အခန်း ၃၇၄

အခန်း။ ၃၇၄

"ဒီကိစ္စ..."

ချန်တောက်ရှန်းက တစ်စုံတစ်ခုကို ထပ်ပြောချင်နေသေးသည်။

"ရှောင်ရှန်း မင်း စကားအရမ်းများနေပြီ"

မဟူရာအကြီးအကဲများက သူ့ကို ခန်းမဆောင်အပြင်ဘက်သို့ အမြန်ခေါ်ဆောင်သွားကြသည်။ ကျယ်ဝန်းလှသော ခန်းမဆောင်ကြီးထဲတွင် ချန်ကျီရှင်း၊ ဂျီပူ၊ ရွှေရောင်ခြင်္သေ့နှင့် တူသော အဘိုးအိုနှင့် ယခုမှ သတိပြန်လည်လာပြီး ဝိုင်းစက်နေသော မျက်လုံးများဖြင့် ပတ်ဝန်းကျင်ကို စူးစမ်းနေသည့် ကလေးငယ်တို့သာ ကျန်ရစ်ခဲ့သည်။

"ကျွန်တော်က ဂျီပူပါ။ လွန်ခဲ့တဲ့ နှစ်သုံးရာက ရှီမျိုးနွယ်စုက ရှီရှောင်လင်ဆိုတဲ့ စုံတွဲရဲ့ ကယ်တင်ခြင်းကို ခံခဲ့ရသူ ဖြစ်ပြီး၊ ရှီရှောင်လင်ရဲ့ အိမ်တွင်းအလုပ်သမားအဖြစ် တာဝန်ထမ်းဆောင်နေတာပါ"

"သူကတော့ ရှီမျိုးနွယ်စုရဲ့ ပဉ္စမမြောက် သခင်ကြီးပါပဲ"

ကလေးငယ်ကို ပွေ့ချီထားသော အသားညိုညို အသက်လတ်ပိုင်း အမျိုးသား ဂျီပူက ချန်ကျီရှင်းကို ပြုံးလျက် လက်နှစ်ဖက်ယှက်ကာ နှုတ်ဆက်သည်။

"အို ရှီမျိုးနွယ်စုလား မြောက်ပိုင်းဒေသရဲ့ အကြီးမြတ်ဆုံးသော မွန်မြတ်တဲ့မျိုးနွယ်စုလို့ နာမည်ကြီးတဲ့ ရှီမျိုးနွယ်စုကို ပြောတာလား"

ချန်ကျီရှင်း၏ မျက်ဝန်းတို့တွင် အံ့ဩမှု အရိပ်အယောင်များ ပေါ်လာသည်။

အရှေ့ပိုင်းဒေသ၏ တောင်ပိုင်းပြည်နယ်ခြောက်ခုတွင် စီကုံးမျိုးနွယ်စုမှာ အသက်ရှည်ခြင်းဆိုင်ရာ အင်အားအကြီးဆုံး ဖြစ်သကဲ့သို့ မြောက်ပိုင်းဒေသ၏ ပြည်နယ်ခြောက်ခုတွင် ရှီမျိုးနွယ်စုမှာ အင်အားအကြီးဆုံးပင်။

အထူးသဖြင့် ရှီမျိုးနွယ်စုသည် ယုမျိုးနွယ်စုနှင့် မဟာမိတ်ဖွဲ့ပြီး နက်နဲသော နတ်ဘုရား သန့်ရှင်းသောနယ်မြေနှင့် မျိုးဆက်အလိုက် မဟာမိတ် ဖြစ်လာပြီးနောက် မြောက်ပိုင်းတွင် သူတို့၏ အနေအထားမှာ ပိုမိုအရေးပါလာခဲ့သည်။

"ဒါဆို ရှီမျိုးနွယ်စုရဲ့ ပဉ္စမမြောက် သခင်ကြီး ဖြစ်နေတာပေါ့။ ကြာမြင့်စွာကတည်းက လေးစားခဲ့ရပါတယ်ခင်ဗျာ"

ချန်ကျီရှင်းသည် ရွှေရောင်ခြင်္သေ့ကဲ့သို့ အငွေ့အသက်များရှိသည့် အဘိုးအိုထံသို့ အကြည့်ရောက်သွားပြီး ရိုသေစွာ နှုတ်ဆက်လိုက်သည်။

