အခန်း ၂၂၉

အခန်း ၂၂၉ - နတ်ဘုရားဆင့်ခေါ်အတတ် ဟု ခေါ်ဆိုသော နည်းလမ်း

နန်ကုန်းယွိသည် အဘယ်ကြောင့် ချင်မျိုးနွယ်စုထံသို့ လာရောက်ခဲ့ရသနည်း။ သူမသည် ချင်ယောင်အား သတ်ဖြတ်ရန်အတွက် ကမ္ဘာဦးဧရာမမိစ္ဆာကြီးကို စေခိုင်းခဲ့ပြီးနောက်တွင်မူ ချင်မျိုးနွယ်စုအတွက် ဆန်းကြယ်သော ပုတီးစေ့တစ်စေ့ကို အဘယ်ကြောင့် ချန်ထားခဲ့ရသနည်း။ သူမ၏ အကြောင်းပြချက်က အမှန်တကယ်ဆိုလျှင် ဘာဖြစ်နိုင်မည်နည်း။ နန်ကုန်းယွိသည် နောင်တရစိတ်ဖြင့် ချင်မျိုးနွယ်စုဝင်များ ဘေးအန္တရာယ်မှ ရှောင်တိမ်းနိုင်ရန်အတွက် ပုတီးစေ့တစ်စေ့ ပေးခဲ့ခြင်းရော ဖြစ်နိုင်မည်လော။

အတွေးပေါင်းစုံက သူ၏စိတ်ထဲ၌ ဝင်းခနဲ ဖြတ်သန်းသွားပြီးနောက် ချင်မျိုးနွယ်စုဝင်များ ထိုပုတီးစေ့ကို အမှတ်မထင်ဘဲ အသက်သွင်းမိခြင်းမှာ နန်ကုန်းယွိ၏ တွက်ချက်မှုတစ်ခု ဖြစ်နိုင်ကြောင်း ရီယွင်က ယုံကြည်လိုက်သည်။ ဤပုတီးစေ့ကို အသက်သွင်းလိုက်သည်နှင့် ချင်မျိုးနွယ်စုတစ်ခုလုံးကို ဆန်းကြယ်သော လျှို့ဝှက်နယ်မြေတစ်ခုအတွင်းသို့ ပို့ဆောင်ပေးခဲ့ပြီး ထိုမှတစ်ဆင့် သူတို့တစ်ခုလုံး အမြစ်ပြတ်ချေမှုန်းခံရမည့် ဘေးမှ တားဆီးပေးခဲ့ခြင်း ဖြစ်သည်။

နန်ကုန်းယွိသည် ဤပုတီးစေ့ကို မည်သည့်နေရာမှ ရရှိခဲ့သနည်း။ လွန်ခဲ့သော နှစ်ပေါင်းတစ်သိန်းတုန်းက သူသည် ဤအရာနှင့် ပတ်သက်၍ အဘယ်ကြောင့် တစ်ခါမျှ မကြားဖူးခဲ့ရသနည်း။ ထိုစဉ်က သူကိုယ်တိုင် ကျဆုံးသွားခဲ့ပြီးနောက် ထိုအမျိုးသမီးပျိုလေးထံ၌ အမှန်တကယ် ဘာတွေ ဖြစ်ပျက်ခဲ့ရသနည်း။ ဘာကြောင့် သူမ၏ စရိုက်က ဤမျှအထိ သိသိသာသာ ပြောင်းလဲသွားခဲ့ရသနည်း။

ရီယွင်သည် အခြေအနေများက ပိုမို၍ ထူးဆန်းလာသည်ဟု ခံစားလိုက်ရပြီး သံသယဖြစ်ဖွယ် ရှုထောင့်ပေါင်းစုံက နန်ကုန်းယွိဆီသို့ ဦးတည်နေတော့သည်။

မျိုးနွယ်စုခေါင်းဆောင်ကြီးက စူးစမ်းလိုစိတ်ဖြင့် တိုးညင်းစွာ မေးမြန်းလိုက်သည်။

“စီနီယာကြီး... ဒီလျှို့ဝှက်နယ်မြေကို ဘယ်လိုမျိုး ရှာဖွေတွေ့ရှိခဲ့တာလဲ...”

