်မပြင်ဆင်နိုင်ပေ။

သူက ကိုယ့်ကိုယ်ကိုယ် အပြစ်တင်မည်ဆိုလျှင်ပင် ယင်းက အချည်းနှီးဖြစ်လိမ့်မည်။ သူက တိတ်တဆိတ် ဝမ်းနည်းနေရင်း ခေါင်းလှည့်လိုက်ပြီး သွေးသန့်စင်ခြင်းအစီအရင်၏ တည်နေရာကို ကြည့်လိုက်သည်။

အစီအရင်ပေါက်ကွဲသွားပြီးနောက် မည်သို့ဆက်ဖြစ်ခဲ့ကြောင်း သူမြင်ချင်သည်။ အကယ်၍ အကြွင်းအကျန်တချို့ ကျန်နေခဲ့မည်ဆိုလျှင်ပင် သူ့အတွက် အဆင်ပြေသည်။

“ အဲ့ဒါက… ”

သို့သော်လည်း သီရှီထျန် ခေါင်းလှည့်လိုက်သည့်အခိုက် သူ၏ မျက်လုံးက ရုတ်တရက် ပြူးကျယ်သွားသည်။ သူ့အရှေ့မှ မြင်ကွင်းကြောင့် မယုံကြည်နိုင်မှုက သူ့မျက်လုံးထဲမှာ ထွက်ပေါ်လာသည်။ သူ့ပါးစပ်သည်ပင် ယင်ကောင်ဝင်အောင်းနိုင်သည်အထိ ဖွင့်ဟသွားသည်။ သူက တဒင်္ဂ မိန်းမောသွားသည်။

သူ့အရှေ့တွင် ယခင်က သွေးသန့်စင်ခြင်းအစီအရင်ရှိနေခဲ့သော နေရာက ပရမ်းပတာဖြစ်နေပြီး ရှုပ်ပွနေသည်။ ဤသည်မှာ နွားတစ်ကောင်က ကောက်ရိုးပုံကို ဝင်ခွေ့သွားသည့်အလားပင်။ ယင်းက အစီအရင်ပေါက်ကွဲမှုမှ ဖြစ်ပေါ်လာသော ရလဒ်ဖြစ်သည်။ သို့သော်လည်း သီရှီထျန်ကို ပါးစပ်အဟောင်းသား ဖြစ်သွားစေသည်မှာ ထိုအချင်းအရာမဟုတ်ပေ။ သူ့ကို မိန်းမောသွားစေသည်မှာ အစီအရင်ရှိနေခဲ့သော နေရာ၏ မြေကြီးပေါ်တွင် ဓားမော့ရှည်တစ်လက်က ထောင်မတ်နေသည်။

ထိုဓားမော့သည် ငါးအရိုးနှင့် ဆင်တူသည်။ အပြင်ပိုင်းတွင် ယင်းက ကြည်လင်တောက်ပသည်။ ယင်း၏ အရောင်က ပယင်းရောင်ဖြစ်သည်။

ဓားမော့သည် ငါးမီတာခန့် ရှည်လျားပြီး ယင်း၏ လက်ကိုင်က ဓားမော့၏ သုံးပုံနှစ်ပုံခန့် ရှည်လျားသည်။ လက်ကိုင်နှင့် ဓားမော့ ထိစပ်နေသော ဆုံချက်နေရာတွင် ချွန်ထက်သော ကျားလက်သည်းများ ရှိသည်။ ယင်းက ဓားမော့၏ ပုံပန်းသဏ္ဍာန်ကို ပိုပြီးကြောက်မက်ဖွယ်ကောင်းစေသည်။ သို့သော်လည်း ယင်းက ရိုင်းစိုင်းကြမ်းကြုတ်မှုနှင့် ကြော့ရှင်းတင့်တယ်မှုကို ပေးသည်။

အထူးခြားဆုံးအပိုင်းမှာ ကျားဝိညာဉ်ဓားမော့၏ လက်ကိုင်နေရာ ထိပ်ပေါ်တွင် အစိမ်းပုပ်ရောင်ပုတီးစေ့တစ်လုံး ရှိသည်။

