အခန်း ၁၆၅

အခန်း (၁၆၅) စကားတစ်ခွန်းတည်းဖြင့် ပြောရလျှင်.. ကြမ်းတမ်းလွန်းလှသည်

“ရစ်ပတ် နတ်ဘုရားကူကောင် ဝင်ပူးခြင်း... စတင်လိုက်စမ်း”

မျက်စိတစ်မှိတ် အတွင်းမှာပင် လီယွမ်၏ ခန္ဓာကိုယ် အတွင်းရှိ သွေးကြောများ အားလုံး ပွင့်ထွက်သွားသကဲ့သို့ ခံစားလိုက်ရပြီး သွေးများ တဟုန်ထိုး ဆူပွက်လာကာ.. အလွန်တရာ ကြမ်းတမ်း ခက်ထန်သော အခြေအနေ တစ်ရပ်သို့ ရောက်ရှိသွားလေ၏။

ချီသွေးကြော စွမ်းအင်များက မီးတောက်များပမာ လောင်ကျွမ်းနေဆဲ ဖြစ်ပြီး သူ၏ ဆံပင်များ အားလုံးမှာလည်း ထောင်မတ်နေတော့သည်။

သို့သော် ဤတစ်ကြိမ်တွင်မူ ချီသွေးကြော အပေါ် လီယွမ်၏ ထိန်းချုပ်နိုင်စွမ်းက ပိုမို တိကျ သေချာလာခဲ့သည်။

ကြွက်သားများသည် ပထမဆုံး အကြိမ် ဘီလူးဝိညာဉ်ကူကောင်ကို သန့်စင်စဉ်ကကဲ့သို့ အဝတ်အစားများ ပေါက်ပြဲသွားသည်အထိ ဖောင်းပွ တင်းမာမလာတော့ဘဲ... အရိုးနှင့် အသားများကြားတွင် တိတ်တဆိတ် ပုန်းကွယ်နေကာ ပိုမို သိသိသာသာ သိမ်မွေ့လာခဲ့၏။

ဤအရာက သူ့ကို ပိုမို အစွမ်းထက်သော ပေါက်ကွဲမှု စွမ်းအားကို ပေးစွမ်းနိုင်မည် ဖြစ်လေ၏။

အရင်က သွေးတစ်စက်သည် အလွှာ (၁၀) ထပ်ရှိသော စွမ်းအားကို ထုတ်လွှတ်နိုင်ခဲ့သည် ဆိုပါက... ယခုအခါ သွေးတစ်စက်သည် အလွှာ (၁၀၀) ထပ်ရှိသော စွမ်းအားကို ပိုင်ဆိုင်ထား၏။ သွေးတစ်စက်တည်းဖြင့်ပင် တောင်တန်းများနှင့် မြစ်ချောင်းများကို ဖိနှိပ်နိုင်ပြီး... လက်သီး တစ်ချက်.. ခြေကန်ချက် တစ်ချက်ဖြင့် လောကကြီးကို ကိုင်လှုပ်နိုင်စွမ်း ရှိသည်ဟုပင် ဆိုနိုင်သည်။

“ဝုန်း”

လီယွမ်က လက်သီး တစ်ချက် ထိုးချလိုက်၏။

ပင်လယ်ထဲမှ နဂါးတစ်ကောင် ထွက်ပေါ်လာသကဲ့သို့ အလွန်တရာ ကြောက်မက်ဖွယ် ကောင်းလှသော သွေးရောင် စွမ်းအင်လှိုင်းလုံးကြီး တစ်ခုက ဟိန်းဟောက် ထွက်ပေါ်လာပြီး... ဝါးတောထဲရှိ မရေမတွက်နိုင်သော သိုင်းပညာရှင် ရုပ်သေးရုပ်များ အပေါ်သို့ ကျရောက်သွားတော့သည်။

ဤရုပ်သေးရုပ်တို့မှာ ထူးခြားသော သတ္တုတစ်မျိုးဖြင့် ပြုလုပ်ထားပြီး အလွန် မာကျောကာ ဓားနတ်သမီး ဓားသိုင်း လေ့ကျင့်ရန်အတွက် အသုံးပြုလေ့ ရှိသည်။