သူတို့၏ ဤလျှို့ဝှက်နယ်မြေသည် နှစ်ပေါင်းတစ်သိန်းလုံးလုံး ဟင်းလင်းပြင်အတွင်း၌ ပုန်းကွယ်နေခဲ့ခြင်းဖြစ်ပြီး မည်သူမျှ ရှာမတွေ့ခဲ့ကြချေ။ ထာဝရနယ်ပယ်မှ သန်မာသူတစ်ဦးကသာ ဤနေရာကို တစ်ကြိမ်မျှ သတိပြုမိခဲ့ဖူးသည်။ သို့သော်လည်း ထိုသူသည် ဤလျှို့ဝှက်နယ်မြေ၏ ပြင်ပအလွှာကို ဖျက်ဆီးရန် ကြိုးပမ်းသည့်အခါ ဆန်းကြယ်သော စွမ်းအားတစ်ခု ထွက်ပေါ်လာခဲ့ပြီး သူ၏ ရုပ်ပိုင်းဆိုင်ရာကိုယ်ထည်ကို ခဏချင်းမှာပင် အစအနမကျန် ပျောက်ကွယ်သွားစေခဲ့သည်။ ထိုသန်မာသူ၏ မူလဝိညာဉ်မှာ ထွက်ပြေးလွတ်မြောက်သွားခဲ့ပြီး ဤလျှို့ဝှက်နယ်မြေကို နောက်တစ်ကြိမ် ထပ်မံရန်စရန် မဝံ့ရဲတော့ပေ။

ချင်မျိုးနွယ်စု၏ မျိုးနွယ်စုခေါင်းဆောင်ကြီးသည် အလွန်ပင် စူးစမ်းလိုစိတ် ပြင်းထန်နေခဲ့သည်။ သူ့ရှေ့မှ စီနီယာကြီးသည် ဤလျှို့ဝှက်နယ်မြေကို မည်သို့ရှာဖွေတွေ့ရှိခဲ့ပြီး မည်သို့ဝင်ရောက်ခဲ့သနည်းဆိုသည်ကိုပင်။ သူ၏ နားလည်သဘောပေါက်မှုအရဆိုလျှင် စစ်မှန်သောနတ်ဘုရားနယ်မြေမှ သန်မာသူတစ်ဦးပင်လျှင် ဤနေရာသို့ ဝင်ရောက်နိုင်စရာ အကြောင်းမရှိပေ။

ရီယွင်က ပြုံးလျက် တည်ငြိမ်စွာ ဆိုလိုက်သည်။

“ငါ ရွှေရောင်အစင်းကျားနက် မျိုးနွယ်စုရဲ့ မျိုးနွယ်စုခေါင်းဆောင်ဆီမှာ ဆင်းသက်ပူးကပ်နေတဲ့ စိတ်ဝိညာဉ်ကိုယ်ထည်တစ်ခုကို မြင်ခဲ့တာလေ... ဒါကြောင့် အဲ့ဒီစိတ်ဝိညာဉ်ကိုယ်ထည်ရဲ့ နောက်ကွယ်က ခြေရာလက်ရာတွေကို လိုက်လံစုံစမ်းရင်းနဲ့ပဲ ဟင်းလင်းပြင်ထဲမှာ ပုန်းကွယ်နေတဲ့ ဒီသာယာလှပတဲ့ ကမ္ဘာငယ်လေးကို ရှာဖွေတွေ့ရှိခဲ့တာပါ...”

