အခန်း ၈၆၄

အခန်း (၈၆၄) မှန်ကောင်းကင်ဘုံကမ္ဘာတွင် အဆင့်တက်ခြင်းနှင့် စစ်မှန်သော မိစ္ဆာသားရဲ။ (၃)

"ဂျောက်"

ဒုတိယမြောက် မှန်ရိပ်လူသားမှာ အစိတ်စိတ်အမြွှာမြွှာ ပေါက်ကွဲသွားခဲ့သည်။ ၎င်း၏ ဆန်းကြယ် လိပ် ချီစွမ်းအင်ချပ်ဝတ်မှာ စူးချန်ခုန်း၏ ဆက်တိုက်ပစ်ခတ်လိုက်သော မြားများအောက်တွင် ကြေမွသွားရပြီး မကျေမနပ် ဟိန်းဟောက်သံများသာ ကျန်ရစ်ခဲ့သည်။

ယခုအခါ နောက်ဆုံးကျန်ရှိသော မှန်ရိပ်လူသားတစ်ယောက်သာ ကျန်တော့သည်။ ၎င်းသည် အစွမ်းကုန် ရုန်းကန်သော်လည်း စူးချန်ခုန်းကို ယှဉ်နိုင်စွမ်းမရှိတော့ပေ။ အစောပိုင်းက သုံးယောက်တစ်ယောက် တိုက်ခိုက်စဉ်ကပင် မနိုင်ခဲ့ရာ ယခုတစ်ယောက်တည်း ဖြစ်သွားချိန်တွင် ပို၍ပင် မတောင့်ခံနိုင်တော့ချေ။

စူးချန်ခုန်း၏ မြားအချို့ကို ခုခံပြီးနောက်တွင် ထိုမှန်ရိပ်လူသား၏ ရင်ဘတ်မှာ မြားဖြင့် အပေါက်ခံလိုက်ရပြီး သွေးများ ကောင်းကင်သို့ ပန်းထွက်သွားကာ ခန္ဓာကိုယ်မှာ နှစ်ပိုင်းပြတ်၍ မြေပြင်ပေါ်သို့ ပြင်းထန်စွာ ပြုတ်ကျသွားသည်။ သို့သော်လည်း ထိုမှန်ရိပ်လူသားသည် နတ်ပိုးချည်ကျင့်စဉ်ကို အသုံးပြု၍ ပြတ်တောက်သွားသော ခန္ဓာကိုယ်ကို နတ်ပိုးစွမ်းအင်များဖြင့် ပြန်လည်ဆက်ရန် ကြိုးစားနေသေးသည်။

သို့သော် ထိုသို့ကြိုးစားမှုမှာ အသက်ရှူရုံမျှသာ အချိန်ဆွဲနိုင်ခြင်းဖြစ်သည်။ စူးချန်ခုန်း၏ ပုံရိပ်မှာ ဖျတ်ခနဲ လှုပ်ရှားသွားပြီး မှန်ရိပ်လူသား၏ ရှေ့တွင် ပေါ်လာသည်။ သူ၏ ဓားသွားဝိညာဉ်သည် ခန္ဓာကိုယ်မှ ထွက်ခွာသွားပြီး ရန်သူ၏ ဦးခေါင်းကို ပြတ်သားသော ခွဲချက်တစ်ချက်ဖြင့် အပိုင်းပိုင်း ခုတ်ထစ်ပစ်လိုက်လေသည်။

သေဆုံးသွားသော မှန်ရိပ်လူသား သုံးယောက်၏ ခန္ဓာကိုယ်များသည် ဖြည်းညှင်းစွာ ကြည်လင်သွားပြီး လျှို့ဝှက်ဆန်းကြယ်သော အားအင်များအဖြစ် ပြောင်းလဲကာ မှန်ကောင်းကင်ဘုံကမ္ဘာအတွင်းသို့ ပြန်လည်ဝင်ရောက်သွားကြသည်။

"ငါ နိုင်ပြီ..."