အစိမ်းရောင်ပုတီးစေ့က ကျားဝိညာဉ်ဓားမော့နှင့် ပြီးပြည့်စုံစွာ တစ်သားတည်း ပေါင်းစပ်နေသည်။ သို့သော်လည်း ပုတီးစေ့၏ မျက်နှာပြင်ပေါ်မှာ အနက်ရောင်အလင်းက ရံဖန်ရံခါ မှိတ်တုတ်မှိတ်တုတ် လင်းလက်သွားသည်။ ယင်းက ထူးဆန်းမှုနှင့် နတ်ဆိုးဆန်သော အရှိန်အဝါကို ထုတ်လွှတ်ပေးသည်။ ထို့ကြောင့် ကျားဝိညာဉ်ဓားမော့ဆီမှာ ကိုယ်ပိုင်နတ်ဆိုးအရှိန်အဝါနှင့် အံ့ဖွယ်ထူးခြားသော အငွေ့အသက် ရှိသည်။

“ ကျား… ကျားဝိညာဉ်ဓားမော့က သန့်စင်ပြီးသွားတာလား ”

သီရှီထျန်သည် သူ့အရှေ့မှ တိုက်ပွဲဓားမော့ကို အံ့ဩမှင်သက်စွာ စိုက်ကြည့်နေသည်။ သူက အနည်းငယ် မိန်းမောသွားသည်။ သူ့အရှေ့မှ မြင်ကွင်းက အမှန်တကယ် မယုံကြည်နိုင်စရာကောင်း၏။ ယင်းက သူ၏ မျှော်လင့်ထားမှုထက် လုံးဝ ကျော်လွန်သွားသည်။ ထိုအခိုက်အတန့်မှာ သူက တစ်စုံတစ်ခုကို ပြန်အမှတ်ရသွားသည်။

သူက သတိမမေ့သွားမီ ဝိညာဉ်ဝါးမျိုကျောက်တုံးနှင့် သွေးနီရောင်ကျောရိုးကို အတင်းအဓမ္မ ပေါင်းစပ်ခဲ့သည်။ ယင်းက ရွေးချယ်စရာမရှိသည့်အဆုံး သူ၏ ကြက်ဥနှစ်လုံးကို ခြင်းတောင်းထဲမှာ ထည့်၍ အလောင်းအစားပြုလုပ်လိုက်သော လုပ်ရပ်ဖြစ်သည်။ ထိုသို့လုပ်ဆောင်လိုက်သည့်အတွက် သူ့အတွက် မျှော်လင့်ချက်သေးသေးလေး ရှိသွားသည်။

သူမမျှော်လင့်ထားသည်မှာ ထိုမျှော်လင့်ချက်သေးသေးလေးက အမှန်တကယ် ဖြစ်လာသည်။

သူတကယ် အောင်မြင်သွားလိမ့်မည်ဟု လုံးဝ မမျှော်လင့်ထားပေ။ သူ့အရှေ့မှ ကျားဝိညာဉ်ဓားမော့၏ အသွင်သဏ္ဍာန်က သတိမမေ့ခင် သူတွေးခဲ့သော ပုံရိပ်နှင့် တစ်ပုံစံတည်း တူညီသည်။ တစ်ခုတည်းသော ခြားနားချက်မှာ သူ၏ ကျားဝိညာဉ်ဓားမော့တွင် အစိမ်းရောင်ပုတီးစေ့တစ်လုံး အပိုပါသည်။

“ ဝှစ် ”

သူက ရုတ်တရက် မတ်တတ်ရပ်လိုက်ပြီး သူ၏ ညာလက်ကို ကျားဝိညာဉ်ဓားမော့ထံသို့ ဆန့်ထုတ်လိုက်သည်။ သူနှင့် ကျားဝိညာဉ်ဓားမော့ကြားမှ သွေးမျိုးဆက် ဆက်နွယ်မှုကြောင့် ကျားဝိညာဉ်ဓားမော့၏ ကိုယ်ထည်က အပြင်းအထန် တုန်ခါသွားသည်။ ဓားမော့က ဟိန်းသံတစ်ချက် ထုတ်လွှတ်လိုက်သည်။ ဓားမော့က ပြင်းထန်စွာ တုန်ယင်နေစဉ် ရိုင်းစိုင်းကြမ်းကြုတ်သော အရှိန်အဝါက အပြင်သို့ ပျံ့နှံ့သွားသည်။

