အခန်း (၈၃၁-၈၃၂)

အခန်း (၈၃၁) - ကံကြမ္မာအလှည့်အပြောင်းနှင့် မပြေလည်နိုင်သော ငြိုးသူရန်ဘက်များ (၁) ။

ဤအခိုက်တွင် ကျိုးစွေ့၏ အမြန်နှုန်းမှာ အလွန်မြန်ဆန်လှပြီး ဖုန်းရှီးမြို့၏ အပြင်ဘက်သို့ ရောက်ရှိလာခဲ့လေသည်။

စောစောက ထိုမျိုးနွယ်ခြား ကျင့်ကြံသူများ သေဆုံးသွားခဲ့သော နေရာသို့ သူ ချက်ချင်း ရောက်ရှိလာခဲ့၏။ အထက်စီးမှနေ၍ ပတ်ဝန်းကျင်ရှိ ပျက်စီးနေသော သဲလွန်စများကို သူက ကြည့်ရှုလိုက်လေသည်။

ဝုန်း...။

ထိုခဏတွင် ကျိုးစွေ့သည် ထိုသတ္တမအဆင့် ပျံသန်းရေးသင်္ဘောနှင့်တကွ မျိုးနွယ်ခြား ကျင့်ကြံသူများစွာ၏ ခန္ဓာကိုယ်ထက်တွင် ကျန်ရစ်နေခဲ့သော သိုလှောင်အိတ်များအားလုံးကို သိမ်းဆည်းလိုက်ပြီး အင်မော်တယ်ရတနာ 'ရှန်းဟိုင်ပုလဲ' ၏ နေရာလပ်ထဲသို့ ထည့်သွင်းလိုက်လေသည်။

ဤလုပ်ရှားမှုများမှာ အလွန်ပင် ကျွမ်းကျင်ပိုင်နိုင်နေပြီ ဖြစ်၏။ အဘယ်ကြောင့်ဆိုသော် ဤနှစ်များတစ်လျှောက်တွင် သူသည် ရန်သူများ၏ ရတနာမည်မျှကို ရရှိခဲ့မှန်းပင် မသိနိုင်တော့ဘဲ အလေ့အကျင့်တစ်ခုသဖွယ် ဖြစ်နေပြီ မဟုတ်ပါလော။

"မဆိုးဘူး မဆိုးဘူး။ အကျိုးအမြတ်တွေက တော်တော်လေး ကြီးမားနေတုန်းပဲ...”

ကျိုးစွေ့မှာ အလွန်ပင် ကျေနပ်သွားပြီး နတ်ဘုရားအာရုံဖြင့် အသာအယာ ကြည့်ရှုလိုက်ရာ ဤတစ်ကြိမ် အကျိုးအမြတ်များမှာ အလွန်များပြားလှပြီး အမှန်တကယ်ပင် မျက်စိကျိန်းလောက်အောင် ပြည့်နှက်နေကြောင်းကို ချက်ချင်း သိရှိလိုက်လေသည်။

သို့ရာတွင် သူသည် ဤကွဲပြားသော မျိုးနွယ်စု ကျင့်ကြံသူများ၏ ရတနာများကို ရယူလိုခြင်းမှာ ၎င်းတို့ ချန်ရစ်ခဲ့သည့် အဖိုးတန်ရတနာများကို မျက်စိကျရုံသက်သက်ကြောင့် မဟုတ်ဘဲ နောက်ကွယ်မှ အန္တရာယ်များကို ဖြေရှင်းရန်အတွက်လည်း ဖြစ်ပေသည်။

‘ကံကြမ္မာကူ’၏ စွမ်းအားမှတစ်ဆင့် ဤကျင့်ကြံသူများ၏ သိုလှောင်အိတ်များအတွင်းနှင့် သတ္တမအဆင့် ပျံသန်းရေးသင်္ဘောပေါ်တွင် ခြေရာခံအမှတ်အသားအချို့ ကျန်ရစ်နေကြောင်းကို သူ သိရှိနိုင်လေ၏။

အကယ်၍ အခြားလူသားမျိုးနွယ် ကျင့်ကြံသူများသာ ရရှိသွားပါက အနှေးနှင့်အမြန်ဆိုသလို၊ ထိုမျိုးနွယ်စုများက တံခါးဝအထိ လာရောက်ရှာဖွေကြမည်ဖြစ်ပြီး ဖုန်းရှီးကျွန်း၏ တည်နေရာအတိအကျကို ပေါ်လွင်သွားစေပေမည်။

ထိုသို့ဖြစ်လျှင် ဖုန်းရှီးကျွန်းသို့ ရောက်ရှိလာမည့်သူများသည် ခန္ဓာပေါင်းစည်းခြင်းအဆင့် ကျင့်ကြံသူများသာမက မဟာယာနအဆင့် ကျင့်ကြံသူများပင် ပါဝင်လာနိုင်ချေရှိ၏။

ထိုအချိန်ရောက်လျှင် သူ အသက်ရှင်ချင်ပါက ထွက်ပြေးရန်သာ ရှိတော့သည်။

ထို့နောက် အမှန်တကယ် အသက်ရှင်ကျန်ရစ်မည့် လူသားကျင့်ကြံသူ အရေအတွက်မှာလည်း လက်ချိုးရေတွက်၍ ရနိုင်လောက်သည်အထိ နည်းပါးသွားပေမည်။

ထို့ကြောင့် ကျိုးစွေ့ ဤသို့ ပြုလုပ်ရခြင်းမှာ ဖုန်းရှီးမြို့နှင့် လူသားမျိုးနွယ်ကို ကာကွယ်ရန်အတွက်ပင် ဖြစ်လေသည်။

