အခန်း ၅၈၄

အခန်း ၅၈၄ နီချင်းယု

ကြိုးကြာတိမ်တိုက် မြို့တော်

လမ်းတွင် လူသူများဖြင့် စည်ကားလှုပ်ရှားနေသည်။

ကုန်သည်များ၏ အော်ဟစ်ရောင်းချသံများက အဆုံးမရှိ ထွက်ပေါ်နေ၍

ကျင့်ကြံသူများသည်လည်း တစ်ယောက်ပြီးတစ်ယောက် မြို့တွင်း၌ သွားလာလှုပ်ရှားနေသည်။

ဆိုင်အများအပြား၏ ဆိုင်းဘုတ်များထက်တွင် မုန်တိုင်းတိမ်တိုက်များကြား၌ ပျံသန်းနေသည့် ငွေရောင်ကြိုးကြာတစ်ကောင်၏ ပုံရိပ်ကို တွေ့ရပြီး ထိုအရာက နီမျိုးနွယ်စုအမှတ်တံဆိပ် သင်္ကေတပင် ဖြစ်သည်။

နီဖန်းကျိုး၏ ဥက္ကာပျံတစ်ခုလို လျင်မြန်စွာ တဟုန်ထိုး တိုးတက်လာမှုကြောင့် နီမျိုးနွယ်စု၏ အဆင့်အတန်းသည်လည်း သူနှင့်အတူ ကောင်းကင်သို့ ထိုးတက်သွားခဲ့သည်။

ထို့အပြင် နီဖန်းကျိုး တစ်ဦးတည်းသာမကဘဲ... နီမျိုးနွယ်စုဝင် အများအပြားသည်လည်း အကြောင်းရင်းကို မသိရဘဲ ယခင်ကထက် များစွာ ပိုမိုသန်မာလာခဲ့ကြသည်။

ထို့ကြောင့် တစ်ချိန်က ဆုတ်ယုတ်ပျက်စီးလုနီးပါး ဖြစ်ခဲ့ရသော မျိုးနွယ်စုသည် ပြန်လည်နိုးထလာပြီး ကြိုးကြာတိမ်မြို့တော်၏ နံပါတ်တစ် အင်အားစုအဖြစ် နေရာယူနိုင်ခဲ့ချေပြီ။

ယခုအခါ ကြိုးကြာတိမ်တိုက်မြို့တော်အတွင်း မည်သူမျှ သူတို့ကို ရန်စရဲခြင်း မရှိကြတော့ပေ။

ဤအချိန်တွင် လူငယ်တစ်စုသည် မြို့လယ်လမ်းမကြီးထက်တွင် ဂုဏ်ယူဝင့်ကြွားစွာ လျှောက်လှမ်းလာကြသည်။

ထိုလူငယ်များ၏ အလယ်တွင် ငွေရောင်ဒီဇိုင်းများဖြင့် ပန်းထိုးထားသည့် လှပဆန်းပြားသော နီပြာရောင် ဝတ်စုံကို ဝတ်ဆင်ထားသည့် မိန်းကလေးငယ်တစ်ဦး ရှိနေ၏။

သူမ၏ ရုပ်ရည်က လှပကျော့ရှင်းပြီး သွက်လက်ချက်ချာသည့် ပုံစံ ရှိသည်။

သူမက လမ်းလျှောက်နေစဉ်အတွင်း မေးစေ့ကို အနည်းငယ် မော့ထားတတ်

သူမ ဖြတ်သန်းသွားရာ လမ်းတစ်လျှောက်ရှိ လူတိုင်းက ချက်ချင်းပင် ရိုသေလေးစားစွာ နှုတ်ဆက်ကြသည်။

"သခင်မလေး နီ..."

