အခန်း ၂၂၁၃

အခန်း (၂၂၁၃) မီးဖြင့် တိုက်ခိုက်ခြင်းများ ပြန်လည် ပေါ်ထွက်လာခြင်း

"သွားကြ သံမဏိခံတပ် ထဲကို အရင် ပြန်ဆုတ်ကြမယ်၊ အရာရာတိုင်းကို အရှင် ပြန်လာမှပဲ ဆက်ပြောကြတာပေါ့"

ပါဟရာမ်နှင့် အခြားသူများ အနေဖြင့် ပြည့်နှက်နေသော စစ်မြေပြင်ကြီးကို အမြစ်ပြတ် ဖောက်ထွင်းပြီး သွေးလမ်းကြောင်းတစ်ခုကို အောင်မြင်စွာ ဖွင့်လှစ်ကာ၊ မဟာထန်တပ်စခန်း အတွင်းသို့ အောင်မြင်စွာ ပြန်လည်ရောက်ရှိလာသည်ကို မြင်တွေ့လိုက်ရသည့်အခါ ကျန်းချိုးကျန့်ချုံး၏ ရင်ထဲ၌ ရှည်လျားလှသော သက်ပြင်းကြီး တစ်ခုကို ချလိုက်နိုင်တော့သည်။

"အင်း"

ပါဟရာမ် ဘက်မှလည်း စကားများများ ပြောမနေတော့ဘဲ၊ အန်ဂါရာ သံချပ်ကာမြင်းတပ်များကို ဦးဆောင်ကာ ပွင့်ဟနေသော သံမဏိ တံခါးကြီးရှိရာ အရပ်ဆီသို့ လျင်မြန်စွာ တဟုန်ထိုး ပြေးဝင်သွားတော့သည်။

"ဝုန်း"

ဧရာမ မြို့တံခါးကြီးများမှာ ပွင့်ဟနေခဲ့ပြီး အကျယ်ပြန့်ဆုံးအထိ ဆွဲဖွင့်ထားခဲ့ရာ၊ တပ်ဖွဲ့ကြီးများ တစ်ဖွဲ့ပြီး တစ်ဖွဲ့ အဆက်မပြတ် မြို့ထဲသို့ ဆုတ်ခွာလာခဲ့ကြသည်။ ဆုတ်ခွာနေသည့် ဖြစ်စဉ် အတွင်းမှာပင် လူတိုင်းသည် မြို့ပြင်တွင် ထောင်ချောက်အမြောက်အမြားကို ဆင်ထားခဲ့ရန် လုံးဝမမေ့လျော့ခဲ့ကြပါချေ။

တပ်ဖွဲ့ကြီး၏ ချီတက်မှု အရှိန်မှာ အလွန်ပင် မြန်ဆန်လှသည်။ ခဏတာ အချိန်တိုလေး အတွင်းမှာပင် ကျန်းရှို့ကွေး ဦးဆောင်သော တပ်ဖွဲ့ကြီး ဆုတ်ခွာလာမှုနှင့်အတူ၊ တပ်ဖွဲ့ကြီး တစ်ခုလုံး၏ ၇၀ ရာခိုင်နှုန်းကျော်မှာ သံမဏိမြို့တော်အတွင်းသို့ အောင်မြင်စွာ ပြန်လည်ရောက်ရှိသွားခဲ့ပြီ ဖြစ်သည်။

"လီစီယီနဲ့အခြားသူတွေကို သွားပြောလိုက်စမ်း၊ ချက်ချင်း အနောက်ကို ဆုတ်ခိုင်းလိုက်၊ ထပ်ပြီး အထိအခိုက်ခံလို့ မဖြစ်တော့ဘူး"

ဆုတ်ခွာမှုများ အားလုံးနီးပါး ပြီးဆုံးသွားသည်ကို မြင်တွေ့လိုက်ရသည့်အခါ ကျန်းချိုးကျန့်ချုံးက ရွှယ်ချန်ကျွင်းကို ချက်ချင်း အမိန့်ပေးလိုက်တော့သည်။

ရွှယ်ချန်ကျွင်း၊ ရွှီခဲ့ယီ၊ ကျန်းချွယ်၊ လီစီယီ အစရှိသူများ အားလုံးမှာ ဝမ်ချောင်၏ အယုံကြည်ရဆုံးသော လက်အောက်ငယ်သားများ ဖြစ်ကြရာ၊ ဝူရှန်း သံချပ်ကာမြင်းတပ်များကို ဆုတ်ခွာရန် အကြောင်းကြားရန်အတွက် သူ့ကို သွားခိုင်းခြင်းက အကောင်းဆုံးပင် ဖြစ်ပေသည်။

"ဒါပေမဲ့ ဝမ်ရယ်က ဘယ်လိုလုပ်မလဲ"

ရွှယ်ချန်ကျွင်းက လေးနက်သော အသံဖြင့် ဆိုလိုက်သည်။ မျက်စိရှေ့ရှိ တိုက်ပွဲ ထက်စာလျှင် သူ အမှန်တကယ် စိုးရိမ်ပူပန်နေသည်မှာ ဟင်းလင်းပြင် အချိန်၏အနက်ပိုင်းတွင် ထိုက်ရှီနှင့် အပြင်းအထန် တိုက်ခိုက်နေသော ဝမ်ချောင်ကိုပင် ဖြစ်တော့သည်။

