အခန်း ၂၆၂၅

အပိုင်း(၂၆၂၅)

"မင်းတို့ လေးကောင် ဘာလုပ်နေကြတာလဲ..."

ဝေ့ဝူယင် က မေးမြန်းလိုက်သည်။ မားဂတ် ၏ လျှို့ဝှက် အသွင်သည် တုန်ခါသွားခဲ့သည်။ တိုးတိတ်သော ညည်းတွားသံ အချို့မှလွဲ၍ ၎င်းသည် အခြား မည်သည့်အရာကိုမျှ မပြောဆိုနိုင်တော့ပေ။ သို့သော် ဝေ့ဝူယင် ၏ စိတ်ထဲတွင် ဤအဆော့မက်သော လျှို့ဝှက် ဝိညာဉ်များသည် ကောက်ကျစ်စဉ်းလဲပြီး ဖီဆန်သော အကြံအစည် တစ်ခုခုကို ကြံစည်နေကြောင်း ကြိုတင် ခံစားသိရှိနေခဲ့သည်။ သူ ဆက်လက် စစ်မေးရန် ပြင်လိုက်စဉ် ဧဒင် က ဝင်ရောက် မေးမြန်းလိုက်သည်။

"ခင်ဗျားက ကောင်းကင် အလင်းစက် ကို အသီနာ ဒါမှမဟုတ် ညီအစ်မ နှစ်ယောက်ကို ကျွေးမလို့လား..."

ဝေ့ဝူယင် ၏ အာရုံသည် ဤဆုံးဖြတ်ချက်ကြောင့် ချက်ချင်း လွင့်စဉ်သွားခဲ့သည်။ ကောင်းကင် အလင်းစက်သည် သေချာပေါက် အကျိုးရှိမည် ဖြစ်သော်လည်း မည်မျှအထိ အကျိုးရှိမည်ကို သူ မသိခဲ့ပေ။ ထို့အပြင် ဝမ်မင်ယာ သူမ၏ တာဝန်ကို ပြီးမြောက်သည်အထိ ကောင်းကင် အလင်းစက် ကို သိမ်းဆည်းထားသင့် မသင့် ဆိုသည်ကိုလည်း သူ မဆုံးဖြတ်တတ်ပေ။ သို့ရာတွင် ဤကောင်းကင် အလင်းစက် သည် သူ၏ ခံတွင်းတွေ့မှုကို ဖြေဖျောက်ရန် မလုံလောက်ခဲ့ပေ။ ထို့အပြင် ဝမ်မင်ယာ ချန်ရစ်ခဲ့သော သတင်းစကား တစ်ခုလည်း ရှိနေခဲ့သည်။

စကားလုံး နှစ်လုံးတည်းသာ ဖြစ်သည်။ "ယုံကြည်ပါ" နှင့် "မြည်းစမ်းပါ" တို့ပင်တည်း။

ပထမ စကားလုံးကို သူ နားလည်ခဲ့သည်။ သူမက သူ့ကို ဝေးဝေးတွင် နေစေချင်ပြီး သူမကို အပြည့်အဝ ယုံကြည်စေလိုခြင်း ဖြစ်သည်။ စန်းယွန်းလီ နှင့် ထျန်းရီဝူ တို့သည် လျင်မြန်သော တိုးတက်မှုကို ခံစားနေရသည့် ကောင်းချီးခံ များ ဖြစ်ကြသည်။ သူမသည် အလွန် သတိထားနေခဲ့သည်။ သူမသည် မိမိကိုယ်တိုင် ဖန်တီးထားသော ဟန်ချက်ညီမှုကို မပျက်စီးစေချင်သလို သတိပေးမိသလိုမျိုးလည်း မဖြစ်စေချင်ပေ။