ထိုအခိုက်အတန့်တွင် ထူးခြားသော သတ္တု ရုပ်သေးရုပ်တို့မှာ တို့ဟူးတုံးများကဲ့သို့ ကြေမွ ပေါက်ကွဲသွားတော့သည်။

“ကြမ်းလိုက်တာ.. သိပ်မိုက်တာပဲ”

လီယွမ်က မနေနိုင်ဘဲ လွှတ်ခနဲ အော်ဟစ်လိုက်မိလေ၏။

ရစ်ပတ် နတ်ဘုရားကူကောင်တွင်လည်း ဘီလူးဝိညာဉ်ကူကောင် ကဲ့သို့သော ဘေးထွက်ဆိုးကျိုးများ ရှိနေသည်မှာ ထင်ရှားသည်။ ချီသွေးကြော စွမ်းအင်က အထွတ်အထိပ်သို့ ရောက်ရှိသွားချိန်တွင် ဆင်ခြင်တုံတရားက ကျဆင်းသွားပြီး တိုက်ခိုက်လိုသော စိတ်က တိတ်တဆိတ် လွှမ်းမိုးလာတော့သည်။

“ဓားနတ်သမီး.. ငါ့ကို ခုတ်”

တိုက်ခိုက်ဖော် မရှိသောကြောင့် လီယွမ်သည် ပို၍ အန္တရာယ်များသော ကစားနည်း တစ်ခုကို စမ်းသပ်ကြည့်ချင်လာခဲ့သည်။ ရစ်ပတ် နတ်ဘုရားကူကောင်သည် သွေးစွန်းနေသော အခြေအနေတွင် မည်မျှလောက် အစွမ်းထက်သည့် တိုက်ခိုက်ရေး စွမ်းအားကို ထုတ်လွှတ်နိုင်မည်နည်း။

ဓားနတ်သမီးက ငြိမ်သက်စွာ ရပ်နေလေ၏။

“မင်းက ငါ့ကို မခုတ်ရက်လို့လား”

လီယွမ်က ခေတ္တမျှ တွေးတောလိုက်ပြီးနောက် သူ၏ အင်္ကျီကို ဆွဲဖြဲလိုက်ရာ... အလွန် ရှင်းလင်းပြတ်သားသော ကြွက်သား လိုင်းများကို မြင်တွေ့လိုက်ရပြီး ရစ်ပတ် နတ်ဘုရားကူကောင်သည် သူ၏ ဘယ်ဘက် ပခုံးပေါ်တွင် နေရာယူထားသည်။

၎င်းသည် လီယွမ်နှင့် တစ်သားတည်း ဖြစ်သွားပြီး တက်တူးတစ်ခုပမာ အလွန်တရာ ကြမ်းတမ်း ခက်ထန်သော အသွင်အပြင်ကို ဆောင်နေတော့၏။

လီယွမ်က သူ၏ ဘယ်ဘက် ပခုံးကို လက်ညှိုးထိုးပြလိုက်၏။

“ငါ့ကို မခုတ်နဲ့... အဲ့ဒီအကောင်ကို ခုတ်... လာစမ်းပါ”

“ဝှီး”

လီယွမ် စကားပြောပြီးသည်နှင့် တစ်ပြိုင်နက် ဓားနတ်သမီး လှုပ်ရှားသွားပြီး မျက်စိတစ်မှိတ် အတွင်းမှာပင် ထိုနေရာမှ ပျောက်ကွယ်သွားတော့သည်။

“အရမ်း မြန်တာပဲ”

လီယွမ်၏ မျက်လုံးများ ကျဉ်းမြောင်းသွားပြီး မသိစိတ်၏ စေ့ဆော်မှုအရ မြေပြင်ကို ဆောင့်ကန်ကာ အနောက်သို့ လျင်မြန်စွာ ဆုတ်ခွာလိုက်လေ၏။ ထိုသို့ ဆုတ်ခွာလိုက်သော်လည်း သူ၏ အမြန်နှုန်းက ဓားနတ်သမီးကို မမီသေးချေ။