"အချိန် မမီတော့ဘူး၊ သူတို့လို အဆင့်မျိုး ရှိတဲ့ အစွမ်းထက် သိုင်းပညာရှင် တွေက ငါတို့နဲ့ ယှဉ်လို့ ရတဲ့ အဆင့် လုံးဝမဟုတ်တော့ဘူး၊ အကယ်၍ ဝမ်ချောင်တောင်မှ အဲဒီလူကို မကိုင်တွယ်နိုင်ဘူးဆိုရင် ငါတို့က ပိုပြီးတော့တောင် ပြိုင်ဘက် မဟုတ်နိုင်တော့ဘူး၊ ဒီအချက်မှာတော့ ငါတို့က ဝမ်ချောင်ကို ယုံကြည်ဖို့ပဲ ရှိတော့တယ်"

ကျန်းချိုးကျန့်ချုံးက လေးနက်သော အသံဖြင့် ဆိုလိုက်တော့သည်။

စစ်မြေပြင်ပေါ်ရှိ အခြေအနေများမှာ မျက်တောင်တစ်ခတ် အတွင်းမှာပင် အကြိမ်ကြိမ် ပြောင်းလဲနေတတ်သည်။ ယခင်တိုက်ပွဲတွင် မဟာထန်အနေဖြင့် နိုင်ငံအသီးသီး မဟာမိတ်တပ်ဖွဲ့ကို လုံးဝအမြစ်ပြတ် ချေမှုန်းနိုင်ခဲ့ပြီး သူတို့၏အရှိန်အဝါများကို ဖျက်ဆီးပစ်နိုင်ခဲ့သည် ဆိုသော်ငြားလည်း၊ ကျန်းချိုးကျန့်ချုံးက မျက်စိ တစ်ချက် ဝေ့ကြည့်လိုက်ရာ စစ်မြေပြင်ပေါ်တွင် မဟာထန်၏တပ်ဖွဲ့များ အသီးသီး ဆုတ်ခွာသွားမှုနှင့်အတူ၊ မူလက ဖရိုဖရဲ ဖြစ်နေခဲ့သော နိုင်ငံအသီးသီး မဟာမိတ်တပ်ဖွဲ့ မှာ တဖြည်းဖြည်းချင်း ပြန်လည်ကောင်းမွန်လာခဲ့ပြီ ဖြစ်ကြောင်း မြင်တွေ့လိုက်ရတော့သည်။

အကယ်၍ ယခုအချိန်တွင် ထပ်မံ၍မဆုတ်ခွာပါက၊ နိုင်ငံအသီးသီး မဟာမိတ်တပ်ဖွဲ့ နှင့် ရွဲလော့ဟယ်တပ်ဖွဲ့တို့ ပူးပေါင်းကာ တဟုန်ထိုး ပြေးဝင်လာသည့်အခါတွင်၊ ဝူရှန်း သံချပ်ကာမြင်းတပ်များအနေဖြင့် ဆုတ်ခွာချင်လျှင်တောင်မှ ဆုတ်ခွာ၍ ရနိုင်တော့မည် မဟုတ်ပါချေ။

"သူတို့ကို ဆွဲထားကြစမ်း။ လူ ဘယ်လောက်ပဲ သေရ သေရ၊ သူတို့ကို သံမဏိခံတပ်ထဲကို အေးအေးဆေးဆေး ပြန်ဝင်ခွင့် လုံးဝမပေးနဲ့"

ထိုအချိန်မှာပင် ကြီးမားကျယ်ပြန့်ပြီး ပင်လယ်ပြင်ကြီးအလား ဖြစ်နေသော နိုင်ငံအသီးသီး တပ်ဖွဲ့ကြီး အတွင်းမှနေ၍ စူးရှလှသော အော်ဟစ်သံကြီးတစ်ခု ထွက်ပေါ်လာခဲ့သည်။ ချွေချန်းယုံမှာ လူတစ်ရပ်ကျော်ခန့် မြင့်မားသော စစ်မြင်းကြီး တစ်ကောင်ပေါ်တွင် မတ်မတ်ရပ်နေလျက်၊ သူ၏မျက်ဝန်းများမှာ အေးစက်နေခဲ့ပြီး ကောင်းကင်ယံရှိ နေနှင့်လထက်ပင် ပိုမိုတောက်ပလင်းလက်နေတော့သည်။

ထန်လူမျိုးများ ဆုတ်ခွာချင်နေကြကြောင်းနှင့် မြို့ထဲသို့ အဆက်မပြတ် ဆုတ်ခွာနေကြကြောင်းကို ချွေချန်းယုံက ရှင်းလင်းစွာ မြင်တွေ့နေရသည်။ သို့သော် သူသည် အစွမ်းကုန် တားဆီးရန် လုံးဝမကြိုးစားခဲ့ပါချေ။

တစ်ဖက်တွင် ယခင်တိုက်ပွဲတွင် နိုင်ငံအသီးသီး မဟာမိတ်တပ်ဖွဲ့မှာ လုံးဝ ဖရိုဖရဲ ဖြစ်နေခဲ့ပြီ ဖြစ်ရာ စိတ်ဆန္ဒ ရှိသော်လည်း ခွန်အား မရှိသည့်အခြေအနေသို့ ရောက်ရှိနေခဲ့သောကြောင့် ဖြစ်သည်။ အခြားတစ်ဖက်တွင်မူ သူသည် ယခုကဲ့သို့ အခြေအနေမျိုးကို အမြဲတမ်း စောင့်ဆိုင်းနေခဲ့သောကြောင့်ပင် ဖြစ်သည်။

