အခန်း ၁၅၀၃

အခန်း ၁၅၀၃ ယောက်ဖဖြစ်သူ၏ ရည်မှန်းချက်ကြီးမားမှု (၁/၁၀)

"ယောက်ဖ ကျွန်တော့်ကို လှမ်းခေါ်တာ ဘာကိစ္စ ရှိလို့လဲ" ဖုန်းယွီသည် လီရှိချန်၏ ကားပေါ်သို့ တက်ထိုင်လိုက်ပြီး အနည်းငယ် သိချင်စိတ်ဖြင့် မေးမြန်းလိုက်သည်။

မနေ့က လီရှိချန်က သူ့ထံ ရုတ်တရက် ဖုန်းဆက်ကာ ပင်းချန်သို့ တစ်ခေါက် ပြန်လာရန်နှင့် ဖုန်းယွီနှင့် ဆွေးနွေးစရာ ကိစ္စအချို့ ရှိနေကြောင်း ပြောဆိုခဲ့သည်။ သို့သော် လေသံကို နားထောင်ရသည်မှာ ဆိုးရွားသော ကိစ္စရပ်မျိုး မဟုတ်ချေ။

"ရှောင်ယွီ မင်းနဲ့ ဆွေးနွေးတိုင်ပင်စရာ ကိစ္စလေး နည်းနည်း ရှိနေလို့ပါ။ အစကတော့ မြို့တော်ကို တိုက်ရိုက်သွားပြီး မင်းကို သွားရှာမလို့ စဉ်းစားထားပေမယ့် ဒီဘက်မှာ အလုပ်နည်းနည်း ရှိနေလို့ ထွက်သွားလို့ မရခဲ့ဘူး"

"ငါ့ရဲ့ ဒီFengyu Logistics(ဖုန်းယွီထောက်ပံ့ပို့ဆောင်ရေး) လုပ်ငန်းကို မင်း ကြည့်လိုက်ပါ။ ဝန်ထမ်းဟောင်း အနည်းငယ်ကလွဲရင် အခု စီမံခန့်ခွဲသူ အလွှာက လူတွေ အကုန်လုံးနီးပါး ပြောင်းလဲသွားခဲ့ပြီ။ အရင်တုန်းက မင်း ငါ့ကို အာဏာပြန်ထိန်းဖို့ ပြောပြီး အဲဒီ Franchise ဆိုင်တွေကို စာချုပ်အတိုင်း အကုန်လုံး ပြန်ဝယ်ခိုင်းခဲ့တာ။ အခုတော့ အားလုံး ပြီးစီးသွားပြီ"

ထိုစဉ်က အလျင်အမြန် ချဲ့ထွင်နိုင်ရန်အတွက် ဖုန်းယွီက Fengyu Logistics လုပ်ငန်းအား Franchise ဆိုင် ဖွင့်လှစ်သည့် နည်းလမ်းကို အသုံးပြု၍ ချဲ့ထွင်ရန် အကြံပြုခဲ့ရာ Fengyu Logistics လုပ်ငန်း၏ ချဲ့ထွင်မှု အရှိန်အဟုန်မှာ အလွန်တရာ ပြင်းထန်ခဲ့ပြီး အချိန်တိုအတွင်းမှာပင် စာတိုက်လုပ်ငန်း၏ နောက်တွင် ဒုတိယလိုက်နိုင်သော ထောက်ပံ့ပို့ဆောင်ရေး ကုမ္ပဏီတစ်ခု ဖြစ်လာခဲ့သည်။

သို့သော် ဤသို့ လုပ်ဆောင်ခြင်းတွင်လည်း အလွန်တရာ သိသာထင်ရှားသော အန္တရာယ်တစ်ခု ရှိနေခဲ့ရာ ယင်းမှာ ဖောက်သည် အရင်းအမြစ် အများအပြားသည် ထိုFranchiseဆိုင်များ၏ လက်ထဲတွင်သာ ရှိနေပြီး ၎င်းတို့သာ တစ်ပြိုင်နက်တည်း သစ္စာဖောက်သွားပါက သို့မဟုတ် ၎င်းတို့ ပူးပေါင်းသွားကြပါက ဖောက်သည်များကို ခေါ်ဆောင်သွားပြီး ကိုယ်ပိုင် လုပ်ငန်းသစ် ထူထောင်သွားနိုင်ခြင်းပင် ဖြစ်သည်။