"သခင်မလေး နီ... ဒီနေ့ အပြင်ထွက်လာတာလားခင်ဗျာ"

"သခင်မလေး နီက ဒီနေ့ ပိုပြီးတော့တောင် လှပနေပါလား"

မြှောက်ပင့်သွေးဆောင်သံများ ပြည့်နှက်နေသည့် အသံများက ဆက်တိုက် ထွက်ပေါ်နေ၏။

ထိုမိန်းကလေးကမူ ခေါင်းကို အသာအယာသာ ညိတ်ပြလိုက်ပြီး ယခုကဲ့သို့ ဆက်ဆံခံရမှုကို ကျင့်သားရနေပြီ ဖြစ်ကြောင်း ထင်ရှားသည်။

သူမကတော့ နီဖန်းကျိုး၏ ညီမအရင်း ဖြစ်သူ နီချင်းယုပင် ဖြစ်သည်။

လက်ရှိတွင် ကြိုးကြာတိမ် မြို့တော်အတွင်း မည်သူမျှ မထိရဲ မခိုက်ရဲသည့် အရှိန်အဝါအရှိဆုံး လူငယ်မျိုးဆက်များထဲမှ တစ်ဦးလည်း ဖြစ်၏။

မည်သို့ပင်ဆိုစေ နီဖန်းကျိုး၏ ညီမအရင်းကို မည်သူက ရန်စရဲမည်နည်း။

လက်ရှိ နီဖန်းကျိုးသည် အတိတ်က အသုံးမကျသော လူငယ်လေး မဟုတ်တော့ပေ။

သူသည် ယခုအခါ နီမျိုးနွယ်စု၏ ဂုဏ်ဆောင်၊ ကြိုးကြာတိမ်မြို့တော်၏ ဂုဏ်ဆောင် ဖြစ်နေရုံသာမက တစ်အင်ပါယာလုံးတွင် ကျော်ကြားလှသည့် ကောင်းကင်ရွေးချယ်ခံရသူတစ်ဦး ဖြစ်နေပြီ ဖြစ်သည်။

အင်အားကြီးမားလှသည့် မျိုးနွယ်စုကြီးများပင်လျှင် သူ့ကြောင့် နီမျိုးနွယ်စုကို သတိကြီးစွာဖြင့် ဆက်ဆံနေကြရသည်။

ထို့ကြောင့် နီချင်းယု၏ အဆင့်အတန်းသည်လည်း မိုးပေါ်သို့ လိုက်ပါ မြင့်တက်သွားခြင်းက သဘာဝပင်။

သူမ၏ ဘေးပတ်ပတ်လည်တွင် ဝန်းရံထားသည့် လူငယ်များအားလုံး၏ မျက်နှာထက်တွင် မြှောက်ပင့်လိုသည့် အပြုံးများ ရှိနေကြသည်။

အချို့က ဒေသခံ မျိုးနွယ်စုများမှ သားသမီးများ ဖြစ်ကြပြီး အချို့ကမူ နီမျိုးနွယ်စု၏ မျက်နှာသာပေးမှုကို ရရှိရန် မျှော်လင့်နေကြသည့် ပါရမီရှင် တပည့်များ ဖြစ်ကြ၏။

သူမ၏ ဘေးနားရှိ မိန်းကလေးတစ်ဦးက ချိုသာစွာ ပြုံးလိုက်ရင်း

"ချင်းယု... မင်းရဲ့ အစ်ကိုက မကြာသေးခင်ကတင် သတ္တမမြောက် မင်းသားကိုတောင် နောက်ဆုတ်သွားအောင် ဖိအားပေးနိုင်ခဲ့

တယ်လို့ ငါကြားတယ်... ဟုတ်လား"

နီချင်းယု၏ မျက်ဝန်းများက ချက်ချင်းပင် ဂုဏ်ယူဝင့်ကြွားမှုများဖြင့် တောက်ပသွားသည်

"ဟွန့်... ဒါပေါ့”

သူမ၏ မျက်နှာငယ်လေးက ပို၍ပင် မော့

တက်သွား၏။

"ငါ့အစ်ကိုက ပါရမီရှင်တစ်ယောက်ပဲလေ... အဲဒီ မင်းသားတွေဆိုတာ ငါ့အစ်ကို့ရှေ့မှာ ဘာမှမဟုတ်ဘူး"

သူမ၏ လေသံထဲတွင် အစ်ကိုဖြစ်သူအပေါ် အားကျလေးစားမှုနှင့် ဂုဏ်ယူမှုများ အပြည့် ရှိနေသည်။

