အခန်း ၁၅၀၁

အခန်း ၁၅၀၁ စမတ် အိမ်သုံးပစ္စည်း ထိန်းချုပ်မှုစနစ် (၉/၁၀)

ဖုန်းယွီသည် အကြီးအကဲရှ၏ စေတနာကို နောက်ဆုံးတွင် ငြင်းပယ်ခဲ့သော်လည်း အကယ်၍ အကြီးအကဲရှ တွင် ကိစ္စတစ်စုံတစ်ရာ ရှိပါက သူ့ကို အချိန်မရွေး လာရောက်ရှာဖွေနိုင်ကြောင်း ပြောကြားခဲ့သည်။

သေချာပေါက်ပင် အကြီးအကဲရှကဲ့သို့သော အဆင့်အတန်းရှိသူ တစ်ဦးသည် ကျန့်ရွေ့ချန်ကဲ့သို့ မျက်နှာပြောင်တိုက်ကာ သူ့ထံသို့ အမြဲတမ်း ဖုန်းဆက်နေမည် မဟုတ်ကြောင်းကို ဖုန်းယွီအလွန် ရှင်းလင်းစွာ သိထားပေသည်။

သို့သော် ဤတစ်ကြိမ် ပြီးဆုံးသွားပြီးနောက် အကြီးအကဲရှ၏ သူ့အပေါ် ဆက်ဆံရေးမှာ ပိုမိုရင်းနှီးလာကြောင်းကို ဖုန်းယွီသိသိသာသာ ခံစားလိုက်ရရာ ဤသည်က ကောင်းသောကိစ္စ တစ်ခုပင် ဖြစ်သည်။

ဖုန်းယွီသည် နိုင်ငံရေးနှင့် ပတ်သက်ဆက်နွှယ်ရသည်ကို မလိုလားသော်လည်း စီးပွားရေး လုပ်ကိုင်ရာတွင် နိုင်ငံရေးနှင့် လုံးဝမသက်ဆိုင်ဟု ပြောဆိုမည်ဆိုပါက ယင်းမှာ လုံးဝ အဓိပ္ပာယ်မရှိသော စကားသာ ဖြစ်ပေမည်။ ကမ္ဘာပေါ်ရှိ မည်သည့် သူဌေးကြီးကိုမဆို ကြည့်လိုက်ပါ နိုင်ငံရေး အဆင့်အတန်း အနည်းငယ်မျှ မရှိသူဟူ၍ မည်သူ ရှိပါသနည်း။

ဖုန်းယွီကိုပင် ကြည့်ပါ။ အကယ်၍သာ ကမ္ဘာ့အချမ်းသာဆုံးပုဂ္ဂိုလ် မဟုတ်ခဲ့ပါက ဤနေရာတွင် ထိုင်၍ အကြီးအကဲရှ နှင့် ရယ်မောပြောဆို နေနိုင်ပါမည်လော။

အကယ်၍ ဖုန်းယွီသာ အစိုးရနှင့် ပတ်သက်သော စီးပွားရေးလုပ်ငန်းရှင်တစ်ဦး ဖြစ်လာမည်ဆိုပါက တရုတ်၏ စက်မှုလုပ်ငန်း အများအပြားကို ဆယ်နှစ်အတွင်း တိတ်တဆိတ် လက်ဝါးကြီးအုပ်နိုင်မည်ဟု သူ ယုံကြည်ချက် ရှိပေသည်။ သို့သော် တွေးကြည့်ရုံဖြင့်ပင် အလွန်တရာ ပင်ပန်းလွန်းမည်ဟု ခံစားရသောကြောင့် ထားလိုက်ခြင်းကသာ ပိုကောင်းပေမည်။

