အခန်း ၄၁၂
Vol. 21 Ch. 412
အခန်း (၄၁၂) - နတ်ဘုရားမိုးကြိုးကို ငှားရမ်းခြင်း
မိုးကြိုးတံဆိပ်မည်မျှ အစွမ်းထက်ကြောင်း သိထားသဖြင့် ဤကဲ့သို့သော ကျိန်စာမျိုး တစ်ခုကို ဖန်တီးရန် နှစ်ပေါင်းများစွာ အချိန်ယူရမည်မှာ အမှန်ပင်။ ဤမျှ တန်ဖိုးရှိသော အရာမျိုးကို လင်းကျင်းပင်လျှင် အခြေအနေက အလွန်အမင်း မလိုအပ်ပါက အသုံးပြုလိမ့်မည် မဟုတ်ပါချေ။
တစ်နည်းအားဖြင့် ပြောရလျှင် ရှန်းအာမှာ ရန်သူကို အတော်လေး ထိတ်လန့်သွားစေသဖြင့် ၎င်းတို့က မိုးကြိုးတံဆိပ်ကို အသုံးပြုခဲ့ခြင်း ဖြစ်ရမည်။
အကယ်၍ မိုးကြိုးတံဆိပ် ပေါ်ထွက်လာပါက ပစ်မှတ်မှာ လုံးဝ ဥဿုံ ပျက်စီးသွားပေလိမ့်မည်။ အကယ်၍ ပေါ်ထွက်မလာခဲ့လျှင်လည်း ရန်သူမှာ ရက်အနည်းငယ်အကြာတွင် မိုးကြိုးတံဆိပ်ကို ပြန်လည် သိမ်းဆည်းရန် သေချာပေါက် ရောက်လာပေလိမ့်မည်။
၎င်းမှာ လင်းကျင်း၏ ခန့်မှန်းချက်သာ ဖြစ်ပြီး အတည်ပြုရန် သက်သေတော့ မရှိသေးပါ။ သို့သော်လည်း ယခုအချိန်တွင် နတ်ဘုရား မိုးကြိုးကို မည်သို့ တုံ့ပြန်ရမည်ဆိုသည်ကို သူ ဆုံးဖြတ်ချက် ချရတော့မည် ဖြစ်သည်။
အကယ်၍ အခြားသူသာ လင်းကျင်း၏ နေရာတွင် ရှိနေပါက ထိပ်တန်းနိုင်ငံများမှ အဆင့် (၄) သို့မဟုတ် အဆင့် (၅) အကဲဖြတ်မှူးများ ဖြစ်နေလျှင်ပင် နောက်ထပ် ဘာလုပ်ရမည်ကို သိကြလိမ့်မည် မဟုတ်ပါချေ။ ထွက်ပြေးရုံမှတစ်ပါး ရှန်းအာကို ကူညီရန် အခြားနည်းလမ်း ရှိပုံမရပါ။
လူတစ်ယောက် မည်မျှပင် သန်မာပါစေ၊ သဘာဝတရား၏ အလိုဆန္ဒကို ဘယ်လိုလုပ်ပြီး တိုက်ခိုက်နိုင်ပါ့မနည်း။
ရှေးဟောင်း မသေမျိုးများ လောကတွင် ကျင်လည်ကျက်စားခဲ့စဉ်ကမူ ၎င်းတို့ထဲမှ အချို့မှာ ဤအခြေအနေကို မည်သို့ ကိုင်တွယ်ရမည်ကို သိကောင်းသိနိုင်ပေလိမ့်မည်။ သို့သော်လည်း ယခုအခါ မသေမျိုးလမ်းစမှာ ပျက်စီးသွားပြီဖြစ်ရာ နတ်ဘုရား မိုးကြိုး၏ စွမ်းအားကို စိန်ခေါ်ရန် မည်သူက သတ္တိရှိပါဦးမည်နည်း။
လင်းကျင်းကတော့ ထိုသူများနှင့် မတူပါ။
သူ၏ အသိပညာ၊ အတတ်ပညာနှင့် စွမ်းဆောင်ရည်များကိုသာ အခြေခံလိုက်လျှင် သူသည် ကျောက်စိမ်းနဂါး၏ အမြင့်မြတ်ဆုံး အကဲဖြတ်မှူးဟူသော ဘွဲ့နှင့် ထိုက်တန်လှပေသည်။ ပြတိုက်မပါလျှင်ပင် သူသည် အနည်းဆုံး အဆင့် (၄) အကဲဖြတ်မှူးများနှင့် ရင်ပေါင်တန်းနိုင်သူ ဖြစ်၏။ သို့သော်လည်း ၎င်းမှာ မိုးကြိုးကို ရင်ဆိုင်ရန်အတွက် လုံလောက်မှု မရှိသေးပါချေ။