မျိုးနွယ်စုခေါင်းဆောင်ကြီးက သဘောပေါက်သွားသော အရိပ်အယောင်များဖြင့် အံ့ဩတကြီး ရေရွတ်လိုက်မိသည်။

“ဪ... အဲ့ဒီလိုကိုး... စီနီယာကြီးက တကယ်ကို အစွမ်းထက်တာပဲ... ထုံးစံအတိုင်း အရင်တုန်းက ချန်းနန်ကုန်းမြေကြီးပေါ်မှာ ထာဝရနယ်ပယ်ရဲ့ အစွမ်းထက်ဆုံးသူပီသပါပေတယ်...”

မြင်းနက်ကြီးက သူ၏မျက်ခုံးများကို တွန့်လိုက်ပြီး ဒေါသတကြီးဖြင့် အေးစက်စွာ နှာခေါင်းရှုံ့လိုက်သည်။

“အဘိုးကြီး... အပိုတွေ လျှောက်မပြောနဲ့... နှစ်ပေါင်းတစ်သိန်း ကုန်ဆုံးသွားခဲ့ပြီလေ... ငါ့သခင်ကြီးက အခု ထာဝရနယ်ပယ်မှာတင် မဟုတ်တော့ဘူး...”

မျိုးနွယ်စုခေါင်းဆောင်ကြီးက ထိတ်လန့်သွားရပြီး အလျင်အမြန်ပင် အားနာဟန်ဖြင့် ဆိုလိုက်၏။

“ဪ... ကျွန်တော် တောင်းပန်ပါတယ် စီနီယာကြီး...”

ရီယွင်က ဂရုမစိုက်ဟန်ဖြင့် လက်ကို ဝေ့ယမ်းလိုက်ပြီး ပြုံးလျက် ဆိုလိုက်သည်။

“မသိလို့ လုပ်မိတဲ့ကိစ္စကို အပြစ်မတင်ပါဘူး...”

ထိုသို့ပြောပြီးနောက် ရီယွင်က မျိုးနွယ်စုခေါင်းဆောင်ကြီးကို စိုက်ကြည့်လျက် အမှတ်တမဲ့ မေးမြန်းလိုက်၏။

“ဒါဆိုရင်... ကောင်းကင်တံဆိပ်ရဲ့ အကြောင်းကကော ဘာဖြစ်လို့လဲ...”

ရီယွင်က ကောင်းကင်တံဆိပ်၏ အကြောင်းကို မေးမြန်းသည်ကို မြင်ရသည့်အခါ မျိုးနွယ်စုခေါင်းဆောင်ကြီးက အလျင်အမြန်ပင် ရိုသေစွာ ရှင်းပြလိုက်သည်။

“စီနီယာကြီး... ကျွန်တော်တို့က ဒီလျှို့ဝှက်နယ်မြေထဲမှာ ပိတ်မိနေကြတာပါ... ဘေးအန္တရာယ် မရှိဘူးဆိုပေမဲ့ သိပ်ကို ပျင်းစရာကောင်းတယ်...”

“လွန်ခဲ့တဲ့ နှစ်ပေါင်းသောင်းချီတုန်းက... ကျွန်တော်တို့ တောင်နက်ပိုင်းအတွင်းမှာ စိတ်ဝိညာဉ်ဆင်းသက်ခြင်း လျှို့ဝှက်ကျင့်စဉ်တစ်ခုကို အမှတ်မထင် ရှာဖွေတွေ့ရှိခဲ့တယ်... ဒီအရာက ကျွန်တော်တို့ရဲ့ စိတ်ဝိညာဉ်ကိုယ်ထည်တွေကို အပြင်လောကက သက်ရှိတွေရဲ့ ကိုယ်ထဲကို ဆင်းသက်ပူးကပ်ခွင့် ရစေခဲ့တယ်... ဒီနည်းနဲ့ အပြင်လောကက အကြောင်းအရာတွေကို သိရှိနိုင်သလို... ကျွန်တော်တို့ မျိုးနွယ်စုတစ်ခုလုံး လည်ပတ်ဖို့အတွက် အပြင်လောကက ပစ္စည်းအရင်းအမြစ် အချို့ကိုလည်း ရရှိစေခဲ့တာပေါ့...”

