အခန်း ၁၇၈
Vol. 17 Ch. 178
အခန်း ၁၇၈
နောက်တစ်စက္ကန့်တွင်မူ သူ၏ ရင်ဘတ်မှာ ရွှေရောင်အလင်းတန်းဖြင့် အဖောက်ခံလိုက်ရပြီး နှလုံးသား၏ သုံးပုံနှစ်ပုံခန့် ပျက်စီးသွားခဲ့ပြီဖြစ်ကြောင်း သူ သတိပြုမိလိုက်တော့သည်။
ထို့နောက် သူသည် မိမိ၏ ခန္ဓာကိုယ်ကို မထိန်းချုပ်နိုင်တော့ဘဲ မီတာတစ်ထောင်မြင့်သော ကောင်းကင်ယံထက်မှနေ၍ နောက်ပြန်လန်ကာ အရှိန်အဟုန်ဖြင့် ပြုတ်ကျသွားခဲ့လေသည်။
သူ အသက်မပျောက်ပျက်မီ နောက်ဆုံးအချိန်အထိ မိမိကိုယ်မိမိ ဘယ်လိုသေသွားခဲ့မှန်းပင် သူ နားမလည်နိုင်ခဲ့ရှာချေ။
"ဒါက... ရွှေလက်ချောင်း အတတ်လား"
အကြီးအကဲကျောက်သည် အတွေ့အကြုံရင့်ကျက်သူပီပီ ခွေးပင်လျှင် နှာခေါင်းရှုံ့ကာ အထင်သေးကြသည့် ဤအမှိုက်စား ကျင့်စဉ်အတတ်ကို ချက်ချင်း မှတ်မိသွားခဲ့သည်။
ချန်အန်အနေဖြင့် ဤမျှ အသုံးမကျလှသော ကျင့်စဉ်အတတ်ကို ဤမျှလောက်အထိ အစွမ်းထက်လာအောင် ကျင့်ကြံနိုင်လိမ့်မည်ဟု သူ လုံးဝ ထင်မထားခဲ့မိချေ။
၎င်းက အလွန်ပင် တုန်လှုပ်စရာ ကောင်းလွန်းလှပေသည်။
"ဗုန်း"
အသံတိုးတိုးတစ်ခု ထွက်ပေါ်လာခဲ့ပြန်သည်။
အကြီးအကဲကျောက်၏ နဖူးပြင်ထက်တွင် လက်သီးဆုပ်ခန့်ရှိသော သွေးချင်းချင်းနီနေသည့် အပေါက်ကြီးတစ်ခု ရုတ်တရက် ပေါ်ထွက်လာခဲ့သည်။
သူ၏ ဦးခေါင်းမှာ ရွှေရောင်အလင်းတန်းဖြင့် အချင်းချင်း အဖောက်ခံလိုက်ရခြင်း ဖြစ်သည်။
သို့သော်လည်း သူ သေဆုံးမသွားခဲ့ချေ။
ဒါက ရွှေအမြုတေအဆင့်ကျင့်ကြံသူတစ်ယောက်၏ ခံနိုင်ရည် အစွမ်းပင် ဖြစ်သည်။
အကြီးအကဲကျောက် သေဆုံးခြင်းမရှိသေးသည်ကို မြင်လိုက်ရသောအခါ ချန်အန်သည် လက်ကိုမြှောက်ကာ အကြီးအကဲကျောက်၏ နှလုံးသားဆီသို့ ဦးတည်၍ နောက်ထပ် ရွှေရောင်အလင်းတန်းတစ်ခုကို ထပ်မံ ပစ်လွှတ်လိုက်ပြန်သည်။
ဤအချိန်တွင်မူ အကြီးအကဲကျောက်သည် မိမိကိုယ်မိမိ အန္တရာယ်ကြီးစွာ ကျရောက်နေပြီဖြစ်ကြောင်း ရိပ်မိသွားခဲ့သည်။ သူသည် ဘာမှထပ်မပြောတော့ဘဲ သူ့နောက်ကွယ်ရှိ ပျံသန်းနိုင်သော သင်္ဘောကြီးကိုပင် စွန့်လွှတ်ကာ လေပြင်းခရီးနှင်ခြင်းအတတ်ကို အသုံးပြု၍ ချက်ချင်းပင် ထွက်ပြေးလွတ်မြောက်ရန် ကြိုးပမ်းတော့သည်။
ဝိညာဉ်သင်္ဘောပေါ်ရှိ ကျန်ရှိနေသော ရှုကွန်ဂိုဏ်း ကျင့်ကြံသူများသည်လည်း ချက်ချင်းပင် ၎င်းတို့၏ ဓားပျံများကို စီးနင်းကာ အရပ်ရပ်သို့ ထွက်ပြေးကြတော့သည်။
