အခန်း ၁၅၀၇

အခန်း ၁၅၀၇ တရုတ်၏ လေကြောင်း အိပ်မက် (၅/၁၀)

"ဖုန်း မင်းက လေယာဉ် ထပ်ဝယ်ချင်ပြန်ပြီလား။ ဒါပေမဲ့ အခု ဈေးသက်သာတဲ့ လေယာဉ်တွေ မရှိတော့ဘူး။ ပြီးတော့ အသင့်ရှိတဲ့ ပစ္စည်းလည်း မရှိတော့လို့ ကြိုတင်မှာယူရလိမ့်မယ်" ကီရီလန်ကိုက အားနာဟန်ဖြင့် ပြောလေသည်။

ယခုအခါ ဖုန်းယွီ အီလက်ထရောနစ်မှ လူများက သူ၏အိမ်တွင် စမတ် အိမ်သုံးပစ္စည်း ထိန်းချုပ်မှုစနစ်ကို လာရောက် တပ်ဆင်ပေးနေကြပြီး ငွေကြေးများကိုလည်း ဖုန်းယွီက ပေးချေထားခြင်းဖြစ်ရာ ဤကဲ့သို့ ဖုန်းယွီက သူ့ကို အကူအညီ တောင်းခံလာချိန်တွင် သူက မကူညီနိုင်ဖြစ်နေသဖြင့် အနည်းနှင့်အများတော့ မျက်နှာပူစရာ ကောင်းနေပေသည်။

"ညီလေးကီ မင်း နားလည်မှု လွဲသွားပြီ။ ငါက လေယာဉ်အသစ် ဝယ်ချင်တာ မဟုတ်ဘူး၊ မင်းက တစ်ပတ်ရစ် လေယာဉ် တချို့လောက်ကို ကူညီ ဆက်သွယ်ပေးလို့ ရမလားလို့ မေးကြည့်တာပါ။ ဒီဇိုင်းလုပ်ထားတဲ့ ပျံသန်းမှု မိုင်အရေအတွက်က တစ်ဝက်လောက် ကျော်နေပြီဖြစ်ပြီး ပုံစံနည်းနည်း ဟောင်းနေတဲ့ လေယာဉ်မျိုးပေါ့… ငါက အဲဒါကို ထောက်ပံ့ပို့ဆောင်ရေးမှာ ကုန်စည် သယ်ယူဖို့ အသုံးပြုမလို့ပါ"

လေယာဉ်အသစ်ကိုမူ ဖုန်းယွီက ရုရှားတွင် ဝယ်ယူရန် မရည်ရွယ်ထားချေ။ နည်းပညာနှင့် အရွယ်အစား အင်အားအရ ဆိုလျှင် Airbusနှင့် Boeingတို့က ပို၍အင်အားကြီးမားပြီး တရုတ်ပြည်တွင်းတွင်လည်း ဈေးနှုန်းနှင့် အရည်အသွေး မျှတသော လေယာဉ်များ ရှိနေရာ ဖုန်းယွီအနေဖြင့် အဘယ်ကြောင့် အနီးကိုစွန့်၍ အဝေးကို သွားရှာနေမည်နည်း။

သို့သော် တရုတ်ပြည်တွင်းရှိ လေကြောင်းလုပ်ငန်းမှာ ယခုအခါတွင် တိုးချဲ့နေဆဲ အချိန်ဖြစ်သဖြင့် လေယာဉ်ဟောင်းများ ဝယ်ယူရန် သိပ်မလွယ်ကူလှပေ။ ထို့အပြင် ဖုန်းယွီက ရဲလ်ဖ်ကို မေးမြန်းကြည့်လိုက်ရာ အမေရိကဘက်တွင် ဝယ်ယူ၍ ရနိုင်သော်လည်း ထိုဘက်မှလူများမှာ အလွန်တရာ ပါးနပ်လွန်းလှပေသည်။

အမေရိက၏ လေကြောင်းကုမ္ပဏီ အများအပြားသည် တစ်ပတ်ရစ် လေယာဉ်များကို ဝယ်ယူကာ အနည်းငယ် ပြုပြင်မွမ်းမံပြီး အသစ်ကဲ့သို့ အပြင်ပန်း အသွင်အပြင်မျိုး ဖန်တီး၍ ကုန်ကျစရိတ်ကို လျှော့ချကာ ခရီးသည်များကို ဆွဲဆောင်လေ့ ရှိကြသည်။