သူသည် ပျင်းရိသူ တစ်ဦး မဟုတ်သော်လည်း ထိုမျှလောက်အထိလည်း လုံ့လဝီရိယ ရှိသူ မဟုတ်ပေ။

……

နှစ်ရက်ခန့် ကြာပြီးနောက် ကီရီလန်ကို ရောက်လာခဲ့ပြီး ဤတစ်ကြိမ်တွင် သူ လိုချင်နေသော စမတ် အိမ်သုံးပစ္စည်း ထိန်းချုပ်မှုစနစ် တစ်စုံကို လာရောက် ကြည့်ရှုခြင်း ဖြစ်သည်။

မူလက ဖုန်းယွီသည် သူကိုယ်တိုင် အသုံးပြုရန် သုတေသန ပြုလုပ်မည်ဟု ပြောဆိုခဲ့ခြင်းဖြစ်ပြီး ကီရီလန်ကိုက ကြားသိသွားပြီးနောက် သူပါ စိတ်ဝင်စားလာခဲ့ခြင်း ဖြစ်သည်။ ဘီလ်ဂိတ်မှာ ရှိနိုင်မှတော့ ငါက ဘာဖြစ်လို့ မရှိနိုင်ရမှာလဲ။

ငါက ရှိရုံတင်မကဘူး ပိုပြီးတောင် ကောင်းနေရဦးမယ်။

ဖုန်းယွီတို့သည် ကျန်းဝမ်မုန့် တို့နှင့်အတူ ဖုန်းယွီ အီလက်ထရောနစ်၏ အထူးပြခန်း အိမ်လေးထဲသို့ ဝင်ရောက်သွားခဲ့ကြသည်။

"မန်နေဂျာဖုန်း မစ္စတာကီရီလန်ကို… ဒါကတော့ ကျွန်တော်တို့ ကုမ္ပဏီ တော်တော်များများ ပူးပေါင်းပြီး ဒီဇိုင်းဆွဲထားတဲ့ စမတ် အိမ်သုံးပစ္စည်း တစ်စုံပါ၊ ဒါကတော့ ကျွန်တော်တို့ ဒီဇိုင်းဆွဲထားတဲ့ ပင်မထိန်းချုပ်ရေး ဘုတ်ပြားပါ" ကျန်းဝမ်မုန့်က လက်ဖက်ရည် စားပွဲခုံနှင့် တူသော အရာတစ်ခုကို လက်ညှိုးထိုးပြကာ မိတ်ဆက်ပေးလေသည်။

ကီရီလန်ကို၏ မျက်နှာပေါ်တွင် နားမလည်နိုင်သော အမူအရာများ ပေါ်လွင်နေကာ စမတ် အိမ်သုံးပစ္စည်းများ၏ ထိန်းချုပ်ရေး ကိရိယာ ဆိုသည်မှာ အဝေးထိန်းခလုတ် ဖြစ်သင့်သည် မဟုတ်ပါလော။ ဘာဖြစ်လို့ ဒီလောက် အကြီးကြီး ဖြစ်နေရတာလဲ။

ဒါက ဘာများ အဆင်ပြေမှာလဲ။ ဒီလောက် ကြီးမားတဲ့ အရာကြီးကို ဘယ်လိုများ ထိန်းချုပ်မောင်းနှင်ရမှာလဲ။

ကျန်းဝမ်မုန့်က ဆိုဖာကို လက်ညှိုးထိုးပြကာ သူတို့ကို ပြောလေသည်။ "ထိုင်ကြပါ ဒီစနစ်ကို ဘယ်လို ထိန်းချုပ်မောင်းနှင်ရတယ် ဆိုတာကို ကျွန်တော် အားလုံးကို လက်တွေ့ ပြသပေးပါ့မယ်"

လက်ဖက်ရည် စားပွဲခုံပေါ်တွင် ကျန်းဝမ်မုန့်က ဘေးဘက်ရှိ ခလုတ်တစ်ခုကို နှိပ်လိုက်ရာ လက်ဖက်ရည် စားပွဲခုံတစ်ခုလုံး၏ မျက်နှာပြင်ပေါ်တွင် မော်နီတာတစ်ခုကဲ့သို့ပင် ရုတ်တရက် အလင်းရောင်များ ထွက်ပေါ်လာခဲ့သည်။