နောက်အခိုက်အတန့်မှာ “ ရွှတ် ”ဟူသော မြည်သံနှင့်အတူ ဓားမော့က မြေကြီးထဲမှ ချက်ချင်း မြှောက်တတ်လာပြီး သီရှီထျန်၏ ညာလက်ထံသို့ တန်းမတ်စွာ ပျံသန်းသွားသည်။ ဓားမော့၏ သေးသွယ်သော လက်ကိုင်က သူ့လက်ထဲမှာ ချက်ချင်း ထွက်ပေါ်လာသည်။

“ ဝှီး ”

ဓားမော့ကို ဆုပ်ကိုင်လိုက်စဉ် ဓားမော့နှင့် သူ့ကြားမှာ လျှို့ဝှက်ဆန်းကြယ်သော ဆက်သွယ်မှုတစ်ခုရှိကြောင်း သူခံစားမိသွားသည်။ ယင်းက သွေးမျိုးဆက် ဆက်သွယ်မှုဖြစ်ပုံပေါ်သည်။ ဤသည်မှာ ဓားမော့က သူ့ခန္ဓာကိုယ်၏ တစ်စိတ်တစ်ပိုင်းဖြစ်သည့်အလားပင်။ ဓားမော့ကို သူဆုပ်ကိုင်လိုက်သည့်အခါ ဓားမော့က ဝမ်းသာပျော်ရွှင်သော စိတ်ခံစားမှုကို ထုတ်လွှတ်လိုက်သည်။

သီရှီထျန်က ဓားမော့ကို သူ၏ ညာလက်ဖြင့် ကိုင်ထားရင်း ဓားမော့၏ အသွားကို သူ၏ ဘယ်လက်ဖြင့် ညင်သာစွာ ပွတ်သပ်လိုက်သည်။ စိတ်လှုပ်ရှားမှုက သူ၏ နှလုံးသားထဲမှာ မဖုံးမဖိနိုင်အောင် ထွက်ပေါ်လာသည်။ ဓားမော့ကို ကြည့်နေရင်း သူက စိတ်လှုပ်ရှားစွာ ပြောလိုက်သည်။

“ ကောင်းတယ်… ကောင်းတယ်… အရမ်းကောင်းတယ်… ကျားဝိညာဉ်ဓားမော့… မိစ္ဆာနတ်ဘုရားချီယုံရဲ့ အစွမ်းထက် တိုက်ပွဲလက်နက်နဲ့ ဆင်တူတဲ့ လက်နက်တစ်ခုကို နောက်ဆုံးတော့ ငါပိုင်ဆိုင်သွားပြီ… ကျားဝိညာဉ်ဓားမော့… ဒီနေ့ကစပြီး မင်းငါ့နောက်ကိုလိုက်ပြီး မရေမတွက်နိုင်တဲ့ တိုက်ပွဲတွေကို ရင်ဆိုင်ရမယ်… အနာဂတ်မှာ ငါတို့တွေ သေအတူရှင်မကွာ ရှိနေကြမယ်… ဘယ်တော့မှမခွဲဘူး ”

“ ရွှီး ”

ကျားဝိညာဉ်ဓားမော့သည် သီရှီထျန်၏ နှလုံးသားထဲမှ စိတ်ခံစားချက်ကို ခံစားမိသည့်အလား စိတ်လှုပ်ရှားသော ဟိန်းသံကို ထုတ်လွှတ်လိုက်သည်။ တစ်ချိန်တည်းမှာ ယင်းက ဝမ်းသာပျော်ရွှင်သော စိတ်ခံစားမှုကို ထုတ်လွှတ်လိုက်သည်။ ယင်းက အလွန်ထူးဆန်းသည်။

ယခုအချိန်မှာ ကျားဝိညာဉ်ဓားမော့ မည်သို့ဖွဲ့စည်းသွားကြောင်း သူစိတ်မဝင်စားတော့ပေ။ သူက ကျားဝိညာဉ်ဓားမော့၏ ထူးခြားချက်များကို စမ်းသပ်ရန် သူ၏ မိစ္ဆာအာရုံကို ဓားမော့ထဲသို့ စေလွှတ်လိုက်သည်။