ဥပမာအားဖြင့် ဖောက်သည် အများအပြားမှာ ပြည်နယ်အတွင်းရှိ မြို့အနည်းငယ်ကိုသာ သွားရောက်ရသော ခရီးတို ပို့ဆောင်ရေးကို အဓိက လုပ်ဆောင်ကြရာ ဤမြို့အနည်းငယ်မှ ကိုယ်စားလှယ်ဆိုင်များသာ ပူးပေါင်းလိုက်ပြီး ထောက်ပံ့ပို့ဆောင်ရေး ကုမ္ပဏီအသစ်တစ်ခုကို ဖွင့်လှစ်လိုက်ပါက ဤဖောက်သည်များထဲမှ အစိတ်အပိုင်း ကြီးကြီးမားမားကို ၎င်းတို့က သေချာပေါက် ခေါ်ဆောင်သွားကြမည် ဖြစ်သည်။

ဖုန်းယွီက ဤကိစ္စကို လီရှိချန်အား စတင်ပြောဆိုချိန်တွင် လီရှိချန်မှာ သိပ်ပြီးမယုံကြည်ခဲ့သော်လည်း နောက်ပိုင်းတွင် သူ တိတ်တဆိတ် စုံစမ်းစစ်ဆေးကြည့်လိုက်သောအခါမှသာ တကယ်ပင် ဤသို့ဖြစ်နေကြောင်း တွေ့ရှိသွားခဲ့သည်။

အမြန်ပို့ဆောင်ရေး ဆိုင်ခွဲများမှ ဝန်ထမ်းအများအပြားမှာ ဆိုင်၏မန်နေဂျာကိုသာ သိရှိကြပြီး လီရှိချန်ကဲ့သို့သော ကုမ္ပဏီ၏ တကယ့် သူဌေးကြီး ရှိနေသေးကြောင်းကို လုံးဝမသိရှိကြချေ။ ဤသို့သော အပြုအမူက လီရှိချန်ကို အလွန်တရာ စိတ်အနှောင့်အယှက် ဖြစ်စေခဲ့သည်။

အချို့သော အချိန်များတွင်လည်း ထိုအမြန်ပို့ဆောင်ရေး Franchiseဆိုင်များသည် ကုမ္ပဏီ၏ ဝန်ထမ်းများနှင့် စကားများ ရန်ဖြစ်ကြပြီး ကိုယ်ထိလက်ရောက် ရိုက်ပုတ်သည်အထိပင် အပြုအမူများက အလွန်တရာ မောက်မာရိုင်းစိုင်းလှပေသည်။ သူတို့က ဘာကို အားကိုးနေကြသနည်း။ ဖောက်သည် အရင်းအမြစ်ကို အားကိုးနေကြခြင်း မဟုတ်ပါလော။

ထို့အပြင် ကုန်တင်ကားကို ကိုယ်ပိုင် ဝယ်ယူကာ ကုန်စည်ပို့ဆောင်ရေးကို ကိုယ်တိုင် လုပ်ကိုင်ကြပြီး မူလက Fengyu Logistics လုပ်ငန်း ပိုင်ဆိုင်ရမည့် အမှာစာများကို ၎င်းတို့၏ ကိုယ်ပိုင် စာရင်းထဲသို့ ထည့်သွင်းသွားကြသူများလည်း အမှန်တကယ်ပင် ရှိနေခဲ့သည်။

ဤကဲ့သို့ Fengyu Logistics လုပ်ငန်း၏ အမည်ကို ဗြောင်ကျကျ အသုံးပြုကာ မှောင်ခို အမှာစာများဖြင့် ငွေရှာနေသော အပြုအမူက လီရှိချန်ကို ပို၍ပင် မကျေမနပ် ဖြစ်စေခဲ့သည်။ ဤအချိန်တွင် လီရှိချန်လည်း ဤဆိုင်များ၏ ပြဿနာများမှာ အလွန်တရာ ဆိုးရွားနေပြီဖြစ်ပြီး အကယ်၍ မဖြေရှင်းပါက အလွန်တရာ အန္တရာယ်များနိုင်ကြောင်းကို မြင်တွေ့သွားခဲ့လေပြီ။

