အခန်း ၅၀၉

အခန်း (၅၀၉) - ဧရာမမြေကျင်းကြီးဆီသို့ ပြန်လည်ရောက်ရှိခြင်းနှင့် ကျောက်ဆစ်ရုပ်တုအုပ်စုကြီးအား ဗုံးကြဲတိုက်ခိုက်ခြင်း ၂

မကြာမီမှာပင် ၎င်းတို့အုပ်စုသည် ဧရာမမြေကျင်းကြီး၏ အစွန်းနေရာသို့ ရောက်ရှိသွားခဲ့ကြပေသည်။

မြေကျင်းကြီး၏ အတွင်းပိုင်း၌ မြေပြင်ပေါ်ဝယ် ခွေဝပ်လျက် ဦးညွှတ်ကိုးကွယ်နေကြသော သားရဲရုပ်တုကြီးများ နှင့် အလယ်ဗဟို၌ ရှိနေသည့် ကြောက်မက်ဖွယ်ကောင်းလှသော ရှူးပျံရုပ်တုကြီးများ၊ ၎င်းတို့ ကိုးကွယ်နေကြသည့် ကောင်းကင်သို့ ထိုးတက်နေသော ဧရာမခရမ်းနက်ရောင် အလင်းတိုင်ကြီးကိုရော ကိုယ်တိုင် မြင်တွေ့လိုက်ရသည့်အခါ လီဝမ်ရှီးနှင့် ချီရွှယ်ဖေးတို့နှစ်ဦးစလုံးမှာ စိတ်ထဲ၌ အလွန်ပင် ထိတ်လန့်အံ့သြသွားခဲ့ပေသည်။

"တကယ်ကြီး ဒီလောက်အထိ အများကြီး ရှိနေတာလားဟင်။"

လီဝမ်ရှီးက တိုးတိုးလေး ရေရွတ်လိုက်မိရင်း "တကယ်လို့ သူတို့အားလုံး တစ်ပြိုင်နက်တည်း အသက်ဝင်ပြီး လှုပ်ရှားလာခဲ့ကြမယ်ဆိုရင် ငါတို့ ဘယ်လိုနည်းနဲ့ ဖြေရှင်းရမှာလဲ။ ဒီနေရာမှာက သစ်ပင်အိမ်ရဲ့ လက်နက်စနစ်တွေကိုလည်း သုံးလို့မရဘူးလေ။ ဖြစ်နိုင်ရင် သူတို့ကို သစ်ပင်အိမ်ရှိတဲ့နေရာအထိ မျှားခေါ်သွားလို့ကော မရဘူးလားဟင်" ဟု မေးမြန်းလိုက်၏။

ရွှီရှင်းသည်လည်း လီဝမ်ရှီး တွက်ချက်သကဲ့သို့ ကြိုတင်စဉ်းစားဖူးသည်မှာ မှန်သော်လည်း ၎င်းအတွေးကို ချက်ချင်းပင် ပြန်လည်ပယ်ဖျက်ခဲ့ဖူးပေသည်။

သူ မြေကျင်းကြီး၏ အပြင်ဘက်သို့ ခုန်တက်လိုက်သည့် ခဏ၌ပင် ထိုကျောက်ဆစ်ရုပ်တုကြီးများသည် လာရောက်တိုက်ခိုက်မည့် ပစ်မှတ်ကို ချက်ချင်း ဆုံးရှုံးသွားခဲ့ကြရသဖြင့် မူလနေရာများဆီသို့ အလိုအလျောက် ပြန်လည်ဝင်ရောက်နေရာယူသွားခဲ့ကြခြင်း ဖြစ်ပေသည်။

ကြည့်ရသည်မှာ ၎င်းတို့သည် ဤဧရာမမြေကျင်းကြီးအတွင်း ရောက်ရှိနေသော ရှင်ကျန်သူများကိုသာ သီးသန့်တိုက်ခိုက်ကြခြင်းဖြစ်ပြီး အပြင်ဘက်သို့ ထွက်လာနိုင်စွမ်းမရှိကြသဖြင့် အပြင်သို့ မျှားခေါ်ရန်မှာ လုံးဝ မဖြစ်နိုင်သောအရာ ဖြစ်ပေသည်။

သို့သော်လည်း ၎င်းတို့သည် အပြင်ဘက်သို့ ထွက်လာနိုင်စွမ်းမရှိကြဘူးဆိုမှတော့ ပေါက်ကွဲအားပြင်း မြှားတံများကို အသုံးပြုလျက် ၎င်းတို့အား အပေါ်မှနေ၍ တိုက်ရိုက် ဗုံးကြဲချေမှုန်းပစ်လို့ကော မရနိုင်ဘူးလား။

သို့ပေမယ့် ပေါက်ကွဲအားပြင်း မြှားတံများ ပေါက်ကွဲသည့် ပြင်းထန်လှသောအသံကြီးကြောင့် အလယ်ဗဟိုက ထိုဧရာမရှူးပျံရုပ်တုကြီးနှစ်ခုကိုပါ သွားပြီး နှိုးဆော်မိသွားမလား မသိပါချေ။

ရွှီရှင်းအနေဖြင့် ပတ်ဝန်းကျင်က အဝိုင်းအလိုက် ရှိနေသော ရုပ်တုကြီးများနှင့် ပတ်သက်၍မူ အလွန် စိုးရိမ်ပူပန်နေခြင်းမျိုး မရှိပါပေ။

၎င်းတို့အားလုံး အသက်ဝင်လှုပ်ရှားလာခဲ့ကြသည်မှာ မှန်သော်လည်း ၎င်းတို့၏ အမြင့်ဆုံး အင်အားမှာ အလယ်အလတ်အဆင့် ဗီဇပြောင်းသတ္တဝါများ၏ အဆင့်အတန်းမျှသာ ဖြစ်သဖြင့် အလယ်ဗဟိုက ထိုရှူးပျံရုပ်တုကြီးနှစ်ခု ကိစ္စကသာ သူ့အား အနည်းငယ် စိုးရိမ်ပူပန်မှု ဖြစ်ပေါ်စေခြင်း ဖြစ်၏။

"အီး..."