ထို့အပြင် ယခုအခါ Boeing၏ အမှာစာများ အလွန်များပြားနေပြီး လေယာဉ်အသစ် အများအပြားမှာ အလှည့်ပင် မရနိုင်သေးဘဲ ဝယ်ယူလိုသော်လည်း ဝယ်၍မရနိုင်သဖြင့် တစ်ပတ်ရစ် လေယာဉ် ဈေးကွက်မှာ မထင်မှတ်ဘဲ အလွန်တရာ အရောင်းအဝယ် သွက်နေခဲ့သည်။

ထို့ကြောင့် အမေရိကဘက်တွင် သွားဝယ်လျှင် လုံးဝမတွက်ခြေကိုက်ဘဲ ထိုဈေးနှုန်းဖြင့် ပြည်တွင်းဖြစ် လေယာဉ်အသစ်ကို ငွေနည်းနည်း ထပ်စိုက်၍ ဝယ်ယူလိုက်ခြင်းကမှ ပိုကောင်းဦးမည် ဖြစ်သည်။

ဖုန်းယွီ စဉ်းစားတွေးတောကြည့်လိုက်ပြီးနောက် ညီလေးကီဘက်တွင် ဈေးသက်သာသော အရာများ ဝယ်ယူ၍ ရနိုင်မရနိုင် ဆိုသည်ကို အရင်ဆုံး မေးမြန်းကြည့်ရန်သာ ဆုံးဖြတ်လိုက်သည်။ အကယ်၍ရနိုင်ပါက ဤဘက်မှသာ ဝယ်ယူလိုက်မည်ဖြစ်ပြီး ညီလေးကီက လေကြောင်းဘက်တွင် အဆက်အသွယ် အတော်လေး ကောင်းမွန်ကြောင်း ပြောခဲ့ဖူးသည်ကို မှတ်မိနေသည်။

လေယာဉ်အသစ် ဝယ်ယူရန် သိပ်မလွယ်ကူဘဲ ကြီးမားသော လူမှုရေး အကြွေးတစ်ခုကို တင်သွားစေမည် ဖြစ်သော်လည်း လေယာဉ်ဟောင်း ပြဿနာမှာတော့ သိပ်မကြီးမားနိုင်ဘူး မဟုတ်ပါလော။

တကယ်တမ်းတွင် ဖုန်းယွီသည် ရုရှားမှ လေယာဉ်မှူးများကို ပို၍ သဘောကျမိကာ ထိုဘက်မှ လေယာဉ်မှူး အများအပြားမှာ စစ်တပ်မှ လေ့ကျင့်မွေးမြူလာသူများ ဖြစ်ကြပြီး အရေးပေါ် အခြေအနေများနှင့် ရာသီဥတု ဆိုးရွားမှု အများအပြားကို ဖြေရှင်းနိုင်စွမ်း ရှိကြသည်။

ထိုဘက်တွင် မည်မျှလောက်အထိ အင်အားကြီးမားကြောင်းကို အချက်တစ်ချက်တည်းဖြင့် သိရှိနိုင်ပေသည် လွန်ခဲ့သော ဆယ်နှစ်ခန့်က ရုရှားတွင် လေယာဉ်များကို မတ်တပ်ရပ် လိုက်ပါရသည့် လက်မှတ်များပင် ရောင်းချခဲ့သေးသည်။

မမှားပါဘူး လေယာဉ်ပေါ်တွင် မတ်တပ်ရပ် လိုက်ပါရသည့် လက်မှတ်များ မတ်တပ်ရပ် လိုက်ပါရသည့် လက်မှတ်များပင် ရှိနေခဲ့သည်။

သေချာပေါက် ယခုအခါတွင် မရှိတော့သော်လည်း ဤသည်ကပင် ထိုအချိန်က ထွက်ပေါ်လာသော လေယာဉ်မှူးများ၏နည်းပညာမှာ မည်မျှအထိ အင်အားကြီးမား ကြမ်းတမ်းကြောင်းကို လုံလောက်စွာ သက်သေပြနေလေသည်။

ရုရှားသည် ကမ္ဘာပေါ်တွင် Boeingနှင့်Airbusတို့မှလွဲ၍ ကြီးမားသော လေယာဉ်များ တည်ဆောက်နိုင်စွမ်းရှိသည့် တတိယမြောက် နိုင်ငံဖြစ်သည်။ သေချာပေါက်ပင် ယင်းမှာ ယခင် ဆိုဗီယက်၏ နည်းပညာ အများစုကို ဆက်ခံထားသောကြောင့် ဖြစ်သည်။