ထို့အပြင် သူမသည် သူ၏ လက်ရှိ ကျင့်ကြံခြင်း အခြေခံ သို့မဟုတ် အဆင့်အတန်းကို မသိရှိခဲ့ပေ။ ဤအရာကို ထုတ်ယူစဉ် အချိန်က သူသည် အဆင့်နိမ့် ဂလက်ဆီ များကို လေ့လာစူးစမ်းနေပြီး ခွန်အားနှင့် အဆင့်အတန်းများ တိုးတက်နေခဲ့သည်။ သူမ၏ အစီအစဉ်များကို သူ အင်အားသုံး၍ လျင်မြန်အောင် လုပ်ဆောင်ပေးနိုင်သည်ကို သူမ လုံးဝ မသိရှိခဲ့ပေ။ သို့သော် အကယ်၍ သူ ထိုသို့ ပြုလုပ်လိုက်ပါက သူမ အနေဖြင့် ကောင်းချီးခံ များ၏ ကံကြမ္မာများကို စုပ်ယူသည့် သူမ၏ ပညာရပ်ကို သွေးတိုးစမ်းရန် အခွင့်အရေး ဆုံးရှုံးသွားပေလိမ့်မည်။

သူသည် သူမထံမှ ထိုအခွင့်အရေးကို လုယူရန် ရည်ရွယ်မထားခဲ့ပေ။ ၎င်းသည် အနာဂတ်တွင် အလွန် အသုံးဝင်လာနိုင်ပေသည်။ အထူးသဖြင့် အနာဂတ်တွင် အသစ်တက်လှမ်းလာမည့် စုရီ နှင့် မတူဘဲ မရေမတွက်နိုင်သော နှစ်ကာလများကတည်းက အခြေချလာခဲ့သည့် အင်ပီရီယန်များ နှင့် ရင်ဆိုင်ရချိန်တွင် အလွန် အသုံးဝင်လာမည် ဖြစ်သည်။

မြည်းစမ်းပါ ဆိုသည့် စကားလုံးမှာမူ ဤ ကောင်းကင် အလင်းစက် အတွက် ရည်ရွယ်ရေးသားထားခြင်း ဖြစ်သည်မှာ ထင်ရှားလှပေသည်။ သူမသည် သူ့ကို ၎င်း၏ အသုံးဝင်မှုများကို စမ်းသပ်စေချင်ခဲ့သည်။ ၎င်းသည် ညင်သာပြီး အလုံပိတ် ချိပ်စည်း အမျိုးမျိုး အောက်တွင် ရှိနေသည်။ ထို့ကြောင့် သူ၏ ကိုင်တွယ်မှုကို မည်သည့် တန်ပြန်တိုက်ခိုက်မှုမျှ မရှိဘဲ လက်ခံနိုင်စေသည်။ သူမသည် စန်းယွန်းလီ အတွက်သာ ရည်ရွယ်ထားသော ဤကံကြမ္မာကို တည်ငြိမ်သွားစေရန် ပြုလုပ်ထားခဲ့သည်။ အလွန်တရာ အံ့မခန်းပင် ဖြစ်ပေသည်။

"ဒြပ်စင်... ဒြပ်စင်..."

အိုရီ က ဝင်ရောက် ပြောဆိုလိုက်သည်။ ၎င်း၏ ဘက်လိုက်မှုမှာ အလွန် ထင်ရှားနေခဲ့သည်။ ဒြပ်စင် သည် ဘုရင် နှင့် အိုရီ တို့၏ ကလေးငယ် တစ်ဦးနှင့် ခြားနားမှု မရှိပေ။ သို့သော် သူကလည်း သဘောတူရန် ယိမ်းယိုင်နေခဲ့သည်။ ကောင်းကင် အလင်းစက် သည် အသီနာ ၏ ကောင်းကင် တံခါးပေါက် ကို မြှင့်တင်ပေးသင့်ကြောင်း သို့မဟုတ် ပိုင်ရှု များအား လျှို့ဝှက်ကောင်းကင် သို့မဟုတ် လျှို့ဝှက်ဝိညာဉ် အဆင့် ထုတ်ကုန်များ ဖော်စပ်ရာတွင်ပင် ကူညီပေးသင့်ကြောင်း သူ သိရှိထားသည်။ သို့သော် ဒြပ်စင် ကား လျှို့ဝှက်ဆန်းကြယ်မှု တစ်ခု ဖြစ်နေခဲ့သည်။

"စားမယ်..."