"ဗုန်း... ဗုန်း... ဗုန်း"
ခပ်အုပ်အုပ် သေနတ်သံကဲ့သို့သော ပေါက်ကွဲသံများ ဆက်တိုက် ထွက်ပေါ်လာခဲ့သည်။
ထွက်ပြေးနေကြသော ရွှေကွန်ဂိုဏ်း ကျင့်ကြံသူများသည် တစ်ယောက်ပြီးတစ်ယောက် ရွှေရောင်အလင်းတန်း၏ ဖောက်ထွင်းမှုကို ခံလိုက်ကြရသည်။ သူတို့၏ ဦးခေါင်းများ ပြုတ်ထွက်သွားကြသလို အချို့မှာမူ နှလုံးသားများ ပေါက်ကွဲထွက်သွားခဲ့ကြကာ အားလုံးက ထိုနေရာတင်တင်ပင် ပွဲချင်းပြီး သေဆုံးသွားခဲ့ကြရသည်။
တစ်ဖက်လူကို ရန်ငြိုးဖွဲ့မိပြီးဖြစ်ရာ ချန်အန်သည် နောက်နောင် ပြဿနာမတက်စေရန်အတွက် တစ်ယောက်မကျန် အမြစ်ပြတ် သတ်ဖြတ်ပစ်လိုခြင်း ဖြစ်သည်။
"ဗုန်း... ဗုန်း... ဗုန်း!"
ပေါက်ကွဲသံများက အဆက်မပြတ် ထွက်ပေါ်နေဆဲပင်။
စက္ကန့်အနည်းငယ်အကြာတွင်မူ ယခုလေးတင် ထွက်ပြေးသွားခဲ့သော အကြီးအကဲကျောက်မှလွဲ၍ ကျန်ရှိနေသော ရှုကွန်ဂိုဏ်း ကျင့်ကြံသူ ဒါဇင်ပေါင်းများစွာမှာ ချန်အန်၏ ရွှေရောင်အလင်းတန်းကြောင့် အားလုံး အသက်ပျောက်ပျက်ကာ ကောင်းကင်ယံထက်မှ ပြုတ်ကျကုန်ကြတော့သည်။
မည်သူမျှ မထိန်းချုပ်တော့သော ဝိညာဉ်သင်္ဘောကြီးသည်လည်း အရှိန်အဟုန်ဖြင့် အောက်သို့ ထိုးစိုက်ကျသွားခဲ့သည်။
ချန်အန်သည် ထိုဝိညာဉ်သင်္ဘောကြီးကို ဂရုမစိုက်အားချေ။ ပထမအချက်မှာ သူ၏ သိုလှောင်အိတ်ထဲသို့ ထည့်၍မဆံ့ခြင်းကြောင့် ဖြစ်ပြီး ဒုတိယအချက်မှာ ၎င်းကို မည်သို့မောင်းနှင်ရမည်ကို သူ မသိရှိခြင်းကြောင့် ဖြစ်ရာ မြေပြင်ပေါ်သို့ ပျက်ကျပါစေတော့ဟုသာ လွှတ်ထားလိုက်သည်။
ယခုအချိန်တွင် သူ လုပ်ဆောင်နေသည်မှာ ဓားပျံကို စီးနင်းလျက် အောက်သို့ အလွတ်ကျနေသော အလောင်းကောင်များ၏ ဘေးမှ ဖြတ်သန်းကာ သူတို့၏ သိုလှောင်အိတ်များကို မိမိအိတ်ထဲသို့ သိမ်းဆည်းနေခြင်း ဖြစ်သည်။
ထို့နောက် သူသည် ချက်ချင်းပင် ဓားစီးကာ အကြီးအကဲကျောက်၏ နောက်သို့ အပူတပြင်း လိုက်လံဖမ်းဆီးတော့သည်။
ခုနက ဝိညာဉ်သင်္ဘောပေါ်ရှိ ရွှေကွန်ဂိုဏ်း ကျင့်ကြံသူများအနက် အကြီးအကဲကျောက် တစ်ဦးတည်းသာ အသက်ရှင်ကျန်ရစ်နေခြင်း ဖြစ်သည်။
သူ့ကို သတ်ဖြတ်နိုင်မှသာ ဤပြဿနာက အပြီးတိုင် အဆုံးသတ်သွားပေလိမ့်မည်။
ဝူး..