ခဲခဲလေးသည် ၎င်းကျောက်ဆစ်ရုပ်တုကြီးများကို မြင်တွေ့ဖူးပြီးသား ဖြစ်ပေသည်။

လက်ရှိအချိန်၌ ၎င်းတို့မှာ လှုပ်ရှားခြင်းမရှိဘဲ ငြိမ်သက်နေကြဆဲဖြစ်သဖြင့် ခဲခဲလေးသည်လည်း ထူးခြားလှသော တုံ့ပြန်မှုမျိုး ပြသခြင်းမရှိဘဲ ရွှီရှင်း၏ ပုခုံးပေါ်၌သာ လိမ္မာယဉ်ကျေးစွာဖြင့် ဆက်လက်မှီကပ်နေရှာ၏။

ထားလိုက်ပါတော့ ကိစ္စတိုင်းကို လိုက်စိုးရိမ်နေလို့လည်း မထူးပါဘူး။

အခြေအနေအလိုက် တစ်ဆင့်ချင်းစီသာ ရင်ဆိုင်ဖြေရှင်းသွားရုံပဲ ရှိတော့ပေသည်။

ရွှီရှင်းသည် သူ၏ အာကာသလက်စွပ်ကို လှည့်ပတ်လိုက်ပြီး၊ မီမီ၊ ငွေရောင်ဘုရင်နှင့် အာဖုတို့ကို အပြင်သို့ ချက်ချင်းပင် လွှတ်ပေးလိုက်တော့သည်။

၎င်းသားရဲကြီးများသည် အပြင်သို့ ရောက်ရှိလာကြသည့်တိုင်အောင် မြေကျင်းကြီးအတွင်းက ရုပ်တုကြီးများအပေါ် ရန်လိုသည့် အမူအရာမျိုး ပြသခြင်းမရှိကြဘဲ ၎င်းအစား မြေကျင်းကြီး၏ အစွန်းနေရာ၌ ဝပ်လျက် အတွင်းပိုင်းဆီသို့ စူးစမ်းလိုစိတ်များဖြင့် အသေအချာ လှမ်း၍ ငုံ့ကြည့်နေကြပေသည်။

ရှောင်ဟုန်၏ ကျောက်ဆစ်ရုပ်တုကိုလည်း ရွှီရှင်းက ဘေး၌ ပြန်လည်ထုတ်ထားခဲ့ရာ ၎င်းမှာလည်း မြေပြင်ပေါ်၌ ထိုင်လျက် မည်သည့်လှုပ်ရှားမှု အရိပ်အယောင်မှ ပြသခြင်းမရှိဘဲ ငြိမ်သက်နေဆဲ ဖြစ်၏။

ကျိချောင်းယန်မှာမူ ၎င်း၏ ဒူးလေးကို လက်၌ အဆင်သင့် ဆွဲထုတ်ထားခဲ့ချေပြီ။

"တကယ်ပဲ ပေါက်ကွဲအားပြင်း မြှားတံတွေကို သုံးပြီး တိုက်ခိုက်တော့မှာလား"

ရွှီရှင်းက သူ့အား လှမ်းကြည့်လိုက်ရင်း "သာမန် မြှားတံတွေကတော့ သူတို့အပေါ်မှာ လုံးဝ အကျိုးသက်ရောက်မှု မရှိဘူး" ဟု ပြောလိုက်၏။

ကျိချောင်းယန် ပြီးခဲ့သည့်အကြိမ်က ပစ်ခတ်ထားခဲ့သော သာမန်မြှားတံအချို့မှာ ယခုတိုင်အောင် ကျောက်ဆစ်ရုပ်တုအချို့၏ မျက်လုံးများအတွင်း၌ စိုက်ဝင်နေဆဲ ဖြစ်ပေသည်။

"သုံးကြတာပေါ့။"

ကျိချောင်းယန်က ပေါက်ကွဲအားပြင်း မြှားတံတစ်ခုကို ချက်ချင်းပင် ကျွမ်းကျင်စွာ တပ်ဆင်လိုက်ရင်း "လက်ရှိ အခြေအနေအရ ကြည့်ရသလောက် ငါတို့ ဒီဧရာမမြေကျင်းကြီးထဲကို လူကိုယ်တိုင် မဝင်သရွေ့ ဒီကျောက်ဆစ်ရုပ်တုကြီးတွေက လုံးဝ နိုးထလာကြမှာ မဟုတ်ဘူး။ ငါတို့ မြေကျင်းကြီးထဲကို ခြေချမဝင်ဘဲနဲ့ အပြင်ကနေပြီးတော့ ကျောက်ဆစ်ရုပ်တုအချို့ကို ဖျက်ဆီးပစ်လို့ ရနိုင်မလားဆိုတာကို အရင်ဆုံး စမ်းသပ်ကြည့်ကြတာပေါ့" ဟု ဆိုလိုက်ပေသည်။