မဟာထန်ဘက်မှ အားအနည်းဆုံးသော တပ်ဖွဲ့များ အားလုံးမှာ ဆုတ်ခွာသွားခဲ့ကြပြီ ဖြစ်သည်။ အနောက်တွင် ကျန်ရစ်နေခဲ့ပြီး ခံစစ် ယူနေသူများ အားလုံးမှာ အထက်တန်းလွှာများ ဖြစ်ကြပြီး အထက်တန်းလွှာများထဲမှ အထက်တန်းလွှာများပင် ဖြစ်သည်။ ယခုအချိန်တွင် တပ်ဖွဲ့ကြီးကို အရှေ့သို့ တဟုန်ထိုး ပြေးဝင်ခိုင်းပြီး သူတို့ကို ဆွဲထားကာ လုံးဝအမြစ်ပြတ် သတ်ဖြတ်ပစ်နိုင်မည်ဆိုပါက၊ ဤစစ်ပွဲကြီးမှာ စောစီးစွာ အောင်မြင်မှု ရရှိသွားသည်နှင့် အတူတူပင် ဖြစ်တော့သည်။

ဝုန်းခနဲ မြည်ဟည်းသံကြီးများနှင့်အတူ ချွေချန်းယုံ၏ အမိန့်အရ ယိုကျိုးဗိုလ်ချုပ်များနှင့်၊ ယိုကျိုး တပ်ဖွဲ့အားလုံး အပါအဝင်မှာ မြစ်ရေလှိုင်းလုံးကြီးများအလား ဘေးနှစ်ဖက်မှနေ၍ ဝူရှန်း သံချပ်ကာမြင်းတပ် များ ရှိရာ အရပ်ဆီသို့ တဟုန်ထိုး ပြေးဝင်သွားကြတော့သည်။

"ကောင်းတယ်"

အခြားတစ်ဖက်တွင်မူ ခီတန်ဘုရင်သည်လည်း သူ၏ရည်ရွယ်ချက်ကို ချက်ချင်း နားလည်သွားခဲ့ပြီး၊ အမိန့်ပေးလိုက်ရာ ခီတန် စစ်သည်များ အားလုံးကို ဦးဆောင်ကာ အော်ဟစ်လျက် အလားတူပင် ရှေ့သို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

"သွားစမ်း"

စကားများများ ပြောမနေတော့ဘဲ ဂိုဂူလျော ဧကရာဇ် ယွန်းဂျယ်စိုးမိုးနှင့် အရှေ့ တာ့ခ် ဧကရာဇ် ဝူဆူမစ်ရှ် ခါဂန်းဟူသော ကုန်းမြေ၏ ဧရာမ အရှင်သခင်ကြီးနှစ်ဦး၏ မျက်ဝန်းထဲ၌ အေးစိမ့်လှသော အလင်းတန်း တစ်ချက် လက်သွားခဲ့ပြီး၊ ချက်ချင်းပင် မိမိတို့၏ တပ်ဖွဲ့ အသီးသီးကို ဦးဆောင်ကာ အလားတူ ပူးပေါင်းလျက် ရှေ့သို့ တဟုန်ထိုး ပြေးဝင် တိုက်ခိုက်လိုက်ကြတော့သည်။

ဤစစ်ပွဲကြီးတွင် အရှေ့ တာ့ခ်ဖြစ်စေ၊ ဂိုဂူလျော အင်ပါယာဖြစ်စေ စစ်သည် အမြောက်အမြား ဆုံးရှုံးသွားခဲ့ရပြီ ဖြစ်သည်။ ဆုံးရှုံးမှု ပမာဏ မှာ တွေးတောရန်ပင် ခက်ခဲလောက်အောင် ကြီးမားလှပေသည်။ ယွန်းဂျယ်စိုးမိုးနှင့် ဝူဆူမစ်ရှ် ခါဂန်း ကိုယ်တိုင်ပင်လျှင် ဂန်ချီ စွမ်းအင် အမြောက်အမြားကို အသုံးပြုခဲ့ရသဖြင့် အရှိန်အဝါများ အလွန်အမင်း အားနည်းနေခဲ့ပြီ ဖြစ်သည်။ သို့သော် သူတို့ နှစ်ဦးစလုံးအနေဖြင့် ဤအရာများကို လုံးဝဂရုစိုက်မနေနိုင်တော့ပါချေ။

"ဒါက ကြုံတောင့်ကြုံခဲ အခွင့်အရေးကောင်းပဲ၊ ဘယ်လိုပဲဖြစ်ဖြစ် မဟာထန်ကို အမြစ်ပြတ် ချေမှုန်းရမယ်"

ဘေးနှစ်ဖက်မှ လေပြင်းများ ပြင်းထန်စွာ တိုက်ခတ်နေခဲ့ပြီး ဝူဆူမစ်ရှ် ခါဂန်းမှာ အရှေ့ တာ့ခ်၏ စစ်မြင်းတစ်ကောင်ကို စီးနင်းလျက် အနောက်သို့ လုံးဝပြန်လည်ဆုတ်ခွာမည် မဟုတ်သော အရှိန်အဝါများဖြင့် ရှေ့သို့ တဟုန်ထိုး ပြေးဝင် တိုက်ခိုက်နေတော့သည်။