တိုက်တိုက်ဆိုင်ဆိုင်ပင် တောင်ဘက်ရှိ Shunfeng Logistics(ရွှန်းဖုန်း ထောက်ပံ့ပို့ဆောင်ရေး) ကုမ္ပဏီကလည်း အာဏာပြန်လည်သိမ်းယူရေး လှုပ်ရှားမှုကို စတင်နေခဲ့ပြီး ထိုဘက်မှ ဝမ်ဝေက ဆက်လက် လုပ်ကိုင်လိုပါက ပိုင်ဆိုင်မှု အားလုံးကို ပြန်လည် ဝယ်ယူမည်ဖြစ်ပြီး သို့မဟုတ်ပါက ထွက်သွားကြရန်နှင့် ဤအမှတ်တံဆိပ်မှာ သူ၏အမှတ်တံဆိပ်ဖြစ်ကြောင်း တစ်ခွန်းတည်းသာ ပြောဆိုခဲ့သည်။

လီရှိချန်မှာမူ ထိုမျှလောက် ပြတ်သားတင်းမာမှု မရှိခဲ့ချေ။ အဘယ်ကြောင့်ဆိုသော် ထိုစဉ်က Franchise ဆိုင် အများအပြားကို သူကိုယ်တိုင် လူခေါ်သွား၍ ဆွေးနွေးခဲ့ရခြင်းဖြစ်ပြီး အများစုမှာ သူ၏ စစ်ဘက်လုပ်ဖော်ကိုင်ဖက်များနှင့် သူငယ်ချင်းများ ဖြစ်နေသောကြောင့်ပင်။

ထို့ကြောင့် လီရှိချန်သည် ဓားတစ်ချက်တည်းဖြင့် ပြတ်သားစွာ ဖြတ်တောက်သည့် နည်းလမ်းကို မသုံးခဲ့ဘဲ ဤအချက်က Fengyu Logistics လုပ်ငန်း၏ အာဏာပြန်လည်သိမ်းယူမှုကို Shunfeng Logisticsထက် များစွာနှေးကွေးသွားစေခဲ့သည်။

သုံးနှစ် အချိန်အတွင်း Shunfeng Logisticsသည် အာဏာများကို အားလုံး ပြန်လည်သိမ်းယူနိုင်ခဲ့ပြီး ဝမ်ဝေတစ်ဦးတည်း၏ လက်ထဲသို့ စုစည်းသွားခဲ့သည်။ သို့သော် လူအများကို အလွန်တရာ နားလည်ရခက်စေသည်မှာ ဝမ်ဝေသည် အခြားသော ကုမ္ပဏီတစ်ခုကို သီးသန့် မှတ်ပုံတင်ခဲ့ပြီး Shunfeng Logistics၏ ရှယ်ယာ ဆယ်ရာခိုင်နှုန်းကို ပိုင်ဆိုင်ထားစေကာ ထိုအထဲမှ ငွေကြေးများကိုမူ ဝမ်ဝေက တစ်ကြိမ်တစ်ခါမျှ မထိမတို့ခဲ့ခြင်းပင် ဖြစ်သည်။

ပြောစမှတ်များအရ ဝမ်ဝေသည် ထိုစဉ်က သူ့ကို ကူညီခဲ့ဖူးသူအား အမြတ်ဝေစု ပေးရန် ရည်ရွယ်ထားခြင်းဖြစ်သော်လည်း ထိုသူက မယူခဲ့ကြောင်း သိရသည်။ သို့သော် အခြားသူက မယူသော်လည်း သူက မပေးဘဲ နေ၍မရချေ။

ဝမ်ဝေဘက်တွင် သူ၏ဖခင်နှင့် အစ်မဖြစ်သူတို့ကိုပါ ကုမ္ပဏီမှ နှင်ထုတ်ပစ်ခဲ့သောကြောင့် လုပ်ငန်းစဉ်မှာ အတော်လေး ချောမွေ့ခဲ့သည်ဟု ဆိုရပေမည်။

သို့သော် လီရှိချန်ဘက်တွင်မူ သူ့ကို အားကိုး၍ ရောက်လာခဲ့ကြသော ဆွေမျိုးများ သူငယ်ချင်းများနှင့် စစ်ဘက်လုပ်ဖော်ကိုင်ဖက်များ စသည်တို့ကို နှင်ထုတ်ပစ်၍ မရနိုင်ချေ။ သူက ဤလူများကို ငွေကြေး ပိုမိုပေးချင်သော်လည်း အခြားသော ဆိုင်များကိုပါ အသိပေး၍ မရနိုင်ပေ။

သို့မဟုတ်ပါက အားလုံးက တန်းတူညီမျှ ဆက်ဆံရန် တောင်းဆိုလာကြလျှင် သူ မည်သို့ လုပ်ရမည်နည်း။