သေချာတာက ဤမြေကျင်းကြီးသည် ငါးမီတာခန့် နက်ရှိုင်းလှခြင်းဖြစ်ရာ၎င်းတို့အနေဖြင့် မြေကျင်းကြီး၏ အပြင်ဘက်မှနေ၍ အတွင်းက ရုပ်တုကြီးများကို လှမ်း၍ ထိခိုက်ဒဏ်ရာရအောင် ပြုလုပ်နိုင်မည့် တစ်ခုတည်းသော နည်းလမ်းမှာ ဤပေါက်ကွဲအားပြင်း မြှားတံများကို အသုံးပြု တိုက်ခိုက်ခြင်းသာ ဖြစ်ပေသည်။

ရွှီရှင်းက ခေါင်းညိတ်လိုက်ပြီး မြေကျင်းကြီး၏ အစွန်း၌ ငုံ့ကြည့်နေကြသော သားရဲဆိုးကြီးများကို နောက်သို့ အမြန်ဆုံး ပြန်လည်ဆွဲခေါ်လိုက်တော့သည်။

အကယ်၍ အတင်းပြန်မဆွဲခေါ်ထားဘူးဆိုလျှင်မူ ၎င်းတို့သည် အတွင်းက ရုပ်တုကြီးများကို အနီးကပ်ကြည့်ရှုရန်အတွက် အောက်သို့ ချက်ချင်း ခုန်ချသွားကြနိုင်သောကြောင့် ဖြစ်၏။

၎င်းတို့ငါးဦးစလုံးသည် မိမိတို့၏ ဒူးလေးများကို အသီးသီး ဆွဲထုတ်လိုက်ကြပြီး မြှားတံများကို ချက်ချင်း အဆင်သင့် တပ်ဆင်လိုက်ကြပေသည်။

"ပထမဆုံးအနေနဲ့ အပြင် အဝိုင်းမှာရှိတဲ့ ကျောက်ဆစ်ရုပ်တုတွေကိုပဲ ဦးတည်တိုက်ခိုက်ကြရအောင် သူတို့တွေက အားအနည်းဆုံးပဲ။"

ရွှီရှင်းသည် ဒူးလေးကို လက်ဖြင့် တင်းကြပ်စွာ ကိုင်ဆောင်ထားရင်း အပြင်ဘက်က သာမန်သားရဲရုပ်တုတစ်ခုရှိရာဆီသို့ စူးစိုက်လျက် ချိန်ရွယ်လိုက်ပေသည်။

"သုံး... နှစ်... တစ်... ပစ်ကြ"

"ဒုန်း ဒုန်း ဒုန်း"

ပေါက်ကွဲအားပြင်း မြှားတံငါးစင်းမှာ တစ်ပြိုင်နက်တည်း ပစ်ခတ်ခြင်း ခံလိုက်ရပြီး မတူညီသော သားရဲရုပ်တုကြီး ငါးခုဆီသို့ တိကျစွာ ထိမှန်သွားခဲ့ကြချေပြီ။

ခဏအတွင်းမှာပင် ဧရာမမြေကျင်းကြီးတစ်ခုလုံးအတွင်း၌ ပြင်းထန်လှသော မီးခိုးငွေ့များဖြင့် အပြည့်အဝ ဖုံးလွှမ်းသွားခဲ့ရပါတော့သည်။

မီးခိုးငွေ့များ လျင်မြန်စွာ ကွယ်ပျောက်သွားခဲ့ပြီးနောက် လရောင်အောက်ခြေ၌ ၎င်းတို့ ရှင်းလင်းစွာ မြင်တွေ့လိုက်ရသည်မှာ ကျောက်ဆစ်ရုပ်တုကြီး ငါးခုမှာ တကယ့်ကို မှုန့်မှုန့်ညက်ညက် ကြေမွ ပျက်စီးသွားခဲ့ကြရပြီ ဖြစ်၏။

အချို့ရုပ်တုများမှာ ခေါင်းကြီးများ ပြတ်ထွက်သွားခဲ့ရသလို အချို့မှာ ခန္ဓာကိုယ်အတွင်း၌ ဧရာမ အပေါက်ကြီးများ ဖြစ်ပေါ်သွားခဲ့ရပြီး အချို့မှာမူ တကယ့်ကို တစ်စစီ ကွဲအက်ပျက်စီးသွားခဲ့ကြရခြင်း ဖြစ်ပေသည်။

ရုတ်တရက် ထိုကြေမွပျက်စီးသွားခဲ့ရသော ရုပ်တုကြီးများထံမှနေ၍ တဖျတ်ဖျတ်နှင့် အက်ကွဲသံများ အဆက်မပြတ် ထွက်ပေါ်လာခဲ့ချေပြီ။

၎င်းတို့ငါးဦးစလုံး၏ ရှေ့ပင် ထိုကျောက်ဆစ်ရုပ်တုကြီးများပေါ်တွင် မရေမတွက်နိုင်သော အက်ကွဲကြောင်းများမှာ လျင်မြန်စွာ ဖြာထွက်သွားခဲ့ကြပြီး စူးရှလှသောအသံနှင့်အတူ မြေပြင်ပေါ်သို့ ကြေမွကျဆင်းသွားခဲ့ကာကျောက်မှုန့်ပုံကြီးများအဖြစ်သို့ လုံးဝ ပြောင်းလဲသွားခဲ့ကြရတော့သည်။

