အခန်း ၆၈၈

အခန်း ၆၈၈ - ကံကြမ္မာများ တဟုန်ထိုး မြင့်တက်လာခြင်း၊ ပြီးပြည့်စုံခြင်းအဆင့် မူလကိုယ်ပွားအင်း (၃)

မည်သို့ပင်ဆိုစေကာမူ တစ်ခါတစ်ရံတွင် အစီအရင်၏ စွမ်းအားမှာ အလွန်အမင်း ကြီးမားလှပြီး အားနည်းသူက အားကြီးသူကို အနိုင်ယူနိုင်စွမ်း ရှိပေသည်။

သာမန် ကျင့်ကြံသူများသည် အစီအရင်များနှင့် ပတ်သက်၍ နားမလည်ပါက အစီအရင် ဆရာတစ်ဦး၏ လှည့်စားကစားခြင်းကို ခံရနိုင်ချေရှိ၏။

"နောက်ထပ် အဆင့်တက်ဖို့ ကျန်နေသေးတာက ကြာညိုမြေကမ္ဘာမီးလျှံအင်း၊ လိပ်နက် ကာကွယ်ရေးအင်းနဲ့ ဓားတစ်သောင်း ဂိုဏ်းသို့ ပြန်လည်ရောက်ရှိခြင်း အင်းတွေပဲ။"

"အကယ်၍ အဲဒါတွေကိုသာ ပြီးပြည့်စုံခြင်းအဆင့်အထိ ကျင့်ကြံနိုင်မယ်ဆိုရင် သူတို့ရဲ့ စွမ်းအားတွေက ဘယ်နှစ်ဆတောင် မြင့်တက်လာမလဲဆိုတာ မှန်းဆလို့တောင် ရမှာမဟုတ်ဘူး။ တောင်ပံခြောက်စုံ အဆိပ်ပျားတွေရဲ့ အဆိပ်တံထက်တောင် ပိုပြီး ကြောက်စရာကောင်းတဲ့ တိုက်ခိုက်မှုတွေ ဖြစ်လာနိုင်တယ်။"

ကျန်းဖန်သည် ၎င်းကို အလွန်အမင်း မျှော်လင့်စောင့်စားနေမိ၏။

မည်သို့ပင်ဆိုစေကာမူ သူသည် ဤအသက်သွေးကြောအင်းများကို အချိန်အတော်ကြာကတည်းက ကျင့်ကြံလာခဲ့သော်လည်း ယွမ်ယင်းအဆင့်သို့ တက်လှမ်းပြီးသည့် အချိန်မှသာ ပြီးပြည့်စုံခြင်း အဆင့်သို့ ရောက်ရှိနိုင်မည့် မျှော်လင့်ချက် ရောင်ခြည်ကို မြင်တွေ့ခဲ့ရခြင်း ဖြစ်သည်။

သို့သော် သူ အလောတကြီး မရှိပါချေ။

ဤကိစ္စရပ်များကို အလောတကြီး လုပ်ဆောင်၍ မရနိုင်ဘဲ တစ်ဆင့်ပြီးတစ်ဆင့် ဖြည်းဖြည်းချင်း ကျော်ဖြတ်သွားရန် လိုအပ်ကြောင်းကို သူ ကောင်းစွာ သိရှိထား၏။ သို့မှသာ အလောတကြီး လုပ်ခြင်းကြောင့် ဖြစ်ပေါ်လာမည့် ကျရှုံးမှုများကို ရှောင်ရှားနိုင်မည် ဖြစ်သည်။

"ဒါပေမယ့် ဒီအချိန်ကာလအတွင်းမှာ အကြီးမားဆုံး အကျိုးအမြတ်ကတော့ ကံကြမ္မာပဲ။"

"နှစ်အနည်းငယ်လောက် ဖွံ့ဖြိုးတိုးတက်လာပြီးတဲ့နောက်မှာ မူလအင်းဂိုဏ်းရဲ့ ကံကြမ္မာက နှစ်ဆတောင် တိုးလာခဲ့ပြီ။"

ကျန်းဖန်၏ စိတ်ထဲ၌ လှုပ်ရှားသွားပြီး ဧကရာဇ်၏ အကြည့် နတ်ဘုရားစွမ်းအားကို အသုံးပြုလိုက်ရာ၊ သူ၏ ဦးခေါင်းထက်၌ ဝဲပျံနေသော ကံကြမ္မာ ရွှေနဂါးကြီးကို မြင်တွေ့လိုက်ရ၏။ ယခုအခါ မူလအင်းဂိုဏ်း၏ ကံကြမ္မာကို ကြည့်ရှုရန်အတွက် သားရဲတစ်သောင်း လျှို့ဝှက်နယ်မြေဆီသို့ ပြန်သွားရန်ပင် မလိုအပ်တော့ချေ။