ထိုလူများကို သီးသန့် ခေါ်ယူ၍ ဆွေးနွေးရုံသာ တတ်နိုင်ပြီး Fengyu Logistics လုပ်ငန်းသို့ ဈေးကွက်ပေါက်ဈေးအတိုင်း ရောင်းချပေးရန် မျှော်လင့်ကြောင်းနှင့် ထို့နောက်တွင် လီရှိချန်က ကိုယ်ပိုင် ငွေကြေးများကို ထုတ်ယူကာ ၎င်းတို့အား ထောက်ပံ့ကြေး ပေးမည်ဖြစ်ပြီး ဆိုင်များကိုလည်း ၎င်းတို့ထံ ဆက်လက် လွှဲအပ်ထားမည်ဖြစ်ကြောင်း ပြောဆိုခဲ့ရသည်။

မူလက လီရှိချန်သည် ဤကိစ္စကို အလွန် လွယ်ကူလိမ့်မည်ဟု ထင်မှတ်ထားခဲ့သော်လည်း ပြင်းထန်သော ဆန့်ကျင်မှုများနှင့် ရင်ဆိုင်ခဲ့ရကာ ထိုလူများအားလုံးက လီရှိချန်သည် အလုပ်ပြီးသွားသဖြင့် ကျေးဇူးကန်းနေသည်ဟု ထင်မြင်နေခဲ့ကြသည်။

ထို့ကြောင့်မှသာ လီရှိချန်သည် အချိန်အတော်အတန် ပိုမိုအသုံးပြု၍ ထိုဆိုင်များကို ပြန်လည် သိမ်းယူနိုင်ခဲ့ခြင်း ဖြစ်သည်။ သေချာပေါက်ပင် ထိုအထဲမှ လူအများအပြားမှာ ထွက်ခွာသွားကြပြီး ကိုယ်ပိုင် လုပ်ငန်းသစ်များကို ထူထောင်သွားခဲ့ကြသည်။ သို့သော် Fengyu Logistics လုပ်ငန်း၏ အင်အားကြီးမားသော ဖြန့်ချိရေး လမ်းကြောင်းများ မရှိတော့သဖြင့် ၎င်းတို့က ဖောက်သည်အချို့ကို ဆွဲဆောင်သွားနိုင်ခဲ့သော်လည်း နောက်ဆုံးတွင်မူ ထိုဖောက်သည်များ အားလုံးကို ပြန်လည် ဆွဲဆောင်နိုင်ခဲ့လေသည်။

မြစ်ဝါမြစ်၏ မြောက်ဘက်တွင် Fengyu Logistics လုပ်ငန်းက အင်အားအကြီးမားဆုံးဖြစ်ပြီး ယန်ဇီမြစ်၏ တောင်ဘက်တွင် Shunfeng Logisticsက အကြီးမားဆုံး ဖြစ်သည်။ အလယ်ပိုင်း ဒေသများတွင်လည်း Shentong၊ Zhaijisong စသည့် အခြားသော ထောက်ပံ့ပို့ဆောင်ရေး ကုမ္ပဏီများ ယှဉ်ပြိုင်လျက် ရှိနေကြသည်။

သို့သော် ကြော်ငြာနှင့် ဝါဒဖြန့်မှုများကို အားကိုး၍ Fengyu Logistics လုပ်ငန်း၏ နာမည်ကျော်ကြားမှုမှာ အခြားသော ထောက်ပံ့ပို့ဆောင်ရေး ကုမ္ပဏီများထက် တစ်ပန်းသာနေခဲ့ပြီး စာတိုက်လုပ်ငန်း၏ နာမည်ကျော်ကြားမှုနှင့် နှိုင်းယှဉ်လျှင်ပင် မညံ့ဖျင်းလှပေ။

အာဏာကို ပြန်လည် သိမ်းယူပြီးနောက်တွင် လီရှိချန်က ဆက်လက် ချဲ့ထွင်လိုနေသေးသည်။ Fengyu Logistics လုပ်ငန်းကို အဘယ်ကြောင့် ယန်ဇီမြစ်၏ တောင်ဘက်အထိ ဖွံ့ဖြိုးတိုးတက်အောင် မလုပ်နိုင်ရမည်နည်း။

ဤသို့ဆိုလျှင် နိုင်ငံတစ်ဝန်းလုံးရှိ ထောက်ပံ့ပို့ဆောင်ရေး လမ်းကြောင်းများကို ပိုင်ဆိုင်သွားမည်ဖြစ်ပြီး Fengyu Logistics လုပ်ငန်း၏ လုပ်ငန်းများမှာလည်း ပိုမိုများပြားလာမည် ဖြစ်သည်။