သူ၏ မွေးရာပါ အလိုအလျောက် သိစိတ်ဖြင့် လှည့်စားခြင်းကို အသုံးပြုလိုက်မှသာ ဘာတွေ ဖြစ်ပျက်နေသည်ကို သဘောပေါက်သွားပြီး ရစ်ပတ် နတ်ဘုရားကူကောင်ကို နေရာ ရွှေ့ပြောင်းလိုက်တော့သည်။

“ဖတ်”

အေးစက်သော အလင်းရောင် တစ်ချက် လက်သွားပြီး ဓားနတ်သမီးသည် ဓားတစ်ချက်တည်းဖြင့် လီယွမ်၏ ဘယ်ဘက် ပခုံးကို ထိုးဖောက် ဝင်ရောက်သွားလေ၏။

“အား”

ပြင်းထန်လှသော နာကျင်မှုကြောင့် လီယွမ်မှာ ဟိန်းဟောက်လိုက်မိ၏။ ထိုအသံမှာ နာကျင်မှုကြောင့် အော်ဟစ်ခြင်း မဟုတ်ဘဲ သွေးဆာနေသော စိတ်လှုပ်ရှားမှုနှင့် တားဆီးမရနိုင်သော တိုက်ခိုက်လိုစိတ်များ ပြည့်နှက်နေသည့် အော်သံပင် ဖြစ်သည်။

ဒဏ်ရာရပြီးနောက် သွေးဆာလာခြင်းက သူ၏ စိတ်နှင့် ခန္ဓာကိုယ်ကို ပိုမို ပေါင်းစပ်သွားစေပြီး စွမ်းအားများမှာ အဆက်မပြတ် ကြီးထွားလာနေကြောင်း သူ ရှင်းလင်းစွာ ခံစားသိရှိနေပေ၏။

သို့သော်လည်း ဤအခြေအနေတွင် ခန္ဓာကိုယ်၏ စွမ်းအင် ကုန်ဆုံးမှုမှာလည်း အလွန် မြန်ဆန်လှသည်။

စစ်ပွဲဖြင့်သာ မိမိကိုယ်ကို ထိန်းသိမ်းထားရမည် ဖြစ်ပြီး... ခွန်အား ပြန်လည် ပြည့်ဝရန်အတွက် အခြားသူများထံမှ သွေးများကို အဆက်မပြတ် စုပ်ယူနေရလေမည်။ ထိုသို့ မဟုတ်ပါက အဆက်မပြတ် ကြီးထွားနေသော စွမ်းအားများ အောက်တွင် ကိုယ်တိုင် ပြန်လည် ညှိုးနွမ်း သေဆုံးသွားရပေမည်။

“ကောင်းကင်တုန်ခါ နတ်လက်သီး”

လီယွမ်က သူ၏ ‘ဘိုးဘေး လျှို့ဝှက်နည်းစနစ်’ ကို အသုံးပြုကာ ဓားနတ်သမီးထံသို့ ထိုးနှက်လိုက်လေ၏။

“ချွင်”

ဓားနတ်သမီး၏ နတ်ဘုရားဓား နှင်းပွင့်ကြွေဓားမှာ တုန်ခါသွားပြီး ဓားသွားပေါ်တွင် နှင်းခဲများ ဖုံးလွှမ်းသွားတော့သည်။ ထို့နောက် နေရာ ရွှေ့ပြောင်းသွားသော ရစ်ပတ် နတ်ဘုရားကူကောင်ကို တည့်တည့် ချိန်ရွယ်ကာ နောက်ထပ် ဓားတစ်ချက် ခုတ်ပိုင်းလိုက်ပြန်သည်။

“ဖတ်”

လျင်မြန်လှသော ဓားချီ စွမ်းအင်များက တိုက်ရိုက် ထိုးဖောက် ဝင်ရောက်လာပြီး လီယွမ်၏ လက်သီးကို ဖုံးလွှမ်းထားသည့် သွေးစွန်းနေသော အဝတ်အစား အလွှာများကို မျက်စိတစ်မှိတ် အတွင်းမှာပင် ဖျက်ဆီးပစ်လိုက်ကာ လက်ဆစ်များထဲသို့ စိုက်ဝင်သွားတော့၏။

“အား”