အရှေ့ တာ့ခ် မဟာမြက်ခင်းပြင်သို့ ပြန်သွားရန် ဆိုသည်မှာ လုံးဝမဖြစ်နိုင်တော့ပါချေ၊ ထိုနေရာ တစ်ခုလုံးမှာ နှင်းမုန်တိုင်းကြီးများ ဖုံးလွှမ်းနေပြီဖြစ်ရာ ထိုနေရာတွင် နေထိုင်မည်ဆိုပါက သေလမ်းသာ ရှိတော့သည်။

လူတိုင်း သတိပြုမိသည် ဖြစ်စေ သတိမပြုမိသည် ဖြစ်စေ ဤ ဧရာမ နှင်းမုန်တိုင်းကြီးမှာ အရှေ့ တာ့ခ်ကို လုံးဝလမ်းဆုံးသွားစေခဲ့ပြီ ဖြစ်သည်။

ဝူဆူမစ်ရှ် ခါဂန်းအနေဖြင့် လေဟာနယ် အတွင်းရှိ အအေးဒဏ်မှာ ယခင်ကနှင့် နှိုင်းယှဉ်ပါက သိသာစွာ ပိုမိုအေးစက်လာကြောင်းကိုပင် ခံစားသိရှိနိုင်ပေသည်။

ဤသည်မှာ မြောက်ပိုင်းမှ ဧရာမ နှင်းမုန်တိုင်းကြီးမှာ တောင်ဘက်သို့ အဆက်မပြတ် ဆင်းသက်လာနေခြင်းပင် ဖြစ်တော့သည်။

မဟာထန်ကို အမြစ်ပြတ် ချေမှုန်းပြီး အလယ်ပိုင်းဒေသကို သိမ်းပိုက်ခြင်းမှာသာ အရှေ့ တာ့ခ်အတွက် လက်ရှိ တစ်ခုတည်းသော ရှင်သန်နိုင်မည့် လမ်းကြောင်းပင် ဖြစ်တော့သည်။ အနည်းဆုံးတော့ အသက်ရှူပေါက် တစ်ခု ရရှိနိုင်ပေလိမ့်မည်။

ရည်ရွယ်ချက်ကို အောင်မြင်ရန်အတွက် မည်မျှလောက် တန်ဖိုးပေးဆပ်ရမည် ဆိုသည်မှာ ဝူဆူမစ်ရှ် ခါဂန်း၏ စဉ်းစား တွေးတောရမည့် အပိုင်းတွင် လုံးဝ မပါဝင်တော့ပါချေ။

စစ်ပွဲ ဆိုသည်မှာ အသက်စတေးမှုများ ရှိစမြဲ ဖြစ်သည်။

ဤကပ်ဘေးကြီးကို ကျော်လွန်နိုင်သရွေ့ အသက်စတေးမှု မည်မျှပင် ကြီးမားနေပါစေ၊ နောက်ဆုံး အသက်ရှင် ကျန်ရစ်ခဲ့သူများ အားလုံးမှာ မျိုးဆက်ပွားများလာမည်ဖြစ်ပြီး၊ တစ်ချိန်က အလွန် အင်အားကြီးမားခဲ့သော အရှေ့ တာ့ခ် အင်ပါယာ ကြီးကို အသစ်တစ်ဖန် ပြန်လည် တည်ထောင်နိုင်မည် သာ ဖြစ်ပေသည်။

"ထွက်သွားစမ်း"

နိုင်ငံအသီးသီးဘက်မှ လူတိုင်း စိတ်ဓာတ်များ အလွန်အမင်း မြင့်တက်နေကြပြီး တစ်ကြိမ်တည်းသော တိုက်ခိုက်မှုဖြင့် အောင်မြင်မှုအလုံးစုံကို ရယူရန် ကြိုးစားနေကြသည့် အချိန်လေး အတွင်းမှာပင်၊ ရုတ်တရက် ကောင်းကင်ယံမှနေ၍ အလွန်ကျယ်လောင်သော ပြင်းထန်လှသော အော်ဟစ်သံကြီးတစ်ခု ထွက်ပေါ်လာခဲ့သည်။ စကားသံ မဆုံးမီမှာပင် ကြောက်မက်ဖွယ်ကောင်းသော ဂန်ချီ စွမ်းအင်တစ်ခုမှာ ကောင်းကင်ယံမှနေ၍ ဆင်းသက်လာခဲ့ပြီး နိုင်ငံအသီးသီး ၏ တပ်ဖွဲ့ကြီး အတွင်းသို့ ပြင်းထန်စွာ ရိုက်ကျလာတော့သည်။

သနားစရာကောင်းလောက်အောင် အော်ဟစ်သံများကိုသာ ကြားလိုက်ရပြီး၊ ကောင်းကင်မှ ကျလာသော ဂန်ချီ စွမ်းအင်မှာ ဧရာမ ဖရိုဖရဲ ဖြစ်မှုကြီးတစ်ခုကို ဖြစ်ပေါ်စေခဲ့သည်။ မျက်တောင်တစ်ခတ်အတွင်း စစ်မြင်းများ ထိတ်လန့်တကြား ဟီသွားခဲ့ကြပြီး နိုင်ငံအသီးသီး မှ စစ်သည် မည်မျှလောက် အထိ ကောင်းကင်ယံသို့ လွင့်စင်သွားရသည်ကို မည်သူကမျှ မသိရှိနိုင်ပါချေ။

တစ်ကြိမ်တည်းသော တိုက်ခိုက်မှုဖြင့်ပင် နိုင်ငံအသီးသီးမှာ စစ်သည် အနည်းဆုံး ထောင်နှင့်ချီ ဆုံးရှုံးသွားရတော့သည်။