ဒြပ်စင်၏ အသံသည် တောင်းပန်တိုးလျှိုးစွာဖြင့် ပဲ့တင်ထပ်သွားခဲ့သည်။ ၎င်းသည် အသိဉာဏ်ပိုင်းဆိုင်ရာတွင် ကြီးထွားလာနေခဲ့သည်။ ၎င်းသည် တာအိုမီးပွား တစ်ခု ဖြစ်လာတော့မည်လော။ ထိုအကြောင်းကို တွေးတောလိုက်မိစဉ် သူ၏ စိတ်အာရုံ တစ်ခုလုံးသည် အံ့အားသင့်မှုဖြင့် ရပ်တန့်သွားခဲ့လေသည်။

ကောင်းကင် တာအိုမီးပွားများသည် မည်သည့်နေရာမှ ရောက်ရှိလာကြသနည်း။ ၎င်းတို့သည် ကောင်းကင် ရတနာများ သို့မဟုတ် အထွတ်အထိပ် ကောင်းကင် ရတနာများ မဟုတ်ကြောင်း ထင်ရှားလှသည်။ ၎င်းတို့က အခြေတည် ဝိညာဉ် များထံမှ ဆင်းသက်လာခြင်းများလော။ ဤသည်မှာ မားဂတ် ပင်လျှင် ဖြေဆိုနိုင်ခြင်း မရှိသော မေးခွန်းတစ်ခု ဖြစ်ပေသည်။ မှတ်ဉာဏ်များ သို့မဟုတ် မှတ်တမ်းများထံမှ သူ သိမ်းဆည်းရမိထားသော မည်သည့် သတင်းအချက်အလက်တွင်မှ ကောင်းကင် တာအိုမီးပွားများ နှင့် ပတ်သက်၍ တစ်စုံတစ်ရာ မှတ်တမ်းတင်ထားခြင်း မရှိပေ။

သို့သော် တစ်နေ့နေ့တွင် ဒြပ်စင် သည် အသီနာ သို့မဟုတ် ပိုင်ရှု တို့ကဲ့သို့ပင် ၎င်းကို ဖန်တီးခဲ့သော တာအို နှင့် ပဲ့တင်ထပ် ချိတ်ဆက်နိုင်ခဲ့မည် ဆိုလျှင်၊ ၎င်းသည် တာအို ဝိညာဉ် တစ်ခုအဖြစ်သို့ ပြောင်းလဲသွားမည်လော။ သို့သော် လျှို့ဝှက် ဆေဘာ စွမ်းအင် နှင့် လျှို့ဝှက် ဆေဘာ သွေးကြော တို့ကရော။ တိတိကျကျ ပြောရမည်ဆိုလျှင် ဒြပ်စင် သည် အိုရီ နှင့် ဘုရင် တို့ထံမှ မြစ်ဖျားခံလာသော တာအို များစွာ၏ ပေါင်းစပ်မှု တစ်ခု ဖြစ်ပေသည်။ အကယ်၍ ၎င်းသာ တာအို ဝိညာဉ် တစ်ခု ဖြစ်လာခဲ့လျှင် မည်သို့ ဖြစ်လာမည်နည်း။ ဤအတွေးက အဆုံးမဲ့သော စိတ်ဝင်စားမှုကို ဖြစ်ပေါ်စေခဲ့လေသည်။

"မင်း ဒါကို ယူလို့ရပြီ..."