"ပေါက်ကွဲအားပြင်း မြှားတံတွေက တကယ်ပဲ အသုံးဝင်တာပါလား"

လီဝမ်ရှီးသည် စိတ်ထဲ၌ အလွန်ပင် ဝမ်းသာအားရဖြစ်စွာဖြင့် အော်ဟစ်လိုက်ရှာ၏။

"...ဒီကျောက်တုံးတွေက ဘာဖြစ်လို့ ဒီလောက်အထိ ကြွပ်ဆတ်နေရတာလဲမသိဘူး။ ပေါက်ကွဲအားပြင်း မြှားတံတွေက သာမန်သစ်ပင်အိမ်ရဲ့ နံရံတွေကိုတောင်မှ လုံးဝ ဖောက်ထွက်အောင် မဖျက်ဆီးနိုင်တာပေမဲ့ အခုကျတော့ ရုပ်တုကြီးတွေကို တစ်ချက်တည်းနဲ့တင် တိုက်ရိုက် ကြေမွသွားစေနိုင်တာပဲ"

လုဖေးအာကိုယ်တိုင်လည်း ဤမြှားတံများက ခုလောက်အထိ ကြီးမားလှသော အကျိုးသက်ရောက်မှု ရှိလိမ့်မည်ဟု လုံးဝ မထင်မှတ်ထားမိပါပေ။

ရွှီရှင်းနှင့် ကျိချောင်းယန်တို့နှစ်ဦးစလုံးမှာမူ ဆက်၍ ပစ်ခတ်ခြင်းမျိုး လောလောဆယ် မပြုလုပ်ကြသေးပေ။

၎င်းတို့နှစ်ဦးစလုံးသည် အခြားသော ကျောက်ဆစ်ရုပ်တုကြီးများရှိရာ နေရာဆီသို့ သတိကြီးစွာဖြင့် လှမ်း၍ စိုက်ကြည့်နေခဲ့ကြမိပေသည်။

အလယ်အလတ်အဆင့် ဗီဇပြောင်းသတ္တဝါ ရုပ်တု နှစ်လွှာနှင့် အလယ်ဗဟိုက ထိုဧရာမရှူးပျံရုပ်တုကြီးနှစ်ခု အပါအဝင် အခြားသော ကျောက်ဆစ်ရုပ်တုများက လှုပ်ရှားမှု လုံးဝ ပြသခြင်း မရှိကြပါပေ။

အပြင်ဘက် အဝိုင်းက သာမန်သားရဲရုပ်တုကြီးများကို ပေါက်ကွဲအားပြင်း မြှားတံများဖြင့် ဖြိုခွဲဖျက်ဆီးပစ်လိုက်ခြင်းသည် အခြားသော အတွင်းပိုင်းက ရုပ်တုကြီးများကို သွားရောက်နှိုးဆော်မိခြင်းမျိုး လုံးဝ မရှိပါပေ။

ရွှီရှင်းနှင့် ကျိချောင်းယန်တို့သည် တစ်ဦးကိုတစ်ဦး လှမ်းကြည့်လိုက်ကြမိပြီး နှစ်ဖက်စလုံး၏ မျက်လုံးများအတွင်းက မသိမသာ ဝမ်းသာအားရဖြစ်မှုများကို အသေအချာ မြင်တွေ့လိုက်ရပေသည်။

၎င်းတို့ နိုးထလာခြင်းမျိုး မရှိဘူးဆိုမှတော့ နောက်ပိုင်း ကိစ္စများကို ဖြေရှင်းရတာ များစွာ ပိုမို၍ လွယ်ကူသွားခဲ့ချေပြီ။

"အပြင်ဘက် အဝိုင်းက သာမန်သားရဲရုပ်တု အားလုံးကို ပေါက်ကွဲအားပြင်း မြှားတံတွေ သုံးပြီးတော့ပဲ ဆက်တိုက် ခဖျက်ဆီးပစ်ကြရအောင်"

ရွှီရှင်းက ချက်ချင်းပင် လှမ်း၍ ပြောလိုက်ပေသည်။

"အပြင်ဘက်က ကောင်တွေကိုပဲ အရင်ဆုံး ဖြိုပစ်ကြဦးနော် အတွင်းပိုင်းက ရုပ်တုတွေကိုတော့ လုံးဝ သွားပြီး မတိုက်ခိုက်မိစေနဲ့ဦး"

ကျိချောင်းယန်ကလည်း ဘေးမှနေ၍ ဖြည့်စွက်သတိပေးလိုက်ပေသည်။

၎င်းတို့အနေဖြင့် အတွင်းပိုင်းက ဗီဇပြောင်းသတ္တဝါ ရုပ်တုကြီးများကို သွားရောက်တိုက်ခိုက်လိုက်မည်ဆိုပါက အခြားသော ရုပ်တုကြီးအားလုံး နိုးထလာမလားဆိုသည်ကို သေသေချာချာ မသိရှိနိုင်ကြသေးသဖြင့် လောလောဆယ် အပြင်ဘက်က သာမန်ရုပ်တုများကိုသာ အရင်ဆုံး ချေမှုန်းရန် ဆုံးဖြတ်လိုက်ကြခြင်း ဖြစ်ပေသည်။

"ကောင်းပါပြီ။"

"သဘောပေါက်ပါတယ်ရှင်"