တစ်ခါတစ်ရံတွင် ရတနာများသည် အခွင့်အရေးကို ကိုယ်စားပြုလေ့မရှိဘဲ ကပ်ဘေးတစ်ခု၏ အစပြုရာလည်း ဖြစ်လာနိုင်၏။

အနည်းငယ်မျှ ပေါ့ဆလိုက်ပါက မျိုးနွယ်စုတစ်ခုလုံး မျိုးတုံးသွားနိုင်သည့် အန္တရာယ်နှင့် ကြုံတွေ့ရနိုင်သဖြင့် အလွန်တရာ အန္တရာယ်ကြီးမားလှသည်။

ကံကောင်းထောက်မစွာဖြင့် သူသည် ‘ကံကြမ္မာကူ’၏ စွမ်းအားကို ပိုင်ဆိုင်ထားသောကြောင့် ကံတရားအာရုံခံမှုမှတစ်ဆင့် မည်သည့်ရတနာကို ချန်ထားသင့်ပြီး မည်သည့်ရတနာက ကပ်ဘေးယူဆောင်လာနိုင်သည်ကို သူ သိရှိနိုင်လေသည်။

သို့ဖြစ်ရာ သူသည် ဤရတနာများကို ကိုယ်တိုင်ရယူလိုက်ပြီး ရှန်းဟိုင်ပုလဲ နေရာလွတ်ထဲသို့ အရာအားလုံးအား ထည့်သွင်းလိုက်သည်။

အင်မော်တယ်ရတနာ၏ စွမ်းအားဖြင့် တားဆီးထားနိုင်သောကြောင့် ထိုမျိုးနွယ်စုများတွင် ခြေရာခံနိုင်စွမ်းမည်မျှပင် ရှိနေသည်ဖြစ်စေ အချည်းနှီးသာ ဖြစ်သွားရပေမည်။

ဤရတနာများကို သူရရှိသွားမှသာလျှင် မည်သည့်ဘေးအန္တရာယ်မှ မရှိတော့ခြင်းဖြစ်သည်ဟု ဆိုရပေမည်။

'‘ကံကြမ္မာကူ’ရဲ့ စွမ်းအားက ဒီလောက်တင် မဟုတ်သေးဘူး။ ရန်သူတွေရဲ့ ဟောကိန်းထုတ်ခြေရာခံတဲ့ ပညာရပ်တွေကိုလည်း တားဆီးပေးနိုင်သေးတယ်...’

'ဟောကိန်းထုတ်တဲ့ပညာ၊ အကြောင်းအကျိုးပညာတွေကို သုံးပြီး သူတို့ သေဆုံးရတဲ့ အကြောင်းရင်းကို စုံစမ်းဖို့ ကြိုးစားရင်တောင်မှ အချည်းနှီးပဲ ဖြစ်သွားလိမ့်မယ်...’

'ဘာလို့လဲဆိုတော့ ‘ကံကြမ္မာကူ’က ကောင်းကင်လျှို့ဝှက်ချက်ကို ဖုံးကွယ်ပေးနိုင်ရုံသာမက ကောင်းကင်လျှို့ဝှက်ချက်နဲ့ အကြောင်းအကျိုးတရားတွေကိုပါ ရှုပ်ထွေးသွားစေနိုင်လို့ပဲ...’

ကျိုးစွေ့က မျက်လုံးများကို ကျဉ်းမြောင်းလိုက်၏။

ပြီးခဲ့သည့်အကြိမ် ဖုန်းရှီးမြို့တွင် လေဟာနယ်သန့်စင်ခြင်းအဆင့် ကျင့်ကြံသူအချို့ကို သတ်ဖြတ်ခဲ့စဉ်က ‘ကံကြမ္မာကူ’၏ စွမ်းအားကို အသုံးပြု၍ ကောင်းကင်လျှို့ဝှက်ချက်ကို ရှုပ်ထွေးစေခဲ့ခြင်း ဖြစ်သည်။

ရလဒ်အနေဖြင့် ရန်သူများက ထိုသူများ သေဆုံးရခြင်းမှာ အခြားရန်သူများ၏ လက်ချက်ဖြစ်သည်ဟု အထင်မှားသွားခဲ့ကြလေ၏။

ထိုသို့ဖြင့် သူသည် မိမိ၏ သိုသိပ်မှုကို ထိန်းသိမ်းထားနိုင်ခဲ့ပြီး အကြောင်းအကျိုးတရားများ၏ ပြင်ပတွင် ပုန်းအောင်းနေနိုင်ခဲ့သည်။

မှန်ပေသည်၊ ဤသို့ ပြုလုပ်နိုင်ခြင်းမှာ ‘ကံကြမ္မာကူ’၏ စွမ်းအားတစ်ခုတည်းကြောင့် မဟုတ်ပေ။

အဘယ်ကြောင့်ဆိုသော် သူကိုယ်တိုင်ကလည်း ကြီးမားသော ကံတရားကို ပိုင်ဆိုင်ထားသောကြောင့်ပင် ဖြစ်လေသည်။

အကယ်၍သာ ထိုသို့ ကြီးမားလှသော ကံတရားကို မပိုင်ဆိုင်ထားပါက ‘ကံကြမ္မာကူ’သည် မည်မျှပင် အစွမ်းထက်နေသည်ဖြစ်စေစေ ဤအရာကို လုပ်ဆောင်နိုင်မည် မဟုတ်ပေ။

ဤသည်မှာ လက်ရာကောင်းသော အိမ်ရှင်မဖြစ်နေလျှင်ပင် ဆန်မရှိပါက ထမင်းချက်၍မရနိုင်ခြင်းနှင့် တူညီလှ၏။

သူ၏ကိုယ်ပေါ်ရှိ ကြီးမားလှသော ကံတရားနှင့် ‘ကံကြမ္မာကူ’၏ စွမ်းအားတို့ ပေါင်းစပ်သွားခြင်းက ကျားအတောင်ပံတပ်လိုက်သကဲ့သို့ ပို၍ပင် အစွမ်းထက်သွားစေသည်ဟု ဆိုရပေမည်။

'ဟုတ်သားပဲ၊ ဒီမျိုးနွယ်စု ကျင့်ကြံသူတွေရဲ့ ဝိညာဉ်မှတ်ဉာဏ်အပိုင်းအစတွေကိုလည်း အတူတူ ဝါးမျိုပစ်ရမယ်...’