လီယွမ်မှာ နောက်တစ်ကြိမ် သွေးစွန်းသွားရပြန်သည်။

သူ၏ စွမ်းအားများက တစ်ချိန်တည်းမှာပင် တဟုန်ထိုး ဆူပွက်လာပြီး နောက်ထပ် လက်သီး တစ်ချက်ကို ထိုးချလိုက်ရာ... ကြီးမားလှသော သွေးရောင် စွမ်းအင်လှိုင်းလုံးကြီးများက တဝုန်းဝုန်း မြည်ဟည်း ထွက်ပေါ်လာသဖြင့် ဓားနတ်သမီးမှာ သူမ၏ ဓားဖြင့် ပြန်လည် ခုခံလိုက်ရသည်။

အခွင့်အရေးကို အသုံးချကာ လီယွမ်သည် ဆာလောင်နေသော ကျားတစ်ကောင်ပမာ သားကောင်ဆီသို့ ခုန်အုပ်လိုက်ပြီး လက်သီးချက်ပေါင်း များစွာကို ဆက်တိုက် ထိုးနှက်လိုက်တော့၏။

“ချွင်... ချွင်... ချွင်”

လက်သီးနှင့် ဓားတို့ ထိပ်တိုက် တွေ့ဆုံမှုတိုင်းတွင် လီယွမ်မှာ ပို၍ ကြမ်းတမ်းလာပြီး... သူ၏ မျက်လုံးများမှာ သွေးများဖြင့် ရဲရဲနီလာကာ မျက်လုံးအိမ်ထဲမှ သွေးပန်းရေပမ်းကြီး တစ်ခု ပန်းထွက်နေသကဲ့သို့ ဖြစ်နေပြီး မျက်လုံးထောင့်များမှလည်း ရှည်လျားသော သွေးကြောင်းများ ရံဖန်ရံခါ ကျဆင်းလာတော့သည်။

ဓားနတ်သမီး၏ မျက်လုံးများမှာမူ လောကီ အညစ်အကြေးများ ကင်းစင်နေပြီး ကြည်လင် တောက်ပနေဆဲ ဖြစ်သော်ငြားလည်း သူမ၏ ဓားချက် တစ်ချက်ချင်းစီတိုင်းမှာ ပို၍ ရက်စက် ကြမ်းကြုတ်လာလေ၏။

တိုက်ကွက်ပေါင်း ဆယ်ကျော် ဖလှယ်ပြီးနောက်...

လီယွမ်၏ စွမ်းအားများမှာ ဓားနတ်သမီး၏ အရှိန်အဟုန်ကို တဖြည်းဖြည်း ဖိနှိပ်နိုင်သည့် အဆင့်အထိ ကြီးထွားလာခဲ့ပြီ ဖြစ်ပြီး... ကြမ်းတမ်းသော ခွန်အားဖြင့် ကျွမ်းကျင်မှုကို အနိုင်ယူနိုင်သည့် အဆင့်သို့ ရောက်ရှိနေ၏။

သို့သော်လည်း...

ဓားနတ်သမီးမှာ အနည်းငယ် တုန်လှုပ်သွားလေ၏။

နှင်းပွင့်ကြွေဓား နတ်ဘုရားဓားထံမှ ပိုမို အစွမ်းထက်သော ဓားဆန္ဒများ တဟုန်ထိုး ထွက်ပေါ်လာပြီး... လောကကြီး တစ်ခုလုံး အရောင် ပြောင်းသွားကာ လျှပ်စီးများ လက်ပြီး မိုးခြိမ်းသံများ ထွက်ပေါ်လာကာ ကောင်းကင် ဖြစ်စဉ်များကိုပါ တဖြည်းဖြည်း လွှမ်းမိုးလာတော့သည်။

“တော်ပြီ... တော်ပြီ”

လီယွမ်က ရစ်ပတ် နတ်ဘုရားကူကောင်၏ တိုက်ခိုက်လိုစိတ်ကို အမြန် ဖိနှိပ်လိုက်သည်။

“ငါတို့က မိသားစုဝင်တွေပဲ... ဒီမှာတင် ရပ်လိုက်ကြရအောင်.. အချင်းချင်း မထိခိုက်ကြေးလေ”