ချန်အန်၏ ဓားပျံစီးနင်းနှုန်းမှာ အလွန်အမင်း မြန်ဆန်လှပေသည်။ ကောင်းကင်ယံထက်တွင် လေထုနှင့် ပွတ်တိုက်မှုကြောင့် နားကွဲလုမတတ် အသံလွန်ပေါက်ကွဲသံတစ်ခုကို ဖြစ်ပေါ်စေခဲ့သည်။
မျက်စိတစ်မှိတ်အတွင်းမှာပင် သူသည် ရှေ့ဘက် နှစ်မိုင် သုံးမိုင်ခန့်အကွာတွင် အကြီးအကဲကျောက်ကို လှမ်းမြင်လိုက်ရသည်။
အကြီးအကဲကျောက်သည်လည်း သူ့ကို သတိပြုမိသွားခဲ့ပြီး ထိတ်လန့်လွန်းသဖြင့် နှလုံးရပ်မတတ် ဖြစ်သွားခဲ့ရသည်။
ထို့နောက် သူသည် ချန်အန်၏ လိုက်လံဖမ်းဆီးမှုမှ လွတ်မြောက်ရန်အတွက် မြေပြင်ဆီသို့ ပြတ်ပြတ်သားသားပင် ထိုးဆင်းသွားတော့သည်။
ချန်အန်သည် နောက်မှ ထပ်ကြပ်မကွာ လိုက်လံရင်း အကြီးအကဲကျောက်ထံသို့ ရွှေရောင်အလင်းတန်းများဖြင့် အဆက်မပြတ် ပစ်ခတ်ခဲ့သည်။
သို့သော်လည်း နှမြောစရာကောင်းလှသည်မှာ သူ၏ ပစ်ချက်များသည် အကြီးအကဲကျောက်၏ အသက်အန္တရာယ်ရှိသော နေရာများကို လွဲချော်သွားခဲ့သဖြင့် တစ်ဖက်လူအား ဆေးလုံးသောက်သုံးကာ အသားနု ပြန်လည်မွေးဖွားရန် အခွင့်အရေး ပေးလိုက်သကဲ့သို့ ဖြစ်သွားခဲ့ရသည်။
ချန်အန်သည် သူ့ကို ဖမ်းဆီးရန်အတွက် အရိပ်ခြေမဲ့ သတ်ဖြတ်ခြင်းအတတ်ကို အသုံးပြုလိုသော်လည်း အကွာအဝေးမှာ အလွန်ဝေးကွာလွန်းနေသဖြင့် ထိုအတတ်၏ အာနိသင် စက်ဝန်းပြင်ပသို့ ရောက်ရှိနေခဲ့သည်။
အကြီးအကဲကျောက်သည် မြေပြင်ပေါ်သို့ အရင်ဆုံး ဆင်းသက်နိုင်ခဲ့ပြီး ချက်ချင်းပင် မြေလျှိုးအတတ်ကို အသုံးပြုလိုက်သည်။
ချန်အန်သည် သူ့ထက် အနည်းငယ် နောက်ကျပြီးမှ ဆင်းသက်နိုင်ခဲ့သည်။ ထို့နောက် သူသည် သူ့နောက်သို့ လိုက်လံရန်အတွက် သစ်လျှိုးအတတ်ကို အသုံးပြုလိုက်တော့သည်။
တောအုပ်နီတစ်ခုလုံးတွင် သစ်ပင်များဖြင့် ပြည့်နှက်နေခဲ့သည်။ သစ်လျှိုးအတတ်ကို အသုံးပြုခြင်း၏ အားသာချက်မှာ မြေလျှိုးအတတ်ထက် မနိမ့်ပါးချေ။
'ဒီခွေးကောင်က ဘာလို့ ဒီလောက်တောင် မြန်မြန် ထွက်ပြေးနိုင်ရတာလဲ'
အကြီးအကဲကျောက်၏ မြေလျှိုးအတတ်မှာ အလွန် အထင်ကြီးစရာ ကောင်းလှကြောင်း ချန်အန် သတိပြုမိလိုက်သည်။ သူ၏ အရှိန်မှာ မိမိ၏ သစ်လျှိုးအတတ်ထက် လုံးဝ မနိမ့်ပါးသည့်အပြင် ၎င်းထက်ပင် ပိုမိုမြန်ဆန်နေသေးသည်။
ဒီလိုနဲ့ သူတို့နှစ်ယောက်စလုံးဟာ တစ်ယောက်ကိုတစ်ယောက် လိုက်တမ်းပြေးတမ်း ကစားရင်း မိုင်ပေါင်း တစ်ထောင်ကျော်ခန့်အထိ ရောက်ရှိသွားခဲ့ကြသည်။