ကီရီလန်ကိုမှာ လန့်ဖျပ်သွားခဲ့သော်လည်း ဖုန်းယွီကမူ ဆိုဖာပေါ်တွင် အပြုံးတစ်ခုကို ဆင်မြန်းကာ ထိုင်နေပြီး ဤကိစ္စအပေါ် အထူးအဆန်းဟု မထင်မှတ်ချေ။

သူက သေချာပေါက် အထူးအဆန်း မထင်ပေ။ ဤစိတ်ကူးကို ဖုန်းယွီကိုယ်တိုင်က အကြံပြုခဲ့ခြင်း ဖြစ်သည် မဟုတ်ပါလော။

ယခင်ဘဝက သူသည် ဤကဲ့သို့သော ထုတ်ကုန်မျိုးကို အင်တာနက်ပေါ်တွင် မြင်တွေ့ခဲ့ဖူးပြီး ကျွမ်းကျင်သူ အချို့က လက်ဖက်ရည် စားပွဲခုံကို ဧရာမ PADတစ်ခုအဖြစ် ကိုယ်တိုင် ပြုပြင်ပြောင်းလဲထားကြသည်လည်းရှိရာ ဤသည်က ဤနည်းပညာမှာ အလွန်တရာ ခက်ခဲလှသည် မဟုတ်ကြောင်းကို ဖော်ပြနေကာ ခက်ခဲသည်မှာ ထိန်းချုပ် မောင်းနှင်ရေး စနစ်ကို သုတေသနပြု တီထွင်ဖန်တီးရန်ပင် ဖြစ်သည်။

"ကြည့်ပါ။ ဒီနေရာမှာ ထိုင်နေရင်းနဲ့ အိမ်ထဲမှာရှိတဲ့ အိမ်သုံး လျှပ်စစ်ပစ္စည်း အားလုံးကို ထိန်းချုပ်လို့ ရပါတယ်။ ဒါက ရုပ်မြင်သံကြားပါ"

ကျန်းဝမ်မုန့်က လက်ဖက်ရည် စားပွဲခုံပေါ်ရှိ ရုပ်မြင်သံကြား ပုံသဏ္ဍာန်လေးကို တစ်ချက် နှိပ်လိုက်သည်နှင့် နံရံပေါ်တွင် ချိတ်ဆွဲထားသောLCD ရုပ်မြင်သံကြားမှာ အလိုအလျောက် ပွင့်လာခဲ့သည်။ ထို့နောက် သူက ရွေးချယ်စရာ တစ်ခုကို ထပ်မံနှိပ်လိုက်ပြီး ရုပ်သံလိုင်း ပြောင်းလဲခြင်းကို ရွေးချယ်လိုက်သည်။

"ဒါကတော့ Airconပါ"

တီ ဟူသော အသံတစ်ချက် ထွက်ပေါ်လာပြီးနောက် လေအေးပေးစက် ပွင့်သွားကာ လေအေးများ မှုတ်ထုတ်လာပြီး လေတိုက်နှုန်း ပုံစံအမျိုးမျိုးကိုလည်း ပုံမှန်အတိုင်း ပြောင်းလဲအသုံးပြုနိုင်ပေသည်။

"ဒါကတော့ ရေခဲသေတ္တာပါ။ ဒါက ရေပူစက်၊ ဒါက မိုက်ခရိုဝေ့ဖ် မီးဖို၊ ဒါက မီးဖို၊ ဒါက ပန်းကန်ဆေးစက်ပါ..."