ရှီမျိုးနွယ်စု၏ ပဉ္စမမြောက် သခင်ကြီး ရှီချီကျုံးမှာ တစ်ချိန်က မြောက်ပိုင်းလွင်ပြင်တွင် နိဗ္ဗာနအဆင့်ရှိ ရက်စက်ကြမ်းကြုတ်သော သားရဲများကို လေးနှင့်ပစ်သတ်ပြီး နာမည်ကျော်ကြားခဲ့သူ ဖြစ်သည်။

မြောက်ပိုင်းတွင်မူ မဟာနတ်ဆိုးကြီးဟု နာမည်တွင်သူ ဖြစ်သည်။

ဤနှစ်ဦးသည် မြောက်ပိုင်းမှနေ၍ ဝေးလံလှသော ဇီဝေချန်မိသားစုအထိ ရောက်လာလိမ့်မည်ဟု ချန်ကျီရှင်း မထင်ထားခဲ့ပေ။

သူတို့မှာ အခြားသော လူဆိုးများကဲ့သို့ မဟုတ်ဘဲ အရှေ့ပိုင်းဒေသတွင် အမှန်တကယ် နာမည်ကြီးသော ထူးချွန်သူများ ဖြစ်ကြသည်။

"မျိုးဆက်သစ်လေးချန် အားမနာပါနဲ့။ အရင်က ချန်ကျီရှင်းဆိုတဲ့သူက ထူးခြားတဲ့ပါရမီရှင်တစ်ယောက် ဖြစ်ပြီး ခေတ်အဆက်ဆက်ကို လွှမ်းမိုးနိုင်သူလို့ ကမ္ဘာ့သတင်းစကားတွေမှာ ကြားဖူးပါတယ်။ ကောလာဟလတွေက ချဲ့ကားထားတာလို့ ထင်ခဲ့ပေမဲ့ ဒီနေ့ မျက်မြင်ကိုယ်တွေ့ ကြုံရတော့မှပဲ နာမည်နဲ့လိုက်အောင် ထူးချွန်သူဆိုတာ ယုံကြည်သွားပါပြီ"

ရှီချီကျုံးကလည်း ပြုံးလျက် ရိုသေစွာ ပြန်လည်နှုတ်ဆက်သည်။

အင်အားကြီးသူ အချင်းချင်းအကြားတွင် တစ်ဖက်နှင့်တစ်ဖက် အကဲခတ်ခြင်းမှာ သဘာဝပင်။

သူသည် သူရှေ့တွင် ရှိနေသော လူငယ်လေးမှာ အသက်နှစ်ဆယ်ပင် မပြည့်သေးသော်လည်း မည်မျှနက်ရှိုင်းသည်ကို မခန့်မှန်းနိုင်သော နက်နဲလှသည့် ချောက်ကမ်းပါးကြီးတစ်ခုနှင့် တူနေသည်ကို ခံစားမိသည်။

ထိုသို့ ခံစားမိစေသောသူမှာ အရှေ့ပိုင်းဒေသ တစ်ခုလုံးတွင် ဆယ်ဦးပင် မရှိပေ။

"လူကြီးမင်းတို့နှစ်ဦး ဒီလောက်ဝေးတဲ့နေရာကနေ ဒီကို ရောက်လာတာ ဘာကိစ္စရှိလို့ပါလဲ"

ချန်ကျီရှင်းက သူတို့ကို စူးစမ်းစွာ ကြည့်ပြီး မေးလိုက်သည်။

"ဒီကိစ္စကတော့..."

ရှီချီကျုံးနှင့် ဂျီပူတို့ တစ်ယောက်ကိုတစ်ယောက် ကြည့်လိုက်ကြသည်။

"ဂိုဏ်းချုပ်ကြီးချန် ဒါကို တစ်ချက်လောက် ကြည့်ပေးပါဦး"

ဂျီပူက ခါးသက်သက် ပြုံးကာ သူပွေ့ချီထားသော ကလေးငယ်ကို ချန်ကျီရှင်း၏ ရှေ့တွင် ဖြည်းညင်းစွာ ချပေးလိုက်သည်။

"အို"

ချန်ကျီရှင်းက စူးစိုက်ကြည့်လိုက်သည်။ ထိုခဏမှာပင် ချန်ကျီရှင်း၏ မျက်ဝန်းတို့မှာ လှိုင်းထန်သွားတော့သည်။