ရစ်ပတ် နတ်ဘုရားကူကောင်၏ ဝင်ပူးခြင်းကို ရပ်တန့်လိုက်လေ၏။

နက်ရှိုင်းလှသော ဟာတာတာ ခံစားချက်ကြီး တစ်ခုက တဟုန်ထိုး ဝင်ရောက်လာပြီး လီယွမ်မှာ မြေပြင်ပေါ်တွင် ပက်လက်လှန်ကာ အသက်ကို ပြင်းပြင်း ရှူနေရတော့သည်။

ဓားနတ်သမီးကလည်း သူ့ကို အတုခိုးကာ မြေပြင်ပေါ်တွင် လှဲချလိုက်ပြီး ဘီးတစ်ဘီးလို လိမ့်သွားကာ လီယွမ်၏ ညာဘက်ဘေးတွင် ရပ်တန့်သွားလေ၏။

ဒါက သူမ အိပ်စက်လေ့ရှိသော နေရာပင် ဖြစ်သည်။

ထိုညကစပြီး ရှောင်ချိုက်က ဘယ်ဘက်.. ဝူမေ့က အလယ်.. ဓားနတ်သမီးက ညာဘက်တွင် အိပ်စက်လေ့ ရှိကြပြီး မခွဲမခွာနိုင်သော သုံးပွင့်ဆိုင် အဖွဲ့လေး တစ်ခု ဖြစ်လာခဲ့ကြ၏။

သူမက လီယွမ်ကို ကြည်လင်သော မျက်လုံးများဖြင့် အတန်ကြာ စိုက်ကြည့်နေပြီးနောက်... လက်ညှိုးလေး တစ်ချောင်းကို ထုတ်ကာ လီယွမ်၏ ဘယ်ဘက် ပခုံးကို လာထိုးလိုက်လေရာ သူမ၏ ခေါင်းပေါ်တွင် မေးခွန်းထုတ်စရာ သင်္ကေတလေး တစ်ခု ပေါ်လာသကဲ့သို့ပင်။

‘ဟင်.. ဘယ်လိုဖြစ်ပြီး ဒီလို ဖြစ်သွားတာလဲ’ ဟု မေးနေသည့် အတိုင်းပင်။

ဓားနတ်သမီး၏ ဖြူစင် ရိုးသားလှသော မျက်လုံးလေးများနှင့် ရင်သပ်ရှုမောဖွယ် ကောင်းလှသော မျက်နှာလေးကို ကြည့်ရင်း လီယွမ်မှာ ဒဏ်ရာများ လုံးဝ သက်သာ ပျောက်ကင်းသွားသလို ခံစားလိုက်ရတော့သည်။

လှပသော လူများနှင့် အရာဝတ္ထုများသည် အမြဲတမ်း ပျော်ရွှင်မှုကို ယူဆောင်လာပေးနိုင်စွမ်း ရှိသည်။

ခေတ္တမျှ အနားယူပြီးနောက် သူသည် ပြန်လည် ထိုင်လိုက်ပြီး ရစ်ပတ် နတ်ဘုရားကူကောင်၏ နောက်ဆုံး စွမ်းရည် တစ်ခု ဖြစ်သော.. အရန်ကူကောင်များကို ပြုစားခြင်း စွမ်းရည်ကို စမ်းသပ်ကြည့်တော့သည်။

ပေါက်ကွဲကူကောင် (၁၀၀,၀၀၀) ကို အသုံးပြုပြီးကတည်းက လီယွမ်သည် သူ့အတွက် နောက်ထပ် အားသာချက် တစ်ခုကို မည်သို့ ဖန်တီးရမည်နည်းဟု အမြဲတမ်း တွေးတောနေခဲ့သည်။

အရန်ကူကောင်များ၏ အစွမ်းအစ အားလုံးကို အပြည့်အဝ ထုတ်ဖော် အသုံးချရမည်။

ယခင်က အရန်ကူကောင်များမှာ အလွန် အားနည်းလွန်းပြီး တိုက်ပွဲ အတွင်းရှိ နောက်ဆက်တွဲ ဂယက်များကြောင့် အလွယ်တကူ သေဆုံးသွားနိုင်သဖြင့်.. အဓိက အခန်းကဏ္ဍမှ ပါဝင်နိုင်ရန် အလွန် ခက်ခဲလှ၏။

