အခန်း ၈၆၅

အခန်း (၈၆၅) အရာခပ်သိမ်း မှန်ပြင်နှင့် တစ်ဦးတည်းသော အမွေခံ။ (၁)

အမှန်တကယ်ပင် မှန်ပြင်အတွင်းရှိ ပုံရိပ်သည် အေးစက်စက် လေသံဖြင့် ဆက်လက်ပြောပြောသည်။ "မှန်သခင်ကြီးက ဒါဟာ မိစ္ဆာသားရဲရဲ့ လက်ချက်ဆိုတာ ချက်ချင်း သိသွားခဲ့တယ်။ သူက ဒေါသချောင်းချောင်းထွက်သွားပြီး ညနတ်ဘုရားနိုင်ငံကနေ မထွက်ခွာသေးတဲ့ မိစ္ဆာသားရဲကို လိုက်လံရှာဖွေပြီး တိုက်ပွဲ ဆင်နွှဲခဲ့တယ်"

"မဟာနတ်ဘုရားစွမ်းရည် ပိုင်ဆိုင်ထားတဲ့ မှန်သခင်ကြီးက ဒီလောကမှာ ပြိုင်ဘက်ကင်းသူပါ။ ဒါပေမဲ့ မိစ္ဆာသားရဲဟာလည်း နိုင်ငံတစ်ခုလုံးကို ဖျက်ဆီးခဲ့ပြီး ကြီးမားတဲ့ အင်အားကို ရရှိထားကာ မိစ္ဆာသားရဲတွေထဲမှာ ဘုရင်တစ်ပါး ဖြစ်နေခဲ့ပြီ။ သူတို့နှစ်ယောက်ရဲ့ တိုက်ပွဲဟာ မိုင်ပေါင်းထောင်ချီတဲ့ တောင်တန်းနဲ့ မြစ်ချောင်းတွေကို မြေလှန်ပစ်ခဲ့တယ်။ နောက်ဆုံးမှာတော့ မိစ္ဆာဘုရင် အရေးနိမ့်ပြီး ထွက်ပြေးခဲ့ရတယ်။ မှန်သခင်ကြီးက လိုက်လံတိုက်ခိုက်ပြီး အခု ငါတို့ရှိနေတဲ့ ဒီမြေပေါ်မှာပဲ အဲဒီမိစ္ဆာကို အပြတ်ရှင်းခဲ့တာ"

"ဒါပေမဲ့ မှန်သခင်ကြီးကလည်း မိစ္ဆာဘုရင်ဆီကပဲ ရရှိနိုင်တဲ့ 'မိစ္ဆာဝိညာဉ် အမှတ်အသား' ရဲ့ ကျိန်စာကို ခံလိုက်ရတယ်။ မြင့်မြတ်သော ရှေးဟောင်းနိုင်ငံကို ပြန်ရောက်တဲ့အခါမှာလည်း ဘယ်သူကမှ ဒီကျိန်စာကို မဖြေရှင်းနိုင်ခဲ့ကြဘူး။ ဒါကြောင့် သူဟာ နောက်ဆုံးအစီအစဉ်တွေကို ချမှတ်ပြီး ဒီနေရာမှာပဲ ကျင့်ကြံရင်း ကွယ်လွန်သွားခဲ့တာ ဖြစ်တယ်" ဟု မှန်ပြင်အတွင်းရှိ ပုံရိပ်က ဆိုသည်။

မိမိ၏ အမိနိုင်ငံ ဖျက်ဆီးခံရခြင်း၊ ဆွေမျိုးမိတ်သင်္ဂဟများမှာ စစ်မှန်သော မိစ္ဆာသားရဲ၏ ရန်ကြောင့် ဘေးဒုက္ခရောက်ခဲ့ရခြင်းတို့ကြောင့် မှန်သခင်ကြီးသည် ဒေါသအမျက်ချောင်းချောင်းထွက်ကာ မိစ္ဆာဘုရင်အဆင့်သို့ ရောက်ရှိနေသော ထိုမိစ္ဆာနှင့် အသက်စွန့် တိုက်ခိုက်ခဲ့ခြင်း ဖြစ်သည်။