ထိုအထိ တွေးမိပြီးနောက် ကျိုးစွေ့က စိတ်ဆန္ဒတစ်ချက် အသက်သွင်းလိုက်သည်။

မျက်စိတစ်မှိတ်အတွင်းမှာပင် သူသည် 'အိပ်မက်ဝိညာဉ်ကူ' ၏ စွမ်းအားကို အသက်သွင်းလိုက်ပြီး ပတ်ဝန်းကျင်၌ ပြန့်ကျဲနေသော ဝိညာဉ်အပိုင်းအစများကို ဝါးမျိုလိုက်ရာ ထိုမျိုးနွယ်စု ကျင့်ကြံသူများ၏ ဝိညာဉ်မှတ်ဉာဏ်များအားလုံး သူ၏ အသိစိတ်ပင်လယ် နက်ရှိုင်းရာသို့ ဝင်ရောက်သွားတော့သည်။

ဤဝိညာဉ်မှတ်ဉာဏ်များသည် အိပ်မက်ပူပေါင်းများအဖြစ်သို့ ပြောင်းလဲသွားကာ 'အိပ်မက်ဝိညာဉ်ကူ' ၏ ခန္ဓာကိုယ်အတွင်းသို့ ပေါင်းစည်းသွားသည့်နှယ် ရှိလေ၏။

'သြော်၊ ဒီလိုကိုး။ ဒီမျိုးနွယ်စု ကျင့်ကြံသူတွေက သွေးလမင်းမျိုးနွယ်က လာကြတာပဲ...’

'တော်သေးတယ်။ ဖုန်းရှီးကျွန်းက ပေါ်မသွားခဲ့ဘူး။ သူတို့က မတော်တဆ ဒီကို ရောက်လာကြတာကိုး...’

'ဒါဆိုရင်တော့ သွေးလမင်းမျိုးနွယ်ကို ဆွဲဆောင်မိမှာ မဟုတ်ဘူး...’

ကျိုးစွေ့က မျက်လုံးများကို ကျဉ်းမြောင်းလိုက်ပြီး မျက်နှာပေါ်တွင် ရုတ်တရက် သဘောပေါက်သွားသည့် အမူအရာတစ်ခု ပေါ်လာလေသည်။

မှန်ပေ၏၊ ဤမျိုးနွယ်စု ကျင့်ကြံသူများ၏ မှတ်ဉာဏ်များသည် အလွန်ပင် တန်ဖိုးကြီးမားလှသည်။

၎င်းတို့ ဖုန်းရှီးကျွန်းသို့ ရောက်ရှိလာရသည့် ရည်ရွယ်ချက်ကို သိရှိနိုင်ရုံသာမက ဤပင်လယ်ဒေသနှင့် ပတ်သက်သည့် သတင်းအချက်အလက် အချို့ကိုပါ တစ်ပြိုင်နက်တည်း သိရှိနိုင်လေသည်။

မည်သို့ပင်ဆိုစေကာမူ ဤပင်လယ်ဒေသ၏ ဒေသခံသက်ရှိများဖြစ်သောကြောင့် ၎င်းတို့ သိရှိထားသည့် သတင်းအချက်အလက်များသည် လူသားမျိုးနွယ်ထက် သေချာပေါက် ပိုမိုများပြားနေမည်သာ။

အရင်က သူသည် ကြယ်ကွဲပင်လယ်၏ အခြေအနေများကို သိရှိနိုင်ရန် ဒေသခံသက်ရှိများကို မည်သို့ရှာဖွေရမည်နည်းဟု တွေးတောနေခဲ့ခြင်း ဖြစ်၏။

ဤမျိုးနွယ်စု ကျင့်ကြံသူများက တံခါးဝအထိ ကိုယ်တိုင်လာရောက်ပို့ပေးလိမ့်မည်ဟု သူမထင်ထားခဲ့ပေ။

သူ၏ ကြီးမားလှသော ပြဿနာတစ်ခုကို ဖြေရှင်းပေးလိုက်သည်ဟု ဆို၍ရနိုင်ပေသည်။

ရတနာလာပို့ပေးသည့် ကလေးငယ်များနှင့် သိပ်မကွာလှချေ။

မှန်ပေသည်၊ သူသာ လုံလောက်သော စွမ်းအား မရှိခဲ့ပါက ၎င်းတို့သည် ရတနာလာပို့ပေးသည့် ကလေးငယ်များ ဖြစ်နေမည်မဟုတ်ဘဲ သေမင်းများသာ ဖြစ်နေပေလိမ့်မည်။