"ဟုတ်ကဲ့ပါ၊ ကျွန်မရဲ့ သခင်"

၎င်းတို့ငါးဦးစလုံးသည် ပတ်ပတ်လည်သို့ ချက်ချင်းပင် လူစုခွဲလိုက်ကြပြီး အပြင်ဘက်က သာမန်ရုပ်တုကြီးများရှိရာဆီသို့ အဆက်မပြတ် ဗုံးကြဲတိုက်ခိုက်မှုကြီးကို စတင်လိုက်ပါတော့သည်။

"ဒုန်း ဒုန်း ဒုန်း ဒုန်း ဒုန်း"

ပြင်းထန်လှသော ပေါက်ကွဲသံကြီးများသည် မြေကျင်းကြီးအတွင်း၌ ရူးသွပ်မတတ် အဆက်မပြတ် ဆူညံထွက်ပေါ်လာခဲ့ပြီး ပတ်ဝန်းကျင် မြေပြင်တစ်ခုလုံးကိုပါ တုန်ခါသွားစေခဲ့ချေပြီ။

"အီး..."

ခဲခဲလေးသည် ရွှီရှင်း၏ ပုခုံးပေါ်၌ ဝပ်နေရင်း သူမ၏ ခြေဖဝါးအသေးလေးနှစ်ဖက်ဖြင့် နားကို တင်းကြပ်စွာ ပိတ်ဆို့ထားရှာ၏။

ပြင်းထန်လှသော ပေါက်ကွဲသံ တစ်ချက် ထွက်ပေါ်လာတိုင်း ၎င်း၏ ဧရာမအမြီးပွပွကြီးမှာလည်း အနည်းငယ် တုန်ရီသွားခဲ့ရရှာပြီး နှုတ်မှလည်း တိုးညှင်းလှသောအသံလေးများဖြင့် အဆက်မပြတ် အော်ဟစ်နေရှာပေသည်။

မီမီနှင့် ငွေရောင်ဘုရင်တို့မှာမူ ပြဿနာကြီးကြီးမားမား မရှိကြသော်လည်း၊ အာဖုကတော့ အဆက်မပြတ် ပေါက်ကွဲသံကြီးများကြောင့် တော်တော်လေး ဝေးကွာလှသော နေရာဆီသို့ ချက်ချင်း ပျံသန်းထွက်ခွာသွားခဲ့၏။

ဆယ်မီတာ ဝေးကွာလှသော ခြောက်သွေ့နေသည့် သစ်ကိုင်းခြောက်တစ်ခုပေါ်၌သာ ငြိမ်သက်စွာ တွဲလောင်းခိုလျက် နားခိုနေရှာတော့သည်။

ပြီးခဲ့သည့် သားရဲဒီရေလှိုင်းတုန်းက ပေါက်ကွဲအားပြင်း မြှားတံအမြောက်အပြားကို ရူးသွပ်မတတ် ပစ်ခတ်ခဲ့ကြသည်မှာ မှန်သော်လည်း ထိုစဉ်တုန်းက ပေါက်ကွဲမှု တည်နေရာမှာ မီတာရာဂဏန်းခန့် ဝေးကွာလှခြင်း ဖြစ်ပေသည်။

ယခုတစ်ကြိမ်တွင်မူ ပေါက်ကွဲမှုကြီးမှာ မိမိနှင့် အလွန် နီးကပ်လွန်းလှသော နေရာ၌ ဖြစ်ပေါ်နေခြင်း ဖြစ်၏။

ဤမျှအထိ ကျယ်လောင်လှပြီး အဆက်မပြတ် ထွက်ပေါ်နေသော ပေါက်ကွဲသံဆိုးကြီးများကိုတော့ ၎င်းအနေဖြင့် ဘယ်လိုနည်းနဲ့မှ ဆက်လက်၍ အောင့်မခံနိုင်တော့ပါပေ။

ငါးမိနစ်ခန့် ကုန်ဆုံးသွားခဲ့ပြီးနောက်တွင်မူ ပြင်းထန်လှသော ပေါက်ကွဲသံကြီးများမှာ ဖြည်းဖြည်းချင်း လုံးဝ ရပ်တန့်သွားခဲ့ချေပြီ။

မြေကျင်းကြီးအတွင်းက အပြင်ဘက် အဝိုင်းတွင်မူ သာမန်သားရဲရုပ်တုတစ်ခုမှ ကျန်ရှိခြင်း မရှိတော့ပါပေ။

၎င်းတို့အားလုံးမှာ မြေပြင်ပေါ်၌ ပြန့်ကျဲနေသော ကျောက်မှုန့်ပုံကြီးများအဖြစ်သို့ လုံးဝ ပြောင်းလဲသွားခဲ့ကြရပြီ ဖြစ်၏။

မြေကျင်းကြီးတစ်ခုလုံးအတွင်း၌မူ ပေါက်ကွဲမှု မီးခိုးငွေ့များဖြင့် ပြည့်နှက်နေခဲ့ချေပြီ။

မြေပြင်မှာလည်း ပေါက်ကွဲမှု အရှိန်ကြောင့် မည်းမှောင်နေခဲ့ရပြီး အချို့သော နေရာများတွင်မူ ကြီးမားလှသော အက်ကွဲကြောင်းကြီးများပင် ထွက်ပေါ်နေခဲ့ပေသည်။