ထိုစဉ်က ယခင် ဆိုဗီယက်သည် လေကြောင်းပိုင်းတွင် အတော်လေး အင်အားကြီးမားခဲ့သော်လည်း နောက်ပိုင်းတွင် တဖြည်းဖြည်းနှင့် Boeingနှင့် Airbusတို့၏ ဈေးကွက်လုယူမှုကို ခံလိုက်ရပြီး ဈေးကွက် အားလုံးကို လက်လွှတ်လိုက်ရသည်။ ယခုအခါ ရုရှား၏ လေယာဉ်ကြီးများမှာ ယခင် ဆိုဗီယက်နိုင်ငံများ ဖြစ်ကြသော အရှေ့ဥရောပသို့သာ အဓိက တင်ပို့ရောင်းချနေရသည်။

သေချာပေါက် တရုတ်ကလည်း အချို့ကို ဝယ်ယူခဲ့ဖူးပြီး လေယာဉ်ကြီးများ၏ အားသာချက်မှာ ကုန်စည်များ သို့မဟုတ် လူအများအပြားကို အရေးတကြီး သယ်ယူပို့ဆောင်ရန် လိုအပ်သည့် အချိန်မျိုးတွင်သာ သိသာထင်ရှားလာနိုင်ပြီး ပုံမှန် အချိန်များတွင်မူ သဘာဝကျကျ အသုံးမပြုနိုင်ချေ။

တရုတ်က လေယာဉ်ကြီးများ ဝယ်ယူခြင်းမှာလည်း သယ်ယူပို့ဆောင်ရေး အတွက်ပင် ဖြစ်သည်။

သို့သော် ရုရှား၏ လေယာဉ်ကြီးများမှာ ယခင်ဆိုဗီယက်၏ အားနည်းချက်များကိုပါ ဆက်ခံထားခဲ့ရာ ယင်းမှာ စီးပွားရေး တွက်ခြေကိုက်မှုကို ဂရုမစိုက်ဘဲ ကြီးမားမှုကိုသာ အစဉ်တစိုက် အာရုံစိုက်ထားခြင်း ဖြစ်သည်။ စွမ်းအင် သုံးစွဲမှု များပြားခြင်း တည်ဆောက်မှု ကုန်ကျစရိတ် မြင့်မားခြင်း ပြုပြင်ရမည့် အချိန်တိုတောင်းခြင်း အတွင်းပိုင်းတွင် သက်သောင့်သက်သာ မရှိခြင်း အပြင်ပန်းတွင် လှပမှုမရှိခြင်း အီလက်ထရောနစ် ပစ္စည်းများ အနည်းငယ် ညံ့ဖျင်းခြင်း စသည်တို့ကြောင့် ရောင်းအားမှာလည်း အလွန်တရာ ဆိုးရွားလှပေသည်။

သို့သော် ရုရှား၏ လေယာဉ်ကြီးများတွင်လည်း အားသာချက်များ ရှိပေသည် ဥပမာအားဖြင့် အင်ဂျင်၏ ဝန်ထမ်းနိုင်စွမ်း မြင့်မားခြင်း ပစ္စည်း အရည်အသွေး ကောင်းမွန်ခြင်း ခိုင်ခံ့ပြီး တာရှည်ခံခြင်း ပျံသန်းမှု အမြန်နှုန်း ပိုမို မြန်ဆန်နိုင်ခြင်း အလွန်အကျွံ ဝန်ထမ်းနိုင်စွမ်းနှင့် လေထဲတွင် ထိန်းချုပ်မောင်းနှင်နိုင်စွမ်းမှာ ဥရောပနှင့် အမေရိကတို့ထက် သာလွန်ခြင်းတို့ပင် ဖြစ်သည်။

တရုတ်အနေဖြင့် ခရီးတို လေယာဉ်များ၏ နည်းပညာမှာ ယခုအခါ အတော်လေး ကောင်းမွန်နေပြီဖြစ်ကာ ထိုစဉ်က ဖုန်းယွီသည် ယခင်ဆိုဗီယက်ထံမှ ရယူလာခဲ့သော နည်းပညာများကို အပြည့်အဝ နားလည်သဘောပေါက်ထားပြီး ဖြစ်သလို ၎င်းတို့ သုတေသနပြုရန် လေယာဉ်အချို့လည်း ရှိနေသေးသဖြင့် ယခုအခါ တရုတ်၏ ခရီးတို လေယာဉ်များ ယင်းမှာ ပြည်တွင်းဖြစ် Y စီးရီးမှာ အတော်လေး ကောင်းမွန်နေပြီ ဖြစ်သည်။