…………

တစ်ချိန်တည်းမှာပင်…

ကြယ်ကွဲပင်လယ်ရှိ အဋ္ဌမအဆင့် ကျွန်းတစ်ကျွန်းဖြစ်သော သွေးလမင်းကျွန်းပေါ်၌။

ဤနေရာသည် သွေးလမင်းမျိုးနွယ်စု၏ ဌာနချုပ် ဖြစ်လေသည်။

သွေးလမင်းမျိုးနွယ်၏ ထိပ်တန်းအဆင့် ကျင့်ကြံသူအများအပြား ဤနေရာတွင် ရှိနေကြပြီး ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူများမှစ၍ မဟာယာနအဆင့် ကျင့်ကြံသူများအထိ ဤကျွန်းပေါ်တွင် နေထိုင်ကြရာ ၎င်းတို့၏ စွမ်းအားများမှာ အလွန်တရာ ကြောက်မက်ဖွယ် ကောင်းလှပေသည်။

ဤအချိန်၌ သွေးလမင်းမျိုးနွယ်၏ ခန္ဓာပေါင်းစည်းခြင်းအဆင့် ကျင့်ကြံသူ အများအပြားမှာ ချက်ချင်း လန့်နိုးသွားကြ၏။

၎င်းတို့ထဲမှ ခန္ဓာပေါင်းစည်းခြင်းအဆင့် မျိုးနွယ်ဝင်တစ်ဦး၏ ဝိညာဉ်မီးအိမ် ငြိမ်းသတ်သွားသည်ကို သူတို့ အာရုံခံလိုက်မိခြင်း ဖြစ်သည်။

"ကျစ်... သွေးဝမ်ယန် သေသွားပြီ...”

သွေးလမင်းမျိုးနွယ်မှ ခန္ဓာပေါင်းစည်းခြင်းအဆင့် ကျင့်ကြံသူ အများအပြား၏ မျက်နှာများမှာ ကြီးစွာ ပြောင်းလဲသွားကြလေသည်။

သွေးဝမ်ယန် သေဆုံးသွားသည်ကို မယုံကြည်ရဲသည့်အလား ၎င်းတို့၏ မျက်နှာများပေါ်တွင် မယုံနိုင်သည့် အမူအရာများ ပေါ်ထွက်လာကြသည်။

အကယ်၍သာ သာမန်ဖြစ်ပြီး အလားအလာ ကုန်ဆုံးနေပြီဖြစ်သော သွေးလမင်းမျိုးနွယ်မှ ခန္ဓာပေါင်းစည်းခြင်းအဆင့် ကျင့်ကြံသူတစ်ဦးဆိုပါက ပြဿနာမရှိလှသော်လည်း သွေးဝမ်ယန်မှာမူ ထိုသို့မဟုတ်ပေ။

သူသည် အကန့်အသတ်မဲ့ အလားအလာများ ရှိနေပြီး ငယ်ရွယ်စဉ်မှာပင် ခန္ဓာပေါင်းစည်းခြင်း အစောပိုင်းအဆင့်သို့ ရောက်ရှိနေသူ ဖြစ်လေသည်။

သူသည် အနာဂတ်တွင် သွေးလမင်းမျိုးနွယ်၏ နောက်ထပ် မဟာယာနအဆင့် အင်မော်တယ်တစ်ပါး ဖြစ်လာရန် မျှော်လင့်ချက် ကြီးမားသူဖြစ်သည်ဟု ဆိုရပေမည်။

သို့ရာတွင် ယခုကဲ့သို့ အနာဂတ် တောက်ပနေသော ပါရမီရှင်တစ်ဦး ရုတ်တရက် သေဆုံးသွားခြင်းက သွေးလမင်းမျိုးနွယ်အတွက်မူ တွေးပင်မတွေးဝံ့လောက်သော ကြီးမားလှသော ဆုံးရှုံးမှုကြီး ဖြစ်ပေသည်။

ဤသည်မှာ ဂိုဏ်းတစ်ခု၏ အမာခံတပည့်တစ်ဦး ရန်သူများ၏ သတ်ဖြတ်ခြင်းကို ခံလိုက်ရသည်နှင့် တူညီပြီး ဂိုဏ်းအတွင်း ကြီးမားသော ဂယက်ရိုက်ခတ်မှုများကို သေချာပေါက် ဖြစ်ပေါ်စေမည် ဖြစ်၏။

"ဘယ်လိုလုပ်ပြီး ဒီလိုဖြစ်သွားရတာလဲ...”

"သွေးဝမ်ယန်က ဘာလို့ ရုတ်တရက် သေသွားရတာလဲ။ သူ့ဆီမှာ ထွက်ပြေးလွတ်မြောက်နိုင်တဲ့ နည်းလမ်းတွေ အများကြီးရှိနေတာကို ဘယ်လိုလုပ်ပြီး သေသွားရတာလဲ...”

"သူ့ကို ဘယ်သူက သတ်လိုက်တာလဲ...”

သွေးလမင်းမျိုးနွယ်မှ ခန္ဓာပေါင်းစည်းခြင်းအဆင့် ကျင့်ကြံသူ အများအပြားမှာ မျက်မှောင်ကြုတ်သွားကြသည်။

ဤကိစ္စမှာ အလွန်တရာ အံ့ဩဖွယ်ကောင်းလှသည်ဟု သူတို့ ခံစားလိုက်ရ၏။

မည်သို့ပင်ဆိုစေကာမူ သွေးဝမ်ယန်ကဲ့သို့ ထူးကဲသော ပါရမီရှင်တစ်ဦးကို မျိုးနွယ်စုအတွင်းရှိ မဟာယာနအဆင့် ကျင့်ကြံသူများက အလေးထားကြသဖြင့် သူ၏ကိုယ်ပေါ်တွင် အသက်ကယ်နည်းလမ်းပေါင်းများစွာ ရှိနေလေသည်။