"ယုတ်မာလိုက်တဲ့ကောင် သူပဲ"

အချိန်မလောက်ငှသည့် အခြေအနေတွင် ချွေချန်းယုံက ဇက်ကြိုးကို ရုတ်တရက် ဆွဲလိုက်ရာ ဤတိုက်ခိုက်မှုကို လက်မတင်လေး ရှောင်ရှားနိုင်ခဲ့တော့သည်။

စစ်မြေပြင် တစ်ခုလုံးတွင် ဤကဲ့သို့သော ကြောက်မက်ဖွယ်ကောင်းသည့် တိုက်ခိုက်မှုမျိုးကို ပြုလုပ်နိုင်စွမ်း ရှိသူမှာ လူနှစ်ဦးတည်းသာ ရှိပေသည်။ တစ်ဦးမှာ ထိုက်ရှီဖြစ်ပြီး အခြားတစ်ဦးမှာ ဝမ်ချောင်၏ အစစ်အမှန် ကိုယ်ခန္ဓာပင် ဖြစ်တော့သည်။

"လူတိုင်း အမိန့်ကို နာခံကြ၊ အရှိန်အပြည့်နဲ့ ရှေ့ကို ဆက်တိုးကြစမ်း၊ အနောက်ဆုတ်တဲ့သူ အကုန် သေရမယ်"

ဝူဆူမစ်ရှ် ခါဂန်း၏ အော်ဟစ်သံကြီး မှာ စစ်မြေပြင် တစ်ခုလုံးတွင် ပဲ့တင်ထပ်သွားတော့သည်။

သူ၏ မျက်လုံးများ နီရဲနေခဲ့ပြီး အခြားအရာများကို လုံးဝ ဂရုမစိုက်နိုင်တော့ပါချေ၊ သို့သော် နောက်တစ်ခဏတွင် ပြင်းထန်လှသော ဟင်းလင်းပြင် အချိန် တုန်ခါမှုများ ပါဝင်နေပြီး အလွန်အမင်း ဖိသိပ်ထားသော ဂန်ချီ စွမ်းအင် အလုံးကြီးနှစ်ခုမှာ ကောင်းကင်ယံမှနေ၍ ထပ်မံဆင်းသက်လာပြန်သည်။

ဤတစ်ကြိမ်တွင် ၎င်း၏စွမ်းအားမှာ ပိုမိုကြီးမားလှပေသည်။ ဂန်ချီ စွမ်းအင် ဘောလုံး ကြီးတစ်ခုမှာ ကောင်းကင်ယံမှ ဆင်းသက်လာခဲ့ပြီး အရှေ့ တာ့ခ် တပ်ဖွဲ့ကြီး အတွင်းသို့ ရိုက်ကျသွားရာ ထောင်နှင့်ချီသော အရှေ့ တာ့ခ် သံချပ်ကာမြင်းတပ်များကို ကောင်းကင်ယံသို့ လွင့်စင်သွားစေခဲ့သည်။ အခြားတစ်ခုမှာမူ ရွဲလော့ဟယ်တပ်ဖွဲ့ အတွင်းသို့ ရိုက်ကျသွားခဲ့ရာ၊ ဝုန်းခနဲ မြည်ဟည်းသံကြီး တစ်ခုနှင့်အတူ ရွဲလော့ဟယ်အမြောက်အမြားမှာ မြင့်မားစွာ လွင့်စင်သွားကြပြီး အဝေးသို့ လွင့်ကျသွားကြတော့သည်။

ဤကဲ့သို့ ရုတ်တရက် ပေါ်ထွက်လာသော တိုက်ခိုက်မှု က ရွဲလော့ဟယ်များ၏ တိုက်ခိုက်မှု အရှိန်အဟုန်ကို ချက်ချင်းပင် ဖျက်ဆီးပစ်လိုက်ပြီး ဧရာမ ဖရိုဖရဲဖြစ်မှုကြီးတစ်ခုကို ဖြစ်ပေါ်စေတော့သည်။

အလင်းတန်း တစ်ချက် လက်သွားခဲ့ပြီး ဝမ်ချောင်၏ ပုံရိပ်မှာ အလင်းတန်း တစ်ခုအလား ကောင်းကင်ယံမှ ဆင်းသက်လာခဲ့ပြီး အဝေးဆီရှိ သံမဏိခံတပ်၏ ထိပ်တွင် အောင်မြင်စွာ ရောက်ရှိသွားတော့သည်။

သူ၏ကိုယ်ပေါ်တွင်မူ အနက်ရောင်နှင့် ရွှေရောင် ရောစပ်နေသော သံသရာ သံချပ်ကာ ကို ဆင်မြန်းထားဆဲပင် ဖြစ်သည်။ သို့သော် သူ၏မျက်နှာမှာမူ အနည်းငယ် ဖြူရော်နေကြောင်း သိသာလှပေသည်။

ဟင်းလင်းပြင် အချိန် တုန်ခါမှုများပါဝင်သော ထိုဂန်ချီ စွမ်းအင် အလုံးကြီးသုံးခုမှာ အပြင်ပန်းတွင် ကြည့်လျှင် အလွန်အမင်း အစွမ်းထက်လှသည်ဟု ထင်ရသော်လည်း၊ ၎င်းကို ဖန်တီးရန်အတွက် ကြီးမားကျယ်ပြန့်လှသော စိတ်စွမ်းအင်နှင့် ခွန်အားများကို အသုံးပြုရသည်ဖြစ်ရာ တွေးတောထားသလောက် လွယ်ကူပေါ့ပါးခြင်း လုံးဝ မရှိပါချေ။