ဘေးပတ်ဝန်းကျင်က လူငယ်များကလည်း လျင်မြန်စွာပင် ထောက်ခံကြ၏။

"အမှန်ပဲ”

"သခင်လေး နီက လူငယ်မျိုးဆက်တွေထဲမှာ အနှိုင်းမဲ့ပဲ”

"အင်ပါယာ မင်းသားတွေတောင် အခုဆို သူ့ကို လျှော့တွက်ဖို့ မဝံ့ရဲကြတော့ဘူး"

အစ်ကိုဖြစ်သူအပေါ် ချီးမွမ်းခန်းဖွင့်နေကြသည်ကို ကြားရသောအခါ နီချင်းယု ပို၍ပင် ပျော်ရွှင်သွားသည်။

ငယ်စဉ်ကတည်းက သူမသည် အစ်ကိုဖြစ်သူက ထူးခြားထက်မြက်သူတစ်ဦး ဖြစ်သည်ဟု အမြဲ ယုံကြည်ခဲ့သည်။

လူတိုင်းက သူ့ကို လှောင်ပြောင် သရော်ပြီး အထင်သေးနေကြသည့် နှစ်များအတွင်း၌ပင် သူမသည် အစ်ကိုဖြစ်သူကို တစ်ခါမျှ သံသယမဝင်ခဲ့ဖူးချေ။

ယခုအခါတွင်မူ... တစ်ချိန်က နီမျိုးနွယ်စုကို နှာခေါင်းရှုံ့ခဲ့ကြသူများသည်ပင် ခေါင်းကို ရိုသေစွာ ညွှတ်ထားကြရချေပြီ။

ဤအချက်ကို တွေးမိသောအခါ နီချင်းယု အလွန် စိတ်ကျေနပ်မှုကို ခံစားလိုက်ရသည်။

အထူးသဖြင့်... တစ်ချိန်က ပိုင်မျိုးနွယ်စုက သူမ၏ အစ်ကိုဖြစ်သူကို မည်သို့ အရှက်ခွဲခဲ့သည်ကို ပြန်လည် အမှတ်ရမိသည့် အခါတွင် ဖြစ်သည်။

သူမ၏ မျက်ဝန်းထဲတွင် ဒေါသအရိပ်အယောင်အချို့ ဖြတ်ပြေးသွား၏။

(ဟွန့်... ပိုင်ရွှယ်ချင်း...)

အခုအချိန်အထိ သူမသည် ထိုနာမည်ကို အသည်းထဲကနေ နာကျည်းနေဆဲ ဖြစ်သည်။

ထိုစဉ်က စေ့စပ်ပွဲကို ဖျက်သိမ်းပြီးနောက် ပိုင်မျိုးနွယ်စုကြောင့် သူမ၏ အစ်ကိုသည် ရေတွက်မရနိုင်သော လူအများ၏ လှောင်ပြောင်စရာ ဟာသတစ်ခု ဖြစ်ခဲ့ရသည်။

အကယ်၍ သူမ၏ အစ်ကိုတွင် ပြတ်သားခိုင်မာသော စိတ်ဆန္ဒ မရှိခဲ့ပါက ဤဒဏ်ရာမှ မည်သည့်အခါမျှ ပြန်လည် နာလန်ထူနိုင်ခဲ့မည် မဟုတ်ပေ။

ကံကောင်းထောက်မစွာဖြင့် သူမ၏ အစ်ကိုသည် ထိုနောက်ပိုင်းတွင် တဟုန်ထိုး တိုးတက်လာခဲ့သည်။

ယခုအခါတွင်မူ ပိုင်မျိုးနွယ်စုသည်ပင် အတိတ်ကလိုမျိုး သူ့ကို အလွယ်တကူ အထင်သေးနိုင်တော့မည် မဟုတ်ပေ။

နီချင်းယု ဤသို့ တွေးတောနေဆဲမှာပင်

မြို့တံခါးအနီးတွင် ရုတ်တရက် ရုန်းရင်းဆန်ခတ် အော်ဟစ်သံများ ထွက်ပေါ်လာခဲ့သည်။

"ဟင်...?"