ရန်သူများ၏ ချုံခိုတိုက်ခိုက်ခြင်းကို ခံရလျှင်ပင် အသက်သေဆုံးသွားစရာ အကြောင်းမရှိပေ။

သို့သော်လည်း ယခုမူ တစ်ဖက်လူမှာ အသက်သေဆုံးသွားခဲ့ချေပြီ။

ဤသည်က သွေးလမင်းမျိုးနွယ် ကျင့်ကြံသူအားလုံး၏ မျှော်လင့်ထားမှုများထက် အမှန်တကယ်ကျော်လွန်သွားစေတော့သည်။

အခန်း (၈၃၂) - ကံကြမ္မာအလှည့်အပြောင်းနှင့် မပြေလည်နိုင်သော ငြိုးသူရန်ဘက်များ (၂) ။

"ငွေရောင်ဝံပုလွေမျိုးနွယ်တွေ လှုပ်ရှားလိုက်တာပဲ...”

"သူတို့က သွေးဝမ်ယန်ကို ချုံခိုတိုက်ခိုက်ဖို့ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူ အများအပြားကို စီစဉ်ထားခဲ့တာ...”

"သွေးဝမ်ယန် လွတ်မြောက်သွားနိုင်ခဲ့ပေမယ့်လည်း ဒဏ်ရာ အရမ်းပြင်းထန်သွားတဲ့အတွက် သေဆုံးသွားရတာပဲ...”

သွေးလမင်းမျိုးနွယ်မှ ခန္ဓာပေါင်းစည်းခြင်းအဆင့် ကျင့်ကြံသူတစ်ဦးက မျက်လုံးများကို ကျဉ်းမြောင်းလိုက်ပြီး သွေးဝမ်ယန် သေဆုံးရခြင်း၏ အကြောင်းရင်းကို စုံစမ်းသိရှိနိုင်ရန် အကြောင်းအကျိုးများကို ခြေရာခံမည့် ဟောကိန်းထုတ်ခြင်းပညာရပ်ကို ချက်ချင်း အသုံးပြုလိုက်သည်။

ကောင်းကင်လျှို့ဝှက်ချက်များ ရှုပ်ထွေးနေပြီး အကြောင်းအကျိုးတရားများ ရှုပ်ထွေးနေသော်လည်း ၎င်းသည် သွေးဝမ်ယန်၏ သေဆုံးရခြင်း အကြောင်းရင်းကို ဝိုးတဝါး အာရုံခံမိလိုက်လေသည်။

ငွေရောင်ဝံပုလွေမျိုးနွယ်နှင့် ကြီးမားသော ပတ်သက်ဆက်နွှယ်မှု ရှိနေသည်မှာ သေချာလှပေ၏။

"အင်း... ငွေရောင်ဝံပုလွေမျိုးနွယ်တွေ လှုပ်ရှားလိုက်တာ အမှန်ပဲ...”

"ခုလေးတင် ငါတို့ မျိုးနွယ်စုရဲ့ လျှို့ဝှက်ပညာရပ်ကို သုံးပြီး သွေးဝမ်ယန်ရဲ့ သတ္တမအဆင့် ပျံသန်းရေးသင်္ဘောကို စုံစမ်းကြည့်သေးတယ်...”

"ဒါပေမယ့် အဆက်အသွယ် ပြတ်တောက်သွားပြီး လုံးဝကို အာရုံခံလို့ မရတော့ဘူး...”

"ငွေရောင်ဝံပုလွေမျိုးနွယ်ကလွဲပြီး ဘယ်သူမှ ဒီလိုထူးခြားတဲ့ နည်းလမ်းမျိုး မရှိနိုင်ဘူး...”

"သွေးဝမ်ယန်က သူတို့လက်ချက်နဲ့ သေဆုံးသွားရတာ သေချာတယ်၊ ရတနာတွေလည်း သူတို့လက်ထဲ ရောက်သွားလောက်ပြီ...”

အခြား ခန္ဓာပေါင်းစည်းခြင်းအဆင့် ကျင့်ကြံသူတစ်ဦးကလည်း ပြတ်သားစွာ ပြောလိုက်လေသည်။

သိသာစွာပင် အချက်အလက်များစွာအရ သွေးဝမ်ယန်သည် ငွေရောင်ဝံပုလွေမျိုးနွယ်၏ လက်ချက်ဖြင့် သေဆုံးသွားခြင်းဖြစ်ကြောင်း ပေါ်လွင်နေသည်။

"ခွေးမသား ငွေရောင်ဝံပုလွေမျိုးနွယ်... မကြာသေးခင်ကမှ သူတို့တွေ ပိုပိုပြီး မောက်မာလာကြတယ်...”

"ဒီကာလအတွင်းမှာ သူတို့က ငါတို့ သွေးလမင်းမျိုးနွယ်ရဲ့ ပါရမီရှင်တွေကို ခဏခဏ လုပ်ကြံသတ်ဖြတ်နေကြတာ...”

"အောင်မြင်တဲ့ အကြိမ်အရေအတွက် သိပ်မများဘဲ အကြိမ်များစွာ လက်ဗလာနဲ့ ပြန်လာရပေမယ့်လို့..."

"ဒီတစ်ကြိမ် လုပ်ကြံမှုမှာတော့ သူတို့ တကယ်ကြီး အောင်မြင်သွားလိမ့်မယ်လို့ မထင်ထားခဲ့ဘူး...”

"ငါတို့မျိုးနွယ်စုရဲ့ မဟာယာနအဆင့် အင်မော်တယ်လောင်းလျာလေးတောင်မှ သူတို့လက်ထဲမှာ အသက်ဆုံးရှုံးသွားခဲ့ရတယ်...”