ကျန်းဝမ်မုန့်က ဧည့်ခန်းထဲတွင် ထိုင်နေရုံဖြင့် အိမ်သုံး လျှပ်စစ်ပစ္စည်း အားလုံးကို မည်သို့ ထိန်းချုပ်နိုင်ကြောင်းကို တစ်ခုပြီးတစ်ခု ပြသနေလေသည်။

ဤနေရာမှနေ၍ မီးလုံးများ အားလုံးကို ဖွင့်ပိတ်နိုင်သည်သာမက မီးရောင်များကိုလည်း အပြောင်းအလဲ အမျိုးမျိုး ပြုလုပ်နိုင်သေးရာ ဥပမာအားဖြင့် ရုပ်မြင်သံကြား ကြည့်နေချိန်တွင် မီးရောင်ကို မှိန်ထားလိုက်၍ ရပေသည်။

"အဲဒီ အိမ်သုံး လျှပ်စစ်ပစ္စည်းတွေကို ထိန်းချုပ်နိုင်ရုံသာ မကပါဘူး။ ဒီထိန်းချုပ်ရေး ကိရိယာက တစ်ချိန်တည်းမှာပဲ ကြီးမားတဲ့ ကွန်ပျူတာ တစ်လုံးလည်း ဖြစ်ပါတယ်။ အင်တာနက် သုံးတာ၊ သတင်းတွေ ဖတ်တာ၊ အီးမေးလ် ပေးပို့ လက်ခံတာ၊ ဗီဒီယို ကြည့်တာ၊ သီချင်းနားထောင်တာ စတာတွေအတွက် အသုံးပြုလို့ ရပြီး ဘာပြဿနာမှ မရှိပါဘူး"

"ဒီနေရာကို ကြည့်ပါ။ တစ်ချက်နှိပ်လိုက်တာနဲ့ စံသတ်မှတ်ချက်နဲ့အညီ ပြုလုပ်ထားတဲ့ ကီးဘုတ် တစ်ခု ပေါ်လာပြီး စာရိုက်လို့ ရပါတယ်။ ဒီထိန်းချုပ်ရေး ကိရိယာမှာ မောက်စ် မပါဝင်ပါဘူး။ အကုန်လုံးကို လက်ချောင်းတွေနဲ့ ထိတွေ့ပြီး မောင်းနှင်ရတာဖြစ်လို့ အရမ်းကို အဆင်ပြေပါတယ်"

"ပြီးတော့ ကျွန်တော်တို့က မျက်နှာပြင်အတွက် အထူး အကာအကွယ်တွေ ပြုလုပ်ထားပါတယ်။ ဒီမျက်နှာပြင်က ပွန်းပဲ့ခြစ်ရာ ထင်ဖို့ မလွယ်ကူတဲ့အပြင် ထိတွေ့မှု အာရုံခံနိုင်စွမ်းကလည်း အရမ်းကို ကောင်းမွန်ပါတယ်။ တည်ဆောက်မှု ကုန်ကျစရိတ် နည်းနည်းလေး မြင့်နေတာ တစ်ခုပဲ ရှိတာပါ"

ကျန်းဝမ်မုန့်က စိတ်မလုံမလဲဖြစ်စွာဖြင့် ဖုန်းယွီကို ကြည့်လိုက်ရာ တကယ်တမ်းတွင် တည်ဆောက်မှု ကုန်ကျစရိတ်မှာ အနည်းငယ်မျှသာ မြင့်မားနေခြင်း မဟုတ်ဘဲ အလွန်တရာကို မြင့်မားလွန်းနေခြင်း ဖြစ်သည်။

သို့သော် ဤစနစ်သည် လတ်တလောတွင် အဆင့်မြင့် ဖောက်သည်များကို ဦးတည်ထားခြင်းဖြစ်ပြီး ထိုဖောက်သည်များ အားလုံးမှာ ငွေကြေးချမ်းသာသူများ ဖြစ်ကြရာ ဤပြဿနာမှာလည်း ကြီးမားသော ပြဿနာဟု မဆိုနိုင်တော့ချေ။