ထိုအချိန်တွင် စူးချန်ခုန်းသည် အမောတကော အသက်ရှူနေရပြီး ခေါင်းမူးဝေကာ နုံးချည့်နေသော်လည်း စိတ်လှုပ်ရှားနေလေ၏။ သူသည် နောက်ဆုံးတွင် မှန်ရိပ်နယ်ပယ်၏ လိမ်ယှက်နေသော စမ်းသပ်မှုကို အောင်မြင်စွာ ကျော်ဖြတ်နိုင်ခဲ့ပြီဖြစ်သည်။

"တော်သေးတာပေါ့... သူတို့ ဖန်တီးထားတဲ့ ပုံရိပ်တွေက ငါအစစ် မဟုတ်လို့။ တကယ်လို့ ငါ အဆင့်တက်ချိန်မှာ သူတို့လည်း လိုက်ပြီး အဆင့်တက်မယ်ဆိုရင် ငါ ဘယ်လိုမှ နိုင်မှာမဟုတ်ဘူး"

စူးချန်ခုန်းသည် သက်ပြင်းချလိုက်မိသည်။ ထိုမှန်ရိပ်လူသားများသည် မဟာနတ်ဘုရားမျိုးစေ့၏ စွမ်းအားဖြင့် ဖန်တီးထားသော ပုံရိပ်များသာဖြစ်ပြီး အသက်ရှိ သတ္တဝါများ မဟုတ်ကြပေ။ ၎င်းတို့သည် ပုံရိပ်များသာ ဖြစ်သည့်အတွက် နောက်ထပ် တိုးတက်လာနိုင်ခြင်း မရှိသောကြောင့် စူးချန်ခုန်းက အဆင့်တက်ကာ အနိုင်ယူနိုင်ခဲ့ခြင်း ဖြစ်သည်။ သို့မဟုတ်ပါက ဤစမ်းသပ်မှုမှာ မည်သူမျှ မကျော်ဖြတ်နိုင်သော ပဟေဠိတစ်ခု ဖြစ်နေပေလိမ့်မည်။

"မှန်ရိပ်နယ်ပယ်ရဲ့ စမ်းသပ်မှုကို ကျော်ဖြတ်နိုင်ခဲ့တဲ့အတွက် ဂုဏ်ယူပါတယ်။"

ထိုခဏတွင် စက်ရုပ်ဆန်သော အသံတစ်ခု ထွက်ပေါ်လာသည်။ ၎င်းမှာ မှန်ကမ္ဘာကို အုပ်ချုပ်သူ မှန်လူသားပင် ဖြစ်သည်။ အသံလာရာသို့ စူးချန်ခုန်း ကြည့်လိုက်သောအခါ ဟင်းလင်းပြင်ထဲတွင် ဝေဝါးသော ပုံရိပ်တစ်ခု ပေါ်လာသည်ကို တွေ့ရသည်။ ၎င်းမှာ သူ အရင်က နှစ်ကြိမ်တိုင်တိုင် တွေ့ခဲ့ဖူးသော မှန်သခင်ပင် ဖြစ်သည်။

ယခင်ကကဲ့သို့ အေးစက်စက် အကြည့်များ မဟုတ်တော့ဘဲ မှန်သခင်၏ မျက်လုံးများထဲတွင် အံ့အားသင့်မှုနှင့် နားမလည်နိုင်မှုတို့ ရောယှက်နေသည်။ မှန်ကောင်းကင်ဘုံကမ္ဘာကို ဖွင့်လှစ်ပြီး မကြာမီအချိန်အတွင်းမှာပင် ဤစမ်းသပ်မှုကို ကျော်ဖြတ်နိုင်သူ ရှိလိမ့်မည်ဟု သူ မထင်မှတ်ထားခဲ့ပေ။