[ဧကရာဇ်မင်းတို့၏ ခရမ်းရောင်ကံကြမ္မာ - မွေးရာပါ အသက်ရှည်အရိုးအဆစ်]

[ဧကရာဇ်မင်းတို့၏ ခရမ်းရောင်ကံကြမ္မာ - ကျင့်ကြံဖို့ မွေးဖွားလာသူ၊ ဒုက္ခမျိုးစုံကို ရင်ဆိုင်ဖို့ ရောက်လာသူ]

[ဧကရာဇ်မင်းတို့၏ ခရမ်းရောင်ကံကြမ္မာ - ခေတ်အဆက်ဆက်ကို လွှမ်းမိုးနိုင်သူ]

[ဧကရာဇ်မင်းတို့၏ ခရမ်းရောင်ကံကြမ္မာ - လက်ရှိခေတ်၏ ဒဏ္ဍာရီ]

[ဧကရာဇ်မင်းတို့၏ ခရမ်းရောင်ကံကြမ္မာ - ကိုယ်ပိုင် တာအိုအစေ့၊ ကြီးကျယ်သောခေတ်၏ တစ်ဦးတည်းသောသူ]

[ဧကရာဇ်မင်းတို့၏ ခရမ်းရောင်ကံကြမ္မာ - အသက်ရှည်ခြင်းထက် သာလွန်သူ]

[ဧကရာဇ်မင်းတို့၏ ခရမ်းရောင်ကံကြမ္မာ - ကောင်းကင်ဘုံဧကရာဇ်မင်း၏ ဂုဏ်ဒြပ်နှင့် ပြည့်စုံသူ]

[ဧကရာဇ်မင်းတို့၏ ခရမ်းရောင်ကံကြမ္မာ - ……]

[ဧကရာဇ်မင်းတို့၏ ခရမ်းရောင်ကံကြမ္မာ - ……]

[...]

ခရမ်းရောင် အလင်းတန်းများမှာ ချန်ကျီရှင်း၏ မျက်လုံးကို မှေးမှိန်သွားစေသည်။

သူ၏ စိတ်ဓာတ်ကို အေးဆေးတည်ငြိမ်အောင် ထိန်းချုပ်ထားသော်လည်း သူ၏ မျက်ဝန်းတို့တွင် မယုံနိုင်စရာ အံ့ဩမှုများ ပေါ်ပေါက်လာသည်။

ဂျီပူ ပွေ့ချီထားသည့် ကလေးငယ်အတွက် သက်တမ်းစာအုပ်တွင် ပြသနေသော ကံကြမ္မာတို့၏ အဆင့်နှင့် အရေအတွက်မှာ တစ်ခါမျှ မကြားဖူး၊ မမြင်ဖူးသော အရာများပင်။

လက်ရှိ ချန်ကျီရှင်းကိုယ်တိုင်ကပင် ဧကရာဇ်မင်းတို့၏ ခရမ်းရောင်ကံကြမ္မာဆယ်ခုကို ပိုင်ဆိုင်ထားသော်လည်း ဤကလေးငယ်နှင့် ယှဉ်လျှင် ကံကြမ္မာအဆင့်ချင်း မယှဉ်သာပေ။ သူ၏ သက်တမ်းစာအုပ်ထဲတွင် မည်သို့မျှ ဖော်ပြ၍မရသောဟူသည့် သင်္ကေတများပင် ပေါ်လာသည်ကို ပထမဆုံးအကြိမ်အဖြစ် သူ မြင်တွေ့လိုက်ရသည်။

ဤကလေးငယ်၏ ဘဝအဆင့်အတန်းမှာ သက်တမ်းစာအုပ်ပင်လျှင် အကဲခတ်ရန် မထိုက်တန်သည့် အဆင့်သို့ ရောက်ရှိနေပြီဟု ဆိုလိုနေခြင်းပင်။

ဘယ်လောက်တောင် ကြောက်ဖို့ကောင်းတာလဲ။

"ဂိုဏ်းချုပ်ကြီးချန် ဘာဖြစ်လို့လဲ"

ဂျီပူက ချန်ကျီရှင်းကို အံ့ဩစွာ မေးလိုက်သည်။

"ဘာမှ မဖြစ်ပါဘူး"