"ဒီအတိုင်း ဆက်သွားနေမယ်ဆိုရင် ငါတို့ သွေးလမင်းမျိုးနွယ်ရဲ့ ပါရမီရှင် ဘယ်နှစ်ယောက်တောင် သူတို့လက်ထဲမှာ သေဆုံးရဦးမလဲ...”

ခန္ဓာပေါင်းစည်းခြင်းအဆင့် အကြီးအကဲတစ်ဦးမှာ ဒေါသမထိန်းနိုင်အောင် ဖြစ်သွားလေ၏။

သူသည် ဆက်လက်သည်းခံနိုင်စွမ်း မရှိတော့ကြောင်း ခံစားလိုက်ရသည်။

ယခင်က အခြေအနေတစ်ခုလုံးကို ထည့်သွင်းစဉ်းစားကာ ငွေရောင်ဝံပုလွေမျိုးနွယ်၏ လုပ်ရပ်များကို သည်းခံခဲ့ခြင်း ဖြစ်သည်။

သို့သော် ယခုမူ သွေးဝမ်ယန်၏ သေဆုံးမှုက သွေးလမင်းမျိုးနွယ်၏ သည်းခံနိုင်စွမ်း ကန့်သတ်ချက်ကို ကျော်လွန်သွားခဲ့လေပြီ။

အကယ်၍ ဆက်လက်သည်းခံနေဦးမည်ဆိုပါက ၎င်းတို့သည် အမှန်တကယ်ပင် အခွံထဲသို့ ခေါင်းပုန်းနေသော လိပ်များ ဖြစ်သွားကြပေတော့မည်။

ဤပင်လယ်ဒေသတွင် မည်သူက သူတို့ သွေးလမင်းမျိုးနွယ်ကို အထင်ကြီးလေးစားတော့မည်နည်း။

"ဘိုးဘေးဆီကို သတင်းပို့ကြရအောင်...”

"ငွေရောင်ဝံပုလွေမျိုးနွယ်က ငါတို့ သွေးလမင်းမျိုးနွယ်ကို စစ်ခင်းချင်နေမှတော့ ငါတို့လည်း စစ်ခင်းပေးလိုက်တာပေါ့...”

"ငွေရောင်ဝံပုလွေမျိုးနွယ်ကို အသေအလဲ မနှိမ်နှင်းပစ်ဘူးဆိုရင် သူတို့တွေ ဆက်ပြီး မောက်မာနေကြမှာပဲ၊ ဖြစ်ချင်တိုင်း ဖြစ်နေကြလိမ့်မယ်...”

"ငါတို့ သွေးလမင်းမျိုးနွယ်က အစွမ်းမပြရင် လောကကြီးက ငါတို့ရဲ့ ကြောက်စရာကောင်းတဲ့ အင်အားကို သိကြမှာ မဟုတ်တော့ဘူးထင်တယ်...”

သွေးလမင်းမျိုးနွယ်မှ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူ အများအပြားမှာ ဒေါသတကြီး ဖြစ်နေကြလေသည်။

၎င်းတို့သည် ငွေရောင်ဝံပုလွေမျိုးနွယ်၏ အဆက်မပြတ် ရန်စမှုများကို ဆက်လက်သည်းမခံနိုင်ကြတော့ပေ။

ဤသည်မှာ ကုလားအုတ်ကျောကို ဖိချိုးလိုက်သည့် နောက်ဆုံးကောက်ရိုးမျှင်နှင့် အလားသဏ္ဌာန်တူလှ၏။

သွေးဝမ်ယန်၏ သေဆုံးမှုက မျိုးနွယ်စုနှစ်ခုကြားမှ စစ်ပွဲကို အစပြုစေမည့် မီးပွားလေးတစ်ခု ဖြစ်သွားလေသည်။

သည်းမခံနိုင်တော့ပြီ ဆိုမှတော့ ဆက်လက်သည်းခံနေရန် မလိုအပ်တော့ချေ။

မည်သူ၏ စွမ်းအားက ပို၍ကြီးမားပြီး မည်သူက ဤပင်လယ်ဒေသတွင် ဆက်လက်ရှင်သန်ရပ်တည်နိုင်မည့် အရည်အချင်းရှိသည်ကို ကြည့်ကြရပေတော့မည်။

တစ်ဖက်တွင်မူ ငွေဝံပုလွေကျွန်း၌…။

ဤနေရာသည် ငွေဝံပုလွေမျိုးနွယ်စု၏ ဌာနချုပ်ကြီးဖြစ်ပြီး ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူများနှင့် မဟာယာနအဆင့် ကျင့်ကြံသူအများအပြား နေထိုင်ကြလေသည်။

၎င်းတို့၏အင်အားမှာ သွေးလမင်းမျိုးနွယ်စုထက် အနည်းငယ်မျှ လျော့နည်းခြင်း မရှိပေ။

မဟာယာနအဆင့် အင်မော်တယ်တစ်ပိုင်း အယောက်နှစ်ဆယ်ကျော်ကိုလည်း ပိုင်ဆိုင်ထားကြ၏။

ဤပင်လယ်ပြင်တွင် ၎င်းတို့၏ ကျော်ကြားသော ဂုဏ်သတင်းကို တည်ဆောက်ထားနိုင်ခဲ့ကြသည်။

ငွေဝံပုလွေမျိုးနွယ်စုမှ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူတစ်ဦးက ရရှိထားသောသတင်းကို ပြောပြလိုက်၏။

"သွေးလမင်းမျိုးနွယ်စုက သတင်းပို့လာတယ်။ ငါတို့ငွေဝံပုလွေမျိုးနွယ်စုက သွေးဝမ်ယန်ကို သတ်လိုက်တယ်လို့ စွပ်စွဲပြီး ငါတို့နဲ့ စစ်ပွဲစတော့မယ်တဲ့...”