မျက်နှာချင်းဆိုင်ရှိ ရုပ်မြင်သံကြား မျက်နှာပြင်၏ ဘယ်ဘက်ခြမ်းတွင် မြင်ကွင်းတစ်ခု ရုတ်တရက် ပြောင်းလဲသွားခဲ့ရာ ကျန်းဝမ်မုန့်၏လက်ထောက် ဖြစ်နေလေသည်။

ကီရီလန်ကိုက အနည်းငယ် အံ့အားသင့်စွာဖြင့် မေးမြန်းလိုက်သည်။ "ဒါက တံခါးဝက စောင့်ကြည့် ကင်မရာလား"

"မှန်ပါတယ်။ ဒါက တံခါးဝက စောင့်ကြည့် ကင်မရာပါပဲ။ ကျွန်တော်တို့က ဒီမျက်နှာပြင်ကနေတစ်ဆင့် သူနဲ့ တိုက်ရိုက် စကားပြောလို့ ရပါတယ်။ ဒီအရာက မြင်ကွင်းကျယ် မှန်ဘီလူးကို အသုံးပြုထားတာဖြစ်လို့ ကွယ်နေတဲ့ ထောင့်နေရာတွေ မရှိဘဲ… လူတစ်ယောက်ယောက်က ပုန်းကွယ်နေပြီး ခင်ဗျား မမြင်လိုက်ရဘူး ဆိုတာမျိုး မဖြစ်နိုင်ပါဘူး"

"အိမ်ရဲ့ အတွင်းနဲ့အပြင်ဘက်က ထောင့်ပေါင်းစုံမှာ ဒီလို ကင်မရာမျိုးကို တပ်ဆင်ထားနိုင်ပြီး အိမ်ထဲက ကိစ္စရပ် အားလုံးကို စောင့်ကြည့်လို့ ရပါတယ်။ ဒါ့အပြင် အီးမေးလ် လိပ်စာတစ်ခုကို သတ်မှတ်ထားလို့ရပြီး သတ်မှတ်ထားတဲ့ အချိန်တစ်ခု ရောက်တိုင်းမှာ အလိုအလျောက် သိမ်းဆည်းပြီး ခင်ဗျားရဲ့ အီးမေးလ်ဆီကို ပို့ပေးမှာပါ။ ပြီးတော့ ဒါက နှစ်ဆယ့်လေးနာရီ ကြာတိုင်းမှာ… Folderတစ်ခုကို အလိုအလျောက် တည်ဆောက်ပြီး ရုပ်သံ မှတ်တမ်းတွေကို သိမ်းဆည်းပေးမှာဖြစ်သလို နေရာအပြည့် ဖြစ်သွားတဲ့အခါ အလိုအလျောက် အစားထိုး သိမ်းဆည်းသွားမှာမို့ ရှင်းလင်းရေး လုပ်ပေးနေစရာ မလိုပါဘူး"

"ပုံမှန် အခြေအနေမှာဆိုရင် ဒီထိန်းချုပ်ရေး ကိရိယာက တစ်လစာ အချက်အလက်တွေကို သိမ်းဆည်းပေးထားနိုင်လို့ အသုံးပြုဖို့ လုံလောက်ပါတယ်။ အကယ်၍ ဖောက်သည်ဘက်က အထူးတောင်းဆိုချက်တွေ ရှိနေမယ်ဆိုရင်တောင် သိမ်းဆည်းနိုင်တဲ့ နေရာပမာဏကို ထပ်မံ တိုးမြှင့်ပေးလို့ ရပါသေးတယ်၊ ခြောက်လစာ အချက်အလက်တွေကို သိမ်းဆည်းမယ်ဆိုရင်တောင် မဖြစ်နိုင်စရာ အကြောင်း မရှိပါဘူး"

ကျန်းဝမ်မုန့်က စိတ်ထဲမှ ဖြည့်စွက် ပြောဆိုလိုက်ရာ သို့သော် ထိုအချိန်သို့ ရောက်သောအခါ ဤကဲ့သို့သော လက်ဖက်ရည် စားပွဲခုံလေး တစ်ခုထဲတွင် ထားရှိနိုင်တော့မည် မဟုတ်ပေ။