မှန်သခင်၏ ခန့်မှန်းချက်အရ မြင့်မြတ်သော ရှေးဟောင်းနိုင်ငံမှ ထူးချွန်သူများ သတင်းရရှိ၍ လာရောက်ခြင်း မရှိပါက အခြားနိုင်ငံ ကိုးနိုင်ငံမှ လူများထဲတွင် နှစ်ပေါင်းများစွာ ကြာသည်အထိ ဤစမ်းသပ်မှုကို အောင်မြင်သူ တစ်ယောက်မျှ ရှိလိမ့်မည်မဟုတ်ဟု ယူဆထားခြင်းဖြစ်သည်။ သို့သော် သူ၏ရှေ့မှ လူငယ်မှာမူ အချိန်တိုအတွင်း မိမိ၏ ပုံရိပ်များကို အနိုင်ယူကာ အောင်မြင်သွားခဲ့သည်။

စူးချန်ခုန်း၏ လျင်မြန်သော တိုးတက်မှုနှင့် မလျှော့သော ဇွဲလုံ့လတို့မှာ သာမန်ထက် ထူးကဲကြောင်း မှန်သခင်က အနီးကပ် စောင့်ကြည့်သိရှိထားသည်။ မြင့်မြတ်သော ရှေးဟောင်းနိုင်ငံတွင်ပင် စူးချန်ခုန်းမှာ "ထူးကဲသာလွန်သူ" အဖြစ် သတ်မှတ်ခံရမည် ဖြစ်သည်။

"အကြီးအကဲ"

စူးချန်ခုန်းက ပြုံးပြလိုက်သည်။ သူသည် မှန်ရိပ်နယ်ပယ်၏ စမ်းသပ်မှုကို ပထမဆုံး ကျော်ဖြတ်သူ ဖြစ်ကြောင်း သေချာနေသည်။ မှန်ရိပ်လူသား ပြောခဲ့သည့်အတိုင်း ဆိုလျှင် ယခုအခါ သူသည် မဟာနတ်ဘုရားမျိုးစေ့ကို ရရှိရန် အခွင့်အရေး ရရှိတော့မည်ဖြစ်သည်။

"မင်းဟာ စမ်းသပ်မှုကို အောင်မြင်ခဲ့ပြီ။ မှန်သခင်ကြီး ချန်ထားခဲ့တဲ့ အမိန့်အရ မင်းမှာ မဟာနတ်ဘုရားမျိုးစေ့ကို ရယူဖို့ အရည်အချင်းရော အခွင့်အရေးပါ ရှိသွားပြီ။ ဒါပေမဲ့ မင်းအနေနဲ့ မှန်သခင်ကြီးရဲ့ နောက်ဆုံးဆန္ဒကို ဖြည့်ဆည်းပေးရမယ်" ဟု မှန်သခင်က တိုက်ရိုက်ပြောလိုက်သည်။

"မှန်သခင်ကြီးရဲ့ နောက်ဆုံးဆန္ဒလား။ အကြီးအကဲ... လွတ်လွတ်လပ်လပ် ပြောပါ။ ကျွန်တော့်ရဲ့ အစွမ်းအစထဲမှာ ရှိမယ်ဆိုရင် ကျွန်တော် ငြင်းမှာမဟုတ်ပါဘူး" စူးချန်ခုန်းက ခေါင်းညိတ်လိုက်သည်။

မှန်သခင်ကြီးတွင် နောက်ဆုံးဆန္ဒတစ်ခု ရှိကြောင်း သူ အရင်ကတည်းက ကြားသိထားသော်လည်း အသေးစိတ်ကို သိရှိရန်အတွက် စမ်းသပ်မှုကို အရင်ကျော်ဖြတ်ရန် လိုအပ်ခဲ့ခြင်း ဖြစ်သည်။

မှန်သခင်က တည်ကြည်စွာ ပြောလိုက်သည်မှာ "ပထမဆုံး လိုအပ်ချက်ကတော့ မင်းအနေနဲ့ မိစ္ဆာသားရဲ တစ်ကောင်ကို သတ်ရမယ်"