အဘယ်ကြောင့်ဆိုသော် မူလအင်းဂိုဏ်း၏ ဂိုဏ်းချုပ်တစ်ဦးအနေဖြင့်သာမက ယွမ်ယင်းကျင့်ကြံသူတစ်ဦးအနေဖြင့်ပါ သူသည် ဂိုဏ်း၏ ကံကြမ္မာနှင့် ပေါင်းစပ်သွားခဲ့သည်မှာ အချိန်အတော်ကြာခဲ့ပြီ ဖြစ်သည်။ ဂိုဏ်း၏ ကံကြမ္မာသည် သူ၏ ကံကြမ္မာပင်ဖြစ်ပြီး သူတို့နှစ်ခုမှာ တစ်သားတည်း ဖြစ်သွားခဲ့ချေပြီ။

ရှင်းလင်းလှသည်မှာ ဤကံကြမ္မာ ရွှေနဂါးကြီး၏ အရွယ်အစားသည် ယခင်ကနှင့် နှိုင်းယှဉ်ပါက နှစ်ဆခန့် ကြီးထွားလာခဲ့ခြင်း ဖြစ်သည်။

ဤမျှလောက် လျင်မြန်စွာ ကံကြမ္မာများ တိုးပွားလာရခြင်း၏ အဓိကအကြောင်းရင်းမှာ သားရဲတစ်သောင်း လျှို့ဝှက်နယ်မြေအတွင်းရှိ သေမျိုးများ လျင်မြန်စွာ တိုးပွားလာခြင်းကြောင့် သဘာဝကျကျပင် ဖြစ်၏။ လူဦးရေမှာ သန်းသုံးဆယ်ကိုပင် ကျော်လွန်သွားခဲ့ပြီဖြစ်ရာ တကယ့်ကို အံ့အားသင့်စရာ ကောင်းလှပေသည်။

ဤသည်က အရှေ့နှင့် အနောက်သို့ သွားရောက်ကာ ဖမ်းဆီးခံထားရသော သေမျိုးအမြောက်အမြားကို ကယ်တင်ပေးခဲ့သည့် သူ၏ ကိုယ်ပွားများကြောင့်လည်း ပါဝင်ပေသည်။

ထိုသို့မဟုတ်ပါက သားရဲတစ်သောင်း လျှို့ဝှက်နယ်မြေ၏ လူဦးရေမှာ ဤမျှလောက်အထိ တိုးပွားလာမည် မဟုတ်ပါချေ။

ထို့အပြင် ဤသေမျိုးများကြားမှ ပါရမီရှင်များစွာ မွေးဖွားလာခဲ့ပြီး မူလအင်းဂိုဏ်း၏ တပည့်များ ဖြစ်လာခဲ့ကြ၏။

လောလောဆယ်တွင် သူတို့သည် ချီစုစည်းခြင်းအဆင့် ကျင့်ကြံသူများမျှသာ ဖြစ်လင့်ကစား အချိန်တစ်ခုသာ ပေးလိုက်မည်ဆိုပါက မူလအင်းဂိုဏ်း၏ ခိုင်မာသော မဏ္ဍိုင်များ သေချာပေါက် ဖြစ်လာကြမည်ဖြစ်ပြီး သူတို့၏ ကံကြမ္မာများမှာလည်း ဂိုဏ်းနှင့် နီးကပ်စွာ ဆက်စပ်နေပေလိမ့်မည်။

"ဒါပေမယ့် ဒါတွေက ကလေးကစားစရာ သက်သက်လောက်ပါပဲ။"

"တကယ်တော့ ကံကြမ္မာတွေ ဒီလောက်တောင် ကြီးထွားလာရတဲ့ အဓိကအကြောင်းရင်းက ခွန်ဖန်လေး မင် ကြောင့်ပဲ။"

ဤအခိုက်အတန့်တွင် လျှို့ဝှက်ဆန်းကြယ်သော စာချုပ်မှတစ်ဆင့် ကျန်းဖန်သည် သားရဲတစ်သောင်း လျှို့ဝှက်နယ်မြေ၏ အထက်ကောင်းကင်ယံ၌ လှဲလျောင်းနေသော ခွန်ဖန်ကို အာရုံခံမိလိုက်၏။