မျိုးနွယ်စုခေါင်းဆောင်ကြီး၏ ရှင်းပြချက်ကို ကြားရသည့်အခါ ရီယွင်က ခေါင်းညိတ်ပြလိုက်သည်။ သူသည် မျက်ခုံးတစ်ချက် ပင့်လိုက်ပြီးနောက် မေးမြန်းလိုက်၏။

“မင်းတို့ ရရှိတဲ့ ပစ္စည်းတွေက ရုပ်ပိုင်းဆိုင်ရာ အရာတွေလေ... မင်းတို့ရဲ့ စိတ်ဝိညာဉ်ကိုယ်ထည်တွေက အဲ့ဒါတွေကို စားသုံးနိုင်လို့လား...”

မျိုးနွယ်စုခေါင်းဆောင်ကြီး၏ မျက်နှာပေါ်တွင် အနည်းငယ် အားနာသွားသော အရိပ်အယောင်များ ပေါ်ပေါက်လာခဲ့ပြီး သူက လေးနက်စွာ ရှင်းပြလိုက်သည်။

“အစပိုင်းမှာတော့ ကျွန်တော်တို့ မစားသုံးနိုင်ဘူး... အဲ့ဒီပစ္စည်းအရင်းအမြစ်တွေ ပုံရိပ်ယောင်အသွင် ပြောင်းလဲသွားတဲ့အထိ စောင့်ဆိုင်းပြီးမှသာ... ကျွန်တော်တို့ရဲ့ စိတ်ဝိညာဉ်ကိုယ်ထည်တွေက အဲ့ဒါတွေကို စုပ်ယူနိုင်တာပါ...”

“အဲ့ဒီလိုကိုး...”

ရီယွင်က နောက်တစ်ကြိမ် ခေါင်းညိတ်ပြလိုက်သည်။ သူ၏အတွင်းစိတ်၌ ဤလျှို့ဝှက်နယ်မြေအပေါ် စိတ်ဝင်စားမှုမှာ ပိုမို၍ ကြီးမားလာခဲ့၏။ ဤပုံရိပ်ယောင်ဖြစ်စေသော စွမ်းအားမှာ အမှန်တကယ်ပင် ဆန်းကြယ်ပြီး အလွန်ပင် ပြင်းထန်လှပေသည်။

မျိုးနွယ်စုခေါင်းဆောင်ကြီးက လေးစားစွာ ပြောလိုက်သည်။

“စီနီယာကြီး... ကျွန်တော်တို့ ရွှေရောင်အစင်းကျားနက် မျိုးနွယ်စုတစ်ခုတည်းကိုပဲ ရှာဖွေခဲ့တာ မဟုတ်ဘူး... ကျွန်တော်တို့ရဲ့ စိတ်ဝိညာဉ်တွေ ဆင်းသက်ပူးကပ်ဖို့အတွက် တခြားသော အင်အားစု အချို့ကိုလည်း ရှာဖွေခဲ့သေးတယ်... ကျွန်တော်တို့ကြားမှာ အပြန်အလှန် အကျိုးပြုတဲ့ ပူးပေါင်းဆောင်ရွက်မှု ဆက်ဆံရေး ရှိကြတယ်... တကယ်လို့ သူတို့ရဲ့ ခွန်အားက မလုံလောက်တဲ့နောက်... ကောင်းကင်တံဆိပ်ကို အသုံးပြုပြီး ကျွန်တော်တို့ရဲ့ စိတ်ဝိညာဉ်ကိုယ်ထည်တွေကို ဆင့်ခေါ်နိုင်သလို... ကျွန်တော်တို့ကလည်း သူတို့အတွက် အစွမ်းထက်တဲ့ ရန်သူတွေကို ရှင်းလင်းပေးတာပေါ့...”