ထို့အပြင် ထိုက်ရှီကဲ့သို့သော အစွမ်းထက်သည့် ပြိုင်ဘက်ကို ပထမဆုံး အကြိမ်အဖြစ် တစ်ဦးတည်း ရင်ဆိုင် တိုက်ခိုက်ခဲ့ရခြင်းကြောင့်လည်း ဝမ်ချောင်၏ ဂန်ချီ စွမ်းအင်များမှာ အလွန်အမင်း ကုန်ဆုံးသွားခဲ့ရပြီ ဖြစ်သည်။

"ဆုတ်"

အဝေးဆီတွင် ဝမ်ချောင်၏ ထိုဂန်ချီ စွမ်းအင်အလုံး၏အကူအညီနှင့် ရွဲလော့ဟယ်များ၏ ခဏတာ ဖရိုဖရဲ ဖြစ်သွားမှုကို အခွင့်ကောင်းယူ၍၊ သဘာဝလွန် စွမ်းရည်ပိုင်ရှင် ဗိုလ်ချုပ် လီစီယီက အမိန့်ပေးလိုက်ရာ သူ၏လက်အောက်ရှိ ဝူရှန်း သံချပ်ကာမြင်းတပ် များမှာ လျင်မြန်စွာ ဖောက်ထွက်သွားကြတော့သည်။

"ထွက်ပြေးချင်လို့လား"

အဝေးဆီတွင် အန်းလုရှန်းက ဤမြင်ကွင်းကို မြင်တွေ့လိုက်ရသည့်အခါ မျက်ဝန်းထဲ၌ အေးစိမ့်လှသော အလင်းတန်း တစ်ချက် လက်သွားခဲ့ပြီး၊ ပြည့်နှက်နေသော ရွဲလော့ဟယ်များမှာ လျင်မြန်စွာ အနောက်မှ လိုက်လံ တိုက်ခိုက်လာကြတော့သည်။ သို့သော် ဝုန်း ဝုန်း ဝုန်း ဟူသော အသံများနှင့်အတူ သူတို့ကို ပြန်လည် ကြိုဆိုလိုက်သည်မှာ ပြည့်နှက်နေသော မြားတံ မိုးပေါက်များ ပင် ဖြစ်တော့သည်။

စုဟန်ရှင်းက စစ်ရထားလေး တပ်ဖွဲ့ကို ရှေ့ဆုံးမှ ရွဲလော့ဟယ်များ၏ မြင်းခြေထောက်များကို တိုက်ရိုက်ပစ်မှတ်ထားရန် အမိန့်ပေးလိုက်ရာ၊ ရွဲလော့ဟယ်အမြောက်အမြားမှာ ဟန်ချက်ပျက်သွားကြပြီး မြေပြင်ပေါ်သို့ ပြင်းထန်စွာ လဲကျသွားကြတော့သည်။ အနောက်ဘက်မှ တဟုန်ထိုး ပြေးဝင်လာသော ရွဲလော့ဟယ်များမှာလည်း ရှေ့ဆုံးမှ ရွဲလော့ဟယ်များကို ဝင်တိုက်မိသွားကြပြီး အလားတူ မြေပြင်ပေါ်သို့ လဲကျသွားကြရာ လိုက်လံ တိုက်ခိုက်မှု တစ်ခုလုံးမှာ ချက်ချင်းပင် အရှိန် နှေးကွေးသွားတော့သည်။

"သွားကြ တတိယ အစီအစဉ်ကို အကောင်အထည် ဖော်ကြ၊ မြို့ပြင်မှာ ရှိတဲ့ စစ်ရထားလေးတွေ အကုန်လုံးကို ဖျက်ဆီးပစ်ကြစမ်း"

စုဟန်ရှင်း၏စကားသံ ဆုံးသည်နှင့် တစ်ပြိုင်နက် ဓားရှည်ကို သိမ်းဆည်းလိုက်ပြီး ချက်ချင်း မြင်းပေါ်သို့ ခုန်တက်လိုက်တော့သည်။ သူ၏အနောက်ဘက်တွင်မူ စစ်ရထားလေး တပ်ဖွဲ့မှ စစ်သည်များမှာ အလွန်ကျွမ်းကျင်စွာဖြင့် စစ်ရထားလေး၏ အလယ်ဗဟို နေရာကို အားကုန် ဆွဲလိုက်ကြရာ၊ တဂျွတ်ဂျွတ် မြည်သံများ ဆက်တိုက် ထွက်ပေါ်လာပြီးနောက် သတ္တု အစိတ်အပိုင်းများ ဝင်တိုက်မိသည့်အသံများကို ကြားလိုက်ရသည်။ လုံးဝဖျက်ဆီးပစ်နိုင်စွမ်းရှိသော မဟာထန်၏ စစ်ရထားလေး တစ်စီးမှာ အပြင်ပန်းပုံသဏ္ဌာန် ပြောင်းလဲသွားခြင်းမရှိဘဲ ပစ်ခတ်နိုင်စွမ်း လုံးဝပျောက်ဆုံးသွားတော့သည်။

