အခန်း ၈၇၀

အခန်း (၈၇၀) သိုင်းဝိဇ္ဇာသူတော်စင်အချင်းချင်း တိုက်ခိုက်ခြင်း။ သိုင်းဝိဇ္ဇာသူတော်စင်တစ်ဦး၏ နောက်ဆုံးတိုက်ပွဲ။ (၃)

"ရှယန်လုံက စွမ်းအားကြီးတာတော့ မှန်ပါတယ်... ဒါပေမဲ့ သူဟာ ရှေးဟောင်းမိစ္ဆာဂိုဏ်းက သိုင်းဝိဇ္ဇာသူတော်စင်ကို တကယ်ပဲ ယှဉ်နိုင်ပါ့မလား"

"စောင့်ကြည့်ရုံပဲ ရှိတာပေါ့။ ရှေးဟောင်းမိစ္ဆာဂိုဏ်းဆိုတာ အင်အားကြီးအဖွဲ့အစည်းကြီးပဲ။ သူတို့နဲ့ သွားပြီး ရန်မစသင့်ဘူး။"

သဲဝါပင်လယ်အတွင်း၌ ပုန်းကွယ်စောင့်ကြည့်နေကြသော အခြားသိုင်းဝိဇ္ဇာသူတော်စင်များမှာ ထိတ်လန့်တုန်လှုပ်နေကြပြီး အငွေ့အသက်များမှာလည်း တင်းကျပ်လှသည်။ တစ်ဖက်တွင် မဟာမီးလျှံအင်ပါယာမှ ရှယန်မိသားစုရှိနေပြီး အခြားတစ်ဖက်တွင်မူ မြင့်မြတ်သော ရှေးဟောင်းနိုင်ငံမှ ရှေးဟောင်းမိစ္ဆာဂိုဏ်း၏ အစွမ်းထက်ပုဂ္ဂိုလ် ရှိနေသည်။ အခြားသိုင်းဝိဇ္ဇာသူတော်စင် အများစုမှာမူ ပြဿနာထဲသို့ ဝင်မပါလိုကြဘဲ ဘေးမှနေ၍ ဇာတ်လမ်းကြည့်ရန်သာ ဆန္ဒရှိကြသည်။

"ကောင်းပြီလေ... ဒါဆိုရင်လည်း အားလုံး အတူတူ သေကြတာပေါ့။"

ဟုန်မန့်ထျန်း၏ မျက်နှာတွင် သတ်ဖြတ်လိုစိတ်များ ပေါ်ပေါက်လာပြီး သူမသည် မလိုအပ်သော စကားများကို မပြောတော့ဘဲ ချက်ချင်းပင် တိုက်ခိုက်လိုက်သည်။

"ရှူး"

သူမ၏ လက်ထဲမှ သွေးရောင်ကြိမ်လုံးကို ဝှေ့ယမ်းလိုက်သောအခါ ထိုကြိမ်လုံးမှာ လျင်မြန်စွာပင် ကြီးထွားလာပြီး ကောင်းကင်ယံကို ဖြတ်သန်းသွားသော သွေးရောင်မြွေကြီးတစ်ကောင်အဖြစ် ပြောင်းလဲသွားသည်။ ၎င်းသည် တောင်တန်းများနှင့် မြေပြင်ကို အမှုန့်ဖြစ်အောင် ချေဖျက်နိုင်စွမ်း ရှိသည်။

ရှယန်လုံ၏ လက်စွပ်မှာ ဝင်းလက်သွားပြီးနောက် ရွှေနဂါးရစ်ပတ်ထားသော အနီရောင်ဓားရှည်တစ်လက် ပေါ်ထွက်လာသည်။ သူသည် ကောင်းကင်သို့ ပျံတက်သွားပြီး ထိုဓားမှ ရွှေရောင်နဂါးတစ်ကောင် ထွက်ပေါ်လာကာ လက်သည်းများကို ထုတ်၍ ဟိန်းဟောက်လိုက်သည်။ ၎င်းသည် တောင်ပြိုလှိုင်းထသကဲ့သို့သော ဓားအရှိန်အဝါများကို ဖန်တီးကာ ကျဆင်းလာသော သွေးရောင်ကြိမ်လုံးကို တားဆီးလိုက်သည်။

"ချလွမ်း"

သတ္တုချင်း ရိုက်ခတ်သံမှာ မိုးကြိုးပစ်သကဲ့သို့ ဟည်းထွက်သွားပြီး တိုက်ပွဲ၏ ရိုက်ခတ်မှုကြောင့် ဘေးပတ်ပတ်လည်ရှိ သဲသောင်ပြင်များမှာ လွင့်စင်ထွက်ကုန်သည်။ နီရဲသော နတ်ဘုရားဓားမှ ထွက်ပေါ်လာသော ဓားအရှိန်အဝါများသည် သွေးရောင်ကောင်းကင်ယံကို စုတ်ဖြတ်ပစ်လိုက်ကာ အက်ကြောင်းပေါင်းများစွာ ဖြစ်ပေါ်စေခဲ့သည်။