သူ့အတွက် အခြေအနေကို အသာစီး ရစေခဲ့သည်မှာ 'သားရဲပြတိုက်' ပင် ဖြစ်သည်။
ဤပြတိုက်၏ အကောင်းဆုံးအချက်မှာ လင်းကျင်း အလွန်အမင်း ခက်ခဲသော အခြေအနေနှင့် ကြုံတွေ့ရတိုင်း ၎င်းက ထိရောက်သော ဖြေရှင်းနည်းများကို ပံ့ပိုးပေးခြင်းပင် ဖြစ်၏။
ဥပမာအားဖြင့် ယခုအချိန်တွင် လင်းကျင်းအား နတ်ဘုရား မိုးကြိုးကို ကိုင်တွယ်ရန် ရွေးချယ်စရာ နှစ်ခု ပေးထားသည်။
ပထမတစ်ခုမှာ ၎င်းကို ဖျက်ဆီးပစ်ရန်ဖြစ်ပြီး ဒုတိယတစ်ခုမှာ ၎င်း၏ စွမ်းအားကို ငှားရမ်းရန် ဖြစ်သည်။
ဖျက်ဆီးပစ်ခြင်းမှာ ရိုးရှင်းသော သဘောတရားပင် ဖြစ်၏။ သူသည် မိုးကြိုးကို ခုခံကာကွယ်ရန် နည်းစနစ်များကို အသုံးပြုပြီး ရှန်းအာ မသေဆုံးစေရန် ၎င်း၏ သက်ရောက်မှုကို လျှော့ချပစ်ရမည် ဖြစ်သည်။
အခြားနည်းလမ်းမှာမူ ပို၍ ထူးကဲလှပေသည်။
၎င်းမှာ မိုးကြိုး၏ စွမ်းအားကို အသုံးချကာ ၎င်းကို ပြန်လည် တိုက်ခိုက်စေသည့် နည်းစနစ် ဖြစ်၏။ နတ်ဘုရား မိုးကြိုး၏ စွမ်းအားကို ငှားရမ်းခြင်းဖြင့် လင်းကျင်းသည် ရှန်းအာ၏ ကျင့်ကြံမှု အဆင့်နှင့် စွမ်းအားကို အမှန်တကယ် ပိုမို ခိုင်မာလာစေနိုင်မည် ဖြစ်သည်။
သူသည် စက္ကန့်ပိုင်းအတွင်း ဆုံးဖြတ်ချက် ချလိုက်၏။
သူ မိုးကြိုး၏ စွမ်းအားကို ငှားရမ်းမည်။
စွန့်စားရမှုအပိုင်းတွင် နည်းလမ်းနှစ်ခုစလုံးမှာ ကျရှုံးနိုင်ခြေ အတူတူပင် ဖြစ်၏။ သို့သော်လည်း နည်းလမ်းတစ်ခုမှာ မည်သည့် အကျိုးကျေးဇူးမျှ မရှိဘဲ အခြားနည်းလမ်းမှာမူ အကယ်၍ အောင်မြင်ခဲ့ပါက ရှန်းအာအား ရုပ်ပိုင်းဆိုင်ရာ အသစ်တစ်ဖန် မွေးဖွားခြင်းကို ရရှိစေနိုင်မည် ဖြစ်သည်။
ဤကဲ့သို့သော အခြေအနေမျိုးတွင် တွေးတောနေရန် အကြောင်းမရှိပါချေ။
မြေခွေးလေး၏ ခေါင်းကို ပွတ်သပ်ရင်း လင်းကျင်းက ဆိုလိုက်သည်။