အချိန်အများစုတွင် သူတို့သည် ပင်မကူကောင်အတွက် အထောက်အကူပြု အခန်းကဏ္ဍမှသာ ပါဝင်နိုင်ပြီး အဆင့်တူ အခြေအနေမျိုးတွင် ရန်သူကို အနိုင်ယူနိုင်စွမ်း မရှိကြချေ။

ရစ်ပတ် နတ်ဘုရားကူကောင်သည် အရန်ကူကောင်များကို သွေးတစ်လွှာဖြင့် ဖုံးအုပ်ပေးနိုင်ပြီး အရန်ကူကောင်များ၏ အသက်ရှင်သန်နိုင်စွမ်းကို အဆမတန် မြှင့်တင်ပေးနိုင်လေ၏။ သေချာ ဂရုတစိုက် လေ့လာကြည့်မည် ဆိုပါက ဒါက အလွန်တရာ အစွမ်းထက်သော လက်နက် တစ်ခု ဖြစ်လာမည်မှာ သေချာလှသည်။

သူ အားနည်းစဉ်က မကြာခဏ အသုံးပြုခဲ့သော ကူကောင်များသည် နောက်တစ်ကြိမ် ပြန်လည် ထွက်ပေါ်လာနိုင်ပြီ ဖြစ်သည်။

အထူးသဖြင့် ပေါက်ကွဲကူကောင်.. ဓားကူကောင်နှင့် ဓားသိုင်းကူကောင် ကဲ့သို့သော တိုက်ခိုက်ရေး အမျိုးအစား ကူကောင်များပင် ဖြစ်လေ၏။

အကယ်၍ သူသည် ထျန်းဝေ့ထျန်းမှ သိုင်းသူတော်စင်ကြီးနှင့် နောက်တစ်ကြိမ် ထပ်မံ တိုက်ခိုက်ရမည် ဆိုပါက... ပေါက်ကွဲကူကောင်များ ထွက်ပေါ်လာသည်နှင့် တစ်ပြိုင်နက် သိုင်းသူတော်စင်၏ ဖိနှိပ်မှုကို လုံးဝ ခံရမည်ကို စိုးရိမ်နေစရာ မလိုတော့သလို ချက်ချင်း ဖောက်ခွဲပစ်စရာလည်း မလိုတော့ပေ။

အနည်းငယ် လမ်းပြပေးလိုက်ရုံဖြင့် သိုင်းသူတော်စင်ကြီး ပန်ရှန်းကို ပေါက်ကွဲမှု၏ ဗဟိုချက်ဆီသို့ လှည့်စား ခေါ်ဆောင်သွားနိုင်စွမ်း ရှိနေပြီ ဖြစ်သည်။

တိုက်ပွဲ၏ ရလဒ်မှာ လုံးဝ ပြောင်းပြန် ဖြစ်သွားနိုင်သည်။

“နှမြောစရာပဲ”

လီယွမ်က သက်ပြင်းချလိုက်၏။ သူသည် သိုင်းသူတော်စင်ကြီးနှင့် နောက်တစ်ကြိမ် ထပ်မံ တိုက်ခိုက်ရန် ထျန်းဝေ့ထျန်းဆီသို့ ပြေးသွားရန် မဖြစ်နိုင်ကြောင်း သဘောပေါက်လိုက်ပြီး... ဝါးတောငယ်လေးထဲမှပင် လုံးဝ မထွက်ခွာချင်တော့ချေ။

“အခု ငါ့ရဲ့ တိုက်ခိုက်ရေး စွမ်းအားက မဟာသိုင်းသူတော်စင် တစ်ယောက်နဲ့ ထိပ်တိုက် ရင်ဆိုင်နိုင်တဲ့ အဆင့်လောက်တော့ ရှိနေပြီ... အကယ်၍ အထွတ်အထိပ် သိုင်းသူတော်စင် တစ်ယောက်နဲ့သာ ထိပ်တိုက် တွေ့မယ်ဆိုရင် အဲ့ဒီ နယ်ပယ်က အရမ်းကို ကြောက်စရာ ကောင်းလွန်းတော့ ငါက သူ့ရဲ့ ပြိုင်ဘက် ဖြစ်လာမှာ မဟုတ်ဘူး... အရမ်းကို အန္တရာယ်များတယ်”