"ရှေးဟောင်းမိစ္ဆာဂိုဏ်းကလူတွေအနေနဲ့... မဟာမီးလျှံအင်ပါယာရဲ့ နယ်မြေထဲမှာ လာပြီး ရမ်းကားလို့ မရဘူး။"

ရှယန်လုံ၏ မျက်လုံးများမှ ရွှေရောင်အလင်းတန်းများ ထွက်ပေါ်နေသည်။ သူသည် နတ်ဓားကို ကိုင်ဆောင်ကာ ဟင်းလင်းပြင်ထဲတွင် ဟုန်မန့်ထျန်းကို ရင်ဆိုင်နေသည်မှာ ကောင်းကင်နတ်မင်းကြီးတစ်ပါးကဲ့သို့ ခံ့ညားလှသည်။

"မင်းလို နိုင်ငံငယ်လေးက ဒေသခံတစ်ယောက်က တကယ်ပဲ ငါနဲ့ အသေအကြေ တိုက်ချင်နေတာလား" ဟု ဟုန်မန့်ထျန်း၏ မျက်လုံးများထဲတွင် အန္တရာယ်ရှိသော အလင်းတန်းများ လက်လာသည်။

"ဒေသခံ ဟုတ်လား။ မင်းကိုယ်တိုင်လည်း နတ်ဘုရားမျိုးစေ့အဆင့်ပဲ ရှိသေးတဲ့ သိုင်းဝိဇ္ဇာသူတော်စင် တစ်ယောက်ပါပဲ။ ရှေးဟောင်းမိစ္ဆာဂိုဏ်းရဲ့ သိုင်းဝိဇ္ဇာသူတော်စင်တွေထဲမှာ နတ်ဘုရား ခန္ဓာကိုယ် တည်ဆောက်နိုင်ဖို့ မျှော်လင့်ချက် မရှိတော့တဲ့သူ တစ်ယောက် ဖြစ်မှာပေါ့" ရှယန်လုံက အလျှော့မပေးဘဲ တုံ့ပြန်လိုက်သည်။

ဟုန်မန့်ထျန်း၏ ကျင့်ကြံမှုမှာ အလွန်မြင့်မားသော်လည်း နတ်ဘုရားခန္ဓာကိုမူ တည်ဆောက်နိုင်ခြင်း မရှိသေးသည်ကို သူ ရိပ်မိလိုက်သည်။ ထို့ကြောင့် သူသည် သူမကို တိုက်ခိုက်ရန် မကြောက်ရွံ့ခြင်း ဖြစ်သည်။

"သေချင်နေတာပဲ။ သွေးနွယ်ပင် ပန်းပွင့်"

ရှယန်လုံ၏ စကားမှာ ဟုန်မန့်ထျန်း၏ အထိမခံသော နေရာကို တည့်တည့်မှန်သွားသဖြင့် သူမ၏ မျက်လုံးများမှာ ချက်ချင်းပင် သွေးရောင်ပြောင်းသွားပြီး နတ်ဘုရားစွမ်းရည်ကို ထုတ်ဖော်လိုက်သည်။

"ရှူး... ရှူး... ရှူး"

ဟင်းလင်းပြင်ထဲတွင် သွေးနီရောင် ပန်းပွင့်များစွာ ပေါ်ထွက်လာသည်။ ထိုပန်းပွင့်များမှာ ဟပြဲလျက် ကိုက်ခဲရန် ပြင်နေကြပြီး သွေးနီရောင် အရည်များ ထွက်နေသည်။ လေထုထဲတွင် မိုင်ပေါင်းများစွာအထိ သွေးနံ့များဖြင့် ပြည့်နှက်သွားသဖြင့် စူးချန်ခုန်းပင်လျှင် အနည်းငယ် မူးဝေသွားရသည်။ ထိုသွေးရောင်ပန်းများမှာ ဟင်းလင်းပြင်ထဲတွင် အမြစ်တွယ်ကာ လျင်မြန်စွာ ပြန့်နှံ့သွားသည်။ အချို့မှာ သွေးရောင် ပျက်စီးခြင်း လုံးငယ်များကို မှုတ်ထုတ်နေကြပြီး အချို့မှာ ရှယန်လုံထံသို့ ခုန်အုပ်ရန် ပြင်နေကြသည်။

"ရွှေနဂါး ဓားစွမ်းအင်"

ရှယန်လုံ၏ မျက်နှာမှာ တည်ကြည်သွားသည်။ ဟုန်မန့်ထျန်းကို ရင်ဆိုင်ရာတွင် သူ မပေါ့ဆဝံ့ပေ။ သူ၏ စိတ်အာရုံကြောင့် ပေတစ်ထောင်ခန့် ရှည်လျားသော ရွှေရောင်နဂါးကြီးတစ်ကောင်သည် သူ၏ ခန္ဓာကိုယ်အတွင်းမှ ဟိန်းဟောက်၍ ထွက်ပေါ်လာသည်။ ၎င်းမှာ ဓားဝိညာဉ်နှင့် ပေါင်းစပ်ထားသော ဓားစွမ်းအင်များ ဖြစ်သည်။ အကြေးခွံတစ်ခုချင်းစီမှာ ဓားအရှိန်အဝါများဖြင့် တည်ဆောက်ထားခြင်း ဖြစ်ပြီး နဂါးကြီး လှုပ်ရှားလိုက်တိုင်း ကောင်းကင်နှင့် မြေပြင်ကို ပိုင်းဖြတ်နိုင်ကာ မည်သည့်အရာကမျှ ဖောက်ထွင်းနိုင်ခြင်း မရှိပေ။