တစ်ခဏကြာပြီးနောက် သီရှီထျန်၏ မျက်လုံးထဲမှာ ထူးဆန်းသော အကြည့် ထွက်ပေါ်လာသည်။ ထူးဆန်းသော အကြည့်ထဲမှာ မယုံကြည်နိုင်သော အရိပ်အယောင်လည်း ရှိသည်။

“ ဒီလိုနတ်ဘုရားလက်နက်ကို ငါဖန်တီးသန့်စင်နိုင်လိမ့်မယ်လို့ လုံးဝ မမျှော်လင့်ထားဘူး… ဒါပေမဲ့ ဒီဟာကို သက်စောင့်မိစ္ဆာလက်နက်လို့ သတ်မှတ်နိုင်ပါ့မလား ”

တစ်ခဏကြာပြီးနောက် သူက မသေချာမရေရာစွာ ပြောသည်။ သူ၏ မျက်နှာပေါ်မှာ ဇဝေဇဝါဖြစ်သော အမူအရာရှိသည်။ ကျားဝိညာဉ်ဓားမော့ကို သူသန့်စင်ခဲ့သည့်အချိန်မှာ မမျှော်လင့်ထားသော အဖြစ်အပျက်များ ဖြစ်ပျက်ခဲ့သည်။ ထို့ကြောင့် သက်စောင့်မိစ္ဆာလက်နက်သန့်စင်သော သူ၏ လုပ်ငန်းစဉ်က အောင်မြင်သွားသည်လော ကျရှုံးသွားသည်လော သူမသေချာပေ။

ပထမဆုံးအချက်မှာ အန္တိမကောင်းကင်ဘုံကိုးခုမူလပြန်အစီအရင်ကို လက်နက်ပေါ်မှာ သတ်မှတ်ထားသော အချိန်အတွင်း သူမရေးထွင်းနိုင်ခဲ့ပေ။ အန္တိမကောင်းကင်ဘုံကိုးခုမူလပြန်အစီအရင်ကို ရေးထွင်းထားမှသာလျှင် လက်နက်က တခြားဓမ္မလက်နက်များ၏ စွမ်းအင်အနှစ်သာရကို စုပ်ယူပြီး ဆင့်ကဲပြောင်းလဲနိုင်လိမ့်မည်။

ယေဘုယျအားဖြင့်ဆိုရသော် အန္တိမကောင်းကင်ဘုံကိုးခုမူလပြန်အစီအရင်မရှိလျှင် လက်နက်က နောက်ထပ် အဆင့်တတ်ပြီး ဆင့်ကဲပြောင်းလဲသွားလိမ့်မည် မဟုတ်ချေ။

သို့သော်လည်း ထူးဆန်းဖွယ်ကောင်းသည်မှာ သူ၏ ကျားဝိညာဉ်ဓားမော့ဆီမှာ အန္တိမကောင်းကင်ဘုံကိုးခုမူလပြန်အစီအရင် မရှိသော်လည်း ယင်း၏ ဆင့်ကဲပြောင်းလဲနိုင်သော စွမ်းရည်ကို မဆုံးရှုံးသွားပေ။ အဘယ့်ကြောင့်ဆိုသော် နောက်ဆုံးအချိန်မှာ သူပေါင်းထည့်ခဲ့သော ဝိညာဉ်ဝါးမျိုကျောက်တုံးကြောင့် ဖြစ်သည်။ ယင်းက ကျားဝိညာဉ်ဓားမော့အား အကန့်အသတ်မဲ့သော ဝါးမျိုနိုင်စွမ်းကို ပေးအပ်ထားသည်။ ထို့ကြောင့် ကျားဝိညာဉ်ဓားမော့သည် သွေးချီအနှစ်သာရနှင့် ဝိညာဉ်ကို ဝါးမျိုနိုင်စွမ်းရှိသည်။ တစ်စုံတစ်ယောက်သည် ကျားဝိညာဉ်ဓားမော့ဖြင့် ခုတ်ပိုင်းခံရလျှင် သူ၏ ခန္ဓာကိုယ်ထဲမှ သွေးချီအနှစ်သာရက ဓားမော့၏ ဝါးမျိုခံရလိမ့်မည်။ ထိုမျှသာ မဟုတ်ပေ။ ဓားမော့က ဝိညာဉ်ကိုလည်း ဝါးမျိုနိုင်သည်။