"သွေးဝမ်ယန်ဆိုတဲ့ ကောင်လေး သေသွားပြီလား။ တကယ့်ကို ဝမ်းသာစရာပဲ...”

"ဒီကောင်က ပြီးခဲ့တဲ့ကာလပတ်လုံး ငါတို့ငွေဝံပုလွေမျိုးနွယ်စုရဲ့ မျိုးဆက်ကောင်း အတော်များများကို သတ်ခဲ့တာ။ အခု နောက်ဆုံးတော့ သေသွားပြီပေါ့...”

"ငါတို့အရင်က တကယ်ကို ပူးပေါင်းပြီး သွေးဝမ်ယန်ကို ချုံခိုတိုက်ခိုက်ခဲ့ကြတာ...”

"ဒါပေမဲ့ အဲဒီကောင်က ထွက်ပြေးတဲ့နေရာမှာ အရမ်းတော်တော့ လွတ်သွားခဲ့တယ်...”

"အခုတော့ တကယ်ပဲ သေသွားလိမ့်မယ်လို့ မထင်ထားမိဘူး။ ဘယ်သူက သူ့ကို သတ်လိုက်တာလဲ...”

ငွေဝံပုလွေမျိုးနွယ်စုမှ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူများမှာ တစ်ယောက်တစ်ပေါက် ဆွေးနွေးငြင်းခုံနေကြလေသည်။

၎င်းတို့အားလုံးမှာ အတိုင်းမသိ ဝမ်းသာအားရ ဖြစ်နေကြ၏။

အဘယ်ကြောင့်ဆိုသော် သွေးဝမ်ယန်သည် သွေးလမင်းမျိုးနွယ်စု၏ မဟာယာနအဆင့်သို့ တက်လှမ်းနိုင်မည့် မျိုးစေ့တစ်ဦး ဖြစ်သောကြောင့်ပင်။

ထိုကဲ့သို့သော ပြိုင်ဘက်ကင်းပါရမီရှင် သေဆုံးသွားခြင်းမှာ ငွေဝံပုလွေမျိုးနွယ်စုအတွက် ဂုဏ်ပြုထိုက်သော ကိစ္စတစ်ခုဖြစ်ပြီး သွေးလမင်းမျိုးနွယ်စုကို အပြင်းအထန် ဒဏ်ရာရစေသည်နှင့် တူသည်။

"ဒီလိုဆိုရင် သွေးဝမ်ယန်က ငါတို့ငွေဝံပုလွေမျိုးနွယ်စုရဲ့ လက်ချက်နဲ့ သေတာမဟုတ်ဘူးပေါ့။ ငါတို့ အပြစ်လွှဲချခံလိုက်ရတာလား...”

ငွေဝံပုလွေမျိုးနွယ်စုမှ ကျင့်ကြံသူတစ်ဦးက မျက်မှောင်ကြုတ်လျက် ပြောလိုက်၏။

"အပြစ်လွှဲချခံရလည်း ဘာအရေးလဲ။ ဘာပဲဖြစ်ဖြစ် ငါတို့နဲ့ သွေးလမင်းမျိုးနွယ်စုက မပြေလည်နိုင်တဲ့ ရန်ဘက်တွေပဲ။ သန်းတွေ အများကြီးရှိနေရင် အကိုက်ခံရလည်း မကြောက်တော့ဘူး။ ငါတို့ ခေါင်းခံပေးခဲ့ရတဲ့ အပြစ်တွေက နည်းနေလို့လား...”

အခြားငွေဝံပုလွေမျိုးနွယ်စု ကျင့်ကြံသူတစ်ဦးက ဂရုမစိုက်ဟန်ဖြင့် ပြန်ပြောလိုက်၏။

"ဒါ အမှန်ပဲ။ ပြီးတော့ ငါတို့ငွေဝံပုလွေမျိုးနွယ်စုက တိုက်ခိုက်ပြီး အဲဒီကောင်ကို အပြင်းအထန် ဒဏ်ရာရအောင် လုပ်ခဲ့တာပဲ။ ဒီကိစ္စအတွက် ငါတို့ ဘယ်လိုမှ တာဝန်မကင်းဘူး...”

"တကယ်လည်း ဟုတ်တယ်။ အဲဒီကောင်က ကြယ်ကွဲပင်လယ်ရဲ့ ကပ်ဘေးတစ်ခုခုကြောင့် သေသွားတာ ဖြစ်နိုင်သလို ရတနာလုချင်တဲ့ ကျင့်ကြံသူတစ်ယောက်ယောက်ရဲ့ လက်ချက်ကြောင့်လည်း ဖြစ်နိုင်တယ်။ ဒါပေမဲ့ ငါတို့က အပြင်းအထန် ဒဏ်ရာရအောင် မလုပ်ခဲ့ရင် သူ ဘယ်လိုလုပ် သေနိုင်မှာလဲ...”

"ဟုတ်တာပေါ့။ နောက်ဆုံးမှာ ငါတို့လက်ထဲမှာ မသေခဲ့ရင်တောင် ငါတို့ကြောင့် သွယ်ဝိုက်ပြီး သေသွားရတာပဲ...”

"ဒီကိစ္စ ရှိသည်ဖြစ်စေ၊ မရှိသည်ဖြစ်စေ ငါတို့နဲ့ သွေးလမင်းမျိုးနွယ်စုက စစ်ခင်းကြရမှာပဲ...”