"ရှန်းအာ... မင်းရဲ့ ခန္ဓာကိုယ်ထဲမှာ မိုးကြိုးတံဆိပ် အစိုက်ခံထားရတယ်၊ အခု အဲဒါကို ပြန်ဖြုတ်ဖို့က အရမ်းနောက်ကျသွားပြီ... ဒါပေမဲ့ ဆရာ့ရဲ့ နည်းလမ်းကတော့ နတ်ဘုရား မိုးကြိုးရဲ့ စွမ်းအားကို ငှားပြီး မင်းကို ရုပ်ပိုင်းဆိုင်ရာ အသစ်တစ်ဖန် မွေးဖွားနိုင်အောင် ကူညီပေးမယ်... အဲဒါက မင်းရဲ့ ဓမ္မခန္ဓာကို ဖြစ်တည်စေဖို့တောင် ကူညီပေးနိုင်လိမ့်မယ်၊ ဒါပေမဲ့ အတော်လေးတော့ နာကျင်လိမ့်မယ်နော်၊ ဒါကြောင့် ခဏလောက်တော့ အောင့်ခံထားပါ"
မြေခွေးလေး၏ မျက်လုံးများမှာ တောက်ပသွားပြီး သူမက ခေါင်းညိတ်ပြလိုက်၏။
ထို့ကြောင့် လင်းကျင်းသည် ပြင်ဆင်မှုများကို စတင်တော့သည်။
"ရှောင်ဟော့... ရွှေဝါလေး... မင်းတို့ နှစ်ယောက်စလုံးက ကြံ့ခိုင်တဲ့ ခန္ဓာကိုယ်တွေ ရှိကြတယ်၊ ဒါကြောင့် ခဏနေရင် ရှန်းအာအတွက် နတ်ဘုရား မိုးကြိုးရဲ့ စွမ်းအားအချို့ကို ကူပြီး တောင့်ခံပေးကြ... ဆရာကတော့ မန္တန်တွေသုံးပြီး မိုးကြိုးကို ခွဲပစ်ဖို့ ကြိုးစားမယ်"
လင်းကျင်းက ညွှန်ကြားလိုက်သည်။
အမှန်တော့ လင်းကျင်းကိုယ်တိုင်လည်း နတ်ဘုရား မိုးကြိုး မည်မျှ ပြင်းထန်မည်ကို မသိပါချေ။ ဘေးကင်းစေရန်အတွက် ဝန်ထုတ်ဝန်ပိုးကို ခွဲဝေယူလိုက်ခြင်းမှာ အကောင်းဆုံးဖြစ်ပြီး လင်းကျင်းကလည်း ၎င်း၏ မူလစွမ်းအားကို လျှော့ချရန် အစွမ်းကုန် ကြိုးစားမည် ဖြစ်သည်။
ပြတိုက်၏ ဖြေရှင်းနည်း ရှိသော်လည်း လက်တွေ့ လုပ်ဆောင်သည့်အခါတွင် ခန့်မှန်းမရသော အန္တရာယ်များ ရှိနေနိုင်သည် မဟုတ်ပါလား။ ရှန်းအာ၏ အသက်မှာ စိုးရိမ်နေရသဖြင့် လင်းကျင်းအနေဖြင့် အမှားအယွင်းဟူသည်မှာ အနည်းဆုံး ဖြစ်နေရန် သေချာအောင် လုပ်ရပေမည်။
ရှောင်ဟော့မှာ လင်းကျင်းနှင့် စိတ်ချင်း ဆက်သွယ်ထားသဖြင့် လင်းကျင်း ဘာလုပ်ချင်သည်ကို သေချာပေါက် သိထားပေသည်။ တစ်ဖက်တွင်မူ ရွှေဝါလေးမှာ ကြောင်တောင်တောင် ဖြစ်နေသော်လည်း လင်းကျင်းကတော့ စိတ်မပူပါချေ။ အချိန်တန်လျှင် ရွှေဝါလေးကို သူ၏ မူလအရွယ်အစားသို့ ပြန်ပြောင်းစေကာ မိုးကြိုးကို တိုက်ရိုက် ရင်ဆိုင်ခိုင်းလိုက်ရုံသာ ရှိသည်။
ဤနေရာတွင် လင်းကျင်းမှာ ရွှေဝါလေးအတွက် လုံးဝ စိုးရိမ်ပူပန်ခြင်း မရှိပါပေ။ သူ၏ ဘေးပတ်ပတ်လည်ရှိ ရှားပါး သတ္တဝါများစွာထဲတွင် ရှန်းအာနှင့် ရှောင်ဟော့တို့ ပါဝင်လျှင်ပင် မွေးရာပါ ပါရမီအပိုင်း၌ မည်သူမျှ ရွှေဝါလေးကို မယှဉ်နိုင်ပါချေ။