လူအများအပြားက ဗီဇအရ ခေါင်းကို လှည့်ကြည့်လိုက်ကြ၏။

ဆန်းပြားလှပပြီး ဇိမ်ခံ ပျံသန်းနိုင်သော သင်္ဘောတစ်စီးက ကောင်းကင်ထက်မှ ဖြည်းညှင်းစွာ ဆင်းသက်လာနေသည်။

သင်္ဘောထက်ရှိ အမှတ်အသား သင်္ကေတကို လူတိုင်း မြင်လိုက်ရသည့် ခဏ၌... လမ်းမတစ်ခုလုံး ချက်ချင်းပင် တိတ်ဆိတ်သွားခဲ့ရသည်။

ထို့နောက် အံ့ဩတုန်လှုပ်မှုများက နေရာအနှံ့ ပေါက်ကွဲထွက်ပေါ်လာ၏။

"အဲ... အဲဒီ သင်္ကေတက...”

"ပိုင်မျိုးနွယ်စု?”

"သူတို့ ဒီကို ဘာလာလုပ်တာလဲ..."

...

ကြိုးကြာတိမ် မြို့တော်တစ်ခုလုံး ချက်ချင်းပင် ဆူညံပွက်လောရိုက်သွားခဲ့သည်။

ပိုင်မျိုးနွယ်စုက ဘာကြောင့် ရုတ်တရက် ရောက်ရှိလာသည်ကို မည်သူမျှ မသိကြပေ။

သို့သော် သေချာသည့် အချက်တစ်ခုမှာ... သူတို့၏ ရောက်ရှိလာမှုသည် မြို့တော်တစ်ခုလုံးကို တုန်ခါသွားစေရန် လုံလောက်သည်ဟူသော အချက်ပင်။

မည်သို့ပင်ဆိုစေ ဤသည်က ပိုင်မျိုးနွယ်စု ဖြစ်သည်မဟုတ်ပါလော။

အင်ပါယာ၏ အထွတ်အထိပ် အုပ်စိုးရှင်ကြီးများထဲမှ တစ်ခု။

အင်ပါယာ၏ ထိပ်ဆုံးအဆင့်တွင် ရပ်တည်နေသည့် အင်အားစုကြီး ဖြစ်သည်။

သူတို့နှင့် နှိုင်းယှဉ်ပါက... လက်ရှိ နီမျိုးနွယ်စုသည် နီဖန်းကျိုး၏ တိုးတက်မှု ရှိနေသည့်တိုင်အောင် အရာမသွင်းလောက်စရာ ဖြစ်နေသေးသည်။

အလားတူ အတွေးပေါင်းများစွာက လူတိုင်း၏ စိတ်ထဲတွင် ချက်ချင်း ပေါ်လာခဲ့ကြ၏။

(သူတို့တွေ နီမျိုးနွယ်စုဆီကို လာတာ ဖြစ်ရမယ်)

နီမျိုးနွယ်စုနှင့် ရင်းနှီးသူများသည် ရင်ထဲတွင် တင်းကျပ်သွားကြပြီး စိုးရိမ်ပူပန်မှုများက ၎င်းတို့၏ မျက်နှာထက်တွင် လျင်မြန်စွာ ပျံ့နှံ့သွားသည်။

အချို့လူများမှာမူ စိုးရိမ်စိတ်ကြောင့် ချွေးစေးများပင် ထွက်နေကြပြီ ဖြစ်သည်။

နီဖန်းကျိုး နှင့် ပိုင်ရွှယ်ချင်းကြားက ကိစ္စသည် လျှို့ဝှက်ချက်တစ်ခု မဟုတ်ပေ။

ယခုအခါ ပိုင်မျိုးနွယ်စုက ကြိုးကြာတိမ်မြို့တော်သို့ ကြိုတင်သတိပေးချက်မရှိဘဲ ရုတ်တရက် ပေါ်လာခဲ့ရာ... သူတို့ မည်သို့ မထိတ်လန့်ဘဲ နေနိုင်မည်နည်း။