ရီယွင်က ခေါင်းညိတ်ပြလိုက်ပြီး မှိန်ဖျော့စွာ ပြုံးလိုက်သည်။

ချင်မျိုးနွယ်စု၏ မျိုးနွယ်စုခေါင်းဆောင်ကြီး ပြောဆိုသော ဤ နတ်ဘုရားဆင့်ခေါ်အတတ်ဟု ခေါ်ဆိုသည့် နည်းလမ်းမှာ ကျင့်ကြံမှုနယ်ပယ် အတော်လေးနိမ့်ကျသော မိစ္ဆာမျိုးနွယ်စု သို့မဟုတ် လူသားကျင့်ကြံသူ အချို့ကို ရှာဖွေခြင်းမျှသာ ဖြစ်သည်။ ဤနည်းအားဖြင့် နှစ်ဦးနှစ်ဖက်ကြားတွင် အပြန်အလှန် ပူးပေါင်းဆောင်ရွက်မှု အခြေခံတစ်ခုကို တည်ဆောက်နိုင်ခြင်း ဖြစ်သည်။

ချင်မျိုးနွယ်စုတွင် မျိုးနွယ်စုဝင် အရေအတွက် အမြောက်အများ ရှိသော်လည်း ၎င်းတို့ထဲတွင် ကျင့်ကြံမှု အမြင့်ဆုံးသူမှာ တာအိုနယ်ပယ် အဆင့် ၁၀ ၌သာ ရှိပေသည်။ ထာဝရနယ်ပယ်သို့ တက်လှမ်းနိုင်သူ တစ်ဦးမျှ မရှိချေ။ သို့သော်ငြားလည်း သူတို့၏ ကျင့်ကြံမှုဆင့်နှင့်ဆိုလျှင် သူတို့က ကောင်းကင်တံဆိပ်ကို အသုံးပြုပြီး မိစ္ဆာမျိုးနွယ်စု သို့မဟုတ် လူသားမျိုးနွယ်စု၏ ဂိုဏ်းကြီးများမှ ကျင့်ကြံသူများကို ကူညီပေးမည်ဟု ကတိပြုလိုက်လျှင် ဤသည်မှာ အလွန်ပင် ဆွဲဆောင်မှုရှိသော ကမ်းလှမ်းချက်တစ်ခု ဖြစ်လာပေလိမ့်မည်။ ဘာပဲဖြစ်ဖြစ် စိတ်ဝိညာဉ်ကိုယ်ထည်တစ်ခု ဆင်းသက်ပူးကပ်လာသည်နှင့် သူတို့၏ ကျင့်ကြံမှုနယ်ပယ်မှာ အဆပေါင်းများစွာ ပျံတက်သွားမည်ဖြစ်ရာ စိတ်ကူးလို့မရနိုင်လောက်သော တိုက်ခိုက်ရေးစွမ်းအားများကို ရရှိစေမည် မဟုတ်ပါလား။

ထိုအခိုက်အတန့်တွင် ရီယွင်က တောင်တန်းကြီး၏ အနက်ရှိုင်းဆုံးနေရာရှိရာသို့ နောက်တစ်ကြိမ် လှမ်းကြည့်လိုက်သည်။ သူ၏ မျက်နှာအမူအရာမှာ အနည်းငယ် ပြောင်းလဲသွားခဲ့ပြီး သူ၏ မျက်ဝန်းအစုံက တစိုက်မတ်မတ် စောင့်ကြည့်နေတော့သည်။ ရှေ့ဘက်ရှိ တောင်တန်းကြီး၏ အနက်ရှိုင်းဆုံးနေရာအတွင်း၌ သူသည် စိတ်ဝင်စားစရာကောင်းသော အရာအချို့ကို သတိပြုမိလိုက်ခြင်း ဖြစ်သည်။