သို့သော် ခရီးရှည် လေယာဉ်များ ယင်းမှာ လေယာဉ်ကြီးများ အပိုင်းတွင်မူ တရုတ်မှာ မရသေးချေ။

ယခင် ဆိုဗီယက်ဘက်မှ ရရှိထားသော နည်းပညာများ ရှိနေပြီး ထိုဘက်မှ ခေါ်ယူထားသော ကျွမ်းကျင်ပညာရှင် အချို့၏ အကူအညီများ ရှိနေသော်လည်း ယခုနှစ်မှသာ ပထမဆုံးသော ခရီးရှည် လေယာဉ်၏ ထုတ်လုပ်မှု နည်းပညာ ဒီဇိုင်း အစီအစဉ် တစ်ခုလုံးကို သုတေသနပြု၍ အပြီးသတ်နိုင်ခဲ့သည်။

လောလောဆယ်တွင်မှ စတင်တည်ဆောက်နေပြီး လုပ်ငန်းစဉ်အရ ကြည့်မည်ဆိုပါက နှေးကွေးလျှင် လေးငါးနှစ် ကြာပြီးနောက်မှသာ တရားဝင် စမ်းသပ်ပျံသန်းနိုင်မည် ဖြစ်သည်။ သို့သော် ဤအမြန်နှုန်းကပင် ယခင်ဘဝထက် များစွာပိုမိုမြန်ဆန်နေပြီ ဖြစ်သည်။

တကယ်တမ်းတွင် ဤလေယာဉ်မှာ ကြီးမားသော လေယာဉ်များထဲတွင် အကောင်သေးလေး တစ်ခုသာဖြစ်ပြီး ခုံအရေအတွက် တစ်ရာ့ခုနစ်ဆယ်မှ နှစ်ရာ ဝန်းကျင်ခန့်သာ ပါဝင်ကာ ပျံသန်းနိုင်သော အကွာအဝေးမှာ ကီလိုမီတာ လေးထောင်မှ ငါးထောင့်ငါးရာ ဝန်းကျင်ခန့်သာ ရှိပေသည်။

ထို့အပြင် ဤအထဲမှ နည်းပညာ အများအပြားမှာ တရုတ်၏ ကိုယ်ပိုင် နည်းပညာများ ဖြစ်သွားပြီဖြစ်ပြီး ယခင်ကကဲ့သို့ ပြည်ပမှ အင်ဂျင် တွန်းကန်အား စနစ် စသည်တို့ကို တင်သွင်းလာကာ ကိုယ်တိုင် အခွံတစ်ခု ဖန်တီး၍ ကိုယ်ပိုင် သုတေသနပြု တီထွင်ထားသည်ဟု ပြောဆိုနေခြင်းမျိုး မဟုတ်တော့ချေ။

ဤတစ်ကြိမ်တွင်လည်း ပူးပေါင်းဆောင်ရွက်သော ကုမ္ပဏီများ ပါဝင်သော်လည်း တရုတ်၌ အရေးပါသော နည်းပညာ အများအပြားကို ပိုင်ဆိုင်ထားပြီဖြစ်ရာ နိုင်ငံခြား ကုမ္ပဏီများမှာ အမှန်တကယ်ပင် ကူညီပံ့ပိုးပေးရုံ သက်သက်သာ ဖြစ်သွားခဲ့ပြီဖြစ်ပြီး ယင်းတွင် ပြင်သစ်၊ ဂျာမနီနှင့် အမေရိကတို့မှ ကုမ္ပဏီများ ပါဝင်သည်။

မူလက ရုရှားစသည့် အရှေ့ဥရောပမှ နိုင်ငံများက အသင့်တော်ဆုံး ဖြစ်သော်လည်း တရုတ်က ၎င်းတို့နှင့် ပူးပေါင်းဆောင်ရွက်ရန် လုံးဝမရည်ရွယ်ထားချေ။ အကယ်၍ ၎င်းတို့က ဤနည်းပညာမှာ ၎င်းတို့၏ နည်းပညာများနှင့် အလွန်ဆင်တူနေကြောင်းကို တွေ့ရှိသွားပါက မည်သို့ ရှင်းပြမည်နည်း။