ကျန်းဝမ်မုန့်က လက်ချောင်းဖြင့် တစ်ချက် နှိပ်လိုက်သည်နှင့် အခန်းတံခါး ပွင့်သွားကာ သူ၏လက်ထောက် ဝင်ရောက်လာခဲ့သည်။

"တံခါးကို ထိန်းချုပ်နိုင်ရုံသာမကဘဲ ပြတင်းပေါက်တွေ ပြတင်းပေါက် လိုက်ကာတွေ စတာတွေကိုပါ ထိန်းချုပ်လို့ ရပါတယ်" ကျန်းဝမ်မုန့်က ဆက်လက် လက်တွေ့ ပြသနေလေသည်။

"ကျန် ဒီထိန်းချုပ်ရေး ကိရိယာကြီးက အရမ်းကြီးလွန်းတယ်။ ပြီးတော့ ဒီတစ်ခုတည်းပဲ ရှိတာဆိုတော့ သိပ်အဆင်မပြေဘူး မဟုတ်လား" ကီရီလန်ကိုမှာ အနည်းငယ် မကျေမနပ် ဖြစ်နေဟန် ရှိသည်။

ကျန်းဝမ်မုန့် သည် ယုံကြည်မှု အပြည့်ရှိသော အပြုံးတစ်ခုကို ဆင်မြန်းကာ မတ်တပ်ရပ်လိုက်ပြီး "မစ္စတာကီရီလန်ကို မန်နေဂျာဖုန်း ကျေးဇူးပြုပြီး ကျွန်တော်နဲ့အတူ အထဲကို လိုက်ခဲ့ကြပါ။ ကြည့်ပါ ဒီအခန်းက ကုတင်ဘေးက ဘီရိုလေးကလည်း ခွဲထွက် ထိန်းချုပ်ရေး ကိရိယာ တစ်ခုပါပဲ အတူတူပဲ လုပ်ဆောင်ချက် အမျိုးမျိုး ရှိပါတယ်"

"ရေချိုးခန်းထဲက ဟာကလည်း အတူတူပါပဲ။ ပြီးတော့ ရေစိုခံနိုင်စွမ်း အရမ်းမြင့်မားလို့ ရေငွေ့တွေရဲ့ သက်ရောက်မှုကြောင့် ထိန်းချုပ်မှု ကမောက်ကမ ဖြစ်သွားတာ ဒါမှမဟုတ် အလုပ်မလုပ်တော့တာမျိုး မဖြစ်စေရဘူးလို့ အာမခံပါတယ်"

"မီးဖိုချောင်က ဟာကလည်း ရပါတယ်။ ပြီးတော့ စာကြည့်ခန်း စတဲ့ အခန်းတိုင်းမှာ ခွဲထွက် ထိန်းချုပ်ရေး ကိရိယာ တစ်ခုစီ ရှိနေပြီး လူအသံနဲ့ သတိပေးမှာမို့ ခင်ဗျား မကြားလိုက်ရတာမျိုး မဖြစ်စေရဘူးလို့ အာမခံပါတယ်"

"ကျွန်တော်တို့က ဘယ်အခန်းထဲမှာမဆို ဒီလျှပ်စစ်ပစ္စည်းတွေကို ထိန်းချုပ်လို့ ရပါတယ်။ ပြီးတော့ မေ့သွားမှာကိုလည်း စိုးရိမ်နေစရာ မလိုပါဘူး သတိပေးချက်တွေ အမြဲတမ်း ရှိနေမှာပါ။ ဒါကြောင့် ဒါက အဆင်ပြေရုံသာမကဘဲ ပိုပြီးတော့လည်း လုံခြုံစိတ်ချရပါတယ်"