"မိစ္ဆာသားရဲကို သတ်ရမယ် ဟုတ်လား"

စူးချန်ခုန်း၏ မျက်ခုံးများ အနည်းငယ် တွန့်သွားသည်။ စူးချန်ခုန်း သိထားသလောက်မူ ထို မိစ္ဆာသိုင်းပညာရှင်များမှာ စစ်မှန်သော မိစ္ဆာသားရဲများ မဟုတ်ကြပေ။ စစ်မှန်သော မိစ္ဆာသားရဲများသည် စစ်မှန်သော သားရဲများကဲ့သို့ပင် သိုင်းဝိဇ္ဇာသူတော်စင်အဆင့်နှင့် ယှဉ်နိုင်စွမ်း ရှိကြသည်။

မှန်သခင်ကြီး၏ နောက်ဆုံးဆန္ဒမှာ မိစ္ဆာသားရဲကို သတ်ရန် ဖြစ်နေခြင်းမှာ မှန်သခင်ကြီးနှင့် မိစ္ဆာသားရဲများအကြား ကြီးမားသော အငြိုးအတေး ရှိခဲ့ဟန်တူသည်။ မှန်သခင်ကြီး ကွယ်လွန်သွားခြင်းမှာ သဘာဝအတိုင်း မဟုတ်ဘဲ ထိုမိစ္ဆာသားရဲများနှင့် ပတ်သက်နေနိုင်ပေသည်။

မှန်သခင်က ဆက်ပြောသည်မှာ "မိစ္ဆာသားရဲတွေဟာ အရမ်းကို လျှို့ဝှက်ဆန်းကြယ်တယ်... အချို့ကဆိုရင် သူတို့က ဒီကမ္ဘာက မဟုတ်ဘူးလို့တောင် ယူဆကြတယ်။ သူတို့ရဲ့ မွေးဖွားလာမှုဟာ ဖျက်ဆီးဖို့နဲ့ ဒီကမ္ဘာရဲ့ ပျက်သုဉ်းမှုကို မြန်ဆန်စေဖို့အတွက်ပဲ။"

စူးချန်ခုန်း ဂရုတစိုက် နားထောင်နေသည်။ မိစ္ဆာသားရဲများအကြောင်းမှာ အလွန်လျှို့ဝှက်လှပြီး ရှယန်မိသားစု၏ မှတ်တမ်းများတွင်ပင် အချက်အလက် အနည်းငယ်သာ ရှိသည်။ မှန်သခင်ကြီး၏ ကိစ္စရပ်များကို စီမံခန့်ခွဲသူအနေဖြင့် ဤမှန်သခင်မှာ မိစ္ဆာသားရဲများအကြောင်းကို အများကြီး သိထားသည်။

မှန်သခင်၏ ပြောပြချက်အရ မိစ္ဆာသားရဲများသည် ဤနယ်ပယ်ကို ဖျက်ဆီးရန် ရောက်ရှိလာကြသူများဖြစ်ပြီး ၎င်းမှာ သူတို့၏ တာဝန်ပင် ဖြစ်သည်။ လူသားများအတွက် အစားစားရန် လိုအပ်သကဲ့သို့ သူတို့အတွက်လည်း ဖျက်ဆီးရန် လိုအပ်သည်။ ဤနယ်ပယ်ကို ဖျက်ဆီးနိုင်လေ မိစ္ဆာသားရဲများမှာ ပို၍ အင်အားကြီးမားလာလေ ဖြစ်သည်။

"မှန်သခင်ကြီးဟာ နိုင်ငံငယ်လေးတစ်ခုမှာ မွေးဖွားခဲ့ပေမဲ့ ပါရမီထူးချွန်ပြီး သူ့ခေတ်သူ့အခါမှာ ပြိုင်ဘက်ကင်းခဲ့သူပါ။ သူဟာ အမိနိုင်ငံက ထွက်ခွာပြီး အစွမ်းထက်တဲ့ မြင့်မြတ်သော ရှေးဟောင်းနိုင်ငမှာ နာမည်ကျော်ကြားခဲ့သူ ဖြစ်တယ်" ဟု မှန်သခင်က ရိုသေစွာ ပြောပြသည်။