ပြီးခဲ့သည့် နှစ်များတစ်လျှောက်လုံး ၎င်းသည် အိပ်မောကျနေခဲ့သည်။

သို့သော် ထိုသို့ဖြစ်လင့်ကစား ၎င်း၏ ခွန်အားမှာ အံ့အားသင့်စရာကောင်းလှသော အရှိန်နှုန်းဖြင့် တိုးတက်နေခဲ့ပြီး အဆင့် ၃ ပြီးပြည့်စုံခြင်းအဆင့်သို့ပင် ရောက်ရှိနေပြီဖြစ်ကာ အဆင့် ၄ သို့ တက်လှမ်းရန် သိပ်မဝေးတော့ပါချေ။

သံသယဖြစ်ဖွယ် မရှိအောင်ပင် ဤသည်မှာ ငယ်ရွယ်သော စစ်မှန်သည့် ဝိညာဉ်များ၏ ကြောက်မက်ဖွယ်ကောင်းသော အချက်ပင် ဖြစ်သည်။ ကျင့်ကြံရန် ကြီးကြီးမားမား အားထုတ်စရာမလိုဘဲ အံ့အားသင့်စရာကောင်းသော စွမ်းအားများကို သဘာဝကျကျပင် ဆုပ်ကိုင်နိုင်စွမ်း ရှိကြ၏။

ခွန်ဖန်လေး၏ စွမ်းအားကြောင့် ဤကာလအတွင်း သားရဲတစ်သောင်း လျှို့ဝှက်နယ်မြေမှာ အရွယ်အစားအားဖြင့် သိသိသာသာ ကျယ်ပြန့်လာခဲ့သည်။

ထို့အပြင် သားရဲတစ်သောင်း လျှို့ဝှက်နယ်မြေအတွင်းရှိ ဝိညာဉ်ချီများပင်လျှင် များစွာ ပိုမိုပေါကြွယ်ဝလာခဲ့ပေသည်။

"အကယ်၍ ခွန်‌ဖန်လေး မင် ရဲ့ ကျင့်ကြံမှုသာ အဆင့်တက်သွားပြီး အဆင့် ၄ ကို ရောက်သွားမယ်ဆိုရင်..."

"သားရဲတစ်သောင်း လျှို့ဝှက်နယ်မြေလည်း အကျိုးကျေးဇူးတွေ ရရှိသွားပြီး အဆင့် ၅ လျှို့ဝှက်နယ်မြေအဖြစ် တက်လှမ်းသွားနိုင်တယ်။"

"အဲဒါက သားရဲတစ်သောင်း လျှို့ဝှက်နယ်မြေမှာ အဆင့် ၅ ဝိညာဉ်ကြောတစ်ခုကို ပိုင်ဆိုင်လာစေလိမ့်မယ်။"

"ဒါကြောင့်ပဲ မူလအင်းဂိုဏ်းရဲ့ ကံကြမ္မာတွေက ဒီလောက်အထိ တိုးလာခဲ့တာကိုး။"

ကျန်းဖန်သည် အလွန်အမင်း အံ့အားသင့်နေမိ၏။

ရှင်းလင်းလှသည်မှာ အင်အားစုတစ်ခု အတွက် စစ်မှန်သော ဝိညာဉ်တစ်ခု၏ အထောက်အကူပြုမှုမှာ ယုံကြည်နိုင်စရာ မရှိလောက်အောင် ကြီးမားလှပေသည်။

၎င်းအနေဖြင့် ဘာမျှမလုပ်ဘဲ ဤအင်အားစုအတွင်း၌ ရှိနေရုံမျှဖြင့်ပင် အဆုံးအစမရှိသော အကျိုးကျေးဇူးများကို ပေးအပ်နိုင်စွမ်း ရှိ၏။ ၎င်းမှာ ငယ်ရွယ်သော စစ်မှန်သည့်ဝိညာဉ်တစ်ခု ဖြစ်နေလျှင်တောင်မှ ဤအတိုင်းပင် ဖြစ်သည်။

ဤသည်မှာ "ရေက နက်စရာမလိုဘူး၊ နဂါးရှိရင် မြင့်မြတ်သွားတာပဲ။ တောင်က မြင့်စရာမလိုဘူး၊ နတ်အမတရှိရင် နာမည်ကြီးသွားတာပဲ" ဟူသော စကားပုံကဲ့သို့ပင် ဖြစ်၏။

နေရာတစ်ခုသည် မည်မျှပင် သာမန်ဖြစ်နေပါစေ၊ စစ်မှန်သောဝိညာဉ်တစ်ခုက ထိုနေရာတွင် အချိန်အကြာကြီး နေထိုင်မည်ဆိုပါက မရေမတွက်နိုင်သော ဆန်းကြယ်မှုများကို သေချာပေါက် ပေါ်ပေါက်လာစေမည် ဖြစ်သည်။

…………….