သူတို့သည် ရွှံ့နွံတောတစ်ခုသို့ ရောက်ရှိချိန်တွင်မူ ချန်အန်သည် သူ၏ရှေ့တွင် အဆင့်မြင့် စွမ်းအင်စုပေါင်း ရာနှင့်ချီ သို့မဟုတ် ထောင်နှင့်ချီ၍ ရှိနေကြောင်း အာရုံခံမိလိုက်ပြန်သည်။
သူတို့အားလုံးမှာ လူသားကျင့်ကြံသူများ ဖြစ်ကြပြီး ကျင့်ကြံခြင်းအဆင့်မှာလည်း အခြေခံအုတ်မြစ်တည်ဆောက်ခြင်းအဆင့် အထက်တွင်သာ ရှိကြသည်။
ထိုအထဲတွင် လူကိုးယောက်၏ ဝိညာဉ်ရေးရာ ဖိအား မှာ အလွန် ပြင်းထန်လှပြီး အခြေခံအုတ်မြစ်တည်ဆောက်ခြင်းအဆင့်၏ ဘောင်ကို ကျော်လွန်နေခဲ့ပြီ ဖြစ်သည်။ သူတို့အားလုံးမှာ ရွှေအမြုတေအဆင့် ကျင့်ကြံသူများ ဖြစ်ကြသည်။
အကယ်၍ ဘာမှမမှားယွင်းဘူးဆိုလျှင် ရှုကွန်ဂိုဏ်း၏ အဖွဲ့ဝင်အားလုံးမှာ ဤရွှံ့နွံတောထဲတွင် ရှိနေကြခြင်း ဖြစ်ပေလိမ့်မည်။
"လာလေ... ငါ့နောက်ကို လိုက်ခဲ့ဦးလေ"
"မင်းမှာ အရည်အချင်းရှိရင် ငါ့နောက်ကို ဒီရွှံ့နွံတောထဲအထိ လိုက်ခဲ့စမ်း"
"မဟုတ်ရင်တော့ ငါ တစ်နေ့နေ့ကျရင် မင်းရဲ့ မိသားစုတစ်ခုလုံးကို အမြစ်ပြတ် ခြေမှုန်းပစ်မယ်"
အကြီးအကဲကျောက်သည် အလွန် မာနထောင်လွှားနေခဲ့သည်။ သူသည် ချန်အန်ကို ၎င်းအတွင်းသို့ ဝင်လာစေရန် အဆက်မပြတ် ရန်စဆွပေးနေခဲ့ခြင်း ဖြစ်သည်။ ထို့နောက်မှသာ ရွှံ့နွံတောထဲရှိ လူအားလုံးနှင့် ပူးပေါင်းကာ ချန်အန်ကို ဝိုင်းဝန်းသတ်ဖြတ်ရန် ကြံစည်နေခြင်း ဖြစ်သည်။
ချန်အန်သည် ထိုစကားကို ကြားရသောအခါ သရော်ပြုံး ပြုံးလိုက်မိသည်။ ထို့နောက် သူသည် မိမိ၏ ဓားပျံကို ထုတ်ယူကာ သူ့နောက်သို့ ဆက်လက် လိုက်လံဖမ်းဆီးတော့သည်။
ရှုကွန်ဂိုဏ်း ဟုတ်လား။
ကောင်းကင်မြေကမ္ဘာဂိုဏ်းက လူမဟုတ်သရွေ့ သူ မည်သူ့ကိုမျှ ကြောက်ရွံ့နေစရာ မလိုပေ။
ဒီနေ့တော့ အကြီးအကဲကျောက်၏ အသက်ကို သူ သေချာပေါက် ယူပစ်မည် ဖြစ်သည်။
အတန်ကြာတွင် ချန်အန်သည် ဓားပျံကို စီးနင်းလျက် ရွှံ့နွံတော၏ အပြင်ဘက်အစွန်းဆီသို့ လိုက်လံရောက်ရှိလာခဲ့သည်။
ထိုနေရာမှနေ၍ သူသည် အဝေးရှိ ရှုကွန်ဂိုဏ်းမှ လူများကို လှမ်းမြင်လိုက်ရပြီး သူတို့၏ စကားပြောသံများကိုပါ ကြားလိုက်ရလေသည်။
သူတို့သည် ဤရွှံ့နွံတောထဲတွင် အခြေချနေထိုင်သော စပါးအုန်းမြွေမိစ္ဆာကို အမဲလိုက်ရန်အကြောင်း ပြောဆိုနေကြခြင်း ဖြစ်သည်။