ထိုစဉ်က ဖုန်းယွီက ငွေပေးချေထားခဲ့သည် ဆိုသော်လည်း အနည်းနှင့်အများတော့ သိပ်ပြီးဂုဏ်ယူစရာ မကောင်းလှသလို နိုင်ငံနှစ်ခု၏ ဆက်ဆံရေးကိုလည်း အလွယ်တကူ ဆိုးရွားသွားစေနိုင်ပေသည်။

ဤလေယာဉ်မှာ Airbus၏ ခုံအရေအတွက် သုံးရာကျော်ပါဝင်သော ဧရာမ လေယာဉ်ကြီးများနှင့် နှိုင်းယှဉ်ပါက ကြီးမားသော ကွာဟချက် ရှိနေသေးသည်။ ထိုစဉ်က ထိုကဲ့သို့သော အလွန်ကြီးမားသည့် ကုန်တင်လေယာဉ်ကြီး၏ နည်းပညာကို ညီလေးကီ ကိုယ်တိုင်လည်း မရရှိခဲ့ချေ။

သို့သော် ဤတစ်ကြိမ်တွင် နိုင်ငံတော်က ခွန်အား အများအပြား စိုက်ထုတ်ထားပြီး ထုတ်လုပ်ရေးလိုင်း တည်ဆောက်မှု အမြန်နှုန်းက အလွန်တရာ မြန်ဆန်ရုံသာမက စံပြ လေယာဉ် တည်ဆောက်မှုကိုလည်း အလွန်လျင်မြန်စွာ အပြီးသတ်နိုင်ခဲ့သည်။ စံပြလေယာဉ် ထွက်ပေါ်လာပြီးနောက် ပြည်တွင်းရှိ လေကြောင်းကုမ္ပဏီ အများအပြားက ဝယ်ယူခဲ့ကြရုံသာမက ပြည်ပမှ ကုမ္ပဏီအချို့ကလည်း ဝယ်ယူရန် အမှာစာများ တင်ခဲ့ကြသည်။

တရုတ်ထုတ် ထုတ်ကုန်များ၏ ဈေးနှုန်းနှင့် အရည်အသွေး မျှတမှုမှာ အလွန်တရာ ကောင်းမွန်လှပြီး အနည်းဆုံးတော့ Boeing၏ လေယာဉ်များထက် များစွာ တွက်ခြေကိုက်ပေသည်။

ဖုန်းယွီခေတ္တမျှ စဉ်းစားကြည့်လိုက်ရာ လောလောဆယ်တွင် သူ့အနေဖြင့် အသုံးပြုရန် မလိုအပ်သေးဘဲ နိုင်ငံခြားသို့ သွားမည်ဆိုလျှင် သူ၏ ထိုသီးသန့် လေယာဉ်ဖြင့်ပင် လုံလောက်နေပြီ ဖြစ်သည်။ အကယ်၍ လေယာဉ်၏ ပျံသန်းနိုင်စွမ်း မလုံလောက်ပါက လမ်းခုလတ်တွင် ခေတ္တရပ်နား၍ ဆီဖြည့်ခြင်းများ ပြုလုပ်နိုင်သည် မဟုတ်ပါလော။

သို့သော် တရုတ်၏ ထိုလေကြောင်းကုမ္ပဏီများက ဤလေယာဉ်များကို ဝယ်ယူပြီးနောက်တွင် သေချာပေါက် ဖယ်ရှားပစ်မည့် လေယာဉ်ဟောင်း အချို့ ရှိလာမည်ဖြစ်ပြီး ထိုအချိန်သို့ ရောက်လျှင် Fengyu Logistics လုပ်ငန်းက ပြန်လည် ဝယ်ယူနိုင်ပေသည်။

ကမ္ဘာပေါ်ရှိ ကုန်တင်လေယာဉ် အများစုမှာ တစ်ပတ်ရစ် ခရီးသည်တင် လေယာဉ်များကို ပြုပြင်မွမ်းမံထားခြင်းဖြစ်ပြီး စီးပွားရေးအရလည်း အလွန်တွက်ခြေကိုက်ပေသည်။ ထို့အပြင် လေယာဉ် မော်ဒယ် အများအပြားမှာ မူလကတည်းက ကုန်တင်နှင့် ခရီးသည်တင် နှစ်မျိုးလုံးအတွက် အသုံးပြုနိုင်ပေသည်။