တတိယ အစီအစဉ်…

ဤသည်မှာ စုဟန်ရှင်း၊ ကျန်းရှို့ကျီ နှင့် အလုပ်သမား ဝန်ကြီးဌာနမှ စစ်ရထားလေး သွန်းလုပ်ရေး တာဝန်ခံ အရာရှိများ အတူတကွ တိုင်ပင် ဆွေးနွေးထားသော အစီအစဉ်တစ်ခု ဖြစ်သည်။ ရည်ရွယ်ချက်မှာ မဟာထန်၏ စစ်ပွဲ အဓိကလက်နက်ကြီးများမှာ အချို့သော အခြေအနေများတွင် ပြိုင်ဘက်၏လက်ထဲသို့ ရောက်ရှိသွားပြီး၊ မဟာထန်ကို ပြန်လည်ဒုက္ခပေးလာမည်ကို ရှောင်ရှားရန် အတွက်ပင် ဖြစ်သည်။

စစ်ရထားလေးများမှာ စစ်မြင်းများနှင့် လုံးဝမတူညီပါချေ၊ လျင်မြန် ဖျတ်လတ်မှုတွင် များစွာကွာဟလှပေသည်။ အကယ်၍ ရန်သူများ ဝိုင်းရံလာပါက သယ်ဆောင်၍ မရနိုင်သော ထိုစစ်ရထားလေးများကို မည်သို့ ကိုင်တွယ်ဖြေရှင်းမည်နည်း ဆိုသည်မှာ စုဟန်ရှင်းအနေဖြင့် ဗိုလ်ချုပ်တစ်ဦး ဖြစ်သည့်အလျောက် မဖြစ်မနေ တွေးတောရမည့် ပြဿနာ တစ်ခုပင် ဖြစ်သည်။ ထို့ကြောင့် တတိယ အစီအစဉ်မှာ ပေါ်ပေါက်လာခဲ့ခြင်း ဖြစ်တော့သည်။

စုဟန်ရှင်းသည် စစ်ရထားလေးများ အားလုံးကို အလုံးစုံ ဖျက်ဆီးပစ်ရန် လုံးဝမကြိုးစားခဲ့ပါချေ။ ၎င်း၏ အလယ်ဗဟိုရှိ အဓိကအစိတ်အပိုင်းကိုသာ ဖျက်ဆီးပစ်ခဲ့ခြင်း ဖြစ်သည်။ ဤသို့ ပြုလုပ်ခြင်းဖြင့် ပြိုင်ဘက်များ စစ်ရထားလေးများကို ရယူနိုင်ခြင်းမှ တားဆီးနိုင်ခဲ့သလို၊ အခြားတစ်ဖက်တွင်လည်း စစ်ပွဲပြီးဆုံးသွားသည့်အခါတွင် မဟာထန်အနေဖြင့် ဤစစ်ရထားလေးများကို သိမ်းဆည်းကာ ပြန်လည်အသုံးပြုနိုင်ဦးမည် ဖြစ်သည်။

"မြင်းပေါ် တက်ကြ၊ အမြန် ထွက်သွားကြစမ်း"

စစ်ရထားလေး တပ်ဖွဲ့တစ်ခုလုံး၊ လူတိုင်း၏အနောက်ဘက်တွင် စစ်မြင်းတစ်ကောင်စီ အသင့်ပြင်ဆင်ထားကြသည်။ စစ်ရထားလေးများကို ဖျက်ဆီးပစ်ပြီးနောက် လူတိုင်းမှာ စစ်မြင်းပေါ်သို့ လျင်မြန်စွာ ခုန်တက်ကြပြီး၊ ပြန်လှည့်မကြည့်တော့ဘဲ သံမဏိခံတပ်၏ မြို့တံခါးဆီသို့ လျင်မြန်စွာ တဟုန်ထိုး ပြေးဝင်သွားကြတော့သည်။

"လိုက်ကြစမ်း"

အဝေးဆီရှိ ဧရာမ စစ်အလံကြီး ခြောက်ခု အောက်တွင် အန်းလုရှန်းမှာ အံကို တင်းတင်းကြိတ်ထားခဲ့ပြီး မျက်နှာအမူအရာမှာ အလွန်ပင် ရက်စက်ကြမ်းတမ်းနေတော့သည်။

အန်းလုရှန်း၏ အမိန့်နှင့်အတူ အနောက်ဘက်ရှိ ရွဲလော့ဟယ်များမှာ လျင်မြန်စွာ နှစ်ဖွဲ့ ခွဲသွားကြပြီး ဘေးနှစ်ဖက်မှနေ၍ လမ်းကြောင်းလွှဲကာ အနောက်မှ လိုက်လံ တိုက်ခိုက်ကြတော့သည်။

ရွဲလော့ဟယ်များ၏ အမြင့်ဆုံးအရှိန် မှာ အခြားသော မည်သည့် သံချပ်ကာမြင်းတပ်များထက်မဆို အဆများစွာ ပိုမိုမြန်ဆန်လှပေသည်။ ဝူရှန်း သံချပ်ကာမြင်းတပ်များ အပါအဝင်ပင် ဖြစ်သည်။ အနောက်မှနေ၍ အဆက်မပြတ် လိုက်လံတိုက်ခိုက်ပြီး လုံးဝအလျှော့မပေးဘူးဆိုပါက သူတို့ကို အမီလိုက်နိုင်ဦးမည်သာ ဖြစ်သည်။