"မိစ္ဆာသားရဲက... အဲဒီလောက်တောင် အစွမ်းထက်တာလား။ မဟာနတ်ဘုရားစွမ်းရည်ရှိတဲ့ သိုင်းဝိဇ္ဇာ သူတော်စင်တစ်ယောက်တောင် နောက်ဆုံးမှာ သေလောက်အောင် ဒဏ်ရာရခဲ့တယ်ဆိုတော့" စူးချန်ခုန်းမှာ တုန်လှုပ်သွားမိသည်။

သူ အရင်က တွေ့ဖူးသော မိစ္ဆာသိုင်းပညာရှင်များမှာ စစ်မှန်သော မိစ္ဆာသားရဲများ မဟုတ်ကြပေ။ မိစ္ဆာသားရဲအစစ် များထဲတွင် အားအနည်းဆုံးမှာပင် သိုင်းဝိဇ္ဇာ သူတော်စင်အဆင့်တွင် ရှိကြပြီး အားကောင်းသော အကောင်များသည် နတ်ဘုရားစွမ်းရည်ရှိသော သိုင်းဝိဇ္ဇာ သူတော်စင်များ သို့မဟုတ် ရှေးဟောင်းသူတော်စင်များကိုပင် ယှဉ်နိုင်စွမ်း ရှိကြသည်။

မှန်ပုံရိပ်က အေးစက်စွာ ပြောသည်မှာ "မကြာသေးခင်ကပဲ မှန်သခင်ကြီး ချန်ထားခဲ့တဲ့ မဟာနတ်မျိုးစေ့ဟာ မိစ္ဆာသားရဲတစ်ကောင်ရဲ့ အငွေ့အသက်ကို ခံစားလိုက်ရတယ်... စစ်မှန်တဲ့ မိစ္ဆာသားရဲပေါ့။ ဒါကြောင့်ပဲ မှန်ကောင်းကင်ဘုံကမ္ဘာဟာ နိုးထလာခဲ့တာပါ။ မင်းအနေနဲ့ မှန်သခင်ကြီးရဲ့ မဟာနတ်ဘုရားမျိုးစေ့ကို ရယူချင်ရင် မိစ္ဆာသားရဲတစ်ကောင်ကို အရင်သတ်ရမယ်... စစ်မှန်တဲ့ မိစ္ဆာသားရဲကိုပဲ။ ဒါက မလွဲမသွေ လိုက်နာရမယ့် စည်းကမ်းပဲ"

"နားလည်ပါပြီ..." ဟု စူးချန်ခုန်းက ခေါင်းညိတ်လိုက်သည်။

မှန်ကောင်းကင်ဘုံကမ္ဘာ ဤလောကတွင် ပေါ်ထွက်လာရခြင်းမှာ စစ်မှန်သော မိစ္ဆာသားရဲတစ်ကောင်၏ အငွေ့အသက်ကို ခံစားမိသောကြောင့်ပင် ဖြစ်သည်။ မိစ္ဆာသားရဲအပေါ် နာကျည်းချက် ပြင်းထန်သော မှန်သခင်ကြီး၏ နောက်ဆုံးဆန္ဒတစ်ခုမှာ သူ၏ အမွေကို ဆက်ခံလိုသူတိုင်း စစ်မှန်သော မိစ္ဆာသားရဲတစ်ကောင်ကို သတ်ရမည်ဟူ၍ ဖြစ်သည်။

"မိစ္ဆာသားရဲအစစ်ဆိုတာ... ချင်းမေ့ရှန်များ ဖြစ်နေမလား"

စူးချန်ခုန်းသည် အသက်ခြွေအဖွဲ့အစည်း၏ ခေါင်းဆောင် ချင်းမေ့ရှန်ကို ချက်ချင်း သတိရမိသည်။ သူ၏ သရုပ်မှန်မှာ လျှို့ဝှက်ပြီး လှုပ်ရှားမှုများမှာလည်း ခန့်မှန်းရခက်လှသည်။ သူသည် စစ်မှန်သော မိစ္ဆာသားရဲတစ်ကောင် ဖြစ်ရန် အလွန်နီးစပ်သည်။ သူ ဤလောကတွင် ပြန်လည်ပေါ်ထွက်လာပြီး ရှုပ်ထွေးအောင် လုပ်ဆောင်နေခြင်းကြောင့် မဟာနတ်ဘုရားမျိုးစေ့က သူ၏ အငွေ့အသက်ကို သိရှိပြီး တုံ့ပြန်လိုက်ခြင်း ဖြစ်ပေလိမ့်မည်။