နာရီဝက်ခန့် စောင့်ဆိုင်းပြီးနောက် ကီရီလန်ကိုထံမှ ဖုန်းပြန်ဝင်လာခဲ့ပြီး မေးမြန်းလိုက်သည်။ "ဖုန်း လွန်ခဲ့တဲ့ ခုနစ်နှစ်က Tu-204ဆိုရင် အဆင်ပြေမလား အဲဒီလေယာဉ်ကို ပြောတာ"

ကီရီလန်ကို ပြောသော ထိုလေယာဉ်မှာ ထိုစဉ်က ဖုန်းယွီထံ ရောင်းချခဲ့သော ပုံစံကြမ်းရှိသည့် မော်ဒယ်ပင် ဖြစ်သည်။ ဤအရာက ထိုအချိန်က ဆိုဗီယက်၏ ခေတ်အမီဆုံး သယ်ယူပို့ဆောင်ရေး လေယာဉ် မော်ဒယ် မဟုတ်သော်လည်း ကီရီလန်ကို ရရှိနိုင်သမျှထဲတွင် အကောင်းဆုံးပင် ဖြစ်ခဲ့သည်။

ယခုလက်ရှိ တရုတ်၏ ထိုလေယာဉ်မှာ ဤအရာကို အခြေခံ၍ ပြုပြင်မွမ်းမံထားခြင်း ဖြစ်သည်။ အဓိကအားဖြင့် အပြင်ပန်း အသွင်အပြင်နှင့် အတွင်းပိုင်း ဒီဇိုင်းများကို ပြုပြင်မွမ်းမံခဲ့ပြီး လေကြောင်း အီလက်ထရောနစ် ပစ္စည်းများကိုလည်း ပြောင်းလဲခဲ့ကာ ဤလေကြောင်း အီလက်ထရောနစ် ပစ္စည်းများကပင် တရုတ်၏ အများပြည်သူဆိုင်ရာ လုပ်ငန်းစဉ်များကို အဓိက ကြန့်ကြာသွားစေခဲ့ခြင်း ဖြစ်သည်။

အဘယ်ကြောင့်ဆိုသော် ထိုအချိန်က ဤလေကြောင်း အီလက်ထရောနစ် ပစ္စည်းများမှာ အတော်လေး ခေတ်နောက်ကျနေခဲ့ပြီး နောက်ပိုင်းတွင် ရုရှားမှ ထုတ်လုပ်သော Tu-204 များ အားလုံးမှာလည်း နိုင်ငံခြား ကုမ္ပဏီများ၏ လေကြောင်း အီလက်ထရောနစ် ပစ္စည်းများကိုသာ အသုံးပြုထားကြသောကြောင့် ဖြစ်သည်။

တရုတ်သည် ဤအရာကို သုတေသနပြု တီထွင်ရန်အတွက်သာ ကြီးမားလှသော ရန်ပုံငွေအများအပြားကို သုံးစွဲခဲ့ရသော်လည်း ရလဒ်မှာ မဆိုးလှချေ မည်သို့ပင်ဆိုစေ ၎င်းတို့က အခြားသော အပိုင်းများတွင် အချိန်နှင့် ငွေကြေးများစွာကို သက်သာစေခဲ့သည်။ ထို့ကြောင့်သာ ယခုအချိန်တွင် ကမ္ဘာ့အဆင့်မီ အလယ်အလတ်စား ခရီးရှည်လေယာဉ်ကို တည်ဆောက်နိုင်ခဲ့ခြင်း ဖြစ်သည်။

သေချာပေါက် ဤလေကြောင်း အီလက်ထရောနစ် ပစ္စည်းများကို အခြားသော လေယာဉ် မော်ဒယ်များတွင်လည်း အသုံးပြုနိုင်ပေသည်။

လွန်ခဲ့သော ခုနစ်နှစ်က လေယာဉ် ဟုတ်လော။ အဲဒါဆို သိပ်မဟောင်းသေးပါဘူး။ ယခုအခါ ပုံစံသစ် Tu-204 ၏ ရောင်းဈေးမှာ အမေရိကန်ဒေါ်လာ သန်းသုံးဆယ်ကျော်ပင် ရှိရာ ဤအရာကို ငွေဘယ်လောက် ပေးရမည်နည်း။

……

******