တစ်ဖက်တွင်မူ ယခင်က နီမျိုးနွယ်စု၏ နှိပ်ကွပ်ခြင်းကို ခံခဲ့ရဖူးသူများကမူ လုံးဝ ဆန့်ကျင်ဘက် ခံစားချက် ရှိနေကြသည်။

သူတို့၏ မျက်လုံးများက စိတ်လှုပ်ရှားမှုကြောင့် တောက်ပနေကြ၏။

အချို့ကမူ သူတစ်ပါး ဒုက္ခရောက်သည်ကို ဝမ်းသာသည့်အပြုံးများကို တိတ်တဆိတ် ဖော်ပြနေကြသည်။

"နီမျိုးနွယ်စုက စောင့်ကြွားနေတာ တော်တော်ကြာနေပြီလေ... အခုတော့ တွေ့ကြပြီပေါ့"

"ပိုင်မျိုးနွယ်စုက နောက်ဆုံးတော့ စာရင်းတွေ လာရှင်းတာလည်း ဖြစ်နိုင်တာပဲ”

"တကယ်လို့ ပိုင်မျိုးနွယ်စုကသာ သူတို့ကို တကယ် နှိပ်ကွပ်လိုက်ရင် နီမျိုးနွယ်စုတော့ သွားပြီပဲ”

လူအများအပြားက သူတို့၏ မျက်ဝန်းထဲမှ မျှော်လင့်ချက် အလင်းတန်းများကို မဖုံးကွယ်နိုင်ကြတော့ပေ။

မည်သို့ပင်ဆိုစေ နီမျိုးနွယ်စု အာဏာရလာကတည်းက ဒေသခံ အင်အားစု အမြောက်အမြားသည် ၎င်းတို့၏ ဖိနှိပ်မှုကို ခံခဲ့ရသည်။

အင်အားစုတစ်ခု ထိုးတက်လာလျှင် အခြားအင်အားစုများ ဆုတ်ယုတ်သွားရခြင်းက သဘာဝပင် မဟုတ်ပါလော။

လူအများစုသည် နီမျိုးနွယ်စုကြောင့် ရင်းမြစ်များနှင့် သြဇာအာဏာများကို ဆုံးရှုံးခဲ့ရသည်။

အကယ်၍ နီမျိုးနွယ်စုသာ ပြိုလဲသွားပါက သူတို့အတွက် တစ်ကျော့ပြန် ထောက်တည်နိုင်မည့် အခွင့်အရေး ဖြစ်မလာနိုင်ဘဲ ရှိမည်နည်း။

ထို့ကြောင့် ခဏတွင်းချင်းမှာပင် ကြိုးကြာတိမ်မြို့တော်အတွင်းရှိ အငွေ့အသက်များက အလွန် ထူးဆန်းသွားခဲ့သည်။

အချို့က ပူပန်နေကြသည်။

အချို့က ထိတ်လန့်နေကြသည်။

အချို့ကမူ တိတ်တဆိတ် အောင်ပွဲခံနေကြ၏။

ထိုလူအုပ်ကြားထဲတွင် နီချင်းယုက မျက်မှောင်ကြုတ်လိုက်သည်။

ပိုင်မျိုးနွယ်စု၏ အမှတ်တံဆိပ်ကို မြင်လိုက်ရသည့် ခဏ၌ပင် သူမ၏ မျက်ဝန်းထဲတွင် နာကျည်းမှုနှင့် ဒေါသတရားများ ချက်ချင်း အထင်အရှား ပေါ်ထွက်လာခဲ့သည်။

"သူတို့ အခု ဘာလာလုပ်ချင်ရပြန်တာလဲ"

သူမက အေးစက်စွာ ရေရွတ်လိုက်သည်။

သူမ၏ မျက်နှာအမူအရာက သိသိသာသာ ညိုမှောင်သွား၏။

ဘေးပတ်ဝန်းကျင်က လူငယ်များသည်လည်း မအေးမချမ်း ဖြစ်လာကြသည်။

ပိုင်မျိုးနွယ်စု၏ တည်ရှိမှုက သူတို့အတွက် ဖိအားအလွန် များလွန်းလှသည်။

လူအချို့က ချက်ချင်းပင် နောက်ဆုတ်ရန် ပြင်ကြတော့သည်။

"ဟဟ... ချင်းယု၊ ငါ ရုတ်တရက် သတိရလို့... ငါ့မှာ လုပ်စရာ အရေးကြီးကိစ္စလေး တစ်ခု ရှိနေသေးတယ်..."