၎င်းတို့သည် မီးရထားဌာနနှင့် ရေရှည်ပူးပေါင်းဆောင်ရွက်ရေး စာချုပ်ကို ချုပ်ဆိုထားပြီး ခရီးဝေး ပို့ဆောင်မှုများ အားလုံးကို မီးရထားလမ်းမှတစ်ဆင့် သယ်ယူပို့ဆောင်ကြရာ ၎င်းတို့၏ ကုန်တင်ကားများဖြင့် သယ်ယူပို့ဆောင်ခြင်းနှင့် နှိုင်းယှဉ်ပါက လုံခြုံစိတ်ချရပြီး မြန်ဆန်သည့်အပြင် ဈေးလည်း သက်သာပေသည်။

ယခုလက်ရှိ ကုန်တင်ကားဖြင့် သယ်ယူပို့ဆောင်မှုများမှာ ယေဘုယျအားဖြင့် အလွန်အမင်း ဝေးကွာတော့မည် မဟုတ်ပေ အကယ်၍ ပင်းချန်မှ မိုတုသို့ ကုန်တင်ကားဖြင့် သွားရမည်ဆိုပါက နှစ်ရက် အချိန်ယူရမည်သာမက ယာဉ်မောင်းများ ပင်ပန်းနွမ်းနယ်စွာ မောင်းနှင်ရသဖြင့် အန္တရာယ် ဖြစ်ပေါ်စေရန်လည်း လွယ်ကူပေသည်။

ထို့အပြင် ခရီးဝေး ကုန်စည်ပို့ဆောင်မှု လုပ်ရသည်မှာ မူလကတည်းက အတော်လေး အန္တရာယ်များလှပြီး ယာဉ်အန္တရာယ်များသာမက လူ့ပယောဂကြောင့် ဖြစ်ပေါ်လာသော အန္တရာယ်များလည်း ရှိနေသေးသည်။

အချို့သော နေရာများရှိ ဒေသခံများ၏ အကျင့်စရိုက်မှာ ရိုးသားဖြူစင်လှသည် မဟုတ်ဘဲ အလွန်တရာ ရိုင်းစိုင်းကြမ်းတမ်းသည်ဟုပင် ဆိုရပေမည်။ တစ်ချိန်က Fengyu Logistics လုပ်ငန်း၏ ကုန်စည်များကို အချို့သော နေရာများရှိ ရွာသားများက အမြန်လမ်းပေါ်တွင် ဂိတ်ချကာ တားဆီး၍ အများအပြား ယူဆောင်သွားခဲ့ကြဖူးပြီး Fengyu Logistics လုပ်ငန်းကို ငွေအများအပြား လျော်ကြေးပေးခဲ့ရစေသည်။

ယခုအခါ လီရှိချန်သည် မီးရထားဖြင့် သယ်ယူပို့ဆောင်ခြင်းမှာလည်း အလွန်နှေးကွေးလွန်းနေသည်ဟု ခံစားနေရပြီး ဤအချိန်တွင် အမြန်ရထားများလည်း မရှိသေးချေ။ ထို့ကြောင့် သူသည် စာတိုက်လုပ်ငန်းနှင့် Shunfengတို့တွင် လေကြောင်းဖြင့် သယ်ယူပို့ဆောင်မှုများ ရှိနေသည်ကို မြင်တွေ့သွားခဲ့သည်။

"ရှောင်ယွီ မင်း ပြောကြည့် ငါတို့လည်း လေကြောင်းကနေ သယ်ယူပို့ဆောင်ရေး လုပ်ရင် အဆင်ပြေမလား"

ဖုန်းယွီက ဘာကိစ္စများလဲ ဟု ထင်နေခဲ့သည်မှာ ဒီကိစ္စလေးကိုး။

"အဆင်မပြေစရာ ဘာမှမရှိပါဘူး။ လေကြောင်း သယ်ယူပို့ဆောင်ရေးက အရမ်း ကောင်းတာပေါ့။ လေကြောင်း သယ်ယူပို့ဆောင်ရေး လုပ်မယ်ဆိုရင် နောက်ပိုင်းကျရင် Fengyu Logistics လုပ်ငန်းက နိုင်ငံတစ်ဝန်း နောက်တစ်နေ့ အရောက် ဆိုတဲ့ ဆောင်ပုဒ်ကို ထုတ်သုံးလို့ ရသွားပြီပေါ့"