ဟုတ်မဟုတ် မသေချာသေးသော်လည်း ဤအချက်မှာ စူးချန်ခုန်း၏ ခန့်မှန်းချက်သာ ဖြစ်သည်။

"ဒုတိယအချက်အနေနဲ့ မှန်သခင်ကြီးရဲ့ 'မှန်ကောင်းကင်ကမ္ဘာ မဟာနတ်ဘုရားမျိုးစေ့' ကို ရချင်ရင် မင်းမှာ 'နတ်ဘုရားခန္ဓာကိုယ်' ရှိဖို့ လိုအပ်တယ်။ ဒါမှသာ မဟာနတ်ဘုရားမျိုးစေ့ကို ထိန်းချုပ်နိုင်စွမ်း ရှိမှာဖြစ်တယ်" ဟု မှန်ပုံရိပ်က နောက်ထပ် အချက်တစ်ခုကို ပြောပြသည်။

မဟာနတ်ဘုရားမျိုးစေ့တွင် မဟာနတ်ဘုရားစွမ်းအားများ ကိန်းအောင်းနေသဖြင့် သာမန်နတ်မျိုးစေ့မျိုး မဟုတ်ပေ။ သိုင်းဝိဇ္ဇာ သူတော်စင်အဆင့် စတုတ္ထအဆင့်အောက်ရှိသော သူတစ်ဦးမှာ ၎င်းကို ရရှိလျှင်ပင် အစွမ်းကို ထုတ်ဖော်နိုင်မည် မဟုတ်ပေ။ မဟာနတ်ဘုရားမျိုးစေ့ကို စုပ်ယူထိန်းချုပ်ရန်အတွက် အနည်းဆုံး သိုင်းဝိဇ္ဇာ သူတော်စင် စတုတ္ထအဆင့်သို့ ရောက်ရှိကာ နတ်ခန္ဓာကို တည်ဆောက်ထားနိုင်ရန် လိုအပ်သည်။

"ပြီးတော့ ဒါက မင်းရဲ့ အန္တရာယ်ကင်းဖို့အတွက်လည်း ဖြစ်တယ်။ အကယ်၍ မင်းမှာ အခု မဟာနတ်ဘုရားမျိုးစေ့ ရှိနေမယ်ဆိုရင် လူစည်ကားတဲ့ ဈေးထဲမှာ ရွှေတုံးကို ကိုင်ထားတဲ့ ကလေးတစ်ယောက်လို ဖြစ်နေလိမ့်မယ်။ ကိုယ့်ကိုယ်ကို မကာကွယ်နိုင်ဘဲ အခြား နတ်ဘုရားစွမ်းရည်ရှိတဲ့ သိုင်းဝိဇ္ဇာ သူတော်စင်တွေက ဒီမဟာနတ်ဘုရားမျိုးစေ့ကို အတင်းအဓမ္မ လုယူကြလိမ့်မယ်" ဟု မှန်ပုံရိပ်က ဆိုသည်။

စူးချန်ခုန်းမှာ သဘောတူသည့်အနေဖြင့် ခေါင်းညိတ်လိုက်သည်။ သူ အခု မဟာနတ်ဘုရားမျိုးစေ့ကို ရခဲ့ပါက ပထမအချက်အနေဖြင့် ၎င်း၏ စွမ်းအားကို အသုံးမချနိုင်ဘဲ ဒုတိယအချက်အနေဖြင့် ၎င်းကို ဘေးကင်းစွာ ယူဆောင်သွားနိုင်မည် မဟုတ်ပေ။ အပြင်ဘက်တွင် သိုင်းဝိဇ္ဇာ သူတော်စင်များစွာ ရှိနေသဖြင့် သူသာ မဟာနတ်ဘုရားမျိုးစေ့နှင့် ထွက်သွားပါက အားလုံး၏ ဝိုင်းဝန်းတိုက်ခိုက်ခြင်းကို ခံရမည်မှာ သေချာပါသည်။