မှန်သခင်ကြီးကိုယ်တိုင်မှာ မဟာနတ်ဘုရားစွမ်းရည် သိုင်းဝိဇ္ဇာသူတော်စင်တစ်ဦး ဖြစ်သည်။ သီအိုရီအရ သူသည် "ရှေးဟောင်း သူတော်စင်" များနှင့်ပင် ယှဉ်နိုင်သည်။ ရှေးဟောင်း သူတော်စင်များမှာ သိုင်းဝိဇ္ဇာ သူတော်စင်များထဲတွင် အမြင့်ဆုံးနှင့် အစွမ်းအထက်ဆုံး ဖြစ်ကြသည်။ မှန်သခင်ကြီးမှာ ကြီးမြတ်သော မျိုးရိုးနောက်ခံ မရှိသော်လည်း ထူးကဲသော ပါရမီဖြင့် ရှေ့သို့ အတားအဆီးမဲ့ တိုးတက်လာခဲ့သူ ဖြစ်သည်။

"မှန်သခင်ကြီးက အသက်ငယ်ငယ်ရွယ်ရွယ်နဲ့ နတ်ဘုရားစွမ်းရည်ကို ရခဲ့တာပါ။ သူဟာ ရှေးဟောင်း သူတော်စင်တွေနဲ့ ယှဉ်နိုင်တဲ့ ပုဂ္ဂိုလ်တစ်ယောက် ဖြစ်ဖို့ ရည်မှန်းခဲ့ပေမဲ့ နတ်စွမ်းအားကို ရရှိပြီး မကြာခင်မှာပဲ သူရဲ့ အမိနိုင်ငံ အန္တရာယ် ကြုံနေရတယ်ဆိုတဲ့ သတင်းကို ရရှိခဲ့တယ်။ သူ ပြန်ရောက်သွားတဲ့ အချိန်မှာတော့ တစ်နိုင်ငံလုံးဟာ လူသေကမ္ဘာကြီး ဖြစ်နေပြီး လူတွေအားလုံးဟာ အသက်မဲ့ အလောင်းကောင်တွေ ဖြစ်နေကြပြီ..."

မှန်သခင်သည် မှန်သခင်ကြီး၏ နောက်ဆုံးဆန္ဒနှင့် ပတ်သက်သော ဇာတ်လမ်းကို ဆက်လက်ပြောပြသည်။

"ဒါဆိုရင်... အဲဒီ အလောင်းကောင်တွေ ပြည့်နေတဲ့ 'ညနတ်ဘုရားနိုင်ငံ' က မှန်သခင်ကြီးရဲ့ အမိနိုင်ငံလား။ မိစ္ဆာသားရဲတွေကြောင့် အဲဒီလို ဖြစ်သွားခဲ့တာလား"

စူးချန်ခုန်းသည် ဉာဏ်ကောင်းသူ ဖြစ်သည့်အတွက် အစောပိုင်းက သူ တွေ့ကြုံခဲ့ရသော ပုပ်ပွနေသည့် အလောင်းကောင်များနှင့် သေလူများရှိရာ နယ်မြေကို ချက်ချင်း သတိရလိုက်သည်။ မှန်သခင်ကြီးမှာ မူလက ညနတ်ဘုရားနိုင်ငံမှ ဖြစ်ပြီး ထိုနိုင်ငံမှာ မိစ္ဆာသားရဲများ၏ ဖျက်ဆီးခြင်းကို ခံခဲ့ရကာ သမိုင်းထဲတွင် မေ့ပျောက်လုနီးပါး ဖြစ်နေသော သေလူများ၏ နယ်မြေအဖြစ် ပြောင်းလဲသွားခဲ့ခြင်း ဖြစ်ပေလိမ့်မည်။