ယခုလက်ရှိ Fengyu Logistics လုပ်ငန်းတွင်လည်း နောက်တစ်နေ့ အရောက် ဟူသော ဆောင်ပုဒ် ရှိနေသော်လည်း နေရာတိုင်းအတွက် မဟုတ်ဘဲ ခရီးအကွာအဝေးကို ကြည့်ရသလို မြို့ကြီးများ ဖြစ်မဖြစ်ကိုလည်း ကြည့်ရသေးသည်။

လေကြောင်း သယ်ယူပို့ဆောင်ရေး ရှိလာပြီးနောက်တွင် ထိုနေ့မှာပင် အခြားသော မြို့တစ်မြို့ရှိ အနီးဆုံး ထောက်ပံ့ပို့ဆောင်ရေး စခန်းသို့ ရောက်ရှိနိုင်မည်ဖြစ်သည်။ ထို့နောက် ကုန်တင်ကားများမှတစ်ဆင့် ခရီးဆုံး ပန်းတိုင်ရှိရာ မြို့သို့ ထိုနေ့မှာပင် ပို့ဆောင်နိုင်မည်ဖြစ်ကာ ဒုတိယမြောက်နေ့တွင် အချိန်ကိုက် ပစ္စည်းသွားပို့ပေးခြင်း သို့မဟုတ် တစ်ဖက်လူအား လာရောက် ထုတ်ယူရန် အကြောင်းကြားခြင်းများ ပြုလုပ်နိုင်မည် ဖြစ်သည်။

လီရှိချန်က ဤအချက်ကို တွေးမိခဲ့သည့်အပေါ် ဖုန်းယွီက တကယ်တမ်းတွင် အလွန်ဝမ်းသာနေမိပြီး အကယ်၍ သူသာ မပြောခဲ့ပါက ဖုန်းယွီကိုယ်တိုင်လည်း သူ့ကို ပြောပြရန် ရည်ရွယ်ထားခဲ့သည်။ ပြည်တွင်းရှိ ခရီးသည်တင် လေယာဉ်အများအပြားမှာ လူအပြည့် တင်ဆောင်နိုင်ခြင်း လုံးဝမရှိဘဲ ဧရာမ လေယာဉ်ကြီး အများအပြားမှာ တစ်ဝက်ကို လူတင်ပြီး တစ်ဝက်ကို ကုန်တင်ကြခြင်းဖြစ်ကာ အချို့သော လေယာဉ်များမှာမူ သီးသန့် ကုန်တင်လေယာဉ်များပင် ဖြစ်ကြသည်။

လီရှိချန်က စိတ်လှုပ်ရှားစွာဖြင့် ဖုန်းယွီကို ကြည့်ကာ ပြောလေသည်။ "မင်းလည်း အဆင်ပြေမယ်လို့ ထင်တယ်ပေါ့ ဟုတ်လား။ ငါ ပြောသားပဲ သေချာပေါက် ဖြစ်နိုင်ပါတယ်လို့။ ရှောင်ယွီ မင်းက လေကြောင်း ဌာနတွေနဲ့ အဆက်အသွယ် ရှိတယ် မဟုတ်လား ယောက်ဖအတွက် နည်းနည်းလောက် မေးပေးပါဦး။ ငါက ကုန်တင် လေကြောင်းကုမ္ပဏီတစ်ခု တည်ထောင်ချင်ရင် ဘာစာရွက်စာတမ်းတွေ လိုအပ်မလဲ နည်းနည်းလောက် မြန်မြန် လုပ်လို့ ရမလား။ ပြီးတော့ မင်းက ယောက်ဖအတွက် ကုန်တင် လေယာဉ် တချို့လောက် ဝယ်ဖို့ အဆက်အသွယ်လေး နည်းနည်း ရှာပေးလို့ ရမလား ကြည့်ပေးပါဦး"

ဟင်…. ဖုန်းယွီမှာ ပါးစပ်အဟောင်းသား ဖြစ်သွားခဲ့သည်။ ပြည်တွင်းမှ လေကြောင်းကုမ္ပဏီများနှင့် ကုန်စည်ပို့ဆောင်ရေး သဘောတူညီချက် ချုပ်ဆိုရန် မဟုတ်ဘဲ ကိုယ်ပိုင် ကုန်တင် လေကြောင်းကုမ္ပဏီကို တိုက်ရိုက် ဖွင့်လှစ်ချင်တာ ဟုတ်လား။

ယောက်ဖ ဖြစ်သူ ဒီတစ်ကြိမ်တော့ အကြီးအကျယ် ကစားနေပြီပဲ။

******