ဝေ့ဝူယင် သည် ကောင်းကင် အလင်းစက် ကို ဒြပ်စင် အား ကျွေးမွေးရန် ဆုံးဖြတ်လိုက်သည်။ မည်သို့ ဖြစ်လာမည်ကို သူ သိရှိရန် လိုအပ်ပေသည်။ မူလက သူသည် ပဉ္စမအဆင့်သို့ တက်လှမ်းနိုင်ရန် ဒြပ်စင် အား အာဏာရှင် နှင့် ဂလက်ဆီ အဆင့် စစ်ဝိညာဉ်များ ကို သန့်စင်ပြီး ချေဖျက်စေရန် ရည်ရွယ်ထားခဲ့သည်။ သို့သော်လည်း ယခုအခါတွင် အံ့သြဖွယ်ကောင်းသော တစ်စုံတစ်ရာ ဖြစ်ပေါ်လာနိုင်ပေသည်။ ထို့အပြင် နောက်တစ်လှမ်း ဆုတ်၍ စဉ်းစားကြည့်မည်ဆိုလျှင် ဒြပ်စင်၏ လျှို့ဝှက် ဆေဘာ စွမ်းအင် ကို မြှင့်တင်ခြင်းသည် ၎င်း၏ အရည်အသွေးကိုသာ ပြုပြင်ပြောင်းလဲပေးပုံ ရပြီး ၎င်း၏ မူလ အုတ်မြစ်ကို ပြောင်းလဲပေးနိုင်ခြင်း မရှိပေ။ ဤအရာသည် ၎င်းကို ထပ်မံ၍ ဆင့်ကဲပြောင်းလဲရန် လိုအပ်သော မရှိမဖြစ် အရာတစ်ခု ဖြစ်နိုင်ပေသည်။

ဒြပ်စင်၏ ရုပ်လုံးပေါ်လာသော ပုံသဏ္ဌာန်သည် အတွင်းပိုင်း လောက အတွင်းသို့ လက်ကနဲ ဝင်ရောက်သွားခဲ့သည်။ ၎င်းသည် ဝေ့ဝူယင် သယ်ဆောင်ထားသော ရုပ်ပိုင်းဆိုင်ရာ ကမ္ဘာတစ်ခု ဖြစ်သောကြောင့် ဝိညာဉ်ပုံစံဖြင့် လာရောက်ရန် မလိုအပ်ခဲ့ပေ။ ကောင်းကင် အလင်းစက် သည် ၎င်း၏ အစွန်းဘက်သို့ ညင်သာစွာ ပျံသန်းသွားခဲ့ပြီး ၎င်း၏ ထိပ်ဖျားကို နှစ်ဝင်သွားစေခဲ့သည်။ ထိုအခါ မျက်စိကျိန်းလောက်သော ရွှေရောင် အလင်းတန်းများ ပေါက်ကွဲထွက်ပေါ်လာခဲ့သည်။ ၎င်းမှာ အလွန်တရာ ပြင်းထန်လွန်းလှသဖြင့် ဝေ့ဝူယင် ၏ စိတ်ဝိညာဉ် ကိုယ်ပွား သည်ပင် ဖျက်ဆီးခံလိုက်ရလေသည်။

အတွင်းပိုင်း လောကအတွင်းရှိ သောင်းကျန်းနေသော လှုပ်ရှားမှုများကို အာရုံခံမိလိုက်သောအခါ ဝေ့ဝူယင် ၏ စိတ်ဝင်စားမှုမှာ ပိုမို ကြီးထွားလာခဲ့သည်။

ထိုသို့ ဖြစ်ပေါ်နေစဉ် ပိုင်ရှု များရော အသီနာ ပါ ကောင်းကင် အလင်းစက် ကို ရယူရန် မည်သည့်အတွက်ကြောင့် စကားမဟခဲ့ကြသနည်း ဟူသည့်အချက်ကို သူ သိချင်နေခဲ့သည်။ ချက်ချင်းပင် သူ၏ နှလုံးသားထဲတွင် နောက်ကျနေသော သံသယတစ်ခု ပေါ်ပေါက်လာခဲ့လေသည်။ သူ၏ စိတ်ဝိညာဉ် ကိုယ်ပွား ကို သူ၏ စိတ်အာရုံ မျက်လုံး ထံသို့ စေလွှတ်လိုက်သောအခါ၊ ထို တာအို ဝိညာဉ် သုံးခုသည် ဖီဆန်ပေါက်စ ၏ နေကြယ် အမတေ တွင် ရေချိုးရင်း စုရုံးကာ အခြား အကြောင်းအရာများကို ပြင်းပြင်းထန်ထန် ဆွေးနွေးနေကြသည်ကို သူ တွေ့ရှိလိုက်ရသည်။