၎င်းတို့ငါးဦးစလုံးမှာ နောက်တစ်ကြိမ် ပြန်လည်စုစည်းလိုက်ကြ၏။

"အားရကျေနပ်ဖို့ကောင်းလိုက်တာ"

လီဝမ်ရှီးသည် မြှားတံများ တပ်ဆင်ပစ်ခတ်ခဲ့ရခြင်းကြောင့် တော်တော်လေး ညောင်းညာကိုက်ခဲနေခဲ့ရရှာသော မိမိ၏ လက်ဖဝါးနှင့် လက်မောင်းများကို အသာအယာ နှိပ်နယ်ရင်း ဆိုလိုက်၏။

မြှားတစ်ချက် ပစ်တိုင်း မြှားတံကို အသစ်ပြန်လည် တပ်ဆင်ရခြင်းဖြစ်သဖြင့် ဤကဲ့သို့ အဆက်မပြတ် ပစ်ခတ်ရခြင်းမှာ လူကို ပင်ပန်းနွမ်းနယ်စေသည်မှာ အမှန်ပင် ဖြစ်ပေသည်။

"တစ်ချက်တည်းနဲ့တင် ရုပ်တုတစ်ခုလုံး ကြေမွပျက်စီးသွားတာပဲ"

လုဖေးအာကိုယ်တိုင်လည်း အလွန်ပင် စိတ်လှုပ်ရှားနေခဲ့ချေပြီ။

မည်သည့်သွေးရောင်မှ မြင်တွေ့ရခြင်းမရှိသည်မှာ မှန်သော်လည်း ဤကဲ့သို့သော ဖျက်ဆီးချေမှုန်းမှု လှုပ်ရှားမှုမျိုးသည်ပင်လျှင် အလယ်အလတ်အဆင့် ဗီဇပြောင်းသတ္တဝါတစ်ဦးဖြစ်သော သူမ၏ စိတ်အာရုံကို မထိန်းနိုင်ဘဲ အလိုအလျောက် စိတ်တက်ကြွလာစေခြင်း ဖြစ်ပေသည်။

ချီရွှယ်ဖေးကတော့ မည်သည့်စကားမှ မဆိုပဲ မိမိ၏ ညောင်းညာနေသော လက်မောင်းလေးကိုသာ သာသာလေး ဆက်လက်နှိပ်နယ်နေရှာ၏။

ရွှီရှင်းနှင့် ကျိချောင်းယန်တို့နှစ်ဦးစလုံးမှာမူ အနားယူခြင်းမျိုး လုံးဝ မပြုလုပ်ကြသေးပါပေ။

၎င်းတို့နှစ်ဦးစလုံးသည် မိမိတို့၏ ဒူးလေးများကို နောက်တစ်ကြိမ် ထပ်မံမြှင့်လိုက်ကြပြီး ယခုတစ်ကြိမ်တွင်မူ အဆင့်နိမ့် ဗီဇပြောင်းသတ္တဝါများ၏ ကျောက်ဆစ်ရုပ်တု အဝိုင်းရှိရာဆီသို့ စူးစိုက်ချိန်ရွယ်လိုက်ကြကာ မောင်းတံကို ချက်ချင်းပင် ပြိုင်တူ ဆွဲညှစ်လိုက်ကြတော့သည်။

"ဒုန်း ဒုန်း"

ပေါက်ကွဲအားပြင်း မြှားတံနှစ်စင်းမှာ အဆင့်နိမ့် ဗီဇပြောင်းသတ္တဝါ ကျောက်ဆစ်ရုပ်တုကြီးနှစ်ခုပေါ်သို့ ပြင်းထန်စွာ ထိမှန်ပေါက်ကွဲသွားခဲ့ကြချေပြီ။

မီးခိုးငွေ့များ ပြန်လည်ကွယ်ပျောက်သွားခဲ့ပြီးနောက်တွင်မူ ထိုအဆင့်နိမ့် ဗီဇပြောင်းသတ္တဝါ ရုပ်တုကြီးများမှာ မူလက သာမန်ရုပ်တုများကဲ့သို့ ချက်ချင်း ကြေမွပျက်စီးသွားခြင်းမျိုး မရှိပါပေ။

၎င်းတို့ ခံစားလိုက်ရသော ထိခိုက်ပျက်စီးမှု ပမာဏမှာ သာမန်သားရဲရုပ်တုများထက်စာလျှင် များစွာ ပိုမိုနည်းပါးလှ၏။

သို့သော်လည်း ၎င်းတို့၏ ကျောက်သားခန္ဓာကိုယ်ပေါ်တွင်မူ ထင်ရှားလှသော အက်ကွဲကြောင်းကြီးများ သေချာပေါက် ဖြစ်ပေါ်သွားခဲ့သည်မှာ အမှန်ပင် ဖြစ်၏။

ဤအချက်အရဆိုလျှင်မူ ဤမြှားတံများသည် ၎င်းတို့အပေါ်၌လည်း သေချာပေါက် အကျိုးသက်ရောက်မှု ရှိနေဆဲ ဖြစ်ပေသည်။

ရွှီရှင်းသည် အချိန်ဆိုင်းမနေတော့ဘဲ အခြား မြှားတစ်စင်းကို ချက်ချင်း လျင်မြန်စွာ ပြန်လည်တပ်ဆင်လိုက်ပြီး မောင်းတံကို နောက်တစ်ကြိမ် ထပ်မံ၍ ဆွဲညှစ်လိုက်ပြန်၏။

"ဒုန်း"