"ဒီနေရာမှာ အန္တရာယ် သတိပေး အချက်ပေး လုပ်ဆောင်ချက် တစ်ခုကိုလည်း သတ်မှတ်ထားလို့ ရပါသေးတယ်။ အိမ်ရှင်ကို ရိုးရိုးရှင်းရှင်း သတိပေးရုံသာမကဘဲ အလိုအလျောက် သက်ဆိုင်ရာကို အကြောင်းကြားပေးနိုင်ပါတယ်"

ကျန်းဝမ်မုန့်က ဆက်လက် မိတ်ဆက်ပေးကာ အလွန်တရာ ကောင်းမွန်သော လုပ်ဆောင်ချက် အချို့ကိုပါ ပြသလိုက်ရာ ကီရီလန်ကိုမှာ အံ့သြမှင်သက်စွာ ကြည့်နေမိလေသည်။

လုပ်ဆောင်ချက် အများအပြားမှာ ကီရီလန်ကိုအနေဖြင့် အိပ်မက်ထဲတွင်နှင့် သိပ္ပံစိတ်ကူးယဉ် ရုပ်ရှင်များထဲတွင်သာ မြင်တွေ့ခဲ့ဖူးခြင်းဖြစ်ပြီး လက်တွေ့တွင် ယခုမှ ပထမဆုံးအကြိမ် မြင်တွေ့ဖူးခြင်း ဖြစ်သည်။

ဤစမတ် အိမ်သုံးပစ္စည်း ထိန်းချုပ်မှုစနစ်က တကယ်ကို ပြီးပြည့်စုံလွန်းလှရာ သူ တစ်စုံ တပ်ဆင်ရမည် သေချာပေါက် တစ်စုံ တပ်ဆင်ရပေမည်။

"ကျန် ခင်ဗျားတို့ လုပ်ထားတာ အရမ်းကို မိုက်တာပဲ။ ငါ အရမ်း သဘောကျတယ်။ ငါ့ရဲ့ ခြံဝင်းကြီးမှာ တပ်ဆင်ဖို့ တစ်စုံ လိုချင်တယ်" ကီရီလန်ကိုက စိတ်လှုပ်ရှားစွာဖြင့် ပြောလေသည်။

ကျန်းဝမ်မုန့်မှာ စိတ်ထဲတွင် အလွန်တရာ စိတ်လှုပ်ရှားသွားခဲ့ကာ နောက်ဆုံးတွင် ပထမဆုံး တစ်စုံကို ရောင်းချလိုက်ရလေပြီ။ ကုန်ကျစရိတ် အချို့ကို ပြန်လည် ရရှိနိုင်တော့မည် ဖြစ်သည်။

"မစ္စတာကီရီလန်ကို စိတ်ချပါ။ တစ်စုံစီတိုင်းမှာ မတူညီတဲ့ လုံခြုံရေး စကားဝှက်တွေ ရှိနေသလို မတူညီတဲ့ Setting သတ်မှတ်ချက်တွေလည်း ရှိနေတာမို့ တခြားစနစ်တွေကို ဖောက်ထွင်းပြီး ခင်ဗျားရဲ့စနစ်ဆီကို တိုက်ခိုက်လာနိုင်မယ့်သူ မရှိစေရဘူးလို့ အာမခံပါတယ်"

ဖုန်းယွီက ဘေးမှနေ၍ လက်ပိုက်ကာ မေးလိုက်သည်။ "လောင်ကျန်း ဒီထုတ်ကုန် တစ်စုံကို ဘယ်လောက် ပေးရမှာလဲ"

"အင်း အမေရိကန်ဒေါ်လာ သန်းသုံးဆယ်ပါ"

ဖူးးးးးးး

ဖုန်းယွီမှာ ပါးစပ်ထဲမှ လက်ဖက်ရည်များ ပန်းထွက်သွားသည်။ ဒီလောက်တောင် ဈေးကြီးတာလား…

******