သွေးချီအနှစ်သာရနှင့် ဝိညာဉ်များကို အတိုင်းအတာတစ်ခုထိ ဝါးမျိုပြီးသွားလျှင် ကျားဝိညာဉ်ဓားမော့က ဆင့်ကဲပြောင်းလဲသွားပြီး ထူးဆန်းသော အခြေအနေဆီသို့ ပြောင်းလဲသွားလိမ့်မည်။

ထို့ပြင် ဝိညာဉ်ဝါးမျိုကျောက်တုံး၏ အံ့ဖွယ်စွမ်းရည်များကြောင့် ကျားဝိညာဉ်ဓားမော့က အကန့်အသတ်မဲ့သော အလားအလာကိုလည်း ပိုင်ဆိုင်သွားသည်။ ထိုမျှသာ မဟုတ်ပေ။ ကျားဝိညာဉ်ဓားမော့က အလွယ်တကူ မပျက်စီးနိုင်သော မာကျောမှုနှင့် အစွန်းရောက်ထက်ရှမှုကိုလည်း ပိုင်ဆိုင်ထား၏။

ထက်ရှမှုက ပြိုင်ဘက်ကင်းထက်ရှမှုကို ရည်ရွယ်သည်။ မာကျောမှုကိုတော့ အထူးပြောနေစရာ မလိုပေ။ မည်သို့ဖြစ်ပါစေ သူက ကျားဝိညာဉ်ဓားမော့ကို မပျက်စီးနိုင်သော ကျားအရိုးဖြင့် ဖန်တီးသန့်စင်ခဲ့ခြင်း မဟုတ်ပါလော။ သို့ဖြစ်၍ ကျားဝိညာဉ်ဓားမော့ကို ဖျက်ဆီးပစ်ရန်သည် မလွယ်ကူပေ။

သို့သော် ပြိုင်ဘက်ကင်းထက်ရှမှုနှင့် မပျက်စီးနိုင်သော မာကျောမှုမှလွဲ၍ ကျားဝိညာဉ်ဓားမော့ဆီမှာ တခြားထူးခြားချက်များ မရှိပေ။

ဓားမော့ထဲမှ အစိမ်းရောင်ပုတီးစေ့သည် ဝိညာဉ်ဝါးမျိုကျောက်တုံးမှ ဖွဲ့စည်းသွားသော စွမ်းအင်အနှစ်သာရဖြစ်သည်။ ယင်းက ကျားဝိညာဉ်ဓားမော့၏ အရေးကြီးဆုံး အစိတ်အပိုင်းဖြစ်သည်။ အဘယ့်ကြောင့်ဆိုသော် ကျားဝိညာဉ်ဓားမော့ဆီမှာ ဆင့်ကဲပြောင်းလဲနိုင်သော စွမ်းရည်ရှိနေခြင်းက ထိုအစိမ်းရောင်ပုတီးစေ့ကြောင့် ဖြစ်သည်။

“ ရွှတ် ”

သူက ကျားဝိညာဉ်ဓားမော့ကို စိုက်ကြည့်လိုက်သည်။ သူက လက်ကောက်ဝတ်ကို လှုပ်ရှားလိုက်ပြီး ဓားမော့ကို လွှဲယမ်းလိုက်သည်။ သူက အနီးနားမှ ကျောက်တုံးနံရံကို ဦးတည်၍ ဓားမော့ဖြင့် ခုတ်လိုက်သည်။ ချက်ချင်းဆိုသလိုပင် ထူးဆန်းသော မြင်ကွင်းတစ်ခု ဖြစ်ပေါ်လာသည်။ ဓားမော့က ကျောက်တုံးနံရံကို မထိသွားသော်လည်း အလွန်နက်ရှိုင်းသော ဓားအမှတ်အသားတစ်ခုက ကျောက်တုံးနံရံပေါ်မှာ ထွက်ပေါ်လာသည်။ ဤသည်မှာ ကျောက်တုံးနံရံက တိုဟူးနှင့် မခြားသည့်အလားပင်။ ယင်းကို ကြည့်ခြင်းအားဖြင့် ကျားဝိညာဉ်ဓားမော့၏ ထက်ရှမှုက မည်မျှကြောက်စရာကောင်းကြောင်း မြင်နိုင်ပေသည်။