မြင်းနက်ကြီးကလည်း လည်ပင်းကိုဆန့်ပြီး ထိုလမ်းကြောင်းရှိရာသို့ လှမ်းကြည့်လိုက်သော်လည်း ဘာကိုမှ မမြင်တွေ့ခဲ့ရချေ။

မြင်းနက်ကြီးက တိုးညင်းသော လေသံဖြင့် စိတ်ချင်းဆက်သွယ်၍ မေးမြန်းလိုက်သည်။

‘ဒုတိယအစ်ကို... အစ်ကို တစ်ခုခု ရှာတွေ့လား...’

အစွမ်းထက်သွေးနဂါးမိစ္ဆာက ခေတ္တမျှ စောင့်ကြည့်ပြီးနောက် စိတ်ပျက်လက်ပျက်ဖြင့် ပြန်လည်ဖြေကြားလိုက်သည်။

‘ငါ ဘာမှ ရှာမတွေ့ဘူး...’

သူတို့နှစ်ဦးစလုံးသည် စိတ်ချင်းဆက်သွယ်၍ စကားပြောဆိုနေကြခြင်းဖြစ်ရာ ချင်မျိုးနွယ်စုဝင် တစ်ဦးမျှ ကြားနိုင်စရာ အကြောင်းမရှိပေ။

ရီယွင်က တစိုက်မတ်မတ် စောင့်ကြည့်နေသည်ကို မြင်ရသည့်အခါ ခေတ္တမျှ ကြာပြီးနောက် မျိုးနွယ်စုခေါင်းဆောင်ကြီးက မနေနိုင်ဘဲ သတိပေးလိုက်သည်။

“စီနီယာကြီး... အဲ့ဒီတောင်နက်ပိုင်းရဲ့ အနက်ရှိုင်းဆုံးနေရာက သိပ်ကို ထူးဆန်းလှပါတယ်... နှစ်ပေါင်းတစ်သိန်း ကုန်ဆုံးသွားခဲ့ပြီ ဆိုပေမဲ့... ကျွန်တော်တို့ အဲ့ဒီနေရာကို အလွတ်မဲ့သွားဖို့ မဝံ့ရဲကြသေးပါဘူး...”

ရီယွင်က ပြုံးလျက် ပြန်လည်တုံ့ပြန်လိုက်၏။

“အဲ့ဒီလိုလား... ဒါဆိုရင် မင်းတို့ရဲ့ စိတ်ဝိညာဉ်ဆင်းသက်ခြင်း နတ်စွမ်းရည်တွေက အရင်တုန်းက ဒီနေရာကနေ ရရှိခဲ့တာ မဟုတ်ဘူးလား...”

မျိုးနွယ်စုခေါင်းဆောင်ကြီးက ထိုတောင်နက်ပိုင်းကို ထိတ်လန့်တကြား အကြည့်များဖြင့် စိုက်ကြည့်နေမိပြီး တုန်ယင်နေသော အသံဖြင့် ဆိုလိုက်သည်။

“စီနီယာကြီး... အဲ့ဒီတောင်နက်ပိုင်းရဲ့ အနက်ရှိုင်းဆုံးနေရာက ပုံရိပ်ယောင်ဖြစ်စေတဲ့ စွမ်းအားတွေက အတော်ကို ပြင်းထန်လှပါတယ်... တကယ်လို့ ကျွန်တော်တို့ရဲ့ စိတ်ဝိညာဉ်ကိုယ်ထည်တွေက အဆင်မခြင်ဘဲ အနက်ရှိုင်းဆုံးနေရာအထိ ဝင်ရောက်သွားမိရင်... အမြစ်ပြတ်ချေမှုန်းခံရမယ့် ဘေးနဲ့ ရင်ဆိုင်ရပါလိမ့်မယ်... အမြစ်ပြတ်သွားတာနဲ့ ကျွန်တော်တို့ လုံးဝဥဿုံ ကွယ်ပျောက်သွားမှာပါ... ကျွန်တော်တို့ရဲ့ စိတ်ဝိညာဉ်ကိုယ်ထည်ကို ဖွဲ့စည်းထားတဲ့ စိတ်ဝိညာဉ်စွမ်းအင် အစုအဝေးလေးတောင်မှ ပျောက်ကွယ်သွားရမှာပေါ့...”