"ဟုတ်တယ်၊ ဟုတ်တယ်... ငါ့အဖေကလည်း ဒီနေ့ စောစောပြန်လာဖို့ မှာထားတာ..."

"ငါလည်း အရင် သွားနှင့်တော့မယ်နော်..."

တစ်ယောက်ပြီးတစ်ယောက် အကြောင်းပြချက် အမျိုးမျိုးက ချက်ချင်း ထွက်ပေါ်လာခဲ့သည်။

အကယ်၍ မြင့်မြတ်လှသော ပိုင်မျိုးနွယ်စုကို စော်ကားမိ၍ နီချင်းယုနှင့် အနီးကပ် ရှိနေသည်ကို အမြင်ခံရပါက ၎င်းတို့၏ မိသားစု မျိုးနွယ်စုများပါ ပြဿနာပတ်သက် ကူးစက်ခံရနိုင်သည် မဟုတ်ပါလော။

ခဏမျှအတွင်းမှာတင် လူအုပ်စု၏ ထက်ဝက်ကျော်က ပျောက်ကွယ်သွားခဲ့ပြီ ဖြစ်သည်။

နီချင်းယု၏ ဘေးနားတွင် လူအနည်းငယ်သာ ကျန်ရှိတော့၏။

ထိုသို့ကျန်ရှိနေသည့်တိုင် သူတို့၏ မျက်နှာအမူအရာများက တောင့်တင်းကာ ပျာယာခတ်နေကြသည်။

"ချင်းယု... ငါတို့ မျိုးနွယ်စုဆီ အရင်ပြန်ပြီး လူကြီးတွေကို သွားအကြောင်းကြားရင် မကောင်းဘူးလား"

အခြားတစ်ယောက်ကလည်း လျင်မြန်စွာ ခေါင်းညိတ်သည်။

"ဟုတ်တယ်၊ သူတို့ကို ချက်ချင်း သွားသတိပေးသင့်တယ်”

သို့သော် နီချင်းယုကမူ မည်သည့် ကြောက်ရွံ့မှုကိုမျှ မပြသခဲ့ပေ။

ထို့ပြင် သူမက မေးစေ့ကို ပို၍ပင် ဂုဏ်ယူဝင့်ကြွားစွာ မော့လိုက်သေးသည်။

"ဟွန့်”

သူမ၏ မျက်ဝန်းများက ကောင်းကင်ထက်က ကြီးမားလှသော ပျံသန်းနိုင်သည့် ရထားလုံးကြီးဆီသို့သာ စိုက်ကြည့်နေဆဲ ဖြစ်သည်။

"ငါတို့က ဘာလို့ နောက်ဆုတ်ရမှာလဲ"

သူမ၏ လေသံထဲတွင် သိသာလှသော မာနထောင်လွှားမှုများ ပါဝင်နေသည်။

"ဒီနေရာက ကြိုးကြာတိမ်မြို့တော်လေ... ပိုင်မျိုးနွယ်စုရဲ့ နယ်မြေ မဟုတ်ဘူး။ ငါ့အိမ်ကွင်းမှာ ငါက ဘာလို့ ကြောက်နေရမှာလဲ"

သူမ ပြောလိုက်သည်နှင့်အမျှ သူမ၏ မျက်ဝန်းထဲတွင် ယုံကြည်ချက်များ ပြည့်နှက်သွားသည်။

သူမ၏ စိတ်ထဲတွင် အစ်ကိုဖြစ်သူ နီဖန်းကျိုးသည် လူငယ်မျိုးဆက်များထဲ၌ ပြိုင်ဘက်ကင်းသူဖြစ်နေပြီ ဖြစ်သည်။