မဟာနတ်ဘုရားမျိုးစေ့၏ ဆွဲဆောင်မှုကို မည်သည့် သိုင်းဝိဇ္ဇာသူတော်စင်က ငြင်းပယ်နိုင်မည်နည်း။ မဟာနတ်ဘုရားမျိုးစေ့၏ စွမ်းအင်မှာ ပြင်းထန်လွန်းသဖြင့် သာမန်သိုလှောင်ရတနာများဖြင့် ဖုံးကွယ်ထား၍ မရနိုင်ပေ။ စူးချန်ခုန်း ယူဆောင်သွားပါက နေမင်းကြီးကဲ့သို့ ထင်ရှားနေမည်ဖြစ်ပြီး အခြားသူများက အလွယ်တကူ သိသွားကြလိမ့်မည်။

ထို့ကြောင့်ပင် မှန်သခင်ကြီးသည် ဒုတိယအချက်ကို သတ်မှတ်ခဲ့ခြင်း ဖြစ်သည်။ မဟာနတ်ဘုရားမျိုးစေ့ကို ရယူရန် မိစ္ဆာသားရဲအစစ်ကို သတ်ရမည်ဖြစ်ပြီး ထို့နောက် နတ်ဘုရားခန္ဓာကိုယ်ကို တည်ဆောက်နိုင်ရမည် ဖြစ်သည်။ အကယ်၍ စူးချန်ခုန်းကဲ့သို့ စမ်းသပ်မှုကို အောင်မြင်သူ အခြားရှိခဲ့လျှင်လည်း ဤစည်းကမ်းများကိုသာ လိုက်နာရမည် ဖြစ်သည်။

"စိတ်မပူပါနဲ့။ ဒီ မဟာနတ်ဘုရားမျိုးစေ့ကို ဘယ်သူမှ လုယူလို့ မရပါဘူး။ မှန်သခင်ကြီးထက် အစွမ်းထက်တဲ့ သိုင်းဝိဇ္ဇာ သူတော်စင်တစ်ယောက် လာရင်တောင် အတင်းလုယူလို့ မရဘူး။ အတင်းလုယူဖို့ ကြိုးစားရင် မှန်သခင်ကြီးရဲ့ အစီအမံတွေကြောင့် မဟာနတ်ဘုရားမျိုးစေ့ ချက်ချင်း ပျက်စီးသွားလိမ့်မယ်"

မှန်ပုံရိပ်က စူးချန်ခုန်းကို စိတ်အေးစေရန် ပြောကြားလိုက်သည်။ မဟာနတ်ဘုရားမျိုးစေ့ကို ရရှိရန်အတွက် မှန်သခင်ကြီး သတ်မှတ်ထားသော စည်းမျဉ်းများကိုသာ လိုက်နာရမည် ဖြစ်ပြီး မဟုတ်ပါက အားလုံး ပျက်စီးခြင်းသို့သာ ရောက်လိမ့်မည် ဖြစ်သည်။

"ဟုတ်ကဲ့..." စူးချန်ခုန်း ခေါင်းညိတ်လိုက်သည်။ ဤအခြေအနေမှာ အကောင်းဆုံး ဖြစ်သည်ဟု သူ နားလည်လိုက်သည်။

ထို့နောက် မှန်ပုံရိပ်က ဆက်ပြောသည်မှာ "မင်းဟာ စတုတ္ထမြောက် စမ်းသပ်မှုကို အောင်မြင်ခဲ့ပြီ။ ဘယ်လို ဆုလာဘ်မျိုးကို လိုချင်သလဲ။ မဟာနတ်ဘုရားစွမ်းရည်အဆင့်ရှိတဲ့ ပြိုင်ဘက်ကင်း ကျင့်စဉ်မျိုးကို တောင်းဆိုရင်တောင် မင်း ရနိုင်တယ်"