“အင်း...”

ရီယွင်က ခေါင်းညိတ်ပြလိုက်ပြီး ပြုံးလျက် ဆိုလိုက်၏။

“ဒီလောက်အထိ ဘေးအန္တရာယ် ပြင်းထန်လှတယ်ဆိုမှတော့... ငါ့အတွက် တကယ့်ကို အဆင်ပြေတာပေါ့...”

ထိုသို့ပြောပြီးနောက် သူသည် တောင်တန်းကြီးရှိရာသို့ အေးအေးဆေးဆေး လျှောက်လှမ်းသွားတော့သည်။

မျိုးနွယ်စုခေါင်းဆောင်ကြီးက သူ၏နောက်ကွယ်မှနေ၍ အလျင်အမြန် စိုးရိမ်တကြီး အော်ဟစ်လိုက်သည်။

“စီနီယာကြီး... အဲ့ဒီအတွင်းထဲက သိပ်ကို အန္တရာယ်များပါတယ်... ကျေးဇူးပြုပြီး မသွားပါနဲ့လား...”

ရီယွင်က ဂရုမစိုက်ဟန်ဖြင့် လက်ကို ဝေ့ယမ်းလိုက်ပြီး ကျယ်လောင်စွာ ရယ်မောလိုက်တော့သည်။

“ကောင်းကင်အောက်မှာ ငါသွားလို့မရတဲ့ နေရာဆိုတာ မရှိဘူး... မင်းတို့အားလုံး ဒီနေရာမှာပဲ စောင့်နေကြ...”

မြင်းနက်ကြီးနှင့် အစွမ်းထက်သွေးနဂါးမိစ္ဆာတို့က ရီယွင်၏ နောက်ကွယ်မှ ထပ်ကြပ်မကွာ လိုက်ပါသွားကြသည်။

မျိုးနွယ်စုခေါင်းဆောင်ကြီးသည် အဝေးသို့ ထွက်ခွာသွားသော ရီယွင်၏ ပုံရိပ်ကို အံ့ဩတကြီး စိုက်ကြည့်နေမိပြီး ဆွံ့အနေခဲ့ရ၏။ ဤစီနီယာကြီးသည် နှစ်ပေါင်းတစ်သိန်းလုံးလုံး တံခါးပိတ် ကျင့်ကြံနေခဲ့ခြင်း ဖြစ်ပေရာ ယခုအခါ သူ၏ ကျင့်ကြံမှုနယ်ပယ်မှာ မည်မျှအထိ ကြောက်မက်ဖွယ်ကောင်းသော အဆင့်သို့ ရောက်ရှိနေပြီနည်း။ သူသည် ဤကမ္ဘာ၏ တားမြစ်ချက်ကို လွယ်လင့်တကူ ဖျက်ဆီးနိုင်ရုံတင်မကဘဲ ပုံရိပ်ယောင်ဖြစ်စေသော စွမ်းအား၏ မြစ်ဖျားခံရာကို ရှာဖွေရန်အတွက် တောင်နက်ပိုင်းအတွင်းသို့ပင် ဝင်ရောက်ရန် ကြံစည်နေခဲ့ပြီ ဖြစ်သည်။ တကယ့်ကို ကြည်ညိုလေးစားစရာကောင်းလှပေသည်။ ယခင်ကအတိုင်း ချန်းနန်ကုန်းမြေကြီးပေါ်တွင် ထာဝရနယ်ပယ် ကျင့်ကြံသူအားလုံးကို လွှမ်းမိုးခဲ့သော ထိပ်တန်းသန်မာသူပီသပါပေသည်။ ဤမျှအထိ ရဲတင်းလှသော သတ္တိမျိုးမှာ ဒီလောကတွင် အနှိုင်းမဲ့ဖြစ်ပြီး ပြိုင်ဘက်ကင်း ဖြစ်ပေသည်။