သူမ၏ နီမျိုးနွယ်စုသည်လည်း ပထမတန်းစား မျိုးနွယ်စုကြီးတစ်ခု ဖြစ်လာရန် လက်တစ်ကမ်းအလို ရောက်ရှိနေပြီ ဖြစ်ရာ ပိုင်မျိုးနွယ်စုကို ကြောက်ရွံ့နေစရာ အကြောင်းမရှိဟု ယူဆထားသည်။

"သွားကြစို့”

နီချင်းယုက ရုတ်တရက် ကြေညာလိုက်သည်။

"ဘယ်သူ ရောက်လာတာလဲဆိုတာ သွားကြည့်ရအောင်”

ကျန်ရှိနေသည့် လူငယ်အနည်းငယ်မှာ ကြက်သေ သေသွားကြသည်။

"မင်းက... အဲ့နေရာကို သွားမလို့လား?”

နီချင်ယုက နှာခေါင်းရှုံ့လိုက်ရင်း

"ဘာလဲ... နင်တို့ ကြောက်နေကြတာလား"

သူမ၏ မျက်ဝန်းထဲတွင် အထင်သေးရိပ်များ ပါဝင်နေသည်။

ချက်ချင်းပင် လူငယ်အချို့က သူတို့၏ ကျောပြင်ကို ကသိကအောက်ဖြင့် မတ်လိုက်ကြသည်။

"မ... မဟုတ်တာ”

"ဒါပေါ့... မကြောက်ပါဘူး”

သူတို့၏ ရင်ထဲတွင် ကြောက်ရွံ့မှုများ ရှိနေသေးသော်လည်း နီချင်းယု၏ ရှေ့တွင် သူရဲဘောကြောင်သူများအဖြစ် အမြင်မခံလိုကြပေ။

ထို့ကြောင့် သူတို့သည် သွားကြိတ်ကာ သူမ၏နောက်သို့ လိုက်ပါခဲ့ကြတော့သည်။

တစ်ချိန်တည်းမှာပင် မြို့တွင်းရှိ လူအများအပြားသည်လည်း မြို့တံခါးများဆီသို့ စတင်ရွေ့လျားလာကြသည်။

စပ်စုလိုစိတ်က သူတို့၏ ကြောက်ရွံ့မှုကို လွှမ်းမိုးသွားခဲ့ပြီ ဖြစ်သည်။

မည်သို့ပင်ဆိုစေ ပိုင်မျိုးနွယ်စု၏ လာရောက်လည်ပတ်မှုမျိုးကို ကြိုးကြာတိမ်မြို့တော်အနေဖြင့် နှစ်ပေါင်းရာချီအတွင်း တစ်ကြိမ်မျှပင် မြင်တွေ့ရခဲလှသည် မဟုတ်ပါလော။

လွန်ခဲ့သော နှစ်အနည်းငယ်က ပိုင်ရွှယ်ချင်း ရောက်ရှိလာခဲ့ဖူးသော်လည်း ထိုစဉ်က သူမသည် ကောင်းကင်ဓားဂိုဏ်း၏ နဖူးစည်းအောက်တွင် လာရောက်ခဲ့ခြင်း ဖြစ်သည်။

သို့သော် ယနေ့တွင်မူ... စစ်မှန်သော ပိုင်မျိုးနွယ်စု၏ ပျံသန်းနိုင်သော သင်္ဘော တိုက်ရိုက် ရောက်ရှိလာခြင်း ဖြစ်သည်။

ထို့အပြင် သင်္ဘော၏ ကြီးမားလှပမှုနှင့် ဆန်းပြားခမ်းနားလှသည့် အသွင်သဏ္ဍာန်ကို ကြည့်ခြင်းအားဖြင့်... အတွင်း၌ ပါရှိလာသည့် ပုဂ္ဂိုလ်သည် သာမန် ပိုင်မျိုးနွယ်စုဝင် တစ်ဦး မဟုတ်ကြောင်း လူတိုင်း ရိပ်မိကြသည်။

(ဘယ်သူ ဖြစ်မလဲ...)