ယခုတစ်ကြိမ်တွင်မူ ပေါက်ကွဲအားပြင်း မြှားတံနှစ်စင်း၏ ပြင်းထန်လှသော တိုက်ခိုက်မှုဒဏ်ကို တစ်ဆက်တည်း ခံစားလိုက်ရသောကြောင့် ထိုဗီဇပြောင်းသတ္တဝါ ရုပ်တုကြီးသည် လူတိုင်း၏ ရှေ့မှောက်၌ပင် ခံနိုင်ရည်မရှိတော့ဘဲ တစ်ခါတည်း ကြေမွပျက်စီးသွားခဲ့ရပြီး ကျောက်မှုန့်ပုံကြီးအဖြစ်သို့ လုံးဝ ပြောင်းလဲသွားခဲ့ရတော့သည်။

အဆင့်နိမ့် ဗီဇပြောင်းသတ္တဝါ ရုပ်တုကြီးများသည် ပေါက်ကွဲအားပြင်း မြှားတံနှစ်စင်းစာခန့်အထိ ခုခံနိုင်စွမ်းရှိကြသည်မှာ မှန်သော်လည်း နောက်ဆုံး၌ မှုန့်မှုန့်ညက်ညက် ကြေမွသွားအောင် သေချာပေါက် ဖြိုခွဲပစ်လို့ ရနိုင်စွမ်း ရှိပေသည်။

၎င်းတို့ငါးဦးစလုံး၏ မျက်နှာပေါ်တွင်မူ ချက်ချင်းပင် တောက်ပသော အမူအရာများ ပေါ်ထွက်လာခဲ့ကြ၏။

ကြည့်ရသည်မှာ ဒုတိယမြောက် အဝိုင်းဖြစ်သည့် ဤဗီဇပြောင်းသတ္တဝါ ရုပ်တုကြီးများကိုလည်း ပေါက်ကွဲအားပြင်း မြှားတံများကို အသုံးပြုလျက် ဤနည်းလမ်းအတိုင်း ဆက်လက်၍ အလွယ်တကူ ဖြေရှင်းပစ်လို့ ရနိုင်စွမ်း ရှိပေသည်။

ဤနည်းလမ်းကောင်းကြီးကို ဆက်လက်၍ အသုံးပြုရုံပဲ ရှိတော့ပေသည်။

"အီး"

ရွှီရှင်း၏ ပုခုံးပေါ်၌ ရှိနေသော ခဲခဲလေးသည် ရုတ်တရက် သူမ၏ ဧရာမခေါင်းလေးကို မော့လိုက်ပြီး "အီး အီး" ဟု စိုးရိမ်တကြီးဖြင့် ဆက်တိုက် အော်ဟစ်လိုက်ပါတော့သည်။

ရွှီရှင်းသည် စိတ်ထဲ၌ ချက်ချင်းပင် အလွန် နိုးကြားသွားခဲ့ရ၏။

ဤသည်မှာ တကယ့်ကို ပြင်းထန်လှသော အန္တရာယ် ကြိုတင်အာရုံခံစားမှု အော်ဟစ်သံ ဖြစ်ပေသည်။

"ကိစ္စကြီးတစ်ခုခု ဖြစ်တော့မယ်"

ရွှီရှင်းသည် အခြားသူများအား လူစုခွဲလျက် ဒုတိယမြောက် အဝိုင်းကို ဆက်လက်တိုက်ခိုက်မည့် လှုပ်ရှားမှုအားလုံးကို ချက်ချင်းပင် တားဆီးလိုက်ပြီး မိမိကိုယ်တိုင်လည်း ဧရာမမြေကျင်းကြီးအတွင်းက ကျောက်ဆစ်ရုပ်တုကြီးများ၏ အခြေအနေကို သတိကြီးစွာဖြင့် စူးစိုက်ကြည့်ရှုနေမိပေသည်။

"ဟင်"

ကျိချောင်းယန်သည်လည်း မျက်မှောင်ကို တင်းကြပ်စွာ တွန့်ချိုးလိုက်မိ၏။

"ဘာဖြစ်လို့လဲဟင်။ ဒီရုပ်တုကြီးတွေက လှုပ်ရှားမှုမရှိ... အား..။ သူတို့တွေ တကယ်ကြီး အသက်ဝင်လာခဲ့ကြပြီ"

လီဝမ်ရှီးသည် သူမ၏ ဗာဒံစေ့ကဲ့သို့ လှပသော မျက်လုံးအစုံကို ပြူးကျယ်လိုက်မိပြီး ခန္ဓာကိုယ်ကို အနောက်သို့ ခြေလှမ်းဝက်ခန့် ချက်ချင်း ဆုတ်ခွာလိုက်ကာ မိမိ၏ လက်ထဲ၌ မြှားတံအဆင်သင့် တပ်ဆင်ထားသော ဒူးလေးကိုလည်း ဧရာမမြေကျင်းကြီး ရှိရာအရပ်ဆီသို့ ချက်ချင်းပင် ချိန်လိုက်တော့သည်။

မြေကျင်းကြီး၏ အတွင်းပိုင်းတွင်မူ ဒုတိယမြောက် အဝိုင်း၌ ရှိနေကြသော ထိုအဆင့်နိမ့် ဗီဇပြောင်းသတ္တဝါ ရုပ်တုကြီး အားလုံးမှာ မြေပြင်ပေါ်၌ ခွေဝပ်နေခဲ့ကြရာမှ ဖြည်းဖြည်းချင်း မတ်တပ်ရပ်လာနေခဲ့ကြပြီ ဖြစ်ပြီး ကိုယ်ကိုပြန်လှည့်လျက် ရွှီရှင်းတို့ငါးဦး ရှိနေကြသော နေရာဆီသို့ စုပြုံ၍ မျက်နှာမူလာကြခြင်း ဖြစ်ပေသည်။