ချန်ကျီရှင်းသည် အသက်ကို ပြင်းပြင်းရှူသွင်းလိုက်ပြီး စိတ်ထဲမှ အံ့ဩမှုကို အမြန်ပင် ထိန်းချုပ်ကာ တည်ငြိမ်သွားသည်။

ဤအခိုက်အတန့်တွင် ချန်ကျီရှင်း အသေအချာ သိလိုက်ပြီ ဖြစ်သည်။

သူ ရှာဖွေနေသည့် ကောင်းကင်ဘုံက ရွေးချယ်ထားသော အဓိကဇာတ်ကောင်သုံးဦးထဲမှ တစ်ဦးမှာ ဤကလေးငယ် ဖြစ်နေနိုင်သည်။

ထို့အပြင် ထိုသုံးဦးထဲတွင် အမှန်တကယ် အနိုင်မရှိသူဟု သူ ယုံကြည်ထားသည့် ပုဂ္ဂိုလ်မှာ ဤသူပင်။

သူ ပြင်းပြင်းပြပြ ရှာဖွေနေခဲ့သော ကံကြမ္မာပါသော ကလေးငယ်မှာ မထင်မှတ်ဘဲ သူ၏ ရှေ့မှောက်သို့ ရောက်ရှိလာပြီ ဖြစ်သည်။

"သူ့ရဲ့... အသက်ရှည်အရိုးအဆစ်ကို တစ်ယောက်ယောက်က နှုတ်ယူသွားတာလား"

ချန်ကျီရှင်းသည် ကလေးငယ်၏ ရင်ဘတ်ပေါ်သို့ လက်ကို အသာအယာ တင်လိုက်သည်။ နိဗ္ဗာနအဆင့်ရှိ စွမ်းအားတို့သည် ကလေးငယ်၏ ခန္ဓာကိုယ်ထဲသို့ စီးဝင်သွားပြီး အခြေအနေအားလုံးကို ချက်ချင်းပင် နားလည်သွားသည်။

"ဟုတ်တယ်"

ဂျီပူ၏ မျက်ဝန်းတို့တွင် ဝမ်းနည်းမှု အရိပ်အယောင်များ ပေါ်လာသည်။

"ကလေးငယ်က ဒဏ္ဍာရီလာ မွေးရာပါ အသက်ရှည်အရိုးအဆစ် ပိုင်ရှင်ပါ။ ယုမျိုးနွယ်စုက ရက်စက်တဲ့ မိန်းမကြီးက သူ့သားအတွက်နဲ့..."

ခဏအကြာတွင် ကလေးငယ်၏ ဖြစ်စဉ်ကို ဂျီပူက ပြောပြသည်။

ကလေးငယ်၏ အမည်မှာ ရှီဟွမ်ဖြစ်ပြီး မြောက်ပိုင်းရှိ အသက်ရှည်ခြင်းဆိုင်ရာ ရှီမျိုးနွယ်စုမှ ဖြစ်သည်။

သို့သော် ရှီဟွမ်မှာ အဓိကမျိုးဆက်မှ မဟုတ်ပေ။

သူ့တွင် ရှီလီဟု ခေါ်သော အစ်ကိုဝမ်းကွဲတစ်ဦး ရှိသည်။ ရှီလီမှာ မွေးကတည်းက ထူးခြားသူဖြစ်ပြီး ရှေးဟောင်းပုံစံ မြင့်မြတ်သော မျက်လုံးများ ပိုင်ဆိုင်ထားသူဖြစ်သည်။

ရှီမျိုးနွယ်စုတွင် ရှီလီ၏ မွေးဖွားမှုမှာ အလွန်ပင် ဆူညံသွားစေခဲ့ပြီး သူ့ကို အနာဂတ်၏ ခေါင်းဆောင်အဖြစ် သတ်မှတ်ကာ နက်နဲသော နတ်ဘုရား သန့်ရှင်းသောနယ်မြေက တပည့်အဖြစ် လက်ခံခဲ့သည်။

သူ၏ မိခင်မှာ ယုမျိုးနွယ်စုမှဖြစ်ပြီး နောက်ခံအကြောင်းအရာမှာလည်း အလွန်ပင် ကြီးမားသည်။