၎င်း၏ ရွှေကျီးကန်းသွေးမျိုးဆက်သာ နိုးထလာပါက စစ်မှန်သော နဂါးတစ်ကောင်ပင်လျှင် ဤကြီးမြတ်သော ငှက်၏ ရှေ့မှောက်တွင် ဒူးထောက်ရပေလိမ့်မည်။
လင်းကျင်းသည် လက်ကို မြှောက်လိုက်ကာ ရှန်းအာ၊ ရှောင်ဟော့နှင့် ရွှေဝါလေးတို့၏ ဦးခေါင်းပေါ်သို့ အပ်တစ်ချောင်းစီ ပစ်လွှတ်လိုက်သည်။ သူသည် ဘေးကင်းစေရန်အတွက် မိမိ၏ ဦးခေါင်းပေါ်သို့လည်း တစ်ချောင်း စိုက်လိုက်၏။
ထိုစဉ်မှာပင် အပြင်ဘက်၌ လျှပ်စီးများ လက်သွားခဲ့သည်။
၎င်းသည် ဂူအတွင်းကို နေ့ခင်းဘက်ကဲ့သို့ ချက်ချင်းပင် လင်းထိန်သွားစေ၏။ လင်းကျင်းသည် လျင်မြန်စွာပင် မန္တန်တစ်ခုကို ရွတ်ဆိုလိုက်တော့သည်။
ရှောင်ဟော့မှာ ကြီးမားသော ဝံပုလွေကြီးတစ်ကောင်အဖြစ် ပြောင်းလဲသွားသော်လည်း ရွှေဝါလေးကတော့ ဇဝေဇဝါ ဖြစ်နေဆဲပင်။ သို့သော်လည်း လင်းကျင်းမှာ သူ့ကို ချော့မော့နေရန် အချိန်မရှိပါချေ။
သူသည် ရွှေဝါလေး၏ 'စွမ်းရည်' အပေါ် အပြည့်အဝ ယုံကြည်ထားပြီးသား ဖြစ်သည်။
နတ်ဘုရား မိုးကြိုးက သူ့ကို တိုက်ရိုက် ထိမှန်လျှင်ပင် သူ ဘာမှ ဖြစ်လိမ့်မည် မဟုတ်ပါချေ။
စကားလုံးများထက်ပင် ပို၍ မြန်ဆန်စွာဖြင့် လင်းကျင်းက မိုးကြိုးကို ဆွဲဆောင်လိုက်သည်နှင့် ၎င်းမှာ လေးပိုင်းကွဲသွားကာ လင်းကျင်း၊ ရှန်းအာ၊ ရှောင်ဟော့နှင့် ရွှေဝါလေးတို့ကို ထိမှန်သွားတော့သည်။
လင်းကျင်းအတွက် ဤမျှ ပြင်းထန်သော နာကျင်မှုကို ပထမဆုံးအကြိမ် ခံစားရခြင်း ဖြစ်သည်ဟု ဆိုပါက ပုံကြီးချဲ့ခြင်း မဟုတ်ပါချေ။
စူးရှသော နာကျင်မှုအပြင် သူ၏ ခန္ဓာကိုယ်ကို အစိတ်စိတ်အမွှာမွှာ ဆွဲဖြဲပစ်နေသည့် မမြင်ရသော စွမ်းအားတစ်ခုနှင့် နောက်ဆက်တွဲ ရောက်ရှိလာသော ပူလောင်သည့် ခံစားချက်ကို သူ ခံစားလိုက်ရပြီး ၎င်းမှာ သူ၏ အသက်ကိုပင် ခြိမ်းခြောက်နေသကဲ့သို့ ရှိသည်။ ကံကောင်းထောက်မစွာဖြင့် လင်းကျင်း၏ ခန္ဓာကိုယ်မှာ ထိုဒဏ်ကို ခံနိုင်ရည် ရှိနေခဲ့၏။ မိုးကြိုး ပစ်ချလိုက်သည့် ခဏမှာပင် သူသည် ဧည့်ခန်းမ၏ တံခါးကို အချိန်မီ ဖွင့်နိုင်ခဲ့သဖြင့် နာကျင်စရာကောင်းသော အတွေ့အကြုံ ဖြစ်သော်လည်း ၎င်းက သူ့ကို မသေစေနိုင်ပါချေ။
အမှန်တော့ မိုးကြိုး၏ အဓိက အစိတ်အပိုင်းမှာ ရှန်းအာထံသို့သာ ဦးတည်သွားကြောင်း သူ သိလိုက်သည်။ ရေလှောင်ကန်အကြေးခွံ၏ အကာအကွယ်ကြောင့် ရှန်းအာမှာ မသေနိုင်သလို မိုးကြိုးမှာလည်း သူတို့ကြားတွင် ခွဲဝေသွားခဲ့ပြီ မဟုတ်ပါလား။