“ငါသာ အဋ္ဌမအဆင့် နယ်ပယ်ကို ရောက်သွားပြီး.. ပက်ကျိရဲ့ ဆန်းကြယ် ပုံရိပ်ကူ နယ်ပယ်ကို ပိုမို ဖွံ့ဖြိုးလာအောင် လုပ်နိုင်မယ်ဆိုရင်.. ပြီးတော့ ကူအိမ် နှစ်ခုရဲ့ ကောင်းကင် ဖြစ်စဉ်တွေကိုပါ နားလည် သဘောပေါက်သွားမယ် ဆိုရင် ဘာကိုမှ ကြောက်နေစရာ မလိုတော့ဘူး... အနိုင်မရရင်တောင် အထိအခိုက် မရှိဘဲ ဆုတ်ခွာနိုင်လိမ့်မယ်”

“တတိယမြောက် ကူအိမ်ကိုပါ တည်ဆောက်နိုင်မယ် ဆိုရင်တော့... သိုင်းသူတော်စင်ကြီး တစ်ယောက်ကို ယှဉ်ပြိုင်ဖို့ ဆိုတာ မဖြစ်နိုင်တဲ့ ကိစ္စ မဟုတ်တော့ဘူး”

လီယွမ်က တွက်ချက်လိုက်လေ၏။

သူ၏ စိတ်အာရုံ စွမ်းအား နယ်ပယ်သည် ပြီးပြည့်စုံခြင်း နယ်ပယ်သို့ ရောက်ရှိနေသည်မှာ အချိန်အတန်ကြာပြီ ဖြစ်ပြီး... ဘီလူးဝိညာဉ်ကူကောင်မှာလည်း ရစ်ပတ် နတ်ဘုရားကူကောင်၏ အစောပိုင်း တိုက်ခိုက်ရေး အဖော်များထဲမှ တစ်ကောင် ဖြစ်သည်။ သူတို့ အချင်းချင်း စကားများများစားစား မပြောဆိုကြသော်လည်း... သူတို့၏ ပူးပေါင်း လုပ်ဆောင်မှုမှာ လုံးဝကို ချောမွေ့နေပြီး တစ်ယောက်ကို တစ်ယောက် အပြည့်အဝ နားလည် သဘောပေါက်နေကြလေ၏။

‘နှလုံးသားချင်း ပဲ့တင်ထပ်မှု’ အဆင့်သို့ ရောက်ရှိခြင်းမှာ ကူအိမ် တစ်ခု တည်ဆောက်ရန်အတွက် မရှိမဖြစ် လိုအပ်သော ကြိုတင် သတ်မှတ်ချက် တစ်ခုပင် ဖြစ်သည်။

ထူးခြားကူကောင်ကို ဗဟိုပြုကာ ကူအိမ် တစ်ခု တည်ဆောက်ခြင်း.. အထူးသဖြင့် ထူးခြားကူကောင် စာရင်းတွင် နံပါတ် (၄) နေရာ၌ ရပ်တည်နေသော ရစ်ပတ် နတ်ဘုရားကူကောင်ကို အသုံးပြုခြင်းသည် သေချာပေါက် အရည်အသွေးပိုင်း ဆိုင်ရာ ကြီးမားသော ခုန်ပျံကျော်လွှားမှု တစ်ရပ် ဖြစ်လာမည်သာတည်း။

“ရစ်ပတ် နတ်ဘုရား.. ငါတို့ စမ်းကြည့်ကြမလား”

လီယွမ်က မေးလိုက်၏။

ထပ်မံ ရှင်းပြနေစရာပင် မလိုတော့ချေ... ရစ်ပတ် နတ်ဘုရားကူကောင်က ချက်ချင်း သဘောတူလိုက်သည်။

‘ယောကျာ်းတွေဆိုတာ တိုက်ခိုက်ရမယ်လေ.. တိုက်ပွဲအတွက် အကျိုးရှိမယ့် အရာအားလုံးပေါ့’

“ကောင်းပြီ”

လီယွမ်သည် တုံ့ဆိုင်းမနေတော့ဘဲ ချက်ချင်း စမ်းသပ်ကြည့်တော့သည်။

Book 14 end.