ဤစပါးအုန်းမြွေမိစ္ဆာနှင့် ပတ်သက်၍ ချန်အန်သည် ချင်ကုန်သွယ်ရေးလုပ်ငန်းစုထံမှ ကြားသိထားခဲ့ဖူးသည်။ ၎င်းက အရေခွံလဲပြီး နဂါးအသွင်သို့ ကူးပြောင်းရန် ပြင်ဆင်နေသည့် ရွှေအမြုတေအဆင့် နောက်ကျောပိုင်း မိစ္ဆာကောင်ကြီး တစ်ကောင် ဖြစ်သည်။
ယခုအချိန်တွင် ရှုကွန်ဂိုဏ်း၏ ဂိုဏ်းချုပ်သည် သူ၏ အင်အားအားလုံးကို အသုံးချကာ ဤစပါးအုန်းမြွေမိစ္ဆာကို အမဲလိုက်ရန် စီစဉ်နေခြင်း ဖြစ်ပြီး ၎င်း၏ မိစ္ဆာအမြုတေကို ရယူကာ မိမိကိုယ်မိမိ ရွှေအမြုတေအဆင့် သတ္တမအဆင့်သို့ တက်လှမ်းနိုင်ရန်နှင့် ရွှေအမြုတေအဆင့် နောက်ကျောပိုင်းသို့ ခြေလှမ်းလှမ်းနိုင်ရန် ရည်ရွယ်ထားခြင်း ဖြစ်သည်။
"ဂိုဏ်းချုပ်ကြီး"
"ကျွန်တော့်ကို ကယ်ပါဦး"
"ကျွန်တော် အသက်အန္တရာယ် ခြိမ်းခြောက်ခံနေရလို့ပါ"
အကြီးအကဲကျောက်သည် ချန်အန်ထက် ခြေတစ်လှမ်း စောကာ ရှုကွန်ဂိုဏ်း ဂိုဏ်းချုပ်၏ ရှေ့မှောက်သို့ ရောက်ရှိသွားခဲ့သည်။ သူသည် ရွှံ့နွံတောထဲမှ ရုန်းထွက်လာခဲ့ပြီး ဂိုဏ်းချုပ်ထံသို့ အကူအညီ တောင်းခံလိုက်တော့သည်။
ထိုအချိန်တွင် ချန်အန်သည်လည်း နောက်မှ ထပ်ကြပ်မကွာ လိုက်လံရင်း ကောင်းကင်ယံထက်တွင် ဓားပျံစီးလျက် ရောက်ရှိလာခဲ့သည်။
ရှုကွန်ဂိုဏ်း၏ ဂိုဏ်းချုပ်သည် ပထမဦးစွာ သနားစဖွယ် အခြေအနေ ရောက်နေသော အကြီးအကဲကျောက်ကို တစ်ချက် လှမ်းကြည့်လိုက်သည်။ ထို့နောက် သူသည် ကောင်းကင်ယံထက်သို့ ပျံတက်လိုက်ပြီး ချန်အန်နှင့် အမြင့်ချင်းတူညီသော နေရာတွင် ရပ်တန့်ကာ ချန်အန်ကို စိုက်ကြည့်ရင်း မေးမြန်းလိုက်သည်။
"မင်းက ဘာကြောင့် ငါ့ဂိုဏ်းရဲ့ အကြီးအကဲကို ဒီလောက်တောင် အသေအလဲ လိုက်လံသတ်ဖြတ်နေရတာလဲဆိုတာ ငါ သိပါရစေဦး"
"အကြောင်းကတော့ မင်းတို့ဂိုဏ်းရဲ့ အကြီးအကဲက ငါ့ရဲ့ ဝိညာဉ်အမြုတေကို ဖျက်ဆီးပြီး မင်းရဲ့ အိပ်ရာဖော် ကျွန်အဖြစ် ဖမ်းဆီးခေါ်ဆောင်သွားချင်လို့ပဲ။ မင်းရဲ့ အမြင်အရဆိုရင် ဒီလိုလူမျိုးက အသတ်ခံရဖို့ ထိုက်တန်သလား၊ မထိုက်တန်ဘူးလား"
ချန်အန်သည် စကားပြောရင်း သူ၏ လက်ညှိုးထိပ်တွင် အလင်းဓားတစ်လက်ကို သိပ်သည်းစေလိုက်သည်။ သူသည် အကြီးအကဲကျောက်ကို သတ်ဖြတ်လိုစိတ် အပြည့်ဖြင့် စိုက်ကြည့်လိုက်ရင်း... ဒီနေ့တော့ အကြီးအကဲကျောက်၏ ခွေးအသက်ကို သေချာပေါက် ယူပစ်မည်ဟု စိတ်ပိုင်းဖြတ်ထားလေသည်။
.......................................................