သံသယများက ပိုမို ကြီးထွားလာခဲ့သည်။

နောက်ဆုံးတွင် သူသည် ၎င်းတို့ကို မေးခွန်းထုတ်မနေတော့ပေ။ သူတို့သည် တိတ်ဆိတ်စွာ နေခဲ့ကြပြီး သူ၏ ဆုံးဖြတ်ချက်ကို ကန့်ကွက်ခဲ့ခြင်း မရှိသောကြောင့် ကောင်းမွန်သော အကြောင်းပြချက် တစ်ခု ရှိနေမည်မှာ သေချာလှပေသည်။

ဝေ့ဝူယင် မသိရှိခဲ့သော အချက်မှာ၊ ထိုအကြောင်းပြချက်သည် သူ တွေးထင်ထားသည်ထက် များစွာ ပို၍ ရိုးရှင်းနေခဲ့ခြင်းပင် ဖြစ်သည်။ ၎င်းကို အိုရီက အရင်ဦးဆုံး ပိုင်ဆိုင်ကြောင်း ကြွေးကြော်ထားခဲ့ခြင်းကြောင့် ပင်တည်း။

ကောင်းကင် အလင်းစက် ကို ချေဖျက်ပြီးနောက် ဒြပ်စင် သည် တဖြည်းဖြည်း ကြီးထွားမှုအတွက် ဆောင်းခိုခြင်း အခြေအနေသို့ ဝင်ရောက်သွားခဲ့သည်။ ၎င်းသည် လေးနာရီထက်ပို၍ အချိန်ယူရပေမည်။ ထို့ကြောင့် ဝေ့ဝူယင် သည် သူ၏ အချိန်များကို တီလီ နှင့်အတူ ထပ်မံ အသုံးချရန် ဆုံးဖြတ်လိုက်လေသည်။ သူတို့၏ အာကာသ ပူဖောင်းငယ်လေး အတွင်း၌ သူမ၏ ပျော်ရွှင်သာယာဖွယ်ကောင်းသော ကာမဂုဏ် အသံများသည် ထပ်တလဲလဲ ပဲ့တင်ထပ်နေခဲ့သည်။

...

ပြင်ပ ကြယ်ကွင်းပြင် စည်းမျဉ်း စစ်မြေပြင်

၎င်းသည် သီးခြား နန်းတော်များမှသည် မြို့ကြီးများအထိ၊ တန်ခိုးရှင် ဒဏ္ဍာရီများထဲမှ လိုဏ်ဂူများကို အမှတ်ရစေသော လူလုပ် တောင်တန်းများ အပါအဝင် နေအိမ်အဆောက်အအုံများ ပြန့်ကျဲနေသည့် ကျယ်ပြောလှသော နယ်မြေကြီး တစ်ခု ဖြစ်ပေသည်။ ရုန်းကန်မှုများနှင့် သေဆုံးခြင်းများ ပြည့်နှက်နေသော ရက်စက်ကြမ်းကြုတ်သည့် စစ်မြေပြင်တစ်ခုနှင့် မလိုက်ဖက်အောင် ကြီးကျယ်ခမ်းနားလှသော ရှုခင်းများဖြင့် အလှဆင်ထားခဲ့သည်။ လုပ်ကြံဖန်တီးထားသော အလှတရားအောက်တွင် အမှန်တရားသည် ပုန်းကွယ်နေခဲ့သည်။

စစ်မြေပြင် တစ်ခုလုံးသည် ဇိမ်ကျကျ နေထိုင်နိုင်ပြီး သက်ဝင်လှုပ်ရှားမှုများ ပြည့်နှက်နေခဲ့သည်။ ဝေ့ဝူယင် ရောက်ရှိလာသောအခါ ကျင့်ကြံသူ များ နေထိုင်ရာ ဂြိုဟ်တစ်ခုသို့ ရောက်ရှိသွားသကဲ့သို့ ချက်ချင်း ခံစားလိုက်ရလေသည်။ ဖယ်ရှား၍ မရနိုင်သော သွေးနံ့ သဲ့သဲ့နှင့် သေမင်းတမန် ငိုကြွေးသံများ ပါဝင်သော လေပြေလေညင်းလေးများ ဆိုသည့် ခြားနားချက် နှစ်ခုသာလျှင် ရှိပေသည်။

"ဒါက ပြင်ပ စစ်မြေပြင် လား..."