တိုက်ပွဲမှာ ယခုအချိန်အထိ ရောက်ရှိလာခဲ့ပြီ ဖြစ်ရာ ရွဲလော့ဟယ်သုံးသောင်းမှာ အားလုံး ထွက်ပေါ်လာခဲ့ပြီ ဖြစ်သည်။ သိသာထင်ရှားစွာ အသာစီး ရယူထားနိုင်သည့် အခြေအနေမျိုးတွင် ဤအတိုင်း အလွယ်တကူ လက်လွှတ်လိုက်ရန် ဆိုသည်မှာ မည်သို့လျှင် ဖြစ်နိုင်ပါမည်နည်း။

သို့သော် အန်းလုရှန်း၏ဦးနှောက်ထဲ၌ ဤအတွေးလေး ဖြတ်ပြေးသွားပြီး နောက်တစ်ခဏတွင် ထူးဆန်းသော အပြောင်းအလဲ တစ်ခု ပေါ်ထွက်လာတော့သည်။

"ရွှီးးး"

စူးရှလှသော အော်ဟစ်သံကြီးများ နှင့်အတူ ဧရာမ မီးဆီ ဗုံးများမှာ ကောင်းကင်ယံမှနေ၍ တစ်လုံးပြီးတစ်လုံး ဆင်းသက်လာခဲ့ပြီး ရွဲလော့ဟယ်များ၏ ရှေ့တည့်တည့်သို့ ပြင်းထန်စွာ ရိုက်ကျလာတော့သည်။ မျက်တောင်တစ်ခတ်အတွင်း မီးမြားတစ်ချောင်းမှာ အဝေးဆီမှနေ၍ လျှပ်စစ်မီးပွင့်များအလား ပစ်ခတ်လာခဲ့ရာ၊ ခဏတာ အချိန်တိုလေး အတွင်းမှာပင် စစ်မြေပြင်တွင် တောက်ပလှသော မီးပင်လယ်ကြီးတစ်ခု လျင်မြန်စွာ ပေါ်ထွက်လာခဲ့ပြီး၊ မီးတောက်များမှာ ပေ ဆယ်ကျော်ခန့် အမြင့်သို့ တက်လှမ်းသွားခဲ့သည်။ ရွဲလော့ဟယ်ဆယ်ဂဏန်းခန့်ပင်လျှင် တုံ့ပြန်ရန် အချိန်မရလိုက်မီမှာပင် မီးဆီ ဗုံးဖြင့် မှန်ကန်သွားခဲ့ပြီး တစ်ကိုယ်လုံး မီးများ လောင်ကျွမ်းသွားတော့သည်။

"ဟီးးးး"

ကြောက်မက်ဖွယ်ကောင်းသော မြင်းဟီသံကြီးများ အဆက်မပြတ် ထွက်ပေါ်လာခဲ့ပြီး၊ ရွဲလော့ဟယ်အားလုံး စီးနင်းထားသော စစ်မြင်းများမှာ ကပ်ရောဂါဆိုးကြီးတစ်ခုကို ရှောင်ရှားသည့်အလား အနောက်သို့ ဆုတ်ခွာသွားကြတော့သည်။ မြင်းပေါ်ရှိ ရွဲလော့ဟယ်များပင်လျှင် ဤအခိုက်အတန့်၌ ထူးဆန်းစွာဖြင့် ကြောက်ရွံ့နေသည့် အရိပ်အယောင် အချို့ ပေါ်ထွက်လာတော့သည်။

"သူတို့က တကယ်ပဲ မီးကို ကြောက်တာပဲ"

အဝေးဆီရှိ မြင့်မားလှသော မြို့ရိုး ပေါ်တွင် ချန်ပုရန်မှာ သံချပ်ကာကို ဆင်မြန်းထားလျက် အဝေးဆီကို လှမ်းကြည့်နေပြီး၊ လက်ထဲရှိ လေးကြိုးကို ဖြည်းညင်းစွာ ဖြေလျှော့လိုက်ရာ မျက်ဝန်းထဲ၌ အလွန် ဝမ်းသာသွားသော အရိပ်အယောင်အချို့ ပေါ်ထွက်လာတော့သည်။

အနောက်ဘက်ရှိ တပ်ဖွဲ့ကြီးကို မီးဆီဗုံးများ အသုံးပြု၍ တိုက်ခိုက်ရန် အမိန့်ပေးခဲ့ခြင်းမှာ သူ ရုတ်တရက် စဉ်းစားမိသွားသော ဗျူဟာတစ်ခုပင် ဖြစ်သည်။ ရွဲလော့ဟယ်များ၏ သဘာဝမှာ အလွန်အမင်း အေးစက်လှပေရာ သူတို့နှင့် တိုက်ခိုက်သည့်အခါတိုင်း၊ အချိန်တိုင်းတွင် အလွန်အမင်း ဖြူစင်လှသော ရေခဲ စွမ်းအင်များမှာ ကိုယ်တွင်းသို့ စိမ့်ဝင်လာတတ်သည်။ ချန်ပုရန် သည် ဤအချက်ကို အခြေခံ၍ ကျောက်ခဲပစ် စက် တပ်ဖွဲ့ကို ခေါ်ယူလိုက်ခြင်း ပင် ဖြစ်တော့သည်။

ထိုစဉ်က ဉာဏ်အလင်း တစ်ချက် လက်သွားခြင်း သက်သက်သာ ဖြစ်သည်။ သို့သော် ရလဒ်များကို ကြည့်မည်ဆိုပါက ဤမီးဆီ ဗုံးများ၏ အကျိုးသက်ရောက်မှုမှာ တွေးတောထားခဲ့သည်ထက် များစွာ ပိုမို အသုံးဝင်နေတော့သည်။

******