ရီယွင် ပျောက်ကွယ်သွားပြီးနောက်တွင်မူ ရင်ပြင်၌ ကျန်ရှိနေခဲ့သော မျိုးနွယ်စုဝင် အားလုံးမှာ သက်ပြင်းချလိုက်ကြရသည်။

အသက်ကြီးလှသော မျိုးနွယ်စုခေါင်းဆောင်ကြီးမှလွဲ၍ အခြားသူများမှာ ရီယွင်အား မည်သူမည်ဝါဖြစ်ကြောင်းကို သဲသဲကွဲကွဲ မသိရှိကြချေ။ မျိုးနွယ်စုဝင်များက ဝန်းရံလာခဲ့ကြပြီး စူးစမ်းလိုစိတ်ဖြင့် အော်ဟစ်မေးမြန်းကြတော့သည်။ မျိုးနွယ်စုခေါင်းဆောင်ကြီးသည်လည်း မည်သည့်ဖုံးကွယ်မှုမျှမရှိဘဲ ရီယွင်မှာ အမှန်တကယ် မည်သူမည်ဝါဖြစ်ကြောင်းနှင့် သူတို့၏ ဘိုးဘေးဖြစ်သူ ချင်ယောင်၏ အကြောင်းကို ရှင်းလင်းပြောပြလိုက်သည်။

သက်လတ်ပိုင်းအရွယ် အမျိုးသားတစ်ဦးက ထိတ်လန့်တုန်လှုပ်စွာဖြင့် ပါးစပ်အဟောင်းသားဖြစ်လျက် ရေရွတ်လိုက်မိသည်။

“ဘုရားရေ... ဒီအဖြူရောင်ဝတ်စုံနှင့် စီနီယာကြီးက အမှန်တကယ်ပဲ နှစ်ပေါင်းတစ်သိန်းလုံးလုံး အသက်ရှင်နေခဲ့တာလား...”

သူ့ဘေးမှ လူငယ်တစ်ဦးကလည်း စူးစမ်းလိုစိတ်ဖြင့် အလျင်စလို မေးမြန်းလိုက်သည်။

“မျိုးနွယ်စုခေါင်းဆောင်ကြီး... လွန်ခဲ့တဲ့ နှစ်ပေါင်းတစ်သိန်းတုန်းက ဒီစီနီယာကြီးက ထာဝရနယ်ပယ်ရဲ့ အစွမ်းထက်ဆုံးသူ ဖြစ်ခဲ့တာလေ... အခု နောက်ထပ် နှစ်ပေါင်းတစ်သိန်း ကုန်ဆုံးသွားခဲ့ပြီဆိုတော့... စီနီယာကြီးက စစ်မှန်တဲ့နတ်ဘုရားနယ်မြေကို ရောက်ရှိသွားပြီ မဟုတ်ဘူးလား...”

မျိုးနွယ်စုခေါင်းဆောင်ကြီး၏ မျက်လုံးများအတွင်းမှ အလင်းတန်းများမှာ ပြင်းထန်စွာ ဝင်းလက်သွားခဲ့ပြီး ထူထပ်လှသော ကြည်ညိုလေးစားမှုများဖြင့် ဆိုလိုက်တော့သည်။

“သေချာတာပေါ့... စီနီယာကြီးက စစ်မှန်တဲ့နတ်ဘုရားတစ်ပါး ဖြစ်နေခဲ့ပြီ ဖြစ်ရမယ်...”

အခန်း ၂၂၉ ပြီးပါပြီ။