ဝေ့ဝူယင်က မေးမြန်းလိုက်သည်။ တီလီက နှုတ်ခမ်းကို စုဆန့်ထားရင်း သူမ၏ အဝတ်အစားနှင့် လျော့ရဲနေသော ဆံပင်များကို ကမန်းကတန်း ပြင်ဆင်ကာ ဆံပင်ကို မြင်းမြီးပုံစံ အမြန် စည်းနှောင်လိုက်သည်။ သူမသည် ဝေ့ဝူယင် အား သံသယဖြစ်ဖွယ် မျက်လုံးများဖြင့် မနာလိုစွာ ကြည့်လိုက်လေသည်။ သူမကို အကြိမ်ကြိမ် အချစ်ကြမ်းခဲ့ပြီး ကာမဂုဏ်အရသာ လှိုင်းလုံးများထဲသို့ နစ်မြုပ်သွားစေခဲ့သော်လည်း၊ ထိုအမျိုးသားသည် ပင်ပန်းနွမ်းနယ်ပုံ မရဘဲ အပြစ်အနာအဆာကင်းစွာ တည်ငြိမ်နေပုံရသည်။ အထူးသဖြင့် မကြာသေးမီက သူတို့တွင် အခြား လက်တွဲဖော် နှစ်ဦးလည်း ရှိခဲ့သေးသောကြောင့် ပို၍ပင် အံ့သြစရာ ကောင်းနေခဲ့သည်။

နောက်ဆုံးတွင် သူမသည် ကောင်းစွာ ဖွံ့ဖြိုးတိုးတက်နေသော ဇုံကို အကဲခတ်ကြည့်လိုက်ပြီး ခေါင်းညိတ်လိုက်သည်။

"ဒီ ပြင်ပ စစ်မြေပြင်၊ သူ့ရဲ့ ဇုံ ဝင်ပေါက်ကို အစွမ်းကုန် သန့်စင်ခြင်း ဂလက်ဆီ လို့ ခေါ်တဲ့ ဂလက်ဆီ တစ်ခုက သိမ်းပိုက်ထားတာ... ဒါကြောင့် သူတို့ဆီမှာ အဓိကအားဖြင့် အဂ္ဂိရတ် ပညာရှင်တွေ ရှိကြတယ်... ဒါပေမဲ့ သူတို့ရဲ့ လူနေမှုပုံစံကတော့ အတော်လေးကို... ထူးဆန်းတယ်... ဒါ့အပြင် သူတို့က ရူးသွပ်လောက်အောင်ကို လွှမ်းမိုးချယ်လှယ်ချင်ကြတာ..."

"လွှမ်းမိုးချယ်လှယ်ချင်ကြတယ်..."

အတွင်းပိုင်း စစ်မြေပြင်များသည် ကြယ်ကွင်းပြင် များတွင် ချိပ်ပိတ်ထားလေ့ရှိပြီး ပြင်ပ စစ်မြေပြင်များ တွင်မူ ဂလက်ဆီ များကိုပါ ထည့်သွင်းထားကြောင်း ဝေ့ဝူယင် သိရှိထားသည်။ ဤနေရာသည် အစွမ်းကုန် သန့်စင်ခြင်း ဂလက်ဆီ ၏ ပြင်ပ စစ်မြေပြင် ဇုံများထဲမှ တစ်ခု ဖြစ်ပေသည်။ မဟာ ဂလက်ဆီ များသည် ကြီးထွားလာသည့် ပမာဏအရ တစ်ခါတစ်ရံ ဂလက်ဆီ တစ်ခုလုံးကို ဝါးမြိုပစ်လေ့ရှိသောကြောင့် ဤအရာမှာ သာမန် ဖြစ်ရိုးဖြစ်စဉ် တစ်ခုသာ ဖြစ်ပေသည်။

***