၎င်းတို့၏ ကျောက်သားမျက်လုံး အစုံထံမှနေ၍ တကယ့်ကို ထိတ်လန့်

ဖွယ်ကောင်းလှသော သွေးနီရောင် အလင်းတန်းများ ပြင်းထန်စွာ ဖြာထွက်လာခဲ့ကြပြီဖြစ်ရာ မြေကျင်းကြီးအတွင်း၌ သွေးနီရောင် မျက်လုံးအဝိုင်းကြီးတစ်ခုအလား စနစ်တကျ ဖြစ်ပေါ်သွားခဲ့၏။

အရပ်မျက်နှာအနှံ့ မြင်တွေ့လိုက်ရသော ထိုမြင်ကွင်းသည် လူကို ကြက်သီးမွှေးညင်းများ ထစရာကောင်းလောက်အောင် ခြောက်လှန့်လွန်းလှပေသည်။

"သူတို့တွေ တကယ်ကြီး အသက်ဝင် နိုးလာခဲ့ကြပြီ"

ချီရွှယ်ဖေးသည်လည်း မိမိ၏ ဒူးလေးကို လက်ဖြင့် တင်းကြပ်စွာ ကိုင်ဆောင်ထားရင်း မြေကျင်းကြီးအတွင်းက ကျောက်ဆစ်ရုပ်တုအုပ်စုကြီး၏ လှုပ်ရှားမှုများကို သေသေချာချာ စောင့်ကြည့်လိုက်ပြီးနောက် "ကံကောင်းထောက်မစွာနဲ့ အတွင်းပိုင်းက ရုပ်တုကြီးတွေကတော့ ထပ်ပြီး နိုးလာတာမျိုးတော့ မရှိသေးဘူး" ဟု ဆိုလိုက်၏။

လက်ရှိအချိန်တွင်မူ ဒုတိယမြောက် အဝိုင်းတွင် ရှိနေခဲ့ကြပြီး ယခုအခါ အပြင်ဘက်ဆုံး အဝိုင်းသို့ အလိုအလျောက် ပြောင်းလဲသွားခဲ့ရရှာသော ထိုအဆင့်နိမ့် ဗီဇပြောင်းသတ္တဝါ ရုပ်တုကြီးများသာ လှုပ်ရှားမှုများ ပြသနေခဲ့ကြခြင်း ဖြစ်ပေသည်။

"အီး အီး အီး"

ခဲခဲလေး၏ စိုးရိမ်တကြီး အော်ဟစ်သံမှာ ပိုမို၍ပင် ပြင်းထန်လာခဲ့ချေပြီ။

ငွေရောင်ဘုရင်သည်လည်း မိမိ၏ ထက်လှသော အစွယ်ကြီးများကို တဖြည်းဖြည်း ပြလာခဲ့သလို မီမီ သည်လည်း သူမ၏ ကျောပြင်ကြီးကို ကုန်းလိုက်ပြီး ၎င်းတို့အားလုံးမှာ တိုက်ခိုက်ရေး အသွင်သို့ ချက်ချင်းပင် အပြည့်အဝ ဝင်ရောက်သွားခဲ့၏။

အဝေးသို့ ရောက်နေခဲ့သော အာဖုပင်လျှင် ဒီဘက်သို့ အရှိန်အဟုန်ဖြင့် လျင်မြန်စွာ ပြန်လည်ပျံသန်းလာခဲ့ချေပြီ။

လုဖေးအာ၏ မျက်နှာတွင် စိုးရိမ်ပူပန်မှုများ ပြည့်နှက်သွားခဲ့ရပြီး "ဒီရုပ်တုကြီးတွေက အခု ငါတို့ကို လာပြီးတော့..." ဟု ပြောရန် ပြင်လိုက်စဉ်မှာပင်။

ရုတ်တရက် ထိုအဆင့်နိမ့် ဗီဇပြောင်းသတ္တဝါ ရုပ်တုကြီး အားလုံးမှာ ပြင်းထန်လှသော အရှိန်အဟုန်ဖြင့် စတင်၍ ရူးသွပ်မတတ် လှုပ်ရှားလာခဲ့ကြ၏။

၎င်းတို့သည် မူလက သာမန်သားရဲရုပ်တုများထက်စာလျှင် ကျယ်လောင်ပြင်းထန်လှသော ဧရာမဟောက်သံကြီးများကို ပြိုင်တူ ထုတ်လွှတ်လိုက်ကြပြီး ၎င်းတို့ငါးဦး ရှိနေကြသော နေရာဆီသို့ ရူးသွပ်မတတ် တစ်ရှိန်ထိုး စုပြုံပြေးလွှား လာကြပါတော့သည်။

ခြေဖဝါးအောက်ခြေက မြေပြင်ကြီးတစ်ခုလုံးသည်လည်း ငလျင်လှုပ်သကဲ့သို့ ပြင်းထန်စွာ လှုပ်ခတ်သွားခဲ့သည့်အလား တုန်ခါလာခဲ့ပါတော့သည်။

အခန်း ၅၀၉ ပြီး။