"ဟုတ်ပါ့။ ပြီးခဲ့တဲ့ ကာလတွေမှာ သွေးလမင်းမျိုးနွယ်စုရဲ့ တိုးတက်မှုနှုန်းက အရမ်းမြန်လွန်းနေတယ်။ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူတွေတင်မက မဟာယာနအဆင့် ကျင့်ကြံသူတွေပါ ပိုပြီး ပေါ်ထွက်လာနေတယ်…”

“ဒီအတိုင်း ဆက်သွားရင် ငါတို့ငွေဝံပုလွေတွေကို ကျော်တက်သွားလိမ့်မယ်။ ဒါကြောင့် ငါတို့က အရင်ဦးအောင် လက်ဦးမှုယူပြီး သူတို့ရဲ့ အလားအလာကို ကြိုတင်ဖျက်ဆီးပစ်ရမယ်...”

"မဟုတ်ရင် သွေးလမင်းမျိုးနွယ်စုရဲ့ အင်အားက ငါတို့ကို ကျော်တက်သွားတဲ့အထိ စောင့်နေရင် အရမ်းနောက်ကျသွားလိမ့်မယ်...”

"ဒီစစ်ပွဲကနေ သွေးလမင်းမျိုးနွယ်စုရဲ့ နှစ်ပေါင်းသောင်းချီ တိုးတက်မှုကို ဖြတ်တောက်ပစ်ပြီး ငါတို့ငွေဝံပုလွေမျိုးနွယ်စုအတွက် ဖွံ့ဖြိုးတိုးတက်ဖို့ အချိန်ရှာရမယ်...”

ငွေဝံပုလွေမျိုးနွယ်စုမှ ခန္ဓာပေါင်းစည်းခြင်းအဆင့် အစွမ်းထက်ကျင့်ကြံသူများမှာ တစ်ယောက်တစ်မျိုး ဆွေးနွေးငြင်းခုံနေကြပြီး၊ ၎င်းတို့၏ ခန္ဓာကိုယ်ထက်မှ ကြောက်မက်ဖွယ်ကောင်းသော သတ်ဖြတ်လိုသည့် အငွေ့အသက်များ ပျံ့လွင့်နေလေသည်။

၎င်းတို့ကိုယ်တိုင်လည်း အပြစ်ပုံချခံလိုက်ရမှန်း သိကြသည်။ သို့သော် ဤသည်မှာ လုံးဝ အရေးမကြီးလှပေ။

မည်သို့ပင်ဆိုစေကာမူ နှစ်ဖက်စလုံးမှာ မပြေနိုင်သောရန်ဘက်များ ဖြစ်ကြသဖြင့် ဤကိစ္စကြောင့် မဟုတ်လျှင်ပင် အခြားသော ကိစ္စရပ်များကြောင့် စစ်ပွဲဖြစ်ပွားကြမည်သာ။

မျိုးနွယ်စုနှစ်ခု စစ်ဖြစ်ရခြင်း၏ အကြောင်းရင်းမှာ ဤမျှသာ မဟုတ်ပေ။

ပြိုင်ဘက်က မိမိတို့အား ခြိမ်းခြောက်လာခြင်း သို့မဟုတ် ဟန့်တားနှောင့်ယှက်လာခြင်းကြောင့်သာ ဖြစ်ပေသည်။

သွေးဝမ်ယန်၏ ကိစ္စမှာ စနက်တံတစ်ခုမျှသာ ဖြစ်လေ၏။

မည်သို့ပင်ဆိုစေ ဤဖြစ်ရပ်ကြောင့် မျိုးနွယ်စုနှစ်ခုကြားတွင် တစ်ခါမျှ မရှိခဲ့ဖူးသော စစ်ပွဲကြီးမှာ ချက်ချင်း ဖြစ်ပွားသွားခဲ့တော့သည်။

အဝေးတစ်နေရာမှ ကျိုးစွေ့၏ ခန္ဓာကိုယ်ထက်ရှိ ‘ကံကြမ္မာကူ’ ၏ ကံတရားအင်အားစုမှာ အဆက်မပြတ် လှုပ်ခတ်လာကာ ဟင်းလင်းပြင်နက်ရှိုင်းရာသို့ စီးဝင်သွားပြီး၊ မရေမတွက်နိုင်သော အကြောင်းအကျိုး ဆက်နွှယ်မှုများကို ရှုပ်ထွေးစေကာ အရာအားလုံးကို ကျိုးစွေ့အတွက် အကျိုးရှိမည့် ဘက်သို့ ဦးတည်စေခဲ့သည်။

ဘာသိဘာသာဖြင့် ကျိုးစွေ့မှာ အကြောင်းအကျိုး ဆက်နွှယ်မှုများ၏ အပြင်ဘက်သို့ ရောက်ရှိသွားကာ အသွင်မဲ့စွာ ပုန်းကွယ်လျက် များပြားလှသော ကပ်ဘေးများကို ရှောင်ကွင်းနိုင်ခဲ့ပြီး ကပ်ဘေးများကို အလိုအလျောက် ပျောက်ကွယ်သွားစေခဲ့သည်။ သို့သော် ဤသည်မှာလည်း ကံကြမ္မာအင်အား အတော်များများကို ကုန်ဆုံးစေခဲ့၏။

သို့ရာတွင် ဤသည်မှာ ကျိုးစွေ့ပိုင်ဆိုင်ထားသော အတိုင်းအဆမရှိ ကြီးမားလှသည့် ကံကြမ္မာအင်အားနှင့် ယှဉ်လျှင် ဆံခြည်တစ်မျှင်မျှသာ ဖြစ်ပေသည်။

...