စူးချန်ခုန်း၏ မျက်လုံးများက တလက်လက်နှင့်။ တတိယမြောက် စမ်းသပ်မှုတွင် နတ်ဘုရားမျိုးစေ့အဆင့် ဆုလာဘ်ကို ရရှိခဲ့ပြီး ယခု စတုတ္ထမြောက်တွင်မူ မဟာနတ်ဘုရားမျိုးစေ့ကို ရယူရန် အရည်အချင်း ပြည့်မီသွားရုံသာမက မှန်သခင်ကြီး၏ ရတနာများထဲမှ ပြိုင်ဘက်ကင်း မဟာနတ်ဘုရားစွမ်းရည် ကျင့်စဉ်များကိုပင် ရွေးချယ်ခွင့် ရရှိသွားခြင်း ဖြစ်သည်။

ခဏမျှ စဉ်းစားပြီးနောက် စူးချန်ခုန်းသည် နတ်ပညာရပ်များကို စိတ်ဝင်စားသော်လည်း မိမိနှင့် အကိုက်ညီဆုံးအရာမှာ အကျိုးအရှိဆုံးဖြစ်မည်ကို သိရှိသည်။ မှန်သခင်ကြီး၏ ပညာရပ်များသည် သူနှင့် ကိုက်ညီချင်မှ ကိုက်ညီပေလိမ့်မည်။ စူးချန်ခုန်းအတွက် လက်ရှိ အလိုအပ်ဆုံးမှာ သိုင်းဝိဇ္ဇာ သူတော်စင်အဆင့်သို့ တက်လှမ်းနိုင်ရန် ဖြစ်သည်။ ထို့ကြောင့် သူ၏ အဆင့်တက်ခြင်းကို အထောက်အကူပြုမည့် ဆုလာဘ်မှာ အကောင်းဆုံး ဖြစ်ပေလိမ့်မည်။

စူးချန်ခုန်းသည် မှန်ပုံရိပ်ကို ကြည့်ကာ ပြောလိုက်သည်မှာ "စီနီယာ... ကျွန်တော့်ရဲ့ ဆုလာဘ်အနေနဲ့ ကျား၊ သမင်၊ ဝံ၊ မျောက်နဲ့ ငှက် စတဲ့ စစ်မှန်တဲ့ သားရဲကြီးတွေကို မှန်ရိပ်အဖြစ် ဖန်တီးပေးနိုင်မလား။ ကျွန်တော် သူတို့နဲ့ တိုက်ခိုက်ပြီး ကျွန်တော် လေ့ကျင့်နေတဲ့ သိုင်းပညာမှာ အသိဉာဏ်အသစ်တွေ ယူပြီး အဆင့်တက်ချင်လို့ပါ"

မဟာနတ်ဘုရားမျိုးစေ့၏ အစွမ်းမှာ "မှန်ကောင်းကင်မြေကမ္ဘာ" ဖြစ်ပြီး ခေတ်အဆက်ဆက်မှ ပုံရိပ်များကို ရောင်ပြန်ဟပ်ကာ ပေါ်ထွက်လာစေနိုင်သည်။ ၎င်းသည် လူသားများကိုသာမက စစ်မှန်သော သားရဲကြီးများကိုပါ ပုံရိပ်အဖြစ် ဖန်တီးပေးနိုင်သည်။

စူးချန်ခုန်းက ယုံကြည်ထားသည်မှာ အကယ်၍ သူသည် ထိုစစ်မှန်သော သားရဲကြီးများကို ကိုယ်တိုင် ရင်ဆိုင်တိုက်ခိုက်ပြီး ၎င်းတို့၏ စစ်မှန်သော ခွန်အားကို မြင်တွေ့ရမည်ဆိုပါက သူ၏ ဝူချင်းရှီကျင့်စဉ်ကို နောက်တစ်ဆင့်သို့ မြှင့်တင်နိုင်မည်ဖြစ်ပြီး နတ်ဘုရားစွမ်းရည်အဖြစ် ပြောင်းလဲကာ သိုင်းဝိဇ္ဇာ သူတော်စင်အဆင့်သို့ တက်လှမ်းနိုင်မည်ဟု ဖြစ်ပေသည်။