နတ်ဘုရား မိုးကြိုးကို အောင့်အည်း သည်းခံရင်း လင်းကျင်းသည် အံကြိတ်ကာ နောက်ထပ် မန္တန်တစ်ခုကို ရွတ်ဆိုလိုက်ပြီး ရှန်းအာ၏ ခန္ဓာကိုယ်အတွင်း ကျန်ရှိနေသော အပ်ကို အသုံးပြုကာ သူမ၏ သွေးကြောများကို ထိန်းညှိပေးလိုက်သည်။ သူ အသုံးပြုလိုက်သည်မှာ ပြတိုက်မှ ရရှိသော လျှို့ဝှက် အတတ်ပညာပင် ဖြစ်၏။
သူတို့၏ ဘေးတွင် ရပ်နေသော ရှောင်ဟော့မှာ သူ၏ ဓမ္မခန္ဓာနှင့် ကြီးမားလှသော ခန္ဓာကိုယ်ကို အသုံးပြုကာ မိုးကြိုးဒဏ်ကို ခံယူနေခဲ့သည်။ ကြည့်ရသည်မှာ သူသည် ၎င်းကို ကျော်ဖြတ်နိုင်ပုံရ၏။ အခြားတစ်ဖက်တွင်မူ ရွှေဝါလေးမှာ မိုးကြိုးဒဏ်ကြောင့် လန့်ဖျပ်သွားခဲ့ရသည်။
ထိုကြက်ဖကြီးမှာ ယခင်က ဤကဲ့သို့သော အရာမျိုးကို တစ်ခါမှ မကြုံဖူးသဖြင့် သူ၏ ပထမဆုံး တုံ့ပြန်မှုမှာ အတောင်ပံများကို ခတ်ကာ ထွက်ပြေးရန်ပင် ဖြစ်၏။ သူသည် အက်ကွဲကြောင်းမှတစ်ဆင့် အပြင်သို့ ပျံထွက်သွားနိုင်ခဲ့သော်လည်း လင်းကျင်းက သူ၏ ခေါင်းပေါ်တွင် အပ်တစ်ချောင်း စိုက်ထားခဲ့သည်မှာ ကံဆိုးမှုပင်။ သူသည် ရဲရဲဝံ့ဝံ့ ထွက်ပြေးပြီး မကြာမီမှာပင် နောက်ထပ် မိုးကြိုးတစ်ချက်ကြောင့် ဂူအတွင်းသို့ ပြန်လည် ကန်ထုတ်ခြင်း ခံလိုက်ရတော့သည်။
ရွှေဝါလေး၏ အမွေးအချို့မှာ လောင်ကျွမ်းသွားခဲ့ပြီး မိုးကြိုးပစ်ခံရသဖြင့် ဟိုတစ်ကွက် ဒီတစ်ကွက်မှာ အမွေးများ ပြောင်သလင်းခါသွားခဲ့၏။
သူ ပြန်အထတွင်ပင် နောက်ထပ် မိုးကြိုးတစ်ချက် ရောက်လာပြန်သည်။
နောက်ဆုံးတွင် ရွှေဝါလေးမှာ ထောင့်တစ်ခုအတွင်းသို့ အတင်းအကျပ် တွန်းပို့ခြင်း ခံလိုက်ရတော့၏။
ပြင်းထန်လှသော ရှင်သန်လိုစိတ်နှင့် ဒေါသတို့ကြောင့် သူသည် ရုတ်တရက် ပေါက်ကွဲထွက်သွားကာ ခန္ဓာကိုယ်မှာ အဆပေါင်းများစွာ ကြီးမားလာပြီး တစ်ကိုယ်လုံးတွင်လည်း မီးတောက်များ လောင်ကျွမ်းလာခဲ့သည်။ သည်းခံတတ်သော ရှောင်ဟော့နှင့် မတူဘဲ ရွှေဝါလေးမှာ ဒေါသထွက်လာလျှင်မူ မည်သည့်အရာကိုမျှ ကြောက်ရွံ့ခြင်း မရှိပါချေ။