ရှီလီမှာ ကောင်းကင်နှင့် မြေကြီး၏ ချစ်ခင်မှုကို အပြည့်အဝ ရရှိထားသူ ဖြစ်သည်။

ရှီဟွမ်မှာမူ မွေးစက အားကောင်းသည်မှလွဲ၍ ထူးခြားမှု မရှိသဖြင့် လူများ၏ အာရုံစိုက်ခြင်းကို မခံခဲ့ရပေ။

အချိန်ကြာလာသည်နှင့်အမျှ တစ်နေ့တွင် ရှီလီက သူ၏ ရှေးဟောင်းပုံစံ မြင့်မြတ်သော မျက်လုံးဖြင့် ရှီဟွမ်၏ ခန္ဓာကိုယ်ထဲတွင် အသက်ရှည်အရိုးအဆစ်ရှိနေသည်ကို မြင်သွားသည်။

ထိုအကြောင်းကို မိခင်ဖြစ်သူ ယုထံ ပြောပြလိုက်ချိန်တွင် ကပ်ဆိုးကြီး စတင်တော့သည်။

ရှီဟွမ်၏ မိဘများ မရှိချိန်ကို အခွင့်ကောင်းယူကာ ယုက ကလေးငယ်ကို မြေအောက်နန်းဆောင်သို့ ခေါ်ဆောင်သွားပြီး တားမြစ်ထားသော နည်းလမ်းဖြင့် အရိုးအဆစ်ကို ခွဲထုတ်ယူကာ သူမ၏သား ရှီလီ၏ ခန္ဓာကိုယ်ထဲသို့ ထည့်သွင်းလိုက်သည်။

အပြစ်မဲ့သော ကလေးငယ် ရှီဟွမ်မှာ အရိုးအဆစ်ကို အခွဲခံနေရစဉ်အတွင်း "အဒေါ်ရယ် နာတယ်" ဟု အော်ဟစ်နေခဲ့သည်။

သို့သော်လည်း သူ၏ စိတ်ထားဖြူစင်လွန်းသဖြင့် အဒေါ်ဖြစ်သူက ဤမျှ ရက်စက်လိမ့်မည်ဟု မထင်မှတ်ခဲ့ပေ။

ကံကောင်းထောက်မစွာဖြင့် ရှီချီကျုံးနှင့် ဂျီပူတို့က တစ်ခုခုမှားယွင်းနေမှန်း သိရှိသွားပြီး မြေအောက်နန်းဆောင်ထဲသို့ ထိုးဖောက်ဝင်ရောက်ကာ ကလေးငယ်ကို ကယ်ထုတ်နိုင်ခဲ့သည်။ နောက်ဆုံးတွင် ယုနှင့် နယ်မြေအဖွဲ့အစည်းများ၏ လိုက်လံသတ်ဖြတ်မှုကြောင့် အသက်ငင်နေသော ကလေးငယ်ကို ပွေ့ချီကာ ရန်ကျိုးပြည်နယ်အထိ ထွက်ပြေးလာခဲ့ကြခြင်းပင်။

"ကျွန်တော့်မြေးက မွေးကတည်းက ထူးခြားတဲ့သူပါ။ အဲဒီ ခိုးယူသွားတဲ့ ရှီလီဆိုတဲ့ကောင်က ကျွန်တော့်မြေးရဲ့ အနာဂတ် အောင်မြင်မှုတွေကို ဘယ်လိုမှ မယှဉ်နိုင်ဘူး။ အဲဒီမိန်းမယုတ်ကို စိတ်နာလိုက်တာ"

"တကယ်ကို ရက်စက်တဲ့ နှလုံးသားနဲ့ ယုတ်မာတဲ့ နည်းလမ်းပဲ"

ရှီချီကျုံးမှာ ကောင်းကင်ကို မော့ကြည့်ကာ ဝမ်းနည်း ဒေါသထွက်စွာ အော်ဟစ်လိုက်သည်။ သူ၏ မြေးဖြစ်သူ ဤမျှ ဆိုးရွားသော အခြေအနေသို့ ရောက်ရှိသွားခြင်းမှာ သူ၏ နှလုံးသားကို ဆုတ်ဖြဲနေသကဲ့သို့ ခံစားရစေပြီး နောင်တတရားတို့ဖြင့် ပြည့်နှက်နေသည်။