"ဘုန်း... ဘုန်း... ဘုန်း"

ရွှေရောင်နဂါးကြီး၏ ပတ်ခွေမှုကြောင့် သွေးလုံးများစွာမှာ အမှုန့်ဖြစ်သွားရသည်။ ရှယန်လုံ၏ ဓားရှည် လှုပ်ရှားမှုနှင့်အတူ အခြားနဂါးတစ်ကောင်မှာလည်း ဟုန်မန့်ထျန်းထံသို့ အရှိန်အဟုန်ဖြင့် ပြေးဝင်သွားလေ၏။

"သွေးအသွင်ပြောင်း အကာအကွယ်"

ဟုန်မန့်ထျန်း၏ ခန္ဓာကိုယ်ကို သွေးရောင်အရှိန်အဝါများက ဝန်းရံသွားပြီး ထူထဲသော အကာအကွယ်တစ်ခုကို ဖြစ်ပေါ်စေကာ ရွှေရောင်နဂါးကို နောက်သို့ ပြန်လည်လွင့်စင်သွားစေသည်။ သူမ၏ သွေးရောင်ကြိမ်လုံးမှာလည်း ဟင်းလင်းပြင်ကို ဖြတ်သန်းကာ ရှယန်လုံထံသို့ တိုးကပ်လာသည်။

"ချလွမ်း... ချလွမ်း... ချလွမ်း"

ရှယန်လုံမှာ သူ၏ ဓားကို ဝှေ့ယမ်း၍ ခုခံလိုက်သည်။ နီနီရဲရဲ နတ်ဘုရားဓားမှာ မီးတောက်လောင်နေသကဲ့သို့ ရှိနေသည်။ တိုက်ခိုက်မှုတိုင်းသည် သတ္တုချင်း ရိုက်ခတ်သံများကို ဖြစ်ပေါ်စေပြီး ကောင်းကင်နှင့် မြေပြင်တစ်ခွင် ဟိန်းထွက်သွားသည်။ သဲဝါပင်လယ်၏ အထက် ကောင်းကင်ယံတွင် တိမ်တိုက်များမှာ လိပ်တက်နေပြီး လေပြင်းများမှာလည်း တဝေါဝေါ တိုက်ခတ်နေတော့သည်။

စူးချန်ခုန်းနှင့် အခြားသူများသည် ကောင်းကင်ယံမှ ကြောက်မက်ဖွယ် မြင်ကွင်းကို မော့ကြည့်နေကြသည်။ ကောင်းကင်မှ သွေးများ မိုးရွာသကဲ့သို့ ကျဆင်းနေပြီး ဓားအရှိန်အဝါများမှာလည်း နဂါးများကဲ့သို့ ရုန်းကန်နေကြသည်။ ၎င်းမှာ သာမန်နတ်ဘုရားမျိုးစေ့အဆင့် သိုင်းဝိဇ္ဇာသူတော်စင်များ မဟုတ်ဘဲ နှစ်ပေါင်းများစွာ သိုင်းဝိဇ္ဇာသူတော်စင်အဖြစ် ကျင့်ကြံလာခဲ့ကြသော အစစ်အမှန် သိုင်းဝိဇ္ဇာသူတော်စင် တိုက်ပွဲပင် ဖြစ်သည်။ တစ်ဖက်မှာ ရှေးဟောင်းမိစ္ဆာဂိုဏ်းမှ အကြီးအကဲဖြစ်ပြီး အခြားတစ်ဖက်မှာမူ နိုင်ငံတစ်ခု၏ အမြင့်ဆုံး အုပ်ချုပ်သူ ဧကရာဇ် ဖြစ်နေသည်။

"ဒီမိစ္ဆာမကြီးက... တကယ်ကို ကြောက်စရာကောင်းတာပဲ။"

ကောင်းကင်ယံတွင် ဓားစွမ်းအင်များဖြင့် အပိုင်းပိုင်း ခုတ်ဖြတ်ခံထားရသော်လည်း ချက်ချင်း ပြန်ပေါက်လာသော သွေးရောင်ပန်းများကို ကြည့်ပြီး ဟုန်ကျန်းရှန့် စိုးရိမ်တကြီး ရေရွတ်လိုက်သည်။ ဟုန်မန့်ထျန်း၏ ကြိမ်လုံးတစ်ချက် ဝှေ့ယမ်းလိုက်ရုံဖြင့် ဟင်းလင်းပြင်ကို ပေါက်ကွဲသွားစေနိုင်ရာ သူ့လို မိစ္ဆာသားရဲခန္ဓာကိုယ် ပိုင်ဆိုင်ထားသူပင်လျှင် အပိုင်းပိုင်း ပြတ်သွားနိုင်လေသည်။