မိုးကြိုးကို အံတုရင်း ကြီးမားလှသော ရွှေဝါလေးမှာ သူ၏ အတောင်ပံများကို ခတ်ကာ မိုးခြိမ်းနေသော တိမ်တိုက်များဆီသို့ အဟုန်ဖြင့် ပျံတက်သွားတော့သည်။ သူသည် တိမ်တိုက်များကို တိုက်ရိုက် ရင်ဆိုင်တော့မည့်အလား ပျံတက်ရင်း အဆက်မပြတ် အော်မြည်နေခဲ့၏။
ရွှေဝါလေးမှာ ယခုအခါ မီးတောက်နေသော အမွေးအတောင်များနှင့် မိုးခြိမ်းသံကိုပင် လွှမ်းမိုးသွားသော တွန်ကျူးသံတို့ကြောင့် ရွှေကျီးကန်းတစ်ကောင်နှင့် အတော်လေး ဆင်တူနေတော့သည်။ ၎င်းမှာ အလွန်ပင် ကျယ်လောင်လှသဖြင့် မြေပြင်ကြီးပင် တုန်ခါသွားခဲ့ရ၏။
ပေရာဂဏန်းမျှ ဝေးကွာသော နေရာတွင် ပြိုပျက်နေသော အဆောက်အဦးအောက်၌ ပုန်းအောင်းနေသော ချန်ရုယွမ်မှာ ၎င်းကို ကြည့်ရင်း ပါးစပ်အဟောင်းသား ဖြစ်နေတော့သည်။ သူသည် အလွန်အမင်း ထိတ်လန့်သွားသဖြင့် စကားတစ်လုံးမျှပင် မပြောနိုင်တော့ပါချေ။
မြေအောက်ဂူအတွင်း၌ ကျောက်တုံးမျက်နှာကြက်ပေါ်ရှိ အက်ကွဲကြောင်းမှာ မိုးကြိုးများ ပစ်ချမှုနှင့် ရွှေဝါလေး၏ အဟုန်ဖြင့် တိုးဝင်မှုကြောင့် ပို၍ ကျယ်လာခဲ့သည်။ သို့သော်လည်း ရေလှောင်ကန်အကြေးခွံကြောင့် လင်းကျင်းနှင့် သူ၏ အပေါင်းအပါများရှိရာ ပတ်ဝန်းကျင်မှာမူ ခြောက်သွေ့နေဆဲပင်။ မြေပြင်ပေါ်ရှိ စီးဆင်းနေသော ရေများမှာလည်း သူတို့ကို ရှောင်ကွင်း၍သာ စီးဆင်းသွားကြ၏။
လင်းကျင်းမှာ မိုးကြိုးဒဏ်ကို ခံနိုင်ရည် အနည်းဆုံး ဖြစ်သည်။ သူသည် သားရဲတစ်ကောင် မဟုတ်သဖြင့် ဤမျှကို တောင့်ခံထားရန်မှာပင် သူ၏အတွက် အတော်လေး ခက်ခဲလှပေပြီ။ သို့သော်လည်း သူသည် မန္တန်များကို ရွတ်ဆိုရန်နှင့် ရှန်းအာ၏ ခန္ဓာကိုယ်အတွင်းရှိ အပ်ကို ထိန်းချုပ်ရန်အတွက် မိမိကိုယ်ကိုယ် အားတင်းထားရဆဲပင်။
ပြတိုက်မှ ပေးထားသော လျှို့ဝှက် အတတ်ပညာမှာ အလွန်ပင် နက်ရှိုင်းပြီး လျှို့ဝှက်ဆန်းကြယ်လှသဖြင့် လင်းကျင်းကိုယ်တိုင်ပင် ၎င်း၏ အလုပ်လုပ်ပုံ အများစုကို နားမလည်ပါချေ။ ဥပမာအားဖြင့် သူသည် သွေးကြောစမ်းသပ်ခြင်း နည်းစနစ်ကို အသုံးပြုကာ နတ်ဘုရား မိုးကြိုးကို ဆွဲဆောင်ရမည်ဖြစ်ပြီး အချို့သော အစီအစဉ်အတိုင်း အပ်စိုက်မှတ်များကို ထိုးဖောက်ရမည် ဖြစ်သည်။ ၎င်းကို လုပ်ဆောင်ပြီးသောအခါ သူသည် နတ်ဘုရား မိုးကြိုးကို ရှန်းအာ၏ ခန္ဓာကိုယ်အတွင်းသို့ တဖြည်းဖြည်းချင်း သွတ်သွင်